Tuni sunma dak 11 in Y.Ibochou singh senior manager United Bank of India(UBI) makaih in district hospital a ATM booth di abol uh etkhiak na hong nei uhi. Hiai ATM machine koih na ding ahihleh District Hospital in RKS fund tung ton a abawl hi a, tunung sawt lou in hiai ATM booth ah van zat ding chituam tuam te thuah pah hi ding a, azat theih taktak na ding in kha khat val zek lut lai ding hiin gen uhi. Hiai ATM zat theih ahong hih hun chiang in damlou ompih te ading in zang khai tuan mahmah ding a, huai ban ah, zat theih a honghih pah a deih thu uh mi tamtak in gen uhi.
Xxxxx
Special Summery Revision of Electoral Roll-2017 toh kisai, Distirct sung a Assembly Constituency 6 a Party tuamtuam a BLO Supervisor, Booth Level Officer leh Booth Level Agents ten training a neih zoh u toh kiton in amau bial sung chiat ah special summery revision pan uhi. Tunin Dorcas Veng, New Lamka ah BLO ten revision nei ua, huai ah, min diklou te bawl dik in, tukum a kum 18 ching a electoral roll a min om kha nai loute a khum ban uah, paih ding om te paihna nei uhi. Hiai Special Summery Revision of Electoral Roll-2017 ahihleh pai tou zel lai ding a, kum 18 apan a tung lam ten poimoh ngaih a en chian a, min diklou bang leng om thei ahihna ah, ngaihven chiat poimoh ding hi. Huai lou in state in apaisa September 7, 2016 in latest electoral roll te mipi et theih ding in suahkhia ua, tua special summery revision a neih pen uh, January 2, 2017 in taak khe nawn ding uhi.
Xxxxx
Tuni sunnung dak 12:30 vel in United Nation International Children Emergency Fund, (UNICEF) apan Dr. Sonal, Child health, UNICEF, Consultant, Gauhati leh Narendra, UNICEF Consultant, Gauhati te makaih in District Hospital a Children Ward ding kibawl thak et khiakna hong nei uhi. Hiai hun ah, state apan, Rajeev Irengbam, State Programme Manager, NHM Manipur leh Dr. Dinesh, Nodal Officer, Child Health, NHM/ Imphal ten zui in District hospital a Medical Supreintendent, Dr. J. Songoukham Samte, leh Dr. Zarzou, Padeatrician te makaih in Sick New Born Care Unit, SNBCU, Skill Laboratory leh Model Labour room te et khiakna nei uhi. Thutut kingah dan in, tuni a hongpai official ten, district hospital campus sung a ward tuamtuam ban ah, AR.T centre tanpha et khiakna nei ua, huai ah, a diak a amau funding, ART centre, te nnaasep dan toh kisai lungtung lou uh hidan in gen uhi. Huai ban ah, SNBCU ahihleh a nnasep zoh hi nai lou a, hiaai pen leng a nnasep na uh ze-ol/zekai sa mahmah uh hidan a gen in, Model Labour Room / AC Labour room pen ahihelh AC kipahpih mahmah uh hidanin gen uhi.
Xxxxx
Govt. of Manipur, Veterinary Dept. nuai a post awng tuamtuam laak na ding toh kisai zan, September 21 a registration hun a bei toh kiton in post tuamtuam a ding, a kigawm in mi 193 ten employment exchange ah registration bawl uhi. Veterinary Dept. nuai a post awng tuamtuam leh applicant om dan ahihleh, Veterinary Field Assistant ah mi 53, LDC cum Computer operator ah mi 132, Milk Recorder ah mi 1 leh Lab Assistant a ding in mi 7 ten registration bawl ua, Education(s) department nuai a MTS Grade-D a ding in mi 95 in registration bawl uhi. Huai lou in Directorate of Sericulture, GoM nuai a post awng tuamtuam leh Directorate of AYUSH, Lamphelpat a Driver leh Peon laak na ding toh kisai, tuni apan Emloyment exchange ah registration kipan hi. Employment exchange lam apan thu kiza dan in, Dept. 2 te' nuai a post awng tuamtuam, apply ut ten, mah ni employment card tawi in September 26, 2016 tan in office hour hun sung in ki register theih ding chi in gen uhi.
xxxxx
Khrist Thuzawh Ngaihtuahna (watsapp group) in hongtung ding September 24, 2016 (kiginni), chiang in Nehemiah Prayer Mountain, Mualvaiphei ah, a 6-veina fellowship nei nawn ding uhi. Hiai hun seh 4 a khen in thumna hunzat hiding a, hun masa Ginmuanlian (group admin) makaih in Pathian kiang a kipahthu genna leh kipiak khiakna a zat masak hiding hi. Hun 2na Joycee Tangpua (admin) makaih in praise and worship teamte thumpih na a zat ahih ding banah hun 3na, Mary Naulak (admin) makaih in gam leh nam adia thum in, Vunggoulian (admin) makaih in fellowship lamzangtak leh lawhching tak a neihzom ahihtheih na dingin thumkhomna nei ding uhi. Fellowship hunsung in sharing nei nuamte a dingin a vangkim in hun hong hiding a, hiai hun a lunglutna nei mimal hi'n pawlpi, kua peuhmah teltheih ding hi'n memberte apat thutut kingah hi.
xxxxx
Hongtung ding September 24, 2016 (kiginni) chiangin Simte Inn, Simveng ah sunma dak 10:30 in Hangluah Innkuan Organisation General Assembly cum Election 2016 om ding hi. Hiai hun H. Kamgenpau in makaih ding a, Pastor H. Doumang in thumna in hun pan ding hi. H. Thanglianmang, chairman i/c in vaidawnthu a gen ding banah H. Kapchinthang, finance cum treasure leh CL John, secretary apat report ngaihkhiakna om ding hi. Hangluah Innkuan apan kum 2015-2016 a class X leh XII 1st division a passte kipah pihna piakna om ding a, hiai hun zatna JK. Simte, addl Commissioner, custom & Excise, Govt. of India in Assembly hun ah Chief Guest hihna toh uap ding hi. Sunnung hun in vaihawmna leh election om ding a, Election hun ah H. Nehzasoi, Presiding Officer a pang in H. Khamsuanlal, H. Khupzamuan leh H. Ginlunthang te Polling Officer in pang ding uhi.
xxxxx
All Tribal Women Union (ATWU) makaih in apaisa September 19 zinglam dak 7:00 apan, District Hospital a Salpha 9 te suunna mun ah, sai-ip puansilh in ann ngawl thumna pan uhi. Sai-ip puan silh a anngawl thumna apat uh paitou zel in mi tam tou deuh deuh hi. ATWU lam apan thu kiza dan in, tuni a sai-ip puansilh a ann ngawl thumna a pat pen uh tukal sung nei ding uh hi a, 2Kronikil 7:14 “ Ka minpu ka mite kingaineu a athum ua, hon zong ua, a omdan giloute uh a lehngatsan uh leh van a kipan in ka na ngaikhe ding a, a khelhna uh ka ngaidam ding a, a gam uh ka dam sak ding hi,” chih pansan a a pat uh hi a, hiai hun ah, a lunglut peuhmah tel theih lai ding hidanin gen uhi. Huai ban ah, sai-ip puan a silh te uh, hoih tak a koih hi ding a, 6-schedule muh hun chiang a, hiai sai-ip puan te Museum a koih a, khangthak ten a muh theih ua, 6-schedule muh theih na ding a pan akilaak dan te a theihtheih na ding ua, koih hoih ding hidan in gen uhi.
Xxxxx
WATCH VIDEO
No comments:
Post a Comment