Kilawmlou taka sum latute action lading in ngen
Lamka, Sept-22: Khamchinpau Zou @ K. Zou, Advocate & Social Activist in DC/CCpur kiang ah CCpur Dist. sung ah Voter identity card, Aadhar card, Meithai, Teksia, BPL, AAY card bawlna ah kilawmlou taka sum latute tung ah action lading in ngen hi. Aman ataklatna ah CCpur Dist. sung ah diklou tak in Agent leh kumpi nasem khenkhat-te’n Voter identity card leh adangdang bawlna ding in dan (law) kalh leh kilawmlou tak a sum alakthu uh tampi za hi’n taklang hi. Aadhar card bawlna ding in Rs. 500 apan Rs. 600, Voter identity card bawlna ding in Rs. 250 apan Rs. 300, BPL, AAY, Teksia (Old Aged) leh Meithai (widow) card-te leng sum lou in mi nautang te’n kinei theilou chih leng za hi’n taklang hi. Hichibang a kumpi nasem leh Agent khenkhat te’n kilawmlou taka sum alak ziak un, mi nautang tampi neih ding a kilawm hinazenpi tamtak a neilou om hi’n taklang hi.
Voter identity card leh Aadhar card-te India mi kuapeuh neih ding a kibawl hi a, BPL, AAY, Teksia leh Meithai card kichi leng kuapeuh in neithei ding chih India kumpi in kichiantak in gen chiang a, huaiziakin kuamah in dan (law) banglou leh kilawmlou tak a, sum-le-pai bawlna (business) in aneithei kei ding uh chi hi. Maban ah dan (law) lou a gamtang-te’ tung ah action lading in mipi’ sik leh tang in ngen hi. K. Zou in DC/CCpur kiang a ngetna apiak copy Chief Election Commission, Manipur leh Director, Unique Authority of India, govt of India, New Delhi ah leng pia hi.
HEADLINES:
Ni 75 sunga buaina om hun in Pellet Gun ziakin mi 2150 liam
J & K High Court in Pellet Gun kham ding nawlkhin
 |
| http://ichef-1.bbci.co.uk/ |
Srinagar, Sept-22: Kashmir phaizang buaina ah mi 2150 valte liamna ‘Pellet Gun’ kham(ban) dinga ngetna omte Jammu & Kashmir High Court in nawlkhinsak a, kiphinna neite’n akhengval a thagum azak ziakun Pellet Gun khamna omtheilou ding chi uhi. Chief Justice N Paul Vasanthakumar leh Justice Ali Mohammad Magrey makaih High Court Bench in, Kashmir ah ‘mob violence’ om sung teng Pellet Gun poimawh ahihdan taklang in huai galvan zat theih ding in thupuk uhi. Pellet Gun ziakin July 8, 2016 apan ni 75 sungin minautang 800 val te’n khua mutheilou uh a, ni 11 paisa apan Srinagar a SMHS Hospital ah leng damlou 300 puaklut in om in, Hizbul Mujahideen commander Burhan Wani kaplup nunga buaina thiltungte ah Pellet Gun in a kapkhak, mi 2150 val liam uhi.
Bar Association pawlin mipi tunga Pellet Gun zat ding deihlou in High Court ah ngetna(plea) bawl uh a, Pellet ziaka liamte lakah damsung a poihlong ding tamtak om ahihdan leng taklang uhi. Pellet Gun in akapliamte etkolna di’n state govt in sum tamtak seng a, state sung ah specialist doctor-te’n a etkol theihlouhte uh leng state pawlam ah puakkhiak ngai a, huaithu ziak banah Bar Association pawlte ngetna ziakin High Court ah huai tungtang genkhawm a om hi’n thusuakin taklang hi. Government of India leh Ministry of Home Affairs in Pellet Gun khek ding tungtang enkai di’n ‘Committee of Experts’ bawlkhia a, amaute leh government level in thupukna abawlma un, High Court in Pellet Gun khamna bawl theilou ding hi’n ahihdan Court apan thusuakin taklang hi.
Manipur High Court a Chief Justice thak ding kichiam
Imphal, Sept-22: Raj Bhawan a Darbar Hall ah tuni sunma in Governor Dr. Najma A. Heptullah in Manipur High Court adia Chief Justice 3na ding in tuni’n Rakesh Ranjan Prasad kichiamna neisak hi. Justice Rakesh Ranjan Prasad ahihleh Bihar ah July 1, 1955 in piang a, Patna Law College ah Law zil a, kum 2001 in Jharkhand ah Judge in pang hi. Feb 2016 a Jharkhand High Court apan Manipur High Court ah kisuan in acting Chief Justice hihna len hi.
Manipur High Court in March 13, 2013 ni in full-fledged High Court hihna ngah a, Chief Justice masapen Abhay Manohar Sapre hi a, huai zawh in Laxmikant Mohapatra hi’n gen uhi. Chief Justice in kichiamna a nei zawh in media-te tawh kimuhna hun ah mi tamzaw te’n legal rights lam ah taksapna a neih uh tawh kisai in legal awareness poimawh chi a, ka inn 2na Manipur ahih dungzui in Chief Justice dia seh a om kipak a, case zawhsiang louh tamtak omte akintheipen a saifelna dia panla ding chi’n gen hi. Hiai hun Chief Minister O. Ibobi, Dy. CM Gaikhangam, Ministers, Chief Secretary, govt. leh police a top official banah Manipur High Court official te’n uap uh hi’n kigen hi.
UNICEF officialte’n Dist hospital dinmun enkhia
Lamka, Sept-22: Guwahati pansan United Nations Children’s Emergency Fund (UNICEF) India apan Dr. Sonal, Child Health Consultant, UNICEF/Guwahati leh Narendra, UNICEF Consultant-te’n tuni sunnung in dist. hospital hongpha uh a, State apan Rajivee Irengbam, State Programme Manager, NHM leh Dr. Dinesh, Nodal Officer te’n honzui in hospital a maternity health tawh kisai nasep tuamtuam enkhia hi. Official team te’n Children Ward kianga (Sick New Born Care Unit) leh FHW Training School a Skill Laboratory kibawl lel telin ward tuamtuam kilamthak-te enkhia uhi. JE leh Viral fever outbreak tawh kisai a nasemtu kidaihlouh ziaka panlakna (nasep) khawlsak a om akinlam a sunzom dingin hospital thuneitu-te theihsak ban ah lupna leh van tuamtuam leng a kinlam a indent (ngen) dingin National Health Mission palaite’ kiang ah theisak hi.
Maternity Ward a model labour room 2 kibawl lel leng lungtunhuai ahihdan gen in, vanzat poimawhte a kinlam a koih hiding in gen hi. Govt. in doctor-te banga hospital a duty nurse te’n damdawi prescribe thei ding khawpa dawpsang sawm in panla a, huai dingin FHW Training School ah Skill Laboratory koih dia approval hita a, UNICEF consultant te’n bang dinmun a om chiam chih enkhia uh a, Children Ward lui kibawlthak leh ART Centre leng enkhia uhi.
LOCAL NEWS:
Antang lakna ding RO hawm ding
Lamka, Sept-22: CCpur Dist. ah National Food Security Act. nuai a Rationing Agent, sum deposited-te’ antang lakkhiatna ding Release Order (RO) Sept 26-Oct 1, 2016 sung DC office a DSO/CCpur in office hour sung in hawmkhe ding hi. Sept 26, 2016 in 55- Tipaimukh A/C & 56-Thanlon A/C; Sept 27 in 57-Henglep A/C; Sept 28 in 58-CCpur A/C; Sept 29 in 59-Saikot A/C leh Oct 1, 2016 in 60-Singngat A/C hiding hi.
Police custody ah omlai ding
Lamka, Sept-22: Gari tuamtuam 10 vel mi khut ah mortgage ziaka Police custody a omlel Ningthoujam Opendrajit (39) s/o N. Khelemba of New Bazar, Bus Parking kiang ah, tuni’n Police te’n CJM/CCpur ah pawkhia uh a, court in Sept 26, 2016 tan Police custody ah omlai ding in phalsak hi. Opendrajit tung ah Police te’n FIR No. 45 (9) 2016 CCP- PS U/S 420/406/34 IPC registered uhi.
SP/CCpur in charge pekhia
Lamka, Sept-22: L. Mangkhogin Haokip, IPS, SP/CCpur in zan nitaklam in Addl. SP/Thoubal apan hong kisuan Rakesh Balwal, IPS kiang ah charge pekhia a, nitak in Election Commission ah report pia uhi. Rakesh Balwal’ amansiang nailouh ziakin Sept 23/24 in handing over and taking charge neih hiding in SP in gen hi. L. Mangkhogin Haokip in May 5, 2012- Feb 21, 2014 sung CCpur Dist. ah SP len a, huai zawh March 24, 2015 apan tunitan SP len hi.
Post office ading ATM machine
Lamka, Sept-22: Tuibuong a Post Office ah ATM booth ding bawlzawh nung tunaizek in ATM machine hongtung a, afit ding engineer hongpai nailouh ziakin deptt te’n phel khiak louh in koih uhi. Engineer te’n ATM booth ah machine fit zawh leh zattheih ahih chiang in Post office a customer-te’ kiang ah ATM card issue hiding a, huai zang in ATM booth ah sum draw theih ding ban ah Post office a ATM omna teng ah leng sum draw theih ding hi’n Branch Manager, Post office/Tuibuong apang kiza hi.
Post box 39 lel in renewal bawl
Lamka, Sept-22: Tuibuong a Post office ah letter box 180 vel omlak ah tunitan in mi 39 te’n renewal bawl uhi. Huai thu ah akisaipih te’n renewal bawl ding leh abawllou-te cancel hiding un Branch Manager apan kiza hi.
AERO/SDO-te briefing nei ding
Lamka, Sept-22: DC office a BRGF Resource Centre ah Sept 23, 2016 zinglam dak 11:00 in DC/CCpur makaih in S. Thienlaljoy Gangte, AC to DC & OSD (Election) leh Dingluai, Asst. Election Superviser te’n zana Election Commission of India (ECI) a Chief Election Commissioner Dr. Nasim Zaidi makaih a ECI full bench team-te tawh meeting na uh AERO/SDO-te briefing neihpih ding uhi.
Oct. khasung in ATM machine koih ding
Lamka, Sept-22: Dist. hospital management committee, CCpur in hospital huangsung a ATM booth koih dia panlakna pailel a, ATM booth koihna ding Sept. 14, 2016 in zawhsiang hita hi. Huai tawh kiton in tuni’n Y. Ibochou Singh, Branch Manager, UBI/CCpur Branch makaih in technician te’n estimate bawl dingdan enkhia uh a, a kinlam in Guwahati ah khak ding uh a, approval om hun in ATM machine 1 tel in CCTV 2 leh AC leng koih hiding in kigen hi. October khasunga installed zawh lam-et thu leng gen uhi. Hospital management committee leh UBI in kilemna (MoU) a neih dungzui ua Eastern block a ground floor ning khat piak hi ua, RKS fund tungtawn in Aug. 2016 in nasep pan uhi.
CEO/ADC in training hongding
Lamka, Sept-22: Soiminlian Lengen, CEO/ADC in Sept 23, 2016 zinglam dak 11:00 in Hiangtam lamka a YPA Gen HQ Hall ah Student Database Management Information System (U-Dise 2016-17) tawh kisai 2-day awareness/training program hong ding hi. Huai ah Functional President in T.Goukhomang, ZEO/CCpur pangding hi. Huai zawh in ZEO leh CEO nuai a CCpur block leh Henglep block a Headmistress/Headmaster-te training ding uhi.
Ex-Servicemen Rally om ding
Lamka, Sept-22:Khuga Battalion saina in Sept. 24, 2016 zinglam dak 10:00 in Khuga Dam ah Indian Army Ex-servicemen Rally om ding a, huai hun ah medical camp om ding ban ah Suvigya Cell, SBI extension counter leh CSD extension counter hong ding uhi. Huai a teldingte zinglam dak 8:30 in Chiengkonpang a SDO Office lui ah gari kidawh ding hi’n kigen hi.
(late) Khaikhanlian Divn. League
Tuibuong Peace Ground ah Sept 23, 2016 sunnung dak 2:00 in (late) Khaikhanlian Memorial Dist. I Division League-2016 kipan ding a, Chief Guest in T. Khaikhomang, MDC & Chairman, Finance Committee/ADC pang ding hi. Functional President in Thanglal Haokip, President, KKL Thangting Block pang ding hi. Opening match ah New Lamka Y/C leh Zoheisa Football Club kimawl ding uhi. I Divn. League ah club 12 tel ding uh a, amau te pool nih a khen in om uhi.
IMPHAL NEWS:
By-election ah Congress ching
Imphal, Sept-22: Sadar Hills bial 8-Wakotphai District Council Constituency adia by-election ah candidate 5 om mahleh Independent candidate 3-te a kizukkik ziak un Congress Candidate Seilen Lhoujem of N. Teikhang Village leh BJP Candidate R. Stoneson of Mukui Village paisuak uhi. Sept 17, 2016 a Election om tuni’n vote sim hi a, huai ah Congress Candidate in vote 1935 mu in ching a, BJP candidate in vote 1539 mu hi. Vote kikhia lakah invalid (vote si) 78 om a, Congress candidate in BJP candidate sang in vote 396 a tamzaw mu hi.
Air Asia dakkal 1 val delay
Imphal, Sept-22: Tulihal International Airport ah security personnel te’n Guwahati tawn in New Delhi zuan ding Air Asia flight (I5-784) ah passenger khat in tuni zinglam dak 10:30 velin a luggage sung ah bomb om chi’n vauna a bawl ziakin security agency leh bomb squad te’n flight khawlsak in passanger leh luggage teng checking a bawl ziak un dakkal 1 val Air Asia flight delay hi’n gen uhi. Police thusuak in bomb om hidan a vauna bawl Robinson Paotei (39) s/o Raphie Paotei of Purul Atongba village, Senapati thudot ding in hentang ua, a luggage checkna ah bomb ding muhkhiak hilou hi. Huai hun ah akithuahpih Senapati district apan D. Seikou Paomei of Taphou Village leh Ng. Hraili Paomei of Paomata village-te leng Air Asia thuneite’n lenna sung a lut ding phal lou uh a, Security personnel te’n hun bangtan hiam Robinson a hentang nung un nitaklam dak 5:00 velin police-te khut ah pekhia uh hi’n leng kigen hi.
PAC saina in kihouna om
Imphal, Sept-22: Chhattisgarh Legislative Assembly a official 4 telin Press Advisory Committee (PAC) a member 18 te’n study tour tawh kisai in state 4 – West Bengal, Assam, Manipur leh Nagaland pha ding in tuni’n Imphal hongtung uhi. Press Advisory Committee team te’n Imphal hongtung nung un Assembly Complex a Committee Room ah media leh Manipur Assembly a official-te tawh kihouna nei uh hi’n kigen hi. Huai hun ah Manipur Assembly apan Director Y. Samarendar leh Dy. Director/Public Relation Officer banah officer tuamtuam tel uhi. Akigendan in PAC team te’n Sept 23, 2016 in Indo-Myanmar gamgi Moreh mun zuan ding uh a, huai ma a Manipur Governor kimuhpih ding uh hi’n leng kigen hi.
ILPS tawh kisai a draft proposal pelut
Imphal, Sept-22: State govt. in JCILPS-te kiangah ILPS tawh kisai a ‘Manipur Regulation of Non-Local People Bill 2016’ tungtang draft proposal pelut uh a, draft proposal sung ah thu omte suichet ding leh nialna omte govt. theihsak ding deihna hidan in gen uh a, stake holder teng banah singtang bial a Civil Society-te kiangah piak hi’n leng gen uhi. Huailou in JCILPS Women Wing a Convenor Thongam (O) Apabi leh member 10/15 vel ding te’n tunitaklam dak 3:00 velin Raj Bhawan ah Governor kimuhpih sawm uh a, Governor in thil dang tawh kisai a buaina a neih ziak in Secretary to the Governor in phalna pelou hi’n gen uhi. Hiai tungtang ah Secy. to the Governor in phalna a piaklouh tawh kisai lungkimlouh ziak in JCILPS Women Wings te’n Nityaipat Chuthek ah sit-in-portest nei uhi.
Mi 20,000 in PWD certificate ngah
Imphal, Sept-22: Secretariat South Block ah tunitaklam in press conference om a, Manipur ah pianken a vualphalou-te tawh kisai meeting hun uap dia Manipur hongpha Dr. Kamlesh Kumar Pandey, Chief Commissioner, Persons with Disabilities (PWD) in Manipur ah PWD mi 58,000 lakah mi 20,000 te’n PWDs certificate mu uh a, state commissioner tawh a nasep uh a kibat ding ahi chi a, state govt. in State Disable Commissioner office ngaihsak lou chi’n gen hi. Chief Commissioner office in Central govt. apan fund bikhiah tawh kisai a sum zatdan enkai thei ding uh a, Manipur ah Commissioner of Disabled office bah gawp banah LDC leh peon 1 tuak om a, state office-te ah Dy. Commissioner leh subordinate staff-te a om louh tawh kisai poisak thu taklang hi.
Centre in vual phalou-te a ding in UDID Card pankhia in Madhya Pradesh a Ratlam leh state 14 telkhiak-te ah pilot project dan a sepsuah chi’n gen hi. UDID card tungtawn in vualpha lou te’n India gamsung pumpi ah sepna ding a zonna uah panpih ding a, state khat in disable certificate a piak uh state dang ah pom louh in om theih a, UDID ziak a state teng in a pom ding uh chi hi. UDID zatna mun ding state 14 telkhiakna lakah Manipur telkha lou a, a ziak ahihleh Manipur ah disable om teng lakah 40% lel in leng disable certificate a muhlou ziak hi a, Manipur ah scheme hoihtak a zatna ahihna ding in Chief Secretary leh Governor kiangah recommend bawl ding hi’n leng gen hi.
MGNREGA' orientation program
Imphal, Sept-22: Department of Rural Development and Panchayati Raj (MGNREGA Monitoring Cell)-te saina in Manipur Press Club ah tuni’n Journalist-te a ding in MGNREGA tawh kisai in State Level Orientation Program om a, huai ah Chief Guest in J.C. Ramthanga, IAS, Principal Secy., Rural Development and Panchayati Raj (RD & PR) pang hi. Functional President in W. Shyamjai, President, AMWJU pang a, Guest of Honour in Dr. K. Shyamsunder Singh, MCS, Director, RD & PR-te pang uh hi’n kigen hi. Technical session 4 om a, huai hun ah Dr. A. Ibomcha Sharma, News Editor (ISS); A. Robindro Sharma, Editor, Poknapham Daily in ‘Implementation of MGNREGS and Preparation of LB Fy-2016-17 by Gram Sabha’, Kh. Ibochouba Singh, State Nodal Officer, IEC(MGNREGS), RD & PR in ‘An Introduction on technical training manual for MGNREGS’ leh Kh. Ibochouba Singh, Nodal Officer, MIS (MGNREGS) te’n thugenna nei uhi.
TEACH programme om
Imphal, Sept-22: Rotary India Literacy Mission nuai a Rotary Club of Polo City Imphal-te saina in Kongman Zone IV a National Children School ah tuni’n ‘TEACH programme’ om hi. Huai hun ah National Children School a teacher I. Suresh Mangang kiangah ‘The National Builders’ Award’ leh sum Rs. 3,000 piak hi a, Rotary Club te’n student-te kiangah E-learning kit – projector, screen, study material leh van tuamtuam pia uhi. Hiai hun Salam Sachhidanand Singh, President, Rotary Club of Polo City; RK Roji, MCS, Administrative Officer, Dept. of Hr. Education leh Rotarian member te’n uap uh hi’n kigen hi.
Career Counseling om
Imphal, Sept-22: PIB (Defence) thusuak in Senapati Brigade nuai a Jwalamukhi Battalion-te saina in Khurkhul post ah zan in ‘Career Counseling’ om hi’n gen uhi. Huai hun ah Jwalamukhi Battalion te’n Armed Forces tungtawn a sepna tuamtuam om-te taklang uh a, Company Commander in counseling a tel-te hasotna ding in thugen a, huai zawh in numei leh pasal-te adia Armed Forces lut theihna ding lampi tuamtuam om-te taklatna nei uh hi’n kigen hi. Hiai hun school tuamtuam apan student te’n uap uh a, Counseling zawh in weapon display om hi’n gen uhi.
TUNI THUPI:
“Amau ka vangtah ni in honsual ua, himahleh TOUPA ka ginpipen ahi;” – Sam 18:18
EDITORIAL:
I maban ding theih haksa
I pu ipa khanga i tenna Manipur ah tuma lam akipan tuni tanpha buaina hongtam deuhdeuh a, Assembly election bang hong nai hiaihiai hi. Huchi kalah i maban ding uh theih haksa mahmah a,assembly term thak ah bang party in vaihawmna a len ding uhiam chih leng gentheih hilou khop in Manipur maban ding chianglou hi. Prime Minister Narendra Modi ‘wave’ leh BJP National President Amit Shah in Manipur mite bangzah a thuzawh ding uhiam chih theihchet haksa mahmah a, Manipur phaizang bial ah Chief Minister O. Ibobi tungah mipi bangzah in kingakna tham ching vaihawmtu hi a muanna a neilai ding uhiam chih leng theihbut hituanlou hi.Tu dinmun etin Manipur singtangmite’n Manipur govt ah muanna taktak nei nawnlou uh ahi maimah diam chih leng ngaihtuahtham ching hi.
Tuban kha tamlou nungin Manipur ah assembly election om ding chih a chiangsa hita a, huai hun ah Congress mah hia, ahihkeileh BJP leh akizoppih party-te hong hat maimah ding uhiam chih hun kivei in hong pawkhe ding himahleh bang party pentak hat ding hiam chih bel chiangtaka gen ngam huai nailou suak hi.Manipur assembly a MLA 60 om lakah tuma deuh in NPF MLA 4 leh Congress MLA 1 a kitawp ziakun tulelin MLA 55 te omta a, huai nungin All India Trinamool Congress (AITC) akipan MLA 4 te’n Congress Party zom ua, huai dan etin bel Congress hat mahmah bangin kilang hi.
Himahleh assembly election hong om taktak hial leh Centre ah Congress makaihna UPA govt omlai Dec 2015 a Lok Sabha election ah Congress mualphou huaitaka puksia in BJP makaihna NDA govt hong dingkhia tawh a kibat ding thil hitheilou hituanlou ding in ngaihdan neihtheih hi.Aziak bel Manipur a deptt tuamtuam in Central fund zanga project leh scheme tuamtuam a nasepna in Rs. 5,000 crore vel utilization certificate pe theilou uh chih hi a, huai thil mulkimhuai bang hi. Manipur govt in project leh scheme tuamtuam bawlna ding a Centre akipan fund a ngah uh sum zatna(utilization certificate) leh nasepkhiak a lemlak(photo) tan piaka thil hithei hilebel state govt in pe dingin gintak huai a, hileleng huai tan a beilou in Central team in nasepkhiak a omte mun mahmah ah hong enkhe ding uhi. Huai hial hilebel nasepkhiak muh ding leh etsakna ding omlou maithei a, et teitei hial hileh sep lah bang, seplouh lah bang himaithei hi. Huaiziakin state govt in Centre akipan fund himhim a muhbeh theihlouh ziakin Manipur sum tawh kisai haksatna gen vuallouh tuak hi’n kigen hi.
Sum a gin-omlouhna ziak(financial indispline) leh corruption ziak a Manipur govt mualphou ahi mai a,huchi kalah Manipur in sum dinmun a haksatna tuak ahihlam leng ngaihtuah banlou in govt len Chief Minister leh a Minister pihte’n a appointment ‘ban’ a bawl uh leng lakhe hial in tulai in deptt tuamtuam a semding lakna recruitment process om vengvung hi.Huaiziak mahin tulai a interview/recruitment himhim lawhchinna dingin sum a lei ngai vekta chih hi a,huaipen Minister te’n govt sum lak leh nekguk ding a neih nawnlouh ziakun election a zat ding sum muhna omsun dan a nei maimah uh chih theih hi.Hiai thu thil maimai bang mahleh hideklou a,kumthak 2017 bullam a assembly election om nunga govt thak hong dingkhe ding pen in sum zat ding paisa 1 leng neilou in Rs. Crore tamtak batsa nei govt suak ding uh ahih ziakin mulkimhuaipi suak hi.Hiai thu tuma zeka Manipur hongpha Election Commission of India(ECI) full team in leng ngai serious mahmah uh hihtuak hi.
Huaiziak mah in Manipur a BJP Chief lui banah Union Minister-lui Th. Chaoba in maban a assembly election om ding tungtang a genkholhna (pre-diction) a bawl dik mah ding ahihiam chih ngaihsuttham ching hi. Th Chaoba bel kimuang mahmah in BJP in phaizang bial ah assembly seat 26 val luah ding a, singtanggam a seat tamzawte leng BJP mah in aluah ding chi liuliau hi. BJP a hoih a deihhuai mah ahi, chi hituanlou hihang. Hileleng Manipur ah Congress in term 3 hial govt bawl mahleh laws & order lah hoih tuanlou, sum-le-pai a gin-omlouhna leh nekguk takgukna lah uang deuhdeuh mai, maban ah Congress in govt bawl ding in om hi zenzen leleng beidong dinga kichiansa khop in sum-le-pai dinmun ‘zero’ hiding in kilang hi.
Huchi kal ah BJP ading in Manipur politics ah ‘golden chance’ nei uh suak a,amau mah in leng govt a bawl kei ua leh Manipur mipite buaisia in a puksi leng a om gintak huailah lou hi. Hileleng BJP pen diktatrna a dim hituanlou uh chih a chiangsa ahi hi.Kum 2014 a Lok Sabha election omlai a BJP campaign slogan ‘BJP in vaihawmna a let aleh India a mihausate’n gamdang a sum a aguk a a koihte uh ‘ black money’ ni 100 sungin India a laklut vek ahi ding chi uh a,BJP in Central a vaihawmna a let nung kum 2 hial chingta mahleh huai tawh kisai zuahthu suak hi. Manipur tawh kisai a a thupi khat uh BJP in vaihawmna a let leh ni 100 sungin Imphal-Jiribam lamlian(National Highway 37) bawl hoih hiding chih BJP makaite’ thugen leng taksuah tuanlou uhi. Huaiziakin Manipur maban ding lungzin huai kholdiak bang maimah hi.
No comments:
Post a Comment