SUAHTAKNA LAMPI-II - Written by Vungzamuan Valte, IRS

SUAHTAKNA LAMPI-II

Written by Vungzamuan Valte, IRS

Suahtakna kichi chi tampi in khentheih ding hi. Britishte i gam ahong lut ma un, sa-leh-gal a kithahna, suak-leh-sal a kimatna te’n vai a hawm a, zalenna kichi a meimong leng mupha louhial uhi. I pipute’ nektak zonna ah buai chihtak in buai uh a, hunteng leh niteng in sihna limguam tawn den uhi. Khawsung vaihawmtute’ mitmei veng kawm in khawsa uh a, gal lau ngoihngoih kawm leh hin-le-sih kikar a khawsa in munmuang man louhial in hinkhua zang uhi. Britishte a hong lut uh a, kivaihawmna chikhat, minautangte adingin bitna leh khamuanna a hon tun uhi. Pupate biakna leh ngeinate taisan in Jesu nungjuihna hon sinsak uh a, khawsakdan, nektak zondante kikhek in, zu-nek a koltanna, dawi-leh-kau biaknate taisan in, laisim dante ahon puak uh a, khanlawhna leh suahtakna chikhat i tang uhi.

Kidoupi IIna ahong veng a, suahtakna thawmgingte i pipu te’n theibanlou uhi. Gamtuam leh ki-ukna tuam a khenkhiak in i om uhi. India, Burma leh Bangladesh (East Pakistan) a hong piang a, suahtakna chikhat i chiamteita uhi. Kumpinu thunuai a koltanna akipan suahtakna ahi hi. Huchi in, i gamsung a koltanna lian mahmah, hausa thuneihna akipan Chin Hills a unaute 1948 in a suakta uh a, Mizoram a i unaute 1952 in a suakta uhi. Hiai dan suahtakna te’n i kiim i kiang ahon zelsuak teisam a, KHUL Union malakna in nasatak in suahtakna deih in kiphinna ana om ngeisam hi, a gahsuah muhtheih bel, buhsun, saliang akipan suahtakna ahi hi.

1960’s in khanlawhna chikhat ahong piang a, kivaihawmna tuam neih a suahtak utna khagau in i gam atuam kimvel hi. Himahleh sawt daih zoulou in muihkik nawn leuleu hi. North East Re-organisation, 1972 in a om nawn leuleu a, suahtakna deih in kiphinna nasatak Hill People te’n pankhe leuleu uhi. Huai gahsuah ahi ngei ding a District Council tan kitung zou hamham hi. Manipur in language issue nakpitak in ahon buaipih a, Assam ah Assamese language imposed ahihdan tawh kituakin, Meitei pau nasatakin ahon promote uhi. Lungkimlouhna leh suahtak utnate ziakin kumtampi i gam ah buaina a om nawn leuleu hi. A gahsuah omsun bel, Tribe neuneu te’n mahni pau (dialect) chiat a language subject neihtheih ding chih ahinawn hi.

Suahtak utna lungsim bei ngeilou ding ahi a, namphu a kikaihkhawm tupna leh kitalkaih mawkmawk utlouhnate ziakin, i gamsung Politics in nasatak in 1990’s in abuai mahmah mai a, nam leh nam kikar tanpha ah kimuhsiamlouhna atun hial hi. Hiaite ziakin tunitanpha in group tuamtuam in ki-om tiltel lai a, suahtakna zong vek ihi uhi. Bangchidan a suakta ding, koilam manawh ihi ua, bang ahia i lam-et pen uh chih bang leng theih haksapi khat asuakta hi. Huchikawm kar ah, India leh Manipur akipan suahtak taktak i chih bel thil namailou ahidan a chiang semsemta hi.

Hun leh kumte a hong mualliam tou zelzel a, i zak ding thu leh la tampite ahong piang toutou zel a, lungkimlouhna leh mangbatna chituamtuam ten ahon tuam kimvel uh a, tunitanpha in suahtakna deih in i thum huthut hial mah uhi. Ahia, 6th Schedule chi tawh, SA chi tawh, State within a State/Zalengam/Zogam khong chi’n deihthu i sam kheukhou lai uhi. Huchi neunoupi in suahtakna taktak muh ding haksa mahmah leh kilawm maimah hi. Gam omloupi kituh chihdan ngaihdan kiptak nei bang ki-omta ahihna ah, i nam maban ding lunggel takpi kulta hi.  Huaiziak in, SUAHTAKNA i chih politics a suahtakna kia hihiam? chih kikum him lehang chidan ihi zaw hi.

I pipute dawi-leh-kau biakna a, akoltannate ua kipan a suakta uh a, hinna thak, tawndan thak leh khawsakdan thak tawh a hon mualsuahpih uhi. Himahleh, hun ahong paitou zel a, huaite’n i society sungah chihdan thak, ki-ukdan thak, kivaihawmdan thak ahon pawsuah tou teizel uh a, koltanna chikhat ahon guan tou tei-zel uhi. Huaiziak in, i simlei vai ah koltanna lianpipi i nei lai ngei ding uh a, mimal, pawlpi, khawsung, politics, saptuam leh a dangdangte ah suahtakna a bei ngeilou ding, I bawlhoih det uh poimawh ding abang maimah hi.

1970’s lai in Cowboy films leh comics khong a muhkhak ziak uhiam, Lamka ngial ah houh ki-cowboy sak taktak atam mahmah mai uh a, sumdawng, dawrkai te’n suahtakna ding deih in, a panpihtheitu ding a ngai thei mahmah mai uhi. Mawmawng thahat tak a hia, a phatuam mahmah a chi uhi, gunda tampi hawlmang zou ahihtuak hi. Social evil khat in evil dang khat poimawh, “set a thief to catch a thief” chihdan deuh khawvel ahihtuak mahmah hi. Tualai in Lamka sung a tangval omkhate’n thei chiang mahmah lel uhi. Duty leh mihangsan tampite’n nasatak in panla uhi. Pistol phawi a kikap, ki-ngim leh fair fight chihte khawng cowboy style mahmah ahi chi uhi. Sumdawnna munpi Lamka bazaar a honglun semsem ahihna ah thuneih kituh ding ahong tam deuhdeuh uh a, 1980’s inbel CWA te’n nasatak in bazar sung control zou ua theih ahi hi, Mishra te, Romente (Police) lam tawh nasatak in kinawktuah khasek mah uhi. 1990’s ahong tungtouta a, selai (thau) tawipawl ahong kigolh hehu tamai uhi. Tuate ziakin, salpha khenkhat, sihngap a pang ahong omkhia uh a, galmuanna deih in khawsung humbitnna na ahon sem uhi. Hiai paidan tunitan in kikhenglou lai a, rule of law, sangin, thagum a vaihawmna, summuhna nak asuak ta hi. Ahun ahun a suahtakna omtou zelzelte, Lamka bazar a dawrkai kumkhua te’n theichiang mahmah ding uhi. Sumsin mite’n semlou a sum khon gigete chimtak mahmah ding uh a, huaite khut apat suahtakna, amaute a dingin lunggulhhuai ngoihngoih ding ahi hi.

Pipute biakna i paisan uh a, Saptuam tuamtuam i society sungah adim in ahong dim teltul ta a, mi chih hinkhua nasatak in ahon control maimah hi. Gindan kibang himahleh, chindan leh paidan kibanglou neuhneuhte ziak khong, gentaklouh, mimal leh sungkuan kihuituamna dan in, akhen in a kikhenthang nengnung mai a, nakpitak a kitaitehna ahong piangta hi. Ami ding kituh, hihhoih pen kituh leh paidan dikzaw hihding kituhnate’n i society a pumtuam a, vangam kailou ding a i koih pawl bang hong piangkhe hial hileh kilawm hi. Vangam kai leh kailou pen mihingte buaipih ding hikei leh kilawm hinazenpi. Pathian biakna, Jesu nungjuihna hinazenpi in labu tuam, bible tuam, biakin tuam i nei souhsouh uh a, hahpan in i pang chiat uh a, tha-lehizung, sum-leh-pai sending chillou hial in i kitaiteh hehu maimah uhi. Lamka khawsung ah Bible Colleges 6 om ahi chih i thei, veng chih ah BIAKIN bangzah a om dia? Lamka khawpi chu biakin tamnapen ahong suak ta hial hi. De-addiction Centre tamna pen leng ahong suak veve hi. Biakbuk zat manglouh biakin leng tampi omta dingin a gintakhuai a, mun hoihpipi luah depdup ahi uhi. Hiai kitaitehna pen i society a dingin a healthy pen kei, koltanna chikhat ahi. Suahtakna chikhat poimawh hilou i hiam? I neih leh lamte munkhat ah sungkhawm hileng, phatuam zawlou ding hiam, i biak lah kibang, i lam-et lah sih-nung khamuanna hi veve. Thuneih utna leh kihazatnate’n vaihawm lian mahmah hihtuak maimah hi. Pau tuam zaw thukhat hileh, i paidan uh koltanna lianpi khat hi in thei set ing. Nam kipumkhatna leng omsak theilou ahi zaw dia aw?  

Politics ngol i vei uh a, MLA/MDC utna leh contract deihnate tunglam i ban pha taktak tuan kei zawmah lai uhi. Political party mumaltak leng omloupi in politics a bawh in abawh noinoi mai uhi. Party a ki-baptizena leh lunglutnate bangmah lou asuak a, pawl lou pawl chihdan in, hamphat theihna omna lamlam bawh ding a mansa in i phengpai lailai tel uhi. Telching a omte tungah mimal hamphatna ding i beisei chiat uh a, vote zuak tawh zuaklou tawh i kibang kimvel vek uhi. Nam leh gam nasepna dingin hun i pekei uh a, nasem theilou in i koih uhi. Hiai koltanna akipan suahtakna kiphamawh zaw i hi hia, kivelthak chiat ni. District Council puahphat ahong hi a, power piakbehlap in ahong om uhi. Ahia, sumzatnate ah transparency leh accountability omloupi khat asuak laitel hi. A sungthu ah delegation of powers and functions, Rules and Regulations chihte bang omselou adiam, fund om sunsunte MDC teng kibanhawm (project khat bawlkhiak sangin sum kisehken/khennen) maimah hihtuak uhi. (late) P.A. Sangma in sum ahon piak akizatna in genkhin vek hi. SA e, bang e, gengen lengzong, hichi nilnel a kivaihawm ding i hihleh bel i koltanna bangdang hilou maimah ding eingal ve. Suahtakna i chih, eisung a kibawlphatna leng ahi veve hi.

Pawl (organisation) bawlkhiak haksa i sa hetkei mawk uh a, a omsate phungvuhna omlou in adangdang i bawlkhia khiase uhi. Hiai paidan in nasatak in ahon kainiam a, president a pumdim i hihna uah, kuaman le hon thulak senglou ding mah ahi uhi. Kisoiselna, kinakna, kikhen nenna leh kikaihniamna in i society ah na asem lellel a, midangte adingin thu kipahhuai tak a suaklou theikei. Nambing sungah pawl omsa i nei chiat uh a, huai pawl omsa te’n phatuamngaihna lam bang ah nasatak in nasem uhi. Mite hon muh in a etlawm a khekhai kituaktak a ipai chiang in i ma avang duakduak mai hi. Huchikawm karah, i society sungah kideidanna khong ahong om maimah a, poi petmah asuak hi. Politics a kigolh louhna ding mun ah pawlpi ahong kigolh khak chiangin, nam chi damlou leh nam kithutuaklou apiangsak a, maban hunding saupi a khoihkha thei hi. I society sung uah pawlpi dandeuh a utut in ibawlkhiak ziang theih pen uh I koltanna khat uh ahi a, hiai dinmun akipan suahtakna kiphamawh veve hihang.

Tulai dinmun ensin lehang Manipur gamsung a chi dam kei mahmah mai a, i maban ding uh gen haksapi asuak hi. Bangteng hileh, i khawsakna leh i nektak zonna din khawl thei mawklou ahihna ah, i paidan uh kivelthak a kalsuandan thak i patkhiak uh kul mahmah ta hi. Issue khatah i tan det in bel issue dang ahong piangzel ding a, a paisate nawtsiat dan khat bawlkhia in, i maban a pressing issues hong omtou zelte bohzui thei dingin, i koltanna akipan suahtakna chikhat i bawlkhiak poimawh lua hi. Makai diklou leh hoihlou chia i tangkoupihte akipan suahtakna ding i zon siam bang uleng poimawh hi. Election hong nai hiaihiai te’n i mit hon vaksak henla, kumkhua a koltang i kisakna (om ahihleh) khetbuk a khetkhiak dingdan zon hun ahita hi. Democracy gam a teng ihi uh a, democratic principles paipih akal i suan mah uh hong kul veve ding ahihna ah, i maban ding enkimvel chiat lehang; suahtakna chikhat ahon puak ngei ding hi.

Michih/milip in koltanna kinei chiat ding hiven, tep-leh-muam, khamtheih-guihtheih, guktak-laktak leh chih mawhna tuamtuam i theihbutlouh tampitak i society sungah koltanna nei i om ngei ding. Hiai koltanna akipan suahtakna mi chih in kipoimawh ahi a, i kivelthak chiat uh kiphamawh mahmah hi. Chiin hoihloute zongsat khak ziak a sihna hanmual i zawt zungzung pen uh khasiathuai lou theilou hi, mite zah leng i phak louh lai uh a, banghang hihiam, chia i kivelthak chiat uh poimawh lua hi. Sum-leh-pai a koltannate bang haksapi ahi ngeingut a, khawsakdan kisin, sum zekdan kisin leh nektakzonna a kibulpat thak tampite’n kipoimawh ding hi. Tua kum 1 paita sungin, mi tampi takte nektakzonna lam ah keniam in baihvai (chimawh) mahmah kha ding uhi. Anei vanglakte’n nei hulhul, a neilou vanglakte keu deuhdeuh chihte khawvel paidan himahleh i society sungah ki-itna, ki-lainatnate kichituh leng kineksiatnate taisan in, kihuhtuah dan siam leng, tampitakte a koltanna ua kipan suahtakna kipethei ding hi. Sikh (Punjabi)te ensin lehang, kihuhtuah dan asiam uh a, khutdawh omlou ahi uhi. Lamka khawsung ah Biharite a tam mahmah mai uh a, society (pawl) kibawl in kihuhtuah dan asiam uh a, siksia zongte nasan gintak sangin a changkang baih zaw uhi.

Maban neilai sinlaite, i tuailaite ngialhouh, koltanna nei i omleh a koltanna ua kipan kintak a ahong khanlawh mahmah ding uh ahi, hun in ngak neilou ahi a, i maban ding, i gam maban ding lungzin huaipi himahleh, thakhat thu a thil piangthei mawk hilou ahi hi. Hong piangta mawng lehleng siamna pilna i neih kei in chu zattaklou i suak veve ding hi. I maban ding uh michih in enkimvel chiat leng i chi hi. I NAM I GAM i it uh a, i phungvuh theihdan chiat ua, i hihtheih khamkham a panla thei dingin, panmun khohdan siam leng, changkan lam kimanawh theipan ding hi. I society sung a i khanglaite maban lim chitak nei ahi uh a, amaute zar in, i nektak zonnate hong hoih hileh, mite sangin i tualniam zaw tuankei ding hi. SA, State, Schedule etc. i manawh lailai in, i dinmun i bawlphat louh leh; sepna hoih teng midang te’n ahon luah dimsan thouthou ding uleh, govt fund zektu a midangte tu kheukhou thouthou ding ahih uleh, bang iliak kha tuan dia? Kisingsa chiat ta ni, MLA/MDC-te sang mah in, asung a semtute mah ahi a poimawh zaw, huai ahi I SUAHTAKNA ding uh.

Courtesy: Manipur Express