Lamka – Sept. 3 (Phualvatimes.com) : Tuni Tarik 3 September ni’n Federation Club of Zion te’n asai uh “The 1st (L) BIAK-SIAM-LIAN Memorial Open Football Tournament , 2016 pat in om”. Opening Ceremony hun ah Pastor E. Chinzamang in patna thumna nei in, Chairman Tournamnet Organising Board K. Paubiaklal in Vaidawn thugenna nei hi.
Hiai hun in Pu M. Gouzamang, MDC Lamka West leh Pu Thiankhanmuan, Founding President te’n Chief Guest leh Chief Host hihna toh uap uhi. Chief Guest in agenna ah tulai Tuailai te’n kimawlna kihah bawl mahmah in ahoihlam I nawt ahi chi hi. Aman a gen zom nawnna ah, lai va sim gige theihlouh ahihna ah kimawl hun bang leng a om poimoh petmah ahi chi hi. Football kichi team work petmah ahih ziak in pankhawm siam poimoh a, pankhawmnna neu chikchik in vualzohna hon tun thei ahi chi hi. Kimawl mi’n Game Spirit neitak a kimawl a, vualzohna dik leh siangthou tak a I vualzoh pen athupi pen ahi chi hi.
Pu M. Gouzamang in I khopi niin (waste) toh kisai tamlou genna nei hi. Aman a genna ah I Lamka khopi sung a niin buakna leh treatment plant hoihtak I neih theihna dia panla ahih dan gen in, nin te huathuai mahleh mihing adia zat theih nawn ahihna dia panla hi’n gen hi. Thil tampi kigel, kigen mahleh avek a loching gige diing chihna omlou a, I lohching kei diing chihna leng om tuanlou chi a, ei hih theih tan I hih ma Pathian in leng bangmah hon sem lou ahi chih kei muh dan ahi chi’n gen hi.
Gamsung sianthouna uang bawl diing ahih dan a gen kawm in FC Zion te panpihna leng pia hi. Chief Host in FCZion a hong kipat dan tamlou taklang hi. Aman a genna ah FC Zion kichi 2003 Sept 21 ni a Unaupa Lianzamuan Convenor hihna nuai a kiphut khia ahih dan taklang hi. Football ziakin FC Zion First Batch tampi te’n sepna neih loh uh a, Football lam a sangpi tungkei mah leh uh Sepaih kilakna khawng ah nuamtak in ching uh chi hi. Aman a gen nawnna ah kimawl mite’n Pathian in gift a hon piakte lang khe sak a kimawl diing in ngen hi.
Pastor Chinthiansong PCI (R) in sunna hun leh Player leh Organising Board te adiing in thumsakna nei a, Chief Guest & Host te’n Play masa kick-off na nei uhi.
Play masa ah (L) G. Hauzalian Memorial Team (HMT) leh FC Zion (A) te kimawl uhi. Minute 14 paipan in HMT te’n D-Box pua zek ah free kick mu uhi. Hiai Free kick HMT apat Henry in pek in Jersey No. 4 in nalhtak in head lut in 1-0 in lead uhi. FC Zion (A) te’n attacking hah bawl mahmah uh a himahleh half tan in goal khum zou tuanlou uhi.
Second half kipan phet minute 3 leng pai manlou in FC Zion (A) apan Jersey No. 9 in nalh tak in goal kap mahleh keeper in ana dang khia a, bawl kizuan pen Jersey No. 7 in goal ah head lut daih hi. Huchia kidraw ua a om laitak un HMT apatMinlun (4) apat pass nalhtak mu in Jersey No. 8 in goal ah peklut in 2-1 in lead nawn uhi. FC Zion (A) ten attacking hah bawl mahmah mah le uh khum zou nawn lou in, full time tan in HMT in vualzawlna ngah uhi.
Second Match ah Suangdoh FC leh Tesiepu FC te kimawl ua, Tesiepu FC in 4-1 in Suangdoh FC te zou uhi.
Next play 5th September 2016
1. Ngailua FC V/S TMT 2:00PM
2. DRS V/S APFC 3:30PM
No comments:
Post a Comment