Lamka, Sept-27 (phualvatimes.com): Thu kizadan in Sept 21, 2016 in Phungzathang Tonsing, MLA 58/CCpur A/C leh Vungzagin Valte, MLA, 56/Thanlon A/C & PS te’n YPA General Headquarter President kiangah laikhak in, huai ah “Etsanna zukkik” di’n ngen uhi. MLA 2-te laithon in ataklat dan in, gam-leh-nam banah YPA adia amau leng panla gige kia hilou a it mahmah ahihdan uh taklang in, etsan(boycott) la khe di’n ngen uhi. Hiai tawh kisai mahin, YPA Cabinet inleng MLA 2–te ngetna tawh kisai tuni’n ngaihtuahna nei uh a, Bill 3-te tawh kisai thuchian leh salphate luang vui ahihma MLA-te tungtang ngaihtuah hilou di’n thusuah bawl uhi.
YPA Gen HQ thusuah in taklatna ah, Oct 8, 2015 in Singtangmite suse thei ding Bill thumte (3 Bills) gum a suai akaih ziak uh leh a mi-le-sate a zuak ziak un T. Phungzathang, MLA leh Vungzagin Valte, MLA-te YPA in etsan puankhum hi’n taklang uh a, hiai etsan in hunchiam neilou hi’n leng taklang uhi.
Gam leitang sisan in tuam a, kahna leh suunna hun bei nailou a, hichibang tunnung a tuni tan a “Kam khat” leng keklou MLA-te koi a om a, bang hih ahi ua chi’n dotna bawl uh a, kisikna, poisakna leh ngaihdam ngetna kamkhat leng tellou a etsan zukkik dia ngetna pen bang chihna hiam chi’n Cabinet in omze bei sa uh ahihdan leng thusuah ah taklang uhi.
Thusuah in ataklat zelna ah, bill thumte tawh kisai thu kichian tak a om maleh, salphate (Martyrs’) luang in vaihawmna/thutanna kichian a tutma leh a luang uh vuiliam ahihma teng MLA-te tungtang ngaihtuah hilou di’n in YPA Gen HQ thusuah in taklang hi.
 |
| MLA 2-te ngetna |
No comments:
Post a Comment