HEADLINES:
Oppn. apan Alt. Govt. adia khualzinna zousiang : PM
New Delhi, Oct-9: Bharatiya Janata Party (BJP) in Parliament ah langpang (opposition) hihna apan solkal bawl ding thiltup aneihte hun sawtlou sunga lawhching hi’n Prime Minister Narendra Modi in tuni’n gen a, Opposition party apan Alternative Government adia khualzinna zawhsiang hita chi hi. Prime Minister in tuni’n New Delhi ah BJP ideologue Pt Deendayal Upadhyay hinkhua leh athusinsakna tuamtuam kigelhna laibu 15 hongkhia a, huai hunah Upadhyay in kum tamtak paisa apan sepsuah dia a thiltupte tuni chiang in atamzaw lawhchingta hi’n gen hi.
BJP pawlin Jana Sangh chief lui Deendayal Upadhyay zahna in tukum sung ‘birth centenary year’ dan in zang uh a, hunpaisate ah BJP in dinmun niamchik nei mahleh Upadhyay tungtawn in political party poimawhtak hongsuak hi’n Prime Minister in gen a, politics pai dingdan ngaihtuahna a neihte zangin tunitan BJP paipih a om tou lai ahihdan leng gen hi. Prime Minister in gamsung mipi kiangah kum 60 paisa a political party-te nasepkhiakte enkik ding in chial a, amaute’n mipi adi’n thil phatuam semkhia uhiam chih sui detdet a, huai tungtawn in election hunte ah thupukna bawl ding inleng ngen hi.
Gam thupi leh hat(strong nation) hihtheihna di’n sepaih hattak neih ngai ahihdan Upadhyay in sinsakna apiakte Prime Minister in kamteh kawm in, tulel dinmun tawh kituak mahmah ahi chi a, khawvel kitaitehna sangtak lakah galvan zanga kitaitehna pen thuguk hilou a, India inleng innvengte apan galvan lam ah chouna liantak tuak a, huaite tunga vualzawh theihna di’n sepaih leh galvan lam puahphat poimawh hi’n gen hi.
BJP President Amit Shah in huai huna athugenna ah, tuhun inleng Upadhyay’ philosophy poimawh mahmah a, global warming leh air & water pollution ziaka India in buaina atuahte leng Upadhyay in genkholhna aneihte laka telkha hi’n gen hi. NDA government in gamdangte apan India a humbit vuak hilou in, lemna leh muanna lam ah leng vaihawmtu dangte hunlai sang in dinmun sangzaw ah India vawksang in omta chi a, BJP tungtawn in India mipite lungsim ah mahni kimuan ngamna om hi’n leng gen hi.
LOCAL NEWS:
Kha 1 sung in gari 125 in kibehlap
Lamka, Oct-9: Dist. Transport Ofice ah Sept 2016 in gari tuamtuam 125 kibehlap in registration bawl in om a, huaite- truck 1, mini truck 8, auto rickshaw 7, van 6, car 11, Jeep 4, 2-wheeler gari 86, maxicap 1 leh others ah 1 tel hi. April-Sept, 2016 sung in gari registration kibawl teng truck 1, mini truck 43, auto 41, van 21, car 72, jeep 23, 2-wheeler gari 499, maxicap 1 leh others ah 4 pha hi. Sept 2016 in revenue Rs. 7,50,317/-mukhia uh a, April-Sept, 2016 sung in Rs. 45,22,242/- mukhia uhi.
GNM training ding 30 lak hiding
Lamka, Oct-9: Female Health Worker Training School, Lamka ah Academic session 2016-17 a GNM training ding mi 30 lak hiding hi. Lunglutna neite’n Medical Directorate website www.manipur health directorate.in ah application form download theih ding a, Oct 10 -13, 2016 sung in Directorate of Health Office ah exam fee ST/SC candidate-te a di’n Rs. 200/- tawh piak luttheih ding hi. GNM zildingte class 10+2 passed hiding a, Oct 14-17, 2016 sung in admit card hawmkhiak hiding a, Oct19, 2016 sunnung dak 2 -3 kikal in N.G. College, Imphal ah written test exam om ding a, huai a lawhchingte Oct 22, 2016 in counselling om ding hi.
Feast of Tabernacles zang ding
Lamka, Oct-9: D. Phailian a The House of Yahweh te’ saina in October 16-23, 2016 sung a biakinn uah ‘Feast of Tabernacles’ leh ‘The Last Great Day’ zang ding uh chihthu kiza hi. Hiai hunsung in Evan. Lienboi Gangte, Pastor Ginvum Ngaihte, Deacon Doukhum, Evan Thangginlian, Deacon S David, Deacon Thangsiam, Pastor K Mangpu, Elder T Solomon, Deacon H Gigin leh makai tuamtuam in thugenna leh program tuamtuam zang ding uhi.
TSA Delhi & NCR Annual Meet
Lamka, Oct-9: Thadou Students’ Assn. Delhi & National Capital Region te’n zan sunnung dak 1:00 in Shankarlal Concert Hall, North Campus, New Delhi ah Annual Meet 2016 nei uh a, Chief Guest in Nemcha Kipgen, MLA pang hi. Guest of Honour in Th. Joy Haokip, Dy Director, Army HQ leh Functional President in L. Kipgen, President, Thadou Innpi, Delhi & NCR pang hi.
SSDC in Oct. 15 tan govt. thutawp pia
Lamka,Oct-9: Saikot Sub-Divn Demand Commitee (SSDC) makaihna in zanin Saikot ah public awareness meeting om a, Saikot Sub-Divn sunga khuate apan mipi 500-1000 paikhawm in, SSDC panlakna 'full support' piak dingin thukim uhi. Programme ah R. Lalkaisang, Secy SSDC in makai a, Lalzawnga Exe. Committee, SSDC in SDO akinlam a omding deih-huai ahihdan gen a, Timothy Z. Zote, Chairman, SSDC in govt. process tawh kisai pulak hi. SSDC in Sept. 23, 2016 in SDO koih ding ngetna DC/CCpur tungtawn in Chief Minister ading memorandum pia uh a, huai ah Oct. 15, 2016 tana hihfel dingin thutawp pia uhi. Maban ah naktak a panlak hiding in gen uh a, ahun ding genkholh theih hikei mahleh Imphal Press Club ah press conference sap ding leh central tanpha ah haksatna tut ding in thukim uhi.
Saikawt PKTP Khawmpi om ding
Lamka, Oct-9: Thingchom EFCI Biakinn ah Oct 18-30, 2016 sung Evangelical Free Church of India nuai a Saikawt Presbytery Khristien Thalai Pawl in ‘45th Annual Conference, 2016’ neiding uhi.
Oct 18, 2016 zinglam dak 10:30 in Pastor Lalrokim, Area Pastor Khawmawi in Khawmpi hong ding a, sunnung dak 3:00 in Business Session om ding a, nitak biakna kikhop ah Leonard Ngurnunmawi in thu gending hi. Oct 29, 2016 zing biakna kikhop ah Pastor Ralsunthang Hmar in thu gending a, sunnung dak 2 in Presbytery Musical Committee makaih in kidemna om ding a, nitak kikhop hun ah Joseph R Joute, Lamka in thu gending hi. Oct 30, 2016 zing biakna kikhop ah Rev Jessai L.Neitham, P/S in thu gending a, sunnung dak 1:30 in District AIDS Prevention & Control Unit (DAPCU), CCpur saina in seminar om ding hi. Nitak biakna kikhop ah Upa Dr Phirthanglien Buhril, Chairman, CKTP in thu gending a, Upa N Joulien Joute in khawmpi khak ding hi.
MPCS Manipur area nuai a Presbytery 4 khawmpi om
Lamka, Oct-9: Mizoram Presbyterian Church Synod (MPCS) Manipur Area a Presbytery 4- Lamka North, Lamka South, Phaipi leh Tanggam nuai a bial omte'n Oct. 6-9,2016 sungin thupi tuamchiat 5-veina nei uhi. Hilltown MPCS in Lamka North Presbytery zintun a, S. Zezaw MPCS in Lamka South Presbytery, New Lamka Presbytery MPCS in Phaipi Presbytery leh D. Khawzim MPCS in Tanggam Presbytery zintun hi. Khawmpi sungin palai paikhawmte’n Presbytery tuamchiat in 2016-17 budget ding a bikhiah ban uah khawmpi vaipaw ding tel uh a, veng/biakinn tuamtuam in saptuam Upa ding a telkhiakte uh ordination a piak ban uah bial/area tuamtuam in agenda a puaklutte uh genkhawm in khawmpi 6-veina Oct. 5-8, 2017 sungin ahun kituak a neih din thupuk uhi.
Lamka North Presbytery in 2016-17 khawmpi moderator dingin Rev. Jerry Zoliansanga, Secy (Sr) in Upa BT. Khawmpu, Secy (Jr) in Rev. Thanglianlal, Treasurer in Upa Paukhawmang leh Statistician in Upa Sawitinkhup telching uh a, moderator leh Secy chihlouh post 2-te kum 3 term hiding a, khawmpi sungin saptuam Upa 2- Lalminsang of Hilltown leh Lunginhen of Tuiningkhal orained uh a, kum 1 budget ding bikhiah uh a, khawmpi 6-veina Torbung MPCS in zintun ding hi. Rev. C. Zorammawia, Adm Secy in khawmpi ah thugen a,bial tuamtuam tuailaite'n lapawl sa uhi.
Audition round ah top 5 tan telkhia
Lamka, Oct- 9: Lamka South Divn BYF in Nov. 3-6, 2016 sungin khawmpi 9veina nei ding uh a, huai ding tawh kisai tuni’n EBC Dorcas Jubilee Guest House a Mini-Auditorium ah Solo Competition ding audition round pan uh a, top 5 tan result puang ngal uhi. Audition round ah numei 15 kihel lak ah top 5 tan in Vunglianmawi of Vengnuam, Grace Ngainunmawi of Dorcas Veng, Chiinlalkim of Mualpi, Hoihmandim of Vengnuam, Ngaidimhoih of Khominthang leh Esther Chinglalven of Bethlehem (mark kibang mu) hi uh a, pasal 22 lak ah top 5 tan in Lalminthang of Mualpi, Stephen Khuptong of Zion Veng, Gouchinmang Samte of College Veng, Lamchinkhup of Pethuel banah V. Chinkhansuan of Vengnuam leh Henry Darthanmawi of College Veng-te te hi uh a, amau khawmpi neih hun ah kidem ding uhi.
UKLF apan kitawpna pia
Lamka, Oct-9: MP Haokip, former Secretary, Department of Information & Publicity, United Kuki Liberation Front (UKLF) in damlouhna leh innsung buaina ziakin Chairman/C-in-C, UKLF kiangah kitawpna (resignation) pia hi. Resignation Letter kimudan in ni 45 paisa apan damlouhna ziakin atunga mawhpuakna piak a omte sem zou nawnlou ahihdan taklang a, UKLF a I & Pr Secretary banah JMG a Co-Chairman leh UKLF Joint Secretary hihna apan awngsut ding in ngetna pia hi.
Kholmun ah Haokip Student in Diamond Jubilee zang ding
Lamka, Oct-9: Haokip Students’ Org.(HSO) in Oct. 10-12, 2016 sungin Kholmun ah kiphuhkhiak nung kum 60 chinna diamond jubilee zang ding uh a, Oct. 10, 2016 nitak dak 6:00 in Lunminthang Haokip, DC/CCpur in Chief hihna tawh uap ding hi. Guest of Honour in Mangkhogin Haokip, IPS C.O 8th IRB leh Functional President in James Doujapao Haokip, MCS SDO/Tuibuong pang ding hi. Programme ah Tongmang Haokip, retd. IRS & former HSO leader in flag kaipalh ding a, Lunkhohen Haokip MDC & Chassadpa In-charge in jubilee hong ding a, Haokip student leh makai sisate suunna minute 2 om ding hi.
Oct. 11, 2016 zinglam dak 9:30 in Chief Guest in Chief Minister O Ibobi pangin jubilee monolith hong ding a, Rev. Dr. Hawlngam Haokip, President KBC in lan ding hi. Functional President in Thangjahao Haokip, Chassadpa (Haokip Bulpipa) pang ding a, Chief Host in IFCD Minister Ngamthang Haokip; TN Haokip, MLA & President MPCC leh Yamthong Haokip, MLA & Chairman Jubilee Committee pang ding uhi. Nitak in Chief Guest in D.P Haokip, IRS Principal Comm. of Income Tax, Mumbai pang ding a, Guest of Honour in Khaipao Haokip, MDC/Kholmun leh Functional President in Thangjang Haokip, President KIC pang ding hi.
Oct. 12, 2016 sun hun ah Chief Guest in Achin Haokip, IPS & former HSO leader pang ding a, Guest of Honour in Lalboi Haokip, Addl. SP Traffic leh Functional President in Joel Haokip, MCS SDO/Lungtin pang ding hi. Nitak in Chief Guest in Langkhanpau Guite, Chairman ADC/CCpur pang ding a, Guest of Honour in Lal Hossan, Vice Chairman ADC/CCpur leh Functional President in Onjamang Haokip, ex-MLA pang ding hi. Huai hunsung in Mr. & Miss Contest leng om ding hi.
CBA Lamka Khawk Golden Jubilee
Lamka, Oct-9: CBA Biakinn, Lanva ah Oct 7 nitak apan Chin Baptist Assn. (CBA) Lamka Khawk kum 50 chin Golden Jubilee lawpna om a, kidemna tuamtuam leng om hi. Huai hunsung in Pastor MC Pau Khan Tuang, Local Pastor Sinai Church in Souvenir hong a, Rev Dr.Sut Khan Thang, Executive Secy.CBA in Jubilee Suang hong in Pastor Palet Thuomngel, Chairman, LKC in Pathian kiang ah lan hi. Jubilee lawpsung in Pro. Daimuanlian, HCH Supervisor; Pro Khup Lian Mang; Pastor Dong Sian Pau, Local Pastor Moreh; Rev. Dr. Sut Khan Thang leh Pastor Palet Thuomngel te’n Pathian thu gen uh a, tunitak in Pastor Palet Thuomngel, Chairman, LKC in Jubilee lawpna khak hi.
D. Phailian ah Biakinn thak kihong
Lamka, Oct-9: Evangelical Churches Assn. D. Phailian ah tuni zinglam dak 11:00 in Upa N.T. Kama, Chairman, Local Committee in Biakinn thak hong in Pathian kiang ah thumna in lan hi. Huai hun ah Rev. LB Angam, Director, ECA, ECCI in Pathian thu gen a, Rev Lunkhoneh Area Pastor, LLA, EBCC D. Phailian, MPSC Centenary Church D. Phailian, MGP D. Phailian, Rev Thangjakap, Director Youth Dept. ECA, ECCI te’n thugenna nei uhi.
SUUNNA:
Mrs Niangkhenting @ Nukhen ( 65) w/o Kh P Dala of Tualnuam Village damlouhna ziakin tunitaklam dak 5:30 in si a, Oct. 10, 2016 in Tualnuam hanmual ah kivui ding hi. Amah bel V K Liana Khaute @ Khaute Photography pianna nu ahi.
IMPHAL NEWS:
MU' thupukna mawhpaih
Thupukna zukkik ahih keileh Indefinite bandh puang ding
Imphal, Oct-9: All Tribal Students’ Union Manipur (ATSUM), All Naga Students’ Assn. Manipur (ANSAM), Kuki Students’ Orgn. (KSO), Manipur University Tribal Students’ Union (MUTSU) leh singtanggam a Tribal student orgn. tuamtuam te’n Nagaram a ATSUM administrative office ah tuni’n joint meeting nei uh a, huai hun ah Manipur University thuneite’n amau khut ah kitawi in Central Education Institution (reservation in admission) Amendment Act 2012 leh Manipur High Court thupiak in thupukna a bawl uh tawh kisai mawhpaih thupuang uh a, UGC in Central Education Institution (CEI) leh Manipur High Court thupiak zuih ding theisak mahle uh MU Academic Council te’n mi bangzahhiam-te deihtelna a thupukna a bawl un Parliament Act kalh hi’n gen uhi.
Huai tawh kisai in MU a Professor 4 te’n Sept 12, 2016 in UGC official-te kimuhpih uh a, huai hun ah UGC official te’n March 23, 2016 ni a reservation policy tawh kisai in Central University 40 kiangah general letter thawn uh a, huai nung in June 3, 2016 in admission reservation tawh kisai in hilhchetna thawn nawn uh a, Professor 4-te kiangah June 3, 2016 ni a reservation policy omsa zui ding in theihsak uhi. UGC thupiak dungzui in MU a Chancellor D.M. Nachane in Vice Chancellor Prof. M. Dhaneshwar Singh kiangah academic year 2014-15 leh 2015-16 tawh kibang in CEI Act 2006 leh Amendment Act 2012 zui ding in theisak mahleh MU thuneite’n mimal bangzahhiam-te deihtelna in UGC leh Parliament Act kalh in UGC thupiak zuilou uh a, hiai in MU sung ah buaina om sak a, reservation quantum ahihleh nam khenkhat deihna tungtawn a kibawl hilou in mi tam (population) dungzui a reservation bikhiah hi a, huai tungtang ah MU thuneite’n tuni akipan ni 4 sung a thupukna a bawl uh zukkik ding in theisak uh a, hunchiam sung a zukkik ahihkeileh singtang bial teng ah hunchiam omlou a total bandh puang ding in taklang uhi.
Unemployment allowance pedin phut
Imphal, Oct-9: Sagolband Tera Thengmaijam Leirak a CPI(M-L) office ah tuni’n press conference om a, huai hun ah CPI(M-L) Manipur State Committee a Secy. S. Samungou in media-te tawh kimuhna hun ah state govt. in Haryana a sepna neilou tuailai-te allownace piak tawh kibang model a zuiH ding uh chi a, Manipur a tuailai Class X apan post graduate tan-te allowance a piak dung uh chi’n phutna bawl hi. Aman agenzelna ah Congress govt. in Manipur ah sualna kiamsak banah etkai theihna ding in lekha siam tuailai lakh 7-te allowance a piak ding uh chi a, govt. in tourism sector puah ding a lawhsap uh tawh kisai in mawhsak thu gen a, tourism sector puah hoih hileh tuailai tamtak te’n sepnang nei ding uh a, huai tawh kisai in CPI(M-L) Manipur State Committee te’n Governor kiangah memorandum pe ding uh hi’n taklang hi.
Misi khat muhkhiak in om
Imphal, Oct-9: Imphal East a Heingang Police in a huamkhak Ahallup area ah tuni zingsang a misi khat muhkhiak in om hi. Akigendan in walking paite’n zingsang dak 5:00 velin Ahallup leh Mantriphukhri kikal a tuilou lakah kum 35-40 vel ding non-local dia gintak misi khat mukhia in police-te theisak uhi. Police-te theihsak nung in Heingang Police Station a Investigation Officer leh Forensics Dept. a personnel te’n JNIMS morgue ah misi koih uh hi’n kigen hi.
Galvan hunkhawp mukhia
Imphal, Oct-9: Senapati district a 28-A/R te’n mi khat mankhia uh a, amah apan AK-47 rifle leh magazine khat banah tang 10 mukhia uh a, galvan muhkhiak-te tawh police-te khut ah pekhia uh hi’n kigen hi. Akigendan in 28-A/R te’n zan nitak dak 10:00 velin Kangpokpi a SL veng a operation a bawlna uah Lamminlal (18) tenna inn apan galvan tuamtuam muhkhia uh a, Police te’n Lamminlal in helpawl tawh kizopna nei hiam ahih keileh galvan zuak hiam chih theih sawm in suizuina pan uh hi’n kigen hi.
Cong MLA-te kitawp nawnlou ding
Imphal, Oct-9: Kangla Siphai Youth Orgn. (KSYO) building hongkhiatna om a, huai ah Khurai A/C MLA Ng. Bijoy in a thugenna ah tunai zek in party leh MLA apan kitawp N. Biren sulnung zui in maban ah Congress party apan MLA-te kitawp nawnlou ding uh chi a, tuni a building honkhiat leng MLA local area development fund zang a kibawl hi a, Imphal apan Kangla Siphai gamla kei mahleh infrastructure development lam ah tuantual petmah hi’n kigen hi.
NE Fashion Design Awards 2016
Imphal, Oct-9: Manipur adia masapen ding in BK Event and Entertainment leh Raj Enterprises-te saina banah Northeast India Fashion & Design Council leh Manipur Tourism Development Council huhna in Nov 11, 2016 in Northeast Fashion Design Award (NEFDA) 2016 om ding a, huai tawh kisai in Manipur Press Club ah tuni’n press conference om a, Informing media Director B. Khaba in media-te tawh kimuhna hun ah Oct 22, 2016 ni apan Internal Youth Hostel mun ah audition round kipan ding a, grand finale ahihleh Nov 11, 2016 in DM College a Multipurpose Hall mun ah om ding a, huai a ding in NorthEast bial apan designer 16 telkhiak hiding in gen hi. NEFDA 2016 hun ah main award 3 om ding a, cash award, memento leh certificate piak hiding uh a, NEFDA 2016 sub title award 4 – Best Traditional Clothing, Best Wedding Gown, Best Creative Design leh Best Model award la te’n leng cash award, memento leh certificate mu ding uh a, award adin sum Rs. 10 lakh bikhiah hi’n gen uhi. Hiai hun Dr. V. Ningombam, Executive Member, NEFDA leh RK John Singh te’n leng uap uhi.
Nasemtu pimang : KCP kipuang
Imphal, Oct-9: Meltheihlouh helpawl a tel hidia gintak galvan tawi mi 3 velin Oct 6, 2016 nitak in Senapati district a Sikul Police Station huamsung a om Tuishim village a Prime Minister Gram Sadak Yojana (PMGSY) tungtawn a Leikot-Tuishim inter village lampi puah hoihna a nasem mi 1 pimang uh a, Police te’n panla mahle uh muhkhiak hilou in gen uhi. Pimang a om bel Sorokhaibam Rameshwor (54) hi a, lampi gei a giahbuk ah nasem mi 5 omte lakah amah pimang in om a, thiltung tawh kisai in Contractor kiangah sum ngetna tawh kisai hidia gintak in om hi. Thiltung tawh kisai in KCP (Poirei-Meitei)-te tuni’n kipuang uh a, Sorokhaibam kem uh ahihdan leh Contractor in KCP (Poirei-Meitei)te theihsakna a ngaihsak louh ziak chi’n gen uh a, Contractor in a makai-te uh tawh kihoulemna nei ding a theisak uh hi’n leng taklang uhi.
TUNI THUPI:
“Na omna peuh uah sisan himhim, vasa hiam, gamsa hiam sisan na ne ding uh ahi kei.” - Levitikas 7:26
EDITORIAL:
Sial(mithun) humbit poimawh
‘An Animal of Indian Pride’ chih hial a om Sial (mithun) kichi igam ah kepbit poimawh mahmah hi. I gam a dingin sial kichi manpha a, i pupa-khang ua pan i ngaihsan penpen uleh i zahtak mahmah uh hi a, tua ziakin humbitna (protection) lam i ngaih poimawh mahmah uh ngaileh kilawm hi. Nopni-dahni a pupa dan a inndongta kihouna om hun chiangin leng sial mah genlat in om sek a, sial hiai zah non kaih ding uh ahihkeileh sial hiai manzah non piak ding uh chihte i ki-nget(demand) uh ahi hi. I pupa khang apan dinmun poimawhtak len sial pen i gam ah tawm hiaihiai in kilang a, bangchi leh kepbit ding hiam chih lam i ngaihtuah uh poimawh sak in om hi.
Anuam leh haksa hun a sial hiai zah man i chihsekte un sial manphatna agen chih pen upa lamte’n thei mahmah ding uh a, khangthakte’ lakah sial manphatna (value) pen mansuah deuhdeuh i hih khakding uh lauhuai mahmah hi. Khangthakte’ theih dia deihhuai mahmah ahihleh, innkuan/inndongta kihouna hunah i kilemtheih leh sialkhat leh Rs 100/- leng a kibang (equivalent) in simtheih a, huchi ahihkeileh sial khat man taktak sum kilak theihin om mawk hi. Tu in a ‘ber’ kha i maituahta uh a, zi leh pasal a kinei hiam ahihkeileh thubuai-labuai neuhneuh tuaktou i tam deuhdeuh dinga, thunuam, thumanpha leh thusia-lasia tuamtuam hong om touding ahihna ah, sial ‘value’ a kigapna hunkhop hong om touding chih haihvual hilou hi. Tua ziakin, sial manphatna ngaihtuah in, a taktaka i gam a sial bangzah om a, bangchibang a humbit ding hiam chih ngaihsuthuai mahmah hi.
Kum tamlou paisa in Lamka khawpi ah Zomi Nam Ni zatna kawmin Mithun festival kichi thupitakin neih in om hi. Himahleh, i ngaihtuah taktak chiangin, i thil saidan uh mulkimhuai in chi mul hon thousak hi. Nagaland state in Hornbill festival zanga, Manipur in Sangai Festival ahihkeileh India malsuahbial state tuamtuam te’n a gamsung ua ganhing a ngaihsan diakte uh minzang in festival poimawh taktak zang uhi. Tua hunah, bangchileh a gam ua ganhing omte kepbit (protect) theihding hiam chihte lungsim a koihkawm in program zang ua, eilawi in bel Football First Prize dingin sial khat hi geih mai, Zomi Nam Ni lopna dinga sialkhat chih hinawn, a langlang ah festival lona dinga sial gou ziahziah maimai, ei-le-ei kituisa buah ihi hi. Mite’n bangchileh gamsa leh vasa tuamtuamte humbit theihding hiam chih atangkoupih lai ua eite’n nop bawlna dinga zangmai chihte khawng nuam hetlou hi.
India malsuahbial adinga sial tamna state-te ahihleh Arunachal Pradesh, Nagaland, Manipur leh Mizoram state hi a, NE tawh kizom helhel Burma a Chin state leh Bangladesh a Chittagong Hill tract ah om zek chih ahi. Tua ziakin, Mithun Inhabited Areas in the World chih minvuah in ana om hial hi. Mithun festival tawh kisai Manipur a singtangmi adiakin CCpur district a omte’n i kisaktheihpih mahmah uhi. Kisaktheihpih huai tham him leng ahi hi. Himahleh, a venbitna leh kepbitna lam tawh kisai in mawhpuakna i la tawm mahmah uhi.
CCpur context ah sial (mithun) simna (census) bawl deihhuai hi. Hun paisate tawh et in sial population pen kiam mahmah dingin ginhuai hi. Henglep bial ah om zekdinga, huchilou in Thanlon Sub-Division a om Bungpilon area ah sahpen maithei a, a zomin, Hanship leh Bukpi banah Thanlon/Dialkhai area ah bangzahhiam lel om laidingin gintakhuai hi. Khua khenkhat-te gendan ngialin nidangin gammang apan sialte hong pawtkhia in inn kong (varandah) ah chii (salt) hong liaksek uh a, a chii liahna uleng kong varandah a singpekte’ kuakzou hial a, tuni chiangin sial hunkhop khawsung ah honglut ngam nawnlou chi uhi. ‘Cattle of Mountain” chih a leng om sial-te i pupa khang ua pan dinmun poimawh mahmah ana luah ahihmanin atul maiding uh lauhuai a, bangchileh i gam ah sial kepbitna om theiding hiam chih kawmin, bangzah mawngmawng sial i neilai uam chihte kisimna neihtel deihhuai mahmah ding hi. I lakah civil society organisation tuamtuam omte leh forest department te’n hiai tungtang ah panlak theihna omlou ding hiam chih ut huai mahmah hi. Manipur singtangmite’ adingin sial kichi socio-economic leh cultural life adingin poimawh hi.
No comments:
Post a Comment