HEADLINES:
Manipur a teng nam tuamtuamte kikhen thei ding omlou: O. Ibobi
CM O. Ibobi Singh in HSO Diamond Jub. Monolith hong
Lamka, Oct-12: Manipur Chief Minister O. Ibobi Singh in tuni’n CCpur dist. hongpha in, Kholmun Playground a Haokip Students’ Organization Diamond Jubilee lopna Chief Guest hihna tawh uap in Jubilee suang hong hi. Functional President in Thangjahao Haokip, Chassadpa (Haokip Bulpipa), Chief Host in Ngamthang Haokip, IFCD Minister; TN Haokip, Saikot A/C MLA & President MPCC leh Yamthong Haokip, Saikul A/C MLA pang uhi. VIP 6-te’n Diamond Jubilee dak tum in Rev. Dr. Hawlngam Haokip, President, KBC in Jubilee Monolith Pathian kiang ah lan in Chief Guest in hong a, Haokip Bulpipa Thangjahao Haokip in Jubilee Baloon khah hi. Huai hun, LM Khaute, DGP Manipur inleng uap hi.
Chief Guest in athugenna ah lei ah gam/gou neih teng sihnung chiangin vangam ah kipaw theilou in Pathian a hi a, Manipur a teng community tuamtuam te’n I tenna uh vangam banga bawl ding i mawhpuak hi a, nam tuamtuam om mahleng, gam khat a omkhawm i hihna uah kikhenthei omlou a, kitheisiam leh ki-itna tawh kituak taka tengkhawm poimawh chi hi. Manipur kichi gam hoih leh nuam ahihman in India Prime Minister lui Pt. Jawaharlal Nehru in ‘Switzerland of India’ chi’n ana minlawh hial a, gamsung ah tourist centre tamtak om in, gam hingsakna dingin singtanggam ah plantation tam theilam bawl a, Switzerland gam banga eimah in gam khantouh leh minthanna dia panlak poimawh chi hi.
Ngamthang Haokip, IFCD Minister in Jubilee Souvenir hong in unau/suahpih khat kal ah kisiatna/kitheihsiam louhna teng tawpsan a, kithutuak a pumkhat-a i omkhawm uh hunta chi’n mipi paikhawmte chial hi. Thangsei Haokip, President, Kuki Inpi, Manipur telin mi tuamtuam apan thugen ngaihkhiakna om in, cultural troupe tuamtuam in nam lam alah ban uah artist-te apan la ngaihkhiak in om hi. Nitak in Jubilee programme khakna (closing) om a, Chief Guest in Langkhanpau Guite, Chairman, ADC/CCpur pang a, Guest of Honour in Lal Hossan, Vice Chairman, ADC/CCpur leh Functional President in Onjamang Haokip, Ex-MLA pang uhi. Huai hun ah HSO Mr & Miss Contest om a, Tungjang Haokip, Gen. Secy, Haokip Peoples Council in HSO Flag kaikhia in, Pro. Pastor Lalboi Haokip in thumna in hun khak hi.
Aung Suu Kyi in ni 4 sung India hongpha ding
New Delhi, Oct-12: Myanmarese leader Daw San Suu Kyi in State Counsellor hihna aletnung a India gam hong veh masakna penpen dingin October 16, 2016 chiangin New Delhi hongtung dinga, BRICS-BIMSTEC Outreach Summit hun hong uap ding hi. Hiai hunah Suu Kyi in leitung gam makai tuamtuamte houlimpihna neiding chihthu leng om hi.
Myanmarese leader Daw Aung San Suu Kyi ahihleh October 16 in India hongtung dinga, Goa a BRICS-BIMSTEC Outreach Summit ah kihel in thugenna hun zangding a, Prime Minister Narendra tawh gamnih kikal a kitauna hoihzawsem om theihna dingin houlimna neiding uh chi uhi. External Affairs Ministry thusuakin agendanin, Suu Kyi ahihleh Modi in ngainatakin chialna nei a, aman leng Modi chialna zahtak mahmah kawmin India ah October 17-19, 2016 sung hun zangding chi uhi. Suu Kyi in Oct 16, 2016 in BRICS-BIMSTEC summit a Myanmar delegation team-te makaih ding ahi chi uhi. Amah bel,
National League for Democracy makai poimawh pen ahih banah, Myanmar’s Foreign Minister leng hi a, kum 50 val military rule nuai a ana khawsa ahihban ah haksatna tawpkhawk ana thuak ahi hi.
Suu Kyi ahihleh Minister leh official tamtakin hon zuiding uh chih hi a, India tawh gamgi tungtang (border management), helpawlte’ vai leh issue tuamtuam genkhawm ding uh chihthu kiza a, hiai kihouna in Indo-Myanmar border a helpawlte’ chetdan hihkiam zou mahmah dia lamet ahi chi uhi. August, 2016 in Myanmarese President U Htin Kyaw in India hongpha a, Prime Minister Modi tawh kihouna aneih tungtawn un helpawlte’ gamtatna daizou tuan mahmah a chiamteh ahi hi. Hibangkalah, Suu Kyi in India hongphak chiangin, President Pranab Mukherjee banah External Affairs Minister Sushma Swaraj telin official tuamtuam kimuhpih dinga, business summit leng nei dinga, gamnih kala ki sumdawntuahna tawh kisai in economic &commercial meeting leng company tuamtuam tawh neikhawm ding uh chi uhi.
LOCAL NEWS:
Tuilian’ hihsiat-te enkhia uh
Lamka, Oct-12: Health Minister Korungthang leh Lhukhosei Zou @ Sesei Zou, Chairman ADC/Chandel te’n tuni zinglam in Moreh ah Oct 10, 2016 a Khochailoh lui leh Lailoh lui a tuilian’ in tenna inn leh thil tuamtuam ahihsiat-te amun ah enkhia uhi. Tuilian in Chavangphai lei (bridge), inn tamtak, khawsung a fencing leh lampi hihsia hi’n kigen hi. Tuilian ziakin khawsung mipi’n buaina thupitak tuak uh a, Minister leh Chairman in mipi’ ading silpaulin, antang, um-le-bel (utensil) tamtak pia uhi.
Annual games & sports hongkhia
Lamka, Oct-12: T. Goukhomang, ZEO/CCpur in tuni zinglam in Tuaitengphai a Teresa’s school ah Annual games and sports hongkhia hi. Aman agenna ah laisim kia hilou in damtheihna ding, taksa leh lungsim hat leh chidamna ding in games & sports poimawh hi’n gen hi. Sports siam te’ khawvel ah mi theihphak ban ah mihausa tamtak om uh a, sports tungtawna khawvel theihphak leh mihausa kihithei hi’n gen hi. Student te’n tupguh hoihtak nei a laisim ding, mahni taksa leh lungsim hatna, damtheihna ding a sports ngai poimawh ding in chial hi.
TRATDA in R-Day’ cum- Gen. meeting nei
Lamka, Oct-11: Tipaimukh Road Area Transport Dev. Assn.(TRATDA) in tuni’n IB Road a KKL complex ah 28th Rising Day-cum-General meeting, 2016 nei uh a, 1st session ah S. Lalpi, Chairman/TRATDA makaih in Gen. Body meeting om hi. Second session ah Rising Day zatna nei uh a, Chief Guest in V. Hangkhanlian, V/President, BJP Manipur pang a, Functional President in Lalhmangpui Fimate, MDC (Pherjawl) leh Guest of Honour in Th. Jamchinthang Simte, MDC (Thanlon) pang hi. Rev. Kamminthang, DS/Thanlon, MELC in gari’ neite Pathian kiang ah thumsak in gari chabi-te lan hi. Gen. Body meeting ah member paikhawmte’n maban panlak dingdan genkhawm uh a, registration fee Rs. 25,000/- hisek pen tukum apan Rs. 50,000/- hita dingin thupuk uhi.
Chief Guest in state govt. in kikawmtuahna (transportation) ading transport facility gina apiak theihlouh lai a, ei leh ei kipanpih tuah a hibang panlakna kipahpih thupi hi’n gen a, Central ah BJP in vaihawmna lenta ahihman in amau tawh semkhawm thei dia panlak theihdan om ding in gen a, huai dia maphutu a pang-ut ahihman mipi kithuahpihna deih ahihdan gen in, I pankhawmna in gamsung bawlhoih hiding in gen hi.
TRATDA nuai ah tulel in member 115 vel omlak ah active member (gari service) 80 vel om a, huailak ah passenger gari 50 leh commercial gari 30 vel om hi’n kigen a, niteng in gari 15 vel kipeltuah gige hi’n kigen hi.
Monitoring team te’n enkhia uh
Lamka, Oct-12: Dist. Malaria Deptt a Monitoring team apan Zara, Male Health Superviser makaih in tuni’n Khuangkhai PHSC, Alpha PHSC leh New Khaukual PHSC huapsung a khua tuamtuam ah National Vector Borne Disease Control Programme/CCpur te’n thousilen (Long Lasting Insecticide Net) ahawmkhiat uh enkhia uhi. Monitoring team te’n thousilen kihawmkhia-te mipi’n phattuampih uh hiam? chih inn chih a lut in inn neitute houlimpih uh a, thousilen hoihtaka zang na uh hiam chih leng enkhia uhi.
UDISE form leh student data capture format
Lamka, Oct-12: CCpur block nuai a school recognized leh recognized louh hitaleh school bawl leh abawl lellel te’n UDISE form leh student data capture format Oct 22, 2016 tan in DI of schools, CCpur kiang ah lak ngai a, huai lalou school te’n govt. apan buaina tuak ding uh hi’n DI of schools/CCpur apan kiza hi.
Pre-paid meter box 13200 activate
Lamka, Oct-12: Manipur State Power Distribution Company Ltd. (MSPDCL)/CCpur Divn. (Electric Deptt.) te’n khawpi sung veng tuamtuam ah Electric pre-paid meter box 15250 thuah (install) uh a, huai lak ah 13200 activate uhi.
Campaign for Unity through Music
Lamka, Oct-12: Joint Artists Fellowship saina in tuni’n Campaign for Unity through Music thupi pansan in Road Show om a, sunnung dak 2:00 in Khawmawi Bazaar ah kipan a, Tuibuong, Police Station, Rengkai Bazaar, Saikawt Field Veng, Hmuia Veng, Hebron New Lamka, Kawnpui (NKT), Bungmual, Chengkon leh Nehru marg Junction ah hun zang uhi. Road show in a tup pen u-leh-nau laizomte laka innkuan khat hihna thukzaw sem a pholhkhiak ding hi'n kigen hi.
Seikam kipan nawn ding
Kholmun Youth Club te saina a Kholmun playground a 8th Seikam Memorial Open Football Tournament neih a om Haokip Students Orgn. ten Diamond Jubilee Kholmun playground a neih ziakun dinkhawl a, Oct. 13, 2016 in ngeina bang in tournament paizom nawn ding hi. Tua banah, Lamka Sports Club (LSC) leh Vajing YC te kimawl ding bandh ziaka postponed a om pen Oct. 14, 2016 aneih ding a gen himahleh lemtanlouhna om ziakin hun dang adia suan in om hi.
Songpi Area Chavang Golseh kipan
Songpi Grouping Centre ah tuni’n Songpi Area Chavang Golseh 2016 honna om a, Chief Guest in T. Khaikhomang, MDC/Lanva & Chairman Fin. Commiitee, ADC/CCpur pang a, Guest of Honour in CT. Lian Guite, MDC/New Lamka (West) leh Functional President in Songsei Haokip, President Songpi Area Chief Assn pang hi. Chief Guest in Songpi area te’n a support gige na tung uah kipahthu gen in maban ah leng pangkhawm lai dingin ngen a, Pearsonmun leh Songpi kikal lampi bawlhoih hiding in gen hi.
C T Lian in sport leh cultural exchange mah kituahna dia hoihpen hidan in gen a, mihingte kimuh a kitheihtam in kitanau semna guan ahihdan gen in, kipolhkhawmna atam theilam bawlhoih a, pau leh ham a kikhen thei ding ki hilou chi hi. Chavang Golseh ah Songpi area a khua tuamtuam apan team/club hunkhop paikhawm uh a, Oct. 15, 2016 in a zou ding uhi.
SUUNNA:
Lamngaihkim (32) w/o Khupthianlal of Gamhui village, tuzing in gilna in si a, nitaklam in akhua uah kivui hi.
N. Ginzalian (59) h/o Ningnem of Pearsonmun, tulel a AIR Colony, Imphal a om tuni nitaklam dak 3:40 velin RIMS ah sinna in si a, Pearsonmun hanmual ah vui hiding hi.
IMPHAL NEWS:
CM tungah ngawhna nial
Imphal, Oct-12: Manipur University (MU) a admission reservation thubuai tawh kisai a State govt. thupuangtu M. Okendro in CM tunga ngawhna nial a, thubuai ah CM in kigolh khakna a neih louh banah tutan in University academic activity-te ah state govt. kigolh kha lou chi hi. Huai tungtang ah M. Okendro in CM Secretariat ah Oct 10, 2016 in MU a VC in-charge, registrar banah MU a high ranking official-te tawh meeting hun ah admission thu tawh kisai genkhawm hidan in gen hi.. Thubuai ziak in Manipur ah law & order in siatlam a nawt theih banah mipi kalah kituahna deng deltak in om a, huai ziak in state govt. daitak in om mawk thei lou a, University te’n thubuai sukvengna dia pan alakna uah govt. in kithuahpih ding chiam chi’n taklang hi.
Singjamei PS in DGP Trophy la ding
Imphal, Oct-12: Manipur Police Dept. a screening committee te’n kum 2016 adia ‘DGP Trophy for the best Police Station’ la ding in Imphal West District a Singjamei Police Station telkhia uh a, 2na la ding in Thoubal Police Station leh Bishnupur Police station telkhia uh a, 3na la ding in Ukhrul Police station leh Kangpokpi Police Station telkhia uhi. ‘Best Police Officer for the year 2016’ la ding a Asst. Sub-Inspector Kh. Birendra Singh of Singjamei Police Station telkhiak hi a, Manipur Police Rising day Oct 19, 2016 ni a trophies, commendation certificate leh cash awards-te hawmkhiak hiding in gen uhi.
Dr. Kh. Ratan in HRD Minister kimuhpih
Imphal, Oct-12: Education Minister Dr. Kh. Ratan Kumar in tunitak dak 5:30 velin Shastri Bhavan ah Union Minister for Human Resource Development Prakash Javadekar va kimuhpih a, huai hun ah student te’n buaina omlou a laisim a sutzop theihna ding un Manipur University a PG Admission tawh kisai a Academic Council-te thupukna ziak a thubuai vengsak dia panla ding leh a kintheipen a regular Vice Chancellor ding guang dia ngetna in memorandum pia hi’n gen uhi. Memorandum ah Academic Council thupukna ziak a thubuai in Manipur a law & order tanpha adia ngaihkhawk huai a, class tan pha kipan nailou a, tribal student body te’n ni 4 sung a thupukna zukkik ahih keileh Manipur ah blockade bawl sawm uhi. Manipur University Tribal Student Union te’n MU ah Central Educational Institution (Reservation in Admission) Amendment Act 2012 zuih masiah student-te assignment banah test/class tanpha lalou ding in ngetna bawl uh a, Union Minister in kal 1 sung a dawnna peding in theisak chi’n gen uhi.
CM kiangah memorandum pia
Imphal, Oct-12: Manipur Civil Service Combine Competitive (main) exam 2016 a candidate te’n MPSC tellou a independent body etzuina a tunai zek a exam paper-te mass re-evaluation bawl ding, MPSC bawlhoih thak ding, evaluation ah scaling process zat ding phutna in rally pai uhi. Rally ahihleh zinglam dak 11:00 in North AOC a MPSC office ah kipan in CM bungalow zuan uh a, Police te’n PCTC oil depot gei ah rally pai-te dal in DM College sung ah hawl lut uh a, huai nungin memorandum pe ding a CM kimuhpih ding in mi 4 phal uhi. Huai tawh kisai a kiphinna neite’n Sept 4-23, 2016 sung a exam sai hi a, ni 10 sung a candidate 1130-te result Oct 4, 2016 ni a puangkhiak hi a, candidate 1130 teng in main exam ah mark 300 chiat pua paper 8 gelh uh a, candidate 1130-te paper teng (1130x8=9040) 9040 pha a, hun sawtlou sung MPSC bang chi dan a checking zou thei uh hiam chih dotna bawl uhi. Extra paper piak hilou ding chih kigelh mahleh invigilator khenkhat te’n candidate-te kiangah extra paper pia uh a, UPSC dan in English a qualifying criteria 33% himahleh MCSCC(main) exam ah 40% hi’n gen uhi.
MUEWS te’n theihsakna bawl
Imphal, Oct-12: Manipur University Eimi Welfare Society te’n tuni a thusuah a bawlna uah Manipur University thuneite’n ut dandan a vaihawm in admission tawh kisai a tribal student-te tanvou nelhsiah ahihdan kuapeuh in thei a, ATSUM-te saina banah KSO, ANSAM, MUTSU leh tribe orgn. tuamtuam-te gupna a Oct 13, 2016 in mass protest rally om ding ahihdan campus sung leh pua ah akisaipih EIMIS teng theihsak tupna hi’n gen uhi. Huai tawh kisai a EIMIS member lui leh thak-te, admission bawl ding-te, akisaipih mimal, parents leh guardian te’n zinglam 10:00 in TRI apan Governor office tan rally pai hun uap din ngetna bawl uh hi’n kigen hi.
KNF founder sih champha zatna om
Imphal, Oct-12: Sadar Hills a Phaijang village ah tuni’n Kuki National Front (KNF) founder (late) Nehkholun Kuki sih champha a 23veina zatna om a, huai hun ah ST. Thangboi, President, KNF makaih in KNF member, Kuki Inpi Manipur, Kuki Inpi Sadar Hills, Thadou Inpi Sadar Hills, KSO Sadar Hills, TSA Sadar Hills telin CSO tuamtuam te’n Nehkholun memorial site ah pak piakna hun leh zahtakna latsakna in minute 1 dai dide in om uhi. Huai hun ah Lunpi Gangte, Vice President, KIM in Nehkholun bel Kuki mite mit vaksaktu ahih ziak in makai diktak hi a, KNF phutkhiakna dia mipi ngaihdan lakkhawmna ding in Kuki-te omna teng ah beh leh nam a khentuam neilou in Kuki teng kimuhpih a, ‘Mahatma Gandhi of the Kuki’ chih theih a, Kuki makaite lakah Kukiland movement pankhetu hi’n gen hi. Aaron Kuki, Gen. Secy., KNF banah UPF thupuangtu in New Delhi ah Oct 19, 2016 in India govt. leh Manipur govt. tawh Kuki Political talk tawh kisai a round 2na om ding a, mipite’n kihouna a lawhchinna dia thumna ah phok chiat ding in ngetna bawl hi.
JCB driver tawh kisai hilhchian
Imphal, Oct-12: Twichin a JCB driver pimangna tawh kisai in Gogou Vaiphei, Secy., Info & Pub, KNF(N) in hilhchetna bawl a, huai ah Nongdam Development Committee (NDC) te’n KCP (Poirei) leh KNF(N) te’n mi pimang a ngawhna a bawl uh thuzuau hi a, Pakai Kipgen leh James, C-in-C, KNF(N) leng ngawh uh a, Pakai Kipgen kua hihiam chih tanpha theikha lou in James hih minsiat sawmna banah phaizang leh Kuki-te kalah thil hoihlou tunsam sawmna hidan in gen uhi.
TUNI THUPI:
“Mi dik kam in pilna thu a gen naknak, a lei in vaihawm diktatna thu a gen gige hi.” – Sam 37:30
EDITORIAL:
Education system tungtang
India gam adingin siamsinna (education) kichi poimawh mahmah a, leitung a mihing omzah tamna gam nihna leng ahi hi. Siamsinna tungtang en vengveng le hang, population ratio tawh et in lehkhasiam(literate) niam mahmah lai maithei hi. Tuaziak mah leng ahi ding a, India in siamsinna tawh kisai nasatakin awlmawh a, school omlouhna khua tanpha ah teacher koih in nasatakin panla uhi. India adingin education mahmah poimawhpen ‘top priorities’ hi’n kilang hi.
Term lui a India a vaihawmna len Congress makaihna UPA government in Central Board of Secondary Education(CBSE) saina examination ah class X pe’n optional dingin koih uh a, class VIII tan sinte adingin ‘no-fail policy’ kichi bawlkhia uhi. Exam-na a lawhsap khak ziakin naupang chikchikte’n kingaihsiatna nei in, a amau leh amau a hinna uh kila(suicide) a hunkhop omsek hi. CBSE policy in a thiltup khat ahihleh student te’n school ah zalentak a hinkhua a zatding uh, lehkha siamlouh ziaka school apan kinawhkhia ahihkeileh ‘drop out’ a omlouh ding chih ahi hi.
Huchi kalah Human Rights tawh kisai i gam ah hong hat hiaihiai a, nidang in naupangte chiang zang a soisak hisek mahle uh tuni chiangin court thusuak dungzui in teacher te’n naupangte’ muh a chiang(stick) atawi nawnlouh ding uh, chiang leh khutzang a naupangte soisak nawnlouh ding chih hita . Teacher hunkhop in naupangte chiang leh vanzat chi tuamtuam zanga a soisak sek ziakun huai in naupangte leh teacher te’ kigamla sak (gap) mahmah a, tua kia hilou in naupangte’ ngaihtuahna (psychology) tanpha buaisak ban chih ahi. Tualou in teacher-te’n naupangte home work haksapipi pia uh a, tua in naupangte innkuante tanpha a buaisak ban ahi chih hilai hi. Naupangte’ school bag gikdan leh amau kum kituak hiam chih leng etkai ban ah, student-te khakna leh pina (School Van) ah naupangte’ tut theihna ‘capicity’ bangzah hi a, Van driver in naupang bangzah pawsek hiam chihte leng ngentel taka suizui ahi hi.
Naupangte’ khawsuahna dingin Continuous and Comprehensive Evaluation (CCE) kichi poimawh petmah a, Rights to Education (RTE) ah leng kichiantaka taklat ahi hi. Student kuahiam in examna a a lawhsap leleng amah gawt ding hilou a, school in counsellor a neih teitei a, tua counsellor te’n hasotna tawh kiton thuhilhna a piak ding uh chih hilai hi. India ah naupang tamzawte’n private school naih in government school-te nawlkhin a om deuhdeuh bang hi. Gamdang ah atangpi in government school-te lunzaw a, private institution te huchi hiallou hi. Private school ah tate’ khawsuahna ding ngaihtuahna ziakin sum tampipi nu-le-pate’n seng uh a, government school hoih leh kingakna tham hilebel nu-le-pate’ haksatna dawn zangkhai zou mahmah ding hi.
Manipur in Teacher Eligibility Test (TET) sai uh a, huai hoih mahmah hi. Hun paisa in TET kichi a om lam leng zak hilou a, TET a qualify zoulou, MLA/Minister te’n teacher dingin mi bangzah ana guangkha ding ua le? Education puah hoihna dingin a poimawh tamtak om a, primary teacher ding in leng BA/BSc tan bek lak hi henla, singtangbial a a posting na mun ua pai peih taktak dingte mah lak hisek leh hoih mahmah ding hi. Hausapu/ Hausapi ahihkeileh bialtu MDC/MLA te’ kianga sum piak ahihkeileh, mahni sik-le-tanga midang sepsak kichite om kei leh huai in education tawh kisai reformation thupitak hon tun dingin gintak huai hi.
Thu kizadan in teacher hih lunglut-te’ lakah 90% vel in kumteng a om Center’s Teacher’s Eligibility Test kichi zou zoulou uh chih ahi hi. Huai kalah, a zousunte’ lakah leng a posting na mun ua pai peihlou teacher 40% bang om a, government in a thawn in kumteng in sum crore tamtak a thawn in seng khasek uh chih hi. English teacher hunkhop sappau pau theilou chih hilai a, tua ziakin Teacher sem ding lak hun ah leng achin leh siamte mah lak ahih alou theilou a poimawh ahi hi. Student te’ exam hun a ibuaipih bangbang un teacher te lakna(recruitment process) leng hoihtaka etzui hileh education system bawlhoihna (reformation) thupitak hi dingin kilang hi.
No comments:
Post a Comment