HEADLINES:
Congress leh AAP in BRICS Summit Logo deihlou
Trade minister te’n E-Commerce a pankhawm di’n thupuk
New Delhi, Oct-13: BRICS (Brazil, Russia, India, China leh South Africa) a Trade Minister te’n New Delhi ah tuni’n meeting nei uh a, BRICS gamte laka economy khantouhna di’n e-commerce tawh kisai a pankhawm ding in thupukna bawl uhi. Goa ah October 15-16 sung BRICS Summit omding a, huai huna logo zat a omding pen Congress leh AAP pawlin deihlouh thu taklang uhi.
Tuni a BRICS’ Trade Minister-te meeting hunah Ministry of Micro, Small and Medium Enterprises (MSME) tungtawn a sepna tamtak piansakna ding tungtang leng genkhawm uh a, BRICS gamte lakah thuksem a trade & investment paipih dinga thupukna abawl ban uah BRICS Single Window Cooperation tawh kisai leng genkhawmna om hi.
Congress pawlin BRICS Summit huna Logo kizang ding pen BJP party symbol tawh kinaih hi’n taklang uh a, huai logo ah BRICS Summit kizatna ding leh ahun kigelh louh tungtang AAP in ngaikhawk uhi. BRICS Committee pawlin Logo dinga, India a election symbol khat azat uh ngaih siam huailou hi’n Congress MP Shantaram Naik in gen a, February 2017 in Goa a Election om ding ahihlam kuapeuh in haihlou a, BJP logo tawh kibang zat a ompen election mitsuanna chikhat hi’n leng gen hi. Congress makai te’n Election Commission of India (ECI) kiangah BJP symbol tawh kisai enkai di’n ngen uh a, Symbols Order, 1968 kalh kha ahihdan leng taklang uhi.
AAP spokesman Rupesh Shinkre in New Delhi a agendan in, BRICS Summit dangte ah, akizatna mun leh ahun kigelh sek a, tutung in Goa gelh lat ahihlouh tungtang, akisaipih te’n hilhchian ding in theisak hi. Kum 2009 a BRICS summit huna Logo kizang ah ‘Yekaterinburg (Russia)’ kigelh a, Brasilia (Brazil) - 2010, Sanya (China) - 2011, New Delhi (India) - 2012, Durban (South Africa) - 2013, Fortaleza (Brazil)- 2014 leh Ufa (Russia) – 2015 ah leng akizatna gam gelh a om hi’n AAP spokesman in taklang hi.
LOCAL NEWS:
Director in nasepna enkhia
Lamka Oct-13: Kh. Siile Anthony, Director (HRD &E) North Eastern Council in tuni’n Lamka hongpha in NEC fund a Lamka Public Ground kibawllel enkhia hi. Director in nasepna lungtung leh kipak mahmah hi’n kigen a, Lamka Public Ground kibawllel ah Special Contractor V.Guite phathuai leh chitak ahihdan gen in Special contractor te lak a muanhuai pen atelkhiat in Lamka Public Ground hoihtaka bawl hi’n gen hi. Thangkhosuanmung Guite, EM & Chief of Hiangtam Lamka leh V.Guite te’n kipah etsakna in Director pa Puandum pia uhi. Tulel in Lamka Public Ground nasepna pailel a, fencing nasepna 70% vel zawh hita a, VIP gallery nasepna 45% vel zawh hita a, a tawpna ah ground levelling nasep kipan ding hi’n kigen hi.
Swachhta Pakhwada zang uh
Lamka Oct-13: DC/CCpur makaih in DC office ah tuni zinglam in DRDA/CCpur nuai a Pradhan Mantri Krishi Sanchayee Yojana saina in ‘Be Clean, Be Healthy’ chih thupi zang in Swachhta Pakhwada zang uhi. Huai ah DC’s office campus hahsiang uh a, DC/CCpur makaih in singnou bangzahhiam suan uhi. Nidang in Integrated Watershed Management Programme (IWMP) kichi tu’n Pradhan Mantri Krishi Sanchayee Yojana in kikhek hi.
Pumbuk ah ni 4 sung social work
Lamka Oct-13: Hiangtam Lamka a Salphate Zahna Pumbuk ah Oct 10, 2016 apan JAC-AATB makaih in mipi’n social work in bawlhoih uh a, ni 4 sung in zousiang phial uhi. Salphate hankuang 9 bawlzawh leh koih in omta a, nidang in anawl tuak ah tutna kikoih in atung langva kikhuh a, alailak awng in atung kikhuh keimahleh tu’n bel alaiteng leng atung langva khuhvek in om hi. Ni 4 sung in donation box ah phatuam ngai mi 300 val te’n panpihna pia uhi.
1-Day consultation on Khankho Subject
Lamka, Oct-13: Bethesda-Khankho Foundation saina in Oct 14, 2016 zinglam dak 11:30 apan Koite a Bethesda Academy ah ‘1-Day consultation on Khankho Curriculum/Subjects’ omding hi. Bethesda Staff te’n Khankho Subjects tawh kisai draft copy presentation neiding uh a, discussion zawhin, feedback leh Academic Session 2017 a subject ding final bawlding uhi.
Auto hektu'n Student 3 kidnap sawm
Lamka, Oct 13: Red Cross road a Minister T. Manga Vaiphei’ inn kiang ah tuni nitaklam dak 4:20 velin Elcism school a kai kumchinglou numei 3 te a omna uh Mission Veng, Hiangtam Lamka paisawm lampi gei a ding lai Auto driver in a inn tan uh kha ding in gen a, numei te’n bahara ding neilou uh ahihdan a gen nung in auto driver in sum piak ngailou a Mission Veng ah kha ding a gen ziakin auto ah tuang uhi. Numei te’n Police Station khang a Zomi Colony lutna bul ah auto kham ding in driver pa kiang ah gen mahle taisuak pih a, Peace Ground khang a, Gospel Centenary gate khang deuh ah numei 3 teng auto apan tawmkhia uhi. Asak zeka Police duty te’n thil omdan thei in Auto dang zang in Hospital ah pua uh a, damdawi inn ah 1 admit in om hi. Admit a om pen in khua phawk mahleh pau peihlou hidan in kigen hi.
Naupang sungkuan te’n tunitak in Police Station ah thil omdan report bawl uh a, Diesel auto Auto No. a theihlouh ziak un Police te’n a suizui dingdan buaihuaisa uh hi’n kigen hi. Tua banah tunitak mah in CCpur Dist. Private School Assn. makai te’n Police ah thil omdan complain bawl uhi. Auto driver bel mi ngou leh lian lawlou, auto mai a nameplate ah reserved chih kitak hi’n gen uhi.
HSO Diamond Jubilee Mr & Miss
Lamka Oct-13: Kholmun Playground ah Haokip Students’ Organization Diamond Jubilee lopna Oct 10-12, 2016 sung om ah zannitak in HSO Diamond Jubilee Mr. & Miss. contest om a, Sl. No. 2 Henkholen Haokip in HSO Diamond Jubilee Mr title la hi. 1st runners up ah Sl. No 5. Letminlal Haokip leh 2nd runners up ah Sl. No 8. Paokhogin Haokip in la hi. HSO Diamond Jubilee Miss title Sl. No. 11 Hatneichong Haokip in la a, 1st runners up ah Sl. No. 2 Lhingneinem Haokip leh 2nd runners up ah Sl. No. 16 Lily Lhinneichong Haokip pang hi.
JACAATB leh OMTF in MU tungtang ah thusuah bawl
Lamka, Oct-13: Outer Manipur Tribals' Forum (OMTF - a conglomerate of Hmar Inpui, Thadou Inpi Manipur, Mizo People Convention, United Naga Council and Zomi Council ) leh Joint Action Committee Against Anti-Tribal Bills ( JACAATB ) pawlin tuni a thusuah abawl uh kimu in ataklatdan in, Manipur Govt. in singtangmite bawlsiatna dinga August 31, 2015 a anti-tribal bill 3 a passed nung un, Manipur University a reservation tungtang ah leng singtangmite nelhsiah in om nawn uh a, tanvou ding bikhiah a omsate laksak sawmna om hi’n taklang uhi.
Thusuakin ataklatdan in Central Educations ( Reservation in Admission ) Act, 2006 kichi 2012 a zat ahih hun in singtangmite adi’n University ah 31% reservation piak in om a, Academic Council of Manipur University panlakna tawh October 3, 2016 a Manipur High Court in thupukna abawlte pomtheih hilou ding chi uhi. Singtangmite’n tamveitak ngetna bawl mahle uh Manipur Reservation in Post and Services ( for Scheduled Castes and Scheduled Tribes ) Act, 1976 kichi leng zat in om nailou chi uhi.
Manipur University thubuai banah ST list a Meitei guanglut ding tungtang ngetna omte leng CorCom apan pilvangtak a thupiak kibawl ahihdan taklang uhi. OMTF leh JACAATB pawlin singtangmite gam leitang humbitna ding, rights leh identity kepbitna dia panla tou zel ahihman in ‘indigenous tribal community’ te’n kithuahpih ding ngetna bawl uh a, thusuah bawl a om ah Gaidon Kamei, Convenor, Outer Manipur Tribal's Forum leh H. Mangchinkhup, Chief Convenor, Joint Action Committee Against Anti-Tribal Bills in suaikai uhi.
Hawktui in tuilou leh fencing hihsia
Lamka, Oct-13: Lamka khawpi leh a kimvel ah zan leh zanhal in vuah tamtak zu a, huchihlai in khawpi sung ah thiltung zak ding omkei mahleh Mata area ah tuilou a buhkung bangzahhiam hawktui in hihsia hi. Huai tawh kisai tuilou bawltu khat in agendan in, vuahzuk ziakin hawkguam-te ah tuilet in tuilou lai ah luangdim a, buhkung tamtak delhpuk hi’n gen a, buhkung khenkhat thoukik mahleh a tamzaw buainawi in a delhkhum ziakin akung kisia in thoukik theilou ding dinmun a om hi’n gen hi. Buh phuanpak laitak ahihman in buhkung kipuk in agah suang thei nawnlou ding a, beidot huai ahihdan gen in, hiai tawh kisai a kisaipih disaster management authority in a ngaihsak deihthu gen hi.
Hawktui in tuilou sanggam 4 ding vel naktak in hihsia a, buhzung tanpha a nawkkhiakna pawl om loulai ah ninlom tamtak om in sing leh suangtum tanpha tuahlut hi. Mata area a teng a tamzawte tuilou bawl a nekzong hi uhi. Mata khaw gei a PHE deptt-te’n a gamsung ua water reservoir umkualna dia abawl uh pucca fencing leng ZYA hanmual lampang tui in phusia a, metre 30 vel asau hihse dimdem hi.
Mipi tawh hunzang khawm
Lamka, Oct-13: Khuga Dam a om 6th Sikh Regt (Khuga Bn.) te’n Durga Puja hun tawh kituak in huaikim a omte tawh tuni’n kithuahkhawmna nei uhi. Huai hunah mipite phattuampih theih dia bawl a om Canteen leng sepaihte a ding vuak hilou in minautang-te’n zang thei gige ta ding ahihdan Commanding Officer Col. Vijay Hooda in gen hi. Aman agenzelna ah Pension tawh kisai a buaina neite’n leng thuzak thei ding uh a, huailou in Army leh Civil Service lam a lunglutna nei te’n huaimun a career guidance centre naih thei ding uh chi hi.
Dist. Level Sc. Congress om
Lamka, Oct-13: Science Teacher’s Forum, Manipur saina in tuni’n S. Canaan Veng a Soikholal Ideal High School ah Dist. Level National Children’s Science Congress 24veina om a, school 4 apan team 7 kihel in, model tuamtuam a bawlte uh lahna nei uhi. Sc. Congress ahihleh Deptt. Sc & Tech, Govt. of Manipur leh Rastriya Vigyan Evam Prodyogiki Sanchar Parishad, New Delhi sensakna asai uh hi a, telkhiak a omte’ Dist. ai-oh in State Level ah kihel ding uh a, Oct. 28 -30, 2016 sungin Slope Land Public School, Khongjom, Thoubal Dist ah om ding hi. Lalpuithluaii Foundation School, Soikholal Ideal School leh Rayburn High apan team 2 chiat banah St. Stephen School, Phailian apan team 1 kihel uh a, result ahihleh hun lemtang masapen a suahkhiak hidin kigen hi.
International Job Centre ading form
Lamka Oct-13: International Job Centre, Ancelin Place, Opposite, CRPF Camp, Mantripukhri, Imphal ah Bank BO post 60, Trainee Manager post 38 leh Cabin Crew/Air Hostess/Ground staff post 47 lakna ding application form Manipur Express office, PKT Street ah laktheih hi. Application form lading te’n Rs.300/- piak ngai a, Oct 15, 2016 tan in Mantripukhri ah form submit hun in Rs.200 piak ngai ding a, Oct 17, 2016 in exam omding hi. Post tuamtuam apply dingte Graduate ngaiding a, thuchian kimzaw form lak hun in kantheih ding hi.
SO leh Sector Police Officer-te trg
Lamka Oct-13: Kum nawn 2017 a MLA election ding tawh kisai Sector Officer 30 leh Sector Police Officer 30 te’n tuni sunnung in DC’s office a BRGF Resource Centre ah DEO/DC,CCpur makaih in training nei uhi. Huai ah DEO/DC,CCpur in pre-poll leh post poll phase tawh kisai Sector Officer-te leh Sector Police Officer-te duty leh nasep ding tuamtuam genlang hi. Training hun ah S. Thienlaljoy Gangte, MCS, AC to DC & OSD (election) in slide tungtawn in sinsak hi. Kumnawn MLA election ding tawh kisai in CCpur Dist. a A/C 6 teng Sector 30 in kikhen a, Sector 1 ah Sector Officer 1 leh Sector Police Officer 1 om hi. 55-Tipaimukh A/C ah Sector 5 in kikhen a, 56-Thanlon A/C ah Sector 5, 57-Henglep A/C ah Sector 6, 58-CCpur A/C ah Sector 4, 59-Saikot A/C ah Sector 5 leh 60-Singngat A/C ah Sector 5 in kikhen hi.
Evan Thangvang Avenue hongkhia
Lamka Oct-13: M. Gouzamang Guite, EM, ADC/CCpur in tuzing in Vengnuam South ah ‘Evan Thangvang Avenue’ kichi hongkhia a, K. Pumsuanthang, Local Pastor, Pethuel EBCC in Pathian kiang ah thumna in lan hi. Vengsung mipi’ gendan in Ginzadou Road, Goukhenpau Road, Ngeisok Road leh Kanaan lampi tehtuah teng Veng min kichiantak omlouh ziakin Evan Thangvang Avenue, Vengnuam South minphuak uh hi’n gen uhi. Evan Thangvang bel Paite lak ading a Christian masapen hi’n kigen hi.
SSDC in Manipur govt. thutawp pia
Lamka, Oct-13: Saikot Sub-Divn Demand Comm (SSDC) a Chairman Timothy Z. Zote in thusuah abawl dan in, Oct. 15, 2016 tan a Saikot Sub-Divn Office function sak din Manipur govt. kiang ah thutawp pia uhi. Huai tawh kisai Oct. 8 & 12, 2016 a Saikot Youth Club Hall leh HYA Saikot Branch Office ah executive meeting ah nam tuamtuam a makaite telin mipi tamtak paikhawm uh hi’n taklang hi. DC/CCpur tungtawn in Chief Minister a ding Sept. 23, 2016 in memorandum pia uh a, Oct. 19, 2016 zinglam dak 6:00 apan nitaklam dak 5:00 sung total shutdown nei ding uh a, tua ah Press, water supply, medical, condolence, religious activities, electricity, student transportations leh Airport drop & pick tawh kisai document kichian omte khahkol hidin gen uhi.
Oct. 19, 2016 a kiphinna ngaihsak ahih keileh kiphinna tuamtuam- CCpur dist. ah total bandh bawl ding, Assembly election boycott ding, an ngawla nuakna, sit-in protest leh Saikot Sub-Divn huamsunga siamsinna innte khak ding, lawhchinna dia mipi’n kithuahpih dingin committee in gen a, kiphinna ding tawh kisai Kuki Inpi, Zomi Council, Hmar Inpui, Mizo People Convention leh Vaiphei People’s Council in full support puang hi’n leng thusuak in taklang hi.
YPA V/Unit in kum 7 chinna lawm
Lamka, Oct-13: YPA Vengnuam Unit in tuni’n Unit Office ah kum 7 chinna Raising Day zang uh a, huai ah YPA GHQ leh YPA New Lamka Block apan heutu tuamtuamte kihel ban ah M. Gouzamang Guite, EM ADC/CCpur telin adviser teng leh mipi hunkhop kihel uhi. Pastor Songkhanthang, Local Pastor, Vengnuam EBCC makaih in member mualliam sate suunna om a, innkuante’ adin hasotna thugen in thumsak hi. Programme hun ah Mr. leh Miss Contest om in deptt., chih in report pia uhi. YPA Vengnuam Unit bel 2008 kum a dinkhiak hi’n kigen hi.
SUUNNA:
Ginzadong Tungnung (59) h/o Niangneiching of Tribal Colony, Imphal tuni sun in liver cancer ziakin si a, Oct 14, 2016 in Chingmeirong a Christian Cemetery ah kivui ding hi.
Bijen Singh (48) h/o Thangngaihchiin of Dorcas Veng, New Lamka, zannitak dak 11:30 velin cancer in si a, tuni’n YPA hanmual, New Lamka ah kivui hi. Amah bel gari tuamtuam driver in pang a, Singngat bus “Glory” driver pa’ chi’n mi tamzaw in thei uhi.
Muonthang (36) s/o (late) Nguldal of Chiengkawn, tulela Silchar ah CRPF a sem, tuzing dak 5:00 velin Sichar Hospital ah Hepatitis ‘C’ in si a, aluang YMA hanmual, Chiengkawnpang ah vui hiding hi. Aman azi’ Niengdinpui tawh tanu Jubilee Kimlalvurmawi nei uhi.
IMPHAL NEWS:
Cabinet meeting hun ah e-Cabinet apps zang
Imphal, Oct-13: Chief Minister Secretariat ah tuni’n e-Cabinet tawh kisai in Cabinet Meeting om a, Cabinet Meeting hun a masapen ding in paperless e-Cabinet zat in om hi. Huai ma in Cabinet meeting hun chiang in Cabinet memorandum set 20 vel om a, huai sungah Annexures hunkhop om a, atangpi in page 15-20 pha in printed material a suah khiak chiang in page 400 vel tungtou hi’n gen uhi. e-Cabinet Application (Apps) tungtawn in Cabinet Dept. leh Cabinet Minister te’n Internet zang in e-Cabinet Application ah Cabinet Memorandum leh annexures ki upload teng muthei uh a, tuni’n electronic/digital mode a Cabinet Meeting sai theihna ding in Chief Minister leh Councils of Minister-te i-pads piak hi uhi.
Cabinet Meeting hun ah paper zatlou ding leh thupukna bawlna dia automated workflow om ding tupna in e-Cabinet zat hi a, Department-te apan proposal leh Agenda list-te finalize na ding banah Cabinet in lemsakna dia process teng automated vek hiding a, Cabinet te’n memorandum tawh kisai a thupukna a bawl-te uh tunung a etkik theihna dia archived hiding hi. Manipur a Dept. of Information Technology te’n e-Cabinet Application a bawl khiak uh ahi.
MNDF party-te kinepna lian
Imphal,Oct-13: Manipur a Congress member-lui khenkhat in apaisa Sept 30, 2016 in political party thak ‘Manipur National Democratic Front (MNDF)’ kichi bawlkhia uh a, huai hun Chief Minister-lui banah Manipur Pradesh Congress Committee (MPCC) President-lui K. Radhabinod in uap a, aman tulelin party telna neikei mahleh tunung in party thak MNDF zom maithei hi’n gen hi.
MPCC member-lui Ch. Priyokumar Singh in MNDF President len a, Minister-lui Bijoy Koijam in Secretary hihna len hi. Party thak puankhiakna dinga kikhopna ah Bijoy Koijam in Political party thak Manipur National Democratic Front(MNDF) a puankhiak banah tunung zeka Manipur assembly election om hun ah huai party thakin govt bawlkhiakna ding ah dinmun poimawhtak (role of king maker) hihna len leng len ding hi’n gen hi.
MLA khat in kitawpna pe nawn
Congress MLA lui in BJP zom ding
Imphal, Oct-13: Senapati district a 49-Tadubi A/C MLA Francis Ngajokpa in tuni’n Assembly Speaker Th. Lokeshwor kiangah MLA hihna apan kitawpna pia a, TN. Haokip, President, MPCC kiangah primary member hihna apan kitawpna pia hi’n leng gen uhi. Akigendan in ni 2 paisa a Tadubi a Francis supporter leh worker te’n maban election hun ah Congress leh NPF ticket zang a election tuhlou ding in thupiak uh a, huai ziak a kitawpna pia hi a, Francis Ngajokpa in Ibobi makaihna a Congress govt. term 1na, 2na leh tu term sung a kum 4 phial ding Minister hihna len a, Ministry reshuffle hun a khekkhiak-te lak ah tel hi.Congress apan Y. Erabot leh N. Biren te’n kitawpna a piak nung un Francis in pen awn hi. Huai tawh kisai a TN. Haokip, President, MPCC in Congress apan Senior MLA 3 in kitawpna a piak uh election a naih tak ziak in party a ding in hoihlou a, himahleh party pawtsan sang a lut thak tamzaw a, MLA lui-te sang a MLA thak ding te’n party suhat zaw ding chi’n gen hi.
Huailou in BJP Manipur Pradesh thusuak in MPCC Vice President lui banah 9th Manipur Legislative Assembly hun a PDA in-charge N. Loken in BJP zom ding a, huai ding tawh kisai in BJP Manipur Pradesh Office ah nitaklam dak 2:30 in N. Loken laklutna programme om ding hi. Sagolband A/C apan Congress MLA lui N. Loken in Ibobi makaihna a Congress govt. term masapen hun ah Minister hihna len a, Imphal Municipal Corpn. Election ma deuh a Congress apan kitawpna pia hi’n gen uh a, Oct 20, 2016 tan a Congress MLA 8 in BJP zom ding uh a, himahleh BJP zom thak khenkhat te’n maban election hun ah BJP ticket tanglou ding chi’n taklang uhi.
MU a Tribal student te’n rally nei
Imphal, Oct-13: Manipur University a Academic Council te’n Oct 8, 2016 ni a Central Educational Institutions (CEI) (Reservation in Admission) Amendment Act 2006 zat dia thupukna a bawl uh mawhpaihna leh Central Educational Institutions (Reservation in Admission) Amendment Act 2012 zat ding phutna in ATSUM, MUTSU, KSO, ANSAM, leh tribe orgn. tuamtuam te’n tuni’n protest rally nei uh a, placard ‘Justice is what we want’, ‘Follow 31% for ST’, ‘Where is our integrity’ chih-te tawi uhi. Akigendan in rally ahihleh Chingmeirong a Adimjati complex mun ah kipan in North AOC tawn in Raj Bhawan manawh uh a, sun dak 12:00 velin DM College gate mai ah Police te’n rally pai-te a dal ziak un kinawk tuahna om zek hi.
Huai nungin Police te’n Joseph Hmar, President, ATSUM; Seth Shatsang, President, ANSAM telin makai 5-te’n memorandum a piak ding uh phalsak uh a, memorandum ah MU a reservation tawh kisai a thubuai kipatna taklang in University thuneite’n UGC thuzak lou in All India reservation norm zat ding a kintak in thupukna bawl uh a, MU Academic Council te’n CEI Amendment Act 2012 kalh a thupukna a bawl un Manipur a tribal community-te tuam bawlna hi a, hiai tungtang ah Governor in akintheipen a panla dingin ngen uhi.
Culture Police and Gazetters hong
Imphal, Oct-13: Chief Minister O. Ibobi in tuni’n Chief Minister Secretariat a Cabinet Hall ah ‘Manipur Culture Police’ leh 3 Gazetter viz ‘Gazetteer of Manipur’, ‘Gazetteer of Ukhrul’, leh ‘Gazetteer of Churachandpur’ te hongkhiatna nei hi. Akigendan in Manipur a scholar tuamtuam te’n ngaihdan a sungkhawm-te uh tungtawn a Dept. of Arts & Culture panlakna a Manipur Culture Police kibawl khia a, huai policy tungtawn in culture lam tawh kisai a siamna nei member 30 om ding in Manipur Cultural Advisory Board phuhkhiak hiding a, member 30 lakah 20-te recognised institution/orgn. te’n a telkhiak ding uh banah member dang 10-te Govt. in guang ding hi.
Gazetteer of Manipur te’n gamthu, hunlui tangthu, ganhing leh loute a pou theihna gamlei mun, khutsiamna & tawndan, kivaipuak dan-te banah thu tuamtuam-te kaikhawm in suahkhe ding uh a, hiai hun Dy. CM Gaikhangam, Chief Secretary O. Nabakishore, K. Radhakumar, Commissioner (Art & Culture), K. Sushila, Director, Arts & Culture, M. Kongbam, Director IPR leh Minister tuamtuam in uap uh hi’n kigen hi.
TUNI THUPI:
“Pilna i muta, chilou dingin pilvang un; mihing hilou in Pathian in amah a zou thei hi:”–Job 32:13
EDITORIAL:
Manipur Univ. a pukse diam?
Manipur University (MU) a Academic Council te’n Oct 8, 2016 ni’n Central Educational Institutions (Reservation in Admission) Amendment Act 2006 zat ding a thupukna a bawl uh deihlouh banah zukkik ding phutna in Manipur University Tribal Students’ Union (MUTSU) atel singtangmite kiphin uh a,MU Hostel a om singtangmi teng in leng Hostel potkhiaksan vek uhi. ATSUM leh MUTSU makaihna in Khuman Lampak a Youth Hostel kongah sit-in-protest nei uh a, Naga Peoples’ Front banah pawl tuamtuam in MUTSU panlakna gupthu puang uhi. I kingakna leh muantham i sak Manipur University puksiat khak ding mi tamtakin ngai ngamlou hi.
Manipur University a Academic Council in admission tawh kisai a zuih dinga thupukna a bawl uh ah Central Educational Institutions (Reservation in Admission) Amendment Act 2006 dungzui in ST 7.5% hi a,SC 15% leh OBC 27% hi a, dangte general candidate-te a himai hi.Himahleh kum 2011 a Census ah Manpur population zah laka 31% singtangmi hi a, Manipur High Court thupiak dungzui in Central Educational Institutions (Reservation in Admission, Act 2012 dungzui a kizang ST 31%, SC 2% leh OBC 17% zuih ding chih ziakin academic session 2014-15 leh 2015-16 sungin MU in huai ana zang uhi.
Himahleh phaijangmi lamdeuh Manipur University Students’ Union(MUSU) kichi pawlin Central Educational Institutions (Reservation in Admission) Amendment Act 2006 mah zat ding phutna in nasataka a kiphin ziakun MU thuneite’n huaite deihdan zat dingin thupukna bawl thak phing uh ahi hi.
Tulai a Reservation thubuai tawh kisai in thil sautak poiban ding in kilang a, state assembly election anai ziak hiam chih zaw theikhang, issue tuamtuam tampi om hi. Manipur gam 90% vel singtangmi(Scheduled Tribe/ ST) te luah hi a,singtangmite nawlkhin ahih ua leh tribal-te’ kiphinna sousang mahmah dingin kilang a, huchi kalah, Academic council in a thupukna uh a zukkik ualeh SC/General leh OBC te’n kiphinna sousangtak neinawn ding uh chih hizel hi. Kum bangzah hiam paisa ah Manipur ah SC tawm mahmah a,himahleh amau reservation quota a neih uh etlah ziakin tuni chiangin Meitei mite mah leng SC tam petmah zel uhi. Huaiziakin MU buaina in ‘educational politics’ hilou ‘gam leh leitang politics’ khoihkha thei dingin kilang hi.
Academic Council thupukna zukkik ahihkeileh hill district teng ah total shut down om ding chihthu in state govt patausak mahmah hi’n thil omdan in taklang hi. Court banah University Grant Commission (UGC) thupiak Manipur University in zuiden hileh thukhat hi a, hileleng SC,OBC leh General category te’n kiphinna khauhtak paipih veve ding uh bang hi. MU Academic Council thupukna in Manipur population lakah tribal 40% te Constitutional rights nelhsiahna ahih banah hunsawt pek apan tanvou leh hamphatna a tan ding uh nawlkhinna hi’n ngaihsut louh theihlouh hi.
Manipur adia siamsinna mun sangpen banga ngaih Manipur University hong puksiat mai ding poi mahmah ding hizel hi. Gam le Nam thil politics tawh kisai University akipan khuakpilna neite’ hon puaksuah ahi chih bel theihsa hi a, himahleh, quota reservation tela thil neu nounou ziaka University hong zahlak ding lauhuai mahmah a, state govt a kigolh khak leleng ag pilvan mahmah uh deihhuai ding hi. Manipur University thukhat hitaleh, tu in Manipur Public Service Commission(MPSC) tawh kisai leng gen-le-sak om nawn a, tua ziakin MPSC in leng pan a lakthak uh deihhuai hi. Exam paper-te check thak ding chih khawng thil zumhuaitak hi a, huai kia hilou in MPSC leh MU sianthouna sukbuah hikei teitei leh ut-huai hi. Siamsinna mah pibawl taktak kul ahih ziak hi.
No comments:
Post a Comment