HEADLINES:
PM in BRICS Summit 2016 ah makai 10 zintun ding
New Delhi, Oct-14: Goa a seaside resort ah zingchian gin BRICS Summit 2016 kipan ding a, Prime Minister Narendra Modi in Russia President Vladimir Putin leh Chinese PM Xi Jinping telin makai 10 zintun(host) ding hi. Uri attack tawh kisai a Pakistan koihtuam(isolate) theihna dia India in diplomacy tuamtuam aneihte tutung BRICS Summit hunah bawhzui hiding in kigen hi. BRICS Summit 2016 ahihleh Syria tungtang a Russia-US kizopna dengdel mahmah lai a omding hi a, India leh US kizopna in hoihlam anawt ziaka Asia-Pacific region ah India tungtawn a US in thuneihna(influence) keklian nuam hidan a China in ngawhna abawllai a, China leh India makaite kimukhawm ding uh hi’n leng kigen hi.
Ni 2 sung BRICS Summit hunah Brazil, Russia, India, China leh South Africa apan makaite paikhawm ding uh a, bilateral ties tawh kisai banah thupoimawh tuamtuam genkhawm ding uhi. Huai hunah BRICS gamte banah BIMSTEC (Bay of Bengal Initiative For Multi-Sectoral Technical and Economic Cooperation) apan makaite leng kihel ding uh a, India' Act East policy tungtang genkhawm dia Prime Minister in amaute chial hi’n kigen hi.BIMSTEC ah Bangladesh, Bhutan, Nepal, India, Sri Lanka, Myanmar leh Thailand om uh a, Pathianni nitaklam in BIMSTEC Meeting hunah Prime Minister Narendra Modi leh gamdang makaite kimukhawm ding uhi.
Goa a BRICS Summit neih a om ding, India adi’n economy tawh kisai vuak a poimawh hilou in, connectivity, trade leh security tungtang ah leng poimawh a, gam khangtou lelte tawh helna doukhawm dia panlaknate ah leng tutung Summit in gen nei mahmah ding chi uhi. Uri Attack tawh kisai ah India in Pakistan capital Islamabad a SAARC Summit uap sawmlou in Afghanistan, Bangladesh, Bhutan leh Sri Lanka leng huai hun uaplou di’n thuzawh a, Bay of Bengal gamte kigawmna Bimstec tungtawn in Pakistan tellou in diplomatic strategy bawlsawm hi.
LOCAL NEWS:
ZSF, CDPSA leh EL Scism te'n mawhpaih
Lamka, Oct-14: EL Scism School akai student 3 zan a diesel auto driver khat in a pimang sawm tawh kisai in tuni’n Zomi Students Federation (ZSF) GHQ, CCpur Dist. Private School Assn (CDPSA) leh EL Scism School te’n mawhpaih thu puang uhi. Pawl 3 te’n dawilok taka gamtatna mawhpaih ahihdan taklang uh a, maban ah hiaibang thil atung nawnlouhna dia akisaipih thuneite’n a kinlam a mankhia a, gawtna sangpen pedi’n ngen uh a, student-te’ bitna dia panla di’n leng ngen uhi. ZSF in migilou matkhiak ahihkei leh panlak theihna omte a panla ding uh hi’n taklang uhi.
Mock Interview & Discussion om
Lamka, Oct-14: Zillai GHQ in saina in tuni sunnung in Imphal a TRI ah Zillai sunga tutung MPSC Combined Competitive Examination (Main) 2016 lawhching, personal interview maituah dingte adi’n mock interview/discussion om hi. Huai ah panellist in KT Vaiphei, IPS; Soiminlian Lengen, MCS; Joel G. Haokip, MCS; Rebecca Vaiphei, MFS leh Dr. Thangjamang Lhouvum, Prof. MU pang uh a, personal interview maituah ding mi hunkhop tel uhi.
DI makaih in inspection bawl uh
Lamka, Oct-14: Kaikhanlian Guite, DI of schools/CCpur makaih in CCpur block te’n tuni zinglam in Zenhang Lamka a om Bijang Loubuk Govt Jr. H/S inspection bawl uhi. DI leh team te’n teacher’ attendance hoihtak in check uh a, Primary teacher 2- L. Ranjit leh G.Thangkhanlal te absent uh a, DI of schools/CCpur block in teacher 2-te explanation call hi. Bijang Loubuk govt Jr.H/S ah student tamtak kai uh a, teacher leh student-te hoihtak in school kai uh hi’n mukhia uhi.
State Level MGNREGS Mela
Lamka, Oct-14: Porompat, Imphal a SIRD Complex ah Oct 20, 2016 in 1st State Level MGNREGS Mela 2016-cum-Inaugural Function of SIRD Complex omding hi. Huai ah Dist. teng apan official bangzah hiam telding uh a, Dist. teng in MGNREGS tawh kisai stall bawlding uhi. Huai hun ah Dist. teng apan MGNREGS works best performance khua 3 chiat telkhiat hiding a, CCpur Dist. a SDO/BDO teng in amau block chiat ah khua 3 proposal peding uh a, DRDA/CCpur in block teng apan MGNREGS nasemhoih khua 3 selection in State Level ading in thawn ding uhi.
Police te’n case registered in suizui
Lamka, Oct-14: Zan nitaklam a Red Cross road apan Auto driver khat in Elcism school a kai kumchinglou numei 3-te pimang a sawm tawh kisai in Police te’n FIR No. 50 (10) 2016 CCP-PS U/S 365 IPC registerd uh a, Auto driver matkhiat sawm in suizui uhi.
YPA Unit 2 in R-Day zang
Lamka, Oct-14: YPA New Lamka Block nuai a om YPA Dorcas Veng Unit leh YPA Zion Veng Unit in tuni’n muntuam tuak ah rising day lawm uh a, Dorcas Veng in kum 9 chinna leh Zion Veng in Unit office ah kum 8 chinna lawm uhi.
Dorcas Veng ah Chief Guest in Langkhanpau Guite, Chairman, ADC/CCpur pang a, Guest of Honour in CT Lian Guite, MDC New Lamka West leh Functional President in G. Tuanzathang, Chairman, Dorcas Veng V/A pang hi.
Chief Guest in agenna ah YPA kichi Christ a kibulphuhna dia pawl kibawl omsun hi a, a tup leh gim ahihleh phattuam ngaihna nasep hi’n gen hi. Zion Veng Unit programme ah T. Pumkhothang leh V. Paukhansiam te’n Special Guest hihna tawh uap ban uah Zion Veng V/A, PTC Zion Veng Unit leh YPA New Lamka Block makaite kihel uhi. Prog hunsung in heutu tuamtuam te’n hasotna thu gen uh a, Zionese Editorial Board makaih in Mister leh Miss YPA telna om in Miss YPA dingin Mary Niangngaihkim leh Mister in Chinlaljem @ James Ngaihte telkhia uhi. Programme 2-te ah member mualliamsate sunna hun leng nei uhi.
Nehsial Veng YVA Unit hong
Lamka, Oct-14: Young Vaiphei Assn (YVA) Gen. HQ President Vungminthang makaih cabinet member te’n Oct. 10, 2016 in Nehsial Veng V/A tawh kithuah in hausa (chief) tenna inn ah Neisial Veng YVA Unit hongkhia uhi. Huai hun ah hun lemtang masapen ah amau sunga cabinet leh member ki-form dia mawhpuakna apiak dungzui un zan in ki-form uhi. President in M.L Kakam, Secy in D. Pauminlun Neihsial, V/President in D.K Malsawm, Jt. Secy in Soilianlam, Fin. Secy in Thangmawi Neihsial, Treasurer in Khamminlun, Info. Secy in Kam David leh Member in C. Rebeck, D. Mercy leh Ngaihkim ban ah Val-Upa in N. Thanga guang uhi.
L. Semol khua Golden Jubilee lawm
Lamka, Oct-14: L. Semol khua leh biakinn kum 50 chin Golden Jubilee lopna tuni zinglam in om a, Chief Guest in TN Haokip, MLA & President MPCC pang hi. Huai ah Functional President in Lunminthang Haokip, IAS, DC/CCpur, Guest of Honour in Ngamhao Touthang, EM, ADC/CCpur leh Special Guest in Dr T.Lunkim pang hi. Chief Guest in Jubilee Gate leh Jubilee suangphuh hong a, Dr T.Lunkim in Pathian kiang ah thumna in lan hi. Khuallian te makaih in dakpi 50 vei khenging uh a, khuallian-te leh special guest apan thugen ngaihna om a, programme zawh nitaklam in Golden Jubilee ankuang umkhawm uhi.
VKM in School Annual Day zang
Lamka, Oct-14: Zenhang Lamka a VK Montessori School in tuni’n EBCC Zenhang Lamka Sunday School Hall ah ‘School Annual Day’ zang uh a, G. Luaikhothawng, Local Educationist leh School Managing Board member in hasotna thu gen in, Upa S. Khupzaneng in staff-te adin thumsak a, student te’n choreography telin item tuamtuam lahna nei uhi. VK Montessori School in student-te sukhalna dia activity khat dan a kumteng in ‘Annual Day’ zang zel uh hi’n kigen a, huai hun ah nu-le-pate banah school managing board-te kihel uhi.
State Level 24th NCSC ah kuanding
Lamka, Oct-14: Science Teacher’s Forum, Manipur saina in zan in S.Canaan Veng a Soikholal Ideal H/S ah a 24 veina Dist. Level National Children’s Science Congress, 2016 om ah CCpur Dist. ai-oh a Oct 28-30, 2016 sung Slope Land Public School, Khongjom, Thoubal Dist. ah State Level 24th National Children’s Science Congress (NCSC), 2016 atelding in mi 7 telkhia uhi. Amaute- Douminlun Singsit (class VI) of St. Stephen H/S; Anish Thoudam (class IX) of Lalpuithluaii Foundation School; Tingneihmawi (class IX) of Rayburn H/S; Henry Thangginlal Baite (class IX) of Soikholal Ideal H/S; Mangkhanpau (class IX) of Soikholal Idial H/S; Letginthang Baite (class IX) of Rayburn H/S leh Salam Solomon Singh (class IX) of Lalpuithluaii Foundation School hi uhi. Selected Group Leader te’n project report copy 2 leh 4 charts of project tawi in, GP Women’s College, Imphal ah Oct 27, 2016 sunnung a kuankhe ding in L.Nabakumar, Gen Secy. Science Teachers’ Forum, Manipur in theisak hi.
Gothol in 5th MYDO tour champion la
Matiyang Youth Dev. Orgn (MYDO) saina in Matiyang Play Ground ah 5th MYDO Open Football Tournament-2016’ khakna tuni sunnung in om a, Chief Guest in Thangso Baite, MP (Lok Sabha) pang a, Guest of Honour in Thangjang Haokip, President, KIC leh Functional President in M. Chungpa Kom, ADC Member/CCpur pang hi.
Chief Guest in sports ah principle/discipline neih poimawh a, eilak ah sports kimawl mite’n vualzawh leh vuallelh hun ah alawpna ibawlsek pen i lawhsapna uh hi a, mahni kithunna poimawh chi hi. Maban election omding ah mipi’n i culture leh sahkhua tawh bang party kituak hiam chih theih poimawh a, khawsung vaihawmte tawh tonkhawm poimawh hidan in gen hi.
Final match ah LCMT, Gothol leh MYDO kimawl uh a, Gothol in 3-2 in zou in champion la in kipahman Rs. 30,000/- + trophy sang a, Runners-up in Rs. 20,000/-+ trophy sang hi. Volleyball numei ah Phalzanieng Memorial Team leh Friendship te kimawl in Phalzanieng team in zou in Rs. 3000/- sang ban ah runners-up team in 1,500/- sang uhi.
Huai tournament bel Sept. 6, 2016 in kipan a, Thangting area a khua tuamtuam akipan football team 30 leh volleyball (numei) team 22 kihel uhi. Tunitak in Chavang Nite zang uh a, huai hun ah kipahmante hawmkhia uhi.
SUUNNA:
Vungkholun Khongsai (84) of Penial village, CCpur tuzing dak 8:30 velin awmna in si a, nitaklam in Penial EC Church Campus ah kivui hi. Amah Peniel EC Church leh Thingkangphai EC Church phutkhia lak ah telkhak ziakin church campus ah kuvui hi’n kigen hi.
Pamsialching (24) w/o Paukhomlal of Thingkangphai, tuzing dak 7:00 velin a inn uah awklum a, nitaklam in Thingkangphai hanmual ah kivui hi.
T. Lalthanlian (62) f/o Langbiakmuan of Pearsonmun tunitak in Cancer ziakin si a, October 15, 2016 in Pearsonmun hanmual ah kivui ding hi.
IMPHAL NEWS:
Director in HSRP tungtang genchian
Imphal, Oct-14: Supreme Court in Dec 8, 2011 a order asuah dungzui in Manipur a gari tuamtuam ah April 12, 2012 akipan in High Security Registration Plate (HSRP) kivuah hi’n Transport Director H. Rosita in thusuah bawl hi.Supreme Court in India gama gari omteng a size, colour leh registration plate kilual (uniformity) a om a deihna ziak hi’n leng Transport Director in gen hi. Manipur a gari om 3,06,039 lakah July 2016 kha tan in gari 1,61,600 ah HSRP kithuah hi’n gen hi.Huaite 2-wheeler(motor cycle) 19,062; 2-wheeler (scooter) 78,270; 3-wheelers 10,681; 4-wheeler (heavy) 1,333 leh 4-wheeler (LMV) 52,254 ahi chi’n taklang hi.
Rural Media Workshop bikhiah thak
Imphal, Oct-14: Majorkhul, Imphal a Manipur Press Club ah October 6, 2016 in Imphal East district adingin Rural Media Workshop om ding a bikhiah himahleh October26, 2016 ading in ahun bikhiahthak hi’n Press Information Bureau (PIB) thusuak in taklang hi.Ministry of Information & Broadcasting (I & B) in a sponsored ziaka Workshop sai a om ding hi a, Babupara (opp 1st M/R gate ) a PIB office ah a tel ding selected list muhtheih chih ahi hi.
Dakkal 18 shutdown puang
Imphal, Oct-14: Coordination Committee (CorCom) pawl in kumteng azat zel bang un Oct. 15 Black Day ahih tawh kiton in dakkal 18 sung Manipur pumpi ah shutdown puang uhi. Oct. 14 zankim akipan Oct. 15 nitak dak 6:00 sung dakkal 18 sung shutdown puang ua kuapeuh in kithuahpih dingin ngen uhi. Shutdown sungin Media, electricity, water supply, medical leh sahkhua vai tawh kisai a programme-te khahkol hiding in gen uhi.
Blockade bawlte’n gari khat hihsia
Imphal, Oct-14: National Highway 37 lampi hoihlouh ziaka bawlhoih ding deihna economic blockade omlel a, tuni in Keithelmanbi area ah meltheihlouh blockage bawl hidia gintakte’n Tamenglong District sung a railway lampi bawlte zat gari khat hihsia uhi. Hiai tawh kisai in blockade bawlte’n sutzom lai ding uh hi’n gen uh a, kiphinna om hun a, National Highway blockade bawl ahihma govt. in ngaihsak ngeilou hidan in gen uhi.
RIMS Nurse-te kiphin ding
Imphal, Oct-14: RIMS a Nursing Counsellor dia New Delhi akipan deputation hongpai dia order suah deihlouh latsakna in RIMS Nurses Association, Lamphelpat te’n Oct. 15, 2016 zinglam dak 10:00 akipan nitaklam dak 4 tan hospital campus ah sit-in-protest nei ding uh a, ni thum sung nei ding uh a, tua hunsung a bangmah thuthak omkei leh Oct. 18, 2016 akipan indefinite cease work strike pan ding uh hidan in kigen hi. Nurse pawl in kiphinna a neih sung un nitak in nasem ding uh a, sun inbel semlou ding uh hidan in RNAL Secretary Heikrujam Priyashini in press-te mai ah gen hi.
Dr. Kh. Loken in BJP zom
Imphal, Oct-14: Manipur Pradesh Congress Committee vice-President lui Dr. Khwairakpam Loken in Imphal Municipal Council members 3 tawh May 11, 2016 in Congress nusia uh a, hun bangtanhiam party neilou a om nungun tuni in Dr. Kh. Loken in BJP zom hi. Tua tawh kiton in BJP Manipur Pradesh pawl in Nityapat chuthek a office mun ah laklutna nei uhi. Hiai hun BJP Election Convenor Th. Chaoba, Ashinikumar leh Nimbus ten uap uh a, Dr. Kh. Loken in Congress anutsiat pih Imphal Municipal Council members 3 ten leng BJP zom uhi.
Maoists pawl in Congress boycott puang
Imphal, Oct-14: Maoist Communist Party Manipur (MCPM) ten Oct. 15, 2016 Black Day in puan uh a, hiai ni in Manipur pen India ah laklut hi a, tua mawhpaihna a black day a zat hidan in taklang uh a, Congress party-te boycott puan a om hidan in taklang uhi. Congress party-te bel India in khut zat a nei in vai hong hawm khum ua, tua ziak a Congress party tung a boycott puang uh hidan in gen uhi.
JCB driver khahkhia
Imphal, Oct-14: Kuki National Front (Nehlun) pawl in Oct. 9, 2016 a Molcon leh Chingningpokpi village kianga Itham Moirang Purel, Imphal East ah JCB driver Anou Kabui pimang in Rs. 35 lakhs ngen uh a, hiai tawh kisai in hun sawtkuamtak kihouna om nungin tuni zingkal dak 7:00 in Saikul Sub-Division sung Island kichihna mun ah khahkhia uhi. Hiai tawh kisai KNF-Nehlun pawlin Press statement a suahna uah Anou Kabui bel phalna bangmah la lou a KNF-Nehlun general headquarters area a lut ziaka mat a om hidan in gen uh a, Defense Department te malakna a pimang a om hidan in taklang uhi.
SBI bank luh sawmte lawhsam
Imphal, Oct-14: Mayang Imphal bazar a SBI Mayang Imphal Branch zan nitak sawt nungin in meltheihlouh kuate hiam in luh sawm mahle uh lawhsam uh hidan in kigen hi. Akigendan in zingkal in vengsung mipiten Bank luh sawm a om ahihdan theikhia in police ah report ua, police te makaih in forensic sciene teamten hoihtak in enchian ua, tua ah bank luhsawm a om mah ahihdan theikhia uhi. Bank pen a kalhna a thupi luat ziakin gutaten hong zoulou in lawhsam ua, Mayang Imphal Police ten hiai tawh kisai in case registered uhi. Hiai bank ah security personnel leng omlouh banah CCTV Camera leng koih hilou in kigen hi.
TUNI THUPI:
“Bang ka gen dia aw? Aman hon houpih a, amah mah in a hih pah ngal: ka hinna ningkitelna ziak in ka damsung kum tengin awl khakha in ka pai khiankhianta ding.” – Isai 38:15
EDITORIAL:
Congress maban chianglou!
Manipur assembly election hun ding nai hulhul a, huchih lai in ruling Congress adingin maban ding theihkholh haksa hileh kilawm khop in thubuai-labuai om vengvung hi. Veteran Congress MLA banah hun sawttak Cabinet Minister hihna ana len Congress’ heavy weight Yumkham Erabot in Congress Party nusia in BJP zom hi. Amah Imphal khawpi sung adia mun poimawh mahmah banah mi hausate’ tenna khawmna mun chih hial a om Wangkhei A/C constituency apan MLA ahi hi. Congress’ primary membership apan a kitawp banah MLA hihna akipan kitawp a, BJP’ azop in sau gen nei mahmah dingin kilang hi.
Hun paisa enkik zual lehang Chief Minister O. Ibobi makaihna Congress ministry paidan diklou ahi chi’n hangsantaka New Delhi a vatangkoupih ngam Y. Erabot hi a, Congress MLA 20 velin Dr Manmohan Singh in Prime Minister alet lai in MLA 20 velin amah(Y. Erabot) ana zuikha mah uhi. Ibobi tawh a kituahlouh ziakin Congress party pawtsan hiam ahihkeileh maban election ding tawh kisai a et ziak ahi diam chih theihbut hilou hi. BJP Manipur Pradesh President Kshetrimayum Bhabananda in Y Erabot kipahpih mahmah a, ‘Manipur adingin nisuak kilawmtak hong om ding’ chi’n gen hial hi.
Y Erabot bel taksa upatdan etin ‘senior’ mahmah a, Congress sungthu leng theichai (digest) mahmah ding a gintak ahi hi. Tua kia hilou in, MLA hunkhop thuzawh (command) a, aman Congress MLA bangzah a kaikhe laiding hiam chih leng theih haksa mahmah hi. Chief Minister O Ibobi makaih ministry pe’n nekguk-takgukna tawh kisai in uang khengval uh chi a ngawhna tuamtuam a bawlte thutuam in koih phot lehang, Prime Minister Narendra Modi, BJP Chief Amit Singh leh adangdangte’ huzap (wave) Manipur ah hat hiaihiai hi’n kilang hi. PM Modi makaina BJP govt ah PM Modi leh a Minister-te’n Manipur ah alangtang in panla taktak nailou uh hi zawmah a, election kuan a hong phak thithe hun chiang un a huihnun dan leng hong kikheng mahmah lai ding in muhkholh theih in om hi.
Kum 2014 a Lok Sabha election omlai Narendra Modi in Manipur ah BJP adingin vote campaign bawl a, amah tua hunin Gujarat state a Chief Minister ahi hi. Modi in vote campaign hong neih ding phalsak ahihlouh ziakin Manipur ah total shutdown bawl hi a, huchi kalah, Modi kimuhpih dinga kuan Ibobi in maizum na liantak tuakin, Modi in Ibobi kiangah ‘Ki en-khe tuahni’ chihtan lelin Tulihal Airport ah genkhum chih ahi. Huai sulnung (impact) leng ahi ngei ding a, centre government daidide in kilang mahleh Congress MLA te khat-khit-khat a akitawpna un gen nei mahmah ding bang hi.
Congress leader Y Erabot in Congress a nutsiat nungin IFCD Minister lui kia hilou in Congress party adia thupuangtu N. Biren in Oct 7, 2016 in MLA hihna akipan banah Manipur Pradesh Congress Committee(MPCC) akipan leng kitawpna pia hi. A nalh mahmah politics a kimawlna ahihleh Erabot’ constituency mipite a inn ua paikhawm in MLA ahihna akipan leh Congress apan kitawp dingin phu ua, tua nungin N.Biren supporter te leng kiphin in kitawp dingin phu uh chih ahi hi. Assembly Speaker Th Lokeshwar leh MPCC President TN Haokip te’n Erabot banah N Biren kitawpna a pom nungin Congress sungthu buaina aveng tuankei chih chiang hi. Sept 10, 2016 in Y Erabot in MLA akipan kitawpna leh MPCC apan kitawpna pia a, September 12, 2016 in BJP zom a, N Biren dinmun bel chiang kuang chiah kei mahleh BJP lam apan zolna nasatak ngah chihthu om hi.
Congress adia mi poimawh mahmah leh Nagate’ lak a line hoihtak bawlthei mi muanhuai Minister-lui Francis Ngajokpa in leng Oct 13, 2016 in MLA leh Congress primary membership apan kitawpna pia hi. Kum 2017 a assembly election om ding kuana senior Congress leader a kitawpte’ laka 3-na hita hi. Cong MLA 3 kitawpna in assembly ah Congress' a hihbuai bankei ding chih hi a, aziak ahihleh Trinamool Congress MLA 4 in tuma in ruling Congress party zom uhi. Manipur assembly ah MLA 60 om a, NPF MLA 4 leh Congress MLA 3 in kitawpna pe mahle uh Congress adingin bel ministry pukna dingin lungkhamhuailou a, ahihziakin, assembly election ah bang dinmun ahi dimg uhiam chih genkholh haksa mahmah ding in om hi.
No comments:
Post a Comment