HEADLINES:
Police-te pan lakna ziakin Law & Order dinmun hoih lam nawt – Chief Minister
Tuni’n Manipur Police Raising Day 125 veina kizang
Imphal, Oct-19: Manipur Rifles 1st Bn. Parade Ground ah tuni zinglam dak 9:00 akipan in Manipur Police Raising Day 125veina zat hi a, huai ah Chief Minister O. Ibobi khuallian a pang in March Past a tel Contingent-te akipan salute la a, Manipur Police Newsletter leng hong hi. Chief Minister in Trophy/awards/Commendation Rolls & Discs leng pekhia hi. Tuni a Manipur Police dinkhiak (raising) kum 125vei chin lopna kizang kum 1 sung sutzop hiding hi.
Chief Minister in a thugenna ah Police te’n Manipur a muanna leh bitna (Law & order) dinmun hoihna ding a pan alak ziak un kum paisate sangin Law & Order in hoih lam nawt mahmah hi’n gen a, Police-te kipum piakna leh a panlakna uh pahtak huai asak thu gen kawm in mipite’n leng Police-te nasep hoih leh mipi bitna ding a, pan alakna-te uh kipahpih ding in deih thugen hi. Society tawh kisai thil bangkim ah Police-te mawhpuakna poimawh mahmah a, mipite bitna ding leh muanna ding a panlakna ah Police te’n dinmun haksapipi a tuah hun uh om chi’n gen hi. Himahleh Manipur in sum leh pai dinmun haksatna a tuah ziak in Police-te adia van zat poimawh leh kithuahpihna ahi ding bang in govt. in pe zoulou ahihna ah CM in poisak thugen hi. Law & Order tawh kisai Police te’n pan alakna uah mipite deih dan hilou a sepkhak leh bawl khak uh leng om mai thei a, Manipur kichi buaina a dim state ahihna ah huchi bang sepkhelh leh bawl khelh kichi tup ziak hilou in thil hithei mah ahih hun om a, hileleng huaite ziakin Police-te mipite deihdan doudal a nasem chihna hituan zenzen lou hi’n CM in gen hi.
Chief Minister thugen ma deuh in LM. Khaute, IPS, Director General of Police (DGP) in thugen a, aman tuni a Police Raising Day 125veina uap Chief Minister, Cabinet Minister tuamtuamte, Assembly Dy. Speaker, Parliamentary Secretary-te, Chief Secretary, Police & Civil Official-te leh mipite tungah kipahthu gen in vaidawm hi. Aman Police kibawl khiak kum 100 chinna (Manipur Police Centenary) Oct 19, 1992 in zat hi a, tuni kum 125 a chinna tuni akipan kum 1 sung lopna paitou ding hi’n gen hi. DGP in Police te’n Law & Order etkolna dia apanlakna uah Officer leh Personnel hunkhop in a hinna uh piak uh ahihdan leh tuni tan a Manipur Police te’n Law & Order, helpawlte douna leh gamsung masawnna ding a apanlakna tuamtuamte uh tomkim tak in taklang hi.
Tuni a Police Raising Day lopna ah Parade Commander in Priyadarshini Laishram, MPS, Addl. SP pang a, march past ah Civil Police, Manipur Rifles, IRB, Home Guar, VDF, NCC, Sainik School, MPTC, IRB (Mahila), Manipur Police Sports Club (Polo), Dog Squad telin contingent tamtak tel uhi. Kum 1 paisa sung a Best Police Station telkhiakna ah Singjamei Police Station (Imphal West) in 1na la a, Thoubal leh Bishnupur Police station 2na hi a, 3na in Ukhrul leh Kangpokpi Police Station pang uhi. Best Police Station in kipahman Rs. 15,000 + commendation certificate, 2na in Rs. 10,000 + commendation certificate leh 3na in Rs. 5,000 + commendation certificate piak hi uhi. Best Police Officer in Singjamei Police Station a ASI Kh. Birendra telkhiak ahi hi. C. Doungel, Addl. DGP (Armed Police / Training / Home Guard); T. Guite, IGP(Zone-III) & (Training/ Human Right/ RTI); L. Kailun, IGP (Zone-II/Armed Police/ OPS); Clay Khongsai, IGP (Zone-I) leh Dr. S. Ibocha Singh, IGP (Admn) in nasep hoih ziakin DGP Commendation Rolls ngah uhi.
Joint student body, CCpur in total shutdown full-support puang
Hill Dist. teng ah dakkal 24 total shutdown om ding
Lamka, Oct-19: Manipur University reservation thubuai tawh kisai a All Tribal Students’ Union (ATSUM) leh Manipur University Tribal Students’ Union (MUTSU) in thuneitu-te kiang ah Oct. 19, 2016 tan a hihveng dia hunchiam apiak uh abei mahleh thuthak bangmah omlouh man in ATSUM leh MUTSU in Oct. 20, 2016 zinglam dak 1:00 apan Oct. 21 zinglam dak 1:00 tan dakkal 24 sung Manipur Hill dist. teng ah total shutdown puang uhi.
Total shutdown ding tawh kisai ATSUM leh MUTSU in CCpur dist. pansan student body teng kiang ah kithuahpih dia a-nget dungzui un ZSF GHQ, KSO/CCPur, HSA JHQ, CCpur leh MZP HQ, Manipur in nungthuap ding ahihdan tuni’a thusuah abawl un taklang uhi. Thusuah in ataklatdan in, CCpur dist. ah total shutdown khauhtak a paipih hidinga, shutdown in press/media, medical, telecom, electricity, water supply ban ah Airport pick & drop huamlou ding a, shutdown lawhchinna dia dist. mipi’ kithuahpihna ngen uhi. Maban ah hill dist. tuamtuam ah rally neih hiding a, Oct. 21 in Chandel, Oct. 22 in Ukhrul, Oct. 23 in Senapati, Oct. 24 in Tamenglong leh Oct. 25 in CCpur ah om ding a, economic blockade tanpha in zuilai ding hi’n kigen hi.
LOCAL NEWS:
Hospt ading X-Ray 300Mah hongtung
Lamka, Oct-19: CCpur dist. hospital ah hun sawttak X-Ray Machine gina omlouh nungin tuni’n Imphal apan X-Ray Machine (300 Mah) puaktung in om hi. X-Ray machine bel apart tuamtuam x-ray table, column, HT transformer, x-ray tube, x-ray control leh x-ray film processor tawh hongpaikhawm hi a, Director apan order om hunhun in technician te’n fitting pan ding ua, ni 1 sung lel in zou ding uh hi’n kigen hi.
Dr. J. Son Goukham Samte, Med. Sudpt in a gendan in, machine bel athak hilou in, alui puahthak (repaired) hi a, alui himahleh muhna dingin kha 3 bang lut a, fitting pat hunding bel gentheih hilou chi hi. Tulel in hospital in x-ray machine aneih 100 Mah kia ahihman in natna deihbang in mankhe (detect) theilou in, damloute’n private clinic/diagnostic centre a naih gige ngai maimah hi. CCpur dist. mipi’n kumteng in theih kholhlouh in natna hileng tuamtuam maituah phutsek a, hospital in natna tuamtuam chetna machine gina aneihlouh ziakin natna chetma in damlou khenkhat si man sek uhi.
Health Commissioner PK Singh, IAS in JE outbreak tawh kisai a July 30, 2016 in Lamka hongphak hun ah dist. hospital ah Micro-Biologist leh X-Ray Machine 1 tuak ban ah laboratory diagnosis machine ‘ELISA’ koih dia achiam tangtunna hidan in kigen a, Micro-biologist koih in omta hi.
Manipur Police Rising Day zang
Lamka, Oct-19: Rakesh Balwal, IPS, SP/CCpur in Imphal a 125th Manipur Police Rising Day, 2016 a uap ziakin ama’ sik-le-tang in S.David Piaklian, MPS, Addl SP/CCpur makaih in tuni zinglam in SP office ah Manipur Police Rising Day 125 veina zang uh a, Addl SP in Manipur Police Flag kaipalh in general salute la hi. Aman British in Manipur a lak nung kum 1892 in State Military Police chih kipankhia a, British te’n India a pawtsan nung un hoihtak a etkaitouh a om in, tuni tan lawhching taka paitou hi’n gen hi. Manipur Police kum 125 a ching tawh kiton in, Police personnel kuapeuh in kichiamna i bawl mangngilh lou a, mawhpuakna bang semsuah dinga mansa ding leh khawtang siatna ding hilou a, khawtang hoihna ding a kuapeuh in panla din Police personnel-te hasuan hi.
Essay kidemna a kipahman hawm ding
Lamka, Oct-19: ATML in “31st Aug.Incident” thupi pansan in Hr. Sec. School tuamtuam a student-te lak ah essay writing competition asai uh Oct. 21, 2016 zinglam in dist. hospital morgue ah result puangkhia in kipahman hawm ding uhi. Huai ah Khumbiaklal, Tuailai 1434Pro in hasotna thugen in thumsak ding a, in, Lunmang leh John Samte makaih in kipahman hawmkhe ding uhi.
A sungkuante kiangah pekhia
Lamka, Oct-19: Zan nitaklam apan inn nusia a pawtkhia naupang 2 tunitak dak 9:00 velin ZYA GHQ makai-te’n asungkuante kiangah pekhia uhi. Thutut kingahdan in Hauminthang (10) leh anau Elon (7) zan nitaklam apan inn nusia in pawt uh a, huainung in asungkuan-te’n mun tuamtuam zong in buaipih mahmah uh hi’n apa Thangsuankhai in gen hi. Tunitaklam in Hmuia Veng lak a Bus khat ah unau nihte va tuang uh a, huai Bus neitute’n D.Phailian a tun ua theikhia in, a omna uh zonkhiak sawm in houpih ua, mi nihte’n Bungmual khawmi hidan a akigen ziakun gari neite’n Bungmual a om N. Ginminthang thuzak ua, aman leng nitak dak 6 vel apan dak 9:00 kikal a inn uah kem in philantrophic orgn tuamtuam thuzak hi. Phungkhothang H/S ah Hauminthang in Class-III simlel in, anau Elon in Class-I zil a, tuni a thiltung tawh kisai in school teacher-te’n leng nitak nung a Bungmual vapha in buaipih uhi. Naupang nihte’n akhenchiang in Mercy Home a om uh hi’n kigen ua, akhenchiang in Lunmual khawmi hi unleng kigen uhi. ZYA GHQ makai-te’n Bungmual vapha in thil omdan kankhia uh a, nitak dak 9:00 velin New Bazar a asungkuante kiangah pekhia uhi.
NSP online scholarship Oct 31 tan hiding
Lamka, Oct-19: Ministry of Minority Affairs, govt. of India in minority student te’n National Scholarship Portal (NSP 2.0) kichi Pre-matric (class I to X) leh Post-matric (class XI & XI) student te’n apply theih hun hihsau (extend) in Oct 31, 2016 tana apply theih ding in Suresh Yadav, Under Secy. Ministry of Minority Affairs, govt of India in State govt/UT administrator teng theisak hi.
Medical Assessment Camp
Lamka, Oct-19: SSA/SMA, Artificial Limbs Manufacturing Co-operation of India (ALIMCO), NGO, Dist. Health Society pangkhawm in Block 7 ah Inclusive Education for Disability (IED)/CCpur tungtawn in Medical Assessment Camp omding a, Disability Certificate leng piak hiding hi. Huai ah Dr Chiin Guite, Opthalmologist, Dist. Hospital; Dr.Chinggouman, Spychiatist, Dist. Hospital, ALIMCO apan Orthotist leh Audiologist te’n Disable Person-te ending uh a, Block teng ah zinglam dak 10:00 in kipan ding hi. Oct 21, 2016 zinglam in Samulamlan block a Bunglushi Upper Primary School ah omding a, Oct 22 in CCpur block a Synod Hall, IB road, Nov 3 in Singngat block a Singngat Community Hall, Nov 4 in Henglep block a Kukimun JB school, Nov 7 in Thanlon block a Leijangphai H/S leh Nov 7, 2016 in Tipaimukh block a Sibapurikhal Community Hall ah Medical Assessment Camp omding hi.
MGNREGS nasem hoih khua 3 telkhia
Lamka, Oct-19: SDO/BDO te’n amau block chiat ah MGNREGS nasemhoih atelkhiat teng uh DRDA/CCpur te’n screening bawl uh a, Oct 20, 2016 zinglam dak 10:00 a SIRD Complex, Porompat, Imphal East ah State Level MGNREGS Mela, 2016 ah State in prize piakding in select thak ding hi. DRDA/CCpur in khua 3 select-te Tuibuong block ah Jolzam, Lamka block ah Kawnpui leh Kangvai block ah Torbung hi uhi. MGNREGS Mela, 2016 ah CCpur Dist. a Tuibuong block ah khua 10 a V/A a Chairman/Secy telding uh a, Lamka block ah khua 10, Sangaikot block ah khua 8, Saikot block ah khua 8, Henglep block ah khua 8, Vangai block ah khua 8, Singngat block ah khua 8 leh Kangvai block ah khua 10 hiding hi.
Army-te’n sisan unit 2 pia
Lamka, Oct-19: Kullian khua hausa Lianminthang (51) h/o Chingngaihchiin (tulel a Zomi Colony a om) sin (liver) nat ziaka dist. hospital a etkol a om, sisan B+ve unit 2 poimawh ziakin 6 Sikh Light Infantry Regt., Khuga Battalion apan Hav. Balwinder Singh leh Hav. Kiran Singh te’n unit 1 tuak pia uh a, tuazawh in Imphal a etkol din pawsuk uhi.
Vaiphei Pau a Jesu Film hon hiding
Lamka, Oct-19: VBCA Centre Church, New Lambulane, Imphal ah Oct 23, 2016 sunnung dak 1:00 in Sandarbha Enterprises International Inc. panpihna zang in Vaiphei Baptist Mission Deptt saina in Gelpel Luka apan Jesu Film kibawl hon hiding hi.
Kumtawp Khawmpi leh Golden Jubilee
Lamka, Oct-19: Singngat MELC ah Oct 20-24, 2016 sung Lutheran Youth Fellowship Singngat divn. Kumtawp Khawmpi leh Golden Jubilee lop hiding a, khawmpi sung in Pastor T.Ngilzakhup, Pastor Kamsuanlal leh Rev Dousuanthang in thugen ding uhi.
Oct 21, 2016 a Volleyball match opening ceremony ah Chief Guest in Ngamkhai, Principal, JN English School pang ding hi. Guest of Honour in Mahajon Liankhanlal, Functional President in Mahajon Lianmawi leh Chief Host in Kapkhanlam, Chairman, LCF/SD pang ding hi.
Guta 1 mipi’n 2 vei man
Lamka, Oct-19: Police apan kizadan tuni zinglam in Rengkai road a Life Café ah guta 1 mipi’n mankhia uh a, amin Kamminlian (30) s/o Thangchinmang of Zouveng hi’n guta pa kipuang hi’n kigen hi. Guta pan thil guk neimanlou hi’n kigen a, Police te’n mipi’ khut apan la in Dist. hospital ah koih uhi. Huai apan Kamminlian taikhe nawn in Hospital a duty Police-te leh mipi’n delh uh a, Zellang veng ah mipi’n mannawn uhi. Huai mun ah Police te’n mipi’ khut apan la in Dist. Hospital ah pawlut nawn uh a, huai zawh in Lamka Police Station ah paipih in Kamminlian’ pa kiang ah pekhia uhi.
CCpur Dist. apan school 90 telkha
Lamka, Oct-19: SSA, State Mission Authority, Manipur in Manipur ah govt leh Dist. Council nuai a school 981 ah computer siam school 1 ah Nodal Teacher select a, SHAALA SIDDHI activities (School Evaluation Dashboard) ding in Headmaster/ Headmistress te’n selection ding in theihsak hi. School 981 lak ah CCpur Dist. apan school 90 telkhia a, CEO/ADC nuai ah school 4 tel a, adangteng ZEO nuai a Aided school, Primary school, Jr. H/S leh H/S hi uhi. CEO/ADC nuai a school-te New Lamka JB school, Seilal JB school, Misao Lhahvom JB school leh M.B Saichiang JB school hi uhi. School thuneitute’n akintheilam in computer siam teacher 1 select a, ZEO/CCpur office ah peding in ZEO/CCpur in theisak hi.
SUUNNA:
T. Nengpau (56) s/o (late) Thuamzathang of Newlane, Bungmual tuzing dak 6:30 vel in Dist. Hospital ah tuapna in si a, nitaklam in Bungmual hanmual ah kivui hi.
Niangzanem (55) m/o Thiansoi of Elim Veng, New Lamka tuni zinglam in BP stoke in si a, sunnung in YPA hanmual, New Lamka ah kivui hi.
IMPHAL NEWS:
Reservation tawh kisai hilhchian
Imphal, Oct-19: Prof. (Dr.) Jaspal S. Sandhu, Secy., University Grants Commission (UGC) in Manipur University a India govt. reservation policy tawh kisai a khen khat letkhelh in om a, huai tawh kisai a mipi leh stakeholder teng theih ding in UGC in June 3, 2016 in Manipur University telin Central University teng a Registrar te’n Courses teng a ding in Central Educational Institution (Reservation in Admission) Act 2006 leh huchi bang in kum 2012 a bawlthak a om zui ding leh Manipur High Court thupiak in Central Education Institution (Reservation in Admission) zat ma in MU ah ST-te a din reservation 31% leh SC-te a din 2% reservation kizui pen zang ding in theisak hi. Huai banah reservation 50% lakah OBC-te adin 17% bikhiah hi a, Central Educational Institution (Reservation in Admission) Amendment Act 2012 tawh kituahna chi’n leng gen hi.
DGP lui in bomb tawh kisai nial
Imphal, Oct-19: Y. Joykumar, ex-DGP in local dailies khenkhat a zan in a gate kong lak ah handgrenade muhkhiak tawh kisai a thu kisuah nial a, huai tawh kisai in tuni’n a tenna inn ah media-te tawh kimuhna hun ah amah leh a innkuan te’n handgrenade kikoih thu tawh kisai kisai thei kha lou uh a, tuni zingsang a electronic leh print media tungtawn a theikhia uh chi hi. Aman a genzelna ah Police lam apan kua man a tenna inn gei uah handgrenade lakhe kha lou uh a, a worker-te suk lau na dia thuzuau chi’n gen hi.
Huailou in Maoist Communist Party (MCP) te’n Naoremthong a ex-DGP tenna inn gei a handgrenade muhkhiak tawh kisai in MCP a Urban Guerilla nuai a Special Unit-te gamtat chi’n kipuang uhi. Counter insurgency min a Manipur mi tamtak a thah banah kumlui a India security force a ex-serviceman-te khoih ding a thupukna dungzui a handgrenade koih chi’n taklang uhi.
Nagaland CM state guest a puan poisa
Imphal, Oct-19: Senapati District a Yaikongpao mun ah United Naga Council (UNC) te saina in “1st conference of the Naga Village Authority’ kichi zatna om hi. Hiai hun Nagaland CM TR Zeliang in hong uap a, tua hun in Manipur State in State guest dan in puang ua, UCM in naktak in zadah uhi. UCM President Johnson in Manipur a nam tuamtuam omkhawmte lak a chi hoihlou tuh ding a hongzin Nagaland CM bang ziaka state guest dan a puan a om hiam, chi’n gen hi. Aman a genbehna ah Centre leh State govt. in June 2000 kum a thiltung theigige a, tua hun in gamgi kek ding deihlouhna in mi 18 si te mangngilh theih hilou dan in gen hi. Kuapeuh in UNC te Manipur gam leh leitang keksak ding a gamtang ahihdan uh thei a, tua ziaka hiai bang program Manipur gamsung a neihsakna tung ah Manipur govt. naktak in mawhsa uhi. Tua banah bangziaka CM O. Ibobi hiai tungtang ah daidide hiam, chi’n Johnson in gen hi.
AMTUC & AMGEO ten Oct. 22 tan hunpia
Imphal, Oct-19: JAC of AMTUC and AMGEO ten chartered of demand a neihte uh phutna in govt. kiangah memorandum tamtak ana pia ua, tuate Oct. 22, 2016 tan a dawnna kichian banah a thil ngette uh hih tangtung ahih kei a leh kiphinna tuamtuam pan ding uh hidan in taklang uhi.JAC of AMTUC & AMGEO ten bel centre govt. in 7th pay commission a zat tawh kiton a Manipur a leng zat ding phut ua, tua banah DA/DRs due omte a kinlam a hihveng dingin ngen uhi. A thil ngette uh Oct. 22, 2016 tan a sukpichin ahih kei a leh kiphinna tuamtuam pan ding uh hidan in taklang uhi.
Eimi Veteran ten champion la uh
Imphal, Oct-19: Sadar Hills a Ngahmun a 4th Veteran Sports Meet, 2016 final match kimawlna tuni in om a, huai ah Eimi Veteran Football Club ten champion la uhi. Final match ah Eimi Veteran leh KSC Veteran te kimawl ua, huai ah tie-breaker in Eimi Veteran ten 4-3 a zou in champion la uhi. Hiai tournament bel Sadar Hills District Sports Veteran Asso. ten in a sai uh hi a, T. Manga Vaiphei, Minister PHED in Chief Guest hihna tawh uap hi. Champion team in cash prize Rs. 50,000/- dang ua, runners-up in Rs. 30,000/- sang ua, 3rd leh 4th place te Rs. 15,000/- leh Rs. 5,000/- sang uhi.
Bomb attack mawhpaihna in sit-in-protest
Imphal, Oct-19: Chingmeirong a Tangkhul Avenue a omten Oct. 17, 2016 nitak dak 6:45 vel a meltheihlouh kuate hiam in Clement Singlei (68) tenna inn ah bomb hihpuak uh tawh kisai mawhpaihna in tuni in Khuman Lampak a ISBT kong ah sit-in-protest nei uhi. Hiai sit-in-protest bel Women Action for Development, Women welfare Rongmee Lu Pham, Tangkhul Shinaolong, Tangkhul Avenue village Authority leh Meira Paibi te saina a neih a om hi a, hiai bang thil kuaman maban a hih nawnlou ding in Meira Paibi President Leishiwon Keishing in gen hi. Bomb puak ah mi 3 liam ua, khat pen in damdawi inn pawtkhiaksan mahleh minihte ICU ah omlai uh hidan in kigen hi.
Tamboola leh mela kham
Imphal, Oct-19: Kangleipak Communist Party (Poirei Meitei Lup) pawl in sum leh pai deihna ziak a Tamboola leh mela hihten tawpsan dingin theisak ua, tuabang kimawlna thanghuai khamna bawl uhi. Thusuak in a taklatna ah, Mela state pawlam mite hong hih diakdiak deihlou a, tuabang a state pawlam akipan ten sum tamtak hong laksuh zel uh hidan in gen uhi. Huai banah min tuamtuam zang in kuate hiam mun tuamtuam ah tamboola nei zel ua, tuabangte hoihtak a etzui hidan in gen ua, matkhiak om a leh kituahpih bang gawtna piak hiding in taklang uhi.
TUNI THUPI:
Ka hinna ning kitelna ziakin ka damsung kum tengteng in awl khakha in ka pai khiankhian ta ding.”- Isai 38:15
EDITORIAL:
Shamila in party thak a bawlkhiak
Human rights activist Irom Chanu Sharmila in maban Assembly Election etna in a ann ngolh khawlsan a, politics a lutding ahihdan genkawmin political party thak khat phuan hi. Sharmila ahihleh leitung pumpi adia ann ngawlsawt pen a chiamteh (world’s longest hunger strike) chih minvuah in om a, aman Manipur state apan Armed Forces Special Power Act 1958 kichi lakkhiak ding ana phut tinten hi. Sharmila in zanin a kaihzatamte tawh Peoples’ Resurgence and Justice Alliance (PRJA) kichi bawlkhia uh ahihdan puang uh a, hiai political party thakin “non-violence, peace and understanding” chih thupi pansanin Manipur state ah kalsuan ding ahihdan official in puangkhia uhi. Hiai party thak PRJA in bangchibang in kal hon suan ding ua chih theih hilou a, BJP adingin adongkholh diam ahihkeileh Congress adia ‘plus point party’ hong hikha diam chih etguk kiukiau in omlel hi.
Party thak PRJA puankhiak hunah Imphal pansan media-te chauh hilou in national leh international apan newsmen tampitak in a uap uh chih ithei hi. Kum 44 a upata PRJA chief ‘Iron Lady of Manipur’ chih minvuah a om in bangchibang in a party hon paipih ding hiam chih muhnawp huai mahmah hi. Lehkha siamna tawh kisai in bangpi hikhollou maithei a, himahleh, advisor hoihtak nei hidingin gintakhuaina khat om hi. Kum hiai zah ann angolh nunga thakhat thu a a ann ngolh hon tawpsan a Manipur state assembly election tuhding ahihdan hon puankhiak phut in gen nei mahmah hi.
Sharmila in kuateng tawh kizom a PRJA hon phutkhia hiam chih theih hilou a, a ngaihtuahna leh a lungsim taktak bangmah genkhe nailou himhim hi. Helpawl lam tawh bangtan a thuk kizopna nei uhiam, ahihkeileh political back up koiteng apan om hiam chih i theikei, himahleh, hiai party thak pen Manipur state adinga kingakna tak chingding hiam chih dotna liantak om hi. India i chih democratic country ahi a, a ut peuh mahin zalentakin party tuamtuam bawlkhethei mah uhi. Himahleh, mipi adia kingakna tham party, party detdou leh mipi’ nungthuap party hih pen poimawh mahmah hi.
United States ah atangpi in mipi’n party 2 (Democrats leh Republic) bawhtuak uh a, India abel huchi hilou in state chih ah national ahihkeileh regional party hathat in government bawlkhia uhi. Independent ading candidate te tanpha in government bawlkhethei uhi. Manipur a Assembly election om dingah Congress leh BJP kal bel sousang mahmah ding chih haihvual hilou a, huchikawm kalah PRJA in bangtan thil hon kimawlpih ban ding ua chih theih hilou lai hi.
Sharmila bel mi tamtak adingin chimtak huai leng ahikha thei, himahleh, leitung pumpi theihphak mikhat ahi hi. Aman ann ngolh a tawpsan hunin New Delhi va phanawn in, Delhi Chief Minister banah AAP Chief Arvind Kejriwal tawh houlimna nei uh a, assembly election tuh ut ahihdan taklang kawmin, a thuhilhna va ngen hi. Mihingte gensiat beilou kichi thudik hi a, Sharmila chihtakna mahmah om dinga, agense ut-te adingin leng gending beilou dinga, Airport kianga Malom mun ah a ngaihzawngpa Army te’n a kaplup ziakua ann ngawl maimai ahi chi leng tamtak om kha maithei hi. Himahleh, kum hiai zah ann ngawl a a nak a ann piak (nose feeding) a omtou den numei pen mihing khat ahihdan chiang mahmah a, ama makaih PRJA party in election bangchibang in hon maituah ding ua chih etkhiak ut huai mahmah hi.
Congress milun leh senior leader 3/4 bangin opposition BJP zomta uh a, BJP leh Congress naktakin media tungtawn mahmah inleng kinawkta uhi. Party thak PRJA pen BJP adia phatuam zaw ding hiam ahihkeileh Congress adia phatuam zaw ding hiam chih misiam leh pilte’n ‘Analysis’ hoihtaka abawl uh hun hi. PRJA in ‘mipi’ kithuahpihna ka poimawh uh, Manipur ah kikhekna hoih leh detdoutak om ka deih uh’ a chihte un bangchi bang a kikhekna (change) lunggulh uh ahi de aw?
Manipur University thubuai pen politics liantak ahi. Huchikawm kalah, PRJA in atangkoupih uh ‘justice, understanding, love and peace’ bangtan ah hon tangkoupih taktak ngamding ua le? Sharmila bel a kimuang mahmah chih i thei a, Khurai leh Khagabok ah tuhding ahihdan hangsantak in puang a, Khagabok bel Chief Minister O Ibobi Singh adia a home constituency ahi hi. Khurai ahihleh Sharmila pianna mun hi leuleu hi. Hiai Constituency nihte ah a chingtuak diam, ahihkeileh khat mah ah leng chinglou in hong om diam chih itheikei a, kum 15 val ann angolhna bangmah lou hongsuah khak ding lauhuai zaw mahmah maithei bang hi.
No comments:
Post a Comment