HEADLINES:
Masawnna leh khantouhna in buaina beisak thei ding : Modi
PM in Airport terminal hong: Social Empowerment Camp uap
Vadodara, Oct-22: Prime Minister Narendra Modi in Vadodara khawpi ah tuni’n Harni Airport terminal building hongkhia a, Navlakhi ground ah leng Social Empowerment Camp uap in masawnna leh khantouhna a om chianga buaina tuamtuam omte beithei ding ahihdan gen hi.
Prime Minister in Harni Airport international terminal honkhiak huna agenna ah central government in Aviation sector a masawnna omsak sawm in aviation policy hoihzaw ngaihtuah a, huai tungtawn in airport tamsem bawlkhiak ahihding banah public private partnership omsak hiding chi hi. Vadodara a railway university thak bawlkhiak hiding in PM in thuchiam nei a, gamsung a railway service omte leng tulai hun tawh kituak in puahphat hiding chi hi.
Narendra Modi in Prime Minister dia mawhpuakna alak nung a Vadodara aveh masak huna kihongkhia, airport terminal ahihleh Kochi zom a ‘Green Airport’ nihna hi a, Rs 160 crore bei a kibawl ahihbanah square metre 17,500 in lian a, dakkal 1 sung in gamdang apan khualzinmite telin passenger 700 vel huai terminal ah omthei ding uhi. Civil Aviation Minister Praful Patel in kum 2009 in terminal bawlna di’n foundation stone hongkhia a, kum 7 nunga nasep zawhsiang a om hi’n gen uhi. Vadodara airport ah metre 8100 a sau runway om a, Airbus 320 leh Boeing 737 khawlna dia zat ahihbanah Air India, IndiGo leh Jet airways te’n niteng in huaimun zang uh a, terminal sunga Check-in counter 18 a om ziakin thovengtak a passenger etkai theih ding hi’n gen uhi.
Navlakhi ground a Social Empowerment Camp ah Prime Minister in vualphaloute adi’n vanzat tuamtuam hawmkhia a, gam khangtou hat mahmahte lakah India in khatna luah ahihdan gen kawm in, huai masawnnte leng international institution tuamtuam te’n kipahpih uh chi hi. India mipite’n masawnna (development) gah a hamphat pih theih chiang un kizahtaktuahna leh lungkimna om ding a, central government thiltupte aneihte laka lianpen - mizawng leh gentheite dopsang ding ahi chi hi. May 2014 apan vualphalou (Divyang) lakh 5 kiangah vanzat piakkhiak a omta hi’n PM in gen a, huai hunsung in amaute adi’n camp 4500 neih in omta chi hi. BJP makaih central government in vaihawmna alet ding kuan un Divyang community-te adia sepna awng 16,500 om a, tunitan in vacancy 14,500 vel hukdim a omta ahihdan gen hi. Central govt. in subsidy tawh kisai ah direct credit abawl uapan Rs. 35,000 vel mangthang ding lai humbit in om a, black money leng Rs. 65,000 crore muhkik ahihman in mipite’ muanna thupitak ngah uh ahihdan gen hi.
LOCAL NEWS:
Rev Soichinthang in CMO office lan
Lamka, Oct-22: Rev. Soichinthang, Local Pastor, NTBC, New Bazar in tuni zinglam in Pathian kiang ah CMO office lan in CMO thak Dr. Kimngaiching Simte @ Dr. Kim Simte’ ading in Pathian kiang ah thumsak in hanthawnna thu gen hi. Huai hun Dr. Kim Simte’ innkuan leh tanau-te, Dr. Liankhojam Guite, DMO, Dr. Phirthanglien Buhril, DACO leh CMO staff te’n uap uhi.
CMO in agenna ah amah kia in nasem theilou ding a, Medical officer-te leh staff te’n kithuahpih ding in ngen hi. CMO kichi Health Sector leh Administration sector ah kikhen in mawhpuakna ngen in dim a, man power gina omlou a naseptheih ziakin CMO nuai ah Doctor apan Grade IV tan staff bangzah om hiam? CHC, PHC leh PHSC-te ah staff bangzah om hiam chih suikhiat masak hiding in gen hi. National Health Mission nuai ah programme tuamtuam omte a hoihthei pen a sepkhiak leh fund hongpaite a hiding bangtak a zatsawm hi’n gen hi.
Dr. Kim Simte in 1984 in Regional Medical College (RMC) ah MBBS zou a, 1987 in Dist. Hospital, Lamka ah Medical Officer in join a, 1997 in Grade III ah kaisang in 2015 in Grade II ah kaisang nawn a, CCpur Dist. ah numei CMO masapen ding in zan in Dr Thangchinkhup Guite’ apan charge la in tuni’n office ah nasep pan hi. Aman kum 14 sung in Thanlon PHC, Singngat PHC, Parbung PHC leh Sagang PHC ah sem a, Dist. Hospital, Lamka ah kum 2 sung Dy Med. Supdt. ana len hi.
ZOLLS makaite’n vaidawnna neihpih
Lamka, Oct-22: Gouchinkhup Veng, New Lamka a Zomi Language and Literature Society (ZoLLS) office ah tuni sunnung in Kalamyo, Sagaing Divn., Myanmar a ‘The 2nd International Seminar on Development for Zomi Language’ atel mi 30-te vaidawnna om a, Dr. Liankhanlal Simte leh Rev. N. Pumsuanmung te’n khualzinna tawh kisai report pia in, Rev. Dr. Luaichinthang, Chairman, ZOLLS in hasotna thu gen in thumsak hi. ZoLLS apan– Dalsianpau, Secy leh Rev. Dr. Liankhanlal Simte, Treasurer telin Lamka North Divn Choir mi 24, Rev. N. Pumsuanmung, Youth Co-ordinator, EBC leh lasiam Biaksang, Nemsiam, Chingngaihlian leh Tracy Ngaihchingte hi uh a, Oct. 12, 2016 a zinkhia in Oct. 17 in hongtung kik uhi.
3rd Disabilities Camp, 2016
Lamka, Oct-22: Gospel Ministry for Disabilities India (GMFDI) saina in Nov. 2-7, 2016 sung GMFDI office, Evan. Chinkholam’ inn Tuibuong DHQ ah 3rd Disabilities Camp, 2016 omding hi. Huai ah Evan. Chinkholam, Founder, GMFDI; Evan. Onkholet, Vice Chairman, GMFDI; Pastor Jangsei; Evan. D. Mangboi leh Pa Mamang te’n thu gending uhi. GMFDI saina in Nov 5, 2016 zinglam dak 11:00 in B.Vengnuom Community Hall ah Dr. Rev. Hawlngam Haokip, President, KBC in gospel album “Christa Nungjui- I” hong ding hi.
TKSU saina in blood donation camp
Lamka, Oct-22: Thadou-Kuki Students’ Union (TKSU) GHQ in CCpur dist. hospital blood bank tawh kithuah in tuni’n Tuibuong a TKSU Adm. Office ah ‘voluntary blood donation cum awareness camp nei uhi. Huai hun Kamthang Haokip, President, KKL, Ngaineikim, President, Kuki Women for Human Rights leh KSO makaite telin mi poimawh tuamtuam in uap uhi. Ksh. Vijayanta, MD (Immuno Hemotology) in blood transfusion tawh kisai sinsak a, aman agenna ah Manipur ah voluntary donation tawm mahmah in 8% lel hi a, Tripura ah bel 97 % bang phazou hi’n gen hi.
Artificial blood bawlthei omlou ahihman in mihing hinna humbitna din kipanpih tuah poimawh chi hi. Pathian in mahni ading sisan kiching apiak ban ah midangte hawmthei ding tanpha a leng koih ahihman in, mi 1 hinna humbitna dia sisan 8ml piak pen taksa adia poina omlou hi’n gen hi. Donation camp ah TKSU member 75 val in min pelut mahle uh hun kidaihlouh ziakin mi 29 lel in peman uh a, hun lemtang masapen ah hiai bang camp neih hinawn dingin kigen hi.
HAA annual confe-cum-talent hunt
Lamka, Oct-22: Hmar Artiste Association (HAA) in tuni’n Rengkai Road a Lalhmasuon Memorial hall ah annual conference cum talent hunt zang uh a, Chief Guest in Z. Solomon, Jt. Dir, TRI, Manipur pang hi. Functional President in Y. Sashi Kumar Singh, Project Officer, DRDA/CCpur leh Guest of Honour in Mary Lalrengpui, Promoter, HAA GHQ pang a, ZAA telin Artiste Assn tuamtuam a makaite ban ah Saikot MDC Lalhrillien telin CCpur dist. a veteran musician hunkhop kihel uhi. Hiai hun in HAA member te’n talent tuamtuam aneihte uh paikhawmte muhdin show uhi.
Awareness campaign nei din zinkhia
Lamka, Oct-22: ATWU leh The Singtangmite (WhatsApp Geoup) makaih Thanlon leh Guite road area ah campaign nei di’n mun tuamtuak ah tuzing in zinkhia uh a, AWTU makaih numeite K. Pumsuanthang, Local Pastor, EBCC Pethuel in New Lamka a Dorcas hall kong ah thumna in khakhia a, Bus 2 leh Sumo 3 zangin mi 200 val kuan uhi. Tunitak in Songtal leh Mualnuam khua ah 6th Schedule tawh kisai campaign nei uhi.
The Singtangmite’n ahihleh “Our Land, Our Rights, Our Identity” thupi zangin tribal movement tawh kisai 6 days marathon awareness neidin Thanlon bial zuan in zinkhia ua, Info Centre, Dorcas Veng, New Lamka ah V. Paukhansiam in flag-off hi. Huai hun ah JAC-AATB, MTDF leh YPA GHQ makaite telin mi tuamtuam in uap uhi. Amau Bukpi, Sinzawl leh Thanlon khua ah tribal movement tawh kisai awareness nei ding uhi.
BSF ah 2 I/C in kaisang
Lamka, Oct-23: Muang Khuptong s/o (L) K. Kamkhogin, Convention Road, New Lamka, tulel a 39 Bn Border Security Force, West Bengal a semlel Second in Command ( 2 I/C) ding in kaisang hi. Muang Khuptong ahihleh kum 2001 apan Assistant Commandant di’n BSF ah lut a, kum 2008 apan Deputy Commandant dia kaisang hi’n gen uhi.
Assessment Camp ah mi 90 identified
Lamka, Oct-22: Tuni zinglam in Synod Hall, IB Road ah SSA/SMA, Artificial Limbs Manufacturing Co-operation of India (ALIMCO), NGO, Dist.Health Society leh SSA/CCpur nuai a Inclusive Education for Disability (IED) pangkhawm in vualphalou-te’ ading in Medical Assessment Camp om hi.
Huai ah Dr. Chiin Guite, Ophthalmologist, Dist. Hospital; Dr. Chinggouman, Psychiatrist, Dist. Hospital, ALIMCO apan Orthotist leh Audiologist te’n Disable Person-te en uhi. Mi 90-te Children with Special Needs (SWSN) identified uh a, huai lak ah mental retardation mi 46, multiple disability mi 10, vision impairment mi 13, orthopedic impairment mi 12 leh hearing impairment mi 9 hi uhi. Nov 3 in Singngat block a Singngat Community Hall ah Medical Assessment Camp neih hiding a, Nov 4 in Henglep block a Kukimun JB school, Nov 7 in Thanlon block a Leijangphai H/S leh Nov 7, 2016 in Tipaimukh block a Sibapurikhal neih hiding hi.
Mi 2 tunga suspend tungtang zukkik
Lamka, Oct-22: Hiangtam Lamka a PTC office ah tuni zinglam in PTC GHQ a Central Working Committee (CWC) member te’n meeting nei uh a, Oct 23, 2015 ni a PTC member 2- LB Sona leh G. Vungsuanthang-te PTC Constitution (11 amendment, 2013) Bung 4, Article -IX clause 38 ( residuary power) zang a suspend uh hunchiam sung kum 1 achin tawh kituak in suspend order zukkik (revoke) uhi. Kum 2017 a MLA election ding tawh kisai, Zomi Council sung a om nam (tribe) tuamtuam te’n nambing a support neihlouh ding chi a pawlpi apan thupiak om pen a thu hoihsa uh chi in leng thupuk uhi. Assam leh Shillong a PTC dinkhiat ding tawh kisai, sum-le-pai haksatna omziakin tuni tan zinkhe theinailou uh hi’n L.Pumlianpau, President, PTC GHQ in CWC member-te theisak hi.
8th Seikam:
Henglep leh Kholmun te vualzou uh
8th Seikam memorial Open football tournament knock-out kipat tawh kiton in tuni a match nih kimawlna om ah Henglep leh Kholmun te vualzou uhi. Match masa ah Henglep leh Huilhi kimawl ua, kintak in minute 2 in Huilhi ten goal khat khum in 1-0 in makai mahle uh Henglep ten minute 4 in goal khum in 1-1 in kidraw ngal uhi. Tua zawh minute 10 in Huilhi ten goal khat khum in 2-1 in makai nawn ua, Henglep ten half ma in goal nih akizom a khum in 3-2 in makai ua, half kuan in khat khum nawn in 4-2 in makai uhi. Half zawh in Huilhi apan Thangminlen Singson hat-trick in 4-4 in kidraw ua, hun beitan a goal kikhum zou om nawnlou in penalty peksak in om ua, huai ah Henglep ten vangphathuaitak in 5-4 in zou uhi.
Tua zawh in Kholmun leh Ebenezer te kimawl ua, huai ah Kholmun ten 3-2 in zou uhi. Hiai match ah minute 3 in Ebenezer apan Jameson in goal khat khum ngal in 1-0 in makai, minute 9 in Kholmun ten penalty mu in Ginkholen in peklut in 1-1 in kidrawpih ngal uhi. Half zawh in Kholmun ten Ginkholen leh Paopithang goal in 3-1 in makai ua, Ebenezer tea din vualzawhna chance tawm mahmah in kilang a, himahleh hun beikuan lam in Tyson tungtawn in goal khum mahleh zekai lawta hi. Ebenezer ten ahihleh goal chance tamtak khahsuah uhi. Huchilou hileh Ebenezer te vualzou thei dinmun in om uhi.
SMT in champion la uh
Zenhang Lamka playground ah tuni sunnung in (late) Upa Vumzakhup Vualnam Memorial U-16, 9-men football tournanment 2veina khakna om a, Chief Guest in G. Thangkhosuanmung, EM ADC/CCpur pang a, Guest of Honour in V. Dongzathang, (retd) IRS pang hi.
Chief Guest in agenna ah mihingte adin khatvei sih maban hi a, kuapeuh damsung a thilhoih tamthei pen sepkhiak poimawh hi’n gen a, tuailaite’n mahni talent zongkhia a maban sautak enkhawm a kithunna hoihtak tawh panla dingin hasuan hi.
Guest of Honour in agenna ah khangthak games leh saptuam ah kihel thei ding omlai ahihman in igam uh kise nailou ahihdan theihtheih chi a, gam bawlhoihna dia khuampi poimawhtak ahihlam uh phawk kawm a chindan hoihloute apan kiveng dingin ngen hi.
Final match ah defending champion SMT leh BSSC kimawl uh a, SMT in 2-1 a zou in a 2veina din champion la in Rs. 10,000/- +Trophy sang in Runner Up in Rs. 4,000/- sang hi. Tournament ahihleh Sept. 21, 2016 in kipan a, mun tuamtuam apan team 20 kihel uhi.
IMPHAL NEWS:
Manipur University ah Academic Council thupukna zuih hiding
Imphal, Oct-22: Manipur University a Vice Chancellor in-charge leng ding a seh thak a om Prof. Amar Yumnam makaihna in Deans leh Head of Department teng in reservation thubuai tawh kisai in tuni’n meeting nei uh a, huai ah Oct 8, 2016 ni a Academic Council te’n Central Education Institution (Reservation in Admission) Act 2006 (ST reservation 7.5%, SC 15% leh OBC reservation 27%) zui ding a thutanna a bawl uh pom ding, Academic Session 2016-17 a Course tuamtuam adia admission process Oct 24, 2016 ni a pat ding leh Oct 31, 2016 ni a session pat ding in thupukna bawl uh a, Manipur University Teacher Assn. teng leng gupthu puang uh hi’n kigen hi. Huai tawh kisai a Prof. Amar Yumnam in MU ah academic activity kia hilou in admission process tanpha zekai a om vangsiat huai a, kintak a thutanna bawl ahih keileh kum 1 a thawn in bei ding a, lampi dang omlouh ziak in Academic Counicl-te thupukna zui phot hiding a, ST reservation tawh kisai ahihleh kum nawn a session thak kipat ma a etkai hiding a, student-te hoihna ding gelna a tuni a thupukna bawl uh chi’n gen hi.
Dawr leh dukan-te kihong ding
Imphal, Oct-21: Diwali festival (Oct 23, 2016), KUT leh Ningol Chakkouba (Nov 1, 2016) adia vanlei nuam mipite khualna in Pathianni 2vei (Oct 23 & 30, 2016) in Imphal Municipal Corporation (IMC) bialsung a dukan leh dawr omteng kihong ding a, huai tawh kisai Labour & Employment Dept. in dawr neite kiangah ngetna leh theihsakna bawl hi’n kigen hi.
Koteswar in Legal Aid Clinic hong
Imphal, Oct-22: Manipur State Legal Services Authority (MASLSA), District Legal Services Authority (DLSA) Chandel leh All Tribal Women’s Orgn (ATWO)-te saina in Chandel a Nungourok village a ATWO office ah tuni’n Manipur High Court Judge Justice N. Koteswar Singh in Legal Aid Clinic hongkhia a, zingthawh akipan nitak ihmut hun ding tan a niteng hun zatna tawh dan (law) kizawi tawn a, dan theih louhna leh tanvou omte theih louh ziak in kithuak a, huai ziak in gammi hihna dungzui a fundamental rights leh duties-te theih ding poimawh chi’n gen hi. Program hun a legal training zou Legal Para Volunteer-te kiangah Certificate leh bag hawmkhia uh a, M. Manojkumar Singh, District & Session Judge, Chandel; RK. Memcha Devi, Secy., MASLSA; M. Ibohal Singh, Chief Judicial Magistrate (CJM) Chandel leh S. Tongtang, Khangshim VA member te’n uap uh hi’n kigen hi. Huai nung in One Day Legal Awareness program om a, huai ah Advocate Ch. Momon Singh in ‘General Laws’ tawh kisai in thugenna nei hi.
Sky Hospital leh A/R te’n MoU kai
Imphal, Oct-22: Dr. Shyam Kishore, Chairman, Sky Hospital leh Major General V.S. Sreenivas, VSM, IGAR (S) te’n zan in IGAR(S) HQ ah Sky Hospital tawh Assam Rifles empanelment ding in MoU suai kai uh a, huai dungzui in Assam Rifle personnel leh a innkuan-te un Sky Hospital ah manbei in speciality leh Super speciality service a ngah ding banuah emergency, ICU leh casualty services hoihtak muding uh hi’n kigen hi. Huai hun ah Maj. Gen. V.S. Sreenivas in Sky Hospital tawh Assam Rifles empanelment a poimawh dan leh IGAR(S) HQ a Assam Rifle Nodal Hospital upgrade banah ICU facilities om ding tawh kisai in thugen hi. Dr. Shyam Kishore in Sky Hospital a facilities tuamtuam leh medical care standard hoihtak om ahih dan gen a, Assam Rifle-te medical treatment hoihtak piak ding chiam hi.
Student 3 vuak liam in om
Imphal, Oct-22: DESAM a student member 20 vel ding te’n Birmangol College a Student Union election hun ah intending candidate 2 telin student 3 soisa uh a, JNIMS hospital ah etkol in om uhi. Liamna tuak Depak Leitanthem, Wahengbam Rakesh leh Khagokpam Bidyajit hi a, Student Union Election ah intending candidate Depak leh Rakesh hi uh a, Waiton village apan pikhiak a om hi’n gen uhi. Thiltung tawh kisai Deepak in a genna ah Student Union Election ding tawh kisai a Waiton Village ah a lawm-te uh kimuhpih ding in kuan uh a, lamkal ah DESAM a student member 20 vel ding te’n kham in Keishampat a DESAM office gei a CAS Coaching Institute sawngtung (top floor) ah soisak uh a, mi soisa-te lakah a College ua games & sports secy. lui leng tel hi’n gen hi. Thiltung tawh kisai in Lamlai Police Station ah case chiamteh a om hi’n leng taklang uhi.
NB College a staff leh student te’n action lakding phut
Imphal, Oct-22: Khundrakpam a Naorem Birahari College staff leh student te’n college sung ah zan a buaina tawh kisai in College election a finance Secy. ding a candidate Naoreibam Lanchenbi thugen nial uh hi’n kigen hi. Huai tawh kisai in Manipur Press Club ah tuni’n press conference om a, huai ah N. Anita of Manipuri Dept. in media-te tawh kimuhna hun ah Naoreibam Lanchenbi in media-te kiang ah a thilgen thuzuau banah pansan bei hi a, Oct 21, 2016 zinglam dak 9:30 velin student 4 kalah buaina om mahleh college staff-te panlakna a sukveng hi a, huai nung sawtlou in DESAM Imphal East a President kichi Norendro makaihna nuai a college dan apan student hunkhop in hiam hei tuamtuam tawi in College sung ah buaina bawl in van tuamtuam susia uh a, buaina bawl-te kham daih sawm teacher-te tungah kampau hoihlou leng zat khum uh chi hi.
Poppy Cultivation ngai khawk
Imphal, Oct-22: Union Ministry of Home Affairs (MHA) in Manipur a district 5 – Imphal East, Chandel, Ukhrul, Senapati leh Churachandpur-te ah poppy cultivation ngai khawk in state govt. kiangah a kinthei pen a poppy cultivation om te suse ding a thupia uh hi’n kigen hi. Thusuak in Union Ministry of Home Affair a Dept. of Inter Security in India gamsung ah narcotic substance-te kipatna mun Manipur chi uh a, MHA in Chief Secretary kiangah India gamsung a khamtheih tuamtuam-te Manipur apan kihawm khia banah drug gang te’n Manipur ah source nei in gen uhi. State govt. panlakna a opium leh poppy cultivation hihsiat ahih keileh gamsung a opium trafficking etkai theih hilou ding a, kum nawn April kha tan a poppy cultivation-te suksiat theihna dia BSF, AR, CRPF, NCB telin central paramilitary force-te zat theihna ding phalna pia uh hi’n kigen hi.
Lampi bawl hoih louh ziakin Tinseed road khak uh
Imphal, Oct-22: Tinseed Road bawl hoih louh mawhpaihna in Tinseed Road JAC Takhel GP te’n tuni zingsagn apan Takhel GP mun ah singtum leh gua zang in lampi khak uhi. Akigendan in JAC te’n lampi bawlhoih ding a ngetna in Work Minister Ksh. Biren kiangah Oct 13, 2016 ni in memorandum pia uh a, himahleh Workd Minister apan dawnna bangmah omlouh ziak in lampi khak ding in thupukna bawl uhi. Lamlai Mandal BJP Member banah BJP state Executive Member Kh. Ibomcha in a genna ah BJP Lamlai Mandal te’n akisaipih thuneite kiangah kum 2015 apan lampi bawl hoih ding in ngen uh a, govt. in lampi a bawl hoih keileh amah bawl ding in chiam hi. JAC te’n Ningol Chakkouba festival ding tawh kisai a mipi khualna in nitaklam a kiphinna khawlsak uh hi’n kigen hi.
TUNI THUPI:
“Ze-etna ka tuah sung noute kei hon ompihte na hi uh;” – Luka 22:28
EDITORIAL:
Election bouruak kipan
Tunung sawtlou in Manipur state telin India gamsung state 5 ah Assembly election neih hidinga, i theihchiatsa bang ngei in Congress leh BJP kal sousangtak in om lel a, regional party-te’ sangmah in national party-te gikzaw dingin kilang hi. Manipur ah Sharmila in regional party khat dinkhia in Delhi Chief Minister Arvind Kejriwal kiangah advice va ngen mahleh ama’ party dinkhiak pe’n AAP tuk a hat ding in leng gintakhuailou hi.
Nagaland Chief Minister TR Zeliang in Manipur a Naga mipite hong kimuhpihna tawh kisai in gen-le-sak tam mahmah a, Manipur phaizangmi MLA khat bangin athugen a dik kei himhim chi’n police ah ‘criminal case’ bawlkhum hi. Manipur Chief Minister banah Congress senior O Ibobi Singh in TR Zeliang thugen zadahin mawhpaih ahihdan gen a, huchi kawmkalah, Manipur’ BJP in leng Zeliang mawhpaihthu puankhum ua, Manipur gamgi khen lamdang ahikei himhim ding chi uhi.
India gamsung ah state 29 bang om a, kigamgi tuak a teng Chief Minister tuamtuam bel kitauhtuah om tham a, himahleh, tutung a political issue liantak tungtawn a Nagaland CM leh Manipur CM a kitauhtuahna un gen nei mahmah hi. February 2017 velin Manipur state assembly election om ding chih kuapeuh theihsa hi a, huai kawmkawm in ‘Indo-Naga framework’ hoihtak bawlkhit a om ahihdan leh atawptung (final stage) hita chih apuan in Manipur phaizangte kiguihsak hi.
Manipur in state assembly election hon nei leh Congress leh BJP kal kibeihna sang mahmah ding chih chiangsa hi a, Congress in lah hiai Naga Issue mah hon pansan ding ua, BJP in leng hon pansan ding uhi. Alehlam ah, Naga Peoples’ Front (NPF) in thil hon bangchi vek ding ua chih thei naikei mahle hang, centre government tawh kikhut zop a banghiam hon bawl uh bel gintakhuai hi. BJP in gel detdet kawma vai khat hon gel kei ua leh kimuangkhial kha mahmah ding ua, tulelin BJP huzap khauhsim in kilang hi. Tua igenna ziak ahihleh, Manipur ah singtangmi leh phaizangmi kalah kideidanna lian law mahmah a, kimuangkhial (over confidence) kichi om theitham hi. Lok Sabha election hun abel Inner leh Outer chi’n kikhen a, assembly election hun ah bel constituency neuchik ah khen in om hi.
Naga bial ah NPF in makai (lead) zou ding in uphuai a, NPF leh BJP te centre level ah kikawi zel uhi. NPF in Indo-Naga peace talks final solution abawl ding uh phut ua, aleh lam ah Manipur a BJP makaite’n ‘Territorial Integrity’ tawh kisai naktakin vawk zel uhi. Manipur a singtangbial mun tamzaw Nagate’ opkhum hi a, himahleh, phaizangbial ah MLA tamzaw hi. Maban a election ineih ding pe’n BJP adingin leng buaihuai mahmah dingin kilang a, Naga biala vote campaign hunchiang in ‘final solution’ ompah ta ding chih hon tangkoupih ding ua, phaizangbial ah Manipur gamgi akek theikei ding hon chi nawnding ua, mipite’ adingin leng lung-ap huai mahmah ding hi.
Manipur ah election om chiangin thil dukdaklou (peculiarity) tampi omsek hi. Chi-le-kuang ahihkeileh beh-le-phung (ethnic issues) te’ banah sum-le-pai etlahna ziakin candidate i deih vungvung tanpha vote ngamlouhna om kha naak a, hiai pe’n voter te’ adia thil poi liantak (seldom affect) ahi hi. Zan a igen piandeuh in Manipur maban ding lungzinhuai mahmah a, Naga political issue, UPF/KNO’ separate state demand issue, Meitei Scheduled Tribe (ST) demand, Inner Line Permit (ILP), Manipur University thubuai leh genseng louh issue tuamtuam tawh election maituah ding political party-te hehpihhuai mahmah hi. Hiai issue te mah party te’ adia kikouna aw (slogans) hong hiding a, bangchi bangin hon vekding uam chih i theikei a, voters te’n ngaihtuahna pilvangtaka ipiak uh kipha mawh mahmah ding hi. Irom Sharmila Ann ngolh (fasting) issue leng hong kigolh laidinga, Thangjam Manorama Devi leh Sanjit te’ sihna anti -AFSPA campaign in leng hon buaklai ding hi. Himahleh, hiai issue in singtangbial ah gen aneikei dinga, singtangmite’n MLA 20 ineih theihna lak uah Congress leh BJP in tutung bangzah mawngmawng hon vawkkhe tuakding ua chih ngaihtuah thamching mahmah hi.
No comments:
Post a Comment