HEADLINES:
Mata khua ah i-20 car in mi 4 phu;1 si, 5 liam
Lamka, Oct-24: CCpur police station apan km 7 vela gamla Mata khua a ‘Leisang Lei’ kichihna mun ah tunitak dak 6:00 velin Lamka apan tai i-20 car khat in mi 4 phukha in amun ah 1 si in, midang 5 liam uh a, aliamte dist. hospital casualty tut ahihnung Imphal a etkol di’n doctor te’n referred uhi.
Amun asi ahihleh Tongbram Premjit Singh (35) s/o Khamba of Mata hi a, Yumnam Naocha (23) s/o Gobaton of Lamphel; Yumnam Anand (30) s/o Shanti Kumar of Mata (veilam ngalguh tan), Oinam Brojen (35) Oinam Jugin of Ningthoukhong/Upokpi (amai leh a veilam khepek bei) banah car driver- Khupngaihsuan @ Suasuan (22) s/o (late) Lamkhenthang of Siloam Veng, Bungmual (a taklam liang leh a bil liamzek) leh Vanlalpieng (27) s/o Choihrang of Rengkai Bethlehem Veng (a veilam liang liamzek) hi uh a, Suasuan leh Vanlalpieng chihlouh mi 3-te referred hi uhi.
Mit a mute’ gendan in, Moiranga moupite ngakin lei (bridge) kiang a road guard ah mi 9 tu uh a, car tai amuh un, mi 5te taikhe man uh a, mi 4-te gari in phu in guamsung ah kia uh hi’n gen uhi. Premjit Singh ahihleh amun ah si in, apum leh a khe kikhen hi’n leng kigen hi. i-20 car gari ahihleh Khanzam h/o Hmuaki of Bungmual a hi’n kigen a, se nak mahmah hi. Gari driver in agendan in Sasang of Saipum kha dia kuan hi uh a, public career meivak in a salh nakluat ziak a lampi mu theilou a taikhe kha hidan in gen hi. Hiaithu gelh ahihtan in misi leng dist. morgue ah omlai a, zingchiangin kihou ding uh hi’n leng kigen hi.
Triple Talaq tungtang ah Govt. in Constitution zui ding : Modi
PM Narendra Modi in Mahoba ah Public Rally uap
Lucknow, Oct-24: Prime Minister Narendra Modi in Uttar Pradesh sung Mahoba ah tuni’n Public Rally hunzatna uap a, Muslim numeite’ bitna dia Triple Talaq patkhiak a om ahihdan genkawm in constitution dungzui a paipih hiding chi hi. Kumnawn in Uttar Pradesh assembly seat 403 adi’n election omding a, tuni a public rally leng Akhilesh Yadav makaih Samajwadi Party pawlte phukkhiakna dia kalbi khat hi’n gen uhi.
Prime Minister in Mahoba mipite laka athugenna ah, Triple Talaq pen BJP leh opposition party kala buaina hilou ahi chi a, opposition party khenkhat in mipite gupna deih ziakin ngawhna tuamtuam bawl mahle uh, Muslim milip tamtak te’n numei-palsal dinmun kikimsak ding deih uh chi hi. Tulel a UP government bawltu, Samajwadi Party(SP) in loubawlmite leh namniamte adia haksatna behlap hi’n Modi in ngawh a, hunpaisa a vaihawm BSP leh SP nasepkhiakte en a, muanhuailou ahihdan uh theichian ding in mipi chial hi.
Prime Minister in Varanasi a amah constituency ah leng public rally uap in Surgical Strike tungtang amah panlaknate puangkhia hi. Aman agendan in LoC ah September 29, 2016 in Terrorist leh akizoppihte munpi tamtak hihsiat in om a, huai thiltung te’n India melmate bit nawnlou uh ahihdan langsak hi’n gen hi. Gamsung mipite’n Surgical Strike kipahpih a, 'choti Diwali' azatlai un, sepaih hangsante kipiakna mangngilh lou ding inleng Prime Minister in ngen hi.
Prime Minister in Varanasi ah tunitaklam in project tuamtuam 7 hongkhia a, huaite Rs. 5000 crore bei a kibawl hi’n gen uhi. Project honkhiak a omte lakah City Gas Distribution Project (C.G.D) pen Varanasi mipi adia Rs. 1000 crore a zawhsiang hi a, Varanasi - Madhosingh - Allahabad railway line a electric supply ahihleh Rs. 588 crore bei a kibawl hi’n gen uhi. Varanasi khawpi sung mah ah Diesel Locomotive Works tawh kisai extension project leng PM in hongkhia a, Varanasi postal region leng ahonkhiak banah BJP innkuan 5 adi’n L.P.G. connection thak pekhia hi.
Chief Justice T. Vaiphei in Lamka hongpha
Lamka, Oct- 24: Tripura High Court a Chief Justice Tinlianthang Vaiphei in Manipur hongpha in zanin Lamka hong paisuak a, CCpur College nunga a upa inn tuni’n Henlianthang Thanglet, ex-CEO/CCpur in a kaisang bawng 1 gou in lopsak hi.
T. Vaiphei in agendanin, CCpur gambuai ziakin case buaipih ding tamlou ahihman in, Imphal ah bawlsawm mahleh khawlum (climate) ziakin June 1997 in Mizoram ah lutkha hidan in gen a, climate nuam asak ziakin tenglut a, huaikum mah in private advocate in bawl mahleh case deihbang in mulou a, 1998-98 apan govt. ukil dingin chial in om a, huai hun ah ministry kikhengin MNF govt. deihsakna in kha 6 sungin promotion mupah in high court judge ding tanpha in kaisang a, Aizawl bench, Gauhati High Court nuai ah 2003 tan advocate general in sem hi. 2003 apan 2006 sungin Agartala Bench, Gauhati High Court ah judge in pang a, 2006 apan Jan. 2013 sungin Gauhati High Court, Shillong bench ah sem in Feb. 2013 in Gauhati High Court a Chief Justice dia suan in om a, May 16, 2015 in Tripura High Court a acting Chief Justice dia guang in om nawn a, Sept. 2016 in Chief Justice a kaisang hidan in gen hi.Tulel a omna bel gam kivaipuakna hoih in nuam mahmah hidan in gen a, tutan asepna ah Gauhati nuam sapen a, huaizawh Tripura hi’n gen hi. Chief Justice in administrative power leh judicial power neikhawm in judge in bel judicial power kia nei hi’n gen a, Manipur mi ahih man in posting chance neilou hi’n gen a, amah Feb. 2018 a pension tading hidan in leng gen hi.
Chief Justice ahihleh Manipur High Court Bar Assn pawlin a kaisang kipahpihna aneih ding ziak ua Oct. 20 in Manipur hongpha a, Vaiphei Officer Forum (VOF) inleng Oct. 21, 2016 in Imphal a Classic Hotel ah kipahpihna nei uh a, huai ah Vaiphei sunga officer tuamtuam ban ah VPC GHQ makaite leh student telin mi tuamtuam in uap uh a, Oct. 26 in Tripura ah kikding hi.
LOCAL NEWS:
Kut Committee te’n SP kimuhpih
Lamka, Oct-24: Chavang Kut 2016 Celebration Committee te’n tuni zinglam in SP/CCpur kimuhpih uh a, Oct 30- Nov. 1, 2016 sung Tuibuong Peace Ground ah Chavang Kut, 2016 omsung buaina bangmah omlouhna ding a pan lakpih ding in ngen uhi. SP/CCpur in Chavang Kut Celebration Committee-te ngetna bang a Security te’n kithuahpih ding leh panla ding hi’n gen hi. Huaiban ah Tuibuong ah Chavang Kut zatsung in NE, Myanmar, Bangladesh leh Asian country khenkhat pan Kut zang ding hongpai ding uh a, civil society, organisation, association te’n bandh/strike bawllou ding in ngen uhi. Committee te’n Tuibuong Peace Ground a Chavang Kut zatna ding ah Tuibuong, Bethel, Khawmawi, Ramthar leh Molnom te’n social work aneih uh kipahthu gen uhi. Chavang Kut’s T-Shirt kibawl leng kuapeuh leitheih ding in omta hi’n taklang uh a, Chavang Kut hun ah kuapeuh in uap ding in chial uhi.
KZP te’n promotion 2 kipahpih
Lamka, Oct-24: H. Doumuanthang, President, Khangthah Zuun Pawl (KZP) GHQ makaih in executive member te’n CMO kaithak Dr Kimngaihching @ Dr Kim Simte leh 54 Bn, HQ, Gangpimual a om T.Mangkhanthang Simte @ MKT Simte, 2nd in Command (2IC) a promotion uh kipahpihna nei uhi.
KZP GHQ makaite’n tuni in CMO office ah Dr Kim Simte kipahpihna nei uh a, Khangthah Puan silhsak uhi. KZP President in kipahthu gen in Simte sung a pan CMO i/c lenthei ding om Dr Kim Simte kipahpihthu gen a, Simte khangthu a ding a CMO i/c dinmun luah masapen banah CCpur dist. adin a numei CMO len masapen hi’n gen hi. CMO in KZP GHQ makaite’ kalsuanna kipahpihthu gen a, maban ah leng KZP GHQ te’n na hoih semtou zelding in hasuan hi.
KZP GHQ makai te’n 54 Bn HQ Gangpimual ah T Mangkhanthang Simte @ MKT Simte in 2nd In Command (2IC) a kaisang kipahpihna nei in Simte Puanlaisan silhsak uhi. KZP GHQ President in kipahthu gen a, T Mangkhothang Simte in KZP GHQ makai-te’ thilhih kipahpihthu gen in maban ah tuailaite’n lehkha hahtaka sim ding leh pan lathak ding in KZP GHQ makaite vaikhak hi.
Vice Chancellor’ effigy haltum uh
Lamka, Oct-24: MUTSU, ZSF, KSO/CCpur, MZP (Manipur) leh HSA Jt. HQ/CCpur te’n tuni sunnung in NERCORMP office konga Tedim road ah Manipur University a Vice Chancellor i/c Prof. Amar Yunmam’ lim(effigy) haltum uhi. Student Organisation-te gendan in MU a Vice Chancellor i/c makaih in Dean leh Head of Deptt teng in Oct 8, 2016 a Academic Council te’n Central Educational Institution (Reservation in Admission) Act 2006 zuihding, singtangmite’ reservation 7.5% zatding chih a pom ziak uleh bandh bawl sik a Vice Chancellor’ i/c effigy haltum uh hi’n gen uhi.
School transport commtt bawl ngai
Lamka, Oct-24: Supreme Court of India in road safety leh school student-te safety na ding in school authority theihpihna tawh school chih in student’ pua gari te’n school transport committee bawlkhe ding in theihsakna bawl a, N.Praveen Singh, Director of Education (S) Manipur in huai thu ZEO teng theisak hi. School authority te’n school transport committee bawlkhia a, terms of reference leng hoihtak a bawl ding uh chi’n Director of Education (S) in theisakna bawl hi. School transport committee bawlkhiat ding thu ah Oct 21, 2016 in Director of Education(S) makaih in district teng a ZEO teng tawh meeting nei uh a, Supreme Court thupiak zuihchiat ding in lemsa uh hi’n kigen hi.
NCC Integration Camp a hohte hongtung
Lamka, Oct-24: Andhra Pradesh a Kakinada mun ah Oct 10-21, 2016 sung NCC Special Integration Camp, 2016 om a, Vete Gangte makaih in Lamka apan NCC hunkhop tel in competition ah prize tuamtuam tawh tuni’n hongtung kik uhi. NCC Special Integration Camp, 2016 hun ah India pumpi a NCC Directorate 17 apat Army, Naval, Air wing cadets paikhawm uh a, North Eastern Region (NER) apart cadet 20 tel uhi. Camp sung in INS Gharial in cadet-te Bay of Bengal tuipi ah pua in show leh motivation class neihpih hi’n kigen hi.
34-AR te’n vanzat ding pia
Lamka, Oct-24: Singngat Sub-Divn. a Kangkap khua a om 34-Assam Rifles te’n Convention English School’ zatding in desk 27, bench 27, whiteboard 3, table 3, bookcase 3, syntax 2 pia uh a, school building white washing hoihtak in nuhsak uhi. 34-AR te’n Kangkap khawsung ah solar streetlight hunkhop koihsak uh a, nitak hun in Kangkap khawsung vang phingpheng hi’n kigen hi.
DAPCU in monthly report taklang
Lamka, Oct-24: Dist. AIDS Prevention & Control Unit te’n Sept. 2016 report taklang uh a, HIV positive 15 mukhia uhi. Sept 2016 khasung in General Client ah HIV ki-test mi 562 pha a, huai lak ah HIV positive 12 mukhia uh a, mi 11 te’n ART Centre ah registration bawl uh a, ART damdawi ne bel kuamah omlou hi. HIV ki-test mi 562 lak ah Female Sex Worker mi 155 leh Injecting Drug User mi 158 telkha a, amau lak ah HIV positive muhkhiak omlou hi.
MACS in HIV testing Centre teng ah syringe leh needle a thawn a, ahawm uh a bei (stock-out) ziakin HIV Testing Centre te’n tuma lam apan in stock ngah nawnlou uhi. CCpur Dist. HIV Testing Main Centre in Medical Supdt. apan supply a muh nawnlouh ziak in buaina tuak panpan uh a, DFWO in syringe box 2 (200 pieces) a piak ziak in hithei hamham lai uhi. Dist Hospital ah HIV Testing Centre ah kha 1 in HIV test mi 250 vel om gige a, maban ah HIV Test ding te’n syringe man ding a kisen uh ngai ding hi’n kigen a, thuneitute’n a kinlam a pan alak uh deihthu gen uhi.
College Veng ah 6th Sechedule awareness
Lamka, Oct-24: ATWU/ATML makaih in Oct 25, 2016 nitaklam dak 5:30 in College Veng (Zamsuan road), New Lamka ah 6th Schedule Awareness program omding a, Thangbiaklian Hangzou, MA (Intl. Dev. Australia) leh Dr.Tualchin Neihsial te’n thu gending uhi.
17th World Sight Day zat hiding
Lamka, Oct-24: Dist. Health Society nuai a National Programme for Control of Blindness (NPCB)/CCpur saina in Oct 26, 2016 zingsang dak 7:30 in Synod Hall, IB road ah ‘Universal eye Health, Prevention and Control of Emerging Eye diseases” chih thupi zang in 17th World Sight Day, 2016 zat hiding hi. Huai ah Chief Guest in Dr. Kim Simte, CMO pang ding a, World Sight Day, 2016 hongding hi. World Sight Day atel ding te’n amau office/institution apan Dist. Mega Rally nei ding uh a, Synod Hall ah kisutuah ding uhi.
Dist. Hospital Morgue hongpha
Lamka, Oct-24: Chandel Dist. a om Monsang Naga Baptist Churches Assn. te’n tuni’n Dist. Hospital a Morgue hongpha uh a, ATWU makaih in numei pawlte tawh hun zangkhawm uh a, salphate galna leh ATWU-te panpihna in Rs. 20,000 pia uhi. Monsang Naga Baptist Churches Assn-te ahihleh IEM Missionary Thangzalun in hon makaih a, mi 14 pha uhi.
Rev. W. Moses, Executive Secretary, MNBCA in salphate zahna sangpen pia ahihdan gen a, amaute mawk sih hilou in, gam leh leitang itna ziak leh tribal cause ziak a, a hinna uh pia uh ahihdan gen a, Manipur singtangmite’ kipumkhat a i om uh hunta a, kihuatna chii teng beisak a, khat leh khat i ki-it tuah uh poimawh mahmah ahi chi’n gen hi.
SUUNNA:
Gouzamuan Guite (58) s/o (late) Tuankhozam Guite of Zellang Veng, Hiangtam Lamka tuni nitaklam dak 5:40 velin cancer in si a, Oct 25, 2016 in Lamka hanmual ah kivui ding hi.
IMPHAL NEWS:
Security personnel 2 liam
CM in Ukhrul a phaksawm lawhsam
Imphal, Oct-24: Chief Minister O. Ibobi in Ukhrul district ah tuni’n Hungpung a lupna 100 om theihna District Hospital, Khungjao a 33/11 sub-station, Hungdung a 32/11 sub station, leh SDO/BDO office a hongkhiak ding deihlou in Tangkhul Naga Long (TNL) te’n zan nitak apan public curfew puang uh a, volunteer te’n lampi ah tyre hal in lampi khak uh a, thil omdan a hoih louh ziakin CM leh Dy. CM Gaikhangam, I. Hemochandra, Korungthang, Govindas, Preshaw Shimray leh Victor Keishing-te Imphal ah kiknawn uh hi’n kigen hi.
Akigendan in Helicopter zang in CM leh a team-te tuni zinglam dak 9:30 velin Hungpung a Bakshi Ground Helipad bawh uh a, TNL volunteer te’n mun tuamtuam ah lampi khak in kiphinna a neih ziak un CM leh a nungzui-te dakkal 1 sung Bakshi ground ah khawlsak in om uh a, thil omdan a hoihlouh luat ziak in zinglam dak 10:30 vel a CM in district hospital hongkhe lou in Chiangai zuan in lekhe nawn uh a, huai nung sawtlou in helpawl hiding a gintak te’n helipad lam ah thau a khahna uah thautang in 6th MR a Jawan William Tara ban (arm) taklam leh a gil kha in liam a, minute 15 sung thau ging hi’n gen uhi. Chiangai mun ah leng CM leh a team-te bawh lou in Imphal ah kik uh a, kiphinna neite’n gypsy 1 leh sumo 1 halsia uh hi’n kigen hi. Huai banah zankim nung zek zingkal baihtak dak 12:30 velin security-te’n Hungpung a District Hospital vengbit mahle uh lethod bomb 2 vei puak a, huai ah 4th IRB a T. Milan liam hi’n gen uhi.
Huailou in Dy. CM office chamber ah tunitaklam in press meet om a, huai ah Dy CM banah Home in-charge Gaikhangam in Ukhrul a thiltung mawhpaih thupuang a, NSCN-IM te gamtatna hidan a gen in, India pumpi, Manipur leh mipite douna hidan in gen hi. Minautang tamtak liam khak ding lauhna ziak a security force te’n kap thuk lou ding a thupiak hi uh a, hiai thu Centre tut hiding in gen hi.
‘Air Mobile Dispensary’ pan ding
Imphal, Oct-24: Manipur ah ni 2 om ding in tuni’n Union DoNER Minister Dr. Jitendra Singh Imphal hongtung a, Secretariat South Block a conference hall ah sunnung dak 1:30velin media-te tawh kimuhna hun ah a ministry in Manipur ah ‘Mobile Air Dispensary’ pansuah ding chi hi. DoNER Ministry nuai a project tuamtuam-te dinmun state leh NEC official-te tawh enkhe ding hi’n gen hi. Manipur ah ‘Mobile Air Dispensary’ patsuah ahihchiang in India gamsung adia masapen hiding a, huai tawh kibang in Uttarakhand, Himachal Pradesh leh mun tuamtuam ah pansuah ding in gen hi.
Numei 1 thahna ah MNPF-te kipuang
Imphal, Oct-24: Imphal East a Lamlai Police Station huamsung a Nongren leh Happyland village kikal ah zan a numei khat sisa a muhkhiak tawh kisai in Manipur Naga People’s Front (MNPF)-te kipuang uh hi’n kigen hi. Huai tawh kisai a Thomas Numai, Asst. Publicity Secy., in a gendan in MNPF apan Puchungla @ Toto w/o (late) Paoshim of Chontan village, taikhia in NSCN(IM) zom a, himahleh MNPF min zang in mipi lakah thagum a sumkhon a tawpsan louh ziak a that uh hi’n gen hi.
Dakkal 4 sung lighting bandh
Imphal, Oct-24: Manipur University a kiphinna nei tribal student-te tungah state security force-te gamtatna mawhpaihna in ATSUM volunteer te’n tuni sunnung dak 1:00 apan lighting bandh a puang un hindan ngeina leh NH-2 (Imphal-Dimapur) ah gari paidan nawngkaisak man hi’n gen uhi.
MU a Tribal student-te kiphin
Imphal, Oct 24: Manipur University ah tuni’n ATSUM, ANSAM leh KSO nuai a tribal student te’n MU ah Academic Council-te thupukna zuih ding leh tuni a admission kipan mawhpaihna in MU gate ah kiphinna nei uh hi’n kigen hi. Huai nung sawtlou in Police team-te tung uh a, student bodies palai bangah hiam-te Vice Chancellor tawh kimuh ding phalsak uhi. VC in Oct 8, 2016 ni a Academic Council-te thupukna zuih dia thutanna a bawl a zukkik lou ziak in kiphinna neite’n MU gate khak sawm uh a, huai hun ah police numei-te leh kiphinna nei numei lam-te kinawk tuah uh a, police te’n kiphinna neite kham daihna dia tear gas a kapna uah mi 6 liam a, mi 3 man uh hi’n kigen hi. Huai tawh kisai a Joseph Hmar, President, ATSUM in VC Prof. Amar Yumnam in tribal-te deihna tellou a thupukna a bawl pomtheih hilou a, panpih tuam nei a thutanna a bawl in akinthei pen a akitawp ngai chi a, Police te’n mi 3 a mat uh nitaklam a khahkhia uhi.
Huailou in Manipur University gate bul ah tribal student te’n kiphinna nei mahle uh academic session 2016-17 a PG course a ding in Admission tuni’n kipan a, kiphinna neite’n staff-te telin campus sung ah lut ding kham uh a, admission bawl ding mi tamlou in MU a dept. tuamtuam nuai a 2nd semester apan 6th semester te’n tuni apan class pan nawn uh hi’n leng kigen hi.
Ukhrul a thiltung mawhpaih
Imphal, Oct-24: Manipur Pradesh Congress Committee (MPCC) President TN. Haokip in tuni a Ukhrul district ah thiltung tawh kisai in mawhpaih thu puang a, Hungdung a district hospital kibawl thak pen mipite hamphatna ding hi a, hospital hongkhiat ma a bomb a puah vangtah huai a, govt. in Ukhrul mipite adia hospital a bawl ahi chi hi. Huailou in RK Anand, MLA in thiltung tawh kisai Manipur mipi chouna hi a, Manipur khantouhna dia mi teng pangkhawm hun hita a, hospital kibawl thak a bomb puak in Manipur a nam tuamtuam kituahna vaulauna ahih banah NSCN-IM te panpihna lou in om theilou ding a, NDA makaihna nuai a Central govt. in a kintheipen a NSCN-IM tawh peace talk a sukbei ding uh chi hi. Aman agenzelna ah Centre ah NDA te’n vaihawmna a let chiang un Manipur a ding in lauh huai a, Bangkok Agreement ziak a Manipur ah June 14, 2001 banah Aug 3, 2015 ni a NSCN-IM leh Centre-te framework agreement tawh kisai a thiltung taklang hi’n gen uhi.
TUNI THUPI:
“Mi chih Christ a hoihkim a ka piak theihna ding un, michih hilh in, michih pilna chiteng a zilsak in, Amah tanchin ka gen zel uhi.” – Kolosa-te 1:28
EDITORIAL:
Ukhrul district a thiltung
Chief Minister O Ibobi makaih in Minister khenkhat, MLA leh official team in tuni in Ukhrul district sunga project tuamtuam banah developmental progject bangzahhiam leh h Ukhrul town sung ah district hospital honkhiak sawm in vazin uh a, himahleh lawhsam dimdem uh chi’n kigen hi. Ukhrul town a helipad bawh dinga kisalai tanpha nan in om a, hibang thil tawh kisai tunaichin a kipan hilou in tuma kha tamlou paisa akipan khuak a kibeihna kipan ahi chih ahi hi.
Nagaland Chief Minister TR Zeliang in tuma a Senapati district hongphak in thil gen nei hi’n ngaihdan om a, Manipur govt hi’n MLA khenkhat in leng tuni tan in Nagaland Chief Minister thugen soiselna leh demna thupuan bawl lailai uhi. NSCN(IM) leh Centre government in ‘Indo-Naga Peace Talks’ a neih uh zousiang dekdekta uh hi’n kigen a,huai kalah ‘Frame Work Agreement’ tanpha nei khinta hoihtak uhi. Tua mah kimuanpih in United Naga Council (UNC) leh Naga Civil Society tuamtuamte’n Southern Nagaland chih paulam kawmin Manipur a Nagate’ tenna bial khua 800 vel apan Village Authority/Council makaite samkhawm uhi. Zeliang in Manipur hongphak tawh kisai in gen-le-sak tamtak om a, Manipur phaizang pansan political party tuamtuamte sousang mahmah uhi.
Thil tuamtuam leh Indo-Naga Peace talk pansan in Manipur state kuangzak thei dinmun a om hi’n kilang a, hong dik toutou ding bangin kilang hi. Kum nawn Feb/March 2017 velin Manipur ah Assembly election om ding a, tua tawh kisai in ‘drama’ leh ‘propaganda’ thuk alanglang in thehdalh panta uhi. Manipur a Naga bial tengah Naga Peoples’ Front (NPF) adingin a guktakin kimuan theihna ding aziak hoihtak om bang hi. NPF in Nagaland state thazawh (dominate) mahmah uh a, Manipur a assembly election om hun ah Naga mite tenna deuh Chandel, Senapati, Ukhrul leh Tamaleng leng luahvek ding khop in kimuang uhi. Himahleh, Sadar Hills leh CCpur bial abel NPF in gen neiban lawlou ding un kilang hi.
Election tunung sawtlou in Manipur om ding ahih lai in Ukhrul a thiltung tawh kisai leng taklat zek ngai ding hi. Chief Minister O Ibobi in Ukhrul district a project kisem khenkhat honkhiak ding chih program kichiantak aneih ziakin zingkal dak 9.30 velin Ukhrul a helipad bawh a, himahleh, mipi kuamah muhding omlou a, dakkal 1 vel a ngaknungin lungkia in state capital Imphal zuan in leng kiknawn chih ahi hi.
Tua kia hilou in, Tangkhul mite laka civil society lianteng in Chief Minister Ibobi a boycott kia uh hilou in kuamah innkong ah pawtkhe lou dingin theisak uhi. Security tawh kisai in leng Ukhrul town ah dakkal 1 val a om ding phallouh chih ahi hi. Huchih lai in tu zingkal lam in Ukhrul ah bomb puak om a, police man khat liamin building tanpha kisia chi uhi. Agal apan ngim vengveng in helpawl kuahiamte’n sniper zanga galvan a khahna uah security force personnel khat leng liam chi uhi.
Thil omdan i ngaihtuah a, i et vengveng chiangin phaizangmi leh singtangmi kal kigamla deuhdeuh dingin kilang hi. Ukhrul kim a om Hundung a district hospital leh projects tuamtuam power sub-station tela a dangdang honkhiak ding naktak a dal a om in bang gen nei ahi dia? Nagaland CM Zeliang in Manipur hongphak tungtawna bang (impact) hong om ahi dia le? Project tuamtuam kibawlte lungtun huailou (sub-standard) chih ziak kia in Tangkhul Naga Long(TNL) group te lungkimlou uh hidingin gintak huailou a, TNL in public curfew a puan nunga galvantawi pawl tanpha a kigolh un gen nei mahmah hi. Numei-naupang te’n Chief Minister Ibobi dal in lampi ah kikham mai uh a, CM in Ukhrul apan Hundung leh mun tuamtuam a phak ding thil hitheivual hilou hi.
Manipur phaizang mite’n kum tamlou paisa in NSCN(IM) General Secy Th Muivah in a pianna khua Ukhrul district a phak ding deihkhop in dal uh a, Mao Gate ah Manipur Police commando-te tanpha pang uhi. Tu in Ibobi in Ukhrul district a phakding theikhol in Tangkhul- Nagate’n dal uh a, ki dalzou tuah uh chihtheih hi. Alehlam a gen in Naga-te’n leng Meitei-te alau hetkei uh chih ngaihdan piangthei mawkmawk a,ahih ziakin, Manipur state a dingin huai chidam huailou a, i maban ding uh ngaihtuah huai mahmah a, kithuk tuah geihgeih hiding uhiam chih ngaihtuahna neih theih mah suak hi.
No comments:
Post a Comment