HEADLINES:
Cyrus Mistry paihkhiak nungin Rs. 26,000cr mansuah
 |
| http://images.newindianexpress.com/ |
Mumbai, Oct-27: Tata Group Chairman hihna apan Cyrus Pallonji Mistry (48) paihkhiak nung in company-te’ market value naktakin keniam a, India adia business conglomerate lianpen, Tata Group in ni 3 sunga Rs. 26,000 mansuah hi’n kigen hi. Irish sumdawngmi Cyrus Pallonji Mistry ahihleh Tata Sons Ltd a Board of Director te’n Seppatni in Chairman dinmun apan koihkhia uh a, huai nung in Cyrus Mistry in e-mail tungtawn a Director-te kianga laithon akhak ziakin buaina sousangtak piangkhia a, Cyrus leh Tata Group kalah kingawhtuahna tamtak piang hi. Cyrus Mistry in Tata Group adia Chairman 6na di’n kum 2012 apan mawhpuakna la a, amah tungtawn in Tata Group nasatak a khangtou hi’n gen uhi.
Tata Group apan Cyrus Mistry paihkhiak in om mahleh, amah etkolna nuaiah ‘The Shapoorji Pallonji Group’ omlai a, huai group pen Tata Group adia stake holder lianpen ahihbanah tulelin $103-billion nei hi. Cyrus Mistry in email zanga hilhchetna apiak ah, Tata Group gouluahtu Ratan Tata in kitheih siamlouhna piangsak hidan in ngawh hi. October 24, 2016 a Board Meeting omlai in, hilhchetna piaklouh a Chairman khek khiak ding in thupukna bawl in om chi a, akisaipihte kianga thil omdan zaksak ahihlouh ziakin, Chairman dinmun len theilou dia paihkhiak ahih tungtang ah thil kiselgu tamtak om hi’n gen hi. Tata Group pawlin dawnna apiakna uah huai ngawhnate thuzuau hi'n taklang uh a, leitung gam tuamtuam a omte simtheih dia email khahkhiak(leak) tawh kisai ngaihdam theih hilou ding chi uhi.
Cyrus Mistry paihkhiak nung in Tata Motors 1.44 percent in keniam a, Tata Power - 1.36 percent, Tata Steel - 0.44 percent, Tata Teleservices - 9.72 percent, Indian Hotels - 5.81 per cent, Tata Investment Corporation - 5.43 percent, Tata Global Beverages - 5.12 percent, Tata Metaliks - 4.74 %, Tinplate Company of India - 3.98 %, Tata Coffee - 3.33%, Tayo Rolls - 2.91 %, Tata Motors Ltd DVR - 2.08%, Rallis India - 2 %, Tata Chemicals - 1.98 %, Tata Communications - 1.68 5, Titan Company - 1.53 %, Voltas - 0.90%, leh Trent - 0.73 % a niamkiak hi’n gen uhi.
LOCAL NEWS:
Election hun a ramps ding thugen
Lamka, Oct-27: Biren Singh, Statistic Officer, Chief Electoral office, Manipur makaih in mi 5 in Lamka hongpha uh a, Election tawh kisai DC’s office BRGF Resource Centre ah Data Entry Operator teng meeting neihpih uhi. Sunnung in DC/CCpur makaih in ZEO, CMO, Dist. Social Welfare Officer, PO (ICDS), Election official-te leh CEO/ADC representative tawh meeting uh a, assembly election hun ah Polling station tuamtuam a disable person te’n vote a khiak hun un wheeler chair zang a paitheihna ding ramps tungtang gen uhi. ZEO/CCpur in a gendan in govt school tamzaw ah ramps om a, election neih hun in disabled person-te ading buai huailou ding hi’n gen hi.
ATWU hunzatna hihbuai tum om
Lamka, Oct-27: All Tribal Women Union (ATWU) leh ATML makaih in zan nitakin Jamsuan road leh college road junction ah 6th schedule awareness campaign bawl uh a, huai ah Thangbiaklian Hangzo, MA (International Dev., Australia) leh Dr. Tualchin Neihsial te’n thu gen uhi. Huai a mipi paikhawmte’n slogun sam uh a, athawh khawm uh Pastor Thualgouthang in Pathian kiang ah lan hi. Huchih lai in, pawlkhat in gawphel (catapult) zangin thugente kap uh a, tuni’n ATWU maikaite’n morgue ah press-te kimuhpih in thil omdan gen uh a, Pathian min a ngaidam ahihdan uh taklang uhi.
Auto driver-te enchian uh
Lamka, Oct-27: Diesel Auto driver khat in Oct 13, 2016 nitaklam in EL Scism School a student 3 pimang asawm tawh kisai Police leh BUDASA makai-te pangkhawm in tuni sunnung in Police Station ah Bungmual-Tuibuong Diesel Auto Service Assn. (BUDASA) nuai a driver/owner-te enchian (indentified) uhi. Huai hun ah BUDASA nuai a diesel auto driver/owner 40 paikhawm uh a, gari No., auto driver, contact No. hoihtak in enchian uhi.
YMA Jt.Branch phutkhia uh
Lamka, Oct-27: Group Young Mizo Assn. Manipur nuai a om YMA Branch 6- Phaijang, Galkapkawt, Saichang, Santing, Khanpi leh Chiengkawn te’n Oct 20, 2016 in YMA Santing Branch office ah YMA Joint Branch phutkhia in makai ding guang uhi. President- DL Vunga, Vice Prresident- H. Sawngtinpau, Secretary- Ginzawmsang, Asst. Secy.-Goulal, Treasurer- C. Thanglienlal Thangzawm, Finance Secy.- P Kaizamang hi uhi.
Mock polls campaign om
Lamka, Oct-27: Manipur Assembly election kum 2017 bul lama om ding tawh kisai in kisakkholhna paizel a, kuapeuh in electronic voting machine a zattheih ding deihna in Dist. Election Officer, CCpur makaih tuni’n Don Bosco Hr. Sec. School, CCpur Govt. College leh Sielmat Hr. Sec. School a kai Class X apan atunglamte adin Electronic Voting Machine Familiarization Mock Polls Campaign om hi. Huai ah Dist. Election Officer/DC Lunminthang Haokip, IAS leh Seiminthang Lenthang, MCS SDO/CCpur ban ah election deptt-te telin naupangte EVM tungtawn a secret vote khiatdan ding sinsak uhi.
DC in vote khiak hun a theihtuak omte pulak in, election a tellou kichi gamsung vaihawmna sukha ahihman in kuapeuh in deihtel theihna i neih vote a zang chiat dingin ngen a, mipi leh govt. kal a kikhenna om pen hihbei nadia panla dingin kuapeuh chial hi.
Hnunliansang, Nodal Officer in Electronic Voting Machine zanga vote khiakdan ding practical in sinsak a, election ah vote cast valid hiam chetna din Voter Verifiable Paper Audit Trail (VVPAT) kichi election a zat hiding a, huaizat dingdan leng sinsak uhi.
CT Lian Guite in culvert hong
Lamka, Oct-27: Gouchinkhup Veng a Tedim Road akipan CBA Central Church zotna bul a culvert kisia sawttak bawllouh a om bialtu MDC CT Lian Guite, New Lamka West in ama sum sengin bawl a, zawhsiang ahih tawh kiton in tu zingin Gouchinkhup Veng V/A makaih in ahonna om a, bialtu MDC in hongkhia a, Pastor Gouzamung, Local Pastor, CBA Central Church in lan hi.Bialtu MDC in a genna ah gamsung a bawltuak omte mipi tawh pangkhawm in bawl pahpah hileh a hoihlou omlou ding a, MDC ahihman in mimal a ding tuam bawlsak theilou ahihna ah hibang mipi adia phattuam thei ding neuchik hileleng bawltuak omte panla dia mansa hi’n gen hi.
Thangkhankham, Chairman, GouchinkhupVeng V/A in culvert bawldan pulak a, bialtu MDC panlakna vengsung mipi kipak mahmah hi’n gen hi. Huai Culvert aniamluat ziakin vuahzuk chiangin hawktui luang ginatheilou in ninlom in hubing sek a, GS Road tanpha hawktui in tum-sek hi. Bialtu MDC in ngai poimawh in Rs. 40,000/- val bei in slap culvert bawlsak hi’n kigen hi.
CCpur Private Centre Committee, 2017
Lamka, Oct-27: HSLC examination 2017 tawh kisai tuni’n ZEO/CCpur makaih in Phungkhothang govt H/S ah CCpur Private Centre Committee, 2017 bawlkhia uh a, President in T. Goukhomang, ZEO/CCpur pang hi.Officer i/c in T. Hanglamthang, Headmaster, Phungkhothang govt H/S; Asst Officer i/c (AOC) Confidential- Pumshong Hangshing, DI; AOC (Head office)-M. Chaoba Stanley, Sr. Graduate Teacher, Don Bosco Hr. Sec. School; AOC dangte-H. Liankhanlal, Principal, Ebenezer Academy; CL John, Headmaster, Gandhi Memorial H/S; TS Mangcha Haokip, Headmaster, HEM School; Dimngaihman, Headmistress, Lanva Model H/S; N. Vashti, Headmistress, Songtal H/S hi uhi.
Local Educationist ah C. Hangshing (retd) MCS, Addl Director of Education (S/Hills); S. David Piaklian, MPS, Addl SP (L& O)/CCpur leh Dr. Kim Simte, CMO/CCpur hi uhi. Member-te Principal/Headmistress/ Headmasters of Hr. Sec. School & H/S. Supervising Invigilators- Thanglianlal, Headmaster, Vimala Raina H/S; Joy Yumnam, Asst. Teacher, Lanva Model H/S; Thuamkhanvung, Headmistress, Bungpilon H/S; S. Ginzalian Ngaihte, Vice Principal, Ebenezar Academy; Lalramtlun, Asst. Headmaster ,Dongjang H/S; Okendro Sharma, Asst. GT Don Bosco Hr. Sec .School leh Kimbiaksang, Headmistress, SSPP Residential school hi uhi.
Dr Ambedkar Medical Aid Scheme
Lamka, Oct-27: Ministry of Social Justice and Empowerment, govt of India etkaina nuai a om Dr Ambedkar Foundation in ‘Dr Ambedkar Medical Aid Scheme’ tungtawn in kal (kidney), lungtang (heart) sin(liver), cancer leh brain (khuak) operation/surgery ding ST leh SC innkuan kum 1 sung a income 2,50,000/- nuailam te kiang ah panpihna pethei uhi. Damlou operation ding te’n operation neihma ni 15 tan in Director, Dr Ambedkar Foundation, 15 Janpath, New Delhi ah application piaklut ngai a, MP (Lok Sabha/Rajya Sabha), Dist. Magistrate/DC pan recommend ngai ding hi. Foundation in pahpihna apiaktheih zah lungtang (heart) surgery (operation) te Rs.1.25 lakh; kal (kidney) surgery/Dialysis te Rs.3.50 lakh; cancer surgery/chemotherapy/ radiotherapy te Rs.1.75 lakh; khuak (brain) surgery te Rs.1.50 lakh; kal (kidney)/organ transplant te Rs.3.50 lakh, spinal surgery te Rs.1 lakh leh other life threatening diseases te Rs.1 lakh in panpih theih uhi. Thuchian kimzaw leh application form kimtak DC’s office ah ettheih leh xerox theih ding hi.
LPF te’n CMO kipahpihna nei
Lamka, Oct-27: Ladies Prayer Fellowship (LPF)/CCpur makai te’n tuni zinglam in CCpur Dist.a numei CMO masapen kipahpihna in CMO’s inn ah Memento pia uhi. LPF makai te’n numei CMO kipahpihthu leh mipi kilam etna bang a damtaka mohpuakna aneihte hon semsuah ding in deihthu gen uhi. CMO/CCpur in LPF te tung ah kipahthu leh aphawkphak uh kipahthu gen hi.
Manipur Sangai Festival, 2016
Lamka, Oct-27: Imphal ah Oct 23-27, 2016 sung Manipur Sangai Festival, 2016 omding a, CCpur Dist. apan cultural team 5 selection khiat hiding hi. Huai ding a lunglut cultural troupes te’n DC’s office ah application pia in troupe member list, contact No, synopsis of items Nov 4, 2016 tan in piaklut ngaiding hi. Cultural team ah member 15-20 hiding a, security reason ziak in cultural team te’n temsau ataktak (real) temsau, teipi (spears leh thau (gun) zattheih louh ding hi’n DC/CCpur in taklang hi.
BYF Lamka South Divn. khawmpi
Lamka, Oct-27: Evangelical Baptist Convention nuai a BYF Lamka South Divn. khawmpi a 9 veina Nov. 3-6, 2016 sung EBCC Dorcas Veng, New Lamka ah omding hi. Huai ah ‘Tuailai, Thutak leh Diktatna a kibulphuh thakna’ chih thupi zang in Rev N.Pumsuanmung, Youth Coordinator, EBC in thu gen ding hi. Seminar hun ah Lianding Guite, Child Coordinator, EBC in Nov 3, 2016 nitak in Rev V. Nenglian, DS Lamka South Divn. in khawmpi hong ding a, Seminar hun ah Lianding Guite, Child Coordinator, EBC in “Christian Ethics” chih thupi zang in sinsak ding a, khua tuamtuam a BYF te’n kidemna tuamtuam nei in phatna lapawl sading uh a, Upa S.Lalngailian, Chairman, Divn Working Committee, Lamka South Divn. in khawmpi khakding hi.
CMO makaih in NHM meeting
Lamka, Oct-27: Dr. Kim Simte, CMO/CCpur makaih in Oct 28, 2016 zinglam dak 11:00 in CMO office chamber ah National Health Mission review meeting omding a, CHC/PHC a MO i/c te block 5 a Block Program Manager-te telding uhi. Huai ah Grand Hearing Aids (NPPCD) hawmkhiat ding thu, NPCDCS, RBSK, PMSMA program pailel enkhawm ding uhi.
Paite special joint meeting om ding
Lamka, Oct-27: Paite Tribe Council (PTC) GHQ a Exe. Committee in sitting 33-na thupukna dungzui in block leh unit makaite tawh Paite namsung thu leh maban paiding dan genkhawmna 1st phase special joint meeting Oct. 29, 2016 zinglam dak 11:00 in Dorcas Veng a YPA hall ah nei ding uhi. Huai ah PTC Lamka block, New Lamka block, Lanva block, Tuitha block, Valpakotsuah, Imphal block leh amau nuai a unit chih a makaite tel ding uh a, John K. Ngaihte, Gen. Secy in special joint meeting tawh kisai pulak ding a, H. Paukhenmung, Secy (Fin) in annual fund tawh kisai report peding hi.
IMPHAL NEWS:
MU a Registrar in thusuah bawl
Imphal, Oct-27: Manipur High Court in MU thuneite kiangah academic session 2016-17 a course tuamtuam adia admission hun ah Central Educational Institutions (Reservation) Amendment Act 2006 kibawlsa, kum 2012 akipuahthak (reservation tawh kisai ST adia 31%, SC 2 %, OBC 17 %) zui ding in thupia a, himahleh Court thupiakna in admission process pailel a sukbuai louh ding chi’n taklang uhi. Manipur High Court ah Advocate BR Sharma (Ravi), LLM in MU Registrar kiangah Oct 20, 2016 ni a High Court thupiakna dungzui in academic session 2016-17 sung adia admission hun ah reservation tawh kisai in ST adia 31%, SC adia 2% leh OBC-te adia 17% zui ding in theisak hi.
Huailou in MU a Registrar Prof. M. Shyamkesho Singh in Oct 20, 2016 ni a UGC laikhak leh Deans Committee te’n tuni a meeting a neih hun uah thupukna dungzui in ST category-te adia reservation 31% ahih theihna dia Post Graduate leh course tuamtuam a dia ST candidate-te additional list puangkhe ding in theisak a, course tuamtuam a dia admission leng Nov 5, 2016 tan a dia suan ahih banah Nov 7, 2016 ni a class kipan ding hi’n taklang hi.
Upper PT lakna khawlsak ding phut
Imphal, Oct-27: Education Dept. (S) nuai a Upper Primary Teacher lakna ding tawh kisai in Oct 28, 2016 in interview om ding himahleh selected list a candidate telkhalou te’n interview leh recruitment process khawlsak ding phut uh hi’n kigen hi. Huai tawh kisai in Manipur Press Club ah tuni’n press conference om a, huai hun ah selected list a telkhalou-te palai Karam Niturani in media-te tawh kimuhna hun ah interview ding a qualified candidate list bawl hun ah diklouhna leh a hoihlouna tuamtuam om a, mark sangtak mu candidate khenkhat telkha lou uh a, dept. inleng cut off mark tawh kisai candidate-te theisak lou uhi. Huai tawh kisai a Dept. te’n interview hun ma ngei a diklouhna-te bawl dik ding in ngetna bawl a, huai ahihkeileh Court tun ding uh chi’n taklang hi.
TNL te’n CM O. Ibobi ‘ban’ uh
Pawl 2 in Ukhrul thiltung mawhpaih
Imphal, Oct-27: Weapon Zimik, President, Tangkhul Naga Long in tuni’n Ukhrul ah Chief Minister O. Ibobi a lut nawn ding leh District hospital telin project tuamtuam a hongkhiak ding kham uh a, district hospital zawhsiang louh banah infrastructure hoih a tapsak ziak hi’n gen a, himahleh official dang te’n bel hongkhe thei ding chi hi. Aman agenzelna ah Ukhrul district hospital a etkhiak hun uah infrastructure tasam in lupna 50 om ding chih himahleh lupna 30 kia om a, CM in a hongkhiat sawm ni in machine tuamtuam leh lupna omlou chi’n gen hi.
Huailou in Kuki Inpi Manipur (KIM) leh Kuki Orgn. for Human Rights (KOHRT) te’n Ukhrul thiltung tawh kisai mawhpaih thupuang uh a, state pumpi douna chi uhi. Gaidon Kamei, President, UNC in News agency-te kiangah singtangmite’n Chief Minister leh a Council of Minister-te doudal a chih thu tawh kisai a singtangmite a chihna lakah Kuki telkha ahihleh mipi lakah apology a bawl ding leh UNC te’n singtangmite kua hi hiam chih thu tawh kisai a hilhchetna a bawl ding uh chi’n gen uh a, Gaidon Kamei leh UNC te’n a sanggam Kuki, Naga leh Meite teng tawh kituak leh lungmuangtak a khawsak khawm ding in leng ngetna bawl uhi.
IM active cadre 2 leh OGW 4 man
Imphal, Oct-27: Lamphel Police Station in a huamkhak Imphal Fairyland leh Pallel bazar ah tuni’n Imphal East District Police leh Thoubal Police Commando te’n NSCN-IM a cadre 2 leh overground worker mi 4 man uh hi’n kigen hi. Akigendan in Imphal East Police te’n tuni zingsang dak 8:30velin Imphal Fairyland a Ringreingam Ruivah tenna inn a luhna uah Ukhrul district a Somdal village akipan ngen NSCN-IM overground worker 4 - Ningkangam Muivah @ Freeboy (37) s/o Vareisul Muivah, Ramthem Muivah (35) s/o (late) Ronald Muivah, Chonreisim Phunghsok @ Rogai (33) s/o (late) Ningam Phungshok leh Vivian Ruivah (40) s/o Tonsing Ruivah-te man uh a, amau apan SIM card 4, sum Rs. 6,000 leh document ginglelh huai khenkhat muhkhia uhi. Huailou in S. Madhunimai, Addl. SP (Ops) makaihna nuai a Thoubal Police Commando te’n Pallel bazar gei a Forest gate lak operation a bawlna uah NSCN-IM cadre Moses Tantonga Kanawa (24) s/o K. Kodou of Khunkadan village telin mi 2 man uh a, amau apan 9mm pistol 1, tang 4 leh mobile phone 1 muhkhiak hi a, van muhkhiakte tawh mi 6-te Lamphel Police station ah pekhia uhi.
TRANSFER & POSTING
(IPS/MPS Officers)
1. Ms. R.K. Tutusana, IPS, Dy. Director, MPTC as Dy. Director, MPTC & in-charge Director, MPTC.
2. S. Gautam Singh, IPS, SP CID (SB) as SP CID (SB) & in-charge SP-NAB.
3. L. Mangkhogin Haokip, IPS, Commandant, 8th IRB as Commandant, 8th IRB & in-charge CO 2nd IRB.
4. Ningshem Vashum, IPS, Commandant, HG (VA) as Commandant, HG (VA) & in-charge CO, 5th IRB.
5. Smt. Kh. Sarma, MPS, Addl. SP, Vigilance as Addl. SP, Vigilance & in-charge SP Vigilance.
6. Thongjapao Tungnung, MPS, Dy. Commandant, 3rd IRB as Dy. Commandant, 3rd IRB & in-charge CO 3rd IRB.
TUNI THUPI:
“Pianken thak, diktatna leh sianthounaa Pathian batpiha siampen silh un.” – Ephesate 4:24
EDITORIAL:
Samajwadi Party dinmun
Kumnawn February/March 2017 velin Uttar Pradesh state telin state tuamtuam 5 ah Assembly election om ding hi. Hiai ding tawh kisai in political party hunkhop kisakholta uh a, election omna ding state hunkhop leng buai mahmah uhi. Tum a a i gengen uh Prime Minister Narendra Modi leh BJP Chief Amit Shah-te’ sulnung in bangtan hon sukha ding hiam chih theih hilou hi. Union Territory khat banah state dang 4- Punjab, Uttar Pradesh, Uttarakhand leh Manipur a election om ding pen thukhat ah ngaklahhuai bangmah leh a lehlam ah bangchidan hiam in hong sousang kha diam chih leng theih hilou hi.
Punjab state ahihleh Chief Minister Parkash Singh Badal makaih Shiromani Akali Dal leh Bharatiya Janata Party alliance a government bawlkhiak hilel a, Uttar Pradesh ahihleh Chief Minister Akhilesh Singh Yadav makaih Samajwadi Party ruled state ahi hi. Uttarakhand state tawh kisai en nawn lehang, BC Khanduri apan Ramesh Pokhriyal Nishank in Chief Minister hihna la a, BJP ruled state mah ahi hi. Manipur state ahihleh Chief Minister Okram Ibobi Singh makaih Congress government term 3 bang hita a, tu in BJP in kal naktak a suan uh hi’n kilang a, bang hong chi paidiam chih theih hak lai hi.
Uttarakhand leh Punjab-te BJP a sa chiphot ni, himahleh, Manipur leh Uttar Pradesh state-te BJP vaihawmna hilou ahihman in, a buaipih uh ngai mahmah dingin kilang hi. Tu in official takin election campaign akipan naikei a, huchi kalah, Manipur dinmun ah leng hong kichiangsim khat om a, India adia milip sahna pen banga ngaih Uttar Pradesh state inleng buaina tuamtuam hon tuak uh hi’n kilang hi. Hiai state nih a buaina-te i ngaihtuah chiangin BJP te’n think tank hoihtak nei uh a, khuakhiam pipi vaisaina ahihdan hon taklang a, BJP ruled state-te ah buaina om kei mahleh, party dangte’ vaihawmna state-te ah buaina om toutou mawk hi.
India adingin Manipur state bel khutchin vomchia lel hi a, politics tawh kisai in gentak hilou hi. Himahleh, buaina leh hiamgamna tawh kisai in bel Jammu and Kashmir tawh dinmun kikhat a om tawh kibang uh a, centre government in J & K abuaipih bang in Manipur leng a buai tham ding uh chih haihvual ahikei! I gennop ahihleh Manipur a MLA 3 leh Congress Vice President hilhial in BJP a zoptheih mawk uh ahi. Tu in, India adia state poimawh penpente’ laka khat Uttar Pradesh a vaihawmna lenlel Samajwadi Party sungthu hong buai nawn a, a sungthu a thil ki-play thupitak om dingin gintakhuai a, pa leh tapa kala buaina (feud) liantak om ahihdan haihvual hilou hi. SP play maw… BJP kigolh?
Kum tamtak Uttar Pradesh Chief Minister hihna ana len Mulayam Singh Yadav in a tapa Akhilesh Yadav kiangah Chief Minister hihna pekhia in vaihawmna lensak a, ahihziakin SP Chief hihna bel Mulayam Singh in len veve hi. Huchih lai in, a tapa (Akhilesh) in a paneu Shiv Pal Yadav telin mi hunkhop cabinet minister ahihna ua pan paikhia uh a, SP adia mi poimawh Amar Singh tawh kizopna thuktak anei uh chih paulam hi. Mulayam Singh Yadav, Akhilesh leh mi poimawh tuamtuam in hiai thu ah kitheihsiamna khat bawl mahle uh huai in party sung adingin gah kipahhuai suangtuanlou dinga, maban a election a maituahna ding utawh kisai in SP dinmun dengdal sak zou mahmah laidi’n gintakhuai hi.
Uttar Pradesh state a tutung thiltung pen mi tamtak adingin lamdang saktheih a, khangthu (history) a i simkhak ‘Mughal-te’ hunlai a pata kidouna’ mah a batna ton om hi. Akhilesh in apa pen khanglui bawlsim leng hithei, khangthakte’ ngaihtuahna tawh UP state puahphat sawm leng hikhathei hi. Himahleh, tuapen apa’ ngaihdan hi bilbel lou ahihdan chianga, apa tawh leng hun sawtkuamtak kihoulou uh chih hilai hi. Samajwadi party sungah hun bangtanhiam paisa apan meima ahihkeileh meizing (miasma of feudalism) i chih ana om hita eh chihtheih in om a, tutung a hong puangkhia hidi’n ngaihsut theih hi. Thu kal zehin gen lehang, Congress leng Gandhi/Nehru family in enkol den uh a, tu in Sonia leh atapa Rahul thuthu ahi chi in ngawhna liantak om a, huai piandeuhin Samajwadi Party leng Yadav family control na nuai ah om ahi chi’n MLA hunkhop kiphin uh a, legislator-te leh executive kal tanpha ah buaina om ade aw chihtheih in om hi. India i chih mipi vaihawmna gam hi a, party machinery himhim hoihtaka kivaipuakna (streamlined) tawh a apai teitei deihhuai hi.
No comments:
Post a Comment