HEADLINES:
Manipur singtanggam ah development fund 80% lut –CM
Chief Minister O. Ibobi in MHJU member-te kimuhpih
Imphal, Oct-28: Manipur Chief Minister O. Ibobi in a chial dungzui in All Manipur Hill Journalists Union (MHJU) makaite tuni’n Imphal a a ‘official chamber’ ah kimuhpih in press conference neihpih hi.Chief Minister in a genna ah Manipur state kichi neuchik hi a, huchi kalah singtangmi leh phaizangmi kikal a kideidanna a om sek poisa mahmah ahihdan gen a, development fund himhim 80% vel singtanggam ah lut hi’n gen a, huai chetna dingin ‘slide show’ tanpha bawlin etpih hi.
MHJU team leh Chief Minister in official taka program a neihkhawm patna uh leng hi a, hiai hunah Deputy Chief Minister Gaikhangam banah a Cabinet te Indus & Commerce Minister Konthoujam Govindas; PHED Minister T Manga Vaiphei; Health & FW Minister DK Korungthang; Revenue, Forest & Environment Minister I Hemochandra; Works, CAF & PD Minister Ksh Biren; IFCD Minister Ngamthang Haokip; Education Minister Ratan Kumar, Social Welfare Minister Mirabai leh RD & PR Minister M.Okendro tel uhi. MHJU lam akipan CCpur district, Chandel, Ukhrul, Senapati leh Tamenglong district akipan member 24 paikhawm uh a, singtanggam bangchibanga puahphat a om hiam chihte ngenteltak in genkhawm uhi.
State govt lam apan Chief Minister makaihna Minister tuamtuamte banah Secretary leh Commissioner level hunkhop leng tel uh a, media-te’ theih dingin a nasepna uh tawh kisai report bawl uhi. PK Singh IAS in a gendanin Ukhrul a developmental project tuamtuam CM in a honkhiak ding dalin om a, himahleh mipite khualna ziakin tuni akipan official a honkhiak hikei mahleh mipite’ zattheih dingin latkhiak (dedicate) a om hi’n gen hi. Ukhrul a hospital building kibawlthak pe’n vanzat bukimin om a, civil society tuamtuam in building zawhlouh ahi a chih uh leng a chetna dingin slide show in media-te’ ma ah pulak(show) uhi. Hospital lui a om damlou (patient)te building thak ah suan hiding uh a, lupna 50 om leng 100 tan koih pah hiding in chi’n Chief Minister in gen hi.
Dakkal 4 phial CM leh a teamte tawh MHJUmakaite’n thil omdan a genkhawm nung un state govt top official te’n kum 10 paisa akipan nasepkhiak a omte a chetna (evidence) dingin slide show tungtawn in Health sector, Power (MSPCL) leh PWD nuaia North East State Roads Investment program a na kisemte leh PMGSY nuaia nasepkhiakte muhtheih dingin lahna nei ua, phaizangbial sangin singtangbial ah na kisem tamzaw ahi chi uhi. Kum 2002 in Manipur ah meivak ginalou a, atangpi in nikhat in dakkal 4-7 sung pai a,kum 2016 kum in dakkal 22-24 sung meivak omta chi uhi. PMGSY (Phase 1 to X) sungin singtangbial ah lampi thak km 5072 sial in om a, phaizangbial ah 1648 lel kibawl chi uhi. Dzuko valley ah lampi sial ding km 18 lel himahleh, km 12 tan zawh ahihin nan in om chi uhi.
Tualou lampi bawlna mah in kum 10 paisa sungin NESRIP fund nuaiah 82.47% leh SRCIP fund tungtawn in 88.05 % te singtangbial ah lut a, Manipur phaizang in NESRIP ah 17.53 % tang a, SRCIP ah 11.19% tang chi uhi. Official-te’n a genbehna uah, NESRIP tungtawn a sum honglut tengteng singtangbial ah Rs 1899.88 crore zat hi a, phaizangbial adingin Rs 252.80 crore lel kizang a, SRCIP adia sum hongpaite lakah singtangbial ah Rs 1647.08 crore zat hi a, phaizangbial ah Rs 86.69 crore zat ahi chi uhi. Huaibanah Manipur singtanggam a Chandel, Ukhrul, Senapati, Tamenglong leh CCpur district ah Congress govt in infrastructure leh developmental program tuamtuam a sepkhiakte uh alem mahmah tawh taklang uhi.
Peace Ground ah Chavang Kut 2016 zat hiding
Lamka, Oct-28: Chavang Kut Celebration Committee saina in Oct 30- Nov 1, 2016 sung Tuibuong Peace Ground ah ‘Celebration of Brotherhood bigger, better and stronger’ chih thupi zang in Chavang Kut 2016 zat hiding hi. Oct 30, 2016 zinglam dak 9:30 program ah Chief Guest in Conrad K.Sangma, MP (Meghalaya) hiding a, PS Haokip, President, KNO tawh Chavang Kut honna in ribbon cutting leh Brotherhood Monolith hong ding uhi. Khamphone Viengluang in Sovenir hong ding a, Chief Guest, PS Haokip leh M.C.C.C.K, Nagaland makai-te apan thugen ngaihna omding hi. Oct 31, 2016 zinglam in Thangkhosei Haokip, President KIM; CNTC, Nagaland; Khiamniungan; Mishing; Ao; Karbi; Sangtam; Singpho; Chang; Tang; Sema; Nyishi Baptist Council; Lotha; Wancho; Kuki Inpi Barak Valley; Elder Sainhuu Seded; Mongolia makai-te ban ah President ZoRO apan thugenna omding hi.
Nov.1, 2016 zinglam program ah Chief Guest in Lalthanhawla, CM Mizoram pang hiding a, Chief Guest; KNDO, Chittagong Hills; Yimchunger; Adi; Phom; Kachin, Bodo, Kaipeng, Zeliangrong makai-te apan thugenna omding hi. Chavang Kut sung in tribe tuamtuam apan cultural dance leh special No. omding uhi.
Mipi’n nasep puan hon silhsak un- Paukhansuan
Pute’ vualzawlna leh manifesto puankhiakna om
Lamka, Oct-28: Kumthak 2017 bul lakah Manipur assembly election 11-veina om ding ah assembly constituency tuamtuam a candidate ding mi bangzahhiam lak ah 58-CCpur A/C a MLA candidate sawm Paukhansuan Khuptong in tuni sunnung in tenna inn Nehru Marg ah Pute’ Vualzawlna ngetsakna leh Manifesto puankhiakna nei hi. Huai hun ah mun tuamtuam akipan deihsak leh ngainatu tamtak paikhawm uh a, paikhawmte lak ah bangzahhiam te’n deihsakna thugen uhi. Apu Upa S. Vungsing Ngaihte in a lutung ah khut-nga in thumsak a, K. Vungzalian, President, BJP CCpur dist. in manifesto hongkhia in Pastor Letzathang Guite, Local Pastor EBCC Central Lamka in lan hi.
Paukhansuan in a genna ah kum tamtak paisa akipan politics a lunglut in elected member hikawma gam leh nam adia nasep lunglut mahleh a family uh church background petmah ahihman in apa’n phalkei mahleh a lunglutna bei tuanlou ahihna ah Jan. 27, 2014 in lemsakpihna pia in a lutung ah khut nga in thumsak hi’n gen hi. MLA candidate dia nasepna hatzawk semna din innsung dongtate tawh kithukim in Pute’ vualzawlna tuni’a tangkhei hi’n gen hi. Singtangmite adin tulel dinmun pen survival stage ahihlam theikawm in a kul leh poimawh banga gam leh nam nasem dia kipekhia hi’n gen a, mipi’n nasep puan silhsak a, gam puah theihna dia hunlem pedin ngen hi.
K. Vungzalian in maban a election om ding ah BJP in hihhoih ding ahihdan gen in ticket deih leng tam mahmah a, candidate ding tawh kisai in CCpur A/C ah 75%, leh Singngat ah 80% chiangta mahleh constituency dang bel etthak ding omlai chi’n gen hi.
LOCAL NEWS:
Mangcha in Henglep A/C ah candidate sawm hi’n puangkhia
Lamka, Oct-28: Mangcha Thangzawm in Henglep khua ah Oct 25, 2016 in MLA election 2017 ah Henglep A/C apan candidate sawm hi’n mipi mai ah puangkhia hi. Huai hun ah Pastor Seiboi Haokip, Henglep Area ECA Pastor in Pathian kiang ah thumsak hi.
Mangcha Thangzawm in agenna ah kum 25 nung a, akhanletna Henglep gam hi’n gen a, khantouhna in anung ngatsan poisakthu gen in Nehemia bang a khawpi sesa leh gamsung sesa tungding thak ding a, Pathian hatna muang kawm in MLA candidate sawm hi’n gen hi. Henglep khua ah vote zong a kuan hilou in galdou ding akuan ahihziak a khaw mipi’ lak ah Pathian apan vualzawl ngetsakna ngena kuan ahihdan gen hi. BJP leh Congress ticket kia in Henglep gamsung bawl hoihlou ding ahihdan gen a, gam ittute kia in bawlhoih lel ding hi’n gen hi. Amah leh a team te’n kipahna leh ngaihnat suklatna in bawngtal 1 leh vawk 1 gou in Henglep hausa, Youth Club makaite leh khaw mipi tawh nitak ankuang umkhawm uhi.
Mixer khawl in gawikha; damzoulou
Lamka, Oct-28: V. Paukhanpiang (29) s/o (late) V. Pauchin of Tangnuam, tuni sunnung dak 2:30 velin Mission Road, Hiangtam Lamka ah tractor a cement mixer machine kailai kia in mixer machine in gawikha hi. Kintak in Dist. Hospital puaklut in om a, doctor te’n Imphal ah nitaklam dak 4:30 velin refered mahleh Kangvai khua tunma Koite area ah damzoulou in si a, Oct 29, 2016 in Tangnuam hanmual ah kivui ding hi. V. Paukhanpiang bel Mualveng a om Samuel’ cement mixer machine enkaitu hi’n kigen hi.
B. Khaimang Ngaihte in Ph.D ngah
Lamka, Oct-28: B. Khaimang Ngaihte s/o B. Thongchinthang Ngaihte of Simveng in tunaizek in JNU, New Delhi ah Ph.D ngah thak hi. Aman Prof. Sabrani Roy Choudhary, Japanese Studies, Centre for East Asia Studies, School of International Studies, JNU panpihna in thesis "Japan-Russia relations in the Post-Cold War Era,1991-2010" chih gelh hi.
Laibu suakthak honna om
Lamka, Oct-28: Rev. Dr. Pum Za Thang Tombing in a gelh “Zogam Khanlawhna leh Missionary Box” kichi laibu tuzingkal in EBCC Hebron, New Lamka ah honna om a, Rev. V. Thangkhangin, Dir. of Missions, EBC in hongkhia in Pathian kiang ah lan hi. Huai hun ah laigelhtu in India leh Burma a Pathian gam nasepna kal asuanpih damlaite kihel in, missionary hong kipat khiakdan leh pan alakdan pulak in, Burma gam a Pathian-na asepdan tawh kisai pulak hi. Laibu thak ah missionary box tungtawn a saptuam in Pathian gam-na asep theihdan leh Chin state tanpha sukha in khanlawhhna thupitak a tutdan tuang a, adeihte’n Rs.250/- pia in leitheih ding hi. Programme hunsung in EBC sung a Missionary Secy masapen Rev. N. Phung Zapau, Rev. TS Thangta leh laibu gelhtu lawmhoih Rev. E. Paukhanlian, D/S Lamka North Division te’n thugen uhi.
Seminar leh 59th TCSA Annual Conf.
Lamka, Oct-28: Lanva a TCCC Hall ah November 1, 2016 zinglam dak 10:30 in Seminar leh 59th Tedim Chin Student Assn. Gen HQ Annual Conference, 2016 omding hi. Zolai Sinna seminar hun ah Dal Sian Pau, Secy. ZOLLS, Khampu Hatzaw leh Pau Za Cin Hatzaw, Secy. TCLS te’n sinsak ding uhi. Nitak dak 5:30 in 59th TCSA Annual Conference, 2016 hun ah Pawi Mang in Dr. Pum Za Mang Shoute, Medical Officer leh Pawipinu in Vung Za Kim, MFS, Finance Officer, DIC/CCpur hiding hi. Pawi Mang, Pawipinu, President TCU HQ, President TCYA HQ leh President TCCC HQ apan thugenna omding hi.
Mi 466 in hearing aid ngah ding
Lamka, Oct-28: Dr. Kim Simte, CMO/CCpur makaih IN ama office chamber ah tuni zinglam in CHC/PHC a MO incharge leh BPMU te’n Manipur health deptt in National Programme for Prevention & Control of Deafness (NPPCD) tungtawn in khawzakna hoihloute adia hearing aid a hawmkhiak ding tawh kisai genkhawm uh a, Imphal apan Dr. Dhakeshwore Singh, State Nodal Officer, NPPCD leng kihel hi. Health deptt. in NPPCD tungtawn in State pumpi huapin 1veithu in hearing aid tamtak hawmkhiak a world record bawlsawm in panla uh a, CCpur dist. ah Parbung, Thanlon, Henglep, Singngat, Saikot leh Songtal ah assessment bawlna tawh kisai Dr. Jire Pudaite, Dist. Nodal Officer in report apiakna ah dist. ah mi 466 telkhia uh hi’n gen hi. Nov. 5, 2016 in Khuman Lampak, Imphal ah Grand Hearing Aid Distribution Programme om ding a, CCpur dist. a telkhiakte Nov. 4, 2016 in CMO Office a ki-report theihsak ahih ban uah amau youth hostel ah tungsak in nek-leh-tak, giahman leh lam paiman teng sensak hiding uh hi’n kigen hi.
YPA GHQ khut ah table pia
Lamka, Oct-28: YPA GHQ a Honorary Patron Member (late) V. Ngulthuam @ Taia innkuan te’n amin mangmawhna din YPA GHQ hall a zatding table tuni’n YPA GHQ makaite khut ah pia uh a, Rev. Lian Benson, Exe. Secy, EELC in lan hi.
Huai hun ah T. Khailianthang in YPA poimawh taksap thei a hibang thil thupitak ahih uh YPA GHQ-te kipak uh hi’n gen hi. V. Ngulthuam @ Taia ahihleh khawsik leh natna tuamtuam ziakin Aug. 21, 2016 in Guwahati ah si a, a damlai in YPA GHQ a CWC chairman alet ngei ban ah asih dong in YPA GHQ adin honorary patron member in pang hi.
Anganwadi worker leh helper-te trg.
Lamka, Oct-28: Deptt. of information & technology saina in tuni’n IB road a Synod hall ah ‘Digital Saksharta Abhiyan’ nuai ah Digital Literacy tawh kisai in Anganwadi Worker-te adin training pia uhi. Training ah ICDS Thanlon block huapsung a Anganwadi worker leh helper-te kihel uh a, Thokchom Chanu Chingkheimanbi, State Programme Manager, DIT; Peter G. Biaklian, Dist. Manager leh Michael Haokip, Dist. Manager te’n sinsak uhi. NDA govt. in a patkhiak Digital India tungtawn in India khua leh tui a hihna nei khempeuh in innkuan 1 a mi khat bek in computer atheih ding chih hi a, tua dungzui a sai uh hi a, ASHA worker leh NFSA nuai a rationing agent-te leng training piak hiding uh kigen hi.
Hill Model School-te study tour pai
Lamka, Oct-28: Singngat khua a Hill Model High School akai student-te Singngat a om 26 Assam Rifles sensakna in Imphal khawpi sung mun poimawh diakte pha din study tour pai uh a, amau tuzing in Khuga Dam ah Brig Ajay Sharma, Commander, 27 Sector Assam Rifles makaih in officer te’n vaidawn in huai ah naupangte’ singpi dawnpih in khakhia uhi.
Amau bel teacher guide leh managing board telin 218 hi ua, bus 4 zang in kuan uh a, Sendra, Science Centre, Zoo, Millennium Garden leh Museum pha ding uh hi’n kigen hi. Hill Model High School ahihleh 1971 kum a dinkhiak hi a, SP/CCpur lui L. Mangkhogin Haokip, IPS, Vungzamuan Valte, IRS banah tulel a 26 Assam Rifles a 2 i/c lenlel Major Thianlianmung telin officer tamtak khankhiakna hi’n kigen hi.
Siluang tawhkhiat ding postponed
Lamka, Oct-28: Dist. Magistrate/CCpur in Oct 29, 2016 in (late) Pamsialching (22) w/o Paukhawmlal of Thingkangphai village a kivuina han akipan tawhkhiak banah forensic expert te’n postmortem bawl ding chih himahleh forensic expert omlouh ziak in thuthak om masiah hunchiam omlou a suan (postponed) in om hi. CMO/CCpur in medical team ban ah surgeon/forensic expert arrange ding a, siluang tawhkhiat leh postmorterm bawltheih hun ding bikhiah thak hiding in Dist. Magistrate/CCpur in akisaipihte theisak hi.
School te’n U-DISE form submit ngai
Lamka, Oct-28: CCpur block nuai a om govt leh private school teng in U-DISE/DCF 2016-17 form fill-up a, November 5, 2016 tan in DI of schools/CCpur block kiang ah submit ngai hi. Hunchiam sung a submit lou te’ school min U-DISE 2016-17 ah omkhalou ding a, govt apan hamphatna tuamtuam hongpaite ngahthei nawnlou ding leh govt in theihpihlou ding hi’n kigen hi.
Tuailai Pro 1434 Mega Workshop
Lamka, Oct-28: Joint Christian Fellowship Singngat leh JAC-AATB Singngat area saina in Oct 29, 2016 zinglam dak 10:00 in EBCC Singngat ah Tuailai Pro 1434 Mega Workshop/Seminar om ding. Huai hun ah Rev. K. Kamchinkhup, DS,EBC/Imphal, Rev. N. Pumsuanmung, Youth Coordinator, EBC te’n Pathian thu gen in Seminar hun ah sinsak ding uhi.
IMPHAL NEWS:
Moirang MLA case SC in nawlkhin
Imphal, Oct-28: 27-Moirang A/C a MLA telching a om M. Prithiviraj in Election lai a affidavit ah Mysore University apan MBA Certificate (2004) bawl tawm zang chi in huai A/C mah ah candidate P. Saratchandra, IAS (retd.) in April 19, 2012 ni a Manipur High Court ah case a bawl High Court in M. Prithiviraj, MLA hihna diklou chi’n Saratchandra in a tunga case a bawl zou hi. M. Prithiviraj in Feb 28, 2016 ni a Manipur High Court thupukna phiat ding leh amah mawhpaihna zukkik ding in Supreme Court ah ngetna (appeal) a bawl Supreme Court in pomlou in nawlkhin a, High Court thutanna Supreme Court in bangmah kheng danglam hilou ding hi’n tuni’n thusuak om hi.
Gari parking leh lamlian zat dan kikheng ding
Imphal, Oct-28: Diwali (Oct 30), Goverdhon Pujah (Oct 31) leh Nov 1, 2016 a Ningol Chakkouba kizang ding tawh kisai bazar a van poimawh tuamtuam lei utte khualna in Oct 29, 2016 (Kiginni) zing dak 7:00 akipan nitak dak 6:00 tan Khwairamband, Paona leh Thangal bazar ah gari himhim lut theilou ding a, Nov 1, 2016 zing dak 7:00 akipan dak 11:00 tan in leng gari bangmah lut theilou ding hi. Oct 30, 2016 sunnung dak 1:00 akipan in Diwali beimatan Paona leh Thangal bazar road leng (North to South & South to North) one way traffic hiding hi. Huailou in Tedim Road akipan Imphal khawpi zuan gari-te Keishampat akipan Wahengbam Leikai/Sagolband Side/Uripok Canteen Crossing/Supermarket tawn in Watham Leirak/Thangmeiband road, Nagamapal road, Waheng Leikai raod/ Keishampat junction lut in CCpur zotna bus parking Krishnadas Oil Pump lui kiangah kinga ding uhi.
Helicopter service kipan ding
Imphal, Oct-28: State govt. in Imphal leh district HQ teng kizopna ding a helicopter service patkhiak dia hun sawt sim apan proposal a bawl uh Centre govt. in lemsakna a piak tawh kiton in Regional Connectivity Scheme (RCS) tungtawn a Helicopter service kipan ding hi’n kigen hi. Huai thu tawh kisai in Guru Prasad Mahapatra, Chairman, Airport Authority of India leh Dr. BP Sharma, Managing Director, Pawan Hans te’n Nov 2, 2016 ni in Imphal ah MoU suaikai ding uh a, hiai hun Gajapati Raju, Union Civil Aviation Minister; RN Choubey, Secy., Civil Aviation leh Manipur govt. apan state transport dept. nuai a official te’n uap ding uhi. Akigendan in state govt. in Imphal tawh Moreh, Ukhrul, Thanlon, Temenglong telin mun khenkhat ah helicopter service pan ding in proposal a piak lut-te uh Centre in tamvei tak lemsa mahleh a tak a sepsuah hi ngeilou chi’n gen uhi.
Manipur a social worker upa pen si
Imphal, Oct-28: Manipur a Social Worker upa pen banah ‘Father of Social Work’ minvuah a om Thounaojam Iboyaima (99) of Singjamei Thongam Leikai tuni zingsang dak 1:00 velin RIMS hospital ah teknat ziak a si hi’n gen uhi. Akigendan in Th. Iboyaima bel Nov 2, 1916 in piang a, Manipur in statehood a ngah theihna ding leh Manipur bawlhoih ding deihna in movement tuamtuam ah panla hi. Singjamei Girls School, Singjamei Boys School leh Manipur College-te ah founder member hi a, kum 1958 in politics zom in All India Socialist Party Manipur Branch ah President hihna len a, statehood movement tawh kisai in kum 1960 in kha 7 sung jail tang a, a damlai in Educational Guide Centre te’n NIM Award, International Volunteers Day State Celebration Committee te’n Volunteer Award leh Cultural Forum Manipur te’n Dr. Iboyaima Cultural Harmony 2014 Life Time Award pia uhi. All Manipur Ethnical Socio Cultural Orgn. te’n kum 1999 in ‘Father of Social Work’ ding in puangkhia uh a, Integrated Manipuri Assn. Bangladesh te’n kum 2002 in ‘Manipuri Bandhu’ Title pia uh a, tulel in All Manipur United Clubs Orgns. leh Irabot Foundation Manipur-te Chief Advisor hi a, amah suunna hun ex-Minister N. Biren, CSO leh student leader tuamtuam te’n uap uhi.
Helpawl a tel 1 mankhia
Imphal, Oct-28: Thoubal Police Commando te’n Yairipok Bamon Leikai area ah sun dak 12:30 vel a operation a bawlna uah NSCN-IM a cadre hidia gintak 1 man uhi. Mat a om Pingmeiso Shimbrui @ Asho (51) s/o Laiching Shimbui of Yeasom Village, Ukhrul district hi a, amah apan Santro Car (No. MN07D-1420), wallet leh sum Rs. 340, RC book 1, driving license 1, mobile phone 1, Vodafone SIM 2, Airtel SIM 2, Voter I-card 1 leh document ginlelh huai khenkhat mukhia uhi. NSCN-IM Hebron HQ a Civil Administrative Officer (CAO) Ngaranmi tawh kizopna hoihtak nei self styled Major Shinmikum tungtawn in kum 2010 a NSCN-IM lut in security force-te gamtatdan thu pesawntu ahihbanah Hebron HQ apan document-te mun tuamtuam ah pawtu hi’n kipuang hi.
TUNI THUPI:
“Ngai un, hiamgamna, chiin ka kikou khia a, himahleh zakin ka om kei: panpih deihin ka kikou a, himahleh vaihawmna a om kei hi.” – Job 19:7
EDITORIAL:
Corporal punishment kiam!
Numei naupangte’ tunga gawtna (Corporal punishment) tawh kisai i genma in leitung pumpi ah numei naupang tunga tatsiatna, India gamsunga naupang tunga tatsiatna, India malsuahbial banah Manipur state adiakin CCpur district tanpha a hehpihna bei a numei leh naupang tunga tatsiatna tawh kisai neuchik kikum khawm masa leng i chi hi.
Zanlam zekin Lamka khawpi sungah numei naupang 2 thagum a sualluih tungtang i genta uh a, CCpur district adingin a khatveina ahi nawn kei hi. Diesel Auto hektu pasal khatin numei naupang pimang sawmna tawh kisai thubuai pailel a, police inleng Auto hektu/neitu matkhiak sawm teitei in panla a, CCpur District Diesel Auto Association-te peace ground ah identification parade a neih nungun matkhiak ahinai kei a, police te’n pan naktakin la tou uhi.
Tu in ‘corporal punishment’ tungtang enkhawm lehang Lamka khawpi sung telin i district sung uah adiakin private school ah kisoisakna uang mahmah hi. Hiai thu media tuamtuamte leh student body-te’ banah human rights organisation bangzahhiam te’n kum 3/4 vel paisa apan naktak a hon sual chiangun private school a teacher te’n student-te a soisakna uh hong kiamdeuh un kilang hi. Himahleh, un-official thusuak khenkhat kingahdan in, school khenkhat ah teacher-te’n naupangte chiang (sticks) a zep teitei lai, chih bang om a, chetna (evidence) bel kibawl tuanlou a, i gen ut mahmah bel corporal punishment kiam ahi chih ahi.
Corporal punishment leng naupang tungah tatsiatna chikhat hi a, nidang hunin teacher te’n school ah chiing (cane) tawi in naupangte’n pumlauh mai uh a, a ngaihtuahna uh (psychology) tanpha buai hunkhop ana omta mah hi. Naupangte kepbitna (Child rights) leh Human Rights hong hat hiaihiai chiangin India gamsung ah naupang tunga hiamgamna leng automatic takin hong kiam hiaihiai a, Lamka zang ah leng beisiang hial hikei leh kiamtuan mahmah a, study/research bawl-ut te’ adingin bawltham ching dingin kilang hi. Eilak ah Government school sangin private school-te a lun zawtham a, teh vual hilou hi. Huchih lai in private school association in etkai dia hoih i sak mahmah bel zing zukham kawm a class la teacher bangzahhiam om dingin gintakhuai a, a kisaipih Principal/Headmaster/ Headmistress te’n a et ding un deihhuai hi.
Naupangte laka kiphausak kawma gawtna piak (sadism) kichi a lunglut mahmah teacher hunkhop omkha thei hi. Student naupang lehkha siam theilou deuhte gawtna piak-ek in laisiamna tunlaw khawllou maithei hi. A khente bilhek charchar mai, akhente lah tawpek zialzial kawma, a nung leh awm uh chianga zepsak chihte thil hoihpen hilou a, teacher khat adingin Jail tan theihna ahi hi. Corporal punishment meaning taktak theilou private school heutu a om leh haitak hiding a, government school teacher-te a appointment basis uh i theihsa ahihman in theihsiamna dan khat om thepthup hi. Manipur state govt nuaia govt teacher 90% phialte qualify hilou in political appointment hi tangpi uhi. Himahleh, private school ate bel siamna ziak mah a lut ahihman un Corporal punishment tungtang a theihchai (digest) uh kisam hi.
Mi piching kuahiam in naupang khat vanzat (object) zanga a soisak ngeingei leh hiai pen case liantak hi a, mi tampite’n vanzat hiampipi, sing leh suang, chiing (cane) ahihkeileh a kawnggak (belt) banah khut uh zang a a bet ngeingei leh hiai thu serious taka lak hiding chi uhi. Tua kia hilou in naupangte tawpek, agawl ua man, akawng ua pan domkang a mundang a paihkhia chihte leng Court in a ngaihkhawk ahi. Apaisa paisa ahita, kuamah kimawhsa ihi kei a, hiai Corporal punishment tungtang ah school chihin adiakin teacher-te’ adingin nikhat bek awareness/seminar aneih uh deihsak huai mahmah hi. I gam ah hibang buaina a kiam deuhdeuh chihding ahita a, kipahhuai hi.
No comments:
Post a Comment