PhualvaTimes Movie Review: LAMKA Koi Lam Zuan Ding Ka Hia?

LAMKA “Koilam zuan ding ka hia?”

December 21st 2013 ahi a, huai zan in Vangaitaang a Pathian nasem a om ka nu leh pa leh kanaute ka ngaihluat ziak leng ahi diam ah imutheilou in ka om nilouh a, huai hun in keisang a nulehpa ngaizaw tham mi om law ding hi a chih ngaihtuahna toh kikhem khiat ka sawm lai in, nu leh pa’ dampih nawnlouhte’ hinkhua ding bang ka ngaihtuah a, huchiin naupang tagah hinkhua ding khat 12:40am veel in ka hon gelh hi. Lamdang tak in hiai ka gelh lai in naupang tagah khat a nu toh a kihou ding dan leh atangthu kizop ding dan lungsim ah hong kilang tou dundun in ka thei a, lusu hetlou in mittui bangzah hiam toh ka zanhak zou hial hi.

A tangthu paidan taangpi...

Zoudawn khua khat ah nupa ki it mahmah Lianpu leh a zi om uhi. Amau nupa in tapa deihthoh huai takmai Muanthang nei uhi. Nikhat Lianpu luidung hoh hong tuahsia in a luang nasan leng muh a omlou ahih man in Muanthang tuh apa meel muman lou in anu liim ah hong khang khia hi. A teenna khua ah pawl 5 tan ahon zoh chiang in aban sunzom din’ a nu’n lamka khopi ah a Nii te inn pansan ding in vakha hi. Anu ngai mahmah Muanthang tuh a a Niite’ inn ah om ding in nutsiat hi a, a Nu’n lou nnasem ding in kiksan hi.

Nikhatni chiang a laisiam leh kaam hoihtak mai nei a kanu toh khosa khawm ding chih lungulhna in Muanthang a school kai ding bang kilawp sak mahmah mai hi. School a hong tung ngei a, gate bul a pan a class room a atutna muntan pha ah, a muhteng tuh Muanthang a din thilthak ngen ahihman in thupi salua in hampha kisakna toh kithalawp mahmah mai hi.

Singtang khua a kipan leh pahizaang akipan, innkuan hausa a pan leh innkuan zawng tak a kipante kuamah kideidan tuam omlou in tukhawm vek uhi. Tuabang hun ah a theih ngeilouh uhleh a zakngeilouh uh thute hilh ding a sinsaktu hong lut kaal naupangte’n na ngak khipkhep uhi. A poikhat ah naupangte’ lametna pawtu sinsaktu pen hong kailou hia? Damlou hia? Theikhang. Kuateng pil? Kuateng mawl? chih enkhe ding sinsaktu khat hong lut chiang in naupangte’ lak ah gamgi hong kikhung kha bangta hi. Sappau zaban naupangte leh sapte’ khedap sung a khe nathun baan naupangte’ kaal hong kigamlaat luat chiang in, tuition fee piakzah kibang, uniform colour kibang sintu naupangte khenkhat lungtang ah kei zaw mite’ nuai a ka hi chih ngaituahna chii khat hong kituh pah hi. Kuadang gen hikeng Muanthang leng laisiam pente’ lak a theihphak ahihlouh hangin, hiaibang guu a thuakte lak ah a khatna hidin gingta ing. A ziakbel Muanthang in a siamtheih tawp suah a banghiam hon gen chiang inleng, chiamnuih gen mah bang a mi a nuihsak zaizai hun tam mahmah hi.

Amah na kaina lui toh tua a angah sinsaknate kikhelua ahihman in, a theihbatlouh, koipen tak mi va dong ding ka hia chihleng theih butlouh tampi toh exam hun chiang in mark 2 chihkhawng zero chihkhawng mukhe toihtoih hi. Akaipihte’ lak a khat in na awlmoh in deihsak mahleh, amah hailuat man in hamphatpih kha thei tatak lou hi. Huai a lawmnu’n ahilh khat bel theiden hi. Lai nasiam ut leh Pathian kiang ah ngen in chih na genpihkha a hihman in, Muanthang in a beidot luat chiang in a deihteng gelh in Biakinn ah thohlawmbawm ah va koih zeel hi. Nikhat Biakinn keem tupa’n Biakinn a hahlai in thawhlawm bawm leng susiang dia hong kisak leh Muanthang lehkha koihte hon muh chiang in, Pastorpa’ kiang ah hon tawi hi. Pastorpa’n naupang om moh khat kimawlna hi din ngaihtuah mahleh, naupang beidong khat thumna ahi chih hon theisuah in huai naupang kua hiding hiam? Chiin awlmohna toh zonkhiak hon tum hi. Himahleh Pastorpa leng a deihbang a paihat thei hetlou ding in a sangampa neihsun in na tokbuai zou mahmah a, tangthupha gen dinga kuandek lai bang, a naupa ziak a zahlak huaipi a mimai siding a sapna atuah hun bang na tam mahmah hi. Koilam pentak zuan ding ka hia? Chih akam a dawnna a kipiaktheihlou hun inleng Pathian lau mahmah a zi in na hanthawn zou mahmah hi.

Tuabangkal ah aniite’ tapa Pauson in Muanthang puak khop mahmah ding haksatna na behlap thei mahmah hi. A chang in nuihzat huai bang ding khop in engbawl dan siam mahmah uhi. Khatvei Muanthang school kai ding a kisa tuh, a sawl ngeina dan bang in a khamtheih ding damdawi leiding in sawl hi. Huai hun in Muanthang in bel khamtheih ahihlam ngaituah baan mahmah lou hi. School lut hunding lah hita huciin Muanthang tawp chiang in kape maiding chih ngaihtuahna toh school ah hon pua hi.

Vangtah huaitak mai in, huai nii khelkhel tuh gate ah check na om in Muanthang a puak damdawi toh matkhawm in hong pah hi. Mat a hong hihchiangin dan palsat hong suaksuk pah a, naupangte deihsak Sinsaktu hoihte’n kam kham zen a tamveipi khamtheih hoihlouh dan a gen na nung ua school a khamtheih paw lut tuh bangmah gentam omlou in a tan theih omsun tuh nohkhiak ahi mai hi.

Mahni neihsa a school kaizou leng hilou, mipang beel a khosa Zoudawn a hong kipan naupang neuchik khamtheih ziak a nohsuah a om chih a omna pa a Gang in hon theihchiang in thangpai lua in, Muanthang tuh kideek zoulou phial in zeep zial zial maita hi. Nitak ann leng pelou hi. Zaan hong hihchiang in naupang Muanthang tuh a gil hong kial mahmah in, a nu a ngaihna toh, bang ziak pentak a nohsuah a om hiam chihleng theilou ahihman in, lung buailua leh maimong lua kisa Muanthang in a sikhin a pa angaina bang hong lian mahmah in hichiin hon chi hi. “Pa natapa non mu hia? Pa ei, koi a om na hia? Ka lawmte school kai tawpchiang in a pate’n a pi ve uai, nangle kei hong pi lou di maw khatvei beek! Pa ka tup mualsuah zou lou ding ka hi, nahon nutsiatpah natapa in khoveel keikia in ka palzoukei, pa ei zingchiang in ka nu kiang ah kana pai ding aw..” chih thutawp a zang in, zingkhua hong vaak ding ngaklah mahmah Muanthang khua hong vak phet in a Niite’ theih ma in a inn uh taisan in hong pawtkhia hi. Himahleh gari tuanman ding neiloupi koitan a khe in a paizou diam chih theihbut hikei. Lam bansam a om in zotna ding theilou naupang gamlak ah lau leh liing kawm in hong giak hi. Gamlak a naupang lum Biaklal leh Chingbawi in hon tuakkha ua zotna ding theilou ahihdan a hon theihchiang un Biaklal in hehpihlua in a inn ah tonpih hi. Ahamphat huai khat ah Muanthang kaina school te’n I khotaang siatna thupitak lak a pan hong khangkhe ding naupangte leitung pilna kia hilou in khalam ah kibulphuhna kiptak a neihtheihna ding uh lametna toh Laisiangthou sinsakna a kibulphuh tangval Biaklal counsellor ding in hon la uhi.

Biaklal panlakna ziak in hehpihna toh Muanthang tuh school hong kaithei nawn hi. Biaklal in Muanthang hinkhua bawlna ding in nakpitak in pan honla tou a, muhtheih phial khop in leng hong kikhek tou panpan ta hi. Kumkim bang hong beitou theita hi.

Hucihlai in pawl 10 sinlel Liannu a pan in, tangthupha vaakvaihpih Semtute’ khitui maltaak khiate hon muchian mahmah hi. Liannu tuh a uu Minthang toh lamka ah school kai in innluah uhi. Anuleh Apa bel Pathian nasem in zoudawn lam ah khosa uhi. Tanau laina neisam mahle uh hiai unaute’n taksap hunte ah kawmtheih ding nei tawm mahmah uhi. Amau unau ki it mahmah ua, khenchiang bang in anau mumang pau in “ Nu nou toh omleng zaw Sunday chiang beek a saa kimeh di hi a, tualah chuu.. san suk santou lehle kou havai ngen meh” Minthang in a zakchiang in suty hun khawng ah kiloh a va kuan in anau toh mehlim khatvei chang khawng nezou zeel uhi. Hun hng pai liam zeel in Minthang a nungak damlou in hong gim mahmah hi. Thumna tampi toh Minthang in Pathian kiang ah ngetsak mahleh a hinna leen taang zoulou in kuulsin hon zalsan maimah a, Minthang beidong kisa in kahtam in hiai honlou hi. “ Sesum inlah ka lungdeih leizou a, Sian aw ka kahtam nasiang tungnai lou maw.. kimpih gualte’n ka luankhi nuihchiam in leel, Zua aw navon lungmawl lua ka hiam? Sianmang ka heisan vaang hiam? Sian in kei hon heisan vaang hiam? Tongdot simthu lelthei omlou maw? Koi ah sawlbang hei ding ka hiam? Zua aw navon ka lungmawl man hiam? Hiaiteng dawnna a muhlouh chiang in hinkhua setak ah hong taang in, anaunu leng a thuaktu hong zuak hi.

Counsellor Biaklal in Muanthang kia buaipih hilou in mitaangpi muh a naupang hoihlou bang a kilangte’ haksatna leh a taksap uh bang hihiam chih muhkhiat sawm in naktak in pang hi. Pathian in puakgik a piakte tungtawn in naupangte’ kiang ah na vulue system uh bang ahia? Chihte khawng leh hiai leitung ah Bang legacy na nuse dia? Chi in awlmohna toh naupangte chouna bawl in naupang tampite khoveel etdan khekzou mahmah hi.

Kum tawp dingkuan ahong hita a, nikhat Biaklal a it mahmah Chingbawi leh Muanthang hun nuam zang a pawtkhia hong kiklam uh gari hattak mai a hong tai khat in Biaklal hon phukha in hospital tut himahleh damzou louin, amuan Toupa’ kiang ah, a it mahmah leh a maban asep zohnailouh tampite khawlsan hi. Biaklal leitung ah muhin om nawnkei mahleh Pathian thu toh a chituhte a hong khang hiai hiai a, naupangte’ Annual day hun ah Muanthang tuh naupang hinkhua kikhek pen a chiamteh tham in pahtawina laipi sang ding in tuntou zou hi. Tua kia hikei, a seppihte nasan leng deihteelna thak toh a hinkhua uh khek zou hi.

Hiai kumtawp hun ah naupangte a dia kimuh khawmna nanung ah Muanthang in hon genkhiak theih tuh “ ka hinkhua ah tam veipi zotna ding theilou in ka buai a, koilam zuan ding ka hia? ka chih hun a tam mahmah a, himahleh tun Sir Biaklal in ka zotna ding mun hon hilhta, kuadang hikei Jesu hi.” Chi in a tangthu kikhup ding hi.