Songtal leh akimnai a khua omte a ZRA cadre-te'n All Tribal Women Union pawlte vaulau a thau git khum uh hi'n ATWU pawlin Lamka a District Hospital Morgue a report abawlna uah puangkhia ua, Songtal khua a 'Sixth Schedule Awareness Programme' nei ding in Lamka apan mi tamkhop kuankhe mahle uh ZRA cadre-te'n khawsunga programme zangsaklou a kiksak uh chi in lungkimlouh thu taklang uhi. Huai tawh kisai Zomi Re-unification Organisation, ZRO Hqtrs nuaia Information & Public Relations Secretary in thusuah bawl in hilhchian a, pawlkhat ten Army tonpih a Songtal khua a Sixth Schedule tawh kisai awareness programme neih asawm tungtang ua ZRO mawhsakna omte ngaikhawk mahmah ahihdan taklang in, Songtal a Army lut ding chih thuguk amuh ziakun ZRA cadre-te kigingsa a om hi'n taklang a, ATWU te'n thiltup dang nei a Awareness nei dia Songtal zuan uh hi'n thusuah bawl hi.
Huai tungtang ah mipi apan dotna amuhte uh hilhchian kawm in dawnna pia ua, Songtal a programme neih ding tawh kisai, khawsung enkaitu ZYA leh VA ten lemtang lou ding chi in nawlkhin ua, himahleh All Tribal Women Union ten ngaihsak lou a Songtal a zotna un ZYA leh VA simmoh hi’n taklang ua, programme bawl sawm ten 6th Schedule lou thiltup dang nei uh ahihdan chiang mahmah chi uhi. Hiai campaign bawl dia vakuanten Assam Rifles sepaihte tonpih uh chihthu azak ziakun ZRA cadre te kigingsa a om uh ahihdan leng taklang uhi. ZRO apan hilhchetna omten agenzelna ah zuau leh thutak kimkhat zang in, numei naupang khem lumlet in om ua, kum khat vai huchibang a apaitouh lai in bang lawhtak om hiam chin dotna bawl uhi. Numei pawlten KNO leh ZRF heutute kithuzakpih ua, kumlui apan mimal leh pawl kibawlthakte’ nung-le-ma enkai lel uh ahihdan leng hilhchian in, social media tungtawn in, a gal apan sum leh pai a pangtute, a nai deuh Lamka leh Imphal tan a gamtangte leng enkai lel uh hi’n taklang hi. UPF leh KNO in political demand khat paipih uh ahihman in, mimal leh pawldang ten demand dang neilou ding in theisak a, UPF leh KNO nungthuap zaw ding in chial hi. Election toh kisai in, kumnawn a Manipur Assembly neihzawh ahihchiang in kuateng in gam leh nam it a, mipite khual uhiam chih kithei chianta ding chi uhi. ZRO leh ZRA in athiltup lianpen mipite kianga bitna piak ding hin taklang ua, sun-le-zan in mipi bitna dia asepnate uh puankhiak gige hikei mahleh, tuni a dongkholh sa a kampau nei ten ZRA omlou hileh thautawi group dangte khutlum thuak in, awareness leh rally sai thei mah ding uhiam chi in dotna bawl hi.
--------------------------------
Q1. Tutung ATWUM in Sixth Schedule campaign bawl ding programme a bawl uh ana kimuh ma in VA leh ZYA songtal unit in lemtanlouh na om ziak a ana nolh na lai kimu hi, huai khit a sawtlou in programme dandeuh kimu a huai ah thugen ding in ZRO President, SiaPau leng a tel hi, hichibang kawmkal ah thu ana kikan zeuhzeuh sam a President chialna official taka omlou achi khong aom ua huai khah thudik mah hia? Hilh chetna a om thei diam?
Secy, Info & PR, ZRO: I theihchiatsa bangin, UPF leh KNO in separate State demand kibawl toh kisai, tumalam in leng Joint Appeal kisuahta a, tua ah, UPF leh KNO demand pen kuapeuh in kithuahpihna pechiat a, demand tuam2 bawllou ding in ngetna kibawl hi. Hiai ngetna toh kisai Songtal mipi, VA leh ZYA in pomsiam mahmah chihna hilel ahi. Khosung vaihawmtu VA leh ZYA in lemtan louhna om ziak a ana nolh nunga, programme bawlkhum teitei a, a ngap2 kisak ding chih zozen ngai kasa kei uhi. Khosung vaihawmtute simmohna hia, ahihkeileh, Songtal ten Sixth Schedule toh kisai bangmah theilou, amau sinsak tuam a ngaihna bang om a settok a!! Hiai programme saisawmte tup leh ngiim a tuam ahidan chiang himailou maw!
Anihna ah, ZRO President in hiai hun ah thugenna tangding chih phetlouh in chialna leng a mukei, 22nd October a khualzin hongtung pan hi. Amah toh kithuzakna bangmah om masalou a, newspaper leh social media khong a programme kapkhiak chihmok, bang a gennopna uh ahi? UPF leh KNO in separate State demand a, Govt toh leng kihouna a kipat nung a, UPF Secy in Sixth Schedule tangkoupih dia lamen uhia? Amah mimal simmoh ahi kei ua, UPF leh KNO panlakna simmoh leh chouna bang hilellou hiam?
Social media khenkhat in ZYA Unit kia genmahleh, VA in leng cancel phot dia dawnna pia ahi uh chih kuapeuh in i theih uh deihhuai kasa uhi. Tulel a Sixth Schedule Awareness sai pawlten tribe khat sung kia huama sai2, tribal chih min zang napi'n areas neuchik sung ah tangkou2, bekthamlou in a hihnopna mun te uh hoihtakin sui veng2 lechin, a target uh chianglua khinta ahi. Kituahna lam sangin, eisung kiselphou nopna, leh kikhenzakna lampi sial2 hizaw uh ahi chih kuapeuh in theih dia hoih ahi.
Q2. Morgue ah a report na khenkhat uah, i zogam salpha tebang in Kaihlam tang leh a kiim a mualte thawn zuazua zen in ana muak/vaidawn ua Pitek, Putek leh numei naupang adia kilawmlou ahih dan agen ua, bang chidan a huchibang ki muak/vaidawnna i mi i sate lak ah om theiding a?
Secy, Info & PR, ZRO: I vanneihte i mi leh sate tunga zat dia kitawi hilou ahi, thuhilh ngai, taihilh ngai leh minam policy kalha gamtang teitei te case thutuam ahi. Kou ngaih poimoh mahmah ahihleh, i mipi bitna piak ding chih ahi. Tuabanga bitna omtheihna ding in a sun, a zan chilou in pan kila gige hi chih i phok masak ka deih uhi.
Banah, report a kizak dungzui in campaign bawldia hongkuante a mauchauh hongkuan a hikei ua, AR (Sepaihte) toh hongton a hi uh chih thuzak ahih phet in ana ki alert mahmah hi. A chikachik in AR or Indian Army hi in Police hitale uh leng Theihsakna leh phalna la masalou in hiai lampi hon kantan ngeikei uhi. Awareness program saidek ten bangziaka security poimohsa uh ahi? Kuaten arranged sak hiam? chih dotna poimoh mahmah ahi. I mi leh sa iit a, pitek, putek leh numei naupang khuallou kihi leh thil deihhuailou pen leng tungthei dinmun ahi chih mipin i theih ka deih uhi. Pitek, putek leh numei naupang suanlam a maiphaw dia zang ahih uhleh bel zongsat huailou ding hi. Kidik sakluat leh kipilsak luat bang leng a valhun om hi.
Minam itna toh kalsuan kuapeuh ki zahtaka, kipahpih gige ahi. Himahleh, nikum buai kipat apan, pheengpai, heutu leh Pawlpi leh Saptuamte tanpha iplah bawl, heutu neilou bangzen a mahni muhna chiangbek diksa a gamtatna in, i minam niamkiaksak hizaw khathei ahi chih zong theih ding ahi. Zuau leh thutak kimkhat toh numei naupang khem lumlet in, kum khat val i paitouta ua, bang i lohtak ua le? Hiai innocent tatakte fuiha, a guuk a gaala gamtaangte bang leng kihaih hetlou ahi. Tua morgue a report pia khenkhat kam mahmah inle chetna kampau zak in omta hi. Hiaidan a i om vengvung uh, kuate hiam policy ahihdan theichian leng, kuamah a kihua, ki mohsak ding omlou i hi uh.
Q3. Nianglian in a report na ah tua i President in mi sponsor nei nahi uh chin hon ngoh a, Nianglian bang leng KNO lamte toh kithu zak den phial chih khong in hon ngoh achi a Heutunun lah thuzuau ahi a chi a, hiaithu President chauh in a theih ahi hia or pawlpi sung miten natheihpih/zakpih mah uh hia? huchi ahih leh a taktak mah ahi hia ngoh a aom na?
Secy, Info & PR, ZRO: President in a theihchetlouh mawkgen ahi kei chih kuapeuh in theih masak ding ahi. Minam ngaina a, awlmoh kichi ahih uleh, bangziaka, KNO/ ZRF heutupa toh kithuzak den a, thudot leh thukanna pen a zang uhiam? Bangziaka, mi manding leh that dia KNO te va chial thei uhiam? Ka gensa bangin, kum khat val i pheengpai lai in, mimal leh pawl kibawlthakte nung leh ma ki enzui gige a, ki theisuah mahmahta ahi. Tuabek hilou, social media tungtawn bang, a gaal apan sum leh pai a na pangtute bang, a naideuh, Lamka leh Imphal tana gamtaangte bang leng kithei mahmah ahi.
Selguuk ding thuguuk tamlua omlou hi, UG kikal bang leng ki sualsual hitawk lengleng thuguuk kihilh chih khong ana ki chiing thousam ahi. Sponsor thu leng kithei chianglua 2017 election ma bel hong hatkha na inchin election hong bei leh bang hongsuak diam ana enle mo.
Q4. President pu in pawlpi demand leng Sixth Schedule ah hong kekha maithei a chi a chi ua huaidan ngiim taktak mah ahihia pawlpi in, huaiban ah Sixth Schedule ana campaing nonkei un, ana gen nonkei un honchilou uh ahih chia gengen ding campaign touh ding a chih uh la bang ngaihdan nanei ua..?
Secy, Info & PR, ZRO: President in huaidan in a gen kei. UPF&KNO demand te hoihtak in hilhchian a, kuapeuh in political demand dang bawllou a, UPF& KNO nungthuapzaw ding in ngetna bawl hi. Aman, talk paitouzel leh, Govt. in Sixth Schedule hontah zommah ding ahi chi zaw ahi. Political dialogue khatpeuh ah alangtuak kahto/kikhianiam chih om thei ahihlam a gen banah, AHS pen zong Sixth Schedule provision pansan( Art.244 nuai a omkhawmvek ahi) kawm a political status sangpen ahihman a UPF in na ki demand ahihthu zong taklang hi. Bangtenghileh, UPF&KNO demand nung thuap chiat ni a kicihkhit leh Sixth Schedule.campaign khawl un cih kul lai di maw..?
I theihchiatsa himahleh, eisung a, Consultation meetings 3/4 vei i neihkhit un, ZC in ATS demand na submit in, huaithu mah UPF level a genkhawm ahihzoh in, AHS demand honh kibawl ahi. AHS pen Manipur tribal te adia solution hoihpen ahi chih Govt officials lamten leng hong phokpih mahmah uhi. Himahleh, i unaute toh kitaisan thei omlou chihziakin UPF leh KNO in State Demand bawlkhawm phot dia lemsak ahi. Huaimah Govt kiangah details write-up leng ki submitta hi. AHS hi in State hitaleh, i ADCs te Sixth Schedule nuai a koih ding ahi chih demand omsa ahi, himahleh, Sixth Schedule kia in separate administration genkhalou ahihdan kuapeuhin i haihlouh ahi. Meghalaya State bangin leng, State piiching a muh nungin, Sixth Schedule a lakhia tuankei ua, Mizoram in bel District bangzah hiam a hiai provision a lakkhiak uh tunitan a kisikna khat uh ahi chih kuapeuhin theithak leng deihhuai ahi.
Sixth Schedule leh AHS or State demand vai hiaizaha a kigenchiang nunga, theisiam chi2 napi a Pawlpi paipih dan hiam JAC paipihdan accept nuamlou chihpen, amau limtaka hong kivelthak uh ngai kasa zaw uhi. Pawlpi in Govt kianga a kigensek dan in bel, tua ADCs omlel te Sixth Schedule nuai ah koih unla, a tuateng tungvum ah AHS or State koih un, chih ahi. Sixth Schedule, AHS or State i chihte political decision lou a piangding omlou ahi, a neuzawk mana thubaiha piangpah ding chihna omtuanlou ahi chih kuapeuhin i theih ngai kasa uhi.
Nikum buaiziaka pawl kibawlkhia ten, bàngziaka Innpi leh Pawlpi theihpihna toh kibawlkhia JAC toh kalsuankhawm theilou, bangziaka demand tuam nei sese, bangziaka awareness prog a tuama sai chitchiat ngai sese hiam, chihte mahni kidot tuak mahmah ahi.
Q5. Pawlpi in election vai a hon kaihlut sawm uh ahi a chinuam pawl a om uh abang a, election thukhong genkhak in a om hia? Pawlpi in 2017 election ah bangchi panlak sawm?
Secy, Info & PR, ZRO: I Pawlpi'n kuamah election a kaihlut leh kaihpot a sawm ngeikei, amau ki liimmuh te, a hun zir in hong chiangmai ding ahi.
Tulel dinmun in pawlpi in 2017 election ding bangmah genkhak in anei kei hi.
Election dek teng a kuahiam MLA utte ziak a pawlpi in minsiat loh gige ahih leng mipiten a theih uh deihhuai hi. Nam vai ah, bitna leh muanna vai ah a lou theilou a utlou pipi ale pawlpi hon sapkhiak teitei hun uh tamzo a hih ziak in poi mahmah hi. Gam leh nam iit, mipite iit leh khotuah i hih leh MLA/Minister hih ziak a sepkhiak theih chauh saklouh ding ahi. Manipur Assembly ah ei kia a political voice neitham i hihlouhdan leng accept ding ahi. I elected te, Pawlpi leh mipi teng thuk 3 banga poimohna neichiat i hi. Hiai thuk thumte lou in politics a nektak ding pianglou ding ahi chih phokthak ni hang.
A siangsiang in gen maile 2017 election hongbei chiang in kuakua in gam leh nam iit, mipite khual chih hong kithei dia, tulel a mi tampi ten tha leh zung, hun leh sum leh pai seng a pawl tuamtuam a heutu pauthei mahmah a zuih nilouh ten na hon thei ding uh, tu leh tu inzaw nak iit chiat mah telhang.
Thukhitna ah hiai ka genthak2 nuam uhi:-
"Kou thautawi lamten ka priority lianpen khat uh ahihleh, i mi leh sate' bitna ahi", a sun/zan chilou in mipi bitna dia ka sepnate uh ki gengenlou hi, tuni a dongkholhsa hileh kilawma kam paupau ten, tuabanga na semlou hitazen leng, Lamka zang ah bangzahvei rally or awareness programme a saithei uhiam, ahihkei leh kua thautawi group in kuateng hong tomkhia hiam, chihte mi tamtakin ngaihsun phalou hileng kilawm mok hi.
I pankhawm keileh, political status niampen leh baihlam pen dia i lamet zong mulou ding i hi chih kuapeuhin theisiam a, thumna, tha leh zung, sum leh pai, pilna siamna i neihte thohkhawm chiat zaw dingin kon chial thakthak uhi.
No comments:
Post a Comment