HEADLINES:
Gamsung pumpi a naupang 71% vel school kai
India ah school kai ngeilou naupang 6,54,00,000 om
 |
| http://timesofindia.indiatimes.com/ |
New Delhi, Oct-31: Census 2011 dungzui in India ah kum 5-19 kikal naupang 38,01,00,000 omte lakah 6,54,00,000 velin siamsinna neilou in school kaitheilou uh a, gamsung pumpi a naupang 71% vel school kaisak in om uhi. Tuma kum 10 sung in, school apan nawhkhiak leh siamsinna sunzom kigawm 4,49,00,000 vel om uh a, vualphalou lakh 65.7 omte lakah 17,50,000 vel school kaitheilou uhi.
Thusuakin agendan in, poihlongna tuamtuam ziaka vualphalou omte lakah, 40.2 lakh vel school kaisak in om uh a, amaute lakah pasal lakh 22.8 om in 56.7% luah uh a, numei te’n 43.3% luah in 17.4 lakhs vel hi uhi. Kum 2001 sung in gamsung muntuam tuam a siamsinna innte ah, disable naupang 65.3 lakhs omte lakah 33,00,0000 vel school kai uh a, kum 2001-2011 sung in vualphalou siamsinna ngah 11% vel a khangtou hi’n gen uhi.
School kaizoulou naupangte ahihleh khawsak haksa innkuan apan hideuh un kigen a, North leh Central India ah khawsak haksat ziakin nek-le-tak kaikhawm dia naupang tamtak zat in om uh a, huaimunte ah school kailou tampen hi. Thusuakin agenzelna ah, gamsung mun khenkhat a factory nasem di’n naupang zat in omlai uh a, Child Labour tungtang central govt. in khauhsem in enkai mahleh lawhching taktaklou hi’n kigen hi.
Paokholal Haokip in 59/Saikot A/C ah MLA tuh ding
Lamka, Oct-31: Kum 2017 a Manipur state assembly election om ding ah 59-Saikot assembly constituency a intending candidate Paokholal Haokip in tunitak in Saikot community hall ah Saikot V/A, HYA Saikot unit, HSA, Val-upa, HWA leh SLA makaite tawh kithuah in candidate ding ahihdan puangkhiakna nei a, Rev. Lalrolhu in vualzawlna (blessing) ngetsak hi.
Paokholal Haokip in maban election om ding ah Saikot A/C a tuh sawm ahihna ah constituency min kizatna Saikot khua ah honkhiak leh kimeltheihtuahna a hibang hun zat a om hi’n gen a, maban ah tup leh ngim (manifesto) omte puangkhia hi.
Aman agenna ah, gamsung ah kikhekna (change) khat bek puaksuah ding tup a nei a election tuhsawm hi’n gen a, maban ah gamsung ah lemna leh muanna banah development om theihna dia panla ding hi’n kigen hi. Gamsung bawlhoihna dia gentheih haksa maituah/pal dia kipekhia ahihdan mipi mai ah kipuangkhia hi’n gen hi. Saikot A/C puahthakna dia panla khawm di’n mipi paikhawmte chial hi.
J. Toua, Jt. Secy in Saikot V/A in agenna ah thuneihna leh lalna deih a hong kipan ahihlouh dungzui in pahtakhuai ahih banah maban a Saikot mipi’n ngaihtuah ding om hi’n gen a, Saikot A/C a MLA chingsate sum leh pai in zoukei mahleh contest dia akipat pen kimuan ngamna liantak nei hiding hi’n gen hi. Maban ah Saikot A/C in water supply, communication (road connectivity) leh health centre ah khantouhna poimawh petmah uh hidan inleng gen hi. Paokholal Haokip bel tulel in BJP CCpur dist. a Vice President len ahi hi.
LOCAL NEWS:
DIG (Range-III) in Lamka pha
Lamka, Oct-31: K.J ayanta Kumar Singh, IPS (DIG Range-III) in tuni in Lamka hongpha a, SP office chamber ah Addl. SP 2, CDPO 2 ban ah Police Officer te law & order tawh kisai meeting neihpih hi. Huai ah Nov.1, 2016 in Tuibuong Peace Ground ah Chavang Kut, 2016 ah Mizoram Chief Minister Lalthanhawla hong hawhna ding tawh kisai security panlak ding dan kikum uhi.
Chairman, SVEEP campaign theme song hongkhia
Lamka, Oct-31: Lunminthang Haokip, IAS Dist. Election Officer/CCpur office chamber ah tuni zinglam in 2017 state assembly election ding tawh kisai a Systematic Voters Education & Electoral Participation (SVEEP) Campaign tawh kisai panlakdan pulak a, DC/CCpur in SVEEP theme song abawl Soiminlian Lengen, MCS CEO/CCpur & Chairman, SVEEP in hongkhia hi.
DC/CCpur in election om ding tawh kisai a kisakkholhna paizel in, EVM checking first phase zawh hita a, SVEEP campaign leng first phase zawh hita in campus ambassador-te makaih in college tuamtuam a special summary revision tawh kisai a public awareness leh special registration camp neih ahih ban ah Familiarization of EMC leng neih a om in, student-te kiang ah EVM zatding dan sinsakna om hi.
Thienlaljoy Gangte, Officer on Special Duty (Election) in SVEEP campaign tawh kisai ah Oct. 21, 2016 tan in bei a, tu’n AERO te’n case tuamtuam a neihte uh hearing abawl laitak uh hi a, correction, deletion chihte AERO-te khut a om in, data entry leng zawh hi a, Nov. 18, 2016 tan in summary revision tawh kisai process teng zawhsiang hiding in gen hi. Polling personnel dingte min kaihkhawm kipanta hi’n leng gen hi.
Guta te’n Bolero gari gumang
Lamka, Oct-31: Police apan kizadan in tuzing baihtak dak 1:30 velin guta te’n H.C Stephen’ compound gate leh gari’ buk kongkhak hihsia in Bolero gari (red colour) Reg. No. MN02A-2626, engine No. GAA4F19537, chesis No. MAIPS2GAKA5F77481 gumang uhi. Police te’n guta-te matkhiat sawm in suizui uh a, FIR No.53 (10) 2016 CCP-PS U/S 379/34 IPC registered uhi.
Stone Crusher in khezung hihzan
Lamka, Oct-31: CCpur Police station apan 117km vel a gamla Sainoujang khua a BRTF-te stone crusher ah tuni sunung dak 1:00 velin BRTF a sem Janglun (35) h/o Phalneithiem of Leijangphai in a khe sukha in, tunitak dak 10:00 velin dist. hospital tut hi a, admit in om hi. Akigendan in Stone Crusher a nasem a omlai suang gawisa luankhiakna mun a chiang zang a suang tangte a sutkhiak sawmlai talkhia in a veilam khepek khawl ah guanglut kha in, a khezung teng peizan hi’n kigen hi.
6th schedule awareness campaign
Lamka, Oct-31: ATWU in 6th schedule tawh kisai in New Lamka a Ngulthawng bazar ah tunitak in campaign nei uh a, Nov. 1 nitak in Bethel Veng Auto parking ah neinawn ding uhi. Huai hun ah Nianglian, President, ATWU in thugen ding a, Upa K. Dongzalam in hun khakna tawh thuah in thohlawm landing hi.
Annual school sports meet prize distribution
Lamka, Oct-31: Vengnuam, New Lamka a Easton Hall School te’n 1st Annual School Sports Meet, 2016 a neih uh tuni zinglam in prize hawmna program ah Chief Guest in M.Gouzamang Guite, EM, ADC pang a, kipahmante hawmkhia hi.
Aman agenna ah siamsinna kichi tampi om a, siamsin tengin govt ah sepna neihding chihthu omlou hi’n gen hi. School ah sports poimawh a, student-te’ talent zonna hoihtak hi a, sports ah talent hoihtak neite National leh International level tungthei uh hi’n gen hi. PT Sports complex, New Lamka ah Sports Authority of India (SAI) leh NLYC te’n kilemna bawl uh a, tunung in SAI te’n kimawlna item 8 hong koih ding uh a, student-te azar zoutu ding hi’n gen hi. Managing Committee a Chairman Thanglalmuan Hauzel in laisiamna kia hilou a, student-te talent zongkhia a lam tuamtuam a sekkhiatna ding a school abawl kipahpihthu gen hi.
ZMA HQ te’n CMO/CCpur kipahpih
Lamka, Oct-31: Zomi Mothers’Assn. (ZMA) HQ a President Vungmuanching makaih in member te’n tuni zinglam in CMO office ah Dr Kim Simte kipahpihna nei uh a, Zomi Puan silhsak uh a, Neilam, member ZMA in CMO ading in Pathian kiang ah thumsak hi.
ZMA te’n CCpur Dist. khangthu ading a numei CMO masapen Dr Kim kipahpihthu gen uhi.
CMO in agenna ah Pathian hehpihna ziaka CMO lenthei ahihdan gen a, Pathian panglou in thil hitheilou ahihziakin kuapeuh in Pathian kiang ah thumpih ding in ngen hi. CMO aletsung in CCpur Dist. a Health Deptt. ah khanthouhna step 1/2 bek omtheihna ding a gin-om leh chitaka nasep touh sawm hi’n gen hi. CMO aletnung mimal leh organisation tuamtuam te’n kipahpihna nei uh hi’n gen a, ZMA HQ makai-te’ tung ah kipahthu gen hi.
Simveng hilou in Manniang khua hizaw
Lamka, Oct-31: B. Khaimang Ngaihte s/o B. Thongchinthang Ngaihte of Simveng in tunaizek in JNU, New Delhi ah Ph.D ngahthak chi a kigelh pen information kimu dan hi a, a khua Simveng hilou in Manniang khua chih ding hizaw hi’n thutut kingah hi.
EMCI 1st batch khakna leh athak pan
Lamka, Oct-31: EMCI- Eimi Coaching Institute in tuni’n Rayburn College ah 1st batch khakna leh 2nd batch honkhiakna nei uh a, T. Lianchinpau, Dir., EMCI in 1st batch course sungin motivational class 3 vei (Dr. Chingnunsiam, MO, Dist hospital, CCpur; Pauneihthang Valte, Chief Manager, SBI/CCpur branch leh T. Roumuan, IRS, Mumbai) te’n nei uh hi’n gen hi. Rev. G. Suanzalam, Coordinator Institute, PCI (R) in hasotna leh thumsakna nei a, kuhkal taka pang in lawhchinna kitang sek hi’n gen hi. Huai hun ah 1st batch (6 month course) lak ah MBBS course a batch topper Dimkhovung leh Engineering course a batch topper Lamthianlal Dousel kiang ah cash award Rs.1000/- tuak pia uhi.
Fin. Literacy Awareness Camp
Lamka, Oct-31: SBI, Lead Bank Office, CCpur dist. sensakna in tuni’n Dorcas Veng V/A intekna in YPA Hall, Dorcas Veng ah ‘financial literacy awareness camp om a, huai ah CT Lian Guite, Faculty, SBI/RSETI in “Economic Status & Development of CCpur dist.” thupi zangin sinsak a, Nengkhanpau Hauzel, Chief Manager & Lead Dist. Manager in ‘Financial Management and Planning & Stand Up India Scheme” tawh kisai ban ah G. Thangchinkhup, AGM/DDM NABARD in Self Help Group leh Joint Liability Group tawh kisai pansan in thugen uhi. Huai hun ah Dorcas Veng huap sung apan hunkhop kihel uhi.
Co-Scholastic Activity cum Career Guidance
Lamka, Oct-31: Mualkoi a om Covenant School in ‘Nurturing the Gifts’ thupi zangin Covenant Children’s Home Auditorium ah Co-Scholastic Activity cum Career Guidance 2veina nei uhi.
Huai hunsung in Class I-Vte’n poetry leh bible recitation ah kidemna nei uh a, junior leh senior te’n lasak leh extempore speech ban ah news reading, quiz leh debate ah leng kidem uhi. Sunnung in career guidance om in, huai ah Class IV-X student-te telin Covenant School a sem lui Pauzamuan Vualzong, SI/BSF in sinsak hi. Co-Scholastic Activity cum Career Guidance ahihleh Oct. 29, 2016 apan aneih uh hi’n kigen hi.
Fellowship 3veina nei
Lamka, Oct-31: EBC nuai a mission worker pensioner te’n tuni’n GBC campus a Chhungi prayer hall ah fellowship 3veina nei in, member 50 val paikhawm uhi. Rev. V. Songkhanthang leh Upa Vungkhanmang makaih in thumna nei uh a, in makaih a, Rev. S. Thanglian, Rev. V. Khamlang leh Rev. Ngulkam te’n sharing nei uhi.
SUUNNA:
Bethsy Lalramthangi (32) w/o Lalmalzawl of Hmuia veng Oct. 30, 2016 zinglam dak 1 vel in Deendayal Hospital, New Delhi ah si a, tunitaklam dak 1:20 vel in a U pa Thanglemlal inn puaktun in om a, Nov. 1, 2016 in YVA hanmual, Pangzawl khawgei ah kivui ding hi. Thanglemlal bel YVA Gen. HQ a Joint Secy. ahi.
IMPHAL NEWS:
CM in govt. scheme tuamtuam hong
Imphal, Oct-31: Chief Minister O. Ibobi in tuni’n Imphal district a om Jiribam khua va pha a, lupna 50 omna Jiribam Hospital kibawl thak hong hi. Huailou in Subsidiary Police Centre telin govt. scheme tuamtuam hong a, Jiribam College leng govt. College hiding in puang a, CM in Jiribam a phak hun ah Dy. CM Gaikhangam; Ratan Kumar, Minister (Education); D. Korungthang, Minister (Health & FW) leh Dr. Chaltonlien Amo, Chairman, HAC te’n zui uh hi’n kigen hi.
Minister in ‘Unity Run 2016’ khahkhia
Imphal, Oct-31: IGARS (S) nuai a 9-sector-te saina in CAPF personnel leh school student-te a ding in Ekta Diwas 2016 tawh kizawitawn in tuni zingsang in Kangla Fort ah ‘Unity Run 2016’ hun ah khuallian Union Minister of State for Home Kiren Rijiju in Unity Run khahkhia hi’n gen uhi. Huai hun ah Assam rifle, CAPF personnel leh student hunkhop tel uh a, Iron Man of India’ chih minvuah a om Sarder Vallabhai Patel pianchampha 141veina zatna hi’n leng gen uhi.
Rashtriya Ekta Diwas zatna om
Imphal, Oct-31: India gamsung ah Rashtriya Ekta Diwas zatna tawh kizawi tawn in Manipur ah tuni’n 1st Bn Manipur Rifle ground ah ‘Rashtriya Ekta Diwas’ zatna om a, huai ah Chief Guest in O. Ibobi Singh pang a, Function President in Dy. CM Gaikhangam pang hi. Huai hun ah CM in Parade Commander Faumei Gonglin, IPS, CO 2nd MR makaihna nuai a contingent-te inspection bawl a, huai nungin official-te Rashtriya Ekta Diwas Pledge neisak hi. CM in a thugenna ah India a Home Minister masapen Sardar Vallabhai Patel phawk gigena leh a tungah zahtakna latsakna in a pianchampha pen Rashtriya Ekta Diwas (National Unity Day) a zat in om a, India National Congress leh Republic of India adia founding father khat hi a, Mahatma Gandhi makaihna nuai ah Sardar in Gujarat ah Satyagraha movement a makaih lawhching a, kum 1920 in Gujarat Pradesh Congress Committee kibawlkhia ah President dia telching hi a, Mahatma Gandhi makaihna a non-cooperation movement a gup banah Gujarat ah member lakh 3 val ding a laklut banah fund ding in Rs. 1.5 billion kai khawm hi. Kum 1923 a Jail ah Gandhi a tang lai in Congress member-te ngetna dungzui in Nagpur a Satyagraha makaih a, India pumpi ah a piangchampha National Unity Day a zat hi a, huai hun ah gamsung kipumkhatna leh kituahna dia kichiam ni hi’n leng taklang hi. Hiai hun Ministers, MLAs, Civil leh Police top ranking office te’n uap uhi.
UNC-te total shutdown kipan
Imphal, Oct-31: Meitei leh Kuki-Mizo-Chin community-te festival lianpen a kigen ‘Ningol Chakkouba’ leh ‘Kut’ festival kipan ding himahleh United Naga Council te’n Naga inhabited area ah dakkal 48 sung total shutdown a puang uh kipan a, state govt. in Sadar Hills leh Jiribam-te full-fledged district dia puangkhiak ding a sawm uh deihlouhna ziak hi’n gen uhi. Total shutdown ziak in Imphal zuan a van tuamtuam pua truck leh gari hunkhop NH-37 leh NH-2 ah tang uh a, strike supporter te’n mun tuamtuam ah lampi khak uh hi’n kigen hi. NH-2 in a tawt khak Mao gate ah Ningol Chakkouba festival hun a zuak ding Nga (fish) pua truck telin gari hunkhop tang hi’n gen uhi.
Frisking ah mi 2 kapliam
Imphal, Oct-31: Imphal East district ah zan nitak in frisking leh checking bawl a duty Police personnel te’n Alto car a tuang mi 3 lakah mi 2 kapliam uh hi’n kigen hi. Irilbung Police station in a huamkhak Urup Awang Leikai akipan Moirangthem Thon (18) leh Laishram Danabir (19)-te hi uh a, thautang in Dhanabir ban veilam kha in pailet a, Moirangthem Thon gil taklam pang ah thautang lut a, RIMS hospital ah etkol in om uhi. Liamna tuak te’n a genna uah Police station kongah thakhat thu in Police te’n khawlsak dingin theisak uh a, police-te khamna mun apan gamla lou ah khawl uh a, huai hun ah Police khat in thau kap khum a, liamsa in inn a tun nung ua a innkuan-te uh RIMS hospital ah pawlut uh chi’n gen uhi.
Diwali festival zang zou a kiklam ua thiltung hi a, Urup Women Welfare Assn. (UWA) te’n mawhpaih thupuang in police personnel thau khahtu suspend ding leh dan tawh kituak a gawtna piak ding phut uhi. Seram Mala Devi, Secy, UWA in police personnel te’n Alto Car a tuang mi 3-te khawl dia a theihsak phet un gari awl tai nung in meter gamla lou ah khawl uh a, gari sung apan pawt khe utlou ahihkeileh taikhiak sawm hikei mahle uh thaukap khumna ding thu omlou a, state govt. in pan a lak keileh kiphinna tuamtuam pan ding uh chi’n taklang hi.
Hearing Aids hawmkhiak hiding
Imphal, Oct-31: Health & FW Minister makaihna in Secretariat South Block a Conference hall ah tuni nitaklam dak 4:00 velin press meet om a, huai hun ah PK Singh, Commissioner (Health & FW) in NHM, Manipur te’n Khuman Lampak ah Nov 5, 2016 in Guinness World Record tupna in ‘Grand Hearing Aids Distribution Camp’ hun ah hearing aids 6500 hawmkhiak sawm uhi. Hiai ding tawh kisai in Manipur a district 9-te ah health camp 48 val sai ta uh a, free hearing aids tang ding in patient-te Aadhar cards, income certificate leh Voter i-card –te July 9 apan Aug 2, 2016 sung a screening nung in mi 6,500 telkhia uhi.
TUNI THUPI:
“Mi gensiatbei chiamteh inla, mi diktak en in; huchibang mite’ tawpna ding zaw khamuanna hiding ahi ngal a...” -Sam 37:37
EDITORIAL:
Bank Loan .. Bank Loan
India gama khawpi tuamtuam ah Bank te’n loan la ding deihin mizong uh a, huchih dungzui in loan la mi a tamphot leh bank-te lawhching uhi.Aziak bel loan late’n ditkik ding ahihdan theikawm in la uh a,atangpi in a ditkik lam ah leng feltak in din uhi. Eilak ah bel Bank loan laktheihna ding leh tankhak theihna dingin sepna neih poimawh in sum hauh ngai mawk hi. Bank ten huchibang loute loan pe nuamlou uh a, amu ding a kilawm tamtakte kiangah loan piak ahihlouh ziakin gamsung khantouhna leh masawnna taktak leng haksa in zekai ban suak hi. Nidang lai in PMEGP loan kithang petmah a, tua hunlai in kuateng in loan tangkha a, kuateng in tangkhalou uhiam chih suisawm ihi zenzen kei hi. A paidan tangpi gen zual lehang tamtak in a gendan un sumhau leh a chetheite kia in baihlam takin loan lathei uh chih ahi hi. Bank te’n a customer-te a phungvuh ua leh amau ading a punna lianpi hi a, loan tam a hawmkhiak zawh ua leh sumpung tam mu uh himai uhi. Ei lakah PMEP loan pen tamtak in ditkik louh ding sa in din kiklou petmah uh a, loan sik dinga kuante bang a inn ua ava hawh chiang un ana kibu maimah pawl om hi’n kigen hi.
Kum bangzahhiam paisa hun ah Bank te’n loan deih leh la nuamte kiangah hawmzak uh a, ahihziakin a ditkik lam duhthusam a batlouh ziakin tunitan in kisong sawloi gai vek a, huai hunlai ate thulimlouhna gu tulai huna te’n thuakkha hi’n kilang hi. Nidang in PMEGP loan minthang mahmah mi tamtak in leng mu uhi. Himahleh PMEGP loanla tamtak in ditkik himhim sawmlou uh a, bank te’n leng loan muhkikna dinga panlakdan theizou tuanlou in a koihdap(write-of) uh a hunkhop om hi. Bank ten loan ahawm uh chih ziaka deih mawk, bangchidan hiam chih leng theiloupi a la tamtakte ziakin bank in loan a hawmkhiakte mangthang a, tua ziakin khawsuahna ding leh mahni kitoudelh theihna dinga phattuampih thei ding tamtak loan mutheilou om hi. Huaiziak mahin Bank te’n leng kuamah gingta thei nawnta lou in loan muh leh lak haksa hi. PMEGP loan tawh kisai leng mi tamtak in a zat diklouh ziakun huai hunlai a chiamnuihna in, ‘kuapeuh zi leh pasal zongte pilvang un, PMEGP loan a awk khate khawng neih khak theih ahi’ chih kigen om chive uh aw. Hiai in bang gennop nei hiam i chih leh numei sumbat tamtak tawh pasal nei a kuan sawm, ahihkei leh pasal sumbat tamtak tawh zi neih sawm, chihna ahi. Hibangten kipahna sang in dahna lam tunzaw ding a gintak ahi hi. Tua ziak mah in bank ten a mawkna in mi lakah loan pe ngam nawnlou uh a, state dangte tawh kibang thei nawnlou hi. State dang ah bel bank tuamtuam in loan la nuam mi naktak in zong uh a, sepna nei phot zol chihtak in zol uhi. Eilam tawh kilehbulh hit-het hi. Tuni chiangin govt. a sepna neite a dingin loan lak haksa nawn hetlou a, ahihziakin govt a sepna neilou midangte a dingin bel haksa lai veve hi. Loan i chih bankte a ding a sum punsakna hoihtak hi a, eilamten huai theisiamlou in loan pen ditkik louh ding a koih mawk, huaiziaka loan muh haksa ahi, chi lehang ikhial lawmlawm kei ding uhi.
Diktak a loan dinkikte khawsuak uh a, huchi hilou ditkik ding himhim a leng ngaihtuahloute niteng in lauhthawngna in kidim uhi. Bank ten loan dinkik thulimloute a inn chih uah va kankhe pawl bang leng om uhi. Huai banah akum asim loan ditlouh ziakin bangzahhiam ngaihdam theih hiding a gen pawl leng om veve zel hi. I ta leh naute a maban ding uh khual hetlou a i gamtat ziak un, tu’n amau na tuhgah lou uh ahi hi. CCpur pen Christian gam kichi cent percent phial Christian kichi zawmah, lah mi’ muh ngoihngoih a leng diktat nuamlou, diktat sawmlou tamtak i om a, tua ziaka Pathian gawtna i tung ua hongtung hi ngei dingin gintak-huai hi.Loam i chih hoihtak in dinkik lehang bank-te leng kipak ding uh a, amasa a Rs. 50,000/- i lak pen Rs. 1 lakh bang a hong khansak uh gintak-huai hi. Bank loan tungtawn a nekzon theih leh kitoudelh theihna a leng zattheih ding ngimna in bank ten loan a piak uh hiding in gintak-huai hi. Eilak ah bel a sumhau leh nei zoute adin loan lak nuam, tasam leh a poimawhte ading a lam-etna se omlou zel. I diktat louh ziak ua koimah a leng thawl lou ihi zaw uhi. Diktat lehang i gam ah bank a tamta vele, huaite tungtawn aleng hauhsak theih hilou hiam, chi nuam ihi. Bank loan na lak na dit louh ziakin mi tamtak in thuaklawh thei uh ahi chih thei inla amaute na khual kei a leleng Pathian hing bia na hihlam bek kiphawk ve maw! Mihing mitmei zaw ven theih a, Pathian thil bangkim mitmei bel ven theih hilou hi.
No comments:
Post a Comment