HEADLINES:
Rs. 500 leh Rs. 1000 khamna zukkik di’n ni 3 sung hunpia
‘Demonetization’ thu ah innpi 2 a tutkhawmna buai nawn
 |
| http://media2.intoday.in/ |
New Delhi, Nov-17: Parliament Winter Session pailel ah Demonetization ziakin Rajya Sabha leh Rajya Sabha buai nawn a, Opposition pawlin Speaker tutna kiang a kiphinna aneih ziakun houlimna omtheilou hi’n kigen hi. Lok Sabha ah tuni sunma in debate saulou omthei a, Rajya Sabha a session kipat nung sawtlou in sum tungtang thubuai omte ziakin 5vei adjourned in om hi. Tuabang kalah West Bengal Chief Minister Mamata Banerjee leh Delhi Chief Minister Arvind Kejriwal in sum note Rs. 500 leh Rs. 1000 zat theihlouh dia khamna omte, ni 3 sung a zukkik ding in govt. kiangah thutawp pia uh a, thupiak abawlte uh ngaihsak ahihkeileh kiphinna khauhsem pankhe ding hi’n taklang uh a, sum taksapna liantak om ziakin Reserve Bank of India munpi ah sum bawlna enkhia uhi.
Lok Sabha a session neih hunah Congress leader Mallikarjun Kharge in Question Hour omsak di’n Speaker kiangah ngen a, sum sihsakna (demonetization) thubuai omte, ruling leh opposition in tangtak a genkhawm poimawh chi hi. Opposition pawlin debate omtheihna dia voting neih ding deih uh a, thubuai tamtak om ziakin opposition pawlte ngetna lawhchinglou hi. Parliamentary Affairs Minister Ananth Kumar in huai huna agenna ah, rule 193 dungzui in Parliament member teng tawh houlim khawm dia govt. kiman hi’n gen a, himahleh huai rule ah voting neih ding kigelh lou hi’n taklang hi. Ananth Kumar thugen ziakin Congress, TMC, Left, AIADMK, NCP leh party dang apan member-te’ lungkimlou uh a, Speaker tutna kiang manawh in hun sawttak kiphin uhi. Opposition member-te’n Speaker omna tutna mai ah slogan tuamtuam sam a kiphinna aneih ziakun houlimna buai a, Speaker Sumitra Mahajan in sunnung dak 12:30 in discussion hun beisak hi.
Rajya Sabha a houlimna hunah opposition member-te’n Demonetization tungtang genkhawm dia Prime Minister telsak ding ngiat uh a, member paikhawmte apan dotna omte PM in dawnna apiak ding chi in, mipi haksatna tawh kisai thusem a genkhawm poimawh ahihdan taklang uhi. Opposition pawlte ngetna ziakin Ruling member-te tawh kiselbuaina piang a, sunma tan in 5vei adjourned in om hi. Makai tuamtuamte kala buaina sousangtak om nung, sunnung dak 3 in session kipan nawn a, huai hunah Opposition makai Ghulam Nabi Azad in sum khek sawmte mi 40 val si ahihdan puangkhia a, Uri terror attack a misi sang in sum sihsak tungtang a misi tamzaw ahihdan gen in, Prime Minister leh ruling party-te enghou hi’n kigen hi. Azad thugen tawh kisai Union Minister Venkaiah Naidu in lungkim huailou asakdan gen a, Congress party in Rajya Sabha member teng kianga ngaihdam a nget ding ngiat hi. Ruling leh Opposition kala kingawhtuahna leh buaina sousangtak om ziakin, discussion poimawhte omtheilou in Rajya Sabha Chairman banah Vice President Mohammad Hamid Ansari in houlimna hun beisak hi.
Demonetization tawh kisai ah West Bengal CM Mamata Banerjee leh Delhi CM Arvind Kejriwal in tuni’n thupuan bawl uh a, gamsung mipi zahngaihna enkhe lou dia Prime Minister theisak kawm in, ni 3 sung a Rs. 500 leh Rs. 1000 zat theih dia puang thak ding in nawh uhi. PM Modi in tutunga sum asihsakna, kum 1947 nunga sum tunga ginomlouhna (scam) huaisepen hi’n Kejriwal in gen a, demonetization puan ahihma a plan hoihtak bawllou hi’n ngawh a, constitution rule kalhna liantak hi’n gen hi.
LOCAL NEWS:
Tuni’n SBI/ CCpur Br ah Rs. 20 cr hongtung
CCpur Dist. mipi in sum tasam
Lamka, Nov-17: Central govt. in Rs. 500 leh Rs. 1000 note Dec 30 tan zat theih hiding chih a puan in mipi buaisak a, bank tuamtuam ah niteng in sum deposit leh akheng nuam tam mahmah hi.
CCpur dist. Adi’n Nov. 12, 2016 in Rs. 2000 note 8 crores hongtung a, tuni sunnung dak 2:00 velin bei a, sum lakhe ut tamtak thawnkik uhi. CCpur dist. adin SBI/CCpur ah tuni sunnung dak 2:30 velin Rs. 2,000 note crore 20 hongtung nawn a, tuni mah in bank branch tuamtuam ah hawmzak uh a, Nov. 18, 2016 in ngeina bangin bank kihong ding hi’n kigen hi. Huchikal ah, account neihna bank branch peuh ah deposit leh withdrawal bawltheih hi’n leng kigen hi.
ZSF GHQ in khawpi sung drive bawl
Lamka, Nov-17: ZSF Gen. HQ a President K. Vanlallian Vaiphei makaih ZSF member te’n tuni’n khawpi sunga dukan tuamtuam enkhia in, stock position leh rate manipulate bawl om hiam chih enkhia uh a, kha 1 sung daih ding stock om ziakin mipi pataulou dingin theisak uhi.
ZSF/GHQ in thusuah abawlna ah, khawpi sunga niteng nek-tawm zuak dukan/dawr tuamtuam enkhia uh a, huai ah godown tanpha etsak in kha 1 sung daihding stock om hi’n taklang uh a, UNC in NH 2-te ah Nov. 1 apan e-blockade bawlin, Manipur a ding van bangmah pawlut saklou a, tua ziakin Imphal valley telin dist. tuamtuam in haksatna tuak uh a, vanman khangsaklou din dawr/dukan bawlte kiang ah theisak kawmin hotel bawl khenkhat in sing man akhansak lamdangsa in etkai hi’n taklang uhi.
Huchikal ah tuni’n dawr khat ah van tuamtuam hun beisa kizuak hunkhop mukhia uh a, hibang thil zuak nawnlou dia theisak kawmin van leh dawr license laksak in kem uhi.
Tabloid Editor in kaisang
Lamka, Nov-17: David Tusing s/o Lalremthang Tusing, (retd) Principal CCpur College, tulelin Dubai a Gulf News ah Deputy Editor lenlai Tabloid Editor in kaisang hi. David Tusing in India a Convergence Institute of Media, Management & Information Technology Studies (COMMITS) ah Journalism a zawh in CNN zom a, huai akipan Dubai a Emirates Today zom a, huai zawh in Gulf News, UAE a leading newspaper ah kum 6 sem hi. Aman Journalist-te lunggulh mahmah IBDA Award sang hi.
‘Confluence Day’ zang ding
Lamka, Nov-17: Greenwood Academy te’n Nov.18, 2016 zinglam dak 10:00 apan ‘Confluence Day’ zang ding uh a, Chief Guest in Rakesh Balwal, IPS, SP/CCpur leh Special Guest in Dr. Chinkholal Thangsing, Vice President, KIM hiding hi.
Program ah student te’n poem recitation, speeches, contemporary & classical dance, cultural show, songs, power point presentation, mock parliament, special items show ding uhi. Khuallian-te’ apan thugen ngaihna omding a, Principal in Academic Exellence Awards pekhe ding hi.
Dist. Level Sc Exhibition omding
Lamka, Nov-17: ZEO/CCpur nuai a Science Unit saina in Nov. 18-20, 2016 sung Phungkhothang govt H/S ah ‘Science, Technology & Mathematics for Nation Building’ chih thupi zang in 37th Dist. Level Science Exhibition for Children, 2016 omding hi. Nov 18 zinglam dak 11:00 in exhibitor/written Sc Quiz atelding te’n registration bawl ding uh a, Nov. 19 zinglam dak 11 in Science Quiz contest omding a, 11:30 in ZEO/CCpur in Exhibition hongding hi. Nov 20 zinglam dak 11:30 in ZEO in kipahman hawmkhia in Sc Exhibition hunkhak ding hi.
Resource Person in hongkuan
Lamka, Nov-17: South Korea khawpi Seoul a Korean University te’n Nov.18-19, 2016 sung New Delhi a Jawaharlal Nehru University ah ‘International Seminar’ neiding uhi. Huai ah Resource Person in Langkhankhup Ngaihte s/o Rev Dr. Luaichinthang leng sehkhak a om bang in hongkuan a, tuni’n New Delhi hongtung uhi.
Moirang ah counter e-blockade
Lamka, Nov-17: UNC te’n NH-2 te ah Nov.1, 2016 a Economic Economic blockade apat uh paitou zelin Manipur ah niteng poimawh taksapna liantak om a, niteng in aman khang hulhul hi. Economic blockade thukna in phaijang biala local club, Meira Paibi leh pawl tuamtuamte’n counter blockade bawl uh a, tuni’n Moirang ah Imphal apan CCpur dist. zuan bus leh winger-te khamkhawl uh a, passenger ten van a puakte uh gari apan lakkhiat sak om hi’n kigen hi.
24th Ntl Children’s Sc Congress
Lamka, Nov-17: Science Teachers’ Forum, Manipur saina in Oct 28-30, 2016 sung Slopeland Public School, Thoubal Dist. ah State Level 24th National Children’s Science Congress 2016 om a, Dec 27-31, 2016 sung Vidya Pratishthan’s Institute of Information Technology, Baramati, Maharashtra ah Manipur ai-oh telding in mi 10 telkhiat in om uhi. Mi 10 lak ah CCpur Dist. apan Roll No. 3301 Douminlun Singsit, class VI of St.Stephen English School telkha hi.
BJP party ticket ngen teng lak ah senior pen kahi-DK Mang
Lamka, Nov-17: Tunung zeka assembly election om ding ah 58/CCpur A/C a candidate sawm DK Mang in tuni’n CCpur Dist. BJP Office ah media-te kimuhpih in, BJP party adia gin-om taka pang hi a gen in, election tuhsawm ahihdan leh ticket leng muh kilam-en hi’n gen hi.
Kum 2012 a BJP party zom in 2017 Gen. Assembly election ding foundation bawlna dan in 2015 MDC election ah BJP ticket in tuh a, tu a party ticket ngenteng lak ah senior leh experience nei hoihpen hi’n gen a, Morcha teng enkaitu dia V/President hihna piak ahih ban ah V/President (Org), CCpur Dist. len ngei hi’n gen hi. Manifesto leng newspaper khenkhat ah suahta ahihdan gen a, protocol hoihtak a zui in, National BJP President, State BJP President, District BJP President leh CCpur Mandal President kiang ah party ticket ngetna pia hi’n gen hi.
REDP training pailel
Lamka, Nov-17: Bijang a SBI-RSETI temporary office ah tuailai kum 18-45 kikal sepna neiloute adia free short term course training apiak uh paizel in, tu’n ni 30 sung daihding beauty parlour management om a, S. Mangboy Vaiphei in ni 6 sung entrepreneurship a sinsak nungin zan apan practical class pan in Lhainunnem in sinsak a, threading leh facial telin thil tuamtuam sinsak a, Dec. 1st week in zou ding uhi.
Tuni’n basic photography & videographer course kipan in, S. Mangboy Vaiphei, faculty in ni 5 sung entrepreneurship sinsak in, Lalboi Samte, guest faculty in ni 12 sung lemlak dingdan leh Letthang Doungel in ni 4 sung videographer tawh kisai sinsak ding hi.
MHW te’n CMO kipahpihna nei
Lamka, Nov-17: CMO nuai a sem Male Health Worker Assn. te’n tun tak in Dr Kim Simte, CMO atenna inn ah kipahpihna nei uh a, puamdum silhsak uhi. Huai hun ah Rev. E. Paukhanlian, Dist.Supdt. Lamka North Divn. EBC in CMO’ lutung ah khut nga in Pathian kiang ah thumsak hi. CMO in Male Health Worker Assn. te’ kipahpihna leh present apiakna tung uah kipahthu gen a, Pathian hehpihna ziak liauliau a CMO lenthei hi’n gen hi.
SBI ground floor ah AC thuah ding
Lamka, Nov-17: SBI/CCpur branch a ground floor ah Air Conditioner (AC) hoihtak hunkhop thuah hiding a, huai ding in nasepna pailel hi. Ground floor a counter teng leng bawlthak vek in om a, ceiling leng bawlthak vek ban ah AC hunkhop thuah hiding a, customer-te khualna ziaka ground floor ah AC thuah hiding in Chief Manager, SBI/CCpur branch apan kiza hi.
SUUNNA:
N.Suan Za Mung (61) s/o (late) N.Cin Za Thang of New Lamka (G) tunitak dak 5:00 velin cancer in si a, Nov.18, 2016 in CYA hanmual ah kivui ding hi.
IMPHAL NEWS:
CM in Central Poultry farm hong
Imphal, Nov-17: Imphal West District a Khumbong mun ah tuni’n Veterinary & Animal Husbandry Dept. nuai a Central Poultry Farm honna om a, huai ah khuallian in CM O. Ibobi pang hi. Functional President in Dy CM Gaikhanngam pang a, Guest of Honour in G. Konthoujam, Minister (Vety. & AH, Com. & Ind.); K. Sarat Singh, MLA; L. Lakher, Principal Secy. (Vety. & AH) leh Dr. N. Rajendro Singh, Director, Vety. & AH-te pang uh hi’n kigen hi.
Huai hun ah Chief Minister in Manipur a sepna neilou lehkha siam -te sepna piak ding govt. adia buaina lianpi hi a, maban election hun ah Congress govt. telching ahih nawn leh sepna neilou lehkha siamte sepna piak ding a poimawh pen a koih hiding in gen hi. Govt. in Manipur ah sepna neilou tuailai tamtak om tawh kisai ngaih poimawh mahleh miteng govt. sepna piak theih ahihlouh ziak in entrepreneurship puah ding a panlakna in Cabinet in Manipur Start Up Policy zat ding in thutanna bawl uhi.
AMSU te’n surprise drive bawl
Imphal, Nov-17: AMSU a volunteer te’n Imphal bazar ah tuni’n bawl tawm a van man khansak, van a zuak-te uh a dang banghiam tawh gawmkhawm a dausak (adulterate) leh nektheih hun beisak zuak thu tawh kisai in surprise drive bawl uh hi’n kigen hi. Huai hun ah AMSU volunteer te’n cooking oil, dal, soft drink banah van tuamtuam a muhkhiak-te uh paihkhiak sak uh a, huai tawh kisai in van zuak te’n hun beisa leh chidamna dia hoih lou nek-leh-tak tuamtuam-te zuak nawn lou ding in thupia uhi.
Oil pump-te ah mi tamtak kivual
Imphal, Nov-17: Tuni’n Imphal area a Oil pump-te kikhak mahleh zan nitak a thautui pua truck hunkhop hongtung a, petrol pump-te kihong ding a gintak ziakin tuni’n thautui lei ding mi tamtak kivual uhi. Silchar apan NH-37 (Imphal-Jiribam) tawn in van tuamtuam pua truck 111 vel ding zan nitak dak 8:00 velin Imphal hongtung uh a, huaibanah Imphal zuan in petrol tanker 32, diesel tanker 47, SK oil tanker 2, LPG bullet tanker 37 leh ATF carrier 2 te’n Assam a Khatkhati apan zan in hong kipan khia uh a, ni 2/3 sung a Imphal hongtung ding uh hi’n leng taklang uhi.
Newspaper-te suaklou ding
Imphal, Nov-17: All Manipur Newspaper Publishers’ Assn. (AMNPA) leh All Manipur Newspapers Sales and Distributors Assn. (AMNSDA) te’n Hueiyen Lanpao office ah tuni’n joint meeting nei uh a, tua hun in Imphal pansan a morning dailies teng in Nov 18, 2016 apan thuthak om masiah news suahlou phot ding in thutanna bawl uh hi’n kigen hi. Huai tawh kisai a pawl 2 te’n thusuah a bawlna uah publication houses-te ah sum nen om nawn louh ziak leh Centre govt. in Rs. 500 leh Rs. 1000 note zattheih louh dia thusuah a bawl nung in leng newspaper hawker te’n Rs. 500 note a piak lut ziak in media house te’n sum nen lehna ding leh bank-te a sum koih lutna lam ah nawngkaina lianpi tuak uh a, ni bangzahhiam paisa in newspaper te’n Rs. 500 leh Rs. 1000 note pom thei dinmun in om uh a, himahleh tun distributor/hawker te’n dan phal sum-te kia pelut ding in theisak uhi. Rs. 500 leh Rs. 1000 note zat theihna mun ding bikhiahna lakah media house-te telkhak louh ziak in distributor/hawker-te apan sum zattheihlouh-te pom thei nawnlou ding uh a, a kisaipih thunei te’n leng sum zat theihna mun-te lakah media-te telsak ding a ngetna bawl uh hi’n leng taklang uhi.
Imphal a Oil pump-te kihong ding
Imphal, Nov-17: Consumer Affairs, Food & Public Distribution (CAF & PD) Dept. in tuni a thusuah a bawlna uah mipi lakah thautui hawmkhiakna ding in Imphal area ah Nov 18, 2016 zingsang dak 7:00 apan Oil pump-te kihong ding hi. Oil pump-te ah 2 leh 3-wheeler te’n gari khat in thautui litre 5 ahih keileh Rs. 500 man la thei ding uh a, 4-wheeler te’n thautui litre 10 ahih keileh Rs. 1000 man la thei ding in taklang uhi.
All India Cooperative Week Celebration
Imphal, Nov-17: Manipur State Cooperative Union and Institute of Cooperative Management-te saina in Lamphelpat a Institute of Cooperative Complex (ICM) mun ah Nov 14, 2016 ni akipan ‘The 63rd All India Cooperative Week Celebration 2016’ zatna hun tuni a zawhsiang hi a, huai ah Chief Guest in B.B. Sharma, IAS, Commissioner (Cooperation) pang hi. Functional President in L. Tompishak Singh, President, Manipur State Cooperative Union banah Chairman ICM pang a, Guest of Honour in Dr. Th. Munindro Singh, Director, Planning Dept. pang hi’n gen uhi. Cooperative Week Celebration tawh kisai in Best Management, Best Employee Award, Best Meritorious Training Award telin award tuamtuam hawmkhiakna om hi’n leng taklang uhi.
Bishenpur ah Free ENT Camp om
Imphal, Nov-17: Shija Outreach Camp tawh kisai a Shija ENT Centre-te saina in Bishenpur a Educational, Cultural & Health Organization (ECHO) Club mun ah tuni zinglam dak 10:00 apan sunnung dak 1:00 tan Free ENT Consultation Camp om hi. Dr. Nitesh Moirangthem, Consultant ENT Surgeon, Shija Hospital makaihna in medical team te’n Video Endoscopy zang in mi 50 val en uhi. ENT lam tawh kisai a buaina neite manbei a damdawi piak ahih banah ENT tawh kisai in booklet hawmkhia uh hi’n leng kigen hi.
Constitution Day zang di’n ngen
Imphal, Nov-17: Social Welfare Dept. a Principal Secy. JC Ramthang in thusuah a bawlna ah Oct 7, 2016 ni a Ministry of Social Welfare and Empowerment, Govt. of India a Secretary thupiak delhzuina in Manipur a govt. office, school leh college te’n Nov 26, 2016 ni pen ‘Constitution Day’ a zang ding in ngetna bawl a, Constitutional Day zat hun ah Govt. office leh institution teng in ‘Preamble’ simkhe ding leh Mock parliament, essay, debate, competition banah lecture sai theih a, India govt. theihsakna dia Social Welfare dept. ah Compliance report pelut ding in taklang hi.
Security vengbitna in gari 75 tung
Imphal, Nov-17: United Naga Council (UNC) leh All Naga Students’ Assn. Manipur (ANSAM) te’n NH-te ah Nov 1, 2016 akipan indefinite economic blockade a puang uh tawh kisai in Chandel district a Sinam Khul ah gari 75 tang-te security khauhtak vengbitna nuai ah tuni’n Imphal hongtung uhi. Akigendan in Thoubal Modhunimai, Addl. SP (Operation) makaihna nuai a Thoubal Police Commando, Tengnoupal Police leh 3rd IRB combine team te vengbitna nuai ah Sinam Khul apan bus 26, DI 40, Tata Sumo 8 leh Truck 1 telin gari 75-te Imphal hongtung uh hi’n taklang uhi.
TUNI THUPI:
“A lutungah lukhu na koih ding a, huchi’n lukhu tungah lallukhu siangthou na koih ding hi.” -Eksodas 29:6
EDITORIAL:
Kibeihtuahna sang !
Leitung pumpi in a bildawh US a Presidential election zawhsiang ahihnung in leitung gam tuamtuam ah thubuai-labuai gending tam mahmah hi. India leh Pakistan gamgi kal ‘LoC’ lah kikaptuahna khawllou, gamkhat leh gamkhat, state khat leh state khat kala kibeihtuahna lah omtou den hi.
Huchi kalah, tulai in Manipur telin India gam mun tuamtuam ah ‘issue’ tuamtuam tam mahmah hi. Amasa in Rs 500 leh Rs 1,000 note i zat lel uh zat theih hun ding Dec 2016 tan lel hita ding chih hinapi tuma deuh akipan in Imphal khawpi a dukan, bazar leh pharmacy tuamtuam ah Rs. 500 himhim zat theih nawnlouh hi bikbek a, Rs. 500 note zat theih hun beita chih ding hileh kilawm khop in a deihlou pumdim hi.Lamka khua ah leng Vaite dawr ah zat theihlouh suak mahleh tuni chiangin singtangmi mahmah leng a la utlou kibehlap deuhdeuh hi. Hiai sum note ‘Demonetisation’ tawh kisai pawng koihdap leng hi theilou a, Parliament winter session ah gentham ching mah ahihdan haih vuallouh in kichian hi.Khangthakte’ ading ngialin India khangthu ah hibang thil thakhat thu a atun masakpen hilai dingin gintak-huai hi.
Bangziak hiam i chih leh, Prime Minister Narendra Modi in Reserve Bank of India (RBI) in mipi’ kianga theihsakna bawl ding chih hun kipia pen khek lumlet guih (U-turn) hi’n ngawhna liantak om hi. Rs 500 leh Rs 1000 denomination-te nitak khat thu a ‘zankim apan zattheihlouh ding’ (illegal) chi a Prime Minister Narendra Modi in thupuan a bawl guih in India gam mipi kiguihsak mah hi. Modi vaihawmna govt ah development telin nasep tuamtuam ah gensiat bei in kilang mahleh hiai thiltung in mipi’ lungphong (shock) a, Modi adingin thil hoihsang in a hoihlou a piangsak zaw diam chihtheih hi.
Thudang ah United Naga Council(UNC) pawlin Senapati district sung Sadar Hills bialteng Manipur govt in district piching(full fledge District) in puansuam uh a, huai thu theih phet in Naga-te mai-amsa khoihkha bangin thangpai uhi. Manipur govt tanpha vau uh a,govt in taise thak in Sadar Hills bial district a puang dinga kisalai khawlsak guih mawk uhi. Huchi hizenpi UNC pawlin Manipur govt vauna kawm in Sadar Hills bial teng state govt in district a puan ding thu a zukkik masiah tawplou ding chi’n Nov 1, 2016 akipan Manipur a lut ding National Highway tengah blockade puang uhi. Huai tungtang ah Union Home Ministry ah kihou ding in UNC makaite Delhi ah sam uh a, Nov 15, 2016 in kihouna om mahleh huai ah Manipur govt palaite tellou uh chi’n UNC pawl lungkimlou in kihouna lawhsam chih ahi hi.
Delhi a kihouna ah Manipur govt akipan palao tellouh suanlam a nei in UNC pawlin blockade khawlsak naksangin khauhsak semsem hiding chizawmah uhi. Huchi kalah UNC in blockade a bawl uh ni 10 chin hunvel akipan in Manipur ah niteng vanzat poimawh tuamtuam taksapna lianpi om a, LPG (cooking gas), thautui, nek-le-tak thil(essential commodities) state dang akipan puaklut ngaite honglut a omlouh ziakin Manipur mipi pumbuai hi.State govt in zahlak petmah ding a kithei in Nov 14,2016 in 8th Bn IB a CO makaihna in security escort tamtak tawh Gari 300 phial kuankhesak a,huaite’n leng Naga mite tamna bial pumpelh in Imphal-Jiribam road zui uh a, Silchar tawn in Assam ah lut uhi. Huchi kalah Nov 16, 2016 in van tuamtuam pua Gari 101 vel Jiribam akipan Imphal hongtung uhi.
UNC te’n National Highway a blockade a puan uh Naga mite’ lunglutna(interest) tuam himhim hi a,CCpur district mi 95% val tham in bel Sadar Hills bial teng district piching ahih deihchiat ding in gintak huai hi. Aziakbel govt tawh kisai thil poimawh tamtak Dist HQ phak ngai omsek a,Motbung/Kangpokpi akipan Senapati vaphak mi tamtak adin a lemtanglouh hun omtham ding hi.Sadar hills bial mipi adin bel district tuam alou theilou in poimawh a, deihsak huai petmah ahi uhi.
Huchi kalah Manipur phaijang mun khenkhat akipan UNC kalhna in counter blockade bawl pawl nibangzah hiam paisa in kipan uh a, adiakin Ukhrul leh Senapati zuan ding Gari ah van a puakte uh lakkhiaksak uh chi ahi hi. Huai tana tawplou in Moirang ah leng pawlkhat in Tedim road ah Counter blockade bawl uh chihthu om hi. Moirang akipan Lamka kikal CCpur district ah Naga mi omlou a, Sadar Hills bial district tuam piakding UNC in a doudal leng CCpur district in support zenzenlou in Sadar Hills bial district piching hileh chih huai zawmah hi.
Moirang Lamkhai Tedim Road a nupi bazaar(dukan) kivual deudoute leng Imphal-Lamka kala passenger-te’ ziaka hausa suak vekta uh a,Lamka mite’n huaite’ vanlei tawpsan vengveng le uh huai nupi bazaar kaia hausa hialte leng nikhat thu in a hauhsakna beithei sam ahi chih Moirang mipi’n a theihsam uh hoih ding hi.
No comments:
Post a Comment