HEADLINES:
Sadar Hills a MDC-te Congress akipan kitawp
 |
| Pic: http://www.thesangaiexpress.com/ (file photo) |
Sadar Hills, Nov-18: Sadar Hills ADC building a members’ Lounge mun ah Nov 2, 2016 ni a Sadar Hills thubuai tawh kisai a meeting hun a thupuakna delh zuina in Sadar Hills a MDC te’n tunitaklam in Manipur Pradesh Congress Committee a President T.N. Haokip kiangah kitawpna pia uh a, huai zawh in party dang ‘Sadar Hills Democratic Party’ bawlkhia uh hi’n kigen hi. Sadar Hills MDC te’n full-fledged revenue district dia Sadar Hills puangkhiak ma zek a Govt. in a cancel tawh kisai kikhemna leh kimualphou sakna hi a, kum 40 paisa apan kikhemna leh mipi-te ngaihtuahna banah state govt. a lawhsap ziak a lou theilou a Congress party apan kitawp ding in thutanna bawl uhi.
Sadar Hills a MDC-te kitawpna ah suaikai teng Chairman Haokholal Hangshing, Vice Chairman banah District Congress Committee a President Thangjakam Misao, Bhumi Prasad, EM; Lamkholen Kipgen, EM; Lunkhohen Haokip, EM; Kaikhosei Lhouvum, EM; Finance Committee a Chairman Dr. M. Dominic leh Member Paotinlun Chongloi, Seikholal Haokip, Lamminthang Kipgen, Seilen Lhoujem, Onthong Haokip, Dinglar Chiru, Milan Pradhan, Thongjalun Mate leh Th. Lupheng-te hi uh a, Member Dama Vaiphei in thil pumpelh theilou buaina a neih ziakin tel thei keimah leh amah deihna bang in kitawpna ah amin gelh in om a, Member Johny Gangmei leng meeting hun ah tel mahleh suaikaih ma a ana paikhia a, 4-T. Waichong District Council Constituency a elected member Seikhosat Kipgen in MPCC a Gen. Secy. kiangah Congress party apan kitawpna zan a pia hi’n gen uhi.
Dama Vaiphei telin Congress Councillor 19 te’n INC apan kitawpna pia uh a, Kangpokpi ah tuni’n Councillor te’n emergency meeting hun ah kitawp ding a thupukna bawl uh a, huai hun mah in MDC te’n party dang ‘Sadar Hills Democratic Party’ (SHDP) bawlkhia in party Leader ding in Haokholal Hangshing leh Dy. Leader ding in Thangjakam Misao tel uhi. SHDP thupuangtu din Lunthang Haokip leh Secy. ding in Thongjalun Mate tel uh a, MDC te’n kitawpna lehkha MPCC President leh JAC-Sadar Hills office ah tunitaklam in copy 1 pia uh hi’n kigen hi. Huai thu tawh kisai in JAC-SH a Co-Convener Tonglen Lukim in JAC-SH office ah MDC te’n kitawpna lehkha pelut uh chi’n chetna bawl a, JAC-SH te’n Nov 19, 2016 zinglam dak 11:00 in Kangpokpi ah emergency meeting nei ding uhi.
Parliament Winter Session:
Congress makaih Oppn-te kiphin; houlimna omtheilou
New Delhi, Nov-18: Parliament Winter Session pailel ah Congress makaih Opposition party-te’n Rajya Sabha leh Lok Sabha a houlimna omdingte hihbuai uh a, legislative business neih dia guan a omsate zan apan in paisuak theilou hi.
Lok Sabha ah tuni’n Congress pawlin ‘Demonetization’ tawh kisai lungkimlouh langsak in buaina bawl uh a, huaithu ziaka discussion omtheilou in sousang mahmah hi. Prime Minister Modi kiangah gamsung mipite haksatna ngaihsak lou hi’n Congress pawlin ngawh uh a, Bank tamzaw ah sum kiningching omnailouh ziakin, akintheilam a huai tungtang enkai di’n ngen uhi. Tusun a Lok Sabha kipat nawn masak hunah Congress, Left, SP, RJD leh opposition party dang-te’n slogan tuamtuam sam in Govt. thupukna mawhpaih uh a, Prime Minister in thupiak abawlsa zukkik ding in theisak uhi. Congress leader Mallikarjun Kharge in Speaker Sumitra Mahajan kiangah business paidan lungtun huailou asakdan gen a, Lok Sabha a voting provision tawh kisai enthak dia ngen kawm in, govt. ginatlouh ziakin opposition party leh mipite lungkimlou uh chi hi. Kharge thugen tawh kisai Parliamentary Affairs Minister Ananth Kumar in dawnna pia a, rule 193 pansan in houlimna neih lunggulh mahle uh, huai rule ah voting provision omlou hi’n taklang a, Congress pawlte ngetna lawhching theilou ding chi hi.
Rajya Sabha ah leng Congress leh ruling party-te kala kiselbuaina piang a, sunnung dak 2:30 in session kipan mahleh thubuai tamtak omte ziakin Deputy Chairman P J Kurien in tuni adi’n adjourned hi. Hun sawtlou Rajya Sabha session om hunah Congress leh Opposition leader, Ghulam Nabi Azad in Uri terror attack leh Demonetization a tehkak tungtang BJP member-te lungkimlou uh a, terror attack tawh sum sihsakna tehkak pen pomtheilou uh ahihdan taklang in, member teng theihpih a ngaihdam ngen ding in theisak uhi. Minister of State for Parliamentary Affairs Mukhtar Abbas Naqvi in agenna ah Ghulam Nabi Azad kampau ziakin gamsung mipite thangpai uh chi a, govt. in black money matkhiakna dia panlakna aneihte, helpawlte gamtatna tawh tehkak pen govt. simmawhna liantak hi’n gen hi.
LOCAL NEWS:
Counter blockade mawhpaih
Lamka, Nov-18: Manipur govt. in Sadar hills leh Jiribam Sub-Divn –te Dist. piching a bawlkhiak ding achiam deihlouhna in UNC in Naga-te luahna dist. teng huapin Manipur a NH 2-te ah economic blockade abawl paitou zel in vanpua gari phaijang bial lut theilou a, tua tawh kiton in phaijang bial ateng Meitei te’n tribal dist. teng ah counter blockade bawlkhum in, UNC economic blockade in a huapkhaklouh CCpur dist. tanpha hihbuai uh hi’n taklang hi. Huai tawh kisai theihsiam haksa ahihdan taklang kawm in huai in Manipur a singtang leh phaijang mite’ kideidanna naktak a behlap ding hi’n taklang hi.
Hiai bang a chi leh nam a kideidanna pen JAC-AATB in et-thawh mailou ding ahihdan taklang kawm in, counter blockade kibawlkhum thu zak ahih nawn leh CCpur dist. apan Manipur valley lutding van pua gari-te’ Nov. 21, 2016 apan khaktan hiding hi’n thusuah in taklang hi.
Singpi man thu ah thupukna bawl
Lamka, Nov-18: Lamka Tea Hotel Owner’s Assn. (LTHOA) te’n Nov.15, 2016 apan khawpi sung ah singpi leh nektheih man akhansakthu ah Langkhanpau Guite, Chairman ADC/CCpur in EM-te tawh tuni sunnung in ama’ office chamber ah meeting nei uh a, Chairman in CCpur Consumers’ Club leh LTHOA makai-te sam in genkhawm uhi. Huai hun ah mipi khualna in thupukna bawlthei uh a, singpi (tea) aman khanglou a, LTHOA te’n special abawl ding, nou 1 ah Rs. 10/- azuak ding, singpi san (red tea) nou 1 ah Rs. 5/-, puri/nektheih 1 ah Rs. 5/- leh subji plate 1 ah Rs. 5 a zuak ding in thupukna bawl uhi.
AEC-124 ah rank 2 in pang
Lamka, Nov-18: Douminlien @ Boipu Touthang s/o Letzathang Touthang of Vazing village, CCpur in Army Education Corp’ (AEC-124) ah interview aneih result suak in all India ah rank 2 in pang hi. Aman January 3, 2017 in Dehradum ah training panding hi’n kigen hi.
Auto in phukha in taisan
Lamka, Nov-18: Ching Mary w/o Lalminthang of New Zoveng, tuni zinglam dak 11:00 velin Hmuia Veng ah activa a tailai Diesel auto 1 tawh kiphukha a, Diesel Auto in taisan hi’n kigen hi. Ching Mary khawphoklou in kipuk a, phatuam ngaite’n Dist. Hospital ah pawlut uh a, aman alu (head) nasa in Doctor te’n Imphal ah referred uh hi’n kigen hi.
Nodal Officer-te sinsak
Lamka, Nov-18: DEO Lunminthang Haokip, IAS DC/CCpur makaih tuni’n BRGF Resource Centre ah tuni sunnung in 11th Manipur State Assembly Election om ding tawh kisai in CCpur dist. a Nodal Officer dia guan a omte adin briefing leh training kithuah om hi.
S. Thienlaljoy Gangte, MCS AC to DC/CCpur & OSD(Election) in election paiding dan leh election om hun a vanzat tuamtuam kizang dingte pulak in, siangthoutak a election neih theihna dia panlak dingdan sinsak hi. Election ding tawh kisai in DEO panpihtu din CCpur dist. a deptt. tuamtuam 16 a head teng nodal office dia guan a om hi’n kigen hi.
ZRA in thautui hawm sunzom ding
Lamka, Nov-18: ZRO/ZRA in Lamka khawpi sunga thautui taksapna omte enkai in thautui zuakte kiangah Rs. 100/litre (Petrol) leh Rs. 70/litre (Diesel) tunglam a zuaklou ding in theisak uh a, Mizoram apan Lamka hong kipawlut-te rate bikhiah omsa bang in mipi lakah zuak sak zel uhi. Tua tawh kiton in Nov. 19, 2016 zingkal dak 7:00 apan Simte Inn, Simveng ah Petrol leh Diesel hawmna sunzom ding uh ahihdan ZRO/ZRA te’n mipi kiangah zasak uh a, ni 3 sung in mi tamtakin hamphatpih uh hi’n leng taklang uhi.
SSPP Jt. HQ Delhi in Felicitation neiding
Lamka, Nov-18: Vasant Vihar, Delhi a Mizoram House ah Nov.19, 2016 sunnung dak 1:00 in SSPP Jt. HQ Delhi in Felicitation program neiding hi. Huai ah Roui Kullai, IFS in Siamsin-te’ di'n Motivational speech neiding a, Dr. Chinkhanlun Guite, Asst. Professor, St. Stephen College in Testimonial speech neiding hi.
Education Department makaih in Award tuamtuam- Siamsin Award of Excellence, Siamsin Certificate of Appreciation, Overall Topper Award, Vangngaih.com Award for Professional Excellence (VACAPE) hawmkhiat hiding hi.
Sikpui Sports 2016 hong ding
Lamka, Nov-18: Hmar Students’ Assn. (HSA)/CCpur Jt. HQ saina in Nov. 19, 2016 nitak dak 6:00 in Rengkai Road a L.J Memorial Hall ah ‘Sikpui Sports 2016’ hon hiding hi. Huai ah Chief Guest in Lal Hossan, Vice Chairman, ADC/CCpur, Guest of Honour in Joseph R Hmar, President, ATSUM leh Functional President in Joseph R Joute, Director, For One Life, Asia hiding hi. Badminton exhibition match ah H.Balram, MPS Addl SP(Ops) & David Piaklian, MPS, Addl SP (L& O) v/s SBA Seniors kimawl ding uhi.
DC makaih in bankers meeting om
Lamka, Nov-18: DC/CCpur makaih in ama’ office chamber ah tuni nitaklam in mipi’n sum leh pai a haksatna tuah thu ah bankers meeting om hi. Huai ah bank-te ah mipi kivual (queue) a om pen bangchi hihkiam ding, Rs.1000 leh Rs. 500 note khektuahna tawh kisai ban ah sum nen taksap ziaka dawr/dukan te’n sumlui (Rs.1000/, 500) alak utlouh uh mipi bangchi theihsiamsak ding chih kikum uhi.Banker te’n Nov. 19, 2016 apan khawpi sung ah ATM 10 function sak di’n DC/CCpur theisak uh a, Nov. 22, 2016 nitak dak 6:00 in Dorcas Hall, New Lamka ah mipi’n Rs.1000 leh Rs. 500 note ban ah sum thu a buaina tuah thu talk-show nei ding in thupuk uhi.
Nitak nung in ATM ah mi tam
Lamka, Nov-18: Tulai in sum taksapna liantak om ziakin SBI CCpur Branch a ATM booth tunitakin kihong a, nitak dak 9:30 tan in customer tamtak kivualdim uhi. Zan in SBI/CCpur ah Rs. 20 crores vel hongtung a, Rs. 2000 note ahihbanah ATM ah leng nikhat in Rs. 2000 lakkhiak theih a, khawpi sunga sum note niam (Rs. 100, Rs. 20, Rs. 10) a vang mahmah ziakin mipi-te’n haksatna tuak veve uh a, dawr khenkhat in van-nen leina di’n Rs. 2000 note la ngamlou uh chih thu om hi.
Confluence Day zang uh
Lamka, Nov-18: Tuibuang a Greenwood Academy in nu-le-pate’ tawh kithuah khawmna dan in tuni’n school campus ah ‘Confluence Day’ zang uh a, huai ah Chief Guest in Augustine J. Khongsai, MPS SDPO/Thanlon leh special guest in Dr. Chingkholal Thangsing, Vice President, Kuki Inpi Manipur pang hi. Richard Haokip, Principal makaih in student hih hoih tungtuangte kiang ah academic excellence award piak ban uah teacher-te kiang ah kipahpihna thilpiak pia uh a, student te’n item tuamtuam lahna nei uhi. Programme hunsung in Pr. Jimreev Golmei in teacher-te adin thumsak hi.
Danial Prayer Fellowship
Lamka, Nov-18: Daniel Prayer Fellowship, Langol Imphal te’n Nov.19-20, 2016 sung Langol Independent Church, Imphal ah 20th Annual Conference, 2016 nei ding uh a, Rev Dr. Kh. Khaizakham in Pathian thugen ding hi.
SVEEP campaign 2nd phase kipan
Lamka, Nov-18: Election Commission of India in kum nawn election ding tawh kisai a India khua leh tui hihna nei khempeuh akihel ua siangthoutak a election sai ding tupna in Systematic Voters Education & Electoral Participation (SVEEP) Campaign pankhia in, CCpur dist. in first phase a zawhsiang tawh kiton in tu’n 2nd phase pan nawn uh a, activity masapen dingin Bethel Veng/Khawmoi a Legacy Faith Academy ah school naupangte adin slogan writing competition nei uhi. Huai hun ah student 250 vel kihel in “Ethical Voting & Informed Voters” thupi zangin thusau gelh kidem uhi.
SVEEP Core Committee Chairman Soiminlian Lengen, CEO ADC/CCpur telin member Prescilla Lalliensang leh Ngamthang Haokip, Election Officer te’n campaign tawh kisai in thu gen uhi. Nov. 21 in Bethesda School of Nursing, Muolvaiphei; Nov. 22 in Don Bosco Hr. Sec. School leh VK Tawna College ah nei nawn ding uh a, Nov. 23 in Rengkai Govt. Hr. Sec. School leh CCpur College; Nov. 28 in Rayburn College leh Dec. 1 in Sielmat Christian Hr. Sec. School ah nei ding uhi.
Dist. Level Sc Ex. ah school 4 tel
Lamka, Nov-18: Phungkhothang govt. H/S ah tuni zinglam in ZEO/CCpur nuai a Science Unit saina in ‘Science, Technology & Mathematics for Nation Building’ chih thupi zang in class IX-XII kikal-te ading in 37th Dist. Level Science Exhibition for Children, 2016 om a, ni 3 sung neih ding chih himahleh govt apan fund omlouh ziak in tuni’n zousiang uhi. mi 20 kihel ua, judge in Shyam Kishore Singh, Environmentalist pang a, kipahman-te ZEO/CCpur in pekhia hi.
Written Quiz competition ah 1st in Lunsei Haokip (class XII) of Don Bosco Hr Sec School, 2nd in Francis Haokip (class IX) of St. Mary’s school leh 3rd in Michael Ngamminlen Baite (class X) of JNV/Tuinom hi uh a, amau kipahman Rs.600/-, 400/-, 300 + Certificate ban ah atelteng kiang ah Rs.50/- pia uhi. Science Exhibition Model Competition ah 1st in S. Martin Lhungdim of St Mary’s school leh 2nd in Rs.Jackson Thangminlun of JNV/Tuinom pang a, kipahman Rs.1200, Rs.1000 + Certificate ban ah atelteng in Rs.600/- ngah uhi. Dec 2016 sung in Imphal ah 37th State Level Science Exhibition for Children, 2016 omding ah CCpur Dist. ai-oh in S. Martin Lhungdim of St Mary’s school, Jackson Thangminlun of JNV/Tuinom, T. Lunchingthang of Vimala Raina H/S, Cicilia Vahneiting of St. Mary’s school, Angamba Irengbam of Don Bosco Hr. Sec. School leh David Pauthansang of Don Bosco Hr. Sec. school kuanding uhi.
Ashijolneng FC vuallel; FC Zalen-te vualzou
Thangjam Birachandra Memorial 21st Winners’ Cup semi-final 2nd leg kimawlna tuni in Imphal a Artificial Turf Ground ah om a, tua a CCpur Dist. champion Ashijolneng FC leh DM Rao, Sekmai te kimawl uhi. Hiai match ah DM Rao ten 1st leg a 3-1 a zawhlouh uh lehkhup zou in 2-0 in zou ua, tua tawh kiton in aggregate in 3-3 in kidraw ua, penalty ah DM Rao in 4-2 a zou in final lut daih uhi. Final match ah DM Rao leh Muvanlai FC te kimawl ding uhi.
11th Manipur State League match pre-quarter final match zan a om ah FC Zalen leh TRAU te 1-1 in kidraw uh a, penalty ah FC Zalen in 4-2 a zou in quarter-final lut uhi. Hiai match ah TRAU te’n goal khum masa mahle uh FC Zalen in Seikhohao Tuboi goal in 1-1 in kidrawpih pah uhi. Hun beitan in goal kikhum om nawnlou in 1-1 in kidraw uh a, penalty ah FC Zalen keeper Mong Hmangte in nih tak save in FC Zalen ten khum vek in 4-2 in vualzou uhi. Quarter-final ah FC Zalen in kumlui a final a zawhlouh uh AIM te kimawlpih ding uhi.
SUUNNA:
Henzadong Hanghal (80) f/o Dongzalal of Zion Veng, Rengkai tuni zinglam in teknat in si a, nitaklam in Simveng hanmual ah kivui hi.
S. Chinzapau @ Chiahpi (56) s/o (late) Tualkhogin of Zoutung village, Thanlon Sub-Div. tuni sunnung dak 1:30 velin BP stroke in si a, Nov.19, 2016 in S Zamthang’ inn pansan in Simveng hanmual ah kivui ding hi. Amah tulel in JNV/Tuinom ah casual a Water Carrier semlel hi’n kigen hi.
S. Pauminthang (29) s/o S. Daniel of Vengnuam, New Lamka zannitak in sungna in si a, tuni’n YPA hanmual, New Lamka ah kivui hi.
IMPHAL NEWS:
Govt. in written test result cancel
Imphal, Nov-18: Forest Dept. a Forester 59 leh Forest 141 lakna ding in Written Test result Nov 14, 2016 a suak ah candidate khenkhat diklou om hi a taklang kawm in govt. ah complain bawl uh a, govt. in thil omdan a suizui nungin written test result cancel hi’n thusuak om hi. Written Test a tel candidate-te a ding in tunung sawtlou in written test siangthou leh feltak in saithak hiding chihthu om a, a hun leh ni ding tunung a puangkhiak hiding in govt. thusuak in gen hi.
Thautui tanglou hunkhop om
Imphal, Nov-18: UNC leh ANSAM te’n state govt. in full-fledged district dia Sadar Hills puankhiak a sawm uh mawhpaihna a Nov 1, 2016 apan hunchiam omlou in NH-te ah economic blockade a bawl uh banah Centre leh RBI in sum Rs. 500 leh Rs. 1000 note-te zattheih louh dia thupuan a bawl ziak un Manipur ah nek-leh-tak, niteng van zat leh thautui taksapna om a, Oil pump-te ni 11 sung a kikhak nung a tuni zinglam dak 7:00 apan ki hong nawn hi. Oil pump-te ah thautui kihawm ding chih ziak in zan khawvak in thautui deih-te kivual a ding hunkhop om uh a, tuni zingsang dak 7:00 apan 2-wheeler-te a dia Rs. 300 leh 4-wheeler-te a ding in Rs. 500 tan lei thei ding in bikhiah uh a, himahleh dakkal bangzah hiam nung a thautui bei pah ziak in thautui deih tamzaw te’n tangkha lou uhi.
Golhgukna tawh kisai in mi 2 man
Imphal, Nov-18: Thoubal district ah maban Manipur Assembly Election a dia BJP ticket piak ding in intending candidate kiangah golhgukna bawl mi 2 mat hi uhi. Huai thu tawh kisai in Thoubal district a Wangkhem A/C ah intending candidate Kangabam Jadu in Rs. 2.5 crore a piak leh BJP ticket mu ding a chiamna bawl Sheik Baddrudoza leh Oinam Tarpan te’n zan nitaklam in Charangpat a Kangabam tenna inn ah kihouna nei uh a, huai hun ah mi 2-te gamtatdan ginlelh huai sak ziak in Kangabam worker te’n enzui uhi. Kangabam thupiakna dungzui in worker te’n veng mipi sam khawm in mi 2-te man in thudotna nei uh a, Thoubal Police Station ah pekhia uhi. Mat a om mi 2 te’n RSS member banah BJP makai-te tawh kizopna nei uh chi’n gen uh a, Police te’n mi 2-te hihna puangkhe nailou hi’n gen uhi.
Truck 218 vel hongtung ding
Imphal, Nov-18: Imphal zuan in Assam a mun tuamtuam apan van tuamtuam pua truck 218 vel ding-te tuni nitaklam dak 3:00 velin Manipur leh Assam gamgi Barak mun tung uh a, lamkal ah buaina/nawngkaina a om keileh tunitak zan sawt nung ahih keileh zingsang baihtak a Imphal hongtung ding uh hi’n kigen hi. Police thusuak in gari 218 lakah Petrol tanker 29, diesel 19, LPG bullet tanker 29, ATP 2, FCI anntang pua truck 66, damdawi pua Truck 2, Cement truck 46 leh van tuamtuam pua truck 24 hi a, SP/Tamenglong makaihna a security khauhtak vengbitna nuai ah Barack apan Imphal tan escort pe ding uh hi’n leng taklang uhi.
Kikaptuahna ah mi 1 si
Imphal, Nov-18: Sapormeina Police Station in a huamkhak Sadar hills a Mangjol village gei ah tuni zinglam dak 9:15 vel apan minute 30 sung 38-A/R–te tawh kikaptuah nung in Thadou People’s Liberation Army (TPLA) a cadre 1 si hi. Kaplup a om ahihleh Thangjohn Singsong (25) s/o Satna Singson of Keithelmanbi Military Colony, Sadar Hills hi a, amah apan A1 rifles 1 leh a tang 23 banah van tuamtuam muhkhiak hi a, Police te’n post mortem bawl ding in RIMS morgue ah koih uhi.
AMNPA te’n sit-in-protest nei
Imphal, Nov-18: All Manipur Newspaper Publisher Assn. (AMNPA) leh All Manipur Newspaper Sales and Distributors Association (AMNSDA) te’n sum nen kidaih ding a muh louh ziak ua newspaper business-chain te’n nawngkaina a tuah uh taklatna in tuni’n Keishampat Yumjao Lairenbi Community Hall ah sit-in-protest nei uh a, huai hun ah All Manipur Working Journalist Union (AMWJU) te’n leng kipumkhatna taklatna in sit-in-protest ah tel uhi. Huai nung in AMNPA te’n Chief Secretary tungtawn in Reserve Bank of India (RBI) Chief General Manager adin memorandum pia uhi. Akigendan in Rs. 500 leh Rs. 1000 note zat theihna mun ding-te lakah media house-te telkhak louh ziak in bank lam ah nawngkaina om a, govt. in media house te’n nawngkaina a tuah uh a etkai masiah news suah khe lou ding in taklang uhi.
TUNI THUPI:
“Khatvei tei, chihtakna tawh vaihawm kumpipa khat a hong omdia, huchiin thudik a vaihawm nam pitute ahong om ding uhi”
– Isai 31:1
EDITORIAL:
I maban ding leh Election!
Khat-le-khat kala kibeihtuahna thu zangin igen khawm khin uh a, tuni in i maban ua election ah bang i maisuanta ding ua le chih ngaihtuah leng deihhuai isa hi. Hongtung pahta ding kumnawn 2017 khabul lam a Manipur ah kitelna om ding tawh kisai in bang chibang in mipi’n kal i suanta ding uale? Candidate hih ut hunkhop (intending candidate) kiphoulakta a, a ut tampitak kiphoulak nailou leng om hi. Kumnawn 2017 a Manipur state assembly election om ding ah Election Commission of India (ECI) in election code and conduct hon bangchi puan ding ua chih i thei naikei a, ahihziakin Manipur state tela state dang 4 a election omding bel khauh pai mahmah dingin kilang hi. Eisung ah saptuam makai tal lang taktak khawng hon kigolh (involve) ding uam ahihkeileh organisation tuamtuam a leader te’n gen (say) hon neiding uam chih zaw theih hinailou hi.
Prime Minister Modi makaih Central government leh Reserve Bank of India in Rs 500 leh Rs 1,000 note sisak uh a, mipi buaizak uh a, tua ziakin Winter Parliament session leng buai mahmah hi. Modi ahihkeileh Union Finance Minister Arun Jaitley-te’ ngaihdan leh tupdan bel i theihpih vekkei a himahleh, zan a i gensa bangin BJP adding in thu hoih sangin a hoihlou lam tun khathei hi. BJP in tuapan kha 2/3 sunga state 5 a assembly election om etna a sum hon sihsak phut uh ahih leh ahihkhelhna uh tamtak om kha maithei hi. Sum sihsakna pen terrorist tawh kisai, fake currency, black money chih leh kampau tuamtuam zang uhi.
Ei tawh kisai kikum khawm zual lehang, 11th Manipur state assembly election om ding ah, candidate te’n sum leh thagum (money & muscle power) a zat theihlouhna ding un dan chi tuamtuam, khauh taktak, India khangthu a om ngeilou bangzah hiam centre a vaihawmna len BJP Govt in hon pawlut ding ua gintak hi a, aziak ahihleh Congress in Manipur state a ukkhumna uh sawtpi hita a, Central a Modi makaih BJP solkar kalsuanna ding theihtheih hilou a, dan leh dun thak hunkhop hong piankhiak ngei gintakhuai lai hi. Khawvel leh leitung paidan kilamdang mahmahta a, khangthakte’ lungtang ah leng kikhekna (change) om mahmahta hi’n kilang hi. Tua ziak mah leng ahiding a, thil thakthak hong piang toutou mawk hi.
Genbeh lai lehang, state 5 ah tunung sawt in assembly election neih in omding a, ‘free & fair election’ om theihna dingin mipi’n leng panlak poimawh mahmah hi. Huaikawmin, bang chileh ECI in ‘capture system’ subei theiding uhiam chih ngaihdan om thei a, Electronic Voting Machine (EVM) sangin ballot paper tungtawn mah a ballot box a i deihpen i khiak ngeungeu ahoih diam chih ngaihdan leng om a, American system a vote khete i hihlouh ziakun, eilawi system pen sianthouna leh diktatna tawh bangchi zuihtheih ding hiam chih heutute’ adingin ngaihsut poimawh hi.
Kitelna tungtang ah India adia a saitu lianpen Election Commission of India (ECI) ahi hi. ECI in sum’ thilhihtheihna (money power) nakpi takin a dal uh a, alomlom in sumhul (cash) tamtak man mansek uh a, ahihziakin huai in election sianthouna hih siangthou zou tuanlou in kilang hi. Tuni chiangin pilna leh theihna a sang mahmah ta a, dan (law) kichi poimawhna lian semsem in kilanga, kuamah i pawng mawhsak leh soisel theih hilou ahihdan theihtheih dingin om a, India danbupi gendanin, Daan tungah kuamah a omkei a chih uh dik mahmah dingin ngaihsut theihin om hi. Huai kawmin, thil himhim ah sum in thil ahihthei chih pen thudik nial vuallouh hi a, eilak ah dik diak se maithei hi. ECI in sum-le-pai tawh kisai zuih ding dan guidelines tuamtuam bawl mah le uh huai in candidate-te gak zou taktak a theih hilou hi.
‘Free and fair election’ i chihchih uh democracy gam a om i hihman in kuapeuh in lunggulh mah hi. Ahihziakin mipi tamzaw deihdan mah a vote kikhesek mah hiam chih pen theih haksa mahmah a, huaikawm in mipi lam leng hichi lawmlawm a hai ihi tel maw chih theih dingin om hi. Bangteng hileh, bang i maisuan ding ua chih hi thouthou hi.
No comments:
Post a Comment