HEADLINES:
Bomb 3 vei puak; mi 1 si, security personnel 3 liam
Imphal, Nov-20: Manipur ah Nov 21, 2016 apan ni 10 sung Sangai Festival 2016 lawpna kipat ding ziakin mun tuamtuam ah security hihkhauh in om mahleh tuni zingsang apan dakkal 12 sung in bomb 3 vei puak a, huai ah mi 1 si in security personnel 3- A/R personnel 1 leh CRPF jawan 2-te liam uhi. Akigendan in tuni zingsang dak 8:10 velin Singjamei Chingamatak a Assam Rifle Camp apan metre gamla lou ah IED bomb puak a, huai hun in Iron & Cement shop ah nasepna mun zuan a pai Binod Rai (32) s/o Ram Kishore Rai of Muzaffarpur, Bihar tulel in Chingamathak ah inn luah a om si hi’n gen uhi.
Nitaklam dak 4:45 velin Johnstone Hr. Sec. School nung a M-Sector (Army Transit camp) 26 A/R-te sentry post ah hand grenade puak a, bomb neng in 26-A/R a personnel DK Ray (39) of Lokra, Assam hihliam zek a, IGAR(S) Medical Hospital ah puaklut in om hi. Bomb puah nung sawtlou in M-Sector a A/R te’n bomb hih puaktu dia muanmawh W. Nanaobi @ Nanao (46) of Wahengbam Leikai man in police-te khut ah pekhia uhi. Huai lou in Palace Compound a All India Radio (AIR) Imphal huamsung ah nitaklam dak 5:15 velin Andro parking mun apan hand grenade ki denglut hidia gintak puak a, sentry post a duty CRPF jawan 2 liam uh a, a kim nai a hospital khat ah puaklut in om uhi. Police dept. a top police officers leh Forensic dept. a expert te’n thiltung na mun-te enkhia uh a, Singjamei Chingamatak ah bomb puak pen IED hi a, M-Sector leh AIR Imphal ah bomb puak-te handgrenade hidia gintak hi’n gen uhi. Mun tuamtuam ah bomb puah ziak in security hih khauh in om a, Sangai festival lawpna mun ding telin mun tuamtuam ah frisking leh checking om a, thiltung tawh kisai a helpawl kipuang omlou hi.
India President leh Prime Minister in suunthu puang
Indore-Patna Express tuni’n accident: misi 116 val
Lucknow, Nov-20: Indore-Patna Express train tuni zingsangin Uttar Pradesh state sunga Kanpur Dehat district a Pukhrayan mun ah tuahsia (accident) a, hiai thu bawl ahihtan in misi 116 val a, aliam mi 150 vel om hi. Train lampi apan AC coach 4 telin coach 14 taikhia a, bogies 2 kise nasa mahmah hi’n thusuak in gen hi. Passenger 235 vel tuanna Indore Patna Express in Madhya Presdesh state akipan Bihar khawpi Patna zuanlai hi a, zingsang baihtak dak 3 vela accident hi’n kigen hi. Kanpur Dehat a District magistrate in accident mun delhpah a, aman a gendan in misi 116 val lakah numei 6 leh pasal 14 theihchet hihna chet (identified) ahi hi. Huchi kalah misi kibehlap laidinga gintak ahi hi. President Pranab Mukherjee leh Prime Minister Narendra Modi in Train tuahsia ziaka site suunthu puang in a innkuanpihte uh lungkhamna thuakpih thu leng puang uh a, aliamte a damsiang pah uh deihsak thu puang uhi.
Union Railway Minister Suresh Prabhu leh Minister of State for Railway Manoj Sinha in accident mun delhpah in thil omdan enzui uh a, Manoj Sinha in thiltung tawh kisai a thilhih dikloute a kituahpih gawtna piak hidin gen hi.Inspector General of Police (Kanpur zone) Zaki Ahmed in a gendan in hutkhiakna nasep neihtouh zel hi a, train in a delhkhak mi bangzahhiam omlai ding a gintak ahi chi hi. NDRF team leh medical team hunkhop in leng thiltunna mun delh pah uhi. Railways ministry in misite’ innkuante kiangah zangna dopna (ex-gratia) Rs 3,50,000 chiat piak hiding in puang a, aliam nasa deuhte Rs. 50,000 leh a liam nasa lawloute Rs 25,000 piak dingin puang uhi.
Prime Minister Narendra Modi in misite innkuante centre government in Rs 2 lakh chiat leh aliam serious deuhte Rs 50,000 chiat piak hiding chi’n puang hi. Uttar Pradesh Chief Minister Akhilesh Yadav in misite innkuante Rs. 5 lakh chiat piak ding banah a liamte Rs. 50,000 chiat piak hiding in puang a, Madhya Pradesh Chief Minister Shivraj Singh Chouhan in leng misite’ innkuante Rs. 2 lakh chiat piak hiding in puang hi. Prime Minister in phone tungtawn in Union Railway Minister Suresh Prabhu kitatsatlou in houpih a thil omdan leh hotkhiakna nasep tanpha dong sek hi.Thiltung tawh kisai a thuchiangzaw thei ut te’n Ujjain - 07342560906, Ratlam - 074121072, Orai - 051621072, Jhansi – 05101072 leh Pukhrayan – 05113270239 te phone theih ding hi.
LOCAL NEWS:
Dakkal 4 sung shutdown la uh
Lamka, Nov-20: Electric deptt./MSPDCL, CCpur Divn. te’n electric pre-paid zatna ding Aerial Bundled (AB) cable kaih ding ziak un Nov. 21, 2016 zing dak 8:00 apan sun dak 12:00 tan Singngat feeder shutdown la uhi. Huai hun sung Singngat feeder in electric meivak a piakna teng pailou ding a, shutdown hunsung a nasep zawh ahihkei leh nasep zawh matan electric meivak kikhah theilou ding hi’n thusuak kingah hi.
EBC in kumsim khawmpi 68veina
Lamka, Nov-20: Evangelical Baptist Convention (EBC) in hongtung ding Dec. 8-11, 2016 sungin New Lamka a Gospel Centenary hall ah ‘Diktatna a kilamthakna’ thupi zangin Kumsim Khawmpi 68veina nei ding uhi. Huai hunsung in Rev. Dr. Paige Patterson, President, Southwestern Baptist Theological Seminary, Texas, USA leh Dr. Solomon Rongpi, Gen. Secy, Council of Baptist Churches in North East India thugen in pang ding uh a, Rev. Kumam Suresh Singh, Asia Co-ordinator of Partners in Discipleship International in Bible study makaih ding hi.
Upa M. Ginzalian, Khawmpi Chairman in Dec. 8 nitak in khawmpi hong ding a, Dec. 9 sun in vaihawmna om in biakinn/khua tuamtuam in agenda a genkhawm in budget leh year plan tawh kisai genkhawm ding uhi. Dec. 11, 2016 sunnung dak 1:00 in ordination service om in officiating Minister in Rev. S. Vung Minthang, Gen. Secy pang ding a, Dir. of Ministries in kichiamsak in khawmpi chairman in certificate pekhe ding a, nitak mipi kikhawp tawpin Upa Lalthanghlun Guite in khawmpi khak ding hi.
ECA Biakinn honna leh lopna
Lamka, Nov-20: Rev. L.B.Angam, Executive Director, ECA (ECCI) in tuni zinglam in Saihenjang khua ah ECA biakinn kibawlthak hongkhia in Pathian kiang ah thumna in lan hi. Saihenjang khua bel Henkholun Doungel @H. Doungel, Dist Youth Co-ordinator, NYK/CCpur hauhsakna khua hi a, khua bangzahhiam te’n Biakinn thak kipahpihna in Saihenjang ECA zatding vanzat poimawh tuamtuam present uhi.
DIO te’n damdawi tamtak zang
Lamka, Nov-20: Dist. Immunisation office a Routine Immunisation staff te'n Oct. 2016 in naupang leh nupi naupai (pregnant women) tamtak damdawi pia in kap uhi. Tetanus damdawi in nupi naupai 367 kap uh a, BCG in naupang 451 kap uhi. DPT (khuhhip dalna) in naupang 356, Penta (khuhhip dalna) in naupang 1045 kap uh a, naupang 1258 zengdalna (polio) damdawi dawnsak uhi. Hepatitis-B damdawi in naupang kum 1 nuailam mi 235 kap uh a, measles (sensi dalna) in naupang 589 kap uhi. JE natna dalna in naupang 606 kap uh a, naupang 450 te vitamin ‘A’ dawnsak uhi. Tetanus damdawi in naupang kum 10 leh kum 16 ban ah Dist. Hospital a casualty ah accident ziaka kikap teng 457 pha hi.
JAF in unity campaign sunzom
Lamka, Nov-20: YVA Kangvai unit zintunna in Joint Artistes Fellowship (JAF) pawlin tuni sunnung in Kangvai bazar ah ‘unity through music’ thupi anei in road show tawh kithuah unity campaign nei uh a, huai hun ah lasiam tuamtuam kihel uhi.
YVA Kangvai Unit in physical arrangement leh publicity tawh kisai apoimawh bangbang mawhpuakna la in kithuahpih uhi. Unau laizom tengkhawm te’n music tungtawn a kinaihsem ding tupna a sai uh hi a, khawpi sung ah 2vei nei khinta in maban ah leng sunzom zel ding uh hi’n gen uhi.
ZPYF-DJCC makaih in ‘Jubilee Vumkhawl’ om
Lamka, Nov-19: Zou Presbyterian Youth Fellowship, Diamond Jubilee Celebration Committee (ZPYF-DJCC) makaih tuni sunung in Zomi Colony, Zou Synod Office a MGP Jubilee hall ah ‘Jubilee Vumkhawl’ om hi. Huai hun ah ZPYF makai masa damlai tamtak paikhawm uh a, Khaiminlian, Convenor Souvenir Deptt. DJCC in Vumkhawl pulak in Lalkhawm, Secy. DJCC in jubilee committee panlakna report pia hi.
Vumkhawl kichi kimuhkhawm (get-together) hi a, paikhawmte’n jubilee ding tawh kisai a maban panlak dingdan kikumkhawm uhi. ZPYF makai lui bangzahhiam te’n thugenna nei in diamond jubilee magazine ading pek dungzui in ki-ngap dan in sponsored uhi.
ZPYF in January 27-30, 2017 sungin kum 60 chinna (diamond jubilee) lawm ding uh a, huai ding tawh kisai kisakkholhna leh jubilee cheplawkna danin Dist. 10 omte’n kimeltheih leh ki tanausem ding tupna in Aug. 2016 apan football leh volley tournament telin activity tuamtuam neita uh a, December 2016 in Jubilee Gospel live concert leng nei ding uh hi’n kigen hi.
Sunday School Ah Kei Pai Ning’ album hong
Lamka, Nov-20: Covenant Children’s Home, Mualkoi ah tuni sunnung in Elder Langkhanpau Guite a hoh theihlouh ziakin apa Thanngzadal in ‘Sunday School Ah Kei Pai Ning’ kichi Gospel Music Video album hong a, Rev. G. Vungsangmung, Area Pastor in Pathian kiang ah lan hi. Gospel Music Video album bel Mualkoi Presbyterian Children’s Fellowship te’n Church Building Project sepsuahna ding a bawl uh hi a, huai hun ah V. Nunlian, Lun Ngaihte leh Biaklun te’n la kisa atamzaw aphuah uh hi’n kigen hi.
Pethuel ah Hotdamna Chialpi
Lamka, Nov-20: Pethuel, EBCC ah Nov18-20, 2016 sung ‘Koi a omna hia’ Gen.3;8; Jona1:8 chih thupi zang in Hotdamna chialpi om a, Rev. K. Kamchinkhup, DS. Imphal Division in Pathian thu gen a, Counsellor in Evan. Upa T. Khupzatun leh Evan. Dimzangai pang uhi. Huailou in EBCC Vengnuam in Nov. 25-27, 2016 sung ‘Hong un Toupa kiang ah ikik ding uh’ Hosia 6:1 pansan in Tualsung Mission khawmpi leh Crusade kithuah zangding uh a, Rev Ginmalsawm, Director of Social Dev.EBC in Pathian thugen ding hi.
53rd Siamsin Shillong Annual Conf.
Lamka, Nov-20: SSPP Shillong Jt Hqtrs saina U Soso Tham Auditorium ah zan in ‘53rd Siamsin Annual Conference 2016’neih in om a, Chief Guest in K Ginkhanchin, IP&TAFS & Financial Adviser SSPP pang a, David T Seilunmang, Manager, Syndicate Bank; Dr.Lily Lianmuankim, Ph.D(Zoology) NEHU; Daniel Hauzel, Superintendent, Custom and Central Excise, GoI leh Thanglianmung LLM student,NEHU apan siamsinte hasotna om a, Ngulkhanzam, President, YPA Shillong in thumna in program khak hi.
Yangon a Crusade ah kihel uh
Lamka, Nov-20: Tunitak in Myanmar a Yangon khawpi ah Billy Graham tapa Franklin Graham in Hotdam Chialpina nei a, mipi lakh 1 val paikhawm hi’n kigen hi. Huai hunah Myanmar gamsunga christian pawl tuamtuam apan in saptuam makaite leh choir pawlte kihel uh a, Lamka apan B Muan Ngaihte telin Yangon Zomi Choir member 350 velin leng lapawl sakna nei uh chihthu kiza hi.
Tualsung Khawmpi om
Lamka, Nov-20: Moria EBCC Pearsonmun ah Nov 18-20 sung 'Toupa Kipahna Lam Zong Un" (Ephesate 5:10) thupi anei in Tualsung Khawmpi 2016 om a, huai hunah thugenpi in Rev. S. Vungminthang, General Secretary, EBC pang a, Seminar hunah ‘Khrist Nungzuihna’ thupi pansan in Resource Person Rev. E. Paukhanlian, DS/Lamka North Division in sinsakna pia hi.
Khawmpi honkhiakna Upa M. Ginzalian, Local Secretary in nei a, tunitakin Upa B. Goukhenkhan, Vice Chairman, TBSUC in Khawmpi hunkhakna nei hi.
Suangdawh H/S Farewell program
Lamka, Nov-20: Suangdoh govt H/S Campus ah Dec. 2, 2016 in Suangdoh govt H/S Farewell-cum- SSPP Suangdoh Block Presidential election (2017-2019) omding hi.
Huai ah Chief Guest in G Suanchinpau, MDC (Lungthul), Functional President in Lianzapau Samte, President SSPP GHQ. leh Chief Host in Paukhenkhup Guite, Chief of Suangdoh pang ding uhi.
SUUNNA:
Upa Liansuanpau Baite (65) h/o Nuamkhoniang of Mission veng tunitak dak 6:45 vel in cancer in si a, Nov. 21, 2016 in Lamka hanmual ah kivui ding hi.
Ngaikholhing @ Palhing (97) w/o (late) Upa Thouhkhopat of Khuppau Road, Chiengkawnpang zannitak dak 11:30 velin teknat in si a, tuni’n YMA hanmual, Chiengkawnpang ah kivui hi.
Khawltai (86) m/o L.L Muona, veteran singer of Zenhang Lamka, tuni zinglam in teknat in si a, nitaklam in Zenhang Lamka ah kivui hi.
IMPHAL NEWS:
CM in Community Hall hong khia
Imphal, Nov-20: Chief Minister O. Ibobi in tuni’n Thoubal district a Wangkhem Bazar ah Multi-purpose Community hall thak hong in mipi kiangah pekhia hi. Huai hall bel Wangkhem A/C a MLA banah PS. K. Meghachandra in MLA Local Area Development Fund (LAD) a Rs. 45 lakh bei a abawl ahi. Huai Multi-purpose community hall honna ah Parliamentary Secy. K. Meghachandra; O. Landoni Devi, MLA leh mi poimawh tuamtuam tamtak in uap uhi.
Van pua truck 284 hongtung ding
Imphal, Nov-20: Niteng vanzat poimawh tuamtuam leh thautui pua kigawm gari 284 tuni zingsang dak 9:00 velin Manihar Singh, Asst. Commandant, 6th Manipur Rifles makaihna nuai a security escort tawh kithuah in Jiribam apan NH-37 tawn in Imphal hon zuan uh a, nitak sawt nung a hongtung ding uh hi’n kigen hi. Huaite Petrol tanker 31, Diesel tanker 53, LPG bullet tanker 59 , FCI antang pua truck 21, Kerosene Oil Tanker 2, ATF Oil tanker 1, Cement truck 73 leh van tuamtuam pua truck 73 hi uhi.
Tourism Mart zintun ding
Imphal, Nov-20: Ministry of Tourism, Govt. of India, North Eastern state tuamtuam leh West Bengal kigawm-te saina in Nov 23-25, 2016 sung in North East bial a mun tuamtuam ah 5th International Tourism Mart 2016 zat hiding a, tukum a 5th International Tourism Mart kizang ding Manipur in zintun ding hi. Hun paisa in Tourism Mart tuamtuam 4 om sate Guwahati, Shillong, Tawang leh Gangtok ah kizang a, tutung a pen Manipur ah Tourism Corp. of Manipur Ltd. in zintun ding hi.
Chief Minister O. Ibobi in Nov 24, 2016 zinglam dak 9:00 in Palace Compound a City Convention Centre ah 5th International Tourism Mart hong ding a, Functional President in Union Minister of State for Tourism & Culture Dr. Mahesh Sharma pang ding hi. Tourism Mart zat sung in North East bial a Minister leh Parliamentary Secy. banah Tourism in-charge officer-te leh West Bengal a Official-te tel ding uh a, International delegate 50 leh tour operator tuamtuam 80 leng hong tel ding uhi.
Ticket tawh barcode kithuah ding
Imphal, Nov-20: Secretariat South block a Conference Hall ah tuni’n Tourism Dept.-te saina a Sangai Festival ding tawh kisai in press briefing om a, huai ah Chief Secretary O. Nabakishore in Sangai Festival tawh kisai a kisakkholhna zawhpah hiding leh Thailand, Sri Lanka, UAE, Bangladesh banah Myanmar a Chin state apan delegate-te tel ding uh a, Sangai Festival hun ah masapen ding in Ticket tawh barcode kithuah zat hiding in gen hi. Japan a Commerce Minister in Festival hongkhiatna hun uap ding a, Sangai Festival uap ding in Chin State a Chief Minister leh Minister 3 te’n lampi tawn in hongpai ding uhi. Aman agenzelna ah Sangai Festival hun sung in Sepak Takraw leh Kick Boxing ah Thailand-te tel ding uh a, tukum in main event ‘5th International Tourism Mart 2016’ hiding a, handloom product lahkhiakna banah arts & culture programme om ding a, nitak tengin MFDC ah Russian movies ngaih poimawh pen a koih in film show om ding hi. Nov 23, 2016 in Car Rally 2, business summit 2 leh Kangla Moat ah Boat race om ding a, naupang-te adia festival mun ah planetarium hongkhiat banah stall 300 val om ding a, Ticket ahihleh pichingte a ding in Rs. 25, student-te a ding in Rs. 15 leh naupang kum 5 nuai lam-te entry fee omlou ding a, festival mun a hawh ding-te puakna dia Winger zat hiding in leng taklang hi.
1st Annv. of First Open Heart Surgery
Imphal, Nov-18: Imphal a Hotel Classic Grande mun ah tuni’n ‘The 1st Anniversary of First Open Heart Surgery in Manipur’ zatna om a, huai ah Chief Guest in Governor Dr. Najma A. Heptulla pang hi. Huai hun ah Governor in singtang gam a omte leh mipite’n baihlam tak a zat theih ding ua health service keklet poimawh chi a, Manipur a singtang dawn a omte adia Flying Doctor tungtang tawh kisai in Union Minister of Health in scheme sepsuahna dia panpih theihna teng a pang din chiam a, scheme a tak a sepsuah ahih chiang in singtang dawn a omte’n health lam tawh kisai a haksatna a tuah-te uh kiam ding a, a poimawh dungzui a medical facilities leh a hun tak a medical attention ngah ding uh chi’n gen hi.
Dr. L. Shyamkishore Singh, Chairman banah Chief Cardiologist, Sky Group of Hospital makaihna nuai a doctor te’n Manipur ah Open heart Surgery masapen ding in Nov 18, 2015 in Sky Hospital ah open heart surgery bawl uh a, huai nung Manipur a mun tuamtuam apan patient 33 tungah open heart surgery bawl uh hi’n kigen hi. Hiai hun Dr. Kh, Ratankumar, Minister (Transport & Edn.); PK Singh, Commissioner, Health & Family Welfare; Dr. Ajay Kaul, Chairman & HoD, Cardiothoracic and Vascular Surgery, BLK Multi Speciality Hospital, Delhi, Doctors leh Nurses banah mi tuamtuam uap uh hi’n kigen hi.
Interview/Viva-voce result suak
Imphal, Nov-20: Manipur Legislative Assembly Secretariat a Reporter (Grade-III) lakna ding in Interview/Viva-voce result puangkhiak hi a, huai ah unreserved tamlou leh ST candidate 2 lawhching uhi. Candidate te’n Assembly Secretariat a Notice Board ah result kitak ettheih ding chi’n Dy. Secy. (Admn.) in thusuah bawl hi.
MSPDCL in sum note si la ding
Imphal, Nov-20: Bobby Singh Moirangthem, General Manager (F & A), MSPDCL in thusuah a bawlna ah MSPDCL in November 24, 2016 tan sum Rs. 500 leh Rs. 1000 note-te la ding in Revenue division 14 leh Revenue sub-division/vending station teng theisak a, himahleh mimal/inn chih utility bill banah current bill piakna tawh kisai hiding a, bill piak khawl (advance payment) phal hilou ding in taklang hi.
National Best short film Award ngah
Imphal, Nov-20: Manipur apan Ashok Veilou in Kolkata ah Nov 14-18, 2016 sungin ‘The 22nd International Film Festival’ hun ah Tou-Tai (seed) film kichi a bawl tungtawn in National Best Short Film Award sang a, huai film ahihleh Kalpanirjahar International Film Festival 2016 leh Mumbai a Filmingo Short Film Festival hun ah leng suahkhiak hi’n gen uhi. Ashok Veilou ahihleh Senapati district a Purul village akipan hi a, Shillong a St. Anthony’s College ah Mass Communication and Video production in graduate a, tulel in Kolkata a Satyajit Ray Film & Television Institute ah Post graduate Diploma in Direction and Screenplay writing zil lel a, Tou-Tai film ahihleh tuailai pasal khat state dang ah laizil a om himahleh innlam ah suti a zat sung in Manipur a buaina-te ziak in helpawl ah alut tungtang hi’n taklang uhi.
TUNI THUPI:
“Ka lampi a hihsia uh a, ka tuahsiatna a zong uh a, kuaman a kham kei uh.”
– Job 30:13
EDITORIAL:
Sinlaite state dang ah aw!
Manipur in thubuai-labuai tuamtuam nakpitaka atuah lai in sinlai (student) te’ lawhchinna ahihkeileh a semsate’n promotion ngah chihte niteng phialin Newspaper ah suahtheihin om a, kipahhuai mahmah hi. India adia siamsinna mun sangpen banga ngaih Jawaharal Nehru University (JNU) ahihkeileh Banaras Hindu University telin mun tuamtuam ah Asst. Professor muthak chihkhawng zak nuam law mahmah hi. Tua kia leng hilou in, Company leh private Institution lian taktak ah leng sepna ngah i om tou zel uh a, centre government hi’n private company leh entrepreneurship nuai ah sep hoih pipi ngah i om zel ziakin Pathian in eite hon taisanlou ahihdan chiang mahmah hi.
Sinlai (student) te’n Manipur bouruak nakpitakin thuakkhata uh chih i gelh tamte lak a khat ahi hi. Abiktakin Imphal a naupangte’n thuak uh a, amau hon thuak zawh chiangun Manipur singtangbial a student te’n leng nakpitakin thuakkha sek uhi. Kuapeuhin i tate lehkha a siam ding i deih uh a, neilou sasa in government school-te taisan in private school-te ah tuition fee sang taktak pia in i kaisak uhi. Tamtakte mahin school van(gari) zangin i paisak uh a, i sum senna uh sang mahmah a, himahleh, i tate adingin khaw-ul kaizen in pan i la ngam uhi.
Manipur state paidan i et vengveng chiangin a hoih sangin hoihlou lam nawtzaw hi. Hiai dan a hong paitouh zel leh student-te’ maban ding theih haksa mahmah a, aneiliaite’ tate state pawlam ah koihkhiak vek mai hoihding in gintak huai hi. Blockade/bandh/strike/total shutdown chih ziakin naupangte buai mahmah uh a, school authority te’n lah naupangte’ fee awl chih omtuan lou, School Van fee kikiam chih lah om tuanlou, naupangte’n leng a theihna (memory) uh hih mang gai ding uh bang hi. Tu bangin final examination hong om lai dinga, kumlui 2015 leh 2016 a class a missed tengteng uh pammaih law mahmah hi. Jammu and Kashmir a khawvot ziaka school a kikhak sung nu-le-pa te’n naupangte’ fee hihkiam (deduct) dingin phutsek uh a, himahleh, huai pen mihing bawltawm thiltung ahihlouh ziakin court in pomsak lou a, eilaka thiltungte bel mihing bawltawm hikhasek hi.
Tuadan a Manipur state a paitouh zel leh student-te’ maban ding lungzinhuai mahmah ding hi. Sadar Hills issue a veng naikei a, Manipur University thubuai tawh kisai inleng genle sak omlai dinga, ST demand tungtang, ILP leh issue tuamtuam tampi’n hon nawknawn dinga, state assembly i maituah lai ding uhi. A neizou liaite’n i tate mun thawveng zawdeuh ah lehkha i simsak mai hong ngai khong diam chih hon ngaihtuahsak hi. Neih-leh-neih louh genlou in tate’ khawsuahna ding gelna ziakin private school ah ikaisak a, huai leng hihbuai in omta a, i tenna state Manipur kichi tentak nawnlou leh kingakna tak hinawnlou khop in omta a, poi mahmah hi.
Leitung pumpi adia educational system hoihna penpen a kigen Finland gam ahi chi uhi. Finland gam a siamsinna tawh kisai in politician leh bureaucrat-te kigolh vetlou in sinsaktu (teacher) te’n naupangte lesson tuamtuam a theihma tan uh hilh ngetnget mai uh chih uhi. Naupangte’ theihtelna dinga ‘pedagogical methodology’ bawl uh a, sinlaite leh sinsaktute’ kalah ‘teaching-learning process’ hoihtaka om pen akal uh kizopna thupitak hi a, naupangte’ khawsuahna ding leng ahi hi. Tua chauh hilou in akigendanin, Finnish teacher peuhmah ‘five-year masters’ degree in education’ ahihding uh, research and classroom practice a specialise ahihding uh chih hilai hi.
Finland gamah i tate/tute va kaisak zouni chi ihi kei a, ei state tawh tehkak (compare) ihi a, denchiang in Manipur state hiai dan a hong paitouh zel leh tunung nu-le-pa ding, gamsung vaihawm ding khangthakte khahsuah khakding laulua hihang. Huchih lai in, sepna tuamtuam leh hoihpipi muthak, entrance test a lawhching, sepna apan kaisang chih leh siamsinna kong a thu kipahhuaite Newspaper tungtawna suahkhiak ahih chiangin kuapeuh adingin kipahhuai mahmah hi. Manipur state zaw hong buai toutou dingin kilang lai hi.
No comments:
Post a Comment