HEADLINES:
Pakistan sepaih leh helpawlte’n mi nautang tum(target) uh – BSF
PM Modi makaih in security dinmun genkhawm uh
 |
| https://images.kashmirobserver.in |
New Delhi, Nov-2: Prime Minister Narendra Modi makaihin New Delhi ah Indo-Pakistan gamgi jul venbitna (security) tawh kisai tuni’n ‘high level meeting’ om a, huai ah Union Home minister Rajnath Singh, Defence minister Manohar Parrikar leh National Security Advisor Ajit Doval tel uhi. Hibangkalah, thusuak kingahdanin BSF te’n a gendan un Pakistan sepaih leh helpawlte’n India mi nautangte tum (target) uh chi’n gen uhi.
Thusuak kizadan in Jammu & Kashmir state leh Pakistan gamgi (Indo-Pak border) area ah Pakistan sepaihte’n bomb leh galvan tuamtuam zang a India gam hong kapna uah, mi nautang (civilian) 8 a kaplup uh tawh kisai banah gamgi a security dinmun genkhawm uhi. Pakistan sepaihte’n a kaplup uh civilian site’ lakah numei 5 leng telkha a, mi 14 liam uhi. Tua kia hilou in bomb hattak zangin Jammu & Kashmir state sung kap uh a, tua ziakin gamgi bul a teng khua tamtak ah mi om ngam nawnlou in taikhia uhi.
Pakistan sepaihte leh India sepaihte’ kikap tuah touzel in huchih lai in Border Security Force (BSF) te’n a gendan un Pakistani sepaihte’n gamgi jul a om India mi nautang (civilian)te tungah zahngaihna neilou a gamtat khum tum uh a, ahunkhop leng si uhi. Jammu & Kashmir state a International Border munah Pakistan sepaihte’n galvan hoih taktak banah bomb hat taktak zangin civiliante’ omna kapzel uhi. Inspector General of BSF D K Upadhyay in Jammu a gendanin, BSF te’n Pakistani civilian area ah galvan a zatkhum ngeikei a, Pakistan-te’ hong kapna mun military bunker-te bel target in kinei chi hi. Ramgarh leh R S Pura area ah BSF te’n Pakistani bunkers 14 suksiat sakta uhi.
Information and Public Relation Day kizang
Imphal, Nov-2: Directorate of Information & Public Relations (DIPR) thusuak in a gendan in zan in Palace Gate Imphal a State Information Centre (SIC) ah Information and Public Relation Day 68 veina zatna banah Chief Minister O. Ibobi makaihna Manipur govt. in kum 15 sung a anasepkhiak tuamtuam lahna ni 5 sung om ding (Photo Exhibition) kithuah om a, Chief Guest K. Radhakumar Singh, IAS, Commissioner (Information & Public Relation) in hong in DIPR in documentary film a bawl “Chaokhat Khongthangda Manipur’ kichi leng hong hi.
K. Radhakumar, IAS, Commissioner in a thugenna ah DIPR nasepkhiakte manpha mahmah a, govt. nasepkhiak tuamtuamte mipi theisaktu ahih banah mipi akipan govt. in a theihtuakte theisaktu hi’n gen hi. Aman DIPR apuak sung a angaih poimawh pen ahihleh vanzat poimawhte bukimtak a koih banah semtu kidaih lou leng ngai poimawh in tulel a recruitment process zawh hun ah semtu leng kidaih deuh ta ding hi’n gen hi. Dept. ah semtu chitna hoihtak neite leh experience neite mah lak a poimawh thu gen a, DIPR a reporter-te nasep ding dan tangpi leng kawkmuh hi.
Huai hun a Functional President K. Meghachandra, Director, IPR in a thugenna ah DIPR structure leng specialized professional dept. hihsak poimawh thu gen a, mipite adia navakna hi thei ding in khaw teng leh inn teng ah a poimawhte theisaktu hih poimawh dan gen hi. Manipur ah community tuamtuam leh pau leh ham banah tawndan tuamtuam zangte teng khawm ahih dungzui in mipite lam dik a pi ding leh community tuamtuam kal a kituahna leh ki-itna omsaktu ding in DIPR in mipi lampi dik a kawk muh poimawh a sak thu gen hi. I & PR day zatna ah “Chaokhat Khongthangda Manipur” kichi DIPR in a bawlkhiak minute 55 sung daih documentary film leng etna om a. tua banah media professional-te akipan musical performance leng om hi.
LOCAL NEWS:
Jt Director in kaisang
Lamka, Nov 2: Upa Damsomthang Guite, tulel a Ministry of Defence, Armed Forces HQ a Deputy Director sem tuni in Joint Director in kaisang hi. Amah tulelin n EBCC Delhi ah Local Chairman leng ahi hi.
Chingmuan muh hi nailou
Lamka, Nov-2: Chingmuan (44) w/o Langlam Ngaihte of Singngat zan zinglam dak 10:00 velin dukan ah thil lei dinga kuan a omna theih ahihlouh ziakin Singngat V/A makaih in khawsung a om pawl tuamtuam leh mipi’n zong mahle uh tunitak tan in muh hilou hi. Tuni’n SYO GHQ makaite’n Bolero gari 2 in Singngat khua delhtou uh a, Nov 3, 2016 in mipi’n khawkim, khawkiang ban ah mun tuamtuam zong nawn ding uhi.
Seilenkap Haokip in Ph.D ngah
Lamka, Nov-2: Seilenkap Haokip s/o Lamlet Haokip & Mrs Hoinu Haokip of Chassad village, Ukhrul Dist. in tunaizek in NEHU, Shillong ah Doctor of Philosophy (Ph.D) ngah hi. Aman Prof. SC Srivastava, Deptt. of Rural Dev. and Agricultural Production (NEHU), Tura campus pina nuaio ah a thesis “Decentralization and Rural Development: A case study of Manipur” chih agelh tungtawn in Ph D. ngah hi.
ZDB annual social conference
Lamka, Nov-2: Zillai Delhi Block in Nov. 5, 2016 in Jawaharlal Nehru University, New Delhi a Convention Centre, Auditorium-1 ah vaipaw thak ding telna tawh kithuah annual social conference 2016 zang ding uh a, Chief host in N. Neihsial, IDAS Controller Gen. of Defence Accounts pang ding hi. Guests of honour in T. Manga Vaiphei, Minister PHED; Justice Tinlianthang Vaiphei, Chief Justice of Tripura High Court; Krishna Tyagi, ICAS Chief Controller of Accounts, M/o Power; Prof. Kim Vaiphei, PGIMER, Chandigarh leh June Rose Vaiphei, ex-Member, Manipur State Commission for Women pang ding uhi.
Awllen Guolnuom zatna kipan
Lamka, Nov-2: Joint Section YMA Chiengkawn Branch saina in zan zinglam in D. Phailian Play Ground ah Awllen Guolnuom/Guolsiek kipan a, Sholet, Chief of D. Phailian khuallian apang in hong hi. Huai ah Lalsawma Gangte, Guest of Honour in pang a, YMA Section-te leh Branch te’n football league match nei uhi.
Auto driver-te enchian nawn
Lamka, Nov-2: Diesel Auto driver khat in Oct 13, 2016 in student numei naupang 3 puakmang a sawm thu ah Police te’n kansui in CCpur Dist.Diesel Auto Owner’s Assn (CDDAOA). makaite tawh pangkhawm uh a, Diesel Auto driver-te a etchet (identified) nung un Diesel Auto line tuamtuam a taite enchian zel uhi. Tuni’n Bethel-Pangjol Diesel Auto Assn. makaite tawh Police Station ah Diesel Auto driver-te enchian nawn uhi. Police te’n khawpi sung line tuamtuam a tai Diesel Auto Assn. te Mata line leh Saikot line chihlouh enchian zouvek uh hi’n kigen hi. Numei naupang mi 3 puakmang sawm thu ah Police te’n FIR No. 50 (10) 2016 CCP-PS U/S 365 IPC registered uhi.
Youth Club-te hun zatpih
Lamka, Nov-2: Nehru Yuva Kendra (NYK)/CCpur makaih in Lamka TD block a om youth club te’n tuni’n Gangpimual community hall ah meeting nei uh a, NYK nuai a programme tuamtuam omte sepsuah ding dan genkhawm uhi. Huai hun ah NYK nuai a affiliated youth club leh NYK volunteer-te tel uh a, H. Doungel, Youth Co-ordinator in programme tuamtuam omte pulak hi. Aman Nov. 21 apan Rengkai, Muollum a vocational training institute ah ‘youth leadership training’ neih hiding a, fund omdan dungzui in block level tournament leh neighborhood youth parliament leng neih hiding chi hi. Youth club makai paikhawmte’n dotna tuamtuam a bawlte dawng kawm in NYK tungtawn a tuailaite suk-hat dingdan kikum uhi.
LPYF khawmpi 6veina om ding
Lamka, Nov-2: PCI (R) Lamka Presbytery in Nov. 4, 2016 in New Lamka Chimtung Veng a Olive PCI (R) biakinn ah Lamka Presbytery Youth Fellowship Khawmpi 6-veina om ding cheplawkna in zan leh tuni’n outdoor game tuamtuam kimawl uhi. Zan in Rayburn College campus ah Rev. G. Suanzalian, Co-ordinator (Institutions) in hongkhia a, volleyball leh throwball ah kidemna om a, tuni’n Ngathal ground ah football leh tug or war om hi. Huai ah biakinn tuamtuam 13 apan tuailaite paikhawm uhi.
Rashtriya Ekta Sapta zat hiding
Lamka, Nov-2: India gamsung pumpi ah Sardar Vallabhbhai Patel pianni Oct 31, 1875 theih gigena ding in “Rashtriya Ekta Sapta” kichi Oct 31- Nov. 6, 2016 sung kizang a, huai thu ah ZEO/CCpur saina in Nov. 5, 2016 zinglam dak 11:00 in Phungkhothang govt. H/S ah Dist. Level Painting Competition omding hi. Competition ahihleh category 2- Elementary Level (class I-VII) leh Secondary Level (class IX-X) hiding hi.
Mi 466 in Hearing Aid ngah ding
Lamka, Nov-2: Manipur Health Deptt. in Guinnes World Records ngahsawm in Nov 5, 2016 zinglam in Khumanlampak Main Stadium, Imphal ah ah Hearing Aid 6500 hawmkhiat sawm hi. Huai lak ah CCpur Dist. apan beneficiaries 466 telkhiak hi uh a, Nov. 4, 2016 in CMO office ah beneficiaries select teng slip tawi in ki-report ngai ding hi. Beneficiaries teng Dr. Jire Pudaite, Dist. Nodal Officer makaih in Nov. 5, 2016 zingsang dak 6:00 in Lamka apan Bus in kuankhe ding uhi. Hearing aid ngah ding a telkhiat-te Parbung CHC ah mi 80, Thanlon PHC ah 51, Henglep PHC ah 41, Singngat PHC ah 88, SaikotPHC ah 142 leh Songtal PHSC ah 64 hi uh a,amau te assessment camp apan telkhiat hi uhi.
Second hand puan kithang nawnta
Lamka, Nov-2: Phalbi khawvawt anainawn ta a, khawpi sung mun tuamtuam ah second hand puan/khekol kithang nawn panpan hi. Second hand puan zuak mi hunkhop in Dorcas Hall fencing kiang Tedim road zul ah zingbaihtak apan second hand zuak uh a, zinglam dak 8:00 velin avan zuak teng uh tawh inn lam zuanzel uhi.
SUUNNA:
Manzanem (75) m/o Thangkhanmuan of Bethel Veng, New Lamka tuzing dak 4:00 velin kumzawn in si a, sunnung in YPA hanmual, New Lamka ah kivui hi.
IMPHAL NEWS:
Union Home Minister kimuhpih
Imphal, Nov-2: Manipur Governor Dr. Najma A. Heptulla in zan in Union Home Minister Rajnath Singh mu hi’n thusuak in gen hi. Huai hun ah Governor in Manipur a law and order dinmun banah development tawh kisai thu tuamtuam theisak a, Centre in Manipur a sum leh pai banah haksatna tuamtuam omte ah leng Centre in ahi theitan a kithuahpihna tuamtuam a piak deih thu gen hi. Dr. Najma A. Heptulla in Manipur Governor ahih nung in Manipur tawh kisai Union Home Minister akimuhpih masakna hi’n kigen hi.
Nov 5 in school teng kikhak ding
Imphal, Nov-2: State govt. in Khuman Lampak Main Stadium ah Nov 5, 2016 in National Programme for Prevention and Control of Deafness (NPPCD) nuai a ‘Free Hearing Aids Distribution Camp’ ding tawh kisai in huai ni’n Manipur a school om teng suti ding in puang uhi. Manipur mun tuamtuam a students/beneficiaries-te lakah hearing aids hawmkhiak lemtangna ding deihna hi’n taklang uhi.
Councillor-te tungah mipi thangpai
Imphal, Nov-2: Sadar Hills thubuai tawh kisai in tulel a Congress govt. ziak in Sadar Hills ADC a Congress Councillor 20-te tungah mipi leh Civil Society orgn.-te thangpai uh a, akintheipen a full-fledged district dia Sadar Hills puangkhiak keileh Congress party a primary membership hihna apan Congress Councillor-te kitawp uh ngai ding a, Sadar Hills mipi leh CSO-te muhdahna a tuah ziak un tunitaklam in Kangpokpi a District Council Hall ah Sadar Hills ADC a Vice Chariman, banah Sadar Hills District Congress Comiittee (SHDCC) a President Thangjakam Misao makaihna a joint meeting om a, huai hun ah Haokholal Hangshing, Chairman, Sadar Hills ADC telin Congress Councillor teng in Congress govt. in hih ding a thuchiam a taksuah lou leh Congress govt. leh Sadar Hills a Congress Councillor te’n mipi muhdahna a tuah uh tawh kisai genkhawmna nei uhi. Huai hun ah Thangjakam Misao in Manipur govt. in full-fledged district a Sadar Hills puang ding July 2016 leh Sept 2016 in chiam uh a, huai nung Nov 1, 2016 in chiam nawn uh a, Sadar Hills mipi te’n Kut ni puangkhiak hiding in gingta mahleuh full-fledged district dia puankhiak louh ziak in Sadar Hills mipite kinepna beisak a, Congress govt. in a kintheipen a full-fledged district dia Sadar Hills a puang keileh Congress Councillor 20-te Congress a primary membership apan akitawp uh ngai ding chi’n taklang hi.
Headmaster in student khat sualluih
Imphal, Nov-2: Andro Police Station in a huamkhak Andro Khram Leikai a St. Joseph’s School a Headmaster Salam John @ Ibungo (45) of Andro Bazar, Imphal East in school hostel a om student numei kum chinglou khat sualluih hi’n gen uhi. Akigendan in John in St. Joseph’s School a Class VII sim student kum 12 vel kiangah thiltung gen khelou dia a vau ziak in hun bangtan hiam nung in student nu’n a pianna nu kiangah 3vei sualluihna tuak ahihdan a theihsak dungzui in CSO leh local club-te kaingah complain bawl uhi. Huai dungzui in Local club, Meira Paibi leh CSO te’n John mankhia in school huamsung ah public meeting nei uh a, huai hun ah khawsung apan John a damsung nawhkhiak ding in thupukna bawl uh a, huai nung in Andro Police Station ah pekhia uh hi’n kigen hi.
Van Rs. 30 lakh man ding kangtum
Imphal, Nov-2: Thangmeiband Hijam Dewan Leikai ah zan nitak dak 8:30 velin tenna inn tawh kithuah grocery dawr khat mei in kang a, huai ah van tuamtuam Rs. 30 lakh man ding kangtum mahleh si leh liam omlou a, meikang ahihleh shortcircuit akipan hidin veng mipite’n gen uhi. Nitak dak 9:12 velin fire brigade-te tung mahle uh tui neilou ua, huai banah bang hiam kham a neih ziak un mipi thangpaite’n a nasep uh ngaih sak lou chi’n fire brigade-te Jeep 1 suksiat sak uh a, veng mipite’n fire brigade-te emergency number leng pailou chi’n gen uhi. Akigendan in inn neitu Keisham Jaminikanta hi a, dawr luahtu Leitongbam Tomba in dawr sungah gold leh sum telin van tuamtuam Rs. 15 lakh man ding kang tum chi a, thiltung hun ah kuamah omlou hi’n leng gen uhi.
Huailou in Lilong ah zan nitak dak 6:00 velin lampi ah Maruti Van (MN06L-3601) tailai kuang phut a, huai gari ah tuangte liamna tuak omlou in pawtkhe thei uh a, fire brigade te’n meikuang phelhmit sawm mahle uh gari kang se vek man hi’n gen uhi.
Indo-Naga thubuai genveng hiding
Imphal, Nov-2: NSCN-IM a Ministry of Information and Publicity (MIP) thusuak in Indo-Naga thubuai tawh kisai March 2017 ma ngei a genveng hiding a, NSCN/GRPN a Mulatonu in India govt. tawh March 2017 tan a political talk nei dia bikhiah hidan a thusuah a bawl tawh kisai in March 2017 ma a Indo-Naga political talk a final solution a piang khin ding a, GPRN/NSCN tungtang dotna om khalou ding chi uhi. March 2017 bei tan in India govt. leh NSCN-IM in kilemna a bawl khit ding ziak un NSCN-IM om nawnlou ding a, India govt. in Kehoi Camper-te kiangah tamvei tak Indo-Naga Political thubai sukveng na dia solution 1 kia om ding ahihdan theisak uhi. Indo-Naga political talk pailel ah Naga mipite palai NSCN hi a, GPRN/NSCN cadre te’n a tawptan tungta uh chih akitheih ziak un NSCN ah GPRN/NSCN cadre tamtak lut uh chi’n taklang uhi.
TUNI THUPI:
“Suangphum lepkhitsa loungal suangphum dang kuamah in a lemthei kei uh a,huai suangphum zaw Jesu Christ ahi.” -1 Korinth 3:11
EDITORIAL:
NEC/DoNER phattuamna
India malsuah bial(North Eastern Region) ah Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura kigawm state 8 om a, centre ah party khatpeuh in vaihawmna len le uleng India malsuahbial mit-nauta bangin en veve uh a, Five Year leh Annual Plans ah Union Ministries leh Central Agency tuamtuam in Northeast bial ading fund bikhiah gige uhi. Tua ziak mahl ahi ding a, Meghalaya khawpi Shillong ah North-Eastern Council (NEC) headquarters om a, huchilou in Centre ah Department of North Eastern Region (DoNER) kichi leng om a, huai Minister khat in enkol hi. DoNER leh NEC pangkhawm in India malsuahbial phungvuh hi’n kilang a, ahih ziakin a sepsuahna (implement/execution) lamah state govt-te ah kingalian mahmah zel hi.
Centre government in Northeast bial puahna dingin Ministry teng akipan 10% zel sehtuam in ‘separate additional budget’ bawl hi a, ahi bangbang a developmental project tuamtuamte sepkhiak hileh bangzahta in igam khangtou ding hiam chih theih hi. Manipur singtangbial ah tuni tanpha in gari lut theihlouhna khua tampi omlai a, Tamenglong district ngial houh ‘most backward district’i chih in om hial hi. Damtheihna leh sianthouna lam(Health and Sanitation sector), siamsinna tawh kisai, kikawmna (road & communication) ahihkeileh power tawh kisai singtang ah tuni tanpha gen vuallouh khopin tuantual lai hi. Tua chauh kia hilou mobile network in a matlouhna khua aza asim mah omlai hi.
Mipil, misiam leh danthei mite’n hangsantakin Rights to Information (RTI) pansan a Manipur state government kiangah NEC/DoNER apan kum tengin project sepkhiak ding bangbang hongpai a, huai adin sum bangzah bikhiah a om hiam, huaite lakah bangteng kisemkhia hiam chih dotna abawl uh deihhuai hi. Northeast a state 8te puahna dingin ‘unlimited budget’ zaw chi ngam kei hang, sum crore a lakh asim hongpai ahihdan baihlam in theihtheih hi. Project tuamtuamte ginataka sepsuah hileh Northeast state-te’n central India, south India leh North India state-te bangin khantouhna a ngah uh lam-et huai hi.
Northeast biala state 8te India adingin state zawngkhal penpente hi uhi. Tua ziak mahin development nasepna tawh kisai Central funding ah a kipum ngak mai uhi. State hausa Gujarat in central apan huhna(funding) poimawh salou in amau kitoudelh zou uh a, huai tankia hilou in sum zat gaihlouh a val (surplus budget) tanpha nei gige uh chih ah hii. Huai pe’n a state govt hoih ziak leh lemgel siam ziak hidingin gintak-huai hi. Eilawi bel Centre apan 90% grant leh 10% loan ahihkeileh state share a 10% ahih lai aleng ginataka pezouloute ihi uhi. Huaiziak mah in innkuan tamtak in a ngaklah leh kipahpih mahmah uh Job Card (MGNREGS) bang leng state govt in a piak ding share bikhiah himahleh kum 1 sungin ni 100 tha kimu zou ngeilou hi. Official tuamtuam in bel hauhsakpih mahmah kha mawh kei unteh!
Non-Lapsable Central Pool of Resources (NLCPR) nuaiah i gam puahna dingin sum tamtak om hi. Tuni in NGO tuamtuamte bangleng kipat a, NEC/DoNER nuaia scheme tuamtuam omte state government tungtawn seselou a laklut dan theih poimawh mahmah ding hi’n kilang hi. Lamka khawpi in kimawlna (sports) tawh kisaiin stadium poimawh mahmah a, vangphat-huai takin tu in NEC in hong bawlsak a kipahhuai petmah hi. Tourism tawh kisai in leng Khuga Dam, Ngakik ahihkeileh farm tuamtuam omte puahphatna ding a panla thei om leh chihhuai mahmah a, khangthak (next generation) te khualna leng himai hi.
Khualzinmite’n i gam hong veh ua, lunglutna a neihna dingun i puahtheih ding uh thil tamtak om ding a, gam-awng hunkhop neilai i hihman in, tuamunte ah park piching deuh bang leng bawlkhiak hileh phatuam petmah ding hi. I gam in changkan lam manawh ahihmanin holiday hun a innkuan hiam lawm-le-vualte tawh kisuk halh theihna dingin mun thawveng leh kithuahkhawmna mun ding hoihtak hitheii ding hi. NEC/DoNER apan hamphatna atamthei pe’n laklut i sawm uh deihhuai hi.
No comments:
Post a Comment