United Naga Council UNC in tukha bul November 1, 2016 apan Manipur a hihna lampi nih national highway te hunchiam omlou a economic blockage abawl uh paitou zel in Manipur state sung ah Imphal tel a district tuamtuam ah nek leh tak ah mipi in haksatna tuak touzel in nek leh tak man hundang sang in napi tak in khang hi. Nek leh tak khang ziak in district mipi in haksatna a tuah uh toh kisai bang ah vanman khangthu toh kisai in tuni sunnung dak 3 vel in Lamka Traders and Self Employed Association (LATSEA) in lamka khopi sung a nek leh tak supply tu lian pen te toh Saulim Restaurant Tedim Road ah houlim khawmna nei uhi. Hiai hun ah nek leh tak supply tu lian pen te apan mahajon te tel ua, UNC in blockage abawl ziak a supply tute’n haksatna atuah te uh ban ah vanman khan dan toh kisai genkhawmna nei uhi.
\XXXX
Lunminthang Haokip IAS DC ban ah District election officer CCpur in tuni in election icon thak puanna leh order piakhiakna nei hi. Chief Election commission in ahihleh tutung State Assembly election 2017 ding toh kisai in kum 18 tunglam vote nei theichiang ten amau deihtelna a zalen tak a vote khiak theihna ding in program tuamtuam guan ua, huai lak ah Election Icon ding leng guan aom toh kiton in District election officer DEO CCpur in leng Election Icon ding in numei 4 guan in, tuni in Vualbanlou te lak a Election Icon ding in Churachandpur District Diabled Union CDDU a president T Sianmuanthang Election ding in guan nawn a, tuni in Election Icon order Lunminthang Haokip IAS DC ban ah District election officer DEO CCpur in Election Icon thak T Sianmuanthang kiang ah order piakkhiakna nei hi.
XXX
I
ndia Prime Minister Narendra Modi makaih India solkar in diklou tak a sum muhna black money hih bei sawm in pan naktak a la in, India sum 500 leh 1000 note a khawlsak zoh in, india gamsung a nitha loh a nasem government ahihleh private mimal a hita leh nitha a loh khiak sum te bank tungtawn a piak ding chih ziak in, Lunminthang Haokip IAS DC CCpur in mipi thei ding in bank account hong ding toh kisai in thusuah bawl hi. Huai dungzui in zingchiang November 29, 2016 sunma dak 10 apan in lamka khopi sung a bank 14 om teng in mun tuamtuam ah mipi in bank account honna theihna ding in Special Camps nei ding uhi. Special camp neihna mun ding te ahihleh State Bank of India SBI Churachandpur in mun 2, Zoar Veng, Bungmual leh Rengkai Venglai, State Bank of India SBI Tuibong in Khopi Veng, tuibong, State Bank of India SBI loktak HEPA in Loktak Bazar, State Bank of India SBI pearsonmun in pearsonmun, United Bank of India UBI CCpur in Kangvai Bazar, UCO Bank, CCppur in New lamka Rayburn college kiang ah, Vijaya bank ccpur in L Phainom Village, Canara Bank ccpur in chiengkonpang Bazar, CBI singngat in singngat bazar MRB ccpur in Gochinkhup veng, MSCB limited ccpur in hill town, HDFC bank ccpur in salem veng, ICICI bank ccpur in chingkham modern high school, zomi colony leh Axis bang ccpur in ccpur bus station ah nei ding ua, hiai hun ah bank account honna ding lai poimoh tuamtuam ban ah passport tawi in mahni bank account ding hon theih ding hi.
XX
India Prime Minister Narendra Modi makaih India solkar in diklou tak a sum muhna black money hih bei sawm in pan naktak a la in, India sum 500 leh 1000 note a khawlsak toh kiton in niteng in bank leh ATM booth ah sum la, koihlut, sum kheng chih te tatsat lou in niteng in phung hiai hi. Churachandpur Disrict ah leng ah Bank ah sum note thak 2000 hongtung toh kiton in bank leh ATM Booth ah sum la khia tam mahmah ziak in sun hongtung te hawm bei tawmtawm in om a, district sung a bank tamzaw ah sum hawm ding a bei toh kiton in tuni in imphal apat SBI CCpur ah sum Crore 5 hongtung nawn a, zingchiang in bank ah laktheih nawn ding hi. sum hongtung te tuni mah in SBI Tuibong, ICICI Bank, Canara Bank leh HDFC te ah SBI CCpur in pia khia ngal hi.
XXX
Manipur solkar in Manipur gansung district nih jeribam leh sadar hill district picing a puan ding deihlouna ziak a ni 20 val paita apan in United Naga Council UNC in MANIPUR hinna lampi nihte ah hun chiam omlou a economic blockage apuan uh toh kiton in state sung ah nek leh tak ban ah thautui ah mipi ten haksatna tuak uhi. UNC in economic blockage abawl uh khuah hiaihiai in tawplam manohlou ding abat ziak in Manipur solkar in pan leng mipi te khualna pan naktak a la in, Highway nih atang nek leh tak, van tuamtuam ban ah thautui leh gas paw gari te sepaih te vengbitna khuahtak nuai ah gari bangzah hiam Imphal tut aom toh kiton in, tuni in churachandpur district a pump nih Suaknun & Son’s Oil Pump leh New Lamka Oil Pump ah economic blockage omnung adia anihveina ding in petrol leh diesel hawm in om nawn hi. Hiai hun ah thautui la ding mi tam mahmah a, Petrol litre ah 64.02 leh Diesel 53.24 in pai ua, petrol zang gari pei nihnei two wheel te Rs. 300 man leh peili nei four wheel te Rs. 1000 man pia ua, Diesel zang gari te ahihleh gari lai dungzui in pia ua, atam pen in diesel zang gari lian te’n Litre 40 tan la thei uhi. Oil pump ah sum note lui 500 leh 1000 te Petrol leh Diesel lakna ding in zat theih hi.
XXXX
State government in Sandoh sub division a bawl khiak toh kiton in sub division thak sung ah Singngat sub division aom khua khenkhat a telkhak ziak in hiai khua a hausa leh UZ GHQ in sub division thak a tel khua 16 ten tuni in lampi zui in DC office ah Singngat sub division sung aom khua te amau omna sa sub division sung ah omsak ding deihna in DC office kiang ah memorandum piakna nei uhi. Hiai hun a tel ding te sunma dak 10 in Zogal Hall, Zoveng ah kingak khawm in huai apat in tedim road tawm in DC office tan lampi zuihna nei ua, DC office ah UZO GHQ a president chinlunthang zou in memorandum sim khiakna nei in lunminthang haokip DC CCpur khut ah pia khia hi. Singngat sub division sung a khua suangdoh sub division aom kha khua te ahihleh Buhsau, P Suahzahau, Molbungjang, Hangsum, pakmual, mongken, allusingtam, zabellei, behiang, mualjin, suangphu, tuimanjang, maukot tonglon leh hiangmaul te ahi. suangdoh sub division ahihleh K. Radhakumar Commissioner Revenue government of Manipur in apaisa November 23, 2016 ni a order asuah hi a, sub division thak sung ah khua 27 ban ah khua khat sung a khoneu nounou 10 om hi. Tuni a memorandum piakna hun ah Singngat MDC leh Muallum MDC ten leng press leh media ah mipi te theih ding in thugenna nei uhi.
XX
Apaisa November 23,2 016 a khua 27 leh hamlet 10 huap a Suandoh Sub-Division ding a gazattee order suak in SIngngat Sub-Division huap sung a om khua tamtak a telkhak lungkimlouh latsakna in tunin Zou kho hausa tamtak leh Zou nam sung a mipi bangzah hiam ten lampi zui in DC kiang ah memorandum pia uhi. Tuni a lampi zuihna ah, Chinlunthang, President UZO/GHQ ban ah, Singngat MDC leh Muallum MDC te ban ah, kho hausa tamkhoptak tel uhi. Memorandum in a taklat dan in, hiai bang a, Singngat Sub-Division huap sung a om kho tamtak, Suangdoh Sub-division in a huap khak pen maksa uh hidan in taklang ua, hiai khua te Suangdoh Sub-Division sung apan lakhe thak ding in ngetnna bawl uhi. Lai in a taklatzel dan in, Singngat Sub-Division huap sung aom khua, Buhsau, P.Suahzahau, Tonglon, Vokbual, Hiangmual, Molbungjang, Hangsum, Pakmual, Mongken, Allusingtam, Zabellei, Behiang, Suangphuh, Mualzin, Tuimajang, leh Maukot te SIngngat Sub-Division sung a om hi ua, ban ah, Pakmual, Hangsum, Suangphuh leh Behiang te 24-Singngat Autonomous District Council Counstituency in a huap ban ah, Buhsau, Zabellei leh Molbungjang te 23-Muallum Autonomous District Constituency, in huap a, Mongken, Maukot, Mualzin, Tuimajang, P. Suahzahau, Tonglon, Vokbual leh Hiangmual te 11-Lungthul Autonomous District Constituency in huap a, amau te Suangdoh Sub-Divisional Headquarter a tun na ding ua Singngat Sub-Division a tot uh ngai ahihna ah, hiai in vaihawmna lam ah haksatna a tut ding ban ah, kikawmtuahna lam a leng lemtanlouhna tamtak om hi in taklang uhi. Hiai bang a Singnat Sub Division sung aom khua taklat a om ten, haksatna tampitak tuak ding ahihna uah, amau te, tua aom na uh, Suangdoh Sub-Division apan lakhe thak ding a review bawl ding leh, a om na lui uh, Singngat Sub-Division sungmah a koih ding in ngetna leng bawl ngal uhi.
Xxxxx
Apaisa November 19, 2016 in dr. BR Ambedkar Stadium, New Delhi ah 10th North East Tamchin Football Tournament kipan paitouzel in tunin Quarter Final Match nih neih in om hi. Hiai tournament ah team 16 kihel a, tuni a quarter final match masa zinglam dak 11:00 in Ukhrul United FC leh Zeliangrong FC te kimawl in Ukhurl FC in 5-2 a zou in Semi-final kai uhi. Quarter final match 2na tuni sunnung dak 2:00 in SSPP FC leh Hornbill United FC te kimawl in, Hornbill united FC in 1-0 a zou in semi lut uhi. Zingchiang in leng quarter final neih sutzop hi ding a, match masa leh quarter final match 3na, zinglam dak 11:00 in Hmar FC leh Muvanlai Athletics FC te kimawl in a zou zou toh Semi-final ah Ukhrul United FC te ki sutuah ding ua, Quarter Final match 4na ah ASUD TODO elh Exodus FC te kimawl ina zou zou in hornbill united FC te maituah ding uhi. Semi-final ahihelh November 30, 2016 zinglam dak 11:00 leh sunnung dak 2:00 in neih hi ding a, Final ahihelh December 2, 2016 in om ding hi. SSPP FC in tuni a Quarter final ah akhiak uh toh kiton SSPP GHQ in SSPP FC a dinga a sun a zaan chih omlou a, sum-le-paai, tha-le-zung tamtak seng a, munchih mual chih a om mimal hiin pawl tuamtuam panlak kha tute tengteng tungah kipahthu puang in, hiai tan tuntheihna dia makaih biak Pathian hing leh siangthou Thupina, Pahtawina tengteng pai uh ahihdan SSPP GHQ in gen hi.
Xxxxx
District Hospital CME Hall, ccpur ah 2-days training programme on rational use of blood kichi District Hospital saina in tuni in kipan hi. Tunin district hospital a doctor te tel in CMO leh Medical suoerintendent ten opening speech dan in thugenna nei uhi. Training hun ah, Ratuonal use of Blood chih thupi zang in Dr. Dorendra Singh (IHBT Specialist, Dist. Hospital Thoubal) in sinsak a, Importance of voluntary blood donation & prevalencr of TTI at Dist. Hospital Ccpur Blood Bank, "Adversr effect of Blood transfusion" "Massive bloof transfusion in bleeding patient" leh "irregularities antibody screen for oregnant women and multiple blood transfused patient" chih thupi te pansan in Dr. Pauluamg Vaiphei (Senior MO), Dr. Vijayanta Kshetrimayum, esoecially for Obs/Gynae spwcialist & Medical Officer) leh Dr. Memtombi Kh (IHBT Specialist JNIMS) ten sinsak uhi. Zingchiang in PHC tuamtuam a M/O incharge ten nei nawn ding ua, tuni a resource person te mah in sinsak nawn ding uhi. 2-days training programme on rational use of blood ahihleh National Health Mission sponsor na nuai a District Hospital in asai ahi hi.
Xxxxx
Hong tung ding November 30, 2016 zingkal dak 7:00 apan sun dak 12:00 tan AB Cable kaih ding ziak in IB Feeder ah mei pai lou ding hi. A concern department lam apan thu kimu dan in, huai hunsung teng IB Feeder in mei a piak khak, Tuibuang, Bijang, AIR, DM Veng, B. Vengnom, Bijang, Sielmat, Zomi Colony, Zellang Veng, District Headquarter Tuibuang, District Hospital, Lamka Community Hall, Chiengkon, CCPur College, 7 Assam Rifles, Salem Veng, Cetral Lamka leh IB Feeder in a piak khaak na teng ah mei pailou ding a, nnasep zoh baih leh zoh hak a zil a mei mit hun ding kheng theih hidan in taklang uhi.
Xxxxx
Hongtung ding November 30, 2016 sunmung dak 1:00 in DC office ah National Health Mission nuai a District Level Committee on Adolescent Health ten 1st conversent meeting nei ding uhi. Meeting hun ah District Level Committee for Adolescent Health (DCAH) a member Chief Executive Officer (ADCC), Zonal Education 0fficer(ZEO), District Program Officer (lCDS), District Program Manager (NHM), District Nodal Officer (RKSK) te kimtak in tel ngai ding a, Medical Superintendent, District Hospital, District Family Welfare Officer, District Programe Management Unit Staffs leh District Adolescence Program Manager te special invitees dan in pang ding uhi.
Xxxxx
Simte Inn, Simveng ah zan nitaklam in Simte sung a organisation tuamtuam te’n Simte Officer mi 5 te kipahpihna nei in annkuang umpih uhi. Amaute T. Kammuanlal Simte, MCS, i/c ADC/Bishnupur & PD/DRDA, Bishnupur & CEO, Bishnupur; Dr. Kimngaihching Simte @ Dr Kim Simte, CMO/CCpur; T. Mangkhothang, Lt Col, BSF, Lamminlal, MCS, SDO/BDO Thanlon leh T. Goukhomang, ZEO/CCpur hi ua, hiai hunah simte sunga pawlpi omte banah makai tuamtuam paikhawm uhi. Huai hun ah mi kiphal 11 in tuikhia om hun a zatding tube a donate uh L. Dongchinthang, President SYO GHQ in Upa Laldawnlien Varte, President, HYA GHQ khut ah pekhia hi. Huaiban ah June 10, 2016 a Ngurte khawkianga Tuitha lui ah (late) T. Kamchinkhup (25) s/o Laltuakmawi of V. Munhoih, New Lamka luang lakhetu Zarzosang of Saikot kiang ah President SYO GHQ in Simte Puan Laisan silhsak hi.
xx
Ahong tung ding 30 November 2016 zingkal dak 7:00 apan sun dak 12:00 tan AB Cable kaih ding ziak in IB Feeder shutdown kila hi. Tua hun sung teng IB Feeder in mei a piak khak na teng ah mei pailou ding. Nasep zohbaih leh zoh hak dungzui in shutdown hun kipia ki kheng thei ahi. Areas/locality/transformers to be affected (Town Area): Tuibuang, Bijang, Doordarshan, AIR, Munsif Court, DM Veng, B. Vengnom, Bijang, Sielmat, Zomi Colony, Zellang Veng, District Headquarter, District Hospital, Community Hall, Chiengkon, CCPur College, Microwave Tower, 7 Assam Rifles, Salem Veng, Cetral Lamka, ban ah veng dang anuam khak teng hi Dan in thu suak in tak lang hi.
Xxx
No comments:
Post a Comment