Manipur Express | December 1, 2016

Rs. 2000 lakhe di’n mi tamkhop in dakkal 10val ngaksek uh

Manipur ah zingchiang in Rs. 500 leh Rs. 2000 note Rs. 270 Crore hongtung ding

Lamka, Nov-29: Prime Minister in ‘Demonetisation’ minvuah a Rs.500 leh Rs.1000 note asihsak nung in Lamka khawpi ah leng sum poimawh tamtakte buai uh a, Banking office hour kipat hun a sum la masa thei di’n nitak zankim dak 12:00 vel apan SBI Ccpur Branch ah meiphu tawi kawm in mi tamkhop om khinta uh chihthu kiza hi. SBI official-te apan thutut kingahdan in, Guwahati apan RBI te’n zingchiang (Dec 1)  in Manipur ah Rs.270 crore vel hon thon ding uh a, huaite lakah Rs.500 note Rs.10 crore vel telkha ding a, adangte Rs.2000 ngen ahihding banah Rs.100 note telkhalou ding hi. Imphal hongtunni zingchiang (Dec 2) in Ccpur district ading piakkhiak hiding a, Ccpur in a ngah ding zah theihchet hinaikei mahleh, tamkhop tangkha dia gintak ahihziakin mipite haksatna azia omdeuh ding hi’n kigen hi. 

Manipur ah SBI Branch 40 telin Bank Branch 185 om a, huaite’n ATM Booth 299 nei mahle uh RBI in Manipur mipi poimawh zah apiakkhiak zawhlouh ziakin ATM tamzawte ah sum koih ding omlou hi. Lamka ah leng ATM a sum lakkhiak ding om nawnlouh ziakin SBI Ccpur Branch ah nitak zankim apan mipi kivual uh a, zinglam dak 10:00 tan in SBI Ccpur Branch leh Nehru Marg junction kikalah customer-te kivualdim uhi.

RBI in bank apan sum lakkhiak theih ding zah tuni’n khek thak nawn a, nikhat in ATM apan Rs.2500 lakkhiak theih ding a, cash counter apan mahni branch ah nipikal khat in Rs.24,000 lakkhiak theih di’n thupuan bawl hi. SBI Ccpur Branch ah tuni’n cash counter apan Rs.2000 lel piak in om a, sum kidaihlouh ziakin customer-te tankim theih dia tuabang panlakna bawl uh ahihdan Pauneihthang Valte, Chief Manager in gen a, customer-te haksatna ngaikhawk mahle uh sum omlouh ziakin bank staff-te’n sep theih neilou uh chi hi. Central govt. apan thupiak dungzui in Bank tuamtuam te’n khawpi sunga Special Camp nei in temporary counter hong uh a, account nei nailoute kiangah zero balance a A/C honsak in, tukal sung sunzom ding uh a, document poimawh teng tawikim in account honsak theih ding chihthu kiza hi.

November 8 zankim apan sum note nihte sihsak nung, tunitan in gamsunga Bank tuamtuam ah Rs. 8,11,000 crore val deposit in om a, huaite lakah Rs.500 leh Rs.1000 note kigawm Rs.14 lakh crore vel omkha hi. Huai hunsung mah in  bank te’n cash counter ah Rs.33,000 crore vel kheksak(exchange) uh a, huaite lakah Rs.500 leh Rs.1000 note Rs.2,00,000 crore val telkha hi.

HEADLINES:

Demonetisation leh Nagrota attack ziakin Parliament buainawn

Union Cabinet in PoK galtaite huhna di’n Rs 2,000 crore pomsak

New Delhi, Nov-30: Pakistan occupied Kashmir (PoK) a bawlsiatna thuak zoulou a India honglut-te huhna di’n Union Cabinet in tuni’n Rs 2,000 crore pomsak a, galtai innkuan 36,384-te’n ‘development package’ hamphatpih ding uhi. Tuni a Cabinet thupukna pen Jammu & Kashmir tundingna dia ‘Prime Minister’ Development Package’ puankhiak nung adia thupipen hi’n kigen a, innkuan khat in Rs. 5.5 lakhs vel ngah zou ding uh chihthu om hi. Parliament Winter Session pailel tuni’n Opposition pawlin Demonetisation leh Nagrota attack ziaka govt. mawhsa in Lok Sabha leh Rajya Sabha ah kiphin uh a, hun sawtlou Discussion om nung in innpi nihte khak hinawn hi.

Official thusuakin agendan in, PoK ah Pakistan army leh Pakistan rangers kithuah te’n nam tawmzawte gelgawt uh a, bawlsiatna thuak zoulou tamtakte India a galtai in khawsa uhi. Amaute kianga huhna piak a om dingte state government  in enkai ding a, hamphatna ngah thei dingte kiangah Direct Benefit Transfer (DBT) zanga piakkhiak hiding hi. Tuni a Union Cabinet in thupukna dang abawlte lakah ‘Visa liberalization, simplification & rationalization’ leng telkha a, khualzinna (tourism), sumdawnna (business) leh damlouhna tawh kisai a India hongzin nuam-te’n baihlamtakin Visa ngah thei ding uhi. Visa tungtang thupukna om-te’n economic growth bawlhoih ding a, Skill India, Digital India, Make in India leh flagship programme tuamtuamte leng lawhchingsak ding hi’n kigen hi. Assam, Bihar, Himachal Pradesh, Jharkhand, Maharashtra, Madhya Pradesh, Jammu and Kashmir leh Uttarakhand  apan Other Backward Class (OBC) dia guanglut a omte leng Union Cabinet in lemsakna pia a, amaute adi’n Central Govt. Service leh Central Education Institution ah policy omsa dungzui in reservation piak hita ding hi. Rights of Persons with Disabilities Bill, 2014 (Amendment) leng Cabinet in pomsak a, Persons with Disabilities (Equal opportunities, Protection of Rights and Full Participation) Act, 1995 kichi Parliament Winter Session sunga paisuak sak ding in recommend uhi.

Parliament Session ah tuni’n Demonetisation leh Nagrota attack tungtang genkhawm in om a, Opposition pawlin huai tawh kisai Debate omsak ngetna abawlte uh pomsak ahihlouh ziakin buaina piang hi. Tuni adia Lok Sabha hun beisak ahihma in nihvei khawlsak hi a, Rajya Sabha ah leng final adjournment om ma in 2vei khawlsak in om hi. Lok Sabha ah tuni sunnung lam a session kipat hun in, Congress apan Mallikarjun Kharge in voting neih ding deih ahihdan gen a, voting omtheihna dia rule kibawlte pansan in discussion leh debate omsak poimawh chi hi. Biju Janata Dal apan Bhartruhari Mahatab inleng, Demonetisation tungtanga gamsung mipi haksatna genkhawm poimawh chi a, amaute ngetna tawh kisai Finance Minister Arun Jaitely in dawnna pia in, discussion nei dia government kiman mahmah ahihdan taklang kawm in hilhchetna bawl hi. Parliamentary Affairs Minister, Ananth Kumar in Finance Minister thugen kupbeh in, voting om masalou a discussion neih poimawh zaw ahi chi a, black money doudal di’n Parliament member-te pangkhawm thei mahle uh, opposition pawlkhat in thubuai tuamtuam suanlam in Parliament Winter Session peibuai denlai uh chi hi. 

Rajya Sabha a innpi tutkhawm nihveina ah Opposition leader Ghulam Nabi Azad in Nagrota terror attack mawhpaih ahihdan gen a, Indian Jawan-te sihna tungtang Defence Minister in gamsung mipi theih dia hilhchetna apiak ding ahi chi hi. Huai tawh kisai Mukhtar Abbas Naqvi, Minister of State for Parliamentary Affairs in dawnna pia a, helpawlte zonkhiakna di’n Army leh Jammu & Kashmir state police te’n combing operation bawl uh ahihdan gen a, terror attack om chiang in Opposition pawlin Govt. mawhsakna kampau aneihte uh thil zumhuai mahmah ahi chi hi. Samajwadi Party apan Ram Gopal Yadav in, Demonetisation ziaka misite galna di’n siluang khat tungah Rs. 10 lakhs pe di’n Govt. ngen a, central govt. in mipi hihbuai mahleh, buaina thuakte panpih ding ngaihtuahlou hi’n ngawh hi. Minister nihte’n hilhchetna apiak uh Opposition member-te lungkimlou in kiphin uh a, buaina sousangtak om ziakin Deputy Chairman Prof. P J Kurien in tuni adi’n Rajya Sabha khak hi.

TUALSUNG:

Shutdown om nawn ding

Lamka, Nov-30: 132/33/11-KV Khengjang Power house apan 132/33/11-KV  Thanlon Power Sub-station (under construction) mei piakna ding 132-KV line kaih ding ziak in Dec. 1 & 2, 2016 zingkal dak 7:00 apan nitaklam dak 4:00 tan Singngat 11-KV feeder shutdown Electricity Deptt/CCpur te’n la uhi. Huai hun sung Singngat feeder in eletric mei a piak khakna teng ah mei pailou ding a, nasep zawhbaih leh zawhhak dungzui in shutdown hunsung ki kheng thei hi. Singngat feeder in mei a piakna veng/khua/transformer te: Tuithapi, Peace Ground , Laizon Veng, Zion Veng, Kamdou Veng, Hmar Veng, Circuit House, Zouveng, New Zouveng, Zoumunnuam, Police Station, Zenhang Lamka PCI Colony, Peace Lane, Nehru Marg, Apollo Veng, Beaulahlane, Khumujamba, Bible Hill, Rengkai, Neihsial Veng, Muolvaiphei to Dailzang (along Sugnu road) hiding hi. Singngat 11-KV feeder ahihleh Singngat khua mei piakna hilou in khawpi sung (Eastern side) mei piakna hizaw hi’n Electricity Deptt/MSPDCL/CCpur Divn. apan kiza hi.

MLA 2-te etsan  lakkhiat hilou

YPA GHQ makaih block leh unit te’n genkhawm

Lamka, Nov-30: Manipur govt. in bill 3 a passed tawh kisai a tribal MLA leh MP-te pawl JAC-AATB telin pawl tuamtuam in public boycott puankhum uh a, huchihlai in YPA GHQ inleng MLA 2 – Phungzathang Tonsing leh Vungzagin Valte etsan puankhum uhi. Huai tawh kisai enthak dia CEC, YPA GHQ in ngetna abawl dungzui in YPA GHQ makaih in Hiangtam Lamka a YPA GHQ hall ah CEC leh Advisory board-te telin New Lamka, Imphal leh Singngat block leh unit tuamtuam a makaite tawh genkhawm uh a, member 344 paikhawm uhi.

Hiai hun in Lianmuanthang Valte, Secy meeting neih ziak leh MLA 2-te tungtang a thupukna tuamtuam a lakte uh simkhia  hi. Aman singtangmite susethei ding Bill 3-te gum a suai akaih ziak uh leh mi-leh-sate azuak ziakun YPA GHQ in Oct. 8, 2015 a block leh unit teng tawh genkhawm in hunchiam omlou din ‘etsan’ puankhum uh ahihdan gen hi. 

Etsan a om MLA 2 te’n Sept. 2016 in enthak din ngetna bawl mahle uh YPA GHQ Executive leh CEC Member te’n kisikna leh ngaihdam ngetna tellou ahihna ah omzia neilou chi in nawlkhinsak a, bill 3-te tawh kisai thukichian om masiah banah tribal martyr 9-te luang vuikhiak ahihma a tungthu ngaihtuah hilou din thusuah bawl uhi.  

Nov. 14, 2016 in MLA 2 te’n ngetna bawl nawn uh a, YPA GHQ in block leh unit makaite tawh genkhawm pha asak ziakin makai tuamtuamte tawh genkhawm in om hi. Block leh unit tuamtuam apan makai paikhawm registration bawl mi 344 lak ah 328 te’n secret ballot tungtawn in vote khia uh a, huai ah etsan lakkhiat leh zukkik hoihsa mi 157 om in, hoihsalou leh YPA GHQ thupukna omsa paisuakpih deih mi 168 om a, invalid vote 3 om hi. Member tamzawte deihna bangin MLA 2 -Phungzathang Tonsing leh Vungzagin Valte tunga YPA GHQ in etsan apuan lakkhiat leh zukkik hilou in ngeina bangin paipih hiding in YPA GHQ makaite’n gen uhi.

SSPP GHQ-te zodawn ah

Lamka, Nov-30: Lianzapau Samte, President, SSPP GHQ makaih executive member-te kum nawn a SSPP Platinum Jubilee lop ding tawh kisai (aban pek 2na ah)

SSPP GHQ-te zodawn ah tangkoupih kawm in Singngat leh Suangdoh Sub-Division huapsung a school tuamtuamte annual programme uap din tuzing in zinkhia uh a, amau Pastor H. Ginkhochin, Local Pastor, EBCC/Bethany in Bungmual a SSPP Complex ah thumsak in Ginsianlal, Advocate in flag-off hi.

SSPP makaite ahihleh zodawn leh phaijang a siamsinna puahthak leh tung din nawn ding tupna apatkhiak uh ‘Siamsin Education Initiative- an initiative of Siamsinpawlpi’ sepsuahna leh a etkai school tuamtuamte tawh kithuahkhawm dia zin uh hidan in kigen hi.

SSPP maite’n Manipur State Legal Services Authority leh Dist. Legal Services Authority tawh kithuah in zodawn legal awareness leng nei ding uh a, Advocate M. Vumlianmang Paite, LLB in dan tawh kisai a theihtuak omte sinsak ding hi.

Peace Ground gei ah inn 2 kangtum

Lamka, Nov-30: Peace Ground, Tuibuong kiang a Zion Veng ah tuni nitaklam dak 4:30 velin Mrs  Bina Moirangthem leh Mr Robert Moirangthem te inn mei in kangtum hi. Inn katlai in aneitute kuamah omlou ua, meikuang muhtheih ahih in innkim leh kiangte banah Fire Brigade ten delh in meikuang phelhmit sawm mahle uh phelhmit zoulou in kangtum  hi. Innsung apan bangmah lakkhiat man hilou in kangtum vek a, inntung bel bi (thatch) hi’n kigen hi. Inn bel Ngamkhomang Haokip’ inn hi’n kigen a, a tenna inn uh kat ziakin  huai kim a om L.Tomba’ inn ah omphot uhi. 

        Inn neite’n agendan un meikuang koi akipan hiam chih thei tuanlou uh a, electric akipan hiding in gintakthu gen uhi. Hiai tawh kisai in  "Northeast FoodBanking Network" a Founder leh Director Khanlianlal @ Khams Zotal makaih in emergency in nekding antang bag khat pia uhi.

DC makaih in Nodal Officer-te meeting

Lamka, Nov-30: Dist. Election Officer Lunminthang Haokip, IAS DC/CCpur makaih in tuni sunnung in DC Office a BRGF Resources Centre ah 11th Manipur State Assembly election om ding tawh kisai in Nodal Officer dia guan a omte’n special election review meeting nei uh a, huai ah Soiminlian Lengen, MCS & Chairman SVEEP Core Committee leh S. Thienlaljoy Gangte, MCS AC to DC & RO telin Nodal Officer mi 16 lak ah Lamkhosiam Khongsai, DTO/ Transport Management, Michael Ginzasuan, DSO/Transport Management, T. Goukhomang, Polling Personnel Welfare, Joyce Lalrinpui, Material Management, Lalthazam, SMS Monitoring & Communication Plan, Lalthanzan, Manpower Management,  Khampu Hatzaw, Gen. Manager/MSPDCL leh Sangremsiama, EVM Management kihel uh a, tunitan panlak dan DEO kiang ah report pia uh a, maban a sepsuah ding tuamtuam omte genkhawm uhi.

CRPF-te kisuankhia

Lamka, Nov-30: Bill 3 ziaka August 31, 2015 apan Lamka ah buaina thupitak piang a, Lamka Police Station a duty 87 Bn. CRPF te leh Tuibuong a District Council Office a duty 143 Bn. CRPF te tuni apan kinawnkhia uh a, NH a Economic Blockade omna mun ah duty ding uh hi’n kigen hi. Churchandpur District ah buaina om nawn hunhun in CRPF te hong pai nawn ding uh hi’n kigen hi.

Helmet khuloute liausak

Lamka, Nov-30: Traffic Police te’n tuni’n Police Station mai, Tedim road ah 2-wheeler gari ataituahte drive nei nawn uh a, helmet khulou leh gari’ document tawilou mi 27 mankhia uhi. Mi 27 te TR 5 receipt cut in mi 1 ah Rs.100/- liausak uh a, apoimawh bangzel in drive nei zel ding uh hi’n kigen hi.

RBSK tawh kisai in meeting nei

Lamka, Nov-30: Lunminthang Haokip, IAS DC/CCpur makaih tuni’n BRGF Resource Centre ah District Level RBSK Convergence Committee te’n meeting nei uh a, CMO/CCpur, Medical Supdt., Dist. Programme Manager banah Imphal apan Dr. Ibemcha Hemam, State Nodal Officer, Tarshi Elangbam, State Consultant, RBSK leh Philazan Sangh, Consultant, RKSK telin line deptt., tuamtuam a mawhpuakna neite kihel uhi. 

Philazan Sangh in naupang kum 10-19 kikalte adia flagship programme omlouh ziakin kum tamtak ngaihsaklouh in ana om uh chi a, centre govt. in awlmawh in RBSK kichi apatkhiak hi’n gen hi. Hiai programme sepsuahna din health deptt., kia lou  education leh ICDS inleng mawhpuakna liantak neikha hi’n gen hi.  Dr. J. Son Goukham Samte, MS/Dist. hospital in RSBK sepsuahna din 2015 in Adolescence Clinic honkhiak in om a, clinic tungtawn in tutan in ki-ensak tuailai  2438 omta in, amaute kiang ah Iron Folic Acid leh Albednezol damdawi athawn a piak  hi’n gen hi.

AWTU in pawl tuamtuam thusuah gupthu puang

Lamka, Nov-30: All Tribal Women Union (ATWU) pawl in tuni a thusuah abawlna ua,  Nov. 11, 2016 ni a meeting aneih hun ua thupukna alak dungzui un pawl tuamtuam in tribal MLA leh MP-te tunga boycott apuan uh naktak a gum uh hi’n taklang uh a, kum nawn election leng siangthou leh diktat taka nei dia thupuan bawlte nungthuap ding uh hidan in taklang uhi. 

Sep. 3, 2015 in All Tribal Students’ Union of Manipur (ATSUM) in Bill 3-te deihlouh etsakna in singtangmi MLA-te adinmun uapan a kitawp masiah uh singtanggam lut theilou dingin kham uh a, Sept. 12, 2015 in JAC-AATB inleng MLA 16-te adinmun uapan a kitawp utlouh ziakun public boycott apuankhum ban uah Oct. 8, 2015 in Young Paite Association (YPA) GHQ inleng mi leh sa’te ki theihmawh bawl mipi palai-te YPA kivaipuakna Danbu pansan in thuthak om masiah etsan a puangkhum ban uah, July 18, 2016 in Outer Manipur Tribals' Forum (OMTF) and JAC-AATB te’n joint meeting nei in singtangmi MLA leh MP-te public boycott puankhum pomkip in, singtang gam ah activities aneih ding uh kham bikbek uhi. 

Huchikal ah, CCpur Dist. Goodwill Council, Tribal Youth Council Manipur, Hmar Students’ Association, Kuki Inpi Manipur (Haipi Declaration, July 26-29, 2016), Evangelical Baptist Convention, Zomi Council, All Manipur Christian Organization, Manipur Baptist Convention leh Election Commission of India te’n  diktat leh siangthoutak a election neih dia thupuan abawl uh ATWU inleng naktak a gum in nungthuap ding uh hidan in taklang uhi.

Spot painting competition om

Lamka, Nov-30: Dec. 1, 2016  World Health Orgn (WHO) in World AIDS Day a bikhiah dungzui in huai zatna dan in CMO Conference hall ah Dist. AIDS Prevention & Control Unit, CCpur (DAPCU) saina in ‘Hands up for HIV Positive’ thu zangin spot painting competition om a, huai ah targeted intervention NGO-te apan mi 5 tel uhi. DAPCU makaih in Dec. 1 in CMO Conference Hall ah WAD zat hiding hi. Huai banah  CCpur Royal Riders te’n hiai tawh kizawi tawn in rally nei in, Kangvai apan Mata tan lampi zui ding uh hi’n kigen hi.

CMO kipahpihna nei

Lamka, Nov-30: Churachandpur District Disabled Union (CDDU) makai te’n tuni’n Dr. Kimngaihching @ Dr Kim Simte, CMO/CCpur kipahpihna, singpi dawnkhawmna leh houlimpihna nei uhi. Dr. Kim Simte, CMO/CCpur bel  District Medical Board (Disability) a Chairperson leng ahihman in ama’ tungtawna Persons with Disabilities (PwDs) te'n Disability field ah atankhak ding ua kilawm hamphatna tuamtuam- Disability Certificates, etc. ahiding bangtaka  angah ding uh lamet thu CDDU makai te’n CMO kiang ah genpih uhi. CMO inleng CDDU member te’n govt. apan hamphatna tuamtuam angah theihna ding ua ahitheitan a panpih din theisak hi.

Mobile laksak

Lamka, Nov-30: Police apan kizadan in Beben Vaiphei s/o Hentinsoi of D. Phailien leh atanu Nov 15, 2016 zinglam dak 7:20 velin Tedim road, Nehru Marg junction ah Maruti car atailai traffic jam ziakin khawl uh a, huai sung in meltheihlouh kuahiam in atanu tawilai Mobile phone Nokia X2 , Sim Card No. 8413926887 laksak in taimang hi. Huai thu ah zan in Mobile phone neitute’n Police ah complaint bawl uh a, Police te’n FIR No.59 (11) 2016 CCP-PS U/S 379 IPC registered uhi. Khawpi sung ah traffic jam hun ban ah khe a paikawma khut ah mobile phone tawite, kuahiam in mobile phone  laksak in taimang leh kikhel ding ahihziak in pilvan poimawh hi’n mi tamtak apan kiza hi.

Fellowship nei

Lamka, Nov-30: Division Baptist Dorcas Fellowship, LSD/EBC saina in tuni’n Elim Veng a NLBC biakinn ah ‘A pasal lungtang in amah a muang mahmah a’ chih thupi anei in Pastor leh Upa Ordained zite adin fellowship om a, huai hun Rev. V. Nenglian, DS, Lamka South Division in hong in mun tuamtuam apan mi 250 vel paikhawm uhi. Evan T. Damkhothang in thu gen a, mi tuamtuam in haksatna a tuahsate uh pansan in thu gen uhi.

Huailou in EBC nuai a Mission Worker Pensioner te’n  GBC Campus a Chhungi Prayer hall ah 4veina din prayer fellowship nei uh a, Rev. T. Kaikhotuan, Evan G. Thangkhanpau, Rev. V. Thangsuan leh Rev. T. Kamzakham makaih in paikhawmte’n thupi tuamtuam pansan in thumkhawmna nei uhi.  

STATE THUTHANG:

Sangai Festival 2016 hun khakna om

Imphal, Nov-30: Bhagyachandra Open Air Theatre (BOAT) ah Manipur Sangai Festival 2016 ni 10 sung zat nung in tunitaklam dak 4:30vel in hunkhakna om a, Chief Guest in CM O. Ibobi pang hi. Functional President in Dy. CM Gaikhangam pang a, Guest of Honour in Th. Lokeshwar Singh, Speaker, Manipur Legislative Assembly-te pang uhi.

CM in a thugenna ah kum 7/8 paisa apan Manipur Sangai Festival in gam tuamtuam a tourist-te hip in huai tungtawn a mun tuamtuam ah  thehzak hi uhi. Manipur kichi Northeast pang a state lianlou himahleh nam tamtak tenkhawmna mun ahihziak in mini-India tawh kibang a, huai ziak mahin thil deih leh deih louh leng kibang lou a, nam tuam dungzui in lungput leng kibang lou a, nam om teng suk lungkim ding thil haksa ahi chi hi. Thagum suahna ziak in thubuai sukveng omlou a, thubuai khat peuh kihou lem theih a, state deihna bawhsia-te tungah govt. daitak a om nawnlou ding hi’n gen hi. Huailou in Deputy CM in a thugenna ah Manipur a cultural integration dia Sangai Festival pen platform lianpi banah muanna leh bitna banah kituahna dia thukhahtu suak a, mi khenkhat te’n Manipur a nam teng kalah ki ituahna a sukbuai sawm uh vangtah huai a, bandh/blockade omlouhna dia panla khawm ding in leng ngetna bawl hi. Hiai hun Ministers, Deputy Speaker, MLAs, Chief Secretary, DGP leh govt. official tuamtuam te’n uap uh hi’n kigen hi.

US Ambassador in CM mu

Imphal, Nov-30: Richard Verma, US Ambassador to India, New Delhi tuni zingsang a Imphal hongtung in Chief Minister Secretariat a CM Office chamber ah  CM O. Ibobi va kimuhpih a,  Chief Minister in Richard Verma kiangah Souvenir pia hi. Huailou in Richard Verma in MNP+  (Manipur Network of Positive People) office ah US fund piakna nuai a ‘Project Sunrise’ hongkhia hi. MNP+ office ah media-te tawh kimuhna hun a CM tawh bang thu genkhawm uh hiam chih dotna Ambassador Richard Verma in a dawnna ah US tawh kizopna khangsak ding leh Manipur a tourism leh infrastructure banah energy telin sector sepkhawm theih dingte leng genkhawm a om chi hi.

Aman a genzelna ah state 5 pha ding in ni 5 sung hun nei a, Dec 1, 2016 in Nagaland tung ding a, huai nungin Agartala ah zin nawn ding chi hi. India govt. in NE bial a khamtheih hihte ziak in HIV kilawh sawnna  ngaih khawk uh a, US-India partnership a let banah a thuk ziak in thil tamtak khoih ban mahleh mi tamtak te’n a thil sepkhiakte uh a diak in HIV leh TB douna lam theikha lou uhi. US govt. fund na nuai a Project Sunrise in institutional human capacities, NGO leh Community network to accelerate HIV/AIDS response lam hatsak ding tum a, Obama administration nung tanpha in Indo-US relationship leng hoihzaw leh khangtou lai ding hi’n gen hi.  US Consulate General (Kolkata) Craig Hall; Prasantjit Gupta, Political and Economic Officer (US Consulate); Dr. David Nelson, CDC (India) Deputy Director; NACO, FHI leh SACS a official te’n Ambassador Richard Verma zui uh kigen hi.

Van tuamtuam hihsia

Imphal, Nov-30: Imphal West Police te’n UNC President Gaidon Kamei leh Info. & Pub. Secy. Shankhui Stephen Lamkang a mat-te uh khakkhak ding phutna a UNC te’n economic blockade a khauhsak sem banuah NH-37 in a tawt khak Noney gei ah zan a UNC supporter te’n security vengibntna nuai a van tuamtuam pua gari 30 vel susia uh a, tuni zingsang dak 4:00 tan in gari 40 val suksiat beh uh hi’n kigen hi. Noney gei a thiltung tawh  zak phetin Khumbong Keithel ah mipi kipun khawm te’n  Tamenglong leh mun tuamtuam a kipaw ding nek-leh-tak telin van tuamtuam-te kaih khiaksak  in lamlai ah susia in gari-te khahkhia uhi.

JNIMS A-block thak hong

Imphal, Nov-30: Chief Minister O. Ibobi in tuni’n Porompat a Jawaharlal Nehru Institute of Medical Science (JNIMS) a Administrative leh Faculty block kibawl thak-te hongkhia hi. Huai hun ah Chief Minister O. Ibobi in JNIMS ah Dental College bawlkhiak ding chiam a, dental college adia building tuam om louh ziakin thuneite’n administrative building lui pen dental college ah zat ding dan ngaihtuah uhi. JNIMS thuneite’n JNIMS campus sung ah Sr. residence  leh Professor quarter bawl kipan ding uh a, Union Health Minister in RIMS vehna a neih hun in JNIMS ah Cancer Treatment Centre (CTC) phuhkhiak din chiam a, Manipur ah CTC honkhiak theihna dia state govt. in detail project report (DPR) bawl lel a, Manipur a Health sector banah power sector puahhoih ding state govt. in ngai poimawh banah IT sector puahna dia panlak tuamtuam nei uh chi hi. Deputy Chief Minister Gaikhangam in North Eastern state lakah IT hub dia Manipur ahih theihna ding in panla uh a, tuni a administrative building kihong khia leng gamdang tawh ki lamdangna omlou hi. Hiai hun DK Korungthang, Minister (Health), Ksh. Biren, Minister (Works), Dr. Ng. Bijoy, MLA; PK Singh, Commissioner (Health) leh Dr. Deven, Director, JNIMS leh mi tuamtuam te’n uap uhi. 

Petrol man pung, diesel man kiam

New Delhi, Nov-30: Indian Oil Corporation (IOC) official thusuak dan in Nov 30, 2016 zankim apan in petrol man litre ah Rs. 0.13 paise a pung in diesel man Rs. 0.12 in kiam a, December 1, 2016 apan in Delhi ah petrol in litres 1 zel ah Rs. 66 rupees 10 paise man ding a, Kolkata ah Rs. 68.81; Mumbai ah litre in Rs. 72.46 leh Chennai ah Rs. 65.58 in zuak hiding hi. Diesel ahihleh Delhi ah litre in Rs. 54.57; Kolkata ah Rs. 56.81; Mumbai ah Rs. 60.17 leh Chennai ah Rs. 56.10 in zuak hiding hi.

Transfer & Posting

(IPS/MPS officers)

1.  P.G. Singsit, IPS, SP/CID (Security) as AD/MPTC, Pangei

2.  Faumei Gonglin, IPS, CO/2-MR as SP/Vigilance

3. S. Gautam Singh, IPS, SP-CID (SB) as Co/3-IRB

4. Ningshem Vashum, IPS, CO/HG(VA) with addl charge of CO/5-IRB

5. S. Nandakishore Singh, MPS, Dy.CO/4-IRB as in-charge SP/CID (Security)

6.  Kh. Sharma, MPS, Addl.SP/Vigilance as in-charge SP/CID (SB)

7. S.P. Thaisii, MPS, Dy. CO/5-MR as in-charge CO/HG(VA)

8. Lenin Lamabam, MPS, Addl. SP/Chandel  as AD/MPTC, Pangei

9. Th. Vikramjit Singh, MPS, Addl. SP (Ops)/ Imphal West as in-charge CO/2-MR

10. David Piaklian, MPS, Addl. SP (L/O) CCpur as Dy. CO/1-IRB

11. Smt. Sharon Lalsangmawi, MPS, Dy. CO/1-IRB as Dy. CO/8-IRB

12.  Lunkhomang Khongsai, MPS, Addl. SP/Tamenglong as Addl. SP (L/O)/ CCpur

13.  Pukeho Mao, MPS, Addl. SP/Senapati as Addl. SP/Tamenglong

14. N. Angam Ningsiam, MPS, Addl. SP (Ops)/Ukhrul as Dy CO/6-MR

15.  W Singhajeet, MPS, Addl. SP (Ops)/ Imphal East as Addl. SP (L/O)/Thoubal

16. K. Meghachandra Singh, MPS, Addl. SP (L/O)/ Bishnupur as Addl. SP (Ops)/ Imphal East

17. Khuplen Lhouvum, MPS, Addl. SP/Kangpokpi as Addl. SP/Vigilance

18.  T. Lalboi Haokip, MPS, Addl. SP(Traffic)/Imphal West as Addl. SP/Kangpokpi

19. Md. Jakiruddin, MPS, Dy. CO/1-MR as Addl. SP/Chandel

20.  S. Somorjit Singh, MPS, Dy. CO/8-IRB as Addl. SP (L/O) Bishnupur

21. H. Balram Singh, MPS, Addl. SP (Ops)/CCpur as Addl. SP (L/O), Imphal West

22. Dr. S. Ibomcha Singh, MPS, Addl. SP (L/O) Imphal West as Addl. SP (Ops)/Imphal West.

TUNI THUPI:

“Ngaiin, ka lungmuanna dingin ahi, ningkitelna thupitak ka naneih: himahleh nang, ka hinna na it jiak in, siatna kokhuk akipanin na humbitta; ka khelhnate tengteng lah na nunglam ah na pai vekta ngala.” 

-“Isai 38:17

EDITORIAL:

Manipur’ Sangai Festival

Bhagya Chandra Open Air Threatre (BOAT) ah tuni in ‘Manipur Sangai Festival 2016’ kichi zawh in om hi. Hiai festival in a thiltup leh hatsak (promote)a ut pe’n bangchi leh mite’n Manipur state ngaina a hongveh ut ding uhiam chih ahi hi. Sangai festival tup le ngim hoih mahmah a, ahih ziakin, a policy, plan leh program lawhsam a diam chih uthuai hi. Aziak ahihleh, Sangai festival kipatma deuh in a mun ah bomb puak a, Imphal khawpi sung mun tuamtuam leng hand grenade a denkhum in om hi. Manipur CM leh Dy CM tel in mi poimawh tuamtuam in uap mahle uh amaute thupi ngaihluat in omlou ua, bangchidan hiam chih mi tamtak ngaihdan ahi hi.

Khualzinmite’n bangchi leh i gam ngaina a hong veh ding uam chih ngaihtuahna ah lian mahmah a, election a naihtak tawh kibeihna sang tou deuhdeuh hiam chih ut huaiphial hi. Sangai festival kichi poimawh mahmah a,  Manipur in a kisaktheihpih mahmah ‘Sangai’ tawisanna leng ahi hi. Tourism sector a ding in poimawh diak a, Sangai omna sun Moirang’ Sendra mun ahi hi. Assam in Kaziranga leh Orang kisaktheihpih ua, Nagaland in leng ‘Hornbill’ a kisaktheihpih mahmah uhi.

State Animal hiam ahihkeileh state bird leh a dangdangte humbit ding him ahi a, khualzinmite’ mit hiipna leng ahi hi. Manipur in Sangai a kepte uh ‘head counting’ bawlsek ua, tutak a bangzah om hiam chih theih hikei mahleh, akiamlam zawng a pai a diam chih lung himawh huai hi. Manipur in Sangai Festival kichi zangsuk zangtou mahle uleng a ‘Sangai’ pe’n kiam hiaihiai ahihkhak ding lauhuai hi. Manipur ahihleh Congress ruled government hi a, hiai hunah Centre a vaihawmna len NDA/BJP makaite a chial kei ding uh chih theihsa ahi hi. Ahih ziakin, Manipur state in a hamphatpih theihna ding in Union Minister poimawh deuh chialkha le uh hoih ding hi a chih gen leng tamtak om a, hiai festival hong om uap-te i kipah pih kawmkawm in i state in bangchi leh Sangai festival i hamphatpih thei dia chih hizaw hi.

Tu in Nagaland-te hong kipan nawn ua, tunung sawtlou in ‘Hornbill festival’ kichi honzang nawn ding uhi. Tua ding in state government in leng budget tuamtuam hon genkhawm ding ua, ahihziak in hibang ‘festival’ a zat ziakun sum tam seng law mahmah uh chih ahi. Manipur in Sangai festival a zat ziak in economic tawh kisai buaipha zeen kei mahleh, Nagaland in buai khawlawh uh chih ahi. Nagaland in a buaipih dan ahihleh 2010-2014 in Rs. 11 lakh banah 87 lakhs leh 99 thousand deficit lawh ua, huai in thil tamtak hihbuaikha ban hi.

Sapte’n “westoxified” modern a chih uh om a, tawndan leh paidan kichi mihingte’ lak ah om chiat a, i culture uh kuamah in mansuah theilou chih ahi. Leitung pumpi in na tawndan leh na sahkhua hon dou mahleh nang bel na suakta thouthou ding chi’n gen in om hi. Tuni chiang in i gamtatdan leh khawhei dan uleng chi tuam gawpta a, bangchi gen ding a hia, ‘deceptive style’ ahihkeileh ‘commodification’ chih ding hiam mihingte pumbuai gam bang maita hi. Manipur in Sangai Festival a sai hang in tourist mi bangzah a lalut dia chih ngaihsut huai mahmah hi. Domestic leh international apan tourist mihing Manipur state ah honglut ding ua chih gen haksa mahmah hi. Cultural exchange programme tuamtuam a saite uh kipahhuai mahmah a, tualou in thugen manpha pipite leng hoih huntawk hi. Ahih ziakin khualzinmite bangchibang in i lalut thei dia chih ahi.

Manipur singtangmi adiakin Non-Naga te’n kibatna leh laigui zopna i nei uhi. Lemna leh muanna deihngen i hi ua, chihtakna, ginomna leh muanhuaina tawh i gam uh i humbit uh poimawh mahmah hi. Manipur in Sangai Festival kichi zang zouta ua, lawhching mahmah leng ahimai thei, ahih ziakin bangchibang a hiai nopbawlna (festival) lawhching hiam chihbel i thei kei hi. Nagate’n Hornbill festival, Manipur in Sangai, Mithun, Sik-Puiruoi, Chavang Kut leh festival tuamtuam nei ua, tuate’n bangchituk a tourist-te pilut (attract) ding hiam chih ngaihsut huai mahmah hi. 

Zu kham taktak ding maw?

Christian sahkhua a hong lut apan zu nek pen khelhna lianpi dan in ngaihdan piang a, Pathian thu-awi masate’n zu nek tawpsan uhi. I pu-pate’n zu a nek dan in tulai in eite’n, nekthawh nawn kei mahle a dawn lam i uangbawl mahmah uhi. I khawtang uah zu in mun lian luah mahmah a, ann nekkhawmna omna peuh ah a kisu nam ut zek tam thei mahmah hi. Tulai a pasalte’ ngaihdan tuh “pasal khat hingal a, zu dawn theihlouh chih tel!” chi in pasal hihna tawh zu in kitanauna nei mah i bangsak uhi. Huai in i tangvalnoute lungsim ah chi hoih hetlou tuh a, ‘pa’ hihna ding, nungak(nou)te’n ‘pa’ a sakna ding ua limsa hetlou napi a zu dawn kisin teitei tamtak omsak hi. Saptuam saina a Christmas leh kumthak annkuang luina tanpha a leng a tuanvaite lak a zu mah buaipih pawl bang leng om thei a, saptuam tawh kisailou, khawtang thilhihnate ah bel bangchituk a zu in mun poimawh luah hiam chih i thei hi. I khawtang ua buaina omsate hoihtak a sui vek hilehang a tamzaw zu tawh kisaikhakna nei din gintakhuai hi. Mimal damtheihna leh sungkuan khawsakna ah zu a hoihlouh dan gense ngailou a i theihchiat uh ahi. Zu dawn hoihlouh dan na theih utleh, a dawn gige-te dong lou in, a zi leh sungkuante dong leng, zu dawn a hoihlouh dan a gen sengkei ding uhi.

Zu dawn pen mimal leh khawtang, eite a di’n a hoihna gen ding vang mahmah hi. ‘Zu dawnmite mah khawtang thilhihna a zattheih, hangsan ahihkeileh phatuamngai chi i himaithei, thudik kimkhat lel ahi. Hichibang mite a pianpih uh mizia ziak a zattheih, hangsan ahihkeileh phatuamngai ahi ua, zu ziak ahih louh man in zu omkei leh leng huchi thou ding uhi. ‘A hunphet theite a dia zu dawn kichi a siatna omlou’ chi tamtak a om lai in hunphet thei a zu dawn omlou zel hi.

Ahihleh, bangchik apan Lamka khawpi sung a zu kizuak pan ahi dia? Thil kham dangte dan deuh in zu leng a khamtute a hatzawh phot uleh a zu man pung a, huai in sumdawnna dia zat utna pungsak a bat hun leng tam hi. Bangteng hileh, govt in zu zuak kham taktak ahihleh a hoih a, kham lah bang khamlou lah bang- vot lah votlou a om sang in a lum a leh lum henla, a vot a leh vot vet leh hoih ding hi.