HEADLINES:
MoS (Home) Kiren Rijiju in tuni’n Manipur dinmun hong enkhia:
Centre in NH nihte ah economic blockade lakkhiak ahih theihna ding in a poimawh bang a panlak kipan : Rijiju
Imphal, Dec-23: Union Minister of State for Home Affairs Kiren Rijiju in a gendan in National Highway No. 2 leh 37 a hun chiam omlou economic blockade akin theilam a aven theihna ding in Centre in a kul leh poimawh bang a panlak kipanta hi’n gen hi. UNC in hunchiam omlou economic blockade a puan uh a zukkik theihna ding uh thiltup a nei in Minister in tuni’n Imphal hongpha a, hongtun phet in Chief Minister O. Ibobi, Dy. CM Gaikhangam, State Govt. a top civil leh police officialte banah Centre in security hon sawl makai officialte tawh kimukhawm in economic blockade bangzahta a khauh hileleng lampi (NH 2-te) ngeina bang a honkhiak ding tungtang genkhawm uhi.
Huai zawh in Imphal a Old Secretariat a Conference Hall ah Kiren Rijiju in news saite kimuhpih a, huai hun ah hunchiam omlou a blockade bawl kichi thil hithei hilou a, banghiam lampi dang zon teitei ngai ahihman in huai ding in Centre leh State govt. in pan alak khawm ngai hi’n gen hi. Tu leh tu in Manipur ah Centre in hon sawl para-military force Company 184 in nasem lel uh hi’n gen a, amaute banah lampi honkhiatna a zat ding in para-military force company 7 vel tulel in Manipur zuan a hongpai uh hi’n leng gen hi. Aman agenzel danin economic blockade ziak a Manipur a thil omdan ‘humanitarian crisis’ hi a, hiai tawh kisai in politics a min hoihna zon sangin Centre leh State govt. in mite gentheihna bei theihna ding in akin theipen a panlak ngai hi’n leng Minister in gen hi.
Kiran Rijiju in a genzel danin tulel a mat a om UNC makai 2-te khahkhiakna ding in Centre in State govt. ah bangmah zasak lou hi’n gen a, huai louin galvan tawh matkhawm helpawlte kuamah khahkhiak ding in state govt. leng theihsak neilou hi’n gen hi. Press-te dotna Minister in a dawnna ah India govt. tawh peace talk nei NSCN(IM) in ground rule a bawhsiat tungtang Centre in thuchian tak bangmah zak neilou uh hi’n gen hi. Bang hiam thil a om leleng state govt. in Centre ah a theihsak ding hi a, huchi’n helpawlte tungah akituahpih action lak hiding in gen hi.
Manipur dinmun enkhia a hongzin Union Minister of State for Home Affairs Kiren Rijiju ahihleh Joint Secretary tel in Union Home Ministry official khenkhat in honzui uh a, tuni dak 10.30 a Imphal airport hongtung in huai ah Addl Chief Secreatary Suresh Babu leh top official bangzahhiam in ana dawn uhi. Huai apan Babupara a CM’ Secretariat ah Chief Minister O Ibobi makaih high level security meeting ah Kiren Rijiju vatel hi.
Union Minister in Old Secretariat a Conference Hall a thuthaksaite tawh a hunzatna ah CM. Dy CM leh state top official-te kimuhpih khin ahihdan leh zingchiang (Dec 24) apan blockade lakkhiak ahihna dia nasep kipan ding hi’n gen a, UNC in ni 53 paisa apan economic blockade a bawl lakkhiakna ding a panlak theihna teng a lak a om hi’n gen hi.
Manipur a blockade tungtang ah zan in Union Home Minister Rajnath Singh in Chief Minister Ibobi kiang ah a kinthei bangpen a lampi khak a omte honkhiak poimawh ahihthu theisak a, state government in Constitution in a piak thuneihna zang a panla ding in nawh hi.
Martyrs 9-te laka tel Khaijamang luang kilakhia
Lamka, Dec-23:Tuzing baihtak dak 2:00 velin pawlkhat in district hospital morgue kongkhak kalsia in tribal martyrs 9-te laka telJames Khaijamang Touthang (11) s/o (late) Haokhothang Touthang leh Mrs. Nemneilhing of Bijang pawkhia uh a, Tuibuong KIC office ah koih uh hi’n kigen hi. Chief Minister O. Ibobi telin local MLA 6-te banah Dy. CM Gaikhangam, Kuki Inpi, CCpur; Kuki Khanglai Lompi, KSO/CCpur makaite’ leh Khaijamang Touthang innkuante’n kihouna nei in thupukna khenkhat bawl uh hi’n leng kigen hi. Huai dungzuiin Manipur govt.in James Khaijamang Touthang innkuante jangna-dopna (ex-gratia) in Rs. 10 lakh pia uh a, tuni in a sumtang in Rs.5lakh leh cheque in Rs. 5 lakh pia uhi. Misi inkuanpih naipen DRDA nuai a LDC piak ding banah sivuina a zat din Rs. 1 lakh leng pia uh hi’n kigen hi. Thu kizadan inkuate hiam in tuzingkal baihtak in morgue kongkhak kalsia uh a, a sung ah James Khaijamang Touthang’ luang kikoihna cold storage chabi kalsia in pawkhia uh a, KIC office ah koih uh hi’n kigen hi.
CMO/CCpur in tuni mah in morgue kongkhak kikalsia bawlthak sak pah hi. Tuni a thiltung tawh kisai Police ah case bangmah om nailou hidan inleng kigen hi.James Khaijamang luang vuiding tawh kisai in KIC, KKL, KSO/CCpur telin inkuante’n kihouna nei mahle uh hiaithu gelh ahihtan in avui hunding uh thu kichian zak om nailou hi.
Indian National Congress/CCpur saina in one day political conference om
Lamka, Dec-23:Indian National Congress (INC), CCpur district saina in tuni’n Tuibuong Peace Ground a Indoor Stadium ah maban election om ding tawh kisai a kisakkholhna danin ‘One day political conference’ om hi.Hiai hun zatna ah Chief Guest in Manipur Chief Minister Okram Ibobi Singh pang a, Functional President in TN Haokip, Saikot MLA pang a, Guest of Honour in Dy. Chief Minister Gaikhangam, PHED Minister T. Manga Vaiphei, CCpur MLA Phungzathang Tonsing, HAC Chairman Dr. Chaltonlien Amo, Singngat MLA Ginsuanhau, Thanlon MLA Vungzagin Valte leh Nambol MLA N. Loken Singh pang uhi. Hiai hun ah CCpur district a Congress MDC teng banah block leh mandal tuamtuam a makaite leh mipi tamtak kihel uhi.
Chief Minister in Manipur kichi community tuamtuam tengkhawm mahle hang kikhen thei ding omlou a, gam kichi government a ahih dungzui in a ut hunhun in thupukna bawlkhum thei a, tuate compensation apiak ding chi hi. District 7 kibawlthak tawh kisai leng population enlou in administrative convenience ding tupna a bawlkhiak a om hidan in gen a, tulel in district 16 om lakah valley ah district 6 leh hills ah 9 om a, huai tawh kisai valley lam in tamsa mahle uh maban ah a dang leng bawlbeh poimawh lai ding hidan in gen hi. District 2 bawlkhiak dia ngetna ompen leng tuleh tu a bawltheih hilou a, district piching bawlkhiakna dia infrastructute leh manpower ngai a, maban ah government thak om chianga ettouh hiding in gen hi.
Phungzathang Tonsing in buaina a om leh a hihveng dingdan leng lampi om ahihna ah bandh, strike, blockade, shutdown chihte’n hoihlam sangin siatlam tunzaw ahihman in maban ah hibang thilte kuaman bawl nawnlou din ngen a, buaina leh haksatna om hun chianga tutkhawm agen in phatuamna liantak tun zaw ahihdan gen hi. Manipur ah nam tuamtuam tamtak om te’n a kilawmna langsak ahihman in kuapeuh in kituak taka tengkhawm theih ding dan ngaihtuah a, i maban ding uh houlim a genkhawm pen poimawh mahmah hi’n gen hi.Phungzathang Tonsing in tuni zinglam dak 9:30 in New Lamka ah azi han pha in pak piakna nei a, tua zawh in Lunminthang Haokip, DC/CCpur kimuhpih a, huai zawh in Thangkhosuanmung Guite EM/ADCC tenna in pha a, huai zawh in Imphal zuan in kik hi. T. Manga Vaiphei in BJP party ah mipi phattuamna ding omlou chi a, maban election om ding ah singtang bial ah BJP hatsak sawm in panla mahle uh Congress in 2012 election bangin majority tang zoulai ding chi hi.
ADC/CCpur in CM kiang ah memorandum pia
Lamka, Dec-23: Autonomous District Council, Churachandpur in tuni’n district bawlkhiak ding tawh kisai in Manipur Chief Minister kiang ah memorandum pia uh a, Dy. Chief Minister telin district MLA 6-te kiang ah leng copy pia uhi.
Memorandum in a taklatdan in, Manipur govt in administrative convenience tupna in Dec 8, 2016 a district thak 7 (seven) abawlkhiak kipahpihthu taklang uh a, huchihlai in Dec. 15, 2016 a ADC/CCpur special session ah thupukna alak bangun administrative convenience ding chih ziak a district kibawlthak ahihleh CCpur district pen district 3 suah poimawh hi’n taklang uhi.
Huai dingin Lamka District, Tuibuong leh Pherzawl district dingin taklang uh a, Lamka district in CCpur A/C leh Singngat A/C, Tuibuong district in Henglep A/C leh Saikot A/C banah Pherzawl district in Tipaimukh leh Thanlon A/C a huap dingin taklang uh a, Assembly constituency khenzak pen hitheilou ding hi’n leng taklang uhi. Thanlon Assembly constituency pen CCpur leh Pherzawl district a khenzak pen akinlam a hihdik dia nawh kawm in Thanlon leh Mualnuam Sub-Division-te district administration khat nuai ah aom ding uh hi’n taklang hi. Maban ah state govt in hibang thil abawl ding chiangin stake holder- adiakin HAC (Hill Areas Committee), local MLAs, MDCs, Village Chief, Civil Society Organization tuamtuam banah gam mi thudot anei dingin ngen uhi. Memorandum ah Langkhanpau Guite, Chairman, ADC/CCpur; Lal Hossan, V/Chairman, Ngamhao Touthang, EM leh Khaipao Haokip, MDC te’n suaikai uhi.
‘Zingsol’ Music Video Album hongkhia
Lamka, Dec-23: Mc Muan S. Ngaihte in lasiam minthang (L) Muana Ngaihte theihgigena dia a bawl ‘Zingsol” kichi music video album tunitakin Mission Road a Hornbill Studio ah Langkhanpau Guite, Chairman ADC/CCpur in Chief Guest hihna tawh hongkhia hi. Huai hunah Functional President in T. Goukhomang, ZEO/CCpur leh Chief Host in Thangkhosuanmung, EM/ADCC banah Hiangtam Lamka hausa pang uh a, CT Lian Guite, MDC banah mi poimawh tamkhop in uap uhi.
ADC Chairman in huai huna agenna ah Laa lui kepbit poimawh mahmah hi’n gen a, gou poimawh ahihdungzui in khangthakte’ mangngilh lou dia dopsang poimawh hi’n gen hi. Laa kepbit ahihkawm in public property kepbit poimawh ahihdan leng gen a, govt. property-te mipi ading mah ahihziakin akepbitna leng mipi mawhpuak ahi chi hi. Mizoram a Ngopa ah Ccpur dist. adia thautui puakna gari hentang a omte khahkhiakna di’n ADC in panla ahihdan leng gen a, gari driver-te’n asungkuante utawh Christmas azat khawm theihna ding un akisaipihte thuzak khinta uh hi’n gen hi. ‘Zingsol’ honkhiak hunah lasiam tuamtuam S. Chingnu, Zakim, Pauginmuan, RD-I leh Kapish ten la sa uhi. Huai album ahihleh Mc Muan Ngaihte in a si ta anu Mrs Phaching leh a sanggampa S. Liankhoson phawkgige dia abawl leng hidan in kigen a, khawpi sung mun tuamtuam ah tuni akipan in muhtheih ding hi.
MPC Sub-Hq Zone-1 Office hongkhia
Lamka, Dec-23: Tuzinglam dak 8:00 in Chiengkawn ah Thangkhosuanmung, EM/ADCC in Mizo People Convention, Sub-Hq Zone 1 Office leh Foundation Stone hongkhia a, Rev K. Mawia, Adviser MPC Sub-Hq Zone-1 in Pathian khut ah lankhia hi. Huai hunah MPC Gen. Hq/ Manipur, Group YMA/ Manipur, MZP/Manipur, Gangte veng, Lawntang, Commissariat, Chiengkon MPC Unit apan palaite banah YMA Chiengkawn Branch, MZP Chiengkawn leh MPC Chiengkawn Unit apan member tamkhop kihel uhi. EM/ADCC in huai huna agenna ah, abialsung a khantouhna leh kipumkhatna omding deih in nasatak a panla ahihdan gen hi.
Village Authority 2 in nin hahsiang
Lamka, Dec-23:Elim Veng leh Hebron Veng gamgi Lamka College fencing bul, Damkam Bazar a nin tamtak kipaikhawmte tuzing in Village Authority te’n JCB zangin hahsiang ua, maban ah kuaman hiai mun nin paihna dia zang nawnlou din theisak uhi.
Kum tamtak paita akipan huaimun nin paihna dia zat himahleh akim a tengte adia damtheih huailou chih ziakin Elim Veng leh Hebron Veng V/A te’n huaimun ah kuaman nin paih nawnlou din theihsakna bawl mahle uh kuaman zuilou uh a, nin kipaite a namsiat ban ah damtheih huailou ahihman in village authority-te’n ngai poimawh in bialtu MDC M. Gouzamang Guite, EM/ADCC kiang ah tai in, thil omdan theisak uhi. MDC in leng JCB thawh in District Council-te sanitary truck zangin ni’nte mun thawveng ah pai uh a, maban ah huaimun nin paihna kuaman zang nawnlou din village authority –te’n ngenkawm in theisak uhi.
NDTV Christmas gift in Kut 2016 suahkhiak hiding
Lamka, Dec-23: India a Television Network tallang NDTV PRIMETIME in Dec 24, 2016 zinglam dak 10:00 leh Dec 26, 2016 nitak dak 9:30 in Tuibuong Peace Ground a ‘BIGGER BETTER STRONGER’ chih thupi zang a Chavang Kut 2016 edited program suahkhe ding uh a, entute adiak in mun tuamtuam a om Manasseh tate’n Tata Sky’s Channel No. 604 ah entheih ding uh hi’n thutut kimu hi.
STATE THUTHANG:
CM in Community Hall leh Water reservoir hongkhia
Imphal, Dec-23: Thoubal district a Khangabok Assembly Constituency sung a Lamding ah Multipurpose Community Hall leh Water Supply Reservoir hongkhiakna om a, huai ah khuallian Chief Minister O. Ibobi in Community hall leh reservoir hongkhia hi. Functional President in K. Ranjit, Sugnu A/C MLA pang a, Guest of Honour in O. Landhoni Devi, Kangabok A/C MLA leh P. Brojen Singh, Wangjing Tentha A/C MLA-te pang uhi. Huai hun ah CM in Manipur a Health Sector lam ah sepkhiakte taklang in best infant Mortality Rate ziak in Central govt. akipan reward sang chi hi. Manipur Development Society (MDS) apan fund Rs. 46 in community hall kibawl a, akisam teng MLA Local Area Development Fund kizang a, huai nung a mipi ading in Community hall leh water supply reservoir pekhia in miteng in public infrastructure-te amau van a ngai ding leh hoihtak a kem chiat ding in ngetna bawl hi.
Office campus ah bomb mukhia
Imphal, Dec-23: Sangaiprou a om Consumer Affairs Food and Public Distribution Campus nunglam ah meltheihlouhte’n tuni’n bomb akoih uh muhkhiak hi a, huai tungtang ah Consumer Affairs Food and Public Distribution a sem Employee Union te’n mawhpaihthu puang uhi. Tunung in hichibang thil a tun nawnlouhna ding in Union in akisaipihte leh pawl tuamtuam in a theih ding in ngetna bawl hi.
KNO in thusuah bawl
Kangpokpi, Dec-23: Stephen Kuki, Under-Secy., Info. & Pub., KNO MANMASI in thusuah a bawlna ah Kuki National Organization leh United People’s Front te’n Indian dan bupi huam a kilemna ding tawh kisai in New Delhi ah Oct 19, 2016 ni a kihouna 2vei hun ah joint political objectives pelut uh a, lungmuangtak a kihou theihna ding in Army tawh kum 2005 in SoO kai in huai nung kum 2008 in India govt. leh Manipur govt. tawh tripartite SoO talk kipan in Kuki Hills ah muanna leh bitna om hi. KNO leh UPF nuai a Kuki group tuamtuam te’n amau bialsung chiat banah designated camp ki zahtak tuah in muanna leh bitna om a, security force-te muanna leh bitna kepbitna ah phatuam uh a, himahleh 11 Assam Rifles-te omna mun KNO/KNA tactical Headquarter Moreh area ah mipi lungmuang mahle uh dinmun ngaihkhawkna om a, NSCN(IM) khenkhat telin UKLF cadre 30-te Moreh area ah lut uhi. Kwatha mun ah leng NSCN(IM) cadre 30 velte thagum zang in sum suhsakna ah kigolh uh a, intelligence thusuak in Minow leh Chongjang village ah NSCN(IM) cadre 40 vel om hi’n gen a, thil om dan tawh kisai in Moreh a CSO tuamtuam leh KNO te’n GoM leh GoC 3 Corps tungtawn in Union Ministry of Home Affairs kiangah theihsakna pelut uh a, KNO te’n muanna leh bitna kepbitna dia Government in leng SoO ground rule zuih dia chiam ding in leng ngetna bawl uh hi’n taklang hi.
Van tuamtuam paw ding truck 500 val kuankhia
Imphal, Dec-23: Thautui, LPG gas leh niteng vanzat banah nek-leh-tak poimawh tuamtuam Manipur adia puaklut sawm in tuni’n truck 500 val leh security escort khauhtak tawh kithuah Imphal apan Jiribam zuan in kuan uhi. Tamenglong a om Kabui Kamei in a gendan in tuni sunnung in Petrol tanker gari 20 telin truck 520 in Noney kheng in Jiribam lam ah paisuak uh hi’n gen hi. Huchi kalah BRTF leh Christmas Committee Noney pangkhawm in Noney bazar lutna ding lampi kep siangthou deihna in campaign pan uhi. Amau pawlin leivui leh lampi ah tui theh in lamlian bang leng hahsiang uhi.
Ukhrul ah office 2 kihal
Imphal, Dec-23: Thusuak kiza danin Ukhrul district sung ah tuma zek a kihong Kamjong district a Deputy Commission office dan a kizang Kamjong a BDO office leh SDO office zingkal baihtak in kihal tum chihthu om hi. Ukhrul Mini-secretariat leng tuni zingsang in mei a halsawm pawl om uh a, huai office a 1st floor a om Child Protection Unit Office bel mei in kangman hi’n kigen hi. Hiai thiltung ziak in District Administration in tuma sang in security khauhsak zaw ua, office 2 mei a kihal tungtang thu ah Kamjong leh Ukhrul police station ah case register uh ahihdan kigen hi.
Heroin tawh mi 3 mankhia
Imphal, Dec-23: Takhel Mayai Leikai ah tuni zingsang dak 2:30 velin numei 2 telin mi 3 apan heroin power tun (piece) 75 tawh matkhiak in om uhi. Thusuak in Meira Paibi te’n Takhel Mayai Leikai ah duty in om uh a, huai hun ah Yanagangpokpi zuan Pleasure gari a checkna uah heroin tun 75 mukhia uhi. Huai tawh kisai in Yaingangpokpi akipan Joyshy Kusar (25) leh Rotah (34) banah Andro Khunou apan Phanjaobam Pavi (26)-te mankhia uh a, North AOC apan khamtheih la in Yanagangpokpi ah zuak dia apuak uh hi’n kipuang uhi.
AMBA in economic blockade beisak di’n ngen
Imphal, Dec-23: UNC economic blockade in mipite adia gentheihna leh haksatna atut theisiam a, kintak a beisak ding in All Manipur Bar Association (AMBA) in ngetna bawl uhi. Association thusuak dungzui in economic blockade apaitouh zel leh Manipur mipite kalah leng kitheih siamlouhna thupi tak tun thei ding a thil pautauh huai ahihdan leng puang uhi. Economic blockade tungtang ah CPI Khurai Local Council in leng zukkik ahih deih thu puang ua, UNC in hunchiam omlou blockade a puang uh mipi adia gentheihna thupitak tuntu ahihman in State govt. leh Centre govt. in akinlam a panla ding in ngen uhi.
Integrated Cold Chain centre bawlna din suangphum hong
Imphal, Dec-23: Bishnupur district a Kwasiphai mun ah Horticulture and Soil Conservation Department nuai a Integrated Cold Chain Centre bawlna nasep kipatna ding in Commerce and Industries Minister Govindas Konthoujam in tuni’n suangphum hongkhiatna nei hi’n gen uhi. Huai tawh kisai in Ibudhou Chothe Thamai Pakhangba Community Hall ah programme om a, huai ah G. Konthoujam in project bawl khit ahih chiang in haichi (vegetable) thelthang kiam ding leh farmer te’n marketing lam ah buaina a tuah uh nuamtuam sak ding a, tua project ah processing plant leng telsak ahih ding banah horticulture leh allied sector lam ah farmer-te training piak hiding uh a, tuailai-te adia sepna tamtak bawl khe ding hi. Agenzelna ah ‘organic farming’ poimawh dan taklang in huai tungtawn a famer-te summuhna lam khang ding chi a, Commerce & Industries Minister in suangphum a hongma in Kwasiphai Maning Primary School a building kibawl thak hongkhia hi’n leng gen uhi. Hiai hun T. Pamei, IAS, Commissioner, Horticulture; K. Kipgen, Director, Horticulture leh official tuamtuam te’n uap uh hi’n kigen hi.
CC Meet :
NEROCA in a nihveina ding ARC, Shillong te zou
AMFA saina a Sir Churachand Singh KCSI CBE Memorial football tournament 2016 final match kimawlna tuni in Imphal Khuman Lampak Main Stadium ah om a, tua ah outstation team ARC, Shillong leh NEROCA FC te kimawl ua, NEROCA FC in lamdangtak leh kuamah gintak hetlouh in 5-1 a zou in champion la uhi. NEROCA FC ten CC Meet final a ARC, Shillong te nihvei a zawhna uh hi a, 2012 kum in penalty in NEROCA te vualzou uhi. Hiai match ah minute 11 paipan in NEROCA FC apan Ejigu Chinedu Emmanuel in goal masa khum a, tua zawh in Sushil, Subhas, Nabachandra leh Johnson ten goal khum vek ua, half ma deuh minute 44 in ARC, Shillong in defender W. Rojit tungtawn in consolation goal khum uhi.
CC Meet 2016 bel Dec. 4, 2016 in kipan a, outstation team nih tel in team tuamtuam 22 kihel uhi. Tuni a final match kimawlna bel Manipur CM O. Ibobi Singh in Chief Guest hikawm a uap ding chih himahleh lemtanlouhna ziakin kihel theilou a, State Govt. Consultant Dr. RK Nimai; Chairman cum Managing Director of Classic Hotel Dr. Th. Dhabali leh AMFA President S. Sanatomba ten uap in prize te pekhia uhi. NEROCA FC apan S. Subhas in best player hihna la a, Best Coach ahihleh NEROCA coach Gift Raikhan in sang a, referee ah FIFA Asst. referee a kihel Kennedy Sapam in sang hi.
TUNI THUPI:
“Tapa a nei dia, a min dingin Jesu na sa ding, aman a mite a khelhna ua kipan a hotdam ding jiakin, a chi a.”
- Matthai 1:21
EDITORIAL:
Christmas chibai!
Kumpite’ Kumpi: Jesu Kris
Manipur Express ngaina leh simtu tengteng amasa in Christmas Chibai kon buuk uhi. Eite’ adia hunbi poimawh penpen bang a ngaih ahih ziakin ni 2/3 ki suty dinga hiai pe’n mipite’n non theihsiam uh poimawh mahmah mahmah a, huai kawmkawm in simtute leh ngainatute’n na innkuan ua kipahna leh damtheihna bukim tawh hiai hunbi non zat uh hon kideihsak mahmah hi. Akua hiam zaak dah ding banah doctrine tawh kisai hilou in Jesu tawh kisai i gen chiangin a khenchiang in Kris/ Krist/ Christ chihte hon kizangkha sek a, igentup pe’n kibang ahi chih kithei siam masa dingin iki ngen hi. Mimal innkuan vai hi’n khawtang thil ah hita leleng haksatna leh gentheihna banah thubuai tuamtuam i tuah nungin Jesu Kris pianchampha December 25 zangthei dinga melmuhsak a i om kipahhuai mahmah hi. Jesu Kris gupna ziaka soisak leh sihna tuakte zahna sangpen i pia a, huai kawmkawmin, India gamsung abiktakin Central India leh North India a Hindu kulmut-te’ opkhumna bial ah Krismas abang chizat ding uam chih theih haksa mahmah hi. BJP vaihawmna govt in Christmas Ni tawh kituak chet a ‘Governance Day’ leh ‘Maan Ki Bhaat’ hun hon guan chitchiat ubel anuamkei hi.
December kha i chih chiangin khawvot hun hi a, hiai pe’n hun poimawh mahmah leng hi a, ‘taangsamte apaak hun’ leng hi a, adiakin upa lamte’ lungleen leh lungzuan hun mahmah ahi hi. Tangsaam a hong paak chiang in i biak Pa Pathian tapa Jesu Kris hong pianna nai mahmah ta chih hilhkholhna chikhat hi a, Jesu pe’n mihingte leh mikhialte tanpha ahih kawmkawmin ‘ Kumpite’ kumpi – ‘Prince of Peace chih minvuah in ana om hi.
Christmas/ Krismas hun ahileh a upa pe’n leh anaupente’ ngaklah hun ahi. Neulai hunin nulepa te’n phulalen puanak hon leisak hun uh hon ngaihtuahsak zel hi. I gam ah mi hausa tawp leh azawng tawp in leng hiai hun ngaklah ua, sahkhaw vai en zualzual le hang, Baptipst, Catholics, Protestants, Orthodox leh Jews te tanpha in a ngaklah uh hunbi poimawh ahi chi leng kikhial khollou maithei hi. Kuapeuhin i thei ua, hiai hunbi poimawh pe’n inn kuan kimna bangin i ngai ua, sahkhaw lam gen in (spiritual fulfillment and reflection) chauh hilou in family union hoihtak leng hi a, ineu apan kuapeuhin i ngaklah mahmah uh ahihleh Christmas hun chiangin chi hisek hi. Tulai ngialin naupang tamtak phur leh kilawp takin om ua, inn kong ah Christmas tree te phutsuah in vakthei chi tuamtuam bawl ua, vaak thei chi tuamtuam tawh kongzingte chei uhi. Huai kawmkawm in hiai thilpen hoih lawna pi in vai (Hindu-te’) te’n Diwali a chih sek uh (Light of Festival) zuihna khat leng ade aw chih theih in om hi. Building saang neideuh te’n adung avai in light chi tuamtuam zanin vak sak seksung ua, a kikapkhe zungzung leh meivak ki lang zualzual chih khawng om a, huai vaakna in mikhialte tantu dia hongpiang Jesu Kris pahtawi kha mah ding hiam chih leng theih ahituan kei!
Bethlehem ah mi khialte tanpha Jesu Kris hongpiang chih pe’n i theivek uhi. Amah pianchampha theihgige na dia Ni khat program izat pe’n kuapeuh adingin zahtakhuai a, a siangthoubang pe’n aleng zat ding him uh ahi hi. Laisiangthou vai ah kikalhni chikhang, Bible scholar hunkhop in Jesu ahihleh 4/5 BC vel apiang ahi chi ua, ancient Roman festival tawh ki naih mahmah hi. Jesu pian Ni leh piankum tawh kisai en leh suizui ut hikei a, mikhialte tandinga Jesu hongpiang ahi chih hilel zaw hi. Tualou in mi tamtakin Dr. Martin Luther tawh kisai demna abawl khemkhem uh ahihleh Christmas tree tawh kisai leng hi lai a, carol a la kisasek ‘Away In A Manger’’ bang mawhpaih mahmah ua, ‘Luther’s Cradle Hymn’ chihin ana om hi.
Kris/ Chris/Christ chi in gelhkha mah le hangleng igennop kibang vek a, ‘Kumpite’ kumpi’ ahi a, azahtakhuaina beilou ding hi. Jesu nungzui dingin tuailai leh khangthak tamtakin kalsuan a, tunichiang chiangin pastor, psychologist banah psychiatrist-te tanpha kipanin ‘Jesu nungzui di’n ka kipankhia’ chih la tawh om uhi. I gamah thil mulkimhuai sisan-naisan kisuahna, numei-pasal kala thangtatna, thagum a kisualluihna, kivauna leh adangdang om mahle leleng Jesu nungzui ding taktaka kipekhia mi tamtak om a, kipahhuai mahmah hi. Laisiangthou a thusawm piakte (the 10 commandment) kalh a gamtang mihing tamzaw ki hi dinga, Pathian zahngaihna ziakin tuni dong hing leh dam a om ki hilai ki himaithei ding hi. Huai kawmkawm in Christmas hun pe’n izatkhelh khak ding lauhuai mahmah a, hiai hun pe’n kuamah in guihlouh dingin deih huai hi.
Tuni chiangin technology a sangta a, TV, computer leh mobile tungtawn in thu tuamtuam kizaktuah theihna ‘advance’ law mahmah a, tua ziakin zi leh tate’ banah innkuan mite’ lakah “YES”! Jesus Christ is the ‘Prince of Peace’ a chihtheihna dingun December 25 chiangin bangchibang in pan ila ding ua le” I hinkhua ua dia Jesu/ Pathian pe’n a thupipen chih ithei ua, eite khelhna apan hon tantu ahih ziakin ‘Life’s Great Champion’ i chithei ding uam? En Pathian i nutsiat sangin Pathian in hon nutsiat ding lauhuai zaw ahihdan kingaihtuahna ding tamtak om hi.
December 25, 2016 Christmas ahih ding tawh kitawh kitonin Manipur Express simtute tengteng Christmas zatnuam kon chi ua, tuhun a innkuan kimlou a Christmas zangte kon thuakpih ua, huchikawm kalah, midang tengin innkuan kim a Christmas non zat uh deihsakthu kon puak uhi. Kumpite’ kumpi Jesu Kris ah kipumpiakni. Lungsim dawngkot hong peuhmah le hang, Gou dang bangmah ngai nawnlou ding hi. Christmas zatnuam!
No comments:
Post a Comment