Manipur Express | December 30, 2016

HEADLINES:

Prime Minister Narendra Modi in Manipur hongpha ding:

State 5 a Assembly election om ding tawh kisai in December 30, 2016 in EC in meeting nei ding

Imphal, Dec-29: Manipur tel a state 5 a Assembly election om ding tawh kisai in ‘model code of conduct’ zat kipatma in Prime Minister Narendra Modi in Manipur hongpha ding hi’n thusuak om hi.PM hongzin ni ding puankhiak hikei mahleh January 1st week lak vel hiding a gen in om a, tua hun in Imphal West district sung Koutruk ah National Sports University bawlna dia nasep patna di’n suangphum ding a, tua zawh in Langol Games Village a Mary Kom’ Boxing Academy hong ding hi’n kigen hi. Manipur BJP state office leng PM in pha ding a, State Assembly election ding tawh kisai in party kisak kholhna omsate leh maban panlak dingdan tel in state BJP makaite tawh thu tuamtuam genkhawm ding hi’n leng kigen hi.  

   National Sports University bawl ding tawh kisai in Youth Affairs & Sports Ministry in Imphal West DC leh a kisaipih official-te kiang ah mun kiching sepkhe di’n theisak a, nasep patna ding a suangphumna mun ding hihfel di’n leng Imphal West DC kiang ah theisak khin hi’n kigen hi. Langol Games Village a Mary Kom’ Boxing Academy kibawl zawhsiang nung in Mary Kom  in Prime Minister Modi hong ding in chial hi. PM Nadrendra Modi in Manipur a  hongphak ding tawh kisai in BJP makaih NDA government in Centre a vaihawmna a letnung a hongzin patna hiding a, UNC in hunchiam omlou economic blockade a bawl ziak a Manipur state in haksatna liantak a tuah hun a PM hongzin ding in gen nei mahmah din kilang hi. Prime Minister in Manipur hongphak hun in Union Minister of State for Youth Affairs & Sports (independent) Vijay Goel in leng honzui ding hi.    

Tuabang kalah, UP, Punjab, Uttarakhand, Goa & Manipur state-te a Assembly election om ding tawh kisai in December 30, 2016 in EC in meeting poimawhtak nei ding uh a, tua zawh in election hun ding puankhiak himaithei in kigen hi. Thusuak kizadan in, Assembly term May 27, 2017 a beina ding UP state ah phase 7 in election neih hiding a, UP state sung tumlam bialte ah phase masate kipan ding hi’n kigen a, UP state chihlouh state dang 4-te ahihleh phase 1 a zawh hidi’n gen in om hi.  

State 5 a election hun ding puankhiak ahih tawh kiton in ‘model code of conduct’ kizangpah ding a, a ni ding puankhiak zawh ni 21 sung vote campaign hun ahih ding banah candidate-te adia nomination file theih hun di’n nipikal 2 sung hun piak hiding hi. UP state ah Chief Minister Akhilesh Yadav makaih Samajwadi Party (SP) leh Mayawati makaih BSP, Congress leh BJP kigawm kal ah kibeihna nasatak om ding a gen in om hi. Punjab state ah ahihleh Akali Dal & BJP alliance, Congress leh Aam Aadmi Party (AAP) kal ah ‘three corner fight’ om di’n kigen a, Goa state ah ruling BJP, Congress leh AAP kal ah ‘triangular contest’om ding hi.

 Manipur a election nanungpen 2012 in seat 60 lak ah INC in seat 42 tang in hatpen uh a, tutung in bel kikhek lamdang guihthei hi’n kigen hi. Tua di’n BJP-te naktak in kisakhol uh a, Congress government phuk teitei sawm in panla uhi.2012 kum in BJP in seat khat leng tangkha lou uh a, NCP in seat 1, AITC in seat 7, LJP in seat 1, MSCP in seat 5, NPF in seat 4 tang uhi.

TUALSUNG:

Election ding tawh kisai panlakna enkhawm uh

Lamka, Dec-29: 2017 kumbul a 11th Manipur Legislative Assembly election om ding tawh kisai in kisakkholhna leh kha 2 paita a SVEEP programme nuai a Electoral Roll tawh kisai a Special Summary Revision neihna tawh kisai panlakdan enkhe dingin Imphal apan N. Anganjao Singh, Asst. Chief Election Officer, Manipur in tuni’n Lamka hongpha a, DC/CCpur office chamber ah akisaipihte tawh houlimna nei uhi. DC/CCpur omlouh ziakin Thienlaljoy Gangte, OSD/Election leh W. Ibohal Singh, Addl. DC/CCpur te’n makaih ua, Special Summary Revision neihna tawh kisai banah Election chianga zatding Model Code of Conduct tawh kisai genkhawm uhi. 

Special Summary Revision tawh kisai in order kibawl dungzui in Dec. 13, 2016 malam a claims & objective lut teng saifel zawh chiangin Dec. 13 nunga lutte et-thak hipan ding in gen uh a, Model Code of Conduct tawh kisai in ECI in election hunsung zuih dia thupiak abawl point 21 leh hihlouh dia thupiak abawl point 23 banah sitting MLA-te zuih dia thupiak kibawlte etkai leh sepsuah ding dan telin thu tuamtuam genkhawm uhi. Meeting ah AERO leh Nodal Officer teng banah political party tuamtuam apan palai bangzahhiam leng kihel uhi.

YVA GHQ makaih in annkuang umkhawm 

Lamka, Dec-29: Young Vaiphei Association (YVA) GHQ in tuni’n Kangvai khua a Upa Pautinlam, Secretary, District Congress Committee inn ah 58-CCpur A/C MLA Phungzathang Tonsing in YVA adia sep-le-bawl aneihte tung ah kipahthu genna in annkuang umpih uhi. Huai hun ah YVA GHQ a Cabinet Member leh Central Working Committee (CEC) member teng banah Unit tuamtuam a makaite kihel uh a, Vungminthang, President, YVA GHQ in 58-CCpur A/C MLA annkuang umpihna ziak pulak a, maban a sep-le-bawl ding tamtak omlaite ah leng khekhat a dinga pangkhawm ding uh ahihdan gen hi. YVA Town Unit President in CCpur H/S gei a Store Room bawlna dia Rs. 1 lakh athawh ziakin YVA Town Unit kipak petmah ahihdan gen in, maban ah leng nasemkhawm dia mansa a om uh hi’n gen hi. 

Phungzathang Tonsing, MLA in philanthropic organization tuamtuam om lak ah hibang kipahpihna annkuang umkhawm pih YVA kia hilai ahihdan gen in kipak petmah hi’n gen hi. Press-te kiang ah briefing apiakna ah kigensiatna tengteng kuapeuh in tawpsan a maban kalsuan ding dan ngaihtuah khawm hunta chi a, politics ah naupang leh upalua omlou a, miteng adia election tuh theihna kihong ahihman in a utpeuh in tuhtheih hi’n gen a, election ah alui leh athak bangmah omlou a, candidate teng athak vek hiding uh ahihdan gen in, maban election om ding ah vote siangthou taka khiak ahih theihna dia panlak poimawh zaw hi’n gen hi. Thil paidan et vengveng in tuhun pen mimal kidem hun hi nawnlou a, kituak taka kal suan theihna dia panlak poimawhta ahihdan gen in, election pen kisiatna, vuak leh kisattuahna dia zat hun hinawnlou in, candidate nuam teng ki candidate theih a, chin leh chinlouh pen mipi khut a ngak zawk ding ahihdan gen hi. 

2016 beima in Job card ni 18 ading kia sanction in om 

Lamka, Dec-29: Chairman & Executive Director, DRDA/CCpur in July 2016 khasung in MGNREGS 2016-17 1st phase a Job Card holder te’n ni 18 nasepna ding in block 12- Lamka block, Thanlon, Singngat, Tipaimukh, Saikot, Tuibong, Vangai, Sangaikot, Samulamlan, Henglep, Kangvai leh Mualnuam block ah sanction a, Job Card holder te’n nasem in sum leng la khin uhi. Kumdang in Christmas ma in Job card holder te’n ni bangzahhiam nasep nang sanction in om a, mi tamtak in Christmas thawhlawm in zang uh a, phatuam mahmah hi’n kigen hi. Himahleh tukum  in mi tamtak in Christmas a Job Card holder te’ nasepna ding ni bangzah hiam govt in sanction ding in ngaihtuah mahleh tukum sung in 2nd phase ading sanction gintak huailou hi’n muanhuai tak apan kiza hi. Central govt in Job card holder-te nasepna ding sum sanction khin ta a, himahleh State Finance Deptt in Dist. tuamtuam ading sanction lou in hentang den a, Dec. 31, 2016 ma a sanction gintak huailou hi’n thusuak kingah hi. MGNREGS 2016-17 in Job Card holder te’ ni 1 thaman govt. in Rs. 197/- pia hi.

DC makaih in emergency meeting

Lamka, Dec-29: Lunminthang Haokip, IAS, DC/CCpur office chamber ah Dec 30, 2016 sunnung dak 1:00 in CCpur Dist. ah scheme bangzahhiam sepsuah (implementation) tawh kisai in akisaipih officer te’n emergency meeting nei ding uhi. Huai hun ah scheme khenkhat- Pradhan Mantri Krishi Sinchayee Yojana, Deendayal Upadhyaya Gram Jyoti Yojana, Pradhan Mantri Fasal Bima Yojana, Start Up India/Stand Up India leh e-National Agriculture Market (National e-Mandi) sepsuah dingdan genkhawm ding uhi.

1st D. Leikot Y/C Raising Day lawm

Lamka, Dec-29: D. Leikot khua ah zannitak in 1st D. Leikot Youth Club Raising Day lopna om a, Chief Guest in Paukhansuan Khuptong, Intending MLA Candidate, 58-CCpur A/C pang hi. Guest of Honours in Tongkam Guite, Chief of D. Leikot leh V. Ginkhenthang, Headmaster, CES/D. Leikot pang uhi. Chief Guest in agenna ah i gam dinmun pen survival stage ahihman in, i palai ding uh telna ah lunggel vengveng poimawh hidan in gen hi. Aman gam leh nam humbitna ding leh  maban ding awlmawhna liantak puakgik a nei in,  nam leh gam adia sem dia  kipekhia ahihdan gen in maban a MLA election hun ah mipi’n vote man phatak uh pechiat ding in ngen hi. Hiai bang a Youth Club in vai a saipen phattak a sak banah, khawsung kithutuak ahihna sulang ahihman in, hun hongtung ding ah leng kituaktak a tengkhawm  zel uh deihsakthu gen hi.

Lingsiphai ah inn khat kang

Lamka, Dec-29: Lamka akipan km. 6 vel ding a gamla Lingsiphai ah tunitak dak 9:00  lak in Kamlemlal @ S. Lalpi tenna inn a kipatna theihlouh in mei in kang a, van tuamtuam Rs 3 lakhs vel ding man kangtum hidan in kigen hi. Inn neite apan kizadan in, tunitak in Lalpi zi leh tate pawtkhia ua, amah kia lupna tung ah om in, kitchen lam apan electric meivak hidia gintak akipan  hi’n gen hi. Tenna inn pen kangtum kei mahleh insung a van omteng kang a, TV, refrigerator, lupna, steel almirah, silh leh teen tel in mei  a kang teng sum a tuat in Rs lakh 3 vel man ding kangtum hi. Meikang theihphet in khawmi te’n delh in  phelhmit thei uhi. Fire brigade te meikang phelh dingin kuan mahle uh a tunma un mipi’n phelhmit man ua, a mun tung manlou in kik uhi.

Kha 11 sung in malaria positive 68 mukhia

Lamka, Dec-29: Dist. Maralia Deptt./CCpur te’n January-November, 2016 kha 11 sung in khawsik ziaka damlou mi 17706 sisan test uh a, malaria positive 68 mukhia in huai lak ah malaria PF 37 pha a, official record in khawsik ziaka misi omlou hi. Kha 11 sung in August khasung in khawsik sisan test teng 1953 pha in tampen a, malaria positive leng tampen in 13 pha hi. January, March leh April, 2016 in khawsik ziaka damlou mi 3187 sinsan test himahleh malaria positive muhkhiat omlou hi.

PWC in thupuan bawl

Lamka, Dec-29: Pangzawl Welfare Committee (PWC) a President leh Secretary in Pangzawl khua tawh kisai mipi theih din thupuan poimawh bawl in thuthak ommasiah zuih hiding in taklang uhi.  Pangzawl khawsung ah gari speed 20 km/h sanga hatzaw atai phallouh, khawsung ah nitak dak 5:00 apan zing dak 5:00 kikal poimawh neilou-te’ ading in khawlai vak phal hinawnlou hi’n taklang uhi. Pangzawl khawsung tawna Bus Terminal lam ah thil hoihlou vahih ding peuhmah phal nawnlou ban ah khawsung ah khamtheih puaklut phal hilou hi’n taklang uhi. PWC in dan abawl bawhsia kuahiam matkhak om leh nam vai, beh-le-phung, khua leh khua vai in kuaman la theilou ding a, PWC in action alak bangbang kuaman nial theilou leh khase theilou ding hi’n taklang uhi.

Hinna Gimtui Gospel Album hong

Lamka, Dec-29: Hintui Production leh Vaiphei Artiste Association (VAA) GHQ pangkhawm a Gospel Video Album abawl uh ‘Hinna Gimtui’ kichi tuni’n IB Road a Synod hall ah honkhiak in om hi. Hun zatna ah Chief Guest in KL Muana Khaute, Socio-Gospel Reformer pangin hongkhia a,  Rev. Siama Phaltual in Pathian kiang ah lan hi. Guest of Honour in Khuplianmang, Dignified Village Chief cum Social Worker leh Functional President G. Ginkhanlal, Distinguished Govt. servant, GOM pang a, mun tuamtuam akipan deihsak leh ngainatu tamtak in uap uhi. Program sung in KKP Gangpimual, KKP Saipum, Dist. Choir Khuga Dist. KSP, Boijang Haokip leh Millerose Hoisangkim te’n Pathian phatna lasa uhi. Album ah la 10 om in Vaiphei Gospel Artiste leh Miss Millerose Hoisangkim in asak hi a, disc rate bikhiah omlou in a deihte’n mahni phal dan in leisak  theih hi.

Associate Porfessor in kaisang 

Lamka, Dec-29: Presidency College, govt of Manipur nuai a  Deptt. of History ah Assistant Professor semlel Mrs. Lianmawi Buhril w/o Hmangramlien Buhril of  New Lambulane, Imphal tunaizek in Associate Professor in kaisang hi.

Artisan ID card Registration Camp om 

Lamka, Dec-29: B. Vengnom Community ah Marketing & Service Extension Centre, Ministry of  Textile, Govt. of  India saina in tuni’n Artisan ID Card Registration Camp om hi.  Huai hun Chief  Guest in Thangso Baite, MP (Lok Sabha), Outer Manipur pang a, Functional President in Khaipao Haokip, MDC leh Guest of Honour in Ngamhao Touthang, EM/ADCC leh W. Birenjit Singh, Asst. Director, Handicraft, Directorate of  Commerce & Industries pang uhi.

Chief Guest in agenna ah, tulai a tribal sawl tuamtuam ibawl te’n market keklou ahihman in, handloom leh handicraft lam khansak poimawh a, huai dingin quality hoihtak a etkai a, concern department tawh kithuzak in, hamphatna tuamtuam omte i zat siam uh poimawh hi’n gen hi. Huai hun ah mun tuamtuam akipan in khutsiam silbawl a nekzong mi hunkhop paikhawm uhi. 

Bike in aphutkhak damzoulou in si 

Lamka, Dec-29: Chinlianthang (23) of  Daalkhai (Myanmar) tulel a Chennai ah Old Mahabalipuram Road (OMR) a Restaurant asem, zannitak dak 11:30 velin Restaurant apan staff room zuan a lampi kanlai bike in phukha in taisan a, Rajiv Gandhi General Hospital puaklut himahleh damzoulou in tuni zinglam dak 9:30 velin si hi. Aluang postmortem bawlzawh in ZYA Chennai inntekna in vuailiam hiding hi. Aman azi tawh ta 3 nei hi’n kigen hi.

SUUNNA:

Nengkap h/o Chingmuonkim of Muallum, zan in alawmpa P. Kamlianmang s/o Khamenthang tawh gamlak ah sabeng a kuan, alawmpan theikhial kha in kaplum kha a, tuni’n kivui hi.

Evan. Thongkhenthang Suante (65) s/o (late) Vumnok Suante of  Tahan,  Tedim (Myanmar) zan in BP stroke in si a, tuni’n kivui hi.

STATE THUTHANG:

TRI mun ah thanksgiving ceremony om 

Imphal, Dec-29 : Kamjong District Administration saina in tuni sunnung dak 2:00 velin Chingmeirong a Tribal Research Institute (TRI) mun ah Kamjong district thak bawlkhiak tawh kisai in thanksgiving ceremony om a, huai hun ah Kamjong mite kiangah development project 4 piak khiakna om a, huaite Phungyar leh Kasom Khullen a Tribal Inclusive Infrastructure Project, Phungyar a Augmentation of Water Supply Scheme leh Kamjong a Eklayavas Model Residential School ahi hi. Huai ah Chief Guest in Chief Minister O. Ibobi Singh pang a, Functional President in Dy. CM Gaikhangam, Guest of Honour in Revenue & Law Minister I. Hemochandra, PHED Minister T. Manga Vaiphei, Commerce & Industries Minister G. Konthoujam, Social Welfare and Co-operation Minister Ak. Mirabai Devi, Victor Keishing, Parliamentary Secy. (Tribal Affairs & Hills and IT) leh  ex-CM banah ex- Rajya Sabha MP Dr. Rishang Keishing-te pang uhi. 

Chief Minister O. Ibobi in a thugenna ah Manipur i chih state mipi teng a hi a, politics lam ah hamphatna ding hilou in ki vaipuakna lemtang zaw ding ngaihtuahna a district thak bawlkhiak hi’n gen a, community/orgn. khat peuh deihsak tuam ziak a bawlkhiak hilou a, akibang a hamphatna tuamtuam leh khantouhna om ding chi’n gen hi. Dy. CM in ei adia Jesu bang a hoihte tungah Judas bang a om louh ding gingta a, govt. in development works abuaipih lai in mipi pikawi tupna a kitheih siamlouhna bawl lou ding in ngetna bawl hi. Dr. Rishang in nam tuamtuam omte tengkhawm leh nam tawmzaw-te vengbit ding in ngetna bawl in thil hoih bawlte’n vualzawlna ngah ding uh chi hi. Hiai hun ah Kamjong district a DC Armstrong Pamei, District Administration a top official, Chiefs leh Kamjong mipite tel uhi. Akigendan in Phungyar a Augmentation of Water Supply Scheme bawlna dia Rs. 382 lakh bikhiah hi a, Non-Lapsable Central Pool of Resource (NLCPR) nuai a Centre in Rs. 381.87 lakh leh state in Rs. 38.19 lakh seng a, mi 1,630 val in hamphat pih ding uh a, huai ah Service reservoirs 4, Zonal Reservoir 6, Surface Water Tank, Conveyance & Distribution pipes, Chowkidar Quarter, Godown, gutter leh drop pipe om a, scheme ahihleh July 7, 2014 a kipan in vuah tui hawmkhia hi. Ministry of Tribal Affairs, Govt. of India nuai a tribal district teng ah Eklayavas Model Residential School bawlkhiak hi a, Kamjong a co-educational residential school ah Class VI-VII tan om in kum teng in student 480 enroll hiding hi. Student khat tungah kum 1 in student maintenance fee telin a poimawh bang kim a ding Rs. 42,000 bikhiah in infrastructure teng leng Ministry in seng vek a, 2017-18 academic session adia class VI-IX zilding student-te enrol hiding in gen uhi. 

Imphal Municipal Council apan mi 8 in INC zom nawn 

Imphal, Dec-29: BJP MLA lui Kh. Joykishan in Indian National Congress (INC) a zop nungin tuni’n Imphal Municipal Council (IMC) a Councillor leh member 8 in INC zawm nawn uh hi’n kigen hi. Huai tawh kisai in Congress Bhawan ah MPCC President T.N. Haokip, Chief Minister O. Ibobi, Dy. CM Gaikhangam leh MPCC a top functionaries te’n Councillor-te vaidawn uh a, huai ah Councilor Gaidon Rongmei in a thugenna ah government detdou tak bawlkhe thei ding INC kia abat ziak in Councilor dangte tawh INC zom ding in thutanna bawl uh chi hi. Chief Minister O. Ibobi in member thak 8-te vaidawn kawm in Manipur ah nam tuamtuam kalah kituahna kem hoih ding in ngetna bawl a, phaizang gam pen nam tuamtuam tenkhawmna ahihziakin nam tuamtuam te’n state khangtou hihna dia panla khawm ding in ngen hi. Tuni a INC zomthakte Gaidon Rongmei, Councillor Ward No. 1; Thokchom Punachandra Singh, Councillor Ward No. 2; Yendrembam Premila, Member Ward No. 1; Thokchom Suresh, Member Ward No. 2; Ngangbam Dhananjoy, Member, Ward. No 2; Meinam Chittrangada Devi, Member Ward No. 3; Kwairakpam Premjit, Member, Ward No. 25 leh Meinam Jiten Singh, Member, Ward No. 25-te hi uhi. 

Guv kiangah ngetna bawl

Imphal, Dec-29: Senapati district ADC members te’n political parties tawh kisai khakna omlou in Manipur Governor Dr. Najma A. Heptulla kiangah kinlam a Manipur tawh kisai a political leh khawtang buaina-te suveng ding in ngetna bawl uhi. Huai tawh kisai a Senapati ADC Chairman ML Markson in Senapati DC tungtawn a memorandum a piakna ah Council te’n Dec 19, 2016 in emergency meeting nei uh a, tua ah singtang leh phaizang gam a thagum suahna leh van ki halsakna thiltung-te mawhpaih thu puang uh a, sahkhua tawh kisai thilte hihsiat tungtang pom theilou leh piching huailou banah Raj Bhavan Imphal in hiai tungtang  ngaih poimawh pen a koih a, pan alak ding banah tunung a nam tawh kisai a buaina om ding-te dal din gen uhi. Naga Civil bodies leh Manipur govt. in district thak bawlkhiak ding tawh kisai a MoU ana kaihsa uh theisak thak a, hunpaisa a stakeholder teng leng thuzak ding chih himahleh state govt. in district bawlkhiak hun ah thuzak kuamah neilou a, ginomtak a stake holder-te tawh kihou khawm sangin MoU a suaikaih pihte man in jail ah koih lut uh a, mipi deihna tellou in Manipur govt. in sepaih thahatna zang in district thak 7 bawlkhia uh chi’n taklang hi.

Swachhata App hongkhia 

Imphal, Dec-29: Manipur Housing and Urban Development (MAHUD) Department saina in Imphal khawpi a ding in Citizen Complaint Redressal Mobile App banah ‘Swachhata App’ kichi CM Secretariat a Conference Hall ah tuni’n Chief Minister O. Ibobi in hongkhiatna nei hi. Hiai hun Dy. CM Gaikhangam, Cabinet Ministers, Soram Sunil Singh, Mayor, Imphal Municipal Corporation, Dr. J. Suresh Babu, IAS, Addl. Chief Secy. (MAHUD),  N. Gitkumar Singh, Director, MAHUD, Th. Harikumar Singh, Municipal Commissioner, IMC leh MAHUD dept. banah IMC a official te’n uap uhi. Swachhata Apps ahihleh complaint redressal mobile leh web platform hi a, Swachh Bharat Mission leh Ministry of Urban Development panlakna ahi hi. Huai apps tungtawn in gammi hihna neite’n khawpi tawh kisai thil (eg. Niin paihna mun) a post-te uh akisaipih city corporation-te kiangah lut sawn a, huai nungin ward a sanitary inspector te’n thil omna munte enkhe dia seh hiding uhi. 

Swachhata App ahihleh Android leh iOS smartphone neite’n zang thei uh a, Apple app store leh Google play store ah download theih ding hi. Download leh installation nung in user te’n a mobile number uh registration a bawl uh ngai a, huai nungin a mobile uah OTP mu ding uhi. Registration zawh nungin gammi hihna neite’n Apps tungtawn in niin paihna mun, niin paihna gari tunglou, dustbin ki hahsiang lou, mun phiat sianglou, gan si om,  public toilet ah tui omlou banah thil tuamtuam tawh kisai thilte a muh uh lim la (photo) in complain post thei ding uh chi’n taklang uhi. 

DESAM te’n kiphinna panthak

Imphal, Dec-29: Police te’n Oct 29, 2016 ni a Manipur University gate apan DESAM President  M. Angamba telin volunteer mi 4 man in Police custody ah soisakna a tuah uh tawh kisai a DESAM te’n  state govt. in kigolh khakna nei police offical-te gawtna piak dia phutna a bawl uh tangtun sak louh ziak in DESAM volunteer thangpaite’n tuni’n kiphinna panthak nawn uhi. Amau Home Minister Gaikhangam lim a hal banuah Dec 30, 2016 akipan govt. office paidan subuai ding uh hi’n gen uhi. Akigendan in DESAM volunteer te’n tuni sunnung dak 1:00 velin Keishampat junction ah Home Minister lim mei in halsawm mahleh uh Police team te’n va subuai in lim a hal sawmte uh va laksak uhi. Huai nungin DESAM volunteer te’n police-te kinawkpih uh a, Home Minister lim suhsak nawn in Waheng Leikai Lairembi area ah mei in hal uhi. Huailou in Imphal College a student pawl khat in leng state govt. in DESAM volunteer 4 soisakna tawh kisai a kigolh police official-te gawtna a piak louh uh mawhpaihna in tuni sunnung dak 1:40 velin Home Minister Gaikhangam lim hal uh hi’n kigen hi.

DEO-IW saina in Paid News tawh kisai training session om

Imphal, Dec-29: Maban 11th State Legislative Assembly Election 2017 ding tawh kisai in District Election Officer (DEO) Imphal West saina in tuni’n Lamphelpat a DC Office a Kombirei Hall ah Paid News, Complaint Monitoring & Call Centre tawh kisai in 2nd round training programme om a, huai hun ah Master trainer in Shrimati Waikhom Phajatombi, Asst. Commissioner to DC pang hi. Hiai hun Nodal Officer Media/ Communication, Nodal Officer Expenditure/Monitoring, media & audit official, Media cell member leh Complaint Monitoring & Call Centre member te’n uap uhi.

ACEO in Political Party meeting sam

Imphal, Dec-29: N. Anganjao Singh, Asst. Chief Election Officer (CEO)/Manipur in DC/DEO Office chamber ah tuni’n CCpur district a political party teng tawh meeting nei uh a, huai hun ah political party teng in election siangthou tak a sai ding, candidate te’n election guideline leh political party teng in Election Commission of India (ECI) instruction zui ding in ngetna bawl hi. Huai banah political party teng in Chief Election Officer (CEO) phalna tellou in public leh govt. building banah mimal inn ah political agendas/banners taklou ding in theisak a, kuapeuh in Election Commission of India (ECI) thupiak kalh lou ding leh complain omte sukveng hiding in gen hi.

Khoupum ah SDO/BDO office hongkhia 

Imphal, Dec-29: Noney District a Khoupum village ah tuni’n Chief Minister O. Ibobi in SDO/BDO office hongkhiatna nei a, huai ah CM in SDO office kihong thak a poimawh dan taklang kawm in mipite’n a hoih theipen a office zang dingin ngen hi. Manipur a nam tuamtuam tengkhawmte kalah muanna leh bitna tawh kisai a Dy. CM Gaikhangam dinmun ngenteltak in gen a, Dy. CM  pen politician mahni angsung kia thei mi ahih louh banah vaihawmna hoihtak om ding leh nam tuamtuam kalh kitheihsiam tuahna leh kituahna om ding deih mi hi’n taklang hi. Huai hun ah Dy. CM Gaikhangam, Revenue Minister I. Hemochandra, Senior IGP Kailun, Noney DC leh Khoupum sub-division SDO banah official tuamtuam te’n uap uhi. 

TUNI THUPI:

“Mikhial a lamhaihna a kipan a kiheisak pan sihna akipan akha ahondam ding a, khelhna tampi a khuhsak lai ding chih kithei heh.” 

– Jakob 5:20

EDITORIAL:

Kum beikuan ah i dingta

Laphuak siam mahmah khatin ataklatna ah ‘Zingin vasa te’n Pathian apaak uh” chi a, La dang mahin ‘Mihingte lou hilhngai omlou ahi’ ana chi hi. Ganhing leh thilsiam tuamtuamte tawh mihingte bel tehkak vual ahikei a, Lei leh Van siamtu Pathian in ganhingte leh mihingte ngaihtuahna suangtuah thei dingin lungtang bukimtak pia a, ahihziakin ganhingte’n Kha (soul) neilou a, himahleh, Pathian batpih a siam mihingte’n bel Kha (soul) kinei chih i gindan leh i pomdan ahi a, ginna (faith) pe’n sahkhaw tuamtuamte’n pansan (base) kinei vek a, gen-le-sak tamtak bel om ding hi.

I hoihna, diktatna, ginomna leh chihtakna ziaka kum kai thei ding dinmun ah om i hi zenzen kei a, i Biak Pa Pathian hehpihna leh zahngaihna ziak liauliau a hiai hun tantung ihi chih i theih uh poimawh hi. 2016 kumbul in hiai tan ka mu ngeingei ding chi ngam leng i omkei dinga, hiai tan pitung a i om pe’n thil lamdang leh kipahhuai mahmah ahi. 2016 kumthak innkuan kim a kipaktaka zang siausiau, lem kilakna banah program tuamtuam neikhawm zaizai himahleh, 2016 beikuan in i iit i ngaih mi bangzahin leitung hon paisanta ua? Mihing hinnate ikhut ah om mahmah lou ahihdan theihtheih in om a, Pathian in mihingte’ hinna tawh kisai a lampi honna sialsaksa om ahihdan theihtheih in om hi. Tutung Christmas leh Kumthak 2017 kal a kinai mahmah ta! Ni 2 lel khawngin samta chihtheih ahi a, huai kalah mihing bangzah hinna hong bei lai ding hiam chih igenthei kei hi.

A selam zawng a gen hilou in, vangtahhuaitakin zan nitaklam in unaunu khat bang pasal neikhit phet, a pasal-te’ inn a ann nelai, zan giak manlou, ann hakin si chih hitel hi. A pasal tawh kumthak 2017 muh kinem mahmah ding ua gintak hi a, hiai in mite’ lungsim sukha mahmah hi. Tualou in BP stroke kichi bangleng igam ah hong thang mahmah a, thakhat thu a kipuk phut ziakin mi hunkhop in khawvel honna nutsiat santa uhi. Newspaper-te ah niteng in suunna column ah misi kigelh gige a, hiai pe’n ‘Khualtaai’ chih theihin om hi. Newspaper kembit taktakte’n kumkhat sungin igam sung uah misi bangzah om zou diam chih enthei mahmah ding uhi. Newspaper te ah misi teng kigelh kim zoulou a, i theihchiang leh information hon pete’ a gelh hilel a, singtangdawn ahihkeileh khawpi sunga misi igelhkhak louh tampi petmah om dingin tuat theih hi. 

Eimi chi maile hang, pau kitheihtuah (Non-Naga-te’) lakah niteng in misi ki om gige a, population ratio enkawm a gending hi lehang death rate sang mahmah dingin ginhuai hi. India adia population sahna pe’n Uttar Pradesh, Madhya Pradesh leh state dangdang abel nikhat in mihing a za asim si gige ding ua, himahleh, eilawi population tawmchik ihih lai a, niteng a misi hunkhop i om gige pe’n study bawltham ching leh kilawm bang hi. Manipur context etin i opkhum uh area neuchik hi a, district 7 bawlkhiak ahihma a compact area a i om na mun uh CCpur district chauh hi a, itheih phak liai tante sunna a kigelhkhia i ngaihsut chiangin lungzinhuai mahmah a, birth rate sanga death rate sangzawta hiam chihtheih in om hi. I gentaksa bangin suunna a kigelhkhalou eimi Manipur state ah bangzah a om dia? State dangah bangzah a omkha dia chih hon ngaihsun sak  hi.

Research bawl ut taktakte’ adia bawltham ching mahmah khat ahihleh, population basis et-in ‘birth rate leh death rate’ bangzah a kikhai banhiam chih ahi. Sihna tuakte’ lakah naupang bangzah, tuailai bangzah, papi bangzah ahihkeileh upa lamte bangzah chihte et ngai a, Bible in mihing dam kum Kum 70 ahi a, himahleh, hatna ziakin kum 80 leng hithei chi a, tuni chiangin, mihing kum 100 a chin nung a si vang mahmah a, kum 100 phaktan dam zoute ngaihsanhuai mahmah uh ahihdan theihtheih hi. 

Tulel a eilawi i paidan a i paitouh zel uleh tuapan kum bangzah tanin i mi nam bang hong suak dia? Tulai in leitung mun tuamtuam ah nam mangthang kichi hunkhop omta a, mahni pau ngoihngoih thei nawnlou pumdim tamtak om a, tua ziakin hiaite bangziak hiam, bangchi leh bawldik theih a om ding hiam chih ngaihtuahtham apha nawn. A pil hia, anei zou zawdeuh hia chih theihkhang, Manipur state kichi tenna dingin tak nawnlou chih ziak leh education lam a kingakna tak hinawnlou chih ziakin vaigam ah iki sawlkhe zungzung ua, vaigam genlouh sapgam tanpha ah innmun det taktak nei hunkhop i om ua, innkuan (family) muangchangtak a teng (settled) leng hunkhop i om uh chih ithei hi. Tua mun a va teng nu leh pa tamtakte’n a tate uh eipau a houpih nak sangin sappau leh agampau in houpih ua, ahihna (identity) mang hiaihiai a, a gam mite zi leh pasal dingin nei ua, gammang himai uhi. Kumkhat in ni 365 a om a, eilawi mizah le phalou tawmchikte nikhat in mun tuamtuam ah mi 7 (approximate) in si bang hita le hang, naupiang khe zah 1/2 kan hikhollou maithei hi. Hiai tawh kisai suizui tuak isa hi. 

Bangteng hileh, hiai tantan honpi tung Pathian kiangah kipahthu igen ding ahi. Tu in December 30, 2016 mu ding ihita ua, ni 1/2 lel sungin leng a hatpen leh apilpen, azawng leh ahaupen tanpha in leng hinna chan theilai ihihdan i ngaihsut poimawh hi. Etsakna dingin, tutung Christmas bang innkuan kim a zang siausiau, Biakinn a ann nekhawm, kipaktak a kichibai tuah, himahleh, tua nung sawtlou a leitung hon nutsiatsan hunkhop i om uh chih ithei vek uhi. Kumtawp kuan a dingta ihi a, zingni-thaini in kumlui 2016 khakna i nei ding uhi. Kumlui kha manlou, kumthak lap manlou in mi bangzahin leitung i nuse lai dia chih i gen ngam hetkei! Tua ziakin, hun i neih sunsun-te a tamthei pe’n Pathian adingin pe lehang mimal leh innkuan adia vualzawlna hong hi diam chih theihin om hi. Kum beikuan ah i dingta a, i lampi enthak ni. Khawvel lah buai deuhdeuh a…!!!