UNC in economic Blockade sunzom ding
 |
| Picture source: http://timesofindia.indiatimes.com/ |
Imphal, Jan-7: United Naga Council (UNC) pawlin March 4 leh 8 a Manipur Assembly Election om hun tan ah economic blockade sutzop hiding in puang uhi. Manipur Naga-te kikhaikhawmna UNC in November 1, 2016 apan National Highway nih ah hunchiam omlou Economic Blockade puang uh a, tuni in Senapati ah Naga Tribe 16 apan makai-te’n Economic Blockade sutzop ding in thupuk uhi. UNC General Secretary Milan Shimray in tuni a gendan in Manipur Election hunah Blockade lakkhiak hidi’n thuthang om mahleh Election bei nung inleng sunzom ding uh chi a, Election pen Naga-te adia thil poimawh masa ahihlouh banah, pupa hun apan aluah uh gam leitang poimawh zaw hi’n taklang a, Naga-te gam ah kuamah in thupukna bawlkhum theilou ding chi hi. UNC in ahihleh Manipur a district thak 7 bawlkhiak deihlouh in economic blockade puang uh a, district thak bawlkhiakna ding ah Naga-te thuzak a omlou chih ziakin kiphinna khauhtak pankhia uhi.
HEADLINES:
Budget Session January 31-April 13, 2017 sung om ding:
Finance Minister Arun Jaitley in Feb 1 in Railway allocation telin General Budget (2017-18) luikhe ding
New Delhi, Jan-7: Cabinet Committee on Parliamentary Affairs (CCPA) in recommend a bawl dungzui in President Pranab Mukherjee in January 31, 2017 in Parliament Budget Session sam a, kumdang teng sang in nipikal 3 a baihzaw hi’n thusuak in taklang hi.
CCPA in Parliament Session part kimkhat masa kia bikhiah bawl a, February 9, 2017 in part kimkhat masa zou ding uh a, Feb 10- Mar 8, 2017 sung khawl in Session part nanung pen March 9-April 13, 2017 sung om ding hi’n kigen hi. Parliament Budget session a baih theipen a neih dia bikhiah na ziak ahihleh ruling BJP makaih NDA government in April 2017 a financial year kipat apan ministry tuamtuam a fund allocation bawl a omte sepkhiak pah ding tupna a neih ziak hi’n kigen hi.
January 31,2017 in Lok Sabha leh Rajya Sabha Joint Session (Parliament Joint Session) ah President Pranab Mukherjee in thu gen ding a, President’ thugen zawh in Finance Minister Arun Jaitley in pre-budget Economic Survey pawlut in genkhawm ding uh hi’n leng thusuak in taklang hi. February 1, 2017 in Union Finance Minister in Railway allocation tel in General Budget (2017-2018) luikhe ding hi.
Opposition pawlte’n February 4, 2017 apan India state 5 a Assembly election om ding ziak in Budget luikhiak hun zekai sak ding in Election Commission of India (ECI) ah phu uh a, gelhthawh in President Pranab Mukherjee kiang ah leng ngen uhi. Hiai tawh kisai Government apan dawnna puangkhe ding in ECI in Cabinet Secretary PK Sinha kiang ah leng theisak uh hi’n kigen hi. Huchi kallak ah, tuni’n President in January 31-April 13,2017 sung Parliament Budget Session om ding in sapna bawl hi.
January 31, 2017 a kipan ding Parliament Budget Session ah Winter Session sung a passed man louh bill hunkhop luikhiak hiding in kigen a, tuate ahihleh Minister of State for Shipping Pon Radhakrishnan in Lok Sabha a December 16, 2016 a puaklut ‘The Merchant Shipping Bill 2016’ leh ‘The Major Ports Authorities Bill 2016’; December 15, 2016 a Minister of Labour & Employment Bandaru Dattatreya in Lok Sabha a luikhiak ‘The Payment of Wages (Amendment) Bill, 2016’; Minister of Tribal Affairs Jual Oram in Lok Sabha a December 14, 2016 a luikhiak ‘The Constitution (Scheduled Castes & Scheduled Tribes) Orders (Amendment) Bill,2016’; Minister of Human Resource Development Prakash Javadekar in Lok Sabha a December 9, 2016 a puaklut ‘The National Institutes of Technology, Science Education & Research (Second Amendment) Bill,2016’; Lok Sabha a November 28, 2016 a kiluikhia ‘The Taxation Laws ( Second Amendment ) Bill 2016’; Minister of Health & Family Welfare J. P. Nadda in Lok Sabha a November 21, 2016 a puaklut ‘The Surrogacy (Regulation) Bill 2016’ leh Minister of State for Shipping Mansukh Mandaviya in Lok Sabha a November 21, 2016 a luikhiak ‘The Admiralty (Jurisdiction & Settlement of Maritime claims) Bill 2016’ chihte hi uhi.
TUALSUNG:
January 29, 2017 in IPPI first round om ding
Lamka, Jan-7: India government in gamsung a Polio (Zeng) natna hihbeina dia kum tenga polio eradication programme aneih sepsuahna January 29, 2017 in naupang kum 5 nuailamte kiang ah zeng dalna damdawi dawnsakna first round Intensified Pulse Polio Immunization om ding a, April 2, 2017 in second round om ding a, February 7, 2017 in Mission Indradhanush pat hiding hi. CCpur district in transit booth tawh sim in division 7 a khen in polio booth 444 hongin naupang kum 5 nuailam 37,649 kiang ah zeng dalna damdawi dawnsak sawm in a kisaipih te’n panla lel uh a, damdawi vial 2235 hongtung hi’n DIO/CCpur apan kiza hi.
Tipaimukh, Parbung leh Vangai Rang ah supervisor 2 leh sectoral supervisor 13 etkaina nuai ah polio booth 58 hongin naupang 4050 kiang ah damdawi dawnsak hiding a, Thanlon leh Sinzawl Division ah supervisor 3 leh sectoral supervisor 9 etkaina nuai ah booth 47 hongin naupang 3069 damdawi dawnsak hiding hi.
Singngat, Behiang, Zezaw Division ah supervisor 3 leh sectoral supervisor 12 zat hiding a, booth 53 kihong in naupang 2886 damdawi dawnsak hiding a, Henglep Division ah supervisor 2 leh sectoral supervisor 14 etkaina in booth 67 hongin naupang 4808 kiang ah damdawi dawnsak hiding hi. Saikot, Samulamlan Block ah supervisor 5 leh sectoral supervisor 21 zat hiding a, booth 112 kihong ding a, naupang 10,692 zeng dalna damdawi dawnsak hiding hi’n kigen hi. Town Area ah supervisor 2 leh sectoral supervisor 16 etkna in booth 85 hon hiding a, naupang 10,763 damdawi dawnsak hiding a, tuaban ah town area ah sectoral supervisor 2 etkaina in transit booth hon ding a, naupang 1381 damdawi dawnsak hiding uhi. DIO in first round adin damdawi vial 2759 ngen mahleh state in vial 2235 kia pia hi’n kigen hi.
Guta’ pawlkhat in godown luh
Lamka, Jan-7: Tipaimuhkh Road, Hiangtam Lamka a Century Building tuzan in meltheihlouh guta pawlkhat in luh uh a, van tamtak gukhia uh hi’n kigen hi. Huai inn ahihleh C. Hangshing, MCS (Retd) a hi a, ground floor lamlian tawh kinaihlam mi tuamtuam in dawr din luah uh a, anunglam a room khat vaite’n luah in adangte’ dawr bawlte’n van koihna (godown) din zang uhi.
Innkuan 4 in first floor luah in top floor ahihleh Apple Dental Clinic te’n luah uhi. Guta te’n pilsiamtak leh hiamhei zangin Bloomy’s Colour & Hardware Store neitu’n godown dia aluah uh kongkhak chabi kalhna teptan in asung ah lut in van tuamtuam la uh a, bangzah lakhia uh hiam chih bel theih hilou hi. Gutate’n ahihleh adeih teng uh a lakkhiak zawh un inntung (terrace) ah kaltou in well khau zangin kikhai khia in kihem mang uh a, leader jacket khat leng taisankha uhi.
Ground floor luah vaite’ gendan in, zan nitak dak 10:00 velin gate sungkalh in ihmu uh a, thawmging a zaklouh banuah koi akipan lut uh hiam leng theilou uh a, amau luahna inn leng ni 4 vel paita in guta pawlkhat in ana luhsawm ngei uh hidan in leng gen uhi. Lamka khawpi sunga ah tulai in guta lang in, gutate’ leng pilsiam leh ngamthoh uh ahihdan a sulnung ua kipan theih theih a, kuapeuh pilvan poimawh hi’n kilang hi.
Measles leh JE dalna kapdin theisak
Lamka, Jan-7: CCpur district mipi’n kum teng phial in khawlum leh khawvot kikhek hun chiangin natna tuamtuam tuak sek ua, naupang kum 2 nuailamte measles leh Japanese encephalitis akipan venbit ahih theihna ding un District Immunization office (DIO) ah damdawi kikap theihgige hi’n DIO/CCpur apan kiza hi. Naupang kha 9-12 kikalte 1st dose leh kha 16-24 kikalte adin 2nd dose kikap thei ding hi’n leng kigen hi.
JE leh measles damdawi kikap in asepna din kal 4 sung vel ngai ahihman in a hileng hun a kap in damdawi in nasem manlou ahihna ah omzia neilou a, hileng kipatma a kikap poimawh hidan in DIO in gen hi. JE leh Measles venna damdawi dose 1300 val om ahihman in naupang kum 2 nuailam nei khempeuh in kapsak teitei din DIO in theisak hi.
Post box renewal ngai
Lamka, Jan-7: Tuibong a Post office ah mi 100 val te’n post box nei in laithon leh thil poimawh tuamtuam Post office apan hongpai te akisaipih te’n post box ah koihzel uhi. Himahleh mi tamtak in post box renewal louh in koih uh a, akisaipih te’n renewal bawlngai hi’n gen hi. Huailou in Post office, Tuibong ah ATM card 200 hongtung lak ah mi 80 vel in apply pan uh a, account neite’n apply theih hi’n kigen hi.
Thangbiaklian Hangzo in Manifesto puangkhe ding
Lamka, Jan-7: 58-CCpur assembly constituency a MLA intending candidate Thangbiaklian Hangzo in Jan. 9, 2017 in Hiangtam Lamka a YPA GHQ hall ah manifesto puankhiakna nei ding hi. Hun zatna ahihleh Central Election Committee-te’n makaih ding a, intending candidate in manifesto puangkhia in thugen ding a, huai hun deihsak leh ngainatua te’n uap din CEC in chial uhi.
Smart Card a khek ding mi tam
Lamka, Jan-7: Manipur a Driving Licence Manual a kizang (lai akigelhte) February 2017 tan in Smart Card a khekvek ngai a, Febuary 2017 zawh in manual driving licence teng asi leh zattheih nawnlouh a ngaih hiding hi’n DTO/CCpur apan kiza hi. Huai tawh kisai tulai in DTO office ah Manual driving licence nei te’n Smart card a kheknuam mi tamthei mahmah a, ni 1 in 50 vel zou in khomial tanpha akisaipih te’n buaipih uhi. Min, identification mark leh adangdang computer ah gelhlut vek angaih ziak in kintaka hihtheihlouh hi’n kigen hi.
Inspector.R.K Anil in join
Lamka, Jan-7: Bishnupur Police Station apan R.K Anil in tuni’n CCpur Police Station ah Officer i/c lending in SP/CCpur office ah hong join a, tuni sunnung in office kai in nasep pan hi.
HarLiss Salon hongkhia
Lamka, Jan-6: Pastor V. Khamvum in zan zingkal dak 8 velin Bungmual (Lamlian Veng) ah Judy Vungthianlun Hanghal in abawlthak ‘HareLiss Salon’ kichi hongkhia hi. Judy Hanghal bel Karnataka khawpi Bengaluru a B: Blunt Academy apan graduation zou in Lamka ah ‘beauty parlour’ hong dinkhia hi. Hiai hair/beauty/skin (male/female) bawlphatna mun poimawh mahmah hidingin leng kigen hi. B: Blunt Academy/ Company neitu ahihleh actor Farhan Akhtar zi Adhuna Bhabani a ahi.
Mi 2 in PS ah thau koihlut
Lamka, Jan-7: March 2017 khasung a MLA Election dingziak in Dist. Magistrate/CCpur in DC’s office apan licence nei thau kipekhia teng akinaihpih Police Station ah koihlut ding in theihsakna bawl a, tuni’n mi 2 in Lamka Police Sation ah single barrel koihlut uhi. OC/CCpur PS in Chief Association/Organisation-te kiang ah amau area a licence nei thau (gun) leh atang (ammunition) koihlut sakchiat ding in theisak uh a, Police Station ah thau koihlut lou teng Dist. Magistate thusuak bang a licence cancel sak hiding in taklang hi.
Zu hunkhop mankhia
Lamka, Jan-7: CCpur Dist. Police Deptt a Drugs Cell & Anti Alcohol Unit te’n tuni’n Tipaimukh road, Hill Town ah zu hunkhop mankhia in Police Station a Malkhana (store room) ah koih uhi. Zu kimankhia-te Indian Made Foreign Liquor (IMLF) bottle 52, grape wine bollte 3, local zu litre 16, sekmai zu bollte 33 leh beer (cane) 18 hi’n kigen hi.
Office hong ding
Lamka, Jan-7: T. Goukhomang, ZEO/CCpur panlakna tungtawn in CCpur Govt. High School a room kizangloute temporary office dia puahthak zawhsiang ahih tawh kiton in January 11, 2016 zinglam dak 11:00 in DC/CCpur Lunminthang Haokip, IAS in hongkhia in Upa L. Taithul in lan ding hi.
Neighborhood Youth Parl
Lamka, Jan-7: Nehru Yuva Kendra, Singngat saina in tuni’n Singngat Sub-Division huapsung Tangpijol community hall ah neighborhood youth parliament om a, huai hun ah khawsung mi tamtak tel uhi. Hun zatna Upa Chinsuonhang local pastor in hong hi.
Jameson Hangshing, SDO Singngat in ethical voting thupi pansan in thugen a, mahni vote manphatdan kuapeuh in a thak athei ding leh siangthoutak a zang dingin paikhawmte ngen hi. Maban election om ding tawh kisai siangthou theipen a neihna ding leh kuapeuh in mahni vote manphat dan theihsem ding tupna asai uh hi’n kigen hi.
Regular Nurse thakte tawh meeting ding
Lamka, Jan-7: Dr. Kimngaihching, CMO/CCpur makaih in January 12, 2016 zinglam dak 11:00 in CMO conference hall ah CMO nuai a regular nurse lak thak 14-te meeting neihpih ding hi. Regular Nurse lakthakte ahihleh Lina Niangneikim, Nemneikim Haokip, Nengneilam Haokip, Nameirakpam Kamala Devi, N. Roselyn, Ngaihoihvung, Luaizakim, Nengneihoi Haokip, Rosy Themboi Haokip, Rajia Serto, Joycee Taizoukim, Hauzaman, Bembem Chanu leh Vungmuankim hi uhi.
St.Stephen English School in kipahpihna nei
Lamka, Jan-7: D.Phailien a St. Stephen English School te’n tuni’n Douminlun Singsit, National Child Scientist leh alawmte kipahpihna nei uh a, Special Guest in Dr.Laljagou Neihsial, Dist. Co-ordinator, National Children’s Science Congress, 2016 pang hi. Robin S.Pukhram, Principal St.Stephen English School in Group Leader Douminlun Singsit, Co-workers- Tabitha Manthenkim, Khuolnunmawi, Lhingneinem, Tingngaitheng ban ah guide teacher Sir.Somokanta Konjengbam kiang ah Award pekhia hi. Douminlun Singsit leh ateam te’n December 27- 31, 2016 sung Maharashtra State a VIIT, Baramati ah “24th National Children’s Science Congress 2016” ah vatel uh a, award ngah uhi.
CCpur Dist. in State Level ah 1st la
Lamka, Jan-7: Nehru Yuva Kendra Sangathan (NYKS)/Imphal saina in tuni’n Imphal a Youth Hostel ah ‘State Level Declamation Contest on Patriotism & Nation Building’ kichi om a, Chief Guest in Prof. N. Mohendro Singh leh Functional President in Sahib Singh, State Director NYKS/Imphal pang hi. Kidemna ah 1st in C. Thangminlal Doungel of Saihenjang village, CCpur pang a, kipahman Rs. 25,000/- + Certificate ngah hi. 2nd in Ms Yangmila Shadang of Ukhrul pang in kipahman Rs. 10, 000/- + certificate leh 3rd in Lokendro Singh Chanam of Bishnupr pang a, kipahman Rs. 5,000/-.+ Certificate ngah hi. Kidemna hun ah Judge in Ms Anjalika Samom, Columnist/Social Activist; Dr Dhanabir Laishram, Social Scientists leh N. Ibungochoubi pang uhi. Delhi ah January 20, 2017 in ‘Nationlal Level Declamation Contest on Patriotism & Nation Building’ competition om hun ah Manipur State ai-oh (representative) in C. Thangminlal Doungel of Saihenjang village, CCpur kuanding hi.
SUUNNA:
Rev TK Pauva (77) grandfather of Rose Lalhlupui Shakum of Hmarveng tunitak dak 6:00 velin cancer in si a, Jan 8, 2017 in kivui ding hi.
Lalramlawm (50) s/o Zochawilien Traite of Hmarveng zanhal nitak in cancer in si a, zan in kivui hi.
STATE THUTHANG:
Govt. office-te ni 3 suti ding
Imphal, Jan-7: Manipur government in holiday list abawl dungzui in Jan 8, 2017 (Sunday) suti a, huai zawh Jan 9, 2017 (Monday) Imoinu Iratpa-death anniversary of (late) Maharaja Gambhir Singh ziak in suti ahihbanah Jan 10, 2017 (Tuesday) leng Gaan-Ngai ziak in suti hiding a, ni 3 sung akizom in govt. office-te suti ding uhi. Manipur a om bank-te Jan 8, 2017 leng ngeina dan in suti ahihbanah Jan 10, 2017 leng Gaan-Ngai ziak in suti ding uhi.
Student 2 mei in kanglum
Imphal, Jan-7: Senapati district a Makhan Centre ah zan nitak dak 7:30 velin tenna inn khat mei in kang tum a, huai ah unau 2 leng kanglum uh hi’n kigen hi. Unau-te Marine (18) leh Chamaikho (21)-te Kapani Hekha of Makhan Centre tate hi a, ataksa uh kangse nak mahmah hi’n gen uhi. Marine ahihleh St. Xavier School Makhan a Class-9 leh Chamaikho ahihleh JNV Mao a kai hi a, short circuit ziak a meikang kipan hiding in gen uh a, meikang ziak a van kangtum teng Rs. 12 lakh val ding hi’n gen uhi.
Lamphel CRPF camp ah bomb puak: Jawan 2 liam
Imphal, Jan-7: Lamphel Police Station in a huamkhak Lamphelpat a 143Bn CRPF camp gei ah tunitak dak 6:30 velin IED bomb puak a, huai ah jawan 2 liam hi’n gen uhi. Akigendan in Ct. Visvender Jat (24) leh Ct. Brajesh Singh (28) te’n duty zawh in inn luahna mun a zawtlai un uah bomb puak in liam uh a, bomb neng ziak in Visvender khut veilam liam a, Brajesh ahihleh alu a liam ziak in a dinmun lauhthawng huai a, jawan 2-te RIMS hospital ah puaklut in om uhi.
All Political party meeting om
Imphal, Jan-7: Manipur assembly election hun ding puankhiak tawh kiton in Manipur ah Election Model Code of Conduct Jan 4, 2017 akipan zat hi a, huai tawh kisai in Bishnupur DC office saina in Mini Secretariat a conference hall ah zan in all political party meeting om hi’n gen uhi. Huai hun ah M. Harekrishna Singh, District Election Officer makaihna nuai a meeting om a, huai hun ah Model Code of Conduct (MCC), Election Expenditure Monitoring (EEM), Media Certification and Monitoring Committee (MCMC) tungtang genkhawm uh a, political party teng in ECI te’n election siangthoutak a sai theihna dia zuih ding dan a bawlte uh zui chiat din DEO in ngetna bawl hi’n gen uhi.
Poll tawh kisai genkhawm
Kangpokpi, Jan-7: Kangpokpi DHQ a DC Complex a Multi-purpose Hall ah tuni’n state legislative assembly election ding tawh kisai in political party tuamtuam-te meeting om a, huai hun ah Model Code of Conduct, expenditure registers, defacement of property telin thu tuamtuam genkhawm uh hi’n kigen hi. Huai ah DC/Senapati banah District Election Officer C. Arthur, IAS in a genna ah March 4, 2017 ni in buaina omlou a vote khiak theihna dia political party te’n buaina bawl lou ding leh Election Commission of India (ECI) guideline-te zui chiat ding in theisak a, campaign ding tawh kisai in phalna lakmasak ngai a, huai tawh kisai in political party teng in a campaign hun uh a kiphut tuah louhna dia pan alak ding uh chi hi. Political party palaite kiangah poster, banner zangin campaign na dia public leh private property zang lou ding in theisak a, huai ahih keileh ECI thupiak kalhna hiding a, parties te’n private property zat theihna dia a neite kaingah phalna a lak masak uh ngai a, political party te’n candidate dangte minsiat sak tupna a poster taklou ding in leng theisak hi.
Aman a genzelna ah paid news leh media a instigating content te’n Model code of conduct (MCC) kalh a, District Level Media Certification and Monitoring Committee (MCMC) te’n political advertisement tawh kisai a pre-certification adia ECI in instruction bawl a, huaite print leh electronic media a advertisement suah theihna dia alou theilou a zuih ding hi a, District Level MCMC te’n print leh electronic media a election thutawh kisai-te enkai ding leh akisaipih thuneite kiangah tun ding uh chi hi. DEO in agenzelna ah election tawh kisai a complain ahihlouh leh permission-te website www.ceomanipur.nic.in tungtawn a apply ding hi a, complain tawh kisai Samadhan portal leh permission tawh kisai Suvidha portal ah apply ding chi hi. Election Commission guideline dungzui a MCC kalhte tungah action lak hiding a, hiai hun ah Rang Peter, MCS, Chief Executive Officer, ADC Senapati, SDOs Senapati leh Kangpokpi, akisaipih department official-te banah INC leh BJP pailaite’n uap uhi.
Trinamool te’n seat 60 ah candidate koih ding
Imphal, Jan-7: All India Trinamool Congress (AITC) te’n 11th Manipur legislative assembly election hun ah seat 60 teng ah candidate koih ding uh hi’n kigen hi. Huai tawh kisai in AITC office ah tuni’n press conference om a, huai ah election tawh kisai a party panlak ding dan bawl dia Imphal hongtung AITC Vice President Mukul Roy in media-te tawh kimuhna hun ah seat 60 teng a candidate koih in election tuh ding uh chi a, Congress leh BJP-te ‘vaihawmna ding duh party’ chi’n ngawhna bawl a, party 2 te’n mipi hamphatna dia nasem lou in vaihawmna lettheihna dia mipi khem uh chi hi. Hiai hun ex-MP banah AITC Manipur Unit President Kim Gangte leh leader tuamtuam te’n uap uh hi’n kigen hi.
Poster, flag leh banner lakhia
Kangpokpi, Jan-7: Chief Electoral Officer Manipur thupiak dungzui in District Administration leh Police team te’n Kangpokpi district ah Election Model Code of Conduct (MCC) zat nungin tuni’n Kangpokpi district a A/C 3-te ah phalna omlou a banner, flags leh poster paper tawh kisai a political advertisement-te Committee for Prevention of Defacement of Property member-te muh in lakhia uh hi’n kigen hi. Huai tawh kisai in Gamnom Sapormeina a private building leh public property a BJP-te flag leh banner kitakte lakhia uh a, Kangpokpi bazar ah leng D.I. Th. Biren, A.I. Moses Anth leh A.I Punya Prasad-te muh in zan zingsang a BJP-te flag leh banner lakhia uhi. Kalapahar area a NH ah phalna lalou a BJP flag kitakte leng lakhia uh a, Kangpokpi district police te’n Saikul Hill Town bazar ah bang a kitak poster-te lakhia uhi. ECI in election hun tawh kisai thupuan nung dakkal 24 sung a Government property ah election tawh kisai a wall writing, poster, flag leh banner-te lakhe ding in theisak a, private property a phalna lalou a political advertisement-te dakkal 72 sung a lakkhiak dign in leng thupia uhi.
CAF & PD Minister vau
Imphal, Jan-6: Maoist Communist Party Manipur te’n CAF & PD Dept. a post tuamtuam lakna dia recruitment tawh kisai dik loutak a sai leh golhgukna ziak in complain hunkhop mu uh a, huai ziak in CAF & PD Minister kiangah vauna bawl uh hi’n kigen hi. Maoist te’n CAF & PD Dept. a post tuamtuam adia written test examination hun a tellou candidate khenkhat leng selected list ah tel uh a, huai banah Chief Minister sanggam-te ta leh Minister leh MLA-te tanau tamtak banah CAF & PD Minister bial sung a mi tamtak a tel in recruitment process pen diklou tak a sai ahihdan taklang a, huailou in Jan 4, 2016 ni a interview leng Jan 3, 2017 in a result suak a, hiai in mipite Manipur govt. in mibang lou a koih ahihdan ensak a, huai tungtang Maoist te’n suizui ding uh a, mawhna neite tungah action lak hiding in leng taklang uhi.
RIMS firing victims memorial day
Imphal, Jan-7: RIMS Hospital Victims Memorial Trust saina in CRPF te’n Jan 7, 1995 a RIMS campus ah thau akapna uah nautang mi 9 si-te phawk gige na ding in tuni’n Victim Memorial Day a 21 veina zatna om a, sihna tuak innkuante leh Auto Rickshaw Driver te’n sihna tuakte tungah zahtakna latsakna in pak piak uh hi’n kigen hi. Huai ah M. Subashchandra, Trust Member in a genna ah Manipur mipi te’n Armed Forces Special Power Act 1958 pansan a Indian Armed Forces te’n mi a soisak leh a thah uh doudal uh a, tunung a huai bang a thil a tung nawnlouhna dia memorial day sai uh chi’n gen hi.
MHA ah tripartite talk panding in ngen
Imphal, Jan-7: Manipur govt. in Union Ministry of Home Affairs (MHA) kiangah India govt., Manipur govt. leh NH 2-te ah indefinite economic blockade bawl UNC kalah tripartite talk pan ding a ngetna bawl uh hi’n kigen a, huai tawh kisai in Chief Secretary O. Nabakishore in Union Home Secretary Ministry of Home Affairs ah ngetna pelut hi’n gen uhi.
MPP President N. Sovakiran khahkhia
Imphal, Jan-7: Ukhongsang a election tawh kisai a buaina ziak in Jan 4, 2017 ni a mat a om Manipur People Party President N. Sovakiran tuni a khahkhiak hi’n gen uhi.
TUNI THUPI:
“Mi kuapeuhin na a sep leh Pathianin hatna a piak bang jelin sem hen; huchiin Jesu Christ ziakin Pathian tuh thil bangkimah pahtawiin a om thei ding, thupina leh vaihawmna tuh khantawna amaha ahi ngala. Amen.” – I Peter 4:11
EDITORIAL:
Politics leh Innkuan sung buaina
Sapte’n family feud ahihkeileh dispute a chih uh thilthak ahikei hi. Nidang lai Ancient India hunah leng innkuan sung buaina leh pa leh tapa kala kitheihsiamlouhna ziaka kidouna leh kihehsanna ana om hita hi. Maban ni tamlou nunga Assembly election omna ding mun Uttar Pradesh ah pata kal buaina ziakin Samajwadi Party sungthu liing dipdip a, mi tamtakte’n hiai pen India khangthu adia a khatveina asak khak ua leh hibang buaina om mun mahmahta ahihdan atheihsiam uh poimawh a, eilawi leng i maban ding uh ahihdan mengmuhna ineihkhawl uh poimawh hi.
India adia state lianpen banah mipi sahna pen Uttar Pradesh ahi hi. Regional party SP adingin largest political dynasty hun hi a, Yadav te’n akhang akhang a aluah uh bang in ngaihtheih hi. A taktakin Samajwadi Party sungah vaihawmna len Yadav innkuan apan mi 20 kan hilou ua, ahihziakin UP state pei lumlet zou mahmah uhi. Tuapen mawhsak huai hilouin akhuakpilna ziak uh ahi. Hiai mah thei tinten kawmin, BJP pawlin Gandhi family in bangtan India mipi makaih ding hiam chi’n Indira Gandhi hun apan ana tattou den ua, Rajiv Gandhi in Prime Minister hon len a, tua hun in leng tuabang mah kampau om a, huchi’n Sonia Gandhi in Prime Minister lenthei ding dinmun a hong om takin naktakin dal hinawn a, atapa Rahul Gandhi leng nan theihtawp a nan in om hi.
Uttar Pradesh a Mulayam Singh Yadav leh atapa Akhilesh Yadav kal buaina pen BJP adingin political advantage liantak ahi ding. A pa’n national president hihna len a, atapa Akhilesh Yadav in chief minister len hi. Sum-le-pai vai gending hita le hang, Mulayam sangmah in a tapa Akhilesh in gou le gam hauzaw maithei a, thuneihna leh vaihawmna (power & administration) kituhna lel hi’n muhtheihin om hi. Bihar Chief Minister Nitish Kumar in a gou neih aputlakna hunah ama sang mahin a tapa neihsun hausa zawlai chih ahi.
Innkuan sung buaina i chih chiangin mi chih ibuaina uh a kibang zenzen kei a, sum-le-pai ziak abuaina, gou kituhna, gam le leitang kituhna leh adangdang buaina chi tuamtuam om hi. Business vai gen-le-hang, India adia mi hausapen Dhirubhai Ambani ahi hi. Amah hong sih hun in atapa nih Mukesh leh Anil te’ kalah buaina thupitak hong om a, a business uh hong pukse (collapse) phialin om a, himahleh, a nu uh vaihawmna siamna ziakin Court tungtawnin kilemna hong om thei hi. Politics vai genle hang, Tamil Nadu Chief Minister lui banah DMK Chief Karunanidhi tapa 2 te’ kalah leng kitheihsiamlouhna liantak ana om hi. Tu in Uttar Pradesh state a vaihawmna len Samajwadi Party sung buai mahmah a, huai leng innkuan sung buaina mah ahi hi. Pa leh tapa kal a buaina himhim a chiangin huai in hoihna sangin siatlam manawh zaw mahmah hi. Innkuan sungah numeite hia, ahihkeileh moute a kigolh tamchiang in thil tamtak sukha ban lai hi. Pa neute hia ahihkei innkuan sung nai mahmahte pen thutuam hi a, pa in a suan tapa leh pa kala kitheihsiamlouhna hong om chiangin sautak kang kha sek hi.
Zawn leh hauhthu ah leng thil a kingatham a, sum i neih louh luat chiangin innkuan sungah leng nawngkaina liantak omkha seka, ki mawhsaktuahna, ki hehsan tuahna leh kitheihsiamlouhna piangkhasek hi. Sum le pai i hauh chiang in thuneihna (power) kichi mihingin ki lunggulh khasek mah hi. I pau upa leh thupil ah ‘Khuk in kha pellou’ kichi a, bangchituk in pil in siamin, nei zou le hang le i pianna pa ngoihngoih khuak leh ngaihtuahna kikheng zou ngeingei dingin gintakhuai lou hi.
Tulel a Indian politics adia mi lar leh news bawltu ahihleh Yadav family ahi. UP CM Akhilesh Yadav in apianna pa Mulayam Singh Yadav achou banah a paneu Shivpal Yadav deihkhop in tauh hi. Amau innkuan sung buaina ah va kigolhni chihna thu hilou in, Akhilesh fuihtu leh gumtu mi atam chihna hi mai hi. Apate unau choungam kichi mihing khat ahi a, sum le pai banah thuneihna liantak a tawi a, muang leng akimuang chihna himai hi. Alehlam ah Samajwadi Party hilou in party dang apan SP vaihawmna (dynasty) akiat ding deih ziaka plan leh policy ana bawlbawl mi om adiam chih theihin om hi. Pata leh unau kal tokse ut a kipei mi hunkhop a om ngeiding chih gintak huai a, hiai leng politics sang mahmah khat ahi nawn. Khanawn chiangin UP state in assembly hon phu ding ua, hibang buaina tuakkei le uh SP mahin vaihawmna len nawn ding uh chih chiangkuangtak in muh kilkel theih a, a sau muzawte’ plan hia ahihkeileh amau innkuan sung buai taktak mah hiam chih dotna liantak ahi. Party symbol ‘Cycle’ tawh kisai pa leh tapa kalah kuan tangding hiam chih gen haksa mahmah hi. A kigendanin, Bihar Chief Minister Laloo Prasad Yadav banah Lok Sabha Speaker lui Purno A Sangma innkuante bel kihou thei mahmah ua, apa kalh a gamtang innkuan sungah kuamah om tadihlou chih ahi.
India adingin Yadav family kia buai ahikei a, Prime Minister lui Indira Gandhi leh a mounu Union Minister Maneka Gandhi te Ui le kel bang ua, tuni chiangin Nehru-Gandhi family pen mite’n muanlouh lawh uhiam chih ngaihdan hon piangsak thei ua, Tamil Nadu CM lui J Jayalalithaa si mahleh, DMK Chief Karunanidhi tapa nih MK Stalin leh MK Azhagiri buaina ziakin TN state ah DMK in kiat lawh hithet ua, AIADMK adingin vangphatna hong suak maimah hi. Madhya Pradesh ah leng Scinda te’ innkuan buaina ziakin vaihawmna khahsuah ua, Maharashtra ah Thackeray innkuan leng buai mahmah hi. Andhra Pradesh state ah NT Rama Rao’s (NTR) a sih nung in a zi in NTR-TDP kichi faction dangkhat hon phuan a, himahleh, lawhsam veve hi. I gen ut penpen thildang ahikei a, socio-economic leh politics thilah i innkuan sung hon subuai ut a phe letlet mi tamtak om ahihdan theih poimawh a, huai kawmin mahni sanga upa zawte zahtakna in vualzawlna hontun ahihdan theih poimawh a, eilawi gendan hileh bawng-ek ana tuan masazawte’ lungtang leh ngaihtuahna zahtak tham chih ahihdan itheih uh poimawh hi. Khangthak lehkhasiam ihita zongin kipilsak lawkei in upa lamte’ thuhilhna i ngaihkhiak poimawh mahmah h’n theihtheih in om hi.
No comments:
Post a Comment