Manipur Express | April 11, 2017

HEADLINES:

Video Conferencing tungtawn in Nano-Tech. Centre hongkhia:

India leh Australia in kithukimna 6 ah suaikai

New Delhi, April-10: India a ni 4 sung om ding in Australia Prime Minister Malcolm Turnbull zan nitaklam in  New Delhi hongtung hi. Australian PM ahihleh high-level palai tamtak in honzui uh hi’n kigen hi. Indian Prime Minister Narendra Modi makaih India palaite tawh tuni’n Australia PM makaih palaite kihou uh a, hun bangtanhiam a kihou nung un India leh Australia kal ah kithukimna 6 ah suaikai uh hi’n kigen hi. Gam 2 kithukimna ah terrorism hihbeina ding a pankhawm ding, civil aviation security, Sports, Health & Medicine banah satellite navigation chihte a pankhawm ding telkha hi’n kigen hi. Huai banah, renewable energy, clean coal & bio-fuels chihte leng kihouna hun ah genkhawm uh a, kithukimna ah leng guanlut a om chih ahi hi.  

Gam 2 a Prime Minister leh official team-te’n kihouna a neihma uh tuni zinglam in New Delhi a Rashtrapati Bhavan ah Australia Prime Minister Malcolm Turnbull vaidawnna thupitak (ceremonial reception) om hi. Huaizawh in, Australia PM Turnbull in Rajghat a India Nam’ Pa (late) Mahatma Gandhi theih gigena ding a amah lem kibawl (statue) ah pak pia hi. Australia PM Turnbull in India President Pranab Mukherjee a kimuhpih banah PM Modi tawh kizui in Delhi Metro a Akshardham temple leng enkhia hi’n kigen hi. Huailouin, zingchiang (April 11,2017) in Australia PM in Mumbai khawpi veh ding hi’n kigen a, huai ah business leh energy makaite’ meeting banah event tamtak ah telding hidan in kigen hi. Australia PM Malcolm Turnbull in tutung a India hongzin pen a khatveina chih ahi. Kum 2015 in Antalya khawpi (Turkey gam) a G-20 khawmpi hun ah Malcolm Turnbull leh Narendra Modi kimu uh a, huainung kum 2016 in leng China a Hangzhou khawpi ah kimukha nawn uhi.      

Tuabang kalah, tuni sunnung lam in India PM Modi leh Australia PM Malcolm Turnbull in Video conference tungtawn in Gurugram mun a Nano-Techhnology Centre hongkhe khawm uh hi’n kigen hi. Gam 2 kal a palai level kihou zawh in Indian PM Modi in press statement suahkhia hi. Huai ah India leh Australia gamte Indian Ocean in zomtuah a, gam 2-te ah democracy values & principles banah Dan pansan a kivaihawmna zat a om hi’n taklang hi. Economic thil a za-uap theipen a kizopna leh pankhawm ding banah research & education lam thilte a gam 2-te kizom tuah in abulpipen leng hiding chi hi. Indo-Pacific region a muanna tunding poimawh ahihdan leh huai ding a terrorism douna leh cyber security lam naksem a panlak khawm touhzel hiding chi hi. Tulel dinmun ah gam 2 kal a defence & security, maritime exercise leh counter-terrorism tawh kisai a kithuzak leh panlak khawmna omte lungtunhuai a sakthu taklang hi.Australian PM Malcolm Turnbull in press statement a suahkhiakna ah, cricket game kia hilou in, democracy leh dan pansan a gamsung kivaihawmna chihte ngaih poimawh pen hizel ding ahihdan gen hi. Leitung a democracy gam lianpen India in kivaihawmna thil a lawhchinna a neih touhzel phattham ching ahi chi hi.Turnbull in gam 2 a research institution omte pangkhawm zel ding ahi chi a, adiak in health leh a poimawh kholdiak thilte ah tatsatlou in kithuzak leh panlak hazel ding chi hi.   

Australia in ahihleh India ah US dollar billion 7 vel investment bawl hi’n kigen a, huai banah India-mi tuhun a Australia a khawsa 4,50,000 vel om hi’n leng kigen hi. Gamdang a kipan Australia a pemlut tampente lak ah India-te thumna hidan in kigen a, Australia ah India a kipan student 46,000 vel om hidan in kigen hi.

TUALSUNG:

Manipur Govt. leh JAC-AATB kihouna lawhsam

Lamka, April-10: Chief Minister office chamber ah tuni’n Manipur Govt. leh JAC Against Anti Tribal Bills (JAC-AATB)  makaite  a 2veina dingin  kihou uh a, tutung a kihouna pen lawhsam hi’n JAC-AATB a  Convenor H. Mangchinkhup in press-te kiangah  gen hi. Kihouna  zinglam dak 10:30 in kipan  a, govt. lam ah Chief Minister N. Biren Singh makaih in a Cabinet Minister khenkhat banah Chief Secretary O. Nabakishore, DGP L.M. Khaute leh R. Sudhan, DC/CCpur tel uh a, JAC-AATB lam akipan JAC-AATB  Chief Convenor H. Mangchinkhup makaih in Mizo People Convention, United Zou Organization, Tedim Chin Union leh  Young Paite Assn makaite  kigawm member 14 tel uhi.      

          Dakkal 3 sung JAC-AATB charter of demands a genkhawm nung un Manipur govt. in tu-le-tu a pawm thei tadihlou ahihdan theisak in, kihouna leng   dinkhawl phawt a, maban ah govt. in kihou dia a chial hun hun in  kihouna om nawn ding hi’n JAC-AATB Chief Convenor in gen hi.  Himahleh JAC-AATB te’n govt ah charter of demands a point a taklatte uh tutan mipi’ theihphak dinga puankhiak omlou a, tuni a JAC-AATB makaite leh News saite kimuhna hun ah leng News te’n dotna bawl mahle uh JAC makaite’n thuchian taklang tuanlou uhi.

CEO makaih in Headmaster/Headmistress-te meeting

Lamka, April-10: Soiminlian Lengen, MCS, CEO/ADC makaih in District Council nuai a school tuamtuam a Headmaster/Headmistress te’n tuni sun dak 12:00 in District Council Office a DRDA Training Hall ah meeting poimawh tak nei in, ADC nuai a school tuamtuam omte hoihtak a function sak ding dan tawh kisai genkhawm uhi. Meeting ah Langkhanpau Guite, Chairman, ADC/CCpur leng a kihel banah ADC nuai a DI of schools leh AI of schools teng leng tel uh a,  school tuamtuam apan Headmaster/Headmistress 150 val tel uhi. Meeting ahihleh Soiminlian Lengen, CEO/ADC in makaih  a, Langkhanpau Guite, Chairman, ADC/CCpur in hasotna thu gen in, District Council nuai a school tuamtuam omte puahthak ding dan tel in thu tuamtuam gen uhi. 

Tulel in ADC nuai ah school 170 om a, school tamzawte hoihtak a function in, Biometric Attendence zat theihna school 11 om a, tu kum 2 paita sung in school 10 Upper Primary School din  dopsang (upgrade) in om hi. ADC nuai a om school 11- New Lamka Upper Primary School, Thingkangphai JB School, Tuinom JB School, Mandop Leikai JB School, N. Molhoi JB School, Kholmun JB School, Khengjang JB School, Khoirentak JB School, Kangathei JB School, Thenjang JB School leh Tangmol JB School ah Biometric Attendance kizang a,  2015 leh 2016 sung a Upper Primary School adia dopsang a omte ahihleh New Lamka JB School, Misao Lhahvom JB School, MB Saichang JB School, Sangaikot JB School, Seilal JB School, Khajang JB School, Upper Kharkhuplien JB School, Saichang JB School, Nahjang JB School, leh Moirang Mantak JB School hi’n kigen hi. Tu in ADC/CEO in school 10 ah Biometric Attendence zat theih ding dan ngaihtuah in, tuni a meeting neihna hun ah biometric attendance zang thei ding school om hiam chihte leng etkhiakna nei uh hi’n kigen hi. 

Langkhanpau Guite, Chairman, ADC/CCpur in Headmaster leh Headmaster-te panlakna phathuai a sakthu gen a, amaute hahpanna ziak a hiai tan tungthei ahihdan gen in District Council in leng muanna liantak nei ahihman in maban ah leng gam bawlhoihna dinga theih tawp suah a panla thak ding in hasuan hi.

Police te’n New Bazar a Lagao kimawlte delhzak

Lamka, April-10: Addl. SP/CCpur (Law) Lunkhomang Khongsai leh (Operation) M. Kumarjit makaih Police te’n tusun dak 12:00 vel in New Bazar area dapkual uh a, hotel tuamtuam apan zu hunkhop a matkhiak banuah Bus station a Lagao kimawl teng delhzak in, kimawlna a kizang vanzat tuamtuam tamtak matsak in amun mah ah haltum uhi. 

New Bazar Bus parking ah kum bangzahhiam paita apan Lagao kimawlna om a, tukum inleng hong uang sem-sem in, election ding kuan in Police te’n hawlkhe mahle uh Cheiraoba ni akipan in kimawl pan nawn in niteng in Lagao kimawl mi tam thei mahmah hi. Lagao kimawl kichi sum a kimawlna (gambling) chikhat ahihman in Police te’n mipi tamna mun a hibang kimawlna thanghuai hihpen tawpsan dingin tam veitak theisak mahle uh Lagao mapu te’n ngei ngaihlou in zalentak in kimawl uh a, tuni’n Police team te’n  buluh in kimawlte hawlzak uh a, Lagao kimawlna buk 3 apan Lagao tang (dice) 18 leh vanzat matsak in haltum uhi. Addl. Sp/CCpur makaih Police team-te ahihleh AG Sharma, SDPO/CCpur, Augustine Khongsai, SDPO/Thanlon leh AK Singh, OC/CCpur te’n leng kithuahpih uhi. Lagao mapu-te bel man manlou in taimang uh hi’n gen uhi.

RUSA scheme tungtawn in Lamka College kipuah

Lamka, April-10: Centrally Sponsored Scheme (SSC) nuaia  Rashtriya Uchchatar Shiksha Abhiyan (RUSA) fund tungtawn in New Lamka a Lamka College repairing leh renovation (puahphatna) nasepna zawhsiang ding dinmun in omta hi. Huai tawh kisai tuni’n College Principal in a gendan in repairing leh renovation a zat dingin RUSA tungtawn in Rs. 25 lakh sanction hi a, Dec 31, 2016 in nasep kipan a, tu’n  zawhsiang phial  dinmun a omta hi'n gen hi. Nasep tuamtuam a taklatte 1) Class rooms renovated, 2) Seminar-cum-Conference Hall, 3) Faculty Room, 4) Administrative Block, 5) Principal’ room, 6) Library room, 7)Toilets renovated, 8) Building roofs painted and renovated, 9) Controller of Examination room leh 10) Chowkidar’ Quarter ahi hi. 

Room teng ah electric  koih ahih banah Seminar-cum-Conference hall tuang (floor) leng  tile phah ahih banah ceiling fan leng  koih uhi. Nasep khiak tawh kisai mipi leh concerned official-te’n a theih theihna  ding in mun tuamtuam ah banner 3  takkhia uh a, centre ah total amount gelh tellou in thonkhia uh a, huai centre in pomlou in  belh thawh  dinga a theihsak ziakin gelh in takkhiak beh uh hi’n leng Principal in gen hi.

April 8,2017 (Kiginni) in  hiai News issue ah RUSA scheme nuai ah Rs. 25 lakh bei in Lamka College ah toilet room 1  kia repairing leh renovation  kibawl chih kisuah mahleh huai bawltu Reporter in nasepna munteng enchian masalou in kimlou taka a  gelh ziak hizaw a, poi kisa hi. Building pua ah Toilet 3 a om banah building room tuamtuam 3 ah leng Toilet 1 chiat kibawl hi.

Kuki CSO te’n April 11 tan a tawpsan di’n theisak

Lamka, April-10: Kuki Civil Social Orgn (Kuki CSO) pawlin Tuni’n Tuibuong a  KIC office ah Kuki CSO a pawl tuamtuam -Kuki Khanglai Lawmpi, Kuki Students’ Orgn/CCpur, Thadou-Kuki Students’ Union, Kuki Womens Union, Kuki Womens’ Orgn for Human Rights  leh Kuki Chief Assn  te’n Joint meeting nei in thupukna 4 bawl uhi. Huai dungzui in CCpur dist sung ah khamtheih doudalna khauhsem a panlak ding, khamtheih (drugs) zuak, supply leh ahihte’n    April 11, 2017 tan a tawpsan ding, thupiak zuiloute tungah khauhtak a panlak ding,  khamtheih zuak leh hihte CSO kiang a theisakte kipahman piak ding banah kuapeuh in  CSO te’panlakna  kithuahpih dingin ngen uhi.

FMPD leader-te  Calendar 1 chiat pekhia

Lamka, April-10: Friends Missionary Prayer Band (FMPB) in 2017 a ding calendar abawl uh April 7, 2017 in copy 800 hongtung a, Pastor S. Thangzamang, Local Pastor, EBCC Songtal in hongkhia in Pathian kiang ah lan hi.  Beaulahlane a Songkhotuan Inn, FMPB Office ah Area Leader-te kiang ah hawmzak dingin pekhia uh a, Missionary chawmte leh Friends Focus late kiang ah athawn in area leader-te tungtawn in hawm hiding hi’n kigen hi. Tuabanah, Lamka tan puaktung na dia sen-le-pan omlou theilou ahihna ah muhkikna dingin copy khat ah Rs. 50 zel in zuak hiding a, a deih te’n Convention Book House, Dorcas Road, New Lamka ah muhtheih ding hi’n kigen hi.

Siangthou tak in HSE exam pai zomzel

Lamka, April-10: Council of Higher Secondary Education Manipur (CoHSEM) nuai a Class XII- HSE exam pailel ah tuni’n Science Stream a Optional Subject dia Mathematics late’n exam nei in zousiang uhi. April 12, 2017 in Science Stream optional subject dia Home Science late’n zou ding ua, Commerce Stream te’n April 15 leh Arts Stream te’n April 21, 2017 chiang a exam nei in HSE exam zousiang ding uhi.

Exam ahihleh March 20, 2017 in kipan a, CCpur District ah Centre 4 zat in om a, exam siangthoutak a pailel hidan in kiza hi. Manipur pumpi ah candidate 26,440 om a, huailak ah CCpur district ah candidate 2033 om in, Don Bosco Hr. Sec. School, VK Tawna College, Rengkai Govt. Hr. Sec. School leh Rayburn College zat in om hi. Rayburn College apan candidate teng Rengkai Govt. Hr. Sec. School ah exam uh a, Don Bosco Hr. Sec. School apan candidate teng VK Tawna College a exam in VK Tawna College leh Sielmat Christian Hr. Sec. School apan candidate teng Don Bosco Hr. Sec. School leh Vungzagen Hr. Sec. School, Ebenezer Academy, Vision Academy, Rengkai Govt. Hr. Sec. School, Bethany Christian Hr. Sec. School leh Young Pillars School apan candidate teng Rayburn College ah exam uhi.

Khuga Bn. te’n sisan unit 2 pia

Lamka, April-10: Khuga Dam a om 6 Sikh Light Infantry te’n district hospital a maternity ward ah naunei a om Tinghoivak (34) w/o Lianminthang of Mata a ding blood bank ah sisan unit 2 pia uhi. Tinghoivak ahihleh April 7, 2017 nitak a naunei ding emergency operation kibawl hi a, sisan unit 2 piak hi a, phatuamngai te’n Khuga Battalion-te houpih in 6 Sikh Light Infantry apan Rifleman Harpreet Singh leh Rifleman Jarnail Singh te’n unit 1 tuak ditsak (replace) uhi.

Expenditure audit a tamzaw zou uh

Lamka, April-10: March 4, 2017 a 11th MLA election hun ah CCpur District a Expenditure Observer mi 2- Shiv Raj Singh, IRS, Expenditure Observer (55-Tipaimukh A/C, 56-Thanlon A/C leh 57-Henglep A/C) leh Lalmalsawm Pachuau, IRS, Expenditure Observer (58-CCpur A/C, 59-Saikot A/C leh 60-Singngnat A/C) te’n April 5, 2017 apan DC’s office ah election expenditure audit bawl uh paitou zel in atamzaw zou uh a, April 12, 2017 in Lamka apan kiknawn ding uhi. Expenditure Observer 2 te’n Constituency teng a MLA candidate te’ expenditure agent te leh DRDA staff te’n MLA candidate-te’ expenditure teng enkhawm in audit bawl uhi.

KZP GHQ in suunthu puang

Lamka, April-10: Khangthah Zuun Pawl (KZP) GHQ in L. Kamzakhup (78) b/o L. Mangzakam of  Phailian, tulel a Aizawl, Chaltlang a om retd. Jt. Director BRTF/BRO, zan nitaklam dak 3:15 velin  awmna (Pneumonia) a si suunthu puang hi. L. Kamzakhup bel June 21,1957 in Dumsau khua ah The Simte Students' Organisation (tulel a Khangthah Zuun Pawl) founder member ahihban ah kum 1961-1963 sung KZP GHQ General Secretary ana len a, KZP a ding a mi poimawh mahmah ahihban ah KZP Emblem gelhkhetu leh pawkhetu hi’n KZP GHQ in taklang hi. KZP GHQ in makai muanhuai leh poimawh mahmah ahihziak in suunthu puangkawm in tan lian mahmah ahihdan taklang uhi. KZP GHQ sik-le-tang in Simte Welfare, Aizawl in Simte puan in aluang tuam uhi.

Mi 10 velin thau lakhe nailou

Lamka, April-10: Lamka Police Station ah January 6, 2017 apan March 3, 2017 sung in election dingziak a licene nei thau (gun) mi 600 val te’n koih uh a, election process zawhsiang nung March 17, 2017 apan thau (gun) koihlutna receipt tawi in lakhia uhi. Himahleh tunitan in mi 10 vel te’n thau lakhe nailou uh a, akintheilam a lakhe ding in Lamka Police Station te’n theisak uhi.

Youth Camp 2017 

Lamka, April-10: Eastern Manipur Presbytery Youth Fellowship, Manipur Synod (PCI) Sugnu Gambih te’ saina in Hengken Presbyterian Church ah April 24-27, 2017 sung "Hinna lekhabu a namin kisun hitam?" Kilakna 20:15 chih thupi zang in Sugnu Gambih Youth Camp 2017 omding hi. Rev. Yampao Vaiphei, Area pastor in Youth Camp hongkhe ding a, Evan. Paogin Haokip leh Evan. Helun Chongloi in thugen ding hi.

SUUNNA:

Hoihching (87) m/o Haukhup of Lanva, tuni zinglam in teknat in si a, sunnung in Lanva hanmual ah kivui hi.

Niangthianching (42) d/o Dahthang of  D. Phailian, tuzing dak 4:00 velin sungna in si a, sunnung in D. Phailian hanmual ah kivui hi.

STATE THUTHANG:

Raj Bhawan ah program om

Imphal, April-10: Raj Bhawan ah tuni’n Veteran Polo player 2 – Yumnam Jila Singh leh Kshetrimayum Joykumar Singh kipahpihna hun zatna om a, huai ah Manipur Governor Dr. Najma A. Heptulla in a thugenna ah Manipur akipan Polo piangkhia a, i gouluah (heritage) uh hingsak ngai chi’n gen hi. State ah Manipuri pony-te (sakol chi khat) thahat ziak in huai kia zang in Polo kimawl hi a, gam dangte ah sakol (horse) lianzaw a kizat ziak in state a player-te mun dang ah akimawl chiang un sakolte zathak sa uhi. International arena tanpha a kidemna a teltheihna ding in state player te’n gam dang ah sakol lianzaw a zat theihna ding ua training ding a sawlkhiak theih ding dan sai ngai a, Manipur a pony-te tamsak ding leh pony farm khangsakna dia Sport Minister leh Union Minister of Sports houpih ut ahihdan gen hi. Polo game hun sawttak ahing theihna dia gamsung a Polo Association teng tawh meeting sai ding in a ngaihdan gen a, Cricket bang a athang theihna ding kia hilou in Polo game a sihlouhna ding in Corporate mite kaihlut ngai a, financer leng poimawh hi’n gen hi. Huai hun ah Governor in Manipur Horse Riding  & Polo Association Manipur a Veteran Player 2-te kiangah Rs. 10,000 pia a, huai hun ah Assn. palaite tel uhi.

CM Biren in Ukhrul pha ding

Imphal, April-10: Chief Minister N. Biren Singh in April 11, 2017 (Sepnawnni) in Ukhrul pha ding a, huai tawh kisai in District Administration leh Ukhrul mipi te’n CM vaidawn ding a kisak kholna bangkim zou khin uh hi’n kigen hi. CM N. Biren Singh in Ukhrul a phak hun ah Tangkhul Naga Long (TNL) ground ah amah vaidawnna thupitak om ding a, mipi kikhopna tawh kithuah ding hi. Biren in kha lui a Chief Minister dinmun alet nung a singtang gam ah pai in chih thupi (slogan) a tangkoupih dungzui in Ukhrul phaksawm hi a, district administration thusuak in a gendan in CM vaidawnna leh mipi in kikhoppihna a neih zawh in Ukhrul mini-secretariat ah huai district sung a development nasepkhiak tuamtuamte etkikna (review meeting) om ding hi’n gen hi. Ukhrul apan thupesawntu Shawting Shimray in a gendan in Chief Minister in Ukhrul a phak hun ah amah zahna latsakna in Tangkhul Naga Long ground phak ma deuh a, tang vum ah mipi in CM vaidawnna gate chi khat kibawl a, TNL ground ah kikhopna ah Ukhrul district mipi te’n CM zin hun ding ngaklahtak a om uh hi’n gen hi.

HAC Chairman kitel ding

Imphal, April-10: Manipur Assembly a Hill Areas Committee (HAC) Chairman ding April 12, 2017 (Nilaini) in telna (election) om ding hi’n Manipur Assembly Secretariat in tuni’n thu suah hi. Agri., Vety. & AH Minister V. Hangkhanlian (BJP) leng HAC a member khat ahih ziak in aman HAC Chairman telna sai (preside) ding hi’n Assembly thusuak in gen hi. Huai thusuak dungzui in April 12, 2017 zinglam dak 11:00 in HAC Chairman telna om ding a, huai a candidate dingte min April 11, 2017 sun ma tan piaklut theih ding chi ahi hi.  HAC ah singtang mi MLA 20 tel uh a, huaite lakah Congress 9, BJP 5,NPF 4 leh NPP 2 om uhi. Huai ziak in Manipur ah BJP makaihna government ah NPF leh NPP leng atel ziak un HAC Chairman leng ruling party MLA-te lakah kipan telkhiak ding hi’n kilang chihthu om hi. 

Hill Areas Committee (HAC) in Money bill tawh kisai chih louh singtang gam tawh kisai kha ding bill himhim genkhawm masa in Assembly ah report a piak theih uh hi a, state government, legislative or executive nasep singtang gam tawh kisai himhim HAC in genkhawm a thupukna bawl theihna thuneihna nei uhi. Huailou in HAC in Manipur sum zat ding (budget) singtang gam tawh kisai himhim amau thuneihna nei uh a, HAC in thupukna a bawlte Assembly in leng a lou theilou a khen ngai a om leh khengthei zek kawm in a passed ding hi’n kigen hi. State govt in development plan a guante HAC in enkhawm a ngaihdan  piak masak hi sek a, plan-te finalize ma in Manipur Hills People’s Regulation dungzui HAC-te ngaihdan leh thupukna hungaih masak zel ngai chih ahi hi.

JAC-AATB tawh kihouna nei

Imphal, April-10: Chief Minister’s Secretariat thusuak in a genna ah State Govt. leh Joint Action Committee Against Anti-Tribal Bill (JAC-AATB)te’n CM Secretariat ah tuni’n kihouna nei uh hi’n gen uhi. Huai hun ah state govt. lam apan Chief Minister N. Biren Singh makaihna in a Council of Ministerte banah Chief Secretary O. Nabakishore, DGP L.M. Khaute leh DC/CCpur R Sudhan tel uh a, JAC-AATB lam akipan Chief Convenor Mangchinkhup makaihna a member 14 tel uhi. CM office thusuak in a taklat zel dan in maban ah kihouna sutzop hiding chi’n taklang hi.

Parliamentary Secy. phiat ding in phu

Imphal, April-10: Manipur a BJP makaihna in NPF, NPP, Lok Janshakti, Trinamool Congress leh Independent kigawm government thak in Parliamentary Secretary ding a MLA 12 a guante State Minister dinmun tawh kibang a koih ahih phiat ding in  Aam Admi Party (AAP) Manipur te’n government nawh uhi. AAP in Manipur Chief Secretary kiang a lehkha a piakna uah Parliamentary Secretary dinmun beisak kichi India Constitution tawh kituak a paidan hi’n taklang uhi. Manipur Assembly term beisa ah leng Congress government in Parliamentary Secretary 5 a guan tawpsak ding in hahtak a phu pawl om mahleh Government in beisak tuanlou a term beitan paisuak hi.

Jiribam MLA in hilhchian

Imphal, April-10: Jiribam A/C MLA Ashab Uddin in April 4, 2017 in Silchar pansan a Bengali Newspaper khat banah Manipur a news khenkhat ah aman drug mafia tawh kizopa nei uh chiam chihthu kisuah tawh kisai in hilchetna bawl hi’n gen uhi. Jiribam A/C MLA in tuma a election ah a vualzawh ziak in Assam a Sonai A/C nuai a Zilla Parishad Member leh Panchayat te’n Cachar distirct ah amah vaidawnna leh kipahpihna hun zatpih uh chi’n gen hi. Aman a genzelna ah drug Mafia-te tawh kizopna nei a ngawhna tungtang thuzuau leh pansan bei hi’n gen a, politics lam leh ahihna sukmin siat sawmna hi’n taklang hi.

KPI DHQ ah CSO te’n joint meeting nei

Kangpokpi, April-10: Kangpokpi district HQ a Hotel LNC mun ah tuni’n phaizang bial a CSO leh Kuki Inpi Sadar Hills (Kangpokpi) District leh constituent unit banah JAC Sadar Hills telin KWU, KSO, KTC, KWWO, KYU te’n joint meeting nei uh hi’n kigen hi. Huai hun ah phaizang pansan a CSO palaite UMC President E. Johnson, IPR Secretary Leisemba; Jt.Secy.N.Jiban; Office Secy. H. Kumar; AMUCO President Deban, Gen.Secy. Sanjoy leh CCSK Gen.Secy. Jitendra Ningomba hi uh a, Kuki Inpi Sadar Hills President Seikhomang Khongsai leh JAC Sadar Hills Convener Nehthang te’n KPI CSO-te makaih uh a, Kangpokpi Town Churches Fellowship Chairman Rev. J.Lunkim leh local Church leaders-te tel uhi. Huai ah JAC Sadar Hills Convener, Nehthang in Kangpokpi telin district thak 7 bawlkhiak tawh kisai in phaizang bial a CSO-te panlakna kipahpih hi’n gen a, singtang leh phaizang gam kithuahzakna a awngvanna matsaktu, kitheihsiamlouhna-te ah hunsawt tak daih ding a thubuai vengsaktu leh nam tuamtuam kalah kituahna leh lemna omna dia CSO te’n dinmun poimawh tak luah uh chi’n gen hi. Aman a genzelna ah BJP makaihna a coalition govt. in Manipur ah kikhekna tun ding in plan leh strategies phattak hunkhop pan uh a, huaite singtang leh phaizang bial a CSO te’n Govt. paln-te etzui poimawh hi’n gen hi. UCM President E. Johnson in nam tuamtuam kalah kitheih siamlouh ziak in thubuai tamtak piang khia in khawtang ah kikhekna tun theilou a, singtang leh phaizang gam a CSO te’n kitheihsiam louhnate beisakna ding a panlak hunta hi’n gen hi. Mipi tam theipen in Government lam ah hamphatna omte a muhtheihna ding uh CSO te’n a ngaih poimawh pen ding uh banah muanna leh bitna omna dia singtang leh phaizang gam kikalah kitheihsiam louhna te beisakna dia chitak a panlak ngai hi’n gen hi. Huai hun ah AMUCO President, CCSK Gen. Secy. te’n leng thugenna nei uh a, Kuki Inpi leh CSO Kangpokpi te’n ki-itna leh ki zahtakna latsakna in Phaizang a CSO makaite kiangah traditional shawl ‘Saipikhup’ pia uh a, huai nung in ankuang luikhawmna nei uhi.

Education Minister in Kumbi area a school-te enkhia

Imphal, April-10: Education Minister Th. Radheshyam in tuni’n Bishnupur district a Kumbi area sung a government schoolte etkhiakna nei hi’n gen uhi. Kumbi Assembly Constituency mipi te’n Education Minister ana dawn uh a, Minister in Wangoo High School, Ethai Khunou Government High School, Kumbi Sandhong Government Primary School, Kumbi College, Kumbi leh Saiton Government High Schoolte enkhia hi. Huai hun ah school teng a teacher-te tawh kihouna nei in buaina leh nawngkaina a tuahte uh banah lungkim louhna a neihte uh telin infrastructure adiak in teaching staff kisam hi’n theisak uhi. Aman Minister hihna a let nung in teacher bangzah hiam te’n a lungkim louhna-te uh theisak uh a, teacher-te panpih ding a, thu chiam bangmah bawl kei mahleh student leh teacher-te adia panlak theih teng a panla ding leh Manipur a education sector a hoih theihpen a puah hiding in gen hi. Government school teng in buaina leh nawngkaina a tuah teng uh kibang vek a, huai lakah teacher kisam, infrastructure kichiantak leh tuisiang dawn ding omlou chihte hi’n gen hi. School-te etkhiak hun ah Rashtriya Madhyamik Shiksha Abhiyan leh Sarva Shiksha Abhiyan telin Education Department official te’n Minister zui uh hi’n kigen hi.

Senapati Police te’n ‘Swachh Bharat’

Kangpokpi, April-10: Senapati District Police te’n Swachh Bharat nuai ah tuni’n ‘Swachh Bharat, Swachh Police Station (SBSP)’ tawh kisai in cleanliness drive nei uhi. Huai hun ah Angam Ningsiam, in-charge, SP/Senapati makaihna a Senapati PS, Women PS, Reserve line leh SP office akipan police 70 val te’n Toll Plaza akipan Senapai bridge tan hahsiang uh a, huai ah SDPO Senapati Ringthing Hongchui leng tel hi.

Manipur ah teng den himahleh tualsuak mi hilou – JCILPS

Imphal, April-10: JCILPS a Convenor Arjun Telheiba tuni’n Sega Road a JCILPS office ah news saite tawh kimuhna hun ah Jiribam A/C a MLA Ashab Uddin Manipur ah teng den himahleh tualsuak mi hilou hi’n gen hi. JCILPS te’n Manipur tualsuak mite humbitna dia bill kichiantak zat masiah tualsuak mi hilou te’n election tuh theilou ding in gakna bawl uh a, Ashab Uddin leng tualsuak mi ahihlouh ziak in JCILPS te’n Manipur Legislative Assembly a MLA ding in pomlou ding uh a, huai ziak in Government banah Ashab gamtatna teng enzui ding uh hi’n gen hi.

Truck in mi 1 phulum 

Imphal, April-10: Irilbung police station in a huamkhak Keirao Bitra Mutum Leikai ah tuni’n Yairipok akipan Truck (No. MN01- 5632) in lamgei ah anu tawh kiton khawm student 1 phukha a, amun a si hi’n gen uhi. Misi M. Tanu Koubi d/o M. Hemanchandra hi a, Uchekon a Merit Scholar English School a Class IX sim lel hi’n gen uhi. Huai veng ah Tanu leh anu in atanau-te uh veh kual a pawt hi uh a, thiltung tawh kisai in Irilbung police te’n truck driver telin mi 3 man uhi.

Class XII examna ah mi 1 kinawh khia 

Imphal, April-10: Council of Higher Secondary Education Manipur (CoHSEM) saina in HSE/Class XII examination 2017 paitou zel a, tuni in South East Manipur Higher Secondary School examination centre ah candidate 1 adia exam sak mi 1 matkhiak ahihbanah nawhkhiak in om hi. Aman maban a examination routine dang om laite ah exam thei nawnlou ding ahihdan CoHSEM thusuak in taklang hi.

KRA-U te’n hilchetna bawl

Kangpokpi, April-10: UPF nuai a Kuki Revolutionary Army-Unification (KRA-U) te’n SDS Brick Filed neitu pimang na tawh kisai a kigolh khakna neilou hi’n theisakna bawl uhi. Huai tawh kisai a Ch. Albert, Info. & Publ. Secy, UPF/KRA-U in SDS brick Filed neitu Soibam Dhanabir Singh pimang na leh Imphal West Addl. SP (Ops) in KRA-U akipan mi pimang na ah kigolhte mankhia a chih tungtang ah KRA-U cadre-te kigolh kha lou a, Chongtham Ibomcha Singh @ Ch. Albert of Taothong Ayungba Maning Leikai leh Fin. Secy. a ngawh a om Khajengbam Raju @ King kichi-te KRA-U cadre hilou hi’n gen hi. Aman a genzelna ah Chongtham Ibomcha Singh kipuankhiakna thuzuau leh pansan bei a, KRA-U ah Kuki chih louh nam dangte om khalou a, Ch. Albert in KRA-U dan a kibawl tawm in pawlpi suk minsiat sawmna a thuzuau bawl tawm hi’n taklang hi.

TUNI THUPI:

“Pathian in hon it ahi, huaiziakin bangmah ziak a patau hiam leh lau in om het ken”

-Daniel 10: 19

EDITORIAL:

Bangtan thubuai hilai ding?

Hindu pathian Ram pianna leh khankhiakna Ayodhya khawpi sung a temple (Mandir) bawlkhiak ding deihloute gawl sat-tan hiding hi’n BJP MLA Raja Singh in gen hi. Ram temple bawlna ding a mi tamtakte sih-ngam uh ahihdan gen kawm in, Ram temple kalh a gamtangte that ding in mi tamtak mansa in om uh chi hi. Hyderabad khawpi a Gosha Mahal constituency MLA, Raja Singh in ‘Ayodhya a Ram temple lamna ding kua’n a khawlsak thei a, Ram temple chou ngam a om leh a gawl ka sat-tan ding’ chi in amah gumtute lakah puangkhia hi. Ram temple a dia sih-ngam a pang ding ahihdan leng gen hi.

Ayodhya a Hindu temple leh Muslim Masjid thubuai tungtang ahihleh court pawlam a saifel di’n Supreme Court in theihsakna leh ngetna bawl ngeita a, huaite BJP national leader-te’n pomthei in kipahpih uhi. Himahleh Hyderabad apan BJP MLA khat in Ram temple deihloute thah ding tanpha in vau mawk hi. Telangana khawpi Hyderabad  apan BJP MLA Raja Singh in Ram temple bawl ding doudalte tunga gawtna piak a sawmte video in khahkhia a, Internet ah huai video ziakin kisel buaina thupitak piang hi’n gen uhi. Ayodhya ahihleh Hindu pathian Ram pianna mun hi’n Hindu-te’n gingta uh a, Muslim te’n leng amau sahkhua mun siangthou in ngaihtuah uhi. Huaimun ah Babri Masjid lamkhiak ahih banah, Muslim biakbuk hihsiat nung a Hindu temple bawlkhiak theih louh a om tungtang ah thubuai sautak omta hi. Raja Singh in amah gumtu tamtakte mai a thugenna ah, Ram Mandir deihloute’ gawl sat-tan a om ding hi’n gen a, Ram temple bawlna ding ah midang in thutanna bawl theilou ding hi’n leng gen hi.

Raja Singh thugen tungtang All India Majlis-e-Ittehad-ul Muslimeen (AIMIM) makaite’n mawhpaih uh a, Ayodhya a Ram temple a kibawl hunhun in India kuangzak ding chi  in vauna thusuah bawl uhi. Babri Masjid Action Committee a Convener  Zafar Yab Gilani in, Raja Singh thugen leh Supreme Court apan ngetna omte tawh kisai in thusuah bawl hi. Raja Singh thugen te’n thilsia omsak dia kilang chi’n Supreme Court in court pawlam a saifel dia a ngetnate lawhsam ding hi’n taklang hi. Aman a gendan in, kum 31 paisa apan in Babri Masjid-Ram temple thubuai omtou denlai a, court pawlam a saifel theih ding hileh tutan buaina omlou ding chi hi. Huai thubuai saifel ahih theihna ding in Chief Justice apan Supreme Court Bench khat a tel ngai a, huchilou in vengthei ngeilou ding chi hi.

Kuapeuh in i theih chiatsa bang in Ayodhya a Ram temple mun ahihleh Hindu leh Muslimte kal a mun siangthou kituhna mun hi a, East Jerusalem lak a Jew-te leh Palestinian mite mun siangthou kituhna tawh kilam danna omlou hi. Gamsung dan pansan a India a thukhenna sangpen Supreme Court in thubuai a saifel theihna ding a pansan theih omlou mah hia? Court pawlam a saifel di’n ngetna bawl in om maimah hi. Ram temple bawl ding deihloute gawl sat-tan ding chihthu a kivaulau theih ding hilebel Muslim leh Hindu kal a kitual sualna ah siluang bangzah hiam kikhung leh veng mai ding hi. Himahleh thagum suahna tungtawn a venglou ding chih theihchetsa hi a, huai temple thu ah a kigenkhak phot leh India a Hindu leh Muslim kal sousang saktu suak hizel hi.

India ah sahkhua ziak a thagum kisuah khumna kichi khanglui hunlai pek in kipankhin hi. Huai banah India leh Pakistan leng sahkhua thil ziak a kikhen kha chilehang kigen khial lou ding hi. Ayodhya ahihleh Uttar Pradesh state sung Faizabad district a om hi a, Ram pathian pianna mun dan a gingta in huaimun a Muslim biakin ‘Babri Mosque’ kichi om pen apaisa December 6, 1992 in hihsiat in om hi. Babri Mosque hihsiat hun in Hindu temple kibawlna mun a Mosque kibawlkhia hizaw danin ngawh in om hi. India khangthu ah Hindu period leh Muslim period chihte om a, huaite khawng et in thil hithei ngen hi a, chetna taktak ahihleh omlou himaithei hi. Court tuamtuam inleng Archaeological Survey of India tanpha zang in a chetna ding zongsak uh a, gendan tuamtuam om mahleh tuni tan in thubuai genveng hilou hi.    

Ayodhya thubuai a kigenkhak louh sung lel vengsung hizaw mailou hiam chihtheih di’n om hi. Kua hiamte gumtak a apai mawk ziak ua veng ding ahih louh banah sahkhua a kulmut tamna India gam ah sahkhaw thil a sih-ngam pumdim ding in gintakhuai hi. Huaiziak in, India a Hindu leh Muslim mite kal a Ayodhya temple mun kituhna chik chiang a hihveng hiding hiam chih gen theih vual dinmun hilou phot in kilang hi.