Manipur Express | August 10, 2013

Kumlui a Civil Service a lawhchingte sepna piak hita

Lamka, Aug-9: Union Public Service Commission(UPSC) saina a  Civil Services(Main) examination 2012 zawh a interview a lawhching singtangmi 7 te  sepna piak in om uhi. Rank 193na - Neilenthang Telien in IAS (Indian Administrative Service) mu a, rank 762na - Ms. Grace Lalrindiki Pachuau in  IRS (T) (Indian Revenue Service, Income Tax), rank 868na -  Eric C Lallawmpuia in IRS (C&CE) (Indian Revenue Service, Customs and Central Excise), rank 907na - Ms. Larinpuii Hrahsel in IDAS (Indian Defence Accounts Service), rank 921na -  Samuel S. Vaiphei in IRS (C&CE) (Indian Revenue Service, Customs and Central Excise), rank 972na 0K Lalbiakchhunga in IDAS (Indian Defence Accounts Service) leh  rank 985na  -  Joel G Haokip in IRAS (Indian Railway Accounts Service) sepna piak in om uhi. 

           

Thudang kizadan in  UPSC saina a Civil Service(Prelim) result suak ah Densil Samte s/o Kamzadou Samte leng lawhching hi’n thutut kingah hi.

Kuala Lumpur ah Zomi International Concert om ding

Lamka, Aug-9: Malaysia khawpi  Kuala Lumpur a Chinwoo Stadium ah zingchiang(Aug 10, 2013 ) in Zomi International Concert om ding hi. Huai hunah lasiam tuamtuam tamtak tel ding uh a, India akipan tel dingin Miss  Mary Lun in Malaysia zuanin zinkhe khin a, Myanmar leh Malaysia apan leng Zomi laka  lasiam tamkhop tel ding uhi. Lasiam leh music  siamte lakah U Cinpi,Bass (Lazy Club);  Lengtong Pauno (Myanmar); Kapno ( Myanmar); Cinpi, Zomi Idol(Malaysia); CK Khai(Malaysia); Mary Lun(India); Niangpi, (Zomi Idol 2011-Myanmar); Cingpi(Myanmar)  leh Lun San(Malaysia) tel ding uhi.

SBI asem hunkhop kaisang

Imphal, Aug-9: State Bank of India(SBI) in promotion year (2013-14) sunga JMG Scale-I apan MMG Scale-II a kaisangte merit channel final select list suahkhia a, huaite Aug 6, 2013 akipan a sepna uah kaisang uhi. Amaute:

 1.   Camina Chawnpaui

2.      Henkhogin

3.      John Lalfakawma Hauhnar

4.      John Peter Hrahsel

5.      KC Vanlalvena

6.      Kamlalmuan Ngaihte

7.      Khatkhosei Misao

8.      Lalfakawma

9.      Lalhmangaiha Renthlei

10.  Lalnunenga  PC

11.  Lawmkima Ralkapthang(L)

12.  Lorna Tingkhohoih Gangte

13.  Macdonald Lalropui

14.  Mamang Aloysius

15.  Pauzalian Guite

16.  R Zorammawii

17.  Robert Zosangliana

18.  Songliankhual Hangzo

19.  T Thangkhomang Haokip

20.  T Lalchinhao

21.  Thangliensei  Kipgen

22.  Thawnbiakthang Tunglut

23.  Thongzakham

HEADLINES:

Tamil Nadu Chief Minister in Christian-te’ awlmawh

Centre in Christian-te SC list lakah koih hen -Jayalalithaa

Chennai, Aug-9: Hindu sahkhua zui Schedule Castes(SC) a omkhate leh Hindu apan Christian a kipia (convert) schedule caste-te’ lakah khantouhna tong le lam a akikhaih banah kideihdanna naktaka a om ziakin hiai thil kituaklou(imbalance) om pe’n kituahsakna dingin minitory Christian tengteng Schedule Caste ah koih himai uhen chi’n Tamil Nadu Chief Minister Ms Jayalithaa in tuni in centre government ah ngetna pia hi.

Hindu Scheduled Castes (SC) leh Christian converts-te’ kalah khantouhna leh hamphatna tankhakdan a kibatlouhluat ziakin Centre in a etzui vengveng ding om a, Centre in Hindus, Sikhs ahihkeileh Buddhists te tawh akikim a khantouhna kibang a om theihna dingin Christian sahkhaw zuite leng Schedule Caste lakah koih uhen chi hi. Nidang a Hindu sahkhaw zui mi tamtakte Christian hong suahchiang un amaute’ adia hamphatna tamtak om te nawlkhinsak in om zel uh a, tu hun pe’n ngaihtuah detdet hun hikha ding  chi hi.

Chief Minister Jayalalithaa in Prime Minister Dr Manmohan Singh kiang ah lehkha khakin huai thu ngaihdau hikei henla, bawhzui pah ngeingei hihen chi’n ngen a, India Constitution a Scheduled Castes annexed Constitution (Scheduled Castes) Order, 1950 nuaiah Christian-te leng telsak  hisam uhen chi hi. Jayalithaa in sahkhaw tuamtuam zuite’ lakah Christian-te’ dinmun awlmawhhuai diak hi’n gen  a, tuaziak mah in tulaia Parliament Monsoon session sung mahmah in huai thu genkhawm hihenla, namkip hingal leh chi’n ngetna bawl  hi.

SP/CCpur  in Peace Mela Festival hongkhia

Lamka, Aug-9: L.Mangkhogin Haokip, IPS, Supdt of Police/CCpur in tuni nitaklam dak 4:00 in Tuibuong Peace Ground ah Kuki Students’ Orgn(KSO)/CCpur leh Babu Enterprises Meniananda Mela, Assam pangkhawma a sai uh Peace Mela Festival hongkhia hi.SP/CCpur in ‘Peace Mela ka hong’ chih tanlel thugen in Mela honna in ribbon teptan hi.Huai  Peace Mela  ah Super Dragon Train, Merigold Round, Superstar Disco Dancer, naupangte’ adia  kimawlna thil tuamtuam ban ah stall 30 val kibawlte ah van chituamtuam leitheih dingin om hi.

      Paokai Haokip, President, KSO/CCpur in a genna ah CCpur Dist ah lemna leh muanna nuamtak om omtheihna dinga Peace Mela Festival sai a om hi’n gen a, Aug 30, 2013 tan sutzop hiding chi’n gen hi. Peace Mela hun ah mipi kuapeuh telding leh kuamah buaina bawl omlou ding in ngen a,main gate ah  free in lut theih ding hi’n gen a, a sunga van omte deihte leh kimawlna zangnuamte’ adin bel Mela saite’ bikhiah piak ngai ding hi’n kigen hi.Huai Mela bel  zinglam apan nitak dak 8:00 tan kihong ding hi’n kigen hi.

LOCAL NEWS

T.Sumlianthang in flag-off

Lamka, Aug-9: Kammuanlal Simte, MCS, SDO/Tamenglong khakna tawh kithuah  in  Aug 10, 2013 zinglam dak 11:00 in Tamenglong Football Gound ah Dist Sports Assn/ Tamenglong leh Dist Sports Assn/CCpur team in  ‘Unity through Sports’ chi thupi anei in Football friendly match kimawl ding uhi. DSA/CCpur-te tuni zinglam dak 9:300 in CDSA office ah T. Sumlianthang, MDC & President VSAC in sawlkhia(flag- off) a, CDSA official 10 val telin kimawl dingte’n Tamenglong zuan uhi.

UZO Block election omding

Lamka, Aug-9: UZO Gen HQ saina in Aug 13, 2013 in Delhi ah UZO Delhi Branch election om ding a, Ginsuanhau MLA ban ah UZO Gen HQ a President Manglianthang leh Vice President Vumchinkhup te’n election makaih ding uhi. Aug 22, 2013 in UZO Behiang block; Haopi block; Lamka block; Tuining block; Gunpang block; Kailamnuoi block; Kana block leh Moreh block ah election om ding hi. Aug 23, 2013 in UZO Singngat block; Zotang block; Lentang block; Sugnu block; Tuila block leh Imphal block election om ding hi.

Singnou suanna munding vatsiang

Lamka, Aug-9:Lamka khawpi adia tuilakna mun(intake point) kimlak  ah MGNREGS tungtawna singnou suanding chih ahih ziakin tuni in Bungmual khawsak a Lanva-lui  naak ah Village Authority-te’ makaihin mipi tamtak in catchment area  a singnou suanna mun ding vatsiang uhi. Huai nasepna ah Lamka TD Block nuaia khus 32 te group 4 a kikhen in tuni in group I&II te’n amun vatsiang uh a, Aug 11, 2013 in singnou suanna ding khuak ding uh a, Aug 16, 2013 in singnou suan    panding uh chihthu kiza hi.Tuni nitaklam in B Khamsuansiam, SO makaihin official team in tuni a nasepna enkhia uhi.

Hospital ah Joint Social Work

Lamka, Aug-9: Dist Hospital staff-te leh Dist. Police-te pangkhawm in Aug 10, 2013 zingsang  7:00 akipan Dist Hospital campus ah joint social work nei ding uhi. Huai ah Dist Hospital staff-te,Police leh VDF hunkhop in  District  Hospital campus hahsiang ding uhi.

First Medical Responders training om

Lamka, Aug-9: Indian Red Cross Society saina in tuni zinglam in IB Road a Synod Hall ah ‘Certified First Medical Responders’ training om hi.Huai ah Dr Y.Megachandra, Vice President, Indian Red Cross Society/Manipur; Amul Kumar, Superviser, Disaster Management Programme/Manipur leh Devarjit Singh, Instructor, Disaster  Management Programme te’n sinsak uhi. Training ah mi 25 tel uh Aug 10, 2013 in zouding uhi.

Magazine thak hon hiding

Lamka, Aug-9:Lamka khawpi a kisuah magazine thak  LIMLANG kichi  August 10, 2013, sunnung dak 1:00 in  Jion Street, Tedim road a Limlang office ah honna om ding chihthu kiza hi. Huai Magazine thakin ‘Rights to information’ tawh kisai leng pibawl mahmah ding hi’n kigen  hi.

Police custody ah Aug 19 tan omding

Lamka, Aug-9: Police thusuak kizadan Aug 6, 2013 nitaklam in 46-Assam Rifles pawlin New Bazar a Rajdhani Travels kiang ah sumkhon(extortion) lai HNA cadre  2- Lalrinchhana Hmar (25) s/o Thangliana of Molnom village leh Lalmalsawm Hmar (21)  s/o Ralthathung of Khomawi mankhia in amau akipan 9mm pistol 1, magazine 1 ban ah atang 1, Nokia mobile handset 1, i-ball mobile handset 1 leh Rs 30,000 mukhia in Lamphel Police ah pekhia uhi. CCpur Police te’n a case lasawn in tuni’n CJM/CCpur Court ah dingsak uh a, court in Aug 19, 2013 tan Police custody a omdi’n phalsak hi. HNA cadre 2 tungah Police te’n FIR No. 68 (8) 2013 CCP-PS U/S 400/384 IPC & 25 (1-C) Arms Act registered uhi.

College Branch Freshers’ Meet

Lamka, Aug-9: SSPP Rayburn College Branch te’n Aug 10, 2013 zinglam dak 10:00 apan in Rayburn College ah Freshers Meet neiding uhi.Huai hun ah Dr Thangminlun Mangte in student-te hasotna leh thumsakna nei ding a, SSPP Gen HQ leh SSPP Joint HQ Lamka a makaite’n leng uap ding uhi. Fresher Meet zawh sunnung in freshers teng in kipawlhlimna program zang ding uhi.

SUUNNA

Tualzatuang Thawmte @Tuangno of Go Cin Khup Veng, New Lamka tuni zingsang baihtak dak 2.00 velin rel sungah lungphu hat in si hi.  Thutut kingahdanin Tualzatuang Thawmte in Hyderabad a om  a tate enkhe dinga khualzin buaisia hi’n kigen  a, aluang Hyderabad apan  Lamka ah hong kipaw ding hi. 

IMPHAL NEWS

Chief  Minister in closing function uap

Imphal, Aug-9: Manipur Judo Assn (MJA) leh Judo Federation of India (JFI) te’ saina in  Khuman Lampak Indoor stadium ah August 6, 2013 akipan in  Sub-Junior National Judo Championship 2013-14  om a, tuni a closing ceremony ah Chief Minister O Ibobi Singh khuallian in pang hi. Functional President in Works Minister Dr Kh. Ratan Kumar pang a, Guests of Honour in Parliamentary Secretary(Horti, Soil & CADA) Vungzagin Valte leh Parliamentary Secretary (MI&IPR) K Meghachandra Singh  pang uhi. Huai hunah July 21, 2013 in  Tamil Nadu a Coimbatore ah damlouh ziaka si  Manipur mi Olympian Brojeshori Devi suunna neih banah zahna leng pia uhi. Sub-Junior national judo championship ah India gamsung state tuamtuam apan kimawlmi tamtak tel uhi.

      Huai Sub-Junior National Judo Championship 2013-14 ah numei team ah Manipur in champion hihna la uh a,pasal team ah Mizoram in champion hihna la uhi.  Manipur in Overall chiampion team hihna leng la uh chihthu om hi.  

Govt in private Management Agency piaksawm

Imphal, Aug-9: Manipur in revenue a muhna dia phatuam mahmah Imphal-Dimapur lamlian(NH No. 2) a Hengbung leh NH No. 37 a Jiribam a om Taxation Check post tu’n govt in private Management Agency khut a piakkhiak sawm hi’n kigen hi. Taxation Check post 2te ah tulela Tax muhkhiakdan ah govt a lungtunlouh ziakin private  agency a piakkhiak sawm hideuh in kigen hi.Manipur govt nuaia Deptt of Taxes in kum 3 paisa akipan ki-registered banah experienced hoihtak neisa private party/society/firm/company lunglutna neite akipan ngetna sam lel hi’n kigen hi.  Agency telkhiak a om pen in Taxation Check post a om Taxation Officer te’n state pawlam akipan  hong kipawlut thil tuamtuam a check ban uah tax a lak utawh kisai ah kithuahpih ding uh chih hi a, Management Agency in Manipur VAT Act &  Rules tawh kituakin nasem ding uh chih ahi hi.

Business  team in China pha ding

Imphal, Aug-9: Manipur Chief Minister O. Ibobi makaihna in Manipur Business delegation team in Sept 2013 kha in China pha ding uhi. Thusuak in a gendan in Business team in amau bel Sept. 13, 2013 in Imphal nuse ding uh a, Sept. 19, 2013 in hongkik ding uhi. Amau China gama om sung un Beijing, Shanghai leh Chengdu  pha ding uhi. Manipur Business delegation teamte  mi 10 hiding uh a, huaite lakah Chief Minister banah  Commerce & Industries Minister; Parliamentary Secretary (Tourism); Addl Chief Secretary(Planning);  local Entreprenuers 4- Dr. Kh Palin, Managing Director of Shija Hospital & Research Institute;  Dr. Dhabali, President, Manipur Tourism Forum; Radhakrishna Hanjabam, Secretary, Manipur Tourism Forum & Propreiter Seven Sisters Holiday leh  Kamesh Salam, Founder & Executive Director, South Asia Bamboo Foundation tel ding uhi.

Police te’n search Operation nei

Imphal, Aug-9 :SP/Imphal East District thupiak dungzui in  Imphal East Police te’n tuni in Mabali Forest area kimlak search operation bawl uhi. Huai hunsung in lamlian nawl ah  Independence Day hihbuai  ding tupna a helpawlte’n bomb thang a kam uh om  hiam, chih leng zong uh a, mipi pai vialte leng check zel uh hi’n kigen hi. Huai mun bel Minister-te official  Quarters tawh a kinaih ziaka hibang search operation bawl a om hidan in kigen hi.

‘Consultative Meeting on Village’   

Imphal, Aug-9:Tuni in Kuki Inn ah ‘the 2^nd One Day Consultative Meeting in Village Authorities/District Councils Acts & HAC’  kichi om hi. Huai hun ah  khaw tuamtuam akipan hausa tamtak leh mi poimawh tuamtuam tel uh a,  Manipur  singtanggam tawh kisai a expert committee-te kiangah memorandum leng pia uhi.

Tuni’n World Indigenous Day zat in om  

Imphal, Aug-9:Centre for organization of Research & Education (CORE) te saina in tuni in ‘Indigenous Peoples building alliances: Honouring treaties, agreements & other constructive arrangements’ chih thupi a nei in ‘International Day of the World’s Indigenous Peoples’  hun zat in om hi. Huai hun ah CORE Executive Director Dr. Immanuel Varte in in a genna ah  Manipur state in UN Declaration of rights of Indigenous peoples tungtawn in  mawhpuakna lianpi nei hi’n gen a, tuaziakin state government in hangsantaka human rights a promote ngai hi’n gen hi.

            Thudang kizadan in Joint Committee on Inner Line Permit System, Manipur (Students’ Wing) pawlin tuni in Palace compound a Lamyanba Shanglen mun ah World Indigenous Day zang uh a, tua hun tawh kiton in  cycle rally leng nei uhi. Amau Nambol apan Lamyanba Shanglen tan cycle rally nei ua, tuazawh in public meeting in zui hi. Huai hun ah Manipur a migrants worker omzah naktaka pung thu telin thu tuamtuam genkhawm uhi.

NATIONAL NEWS:

Tamil ngabeng mi 1 sisa in kimu

Rameswaram, Aug- 9: Tamil Nadu ngabengmi siluang khat tu zingkal in Sri Lanka a Talaimannar luipiau ah muhkhiak in om chi’n fisheries department official thusuak in gen hi. Muh a om siluang ahihleh A Leen hi a, Tamil Nadu a Kanyakumari district a Melamuttom khawmi hi’n kigen hi. U Arulanandham, President 'Tamil Nadu Innocent Fishermen's Welfare Association' in agendanin, Jaffna Bishop Risqus apan thu ka zakdanin Sri Lanka tuipiau khat ah siluang om a, hiai pen Tamil Nadu mi hidingin gintakhuai hon chi a, hoihtak a kanchet ahinung in A Leen ahihdan theihsuah in om chi hi. A Leen ahihleh July 29, 2013 in ngabeng in om a, himahleh, huai ni apan inntung kik nawnlou in asulnung suizui theihding in om nawnlou chi hi. Fisheries department official te’ gendanin A Leen in lithuk lam ah nga ava betziak a tui hattakin atuahkhiak hidingin muanmawhhuai chi ua, huai kawmkawm in Sri Lanka kiang ah thil omdan chiantak a report peding a nget leh theihsak ahi chi uhi.

FOREIGN NEWS

Pakistan a buaiah ah mi 10 si

Islamabad, Aug-9: Pakistan gamsung a Shia minority te luahna Quetta bialah hun bangtan hiam paisa a chi-le-nam tawh kisai a buaina thiltung huaisetak a om nung in buaina kipan thak nawn a, galvantawi te’n biakbuk sunga Eid festival zangte bukap in tamkhop si uhi. Huai thiltung ahihleh Bomb ziaka mi 37 thahna tawh kizom a gamtatna hi a,  Pakistan gamsung dinmun hoihlouh ziakin United States solkar leng patau in, huaimun pawtsan di’n US mite theihsakna pia hi. Thusuakin ataklatdanin thautawi mi 4 velin biakbuk pawtsan dinga kisate bukap ua, mi 10 kaplup a om in midang 24 liam uhi.       

Israel in EU tawh suai kailou ding

Jerusalem, Aug-9: Israel  solkar in European Union research grant tungtawn a  dollar million tamtak ngah theihna ding deal ah suaikai lou  ding a, huai ah suaikai leh anti-settlement pom ding ahihman a utlou chihthu om hi. Israel deputy foreign minister  Zeev Elkin in huai tungtang agenna ah kum 7 sung Europe gambup  a research kibawl ding ‘Horizon 2020’  ahihleh 2014   in kipan ding a, budget  80 billion euros  laka Israel in 600 million euros hamphatpih ding chih himahleh nawlkhin hi.

            Tuabang kalah Israel’ Chief negotiator in tuni a agendanin Palestine tungthu a kihouna  kalnawn Nilaini in kipan ding a, U.S. envoy nih in theihpih ding uh a, West Bank town  Jericho ah meeting dang om nawn ding hi.

Bill Clinton leh Oprah zahna pe ding

Washington, Aug-9: US president Barack Obama in America's highest civilian honour  ngah ding Bill Clinton  leh talk show queen Oprah Winfrey kipahpihna sangpen tawh zahna pe ding hi. White House  thusuakin agendanin Mr Clinton  leh Ms Winfrey ahihleh Presidential Medal of Freedom ngah mi 16   laka tel hi uh a, John F Kennedy vaihawmlai a huai award piak a om sunzom zel uh hi’n kigen hi.

                                         

Egypt rally ah Morsi’ zi leng vatel

Cairo, Aug-9: Egyptian President Mohamed Morsi kianga vaihawmna penawn di’n amah gumtute’n Eid zatna tawh lampi zui in kikou uh a, huaite lakah azi Naglaa Mahmoud leng vatel hi. Naglaa Mahmoud in huai huna agenna ah apasal President lui Morsi gumtu asang a sim te’n  Cairo ah kiphinna nei in vaihawmtu hidia Morsi koih di’n nawh ua, azi ngei inleng vaihawmtu dia hong kik lam-en ahihdan gen hi.  Naglaa Mahmoud ahihleh President Morsi paihkhiak nunga mipi laka atel masakna pen hi’n kigen a, Morsi gumpawlin kipahpih mahmah uhi.