Headlines:
“Singtang lou neihna 50% in kiam: Buhthak 12 % in pung”- Lal Thanhawla
Mizoram Chief Minister in NLUP phattuamna taklang
Aizawl, Aug-10: Congress makaihna a Centre a govt bawl UPA in MGNREGS akisuanpih mahmah lai un Mizoram in New Land Use Policy (NLUP) kichi kisaktheihpih zawtham uh hi a theih hi a, NLUP tungtawnin zawnna (poverty) naktaka hihkiam ahihnungin Mizoram state hing (green) hiaihiai hi’n kigen hi. Chief Minister, Lal Thanhawla in a genna ah NLUP ziakin Mizoram state ah singtanggam lou neihna (jhuming cultivation) leh gam halsiatna 50% in kiamzou a, himahleh NLUP tungtawnin buh thak 12% in pungzou chi hi.
Chief Minister Hawla in zanin Rs 60 lakhs bei a kibawl Serchhip a Divisional Horticulture office building hong kawmin a gendan in, "NLUP ziakin state govt nasemte’n lawh a hunhun in lathei uh a, a poimawh hunin NLUP sum sawkin om zel a, employee-te adia a phattuam kia hilou in, singtang lou neihna 50% velin kiamzou a, himahleh buh thak/piangkhia 12%-in pungzou” chi hi. NLUP tungtawnin singtang lou neihna hihbei dingdan policy naktaka bawl hi a, singtang lou neihna sangin theigah chi tuamtuam suan hiam ahihkeileh allu, malta leh adangdang chiin in nek piangsak zaw chih state govt in paipih in nasatakin campaign bawl ua, lawhching mahmah uh hi’n kigen hi.
Chief minister Hawla in a genbehna ah state govt in atup pipen ahihleh Mizote kuamah nuai ah omlouh a, economy, education, health sector leh adangdang ah mahni kitoudelh zou suahsak ding chih hi a, nek-le-tak a i kitoudelh zawh genlouh sum-le-pai ah leng midangte sawklou a ikitoudelh zawh uh tup pipen a kinei ahi chi hi. Nam khangtou leh mite’ muhding azahtak-huai khop a i om theihna ding uh ngimna a policy tuamtuam kibawl toutou ahi chi’n leng Mizoram CM in gen hi. Parliamentary Secretary (Horticulture), KS Thanga in leng thugen a, Mizoram in NLUP kichi abawlkhiak pe’n centre govt in leng etton tak mahmah sa in Centre apan study team tanpha honglut uh chi hi. Horticulture office honna ah R Lalrinawma, MLA; Horticulture Secretary T Sangkunga leh official tamtakin uap uhi.
Headlines:
“Congress in colour nih neilou ahi”- Vungzagin Valte
Thanlon A/C ading MOAP card 241 hawmkhiak in om
Lamka, Aug-10: Vungzagin Valte, Parliamentary Secretary (Horti, SC & CADA) in tuni in New Lamka’ Dorcas road a atenna inn ah abial Thanlon A/C sunga kum 60 tunglamte adia kibawl New MOAP Identity Card 241 hawmkhia hi. Huai ah T Damkhothang, Lecturer GBC in Old age pensioner te’ adingin thumsak hi.Valte in a thugenna hunah Congress party in colour khat chauh aneih ziakin khua khenkhat ah MDC te adia Congress Unit ahihkeileh MLA te adia Congress Unit chih dan deuhte omsaklou dingin mipite leh Thanlon A/C a makai tuamtuamte ngen hi.
Parliamentary Secy in khaw hausate’ kiangah MGNREGS tawh kisai chihtakna tawh semkhe ding in ngen a, tualou in Thanlon sub-divn adia SDO thak Thienlaljoy Gangte,MCS leng Thanlon bial mi mah ahihziakin Thanlon A/C puahthak(re-build) dinga panlakna ah muang mahmah ahihdan gen hi. MGNREGS a nasepna tawh kisai Village Authority te’n 50% proposal bawlthei ua, MLA in 25% leh MDC in 25% bawlthei a, ahihziakin a sepsuahna pe’n khaw hausa (V/A) te’ khut ah om chi hi. Thanlon bial mipite 99% BPL family hi uh a, ahihziakin labour ministry deihna banga spot survey a lemlak pe’n No 666 tawh i tehkak khak ziakin mi tamtak lem kila ngamlou omkha a, poi petmah chi hi. RSVY tungtawna medical lam a hamphatna omte i mansuahlouhna dingin lem kilak ding lau hetkei ni chi’n bialtu MLA in ngen a, lemla dia hong kuante hausate’n kithuahpih chiat zawni chi hi. Tualou in, electoral roll ah ut dandan a i kum zah uh i khumkhak bang uleng buaihuaipi hongsuak thei chi hi. Pathian hehpihna ziakin Thanlon A/C ading IAY tungtawn in innkuan 2,000 val ading panpihna hong paingei ka gingta a, sepsuah ahihtheihna dingin kuapeuhin i thumna uah phawkni chi’n mipite chial a, huai tawh kisai in theihtawp suaha panla lel ahihdan leng gen hi. Chief Minister hoihtak neihkhak ziakin i vangpha mahmah a, election ma in CM Ibobi kiangah Thanlon bial puahpih dinga ka ngetna vuaksuaklou ahihdan kilang toutou a, Chief Minister Ibobi tungah ka kipahna alian mahmah chi hi. Program zatna hun ah S.Thienlaljoy Gangte, MCS, SDO/Thanlon leh Ms A.Umarani Devi, Dist Social Welfare Officer/CCpur in leng thugenna hun nei uh a, Thanlon A/C apan MDC 2- M.Ginzapau leh Lalhmangpui ban ah mi poimawh hunkhop leh hausa tamtak in uap uhi.
Headlines:
Hospital campus ah Joint Social Work om
Lamka, Aug-10: Dist Hospital staff-te leh Dist. Police-te pangkhawm in tuni zingsang 7:00 akipan Dist Hospital campus ah joint social work nei uhi. Huai ah Dist Hospital staff-te banah SDPO/CCpur & Thanlon makaih in Police leh VDF mi 80 valin District Hospital campus hahsiang uhi.
Dr. N.Paulginthang, Medl Suptd/Dist Hospital in agenna amau kia in bangzah veihiam social work nei mahle uh siangthou taka koih haksa mahmah a, kha bangzahhiam paisa apan SP/CCpur tawh kithuzak in tuzing a joint social work omthei hi’n gen a, Police-te tungah kipahthu gen hi. Dist Hospital sianthouna dingin mipi lam in leng dusbin kikoihte kia ah niin pai ding leh pawlam mite’n Hospital campus ah niin pai nawnlou ding in ngen a, kuaman toilet sungah dyper, dispo cup leh thil tuamtuam pai nawnlou ding in leng ngen hi.
Headlines:
Assam Rifles- te’n Hospital ah sisan pia
Lamka, Aug-10: Dist. Hospital ah tuni in damlou mi 3 operation bawl hi a, amau adi’n sisan B+ poimawh a, Rayburn High School apan student te’n sisan pedin vakuan mahle uh a kum uh chin nailouh ziakin sisan pethei ding omlou a, huaiziakin huaimun a om CT Lian Guite, Social Worker leh a lawmte’n thil omdan 46-Assam Rifles theisak uh a, Major S.L. Haokip, Commandant i/c in a jawan-te mi 5 sawlin huaite’ laka 3 in sisan pethei uhi. Sisan a piakte uh Unit 3 hi a, kiphaltaka sisan piate tungah damloute’n kipahthu gen uhi. Assam Rifles sisan piate ahihleh Rifleman ngen Samin Roy, R.K. Tyagi leh LR Swarjori hi uhi.
Local News:
Independence Day lopna
Lamka, Aug-10: Dist Admn/CCpur district saina in Aug 15, 2013 in Lamka Public Ground ah Independence Day lopna om ding a, huai ah Ms Jacintha Lazarus khuallian in pang ding a,aman India flag a kaihpalh banah March Past apai contingent tuamtuamte akipan salute la ding hi. Zinglam dak 9.00 in programme kipan ding a,khuallian zinglam dak 9.30 in Public Ground tung ding hi.Aman Parade a etkhiak zawh in national flag kaipalh ding a,huchi’n March Past in zui ding hi.Huaizawh in thugen ding a, huchi’n Cultural programme, JNV student-te akipan performance, cultural dance,Traffic police, DTO, A/R leh STC BSF akipan pesentation om ding hi.Huaizawh in Stall kihongte etna leh kipahman & award hawmna in zui ding hi.
Daijang khawkiangah Canal kichim
Lamka, Aug-10:Daijang khawkiang ah tuma deuh a Khuga Dam a canal kibawlna tuni sunnung dak 12.30 velin tui in phusia a, akhanglam a tuilou liantak a buhkung omte hihsia hi. Khawsung mite gendanin huai canal atuang inch 4 lel khawnga sah in kibawl a, mun khenkhat ah bel huaisang a sahzaw deuhna mun leng om hi. Canal kichipna mun apanluat ziaka Canal kichim hidin gintakthu gen uh a, kha 5 vel paisa a kibawl pan hizawmah in gen uhi. Thu kizadan in Canal kichipna mun ahihleh nidangin a saklam a mualtung apan tuilakna dinga kizang hi a, Canal kibawl nungin cement zang a zut bing in om a, Canal tui laklut hilou in Canal tui pen a khanglam ah luang paisuak a, himahleh huaimun leak thei zel hi’n gen uhi.
Fund lapse sak ziakin mawhpaih
Lamka, Aug-10: NPF/ CCpur Divn thusuakin a taklatdan in Ministry of Rural Dev. Govt of India in CCpur district ading BRGF 2012-2013 fund Rs.10.74 crores aziak theihlouh in Manipur govt nuaia Finance department in zat theihlouh suaha a lapsed sak uh mawhsakthu puang uhi. CM Ibobi Singh in phaijang gam khantouhna dingin crore tamtak a zat lai in singtanggam tuantual CCpur district adia sum crore tamlou hong pai omsun bangziak a lapse sak hiam chi’n dotna bawl uhi.CCpur district adding fund lapse a omte a kinthei lam a muhkik ahihkei leh NPF om maimai louding hi’n thusuak in taklang hi. Ibobi makaih Congress govt in Manipur ah singtangmite a deidanna nasepte leh diklou taka na a taklat (exposed) zel hiding in leng NPF/CCpur Divn a President in thusuah hi.
Zomi Convention meeting om
Lamka, Aug-10: The 3rd World Zomi Convention kichi Lamka ah October 25-27, 2013 sung om ding tawh kisai in tuni in Nehru Margh a Zomi Council office ah Committee member te’n joint meeting nei uhi. Huai ah K. Guite ,Adviser ZRO; Vungzagin Valte, Parliamentary Secretary; MDC te ban ah Zomi sunga frontal organisation tuamtuam a makaite tel uhi. Huai hun ah 3rd World Zomi Convention a budget ding telin thu tuamtuam genkhawm uhi.
B.Sc( Nursing) ah top 5in pang
Lamka, Aug-10: Delhi University nuai a BSc(Nursing) examna result puankhiak a om ah Lady Hardinge Medical College apan Lalmuanpui d/o H Soichinkhup of Salem Veng, Central Lamka in Topper laka 5na in zou hi’n kigen hi. Tulelin DU nuai ah Lady Hardinge, Ahilyabai College of Nursing leh RAK College of Nursing te Nursing College omsun hi’n kigen hi.
Zillai Unit ah Freshers’ Meet
Lamka, Aug-10: Zillai VK Tawna College Unit te’n tuni in IB Road a KKL complex ah Freshers’ Social Meet zang uh a, S. Genlunthang Vaiphei, Social worker leh S Lallunkam, Chief of Mata te’n Chief Guest leh Guest of Honour hihna tawh uap uh a, Functional President ah Khuplianmang, Chief of Lingsiphai himahleh a tangin D. Mina pang hi. Rev. T. Zuanlal Vaiphei in freshers-te thumsak hi. Chief Guest in agenna ah vaigam ah college kai tha te ragging omsek a, himahleh eigam ah thumsakna tawh kivaidawnpen thupi mahmah chi hi. Lawhchinna taktak omna di’n Pathian phawk poimawh a, tulai khawvel ah kidemna sang mahmah a, a siampente loungal khawsuak haksa chi hi. Laisiamte’n govt sepna kia buaipih lou in saptuam makai dingin leng laisiam mah poimawh chi hi. Ama’n sinlai naupangte’ chihtakna tawh pang ding leh maban lawhching zel dingin hasuan hi.
Henglep Mahila Congress hong
Lamka, Aug-11: All India Mahila Congress Committee in Congress omna A/C teng a Mahila group bawlkhiak ding thupiak a neih dungzui in tuni’n T Manga Vaiphei, Chairman MTDC tenna inn ah 57-Henglep A/C adia Mahila Congress Committee hon in om hi. President dingin Khollhing of Torbung, V/President Nemhat of Bungmol village, Secy Lhingpi of New Ningthiching, Joint Secy P.G Jangmi of Mazuron Kabui village, Finance Secy Neikim of Kangvai village, Information Secy Neithem of Munpi e, Executive member ding in Thimneikim, Hatneichong, Marcy Kom, Mangtinkim, Ruthy, K Shining, Lhingkhonei, Phaneichin leh Lhaineilhing guan hi uh a, Lalzakhai President, 57-Henglep Congress in kichiamsak hi.
Laibu thak latna om ding
Lamka, Aug-10: N.Zatawn in agelh ‘Tuailai Aw Na Malam Enin!’ kichi laibu thak honkhiakna leh latna Aug 11, 2013 zinglam dak 10.15 in G. Mualkawi EBCC ah om ding a, Rev. S. Vungminthang, General Secy, EBC in Pathian min a latna leh honkhiakna nei ding a, Rev. Dr. Kh. Khaizakham in thugen ding hi.
Bank account hong din zasak
Lamka, Aug-10: Lamka Police station ah June 30, 2013 nitaka liamte’n Bank account hong chiat ding leh huai account number a zekaipen in Aug 14, 2013 tan in CDSU office a submit chiat ding in CDSU thusuak in theisak a, hunchiam sunga submit loute financial assistance tawh kisai CDSU in buaipih nawnlou ding chi’n thusuah bawl uhi.
SSPP College Branch Freshers’ Meet
Lamka, Aug-10: SSPP Rayburn College Branch te’n tuni zinglam in Freshers Meet nei uh a, Dr Thangminlun Mangte in student-te hasotna leh thumsakna nei hi. Huai hun ah SSPP Gen HQ leh SSPP Joint HQ Lamka a makaite’n leng uap a, S.Lianzapau Samte, President, SSPP Gen HQ in agenna ah igam ah employee generation omthei nailou in student-te adia poimawhpen laisim hi’n gen hi. Student te’n kuhkal taka laisimding in hasuan a, member kuapeuh in makaite kithuahpih dingin ngen hi. Tuni freshers’ meet ah student 90 val tel uh a, sunnung in kipawllimna program nei uhi.
Magazine thak honna om
Lamka, Aug-10: Lamka khawpi a kisuah magazine thak LIMLANG kichi tuni sunnung in Jion Street, Tedim road a Limlang office ah Pastor S. Thangchinlun, Local Pastor EBCC Centre Lamka in hongkhia a, Pathian kiang ah thumna in lan hi. Huai hun ah Hang Syan Thang @ Pa Sian, Khanthang Tonsing, B. Zodinglianga MDC, Nenglianlal, Principal St. Peter School telin mi hunkhop in uap uhi. Limlang magazine Editor Chinkhanmuan in genna ah Limlang Magazine in kuahiam mimal phatna leh gensiatna ding leh pawl khat mai etna leh phatna ding a kibawl hilou ahihdan gen a, thudik leh thil ahi bangbang mipite theihsak utna ziaka patkhiak a om ahihdan gen hi.
Mission Fellowship-cum-Conference
Lamka, Aug-10: EBC Lamka North Divn Missions Joint Prayer Fellowship-cum-Annual Planning Conference 2013 kichi tuni zinglam in EBCC Zenhang Lamka EBC biakinn ah om hi. Rev Paukhanmang Guite, DS Lamka North Divn. in hongkhia a, Rev L.Kham Kho Lun, Director of Missions in Pathian thugen in Workshop hun ah sinsak hi. Huai hun ah Evan H.Thangkhansiam in Mission Field report pia a, nitaklam in Upa V.Ginchinpau, Chairman Divn Working Committee in khawmpi hun khak hi. EBC Lamka North Divn sunga Baptist Children deptt a makaite’n tuni zinglam dak 10:00 apan EBC Mini-Auditorium, Dorcas Hall campus ah ‘Khuachih Office Bearers’ kikhupkhawmna’ nei uhi. Huai hun ah khaw tuamtuam a makaite tel uh a, thu poimawh tamtak kikum uhi.
Kimjoe May 31 Aug. 12 10am onward
(Stock - 306)
Imphal News:
CM’ bungalow kiangah bomb puak
Imphal, Aug-10 : Chief Minister O. Ibobi’ Bungalow a gate apan feet 2/3 vela gamla ah tuni nitak dak 6:30 in bomb hattak puak a, hileleng misi leh aliam bel omlou hi’n kigen hi . Independence Day lopna ding tawh kisai in Imphal khawpi ah security naktak a hihkhauh ahih lai in hibang thil om thei lamdangtak hidan in kigen a, govt in thiltung pen koih maimai theih hilou danin gen uhi. Dy. CM Gaikhangam in security lam lapse ziak hi’n gen a, tua ziakin security lam vel thak hiding chi hi. Imphal khawpi a CCTV Camera omte power lam nawngkai ziakin duhthusam tak in function theilou a, tuaziak a hibang thiltung hidan in gen hi. Hiai thu gelh ahihtan in Police te’n matkhiak neilou uh a,tuni nitaka CM Bungalow a bomb puak pen a 3veina hita hi. (UNA)
Pimang a omte khahkhe din ngen
Imphal, Aug-10 : Horticulture deptt asem mi 2 zanhal(Aug 8, 2013) in Kanglatombi area ah meltheihlouh galvantawite’n a pimang uh Dy. CM Gaikhangam in khahkhe ding in ngen hi. Aman a genna ah SoS group a om pawlkhat in sum leh pai deih ziakin mi pimang zel uh a, hiai pen SoO kalhna hi’n gen a, peace talk pailel a, tuaziakin hibang chindan SoO nuai a om helpawlte’n hih nawnlou dingin ngen hi. Security lamte’n mi pimangtute theihna chiang nei uh a, himahleh puankhiak hilou ding a, mi a pimangte uh a khahkhiak ahih kei aleh govt in a mawkna a koihlou ding hi’n gen hi. (UNA)
India leh Myanmar Top security meet
Imphal, Aug-10: India leh Myanmar in Myanmar gamsung Tamu ah Intelligence Bureau (IB) a top level Security meeting nei uh chi’n thutut kingah hi. Thusuakin a gendan in in huai meeting bel ni 7 paisa a aneih uh hi’n kigen a, tua ah Myanmar a Manipur helpawl tuamtuam tamtak omte tawh kisai genkhawm uhi. Huai hun in Myanmar palaite’n Manipur helpawl a gam ua om chihthu theikhalou uh hidan in gen uh a, kuateng om uhiam, chih leng puankhiak hilou hi.
Staff Nurse written test om ding
Impha, Aug-10 : Medical Directorate, Govt. of Manipur in Staff Nurse lakna ding in August 18, 2013 in written test sai ding uh hi’n kigen hi. Huai tawh kisai in Director, Health Services in Staff Nurses, Female Health Worker (ANM), Pharmacist, LDC leh Male Worker ding a apply te’n Directorate Office ah August 12-16, 2013 sung officer kaihun sungin Admit card laktheih ding hidan in taklang hi.
3-days social service-cum-awareness
Imphal, Aug-10 : Kangla Economic Devt Orgn (KEDO) leh Imphal Municipal Council-te banah Ima Market, Khwairamband bazar pangkhawmte’n Aug 13, 2013 a Patriots’ Day zatna ding tawh kisai in tuni in BT Road ah ‘3 days social service-cum-awareness programme’ nei uhi. Hiai hun ah AK Mirabai, Social Welfare Minister in Chief Guest hikawm in hongna a, A. Nimai Sharma, IMC, Chairperson; L. Ibobi, Director (Social Welfare) leh Ward members ten leng uap uhi. Patriots’ Day bel August 13, 2013 in zat hiding hi.
Children’s Cultural Meet om
Imphal, Aug-10 : Manipur Alliance for Child’s Rights (MACR) te saina in tuni in Chingmeirong a Tribal Research Institute ah ‘Todays Secured Childhood Ensures a Magnificent Tomorrow’ chih thupi zang in 4th Childrens Cultural Meet-2013’ zatna om hi. Huai ah AK Mirabai, Social Welfare Minister in Chief Guest hihna tawh uap a, Thongju MLA Th. Biswajit, NG. Shantikumar, Mr World Contest Gold medal leh Olympic Bronze meddalist MC Mary Kom te Functional President leh Special invitees in pang uhi.
Huai hun ah AK Mirabai in, hibang function pen zat gige dinga hoih hi a, hiai tungtawn in Manipur a teng nam tuamtuamte unau ihihdan ikitheih uh poimawh, chi hi. Social Welfare depttt te ahihleh child trafficking tawh kisai hihbei sawm naktak a pang uh ahihdan leng gen hi. Mr. World Dr. NG. Shantikumar in hinkhua ah mahni kithunun poimawh a, thil khatpeuh ihihna ah kuhkalna in a zuih aleh lawhchinna in zui ahihdan gen hi. MC Mary Kom in, tuni a huai program atel naupangte kiangah kuapeuh in hih theihlouh neilou ahihdan gen a, tuading a mahni kithuzawh poimawh a, tupna i neih a leh kuhkaltak in pang lehang zawhlouh ding omlou ahi, chi’n gen hi.
Foreign News:
Lebanon ah Turkish pilot pimang
Beirut, Aug-10: Kumlui a Lebanese Shia bangzah hiam Syria a pimangte khahkhe dia nawhna in Zuwar al Imam Reda helpawlin Turkish piliot 2 pimang uhi. Thusuakin agendanin Lebanon capital Beirut ah Turkish Airline pilot pimang hi ua, bus sunga Turkish Airlines tuangte zingsang baihtak dak 3.00 vela khamkhawl ahihnung un mi 7 pawtkhiak sak hi ua, adangteng pimang in om uhi.
No comments:
Post a Comment