Manipur Express | August 14, 2013

AUG 14, 2013 ISSUE

HEADLINE

“Sonia makpa(son-in-law) hawi hituan kei hen”- BJP

Robert Vadra ziakin Parliament buaizak nawn

New Delhi, Aug-13: UPA Chairperson leh Congress President Mrs Sonia Gandhi’ makpa (son-in-law) Robert Vadra in document bawltawm zangin Haryana ah gam lei chi a IAS officer khat in ngawhna abawl tungtang ah tuni in Parliament

ah opposition BJP te sousang  mahmah nawn uh a, huai thu koihdap hun hilou a, govt in kintakin huai thubuai suikhia hen chi uhi. Lok Sabha leh Rajya Sabha ah tuni a session(houlimna) pat nung sawtlou in opposition BJP member-te a tutna uapan dingtou in kikou ngal uh a, Sonia’ tanu Priyanka Gandhi’ pasal  hawi hituankei hen chi tanpha in kikou khia uhi.

Tuni sunnung dak 2 tanin Lok Sabha leh Rajya Sabha 2vei tuak buai a,  atawp in tuni adingin khawlsak khongin om hi. Question Hour hunah Jammu & Kashmir a Kishtwar muna Namkal buaina thu leng sousang mahmah in BJP te’n J&K a vaihawmna len Omar Abdullah govt kitawp dingin phu uhi. Left-front pawlin Kerala a Solar scam thupitak om tawh kisai bangchidan a Centre govt tutan dai dide thei mawk hiam chi uhi. Huai issue-te ziak mah in zan in Lok Sabha leh Rajya Sabha leng houlimna(business) paisuak theilou in dinkhawl mai uhi.

BJP leader Yashwant Sinha telin leader tuamtuamte’n Congress makaih UPA govt ginatlouhdan uangtakin tangkoupih uh a, mipite zawng deuhdeuh hileleng  govt hausa deuhdeuh kichi bang leng om thei ahi chi tanpha in genkhum hi. Sanjay Nirupam ngial a tutna apan dingkhia in Speaker omna lam va zuansukin kou in va kikou hi. Parliamentary Affairs Minister Kamal Nath leh a Deputy Rajiv Shukla-te front row ah tu uh a, BJP member te ama lam ua vapai in va maitang kawk hial uh a, huai apan Congress member-te leng thangpai uh a, buaina sousang sem theidia a kilat ziakin Speaker Meira Kumar in sunnung tan Lok Sabha a busiess khawlsak hi.

HEADLINES  2NA:

Manipur ah tuni’n Patriots’ Day kizang 

Imphal, Aug-13: ‘Anglo-Manipuri war’ kichi kum 1891 a British-te tawh kidouna ah Manipur gam leitang leh zalenna kepbitna dinga hinna pia mi tamkhopte zahna leh theihgigena kawm in tuni’n Manipur govt inntekna in  salphate’ ni(Patriots’ Day) kizang hi.Imphal khawpi sung mun tuamtuam a huai hun zatna ah Chief Minister O. Ibobi leh Dy Chief Minister Gaikhangam makaihna in Minister-te leh top official-te’n British-te tawh kidouna a si mihangsante  zahna pia uhi. Zingsang in Moirangkhom a Hicham Yaichampat a Yubraj Tikendrajit memorial ah zahna in pak(wreath) pia uh a, Palace gate a General Thangal memorial ah leng zahna pak(wreath) pia uhi.  

     Sunnung in Kangla Fort leh Imphal Pologround kiang BT Park a Saheed Minar ah zahna piakna kawm in main function zatna om hi. Huai ah Chief Minister O. Ibobi in kum 1891 Anglo-Manipuri war ah mihangsan Thangal General leh Bir Tikendrajit in Manipur gam zalenna kepbitna ding leh Manipur gam leitang humbitna dia a hinna uh a piak uh thupi sakthu genkawm in amau kipumpiakna tawh kituak pahtawina leh zahna piak senglouh khop a thupi hi’n gen hi. Deputy Chief Minister Gaikhangam in Manipur gam kipumkhatna kepbitna dingin mipite’n panla chiat dingin ngen hi.

     Tuni a Patriots’ Day zatna tawh kiton in Police personnel 3  leh Fire Service personnel 1 medal piak in om uhi. Sub-Inspector M Uttam of Imphal East district Police Commando unit in  Chief Minister’s Police Medal for Gallantry ngah a,

Huailou in Subedar S Sunilkumar of Manipur Police Training Centre, Havildar Th Bharatchandra of 1st Manipur Rifles leh Station Officer L Nabachandra of Manipur Fire Service in Chief Minister’s Police Medal for outstanding devotional to duty piak hi uhi.

HEADLINES  3NA:

Gelmuol khua kum 100 chinna thupitak in kilawm

   

Lamka, Aug-13: Gelmuol khua kum 100 achin lopna(Centenary celebration) tuni zinglam dak 11:00 in Gelmuol Playground ah om hi. Huai ah Pastor T.Khupjalen, Area Pastor, LLA in thumna in program hun hong a, Ngamhao Touthang, MDC in Gelmuol khawlui map hongkhia a, Insung Upa Jamkhothong Lhungdim in Gelmuol Centenary suang hong hi. Seiminlun, Chief of Teisieng makaih in balloon khahkhiatna om a, Thenkholet, Chief of Songpi makaihin Vapal khahkhia a, mi tuamtuam in Dakpi(gong) 100 vei khen-ging uhi.Huchi’n Centenary lapi sa uh a, huai zawh in Rev L.B Angam, General Director ECCI in Gelmuol Khawlui Map leh Centenary suang thumna in lan  hi. J.Lhungdim, Chief of M.Songgel in Gelmuol Khanggui Thusim kichi hongkhia a,huchi’n Pathian kiang ah thumna in lan(dedicate) hi.

     Jamkhothong Lhungdim (Insung Upa) in a genna ah apa’n Judaism ana pom in inn leh lou zuak hial in Kuki tate 1000 val Israel ah lutpih hi’n gen hi. Apa’ sepgimna gah lou in tunitana Pathian vualzawlna tang hi’n gen a, apu-apa, amah leh asanggam te’n khawsung mi, nampi leh mimal tunga hihkhelh bawlkhelh omte Gelmuol khua Centenary lop tawh kitonin Pathian min a ngaidam ding in ngen hi.

     T.Sumlianthang, MDC in Gelmuol khua kum 100 chinna kipahpihthu gen a, maban ah Gelmuol khua Centenary lop tawh kituak in hausa in khawsung a tagah leh gentheite dopkang touh deihthu gen in hi.Ngamhao Touthang, MDC in agenna ah Gelmuol khua kum 100 chin tawh kiton in khawsung ah laisimna lam lungtunhuai na hiam? chih ki etthak hun hi’n gen hi. Khawsung mite kikhual taka teng a sing leh gua atamtheipen suan a, plantation lam hahbawl semding in hasuan hi.     

    Goulal, President TPP in agenna ah khawmipite kituak a pangkhawm in khawsung  hoihna ding ahihleh it neilou a pangkhawm din hasuan a, Gelmuol khaw mipi’n Hausa tawh kituaksem panla din hasuan hi.   

       Tongminthang Lhungdim, MDC; Holkholun Lhungdim, ex-President KIM, Holkhojang Lhungdim ban ah Thangpau, Home Secy KNO te’n leng thugen uhi. Lasiam tuamtuam pan Pathian phatna la ngaihkhiat in om a, Gelmuol Cultural Troupe leh D.Phailian Cultural Troupe-te apan cultural programme om a, nitaklam in Centenary lopna in mipi’n ankuang umkhawm uhi.

Assam CM Gogoi in State demand thu ah PM mu 

New Delhi,Aug-13:Congress makaih UPA govt in Andhra Pradesh state apan Telangana state bawlkhiak dia thupukna abawl tawh kitonin India malsuahbial ah state deih a kiphinna sousang mahmah a, state tuamtuam ah movement paitou lai  hi. Adiakin Assam state ah state thak ngetna ziakin bandh leh strike hun sawtkuamtak om a, government office building hunkhop halsiat ahihbanah gari leh taithei tuamtuam leng tamtak haltum in om hi. Assam Chief Minister Tarun Gogoi in kiphinna neite’ kiangah a thil demand uh  Prime Minister kiang tunding ahihdan a genpih paisuakpih in tuni  in Prime Minister Dr Manmohan Singh tawh thil omdan genkhawm uh chihthu kiza hi.

Chief Minister Gogoi in Parliament House office ah Prime Minister kimuhpih a, Assam dinmun leh tulai a thil omdan genpih  hi. Aman  media te’ kianga agendanin, govt in Telangana state bawlkhiak dinga lemsakna a puan phet in Assam apan state dang atuamtuam bawlkhiak ding phutna sousang mahmah a, Prime Minister kiangah thil omdan (ground situation) ka va zasak chi a, maban ah state ngetna tawh kisai houlim touhzel hiding chi hi. Prime Minister in ka thugente hoihtakin hon ngaihkhiaksak a,  Union Home Minister Sushil Kumar Shinde kimuhpih dingin hon theisak a, ahihziakin, amah Mumbai ah damlou a a omlai tak ahihziakin Union Finance Minister P Chidambaram ka kimuhpih a, aman tu in hiai issue hon enkai ding chi hi. Gogoi in Congress President Sonia Gandhi leng kimuhpih ding hi’n gen a, tuni in Parliament a Central Hall ah bel tomchik houlim kha vuat uh chi hi.

Tarun Gogoi in Union Home Secretary Anil Goswami leh Joint Secretary (North-east) Shambhu Singh leng Assam Bhavan ah kimuhpih a, hiai hunah Commissioner Finance, Himangshu Shekhar Das leh Gogoi’s Principal Secretary Jhisnu Barua leng tel uhi. Union Home Secretary in a genna ah Assam Govt in suggestion tuamtuam a piakte uh Ministry in a en masa ding a, tua zawh in Union Home Minister kiangah piaktouh ahi ding chi hi. Prime Minister Dr Singh in kallui in state deih akiphin Bodo People’s Front, Karbi Anglong Autonomous Council member- te leh Dimasa Hills Autonomous Council-te kimuhpih khinta hi.

LOCAL NEWS

I-Day Badmintion Match kipan

Lamka, Aug-13: Hiangtam Lamka a Community Hall ah tuni nitaklam dak 6.00 akipan in Public Leader-te leh Dist Level Officer(DLO) te’n Independence Day Badminton Match kimawlna  pan uhi.Huai ah  Men’s double team 14 om a, huaite DLO team 7 leh Public Leader’s team 7 hi uhi. Mix double ah team 4 om a, huaite  DLO lam apan DC’s & partner leh LT Puii & partner tel uh a, Public Leader lam ah Lulun & partner leh Grace & partner tel in tunitakin kimawl ek uhi.Aug 14, 2013 nitak dak 6:00 in kimawlna sunzom nawn ding hi.

Dakkal 48  general strike kipan  

Kanggui, Aug-13: Kuki State Demand Committee (KSDC) in Kuki state pe dinga govt nawhna in tuni(Aug 13, 2013) zankim (mid- night) akipan dakkal 48 sung daih dingin Manipur a Kuki mite luahna munteng ah general strike puang uhi.General strike sung in  Media leh medical kia khahkol(extempted) uh a,  General strike in govt establishments,educational institutions, business establishments, vehicular movements  leh adangte huamvek hi’n  kigen hi.KSDC thusuak in govt employee leh student-te leng Aug 15 a Independence Day lopna a tellou din ngen uhi. General strike pen Aug 15, 2013 zankim tan daih ding hi’n kigen hi.

Numei leh pasal omdan kilawmlou

taka omlai mankhiak in om uh

Lamka, Aug-13: Zomi Mothers’ Assn(ZMA) Gen HQ makai te’n tuni sunnung dak 3:00 vel in khawpi sung munkhat ah numei leh pasal kala thangtat taka omlai Mawinu (40) leh Thangpu (40) mankhia uhi. Numei leh pasal (nupi leh papi) kilawmlou taka omte ZMA makai te’n a thuhilh zawh un Pastor  Genliankap in Pathian kianga thumsak in khahkhia uhi. ZMA Gen HQ te’n a genna uah maban ah kuamah numei-pasal kala thangtat taka om nawnlou din theisak uh a, thangtat taka om teitei matkhiat a om nawn leh ahihna diktak uh leh photo tanpha uh suahkhiak hiding in gen uhi.

HDFC in Water Filter 1 pia

Lamka, Aug-13: ST Kishore, Manager HDFC in CDSA office a zat dingin tuni zinglam dak 10:00 in Water Filter 1 ‘Tata Swach” kichi te Lalvullien Joute, President CDSA leh Lun Chon, Secy CDSA kiang ah pekhia hi. ST Kishore in agenna ah HDFC kichi Dist Administration lam, public leader-te leh mipi’n support pia in tunitan hoihtaka function thei  hi’n gen hi. CDSA office a zatding Water Filter houchik himahleh itna thilpiak ahihdan gen a, maban ah CDSA adia poimawh om hun ah HDFC in panpih theihna omte ah panpih ding a mansa gige hi’n gen hi.

BYF Delhi  in khua 17 veh

Lamka, Aug-13: BYF Delhi in Zodawn siamsinna puahna ding in kum 2009 akipan ‘Project Nehemia’ kichi pan uh a, tukum tan in panpihna a donkhiakte uh Rs. 5 lakhs val a, huaite siamsinna a zat dingin thonzel uhi. July 26-31, 2013 sungin EBCC Delhi Upa Committee' Year Plan leh BYF in Project Nehemia nuai a a focus uh  "students motivation" sepsuahna in Zodawn Missions Motivational Tour- 2013  nei uh a, EBCC Director of Institutions Rev V Thangkhangin leh EBCC Delhi Pastor V Nenglian' makaih in Project Nehemiah team in Zodawn a khua 17 va siksuak uh a, Convention English School te vehna, etkhiatna, leh naupangte hanthonna va zang uhi.

Manipur Express a semding

lakna ding interview hun  

Manipur Express a semding lakna ding in anuai a kitaklang bang in Manipur Express office ah efficiency test/interview om ding hi.

Aug 14,2013(Nilaini)  11:00 am : Night duty-cum-Chowkider

Aug 21,2013(Nilaini) 11:00 am:Helper-cum-Printer(trainee)

Aug 28,2013(Nilaini) 11:00 am:News Editor(trainee)

SUUNNA

Langpum Tungdim(88) f/o T. Ginkhanmang of Mata in taksa upat tak banah natna tuamtuam bangtanhiam a thuak nungin  tuni zingsang  dak 4.00 velin  si a, tuni in Mata hanmual ah kivui hi.Amah EBC saptuam ah Evangelist-teacher hihna a pension tanpha in taima taka sem ahi hi.

Miss Ngaihoiphal (17) d/o Khamneipau, Chief of Buallian  tuni zing dak 7.30 velin si  a, tuni mah in Buallian hanmual ah kivui hi.

Mrs Chiinlam Guite (77) w/o (late) Lianchinkhup Guite of  New Checkon tuni zinglam dak 11.30 velin cancer ziakin si, Aug 14, 2013 in  Checkon ah kivui ding hi. Mrs Chiinlam Guite ahihleh Thangkhanlal Guite, IPS, IG of Police  pianna nu ahi hi. 

IMPHAL NEWS

Congress Bhavan ah Patriots’ Day

Imphal Aug-13: Manipur Pradesh Congress Committee pawlin tuni in NT Road a Congress Bhavan ah ‘Patriot’s Day 123veina’ zang uh a, huai ah Dy CM basnah MPCC President Gaikhangam leh Chief Minister O. Ibobi banah Minister, MLA leh party worker tamkhop tel uhi. MPCC President in Patriots’ Day zatna kawm in Congress Bhavan huangsung ah singbou suan hi.

Police in official 2 hunkhia

Imphal, Aug-13: Horticulture deptt a official  2 apaisa Aug 8, 2013 in Mao Maram akipan Imphal zuanlai Kanglatongbi  ah galvantawite’n a pimang uh  tuni’n Manipur Police te’n hunkhia uhi.Dy CM Gaikhangam in  tuni nitaklam in media person-te kimuhpih a, Horticulture deptt a Farm manager M Priyokumar (56) leh aseppih officer W Ipopishak(50) tuni zingsang dak 3.30 a hutkhiak hi’n gen a, hileleng hutkhiak ahihdan uh diktak bel puanglou hi.  Aman Sadar Hills pansan Kuki Revolutionary Army (U)te’  hentang a om uh hi’n leng gen a, hibanga gamtang a om nawn leh action lakkhum hidin gen hi. Tuabang kalah KRA(U) kianga sum tamtak piak zawh a khahkhiak a om ahihdan uleh tuni nitaklam a Imphal hongtung uh chihthu  official taka taklat hilou chi’n UNA News Agency in suahkhia a, amaute sum ngetna dinga pimang a om uh hi’n leng taklang hi. 

Helpawl tuamtuam in I-day boycott

Imphal, Aug-13: Manipur a helpawl tuamtuam 6, Assam akipan helpawl group 3, Meghalaya akipan group 1 leh Tripura a group 1 kigawmkhawm group tuamtuam 11 in Aug 15, 2013 a Indian Independence Day lopna  boycott puang uh a, Aug 15, 2013 zingsang dak 1.00 akipan in nitaklam dak 5.30 tan Northeast pumpi ah General strike puang uhi.

Huaite bel Manipur helpawl tuamtuam 6 kigawm Co-ordination Committee(Cor Com), Meghalaya a HNLC,Tripura a NLFT, leh Assam a KLO,NDFB leh ULFA(Ind) pawl hi uhi.

Search operation sunzom

 Imphal, Aug-13: Independence Day zat laia  buaina om khak ding venna in Manipur  state pumpi ah security  hihkhauh in om hi. Tuni in  Imphal East District Police leh Mantripukhri a om 143-Battalion CRPF te’n Porompat DC Road area ah  operation  bawl uh a, uisiam (sniffer dog) tanpha zang uhi.  Adiakin  August 10, 2013 nitaklam  dak 6.30 in  Chief Minister’s Bungalow  kiangah bomb  hihpuak ahihziakin security hihkhauh behlap in om hi.

Independence Day uaplou din ngen

Imphal, Aug-13:Kuki State Demand Committee(KSDC) in  North-east biala Kuki mipi omte’n Aug 15, 2013 a Independence Day lopna uaplou ding in ngen uhi. KSDC thupuangtu K Khongsai in a genna ah India govt in Kuki mite thildeih leh phut piak ding a limsaklouh dungzui in Kuki mipite’n Independence Day lopna limsaklouh ding ahi, chi’n gen hi.

K. Khongsai in a gendan in KSDC in dakkal 48 sung bandh a puan Aug 13, 2013 zankim lai in kipan a, hiai dakkal 48 nunga leng govt apan dawnna mumal tak a om tuankei aleh Committee in maban sutzop  dingin pa la ding chi’n gen hi.Kuki mite’n kum 1960 akipan in state tuam ngetna pat hia, huai hunlaia India Prime Minister Jwaharlal Nehru kiang tanpha ah thil omdan tut ahihdan Khongsai in gen hi.State ngetna kum 50 chin nungin leng govt in nelhsiah  hi a genkawm in KSDC in state leh central govt in Kuki armed gropus KNO leh UPF tawh SoO om dungzui in peace talk neikhawm kin ding in nawh sek hi’n leng gen hi.

Border area a fencing enzui ding

Imphal, August-13: Chandel district sunga Indo-Myanmar gamgi ah border fencing kibawl ziakin Manipur gam lianpi Myanmar gama lut dinga patauhna om enzui kawm ding leh gamgi dinmun leng enzui ding in Manipur govt in Principal Secretary(Home) makaihna nuai ah  High-power committee dinkhia hi. Huai a Chairman in Principal Secretary (Home) pang ding a, member-secretary di’n Additional Secretary (Home)  pang ding chi’n  kigen hi. Committee member dingte  Inspector General of Police(Intelligence), Inspector General of Assam Rifles (South), Indo-Myanmar border fencing a Border Road Task Force (BRTF) official-te, DC/Chandel, Supdt of Police/Chandel leh Addl DC/Moreh  pang ding uh chih ahi hi.  Committee te’n Moreh border town a border fencing kibawl enzui ding uhi.     

NATIONAL NEWS:

Dimapur ah bomb 1 puaknawn

Dimapur, Aug-13: Apaisa August 7, 2013 in Dimapur ah hand grenade khat puakin huai ah mi khat si a, tua nung zan nitak dak 7:20pm in leng bomb khat puahzak sak hinawn hi. Bomb puahna mun ahihleh transport carrier agency kiang hi a, gate pawlam (lampi lam) apan bomb paihlut hi a, a si leh liam bel omlou vanglak hi’n kigen hi. Thusuakin agendanin, thiltuanna mun ahihleh Marwari Patti a Rhino Roadways Corporation te’ huangsung hi a, bomb puah ziakin a kianga a car khawl khat a tyre puahtap beh hi. SP Dimapur V Z Angami in agendanin, kuate hiam in mi vauna dan a apaih uh hiding ahi chi a, tulai in Dimapur khawpi sungah thawmging nuamlou simsim om sek ziakin duty naktaka hih khauh beh ahi chi hi.

Parliamentary secretary for information technology & communication, technical education, science & technology, taxes, Tovihoto Ayemi in thiltung delhngal in mawhpaihthu puanga,

DC Dimapur N.Hushili Sema in leng va delh a, August 15 independence day celebrations sukbuai sawm om hiam chih te suizui hiding chi hi.

Pakistan in Indian post kapnawn

Jammu, Aug-13: Jammu and Kashmir leh Pakistan kigamgitna LoC mun ah Pakistani army te’n BSF te’ post tu zingkal in kap nawn uh chih thu kiza hi. Tu in Indian army te leng kihah sak mahmah ta ua, Pakistan in ceasefire abawhsiat lai leh India in naktakin kapthuk ta ding chi uhi. Jammu division a Samba district sunga Indian forward posts te Pakistani army te’n ban kap uh chi uhi. BSF officer khat in agendanin, Pakistani Rangers te’n tu zingkal dak 7:45 am in Ashraf Post apan Narianpur Border Out Post (BoP) hon kap uh chi hi. BSF jawan te’n leng thuk ngalin hun bangtanhiam kikaptuahna piang man hi. Kal khat sunglel in Pakistan te’n India a kap uh a 8 veina bang hita hi’n kigen hi.

Khamtheih gram 961 mukhia

Chennai, Aug- 13: Air passenger numei khat zanin Kuwait zotsawm lai a khamtheih puak Rs 15 lakh huu tawh matkhawm in om hi. Amah ahihleh airport ah Central Industrial Security Force te’n hoihtak a etkhiakna aneih zawhnung un man uh hi’n kigen hi. Mat a om ahihleh Andhra Pradesh mi Darbari Palagiri kichi hi a aman a khamtheih (heroine No 4) puakte packet neu chikchik ah thunin a underpant kawm ah seel hi’n kigen hi. Mat ahihnungin Custom official te khut ah a khamtheih vui teng tawh pekhe khawm uhi. Hiai khamtheih gikdan ahihleh 961 gm vel hia, international market ah Rs 1 crore bangin baihlam takin khot theihding chi uhi. Amah ahihleh Air India flight ah tuang a Kuwait zotsawmlai hi’n thusuakin gen hi.

Student luang ngakul ah kimu

Guwahati, Aug-13: Assam Engineering College (AEC) a engineer sinlel student khat zan in college campus sung a ngakal kibawl ah sisa in kimukhia hi. Sihna tuak ahihleh Madhurjya Barukiyal kichi hi a, amah Golaphat a Kamargaon apan hi’n kigen a, zan nitaklam a volley ball kimawlkhin phet hiai ngakul a kisil a omlai sisa a muhkhiak ahi hi. A innkuan pihte’n bel ragging a nak bawl luat ziak ua si hidanin ngohna bawl uhi.

NSCN (I-M) in I’Day zangding

Dimapur, Aug -13: NSCN (I-M) in zingchiang Aug 14, 2012 in “67th Naga Independence Day celebration” thupitakin lopsawm uhi. NSCN IM thusuakin agendanin, zinglam dak 8:45 am geihin Council Headquarters, Camp Hebron ah program kipan ding a, Nampi puanlap “national flag” kaihpalhna neih hiding chi uhi. Hiai hun ah NSCN IM member teng leh officer teng kimtak a teldingin MIP thusuakin theisak hi.

Assam ah ULFA (I) member 2 man

Guwahati, Aug-13: Zan nitakin Tinsukia district sung ah security force ten operation aneihna hun uah Paresh Baruah makaih ULFA (i) cadre 2 manua, amaute apan in bomb hat mahmah IED leng mukhia uhi. Independence Day ding tawh kisai in ULFA ten banghiam hih tum in Tinsukia khawpi ah leng bomb paihsawm uh chih thu om ziakin security te kigingsa in om ua, zan nitakin Borburi area operation aneih hun uah meltheihlouh galvan tawi pawlkhat tawh kikaptuah kha mandek uh chih hi a, ahihziakin kuapawl hiam chih khawmial nuai ah theih man hilou chi uhi.

FOREIGN NEWS

Israel in settlement 900 bawlbeh ding
Jerusalem, Aug-13: East Jerusalem a Palestinian mite gam, Israel in a opkhumna munte ah phalna bei in, tenna inn 1,200 bawlbehna di’n Israel solkar in zanzek in thupuan bawl a, huainung sawtlou in Jerusalem' municipality  in tenna inn 942 bawldi’n phalna penawn hi. Israel leh Palestinian mite kala kilemlouhna bulpantu ahihleh Jerusalem bial a settlement plant ziak hi’n kigen a, namnihte’n kilemna aneih theihna ding un US gamtang mahleh lawhching theilou hi. Tuabang kalah US Secretary of State John Kerry  in phalna neilou Israeli settlement ziakin maban a kihouna om ding hihbuai hilou ding chi hi.  

Mali election  ah Keita vualzou

Bamako, Aug-13: Pathianni a Mali election result puankhiakna official thusuak om naikei mahleh PM  lui Ibrahim Boubacar Keita  vualzou hi. Ex-Finance Minister Soumaila Cisse  akikhinpih vualzou chihthu atheih in kipahpihthu puang a, gamsung vaihawmna ah lamzang dingin deihsakthu leng khak hi.  Mipite’n official result puankhiak kal ngaklah uh a, gamsung kisesa tunding nawn dingin leng gingta uhi. 

Sri Lanka ah Christian leh Muslim-te vau

Colombo, Aug-13: Buddhist  sahkhaw mite’n Sri Lanka gamsunga sahkhaw dang, adiakin  Muslim  leh Christian  mite tungah vauna bawl in, nipikal paisa sungin helna chikhat nei uh a, mi 5 hihliam uhi. Thusuakin a gendanin Colombo a Grandpass area ah Muslim biakbuk khat halsiat saw mom ziakin tuni tan kikhak lai a,  security force-te’n venbitna neilel uhi. 

Iraq buaina ah Al Qaeda kipuang

Baghdad, Aug-13: Iraq pansan Al Qaeda pawlin Middle-east buaina amau sulnung hi’n puang uh a, Iraq gamsung mun tuamtuam ah chi-le-nam(sect) tawh kisai a kithahna thiltungte lehg amau gamtatna ahihdan taklang uhi. Iraq ahihleh Middle-east a helpawlte hatna munpi khat hi a, niteng phial in bombpuak ziaka sihna tuak om sim gige hi’n gen uhi. Iraq buaina ah majority population(65%) Shi’ite Muslim target in om deuh uh a, Shi’ite vaihawmna nuaiah Sunni Muslim te’ khawsa nuamlou in helna pan ua, Al-Qaeda helpawlte leng Sunni Muslim  apan hideuh uhi.