Manipur Express | August 13, 2013

Passenger pua Tata Winger accident: mi 1 si in ahunkhop liam

Lamka, Aug-12: Passenger pawkawm a Lamka apan Imphal zuanlai   Tata Winger (No.AS11AC-4881) tuni zinglam dak 11:30 vel in Torbung Bangalow ah lamlian apai pasal  khat a pelhna lam ah lamlian sik a accident a, huai ah passenger 1 si in midang 8 liam uhi. Misi kuahiam chih theihchet pah hilou a, Hospital a morgue tut zawh bangtanhiam nungin  

Khabesoi a om a 7-Manipur Rifles aseml Hav. Doujangam Mate (48) h/o Lamneiting of Phaikong village, Sajiktampak hi’n kitheikhia hi. Aliamte leng kintakin Lamka a District Hospital tut hi uh a,huai ah mi 7te dressing bawlzawh in paisak theih in  om uh a, doctor te’n mi khat admit uhi.       

       Thu kizadan in tuni zinglam dak 11:00 in IB Road a Tata Winger ticket akipan Tata Winger neitu leh driver thuah Haopu of Zion Veng, Tuibuong in passenger 15 tawh Imphal zuanlai  Torbung Bungalow ah Sanathoi (35) of Torbung Bangalow lampi a pai  tawh kipelbuai  uh a, driver in Tata Winger in brake man in lamlian sik ah khawlthei hi’n gen uhi. Gari hat taka tailai a khawl phut phetin passenger- te leng buaisia in  tawmkhiat theihnana ah tawmkhia uh a,huchi kalah Tata Winger leng lamlian sik munken a khawl lai nulla kuaksung tui lakah  passenger atawmkhe manlou teng tawh kileplut in apei(tyre) atunglam ah om hi’n mit a mute’n gen uhi.

      Tata Winger a accident thu zak phet in huai mun apan gamlalou a om  116- Bn BSF leh mipi pangkhawm in gari kilepbut lai  khupleh nawn in gari sunga passenger te leng hunkhia uh a,huchih laiin  nullah a tui(water) leng awm(chest) tan phial tum hi’n kigen hi. Himahleh passenger-te lakah mi 1 dam zoulou in amun ah si a,misi leh aliam  mi 8 te Dist Hospital ah tut in om uhi.

       Aliam Dist Hospital a  kipawlutte -Baby Cindy(2) of Kawnpui; Cicy (24) of Tuibuong; David (28) of Kawnpui; Jovi (30) of New Lamka; Sanathoi(35) of Torbung Bungalow; T.Paukhohao (47) of  IB Road; Lallenthang (40) of Thangzam Road leh Chochong (45) w/o Ginkhohen of Leisang  hi uh a, aliamte lakah Chochong kia  Hospital ah admit in om a, adangte bel dressing zawhin paisak hi uhi.  

       Misi kuahiam chih theihchet pahlou in bangtanhiam  om a, Joint Philantrophic Orgn makaih in paungaihna(mike) zangin khawlai ah kikou uh a, nitaklam dak 4:30 velin misi pen Hav Doujangam ahihdan theihkhiak hipan hi.Aman azi Lamneiting tawh  tapa 2 leh tanu 2 nei uh a, naupangte school kaiziak un azi leh tate tulel in  B.Aijalon a om uh hi’n kigen hi. Dist Hospital a morgue ah Joint Philantrophic Orgn makaite’n siluang puandum in tuam uhi. Postmortem bawlzawh in a innkuante kiang ah piakkhiak hi a, tuni nitak mahin Phaikong village ah puaktung in om hi.

       Tata Winger kaih khiatna dingin  Insp Elvy Tunglut, OC/CCpur PS in 27-Sector Assam Rifles te kiang ah recovery Van ngen a, huai zangin Tata Winger kaihkhiat theih in om a, tu’n Police Station ah  omlel hi. Tata Winger-te kipawlkhawmna CCpur-Imphal Taxi Owners Society in asia apha teng mawhpuakna la uh a, Aug 13, 2013 in (late) Hav Doujangam’ khua ah Taxi Owners Society te’n siluang puan atuam in gan gou ding uh a, innsung vai a kihouna neiding uh hi’n kigen hi.

     Tata Winger accident thu ah Police te’n FIR No. 70 (8) 2013 CCP-PS U/S 279/338/427/304-A IPC registered uhi.

HEADLINES:

Issue 4 in innpi 2 houlimna buaisak

Parliament monsoon session hihbuai in om nawn

New Delhi, Aug-12: Parliament monsoon session pailel ah tuni in issue tuamtuam ziakin Lok Sabha leh Rajya Sabha innpi 2 te sousang mahmah in kikawktuahna tanpha  piang hi. Kerala a Solar scam thupitak om tawh kisai bang, Jammu & Kashmir a namkal buaina thu leh Telangana issue ziakin innpi houlimna hih buai in om hi. Tualou in IAS officer Ashok Khemka in gam leina tawh kisai in Congress Chief Mrs Sonia Gandhi’ makpa(son-in-law) Robert Vadra in lehkha poimawh tuamtuam abawlte alem (fake) ngen ahi chi a ngawhna abawl thu leng tuni’n House ah  genkhawm dingin BJP te’n nawh uh a, tua ziakin leng buaina sousang mahmah hi.

Tuni sunma a session a kipat phetin Lok Sabh ah MP hilai leh alui sisate suunna  ‘bituary references’ om a, tua zawhin Left-parties  member- te atutna uapan dingtou in Kerala state a Solar scam thupitak om tuni tanpha bangziaka ginatak a sui hi nailou hiam chih dotna bawlkawm in judicial inquiry bawl hi henla, Kerala Chief Minister Oommen Chandy  leng kintakin kitawp  hen chi uhi. Huchih lai in Jammu and Kashmir a namkal buaina tawh kisai in opposition BJP te kitom  uh a, Chief Minister Omar Abdullah in muanna leh bitna(law & order) dinmun  enkol zoulou ahihleh kitawp hen chi uhi. Telangana state bawlkhiak dek a om pe’n deihlou taklatna in Andhra Pradesh apan MP hunkhop kikou zak uh a, Speaker Meira Kumar in session khawlsak a, sunnung dak 2:00 in session kipan nawn mahleh huai hun ah leng buai nawn zel hi.

Rajya Sabha ah leng Question Hour hunah nih vei mahmah buai a, J&K a Kishtwar biala namkal buaina thiltung, Kerala a Solar scam thu leh Andhra Pradesh state khenzak a Telangana state bawlkhiak ding thu ziak mah in buai hi. M Venkaiah Naidu (BJP) in a taklatna ah Rajya Sabha a opposition leader Arun Jaitley in Kishtwar a namkal buaina mun zanin va etkhiak sawm mahleh Jammu & Kashmir government in phallou in sawlkik uh chi hi. Chairman Hamid Ansari in Jaitley kiangah Kishtwar tungtang a muhdan gendingin hun pe mah leh Left member te’n Kerala a solar scam tungtang naktaka a tangkoupih ban uah banner tanpha a zakkhiak ziakun Jaitley in leng thugen thei tuanlou chih hi. Chairman in minute 15 sung houlimna khawlsak a, patnawn ahih hunin leng a ngeingei mah bangin buai nawn veve chih ahi hi.

Tipaimukh Dam in Mizoram ah khua 20 sukha ding

Aizawl, Aug-12: Mizoram leh Manipur gamgi a Tipaimukh Dam bawlkhiak ahih aleh huai in Mizoram state ah khua 20 sukha (affect) kha ding chihthu om hi. A sukkhak ding khua 20 apan mipite’n Forest Advisory Committee (FAC) kiangah ngetna khat pelut in forest clearance pelou dingin ngen uh a, FAC in  August 13 leh zinghal August 14 in  meeting nei in huai tungtang genkhawm ding uh chihthu om hi.

Electric meivak/power  1500 Mega Watt(MW) pekhe zouding Hydro project ‘Tipaimukh Dam’ ahihleh Mizoram-Manipur gamgi jula  bawl hiding chih hi  a, huai in Manipur  gam leh leitang banah khua tamtak atup(submerged) ding genlouh in Mizoram-te’ gammang (forest) 1551 hectares tuumse ding chih hi. Affected People’s Association of Tipaimukh Hydro Electric Project thusuak in a taklatdan in  huai project in khua 20 sukha ding a, huai lakah khua 14te ngial ah gammang leh  lou bawlna munte tuummang vekding chi uhi. Gammang leh lou a tupmang ding khuate ahihleh, Sawleng, Darlawn, New Vervek, Sailutar, Sakawrdai, Khawlek, Vaitin, Vanbawng, Khawpuar, Suangpuilawn, Ratu, Phullen, North East Tlangnuam leh Lungsum ahi chi uhi. Mizoram a Environment & Forest department in a suahkhiak ‘fact sheet’ ah Tipaimukh Dam in a suksiat khak ding khuate taklat ahihlouh ziakin Affected People’s Association in poisakthu leng taklang uhi.

Tipaimukh Dam project in Manipur gam leh leitang a hihsiat khak ding tengteng Forest Advisory Committee in July 11-12, 2013 a meeting a neihna uah chiamteh khinta uh hi’n kigen a, ahihziakin Mizoram tawh kisai bel chiangtakin bangmah chiamteh hi nailou chi uhi. Association thusuakin a gendanin Tipaimukh Dam bawlkhiakna dingin Mizoram in singkung 14,634 mansuah ding a, gua(bamboo) kia leng lakh 40 val hihsiat hiding a, gua(bamboo) omna area 1063.4 hactares vel  mangthang zou ding  chi uhi. Forest Advisory Committee ah Jude Sekhar in Chairperson hihna la hi. Aman tulelin Director General of Forests alet banah Special Secretary, Ministry of Environment and Forest, Government of India semlel ahi hi.

LOCAL NEWS

A/R te’ inntekna in ‘Run for Fun’

Lamka, Aug-12: Tuibuong a 27-Sector, Assam Rifles HQ a   Sector Convoy Ground ah Aug 14, 2013 zinglam dak 10.55 in Independence Day 66veina tawh kisai in ‘Run for Fun’ chih thupi a nei in kitaitehna om ding hi’n kigen hi.Kitaitehna zawh zinglam dak 11.10 in India flag kaipalhna leh National Anthem sakna om ding a, huaizawh in kipahman tuamtuam hawmkhiakna in zui ding hi. Commander, 27-Sector, Assam Rifles in huai hun uap ding in Health Minister ,Parliamentary Secy(Hprt & SC), DC/CCpur, ADC Chairman,ADC Vice Chairman leh mi poimawh tuamtuam hunkhop chial hi.

Parade rehearsal ah contingent 50 tel

Lamka, Aug-12: Lamka Public Ground ah Aug 15, 2013 a   Independence Day lopna ah school tuamtuam akipan contingent 47 vel parade ah tel ding uh a, huaite banah NYK/CCpur, ASHA, Job Card holder, Civil Police, ex-Servicemen leh IRB & Band party  leng tel ding uhi. Parade a telding contingent teng tuni zingsang in Lamka Public Ground ah Parade Commander ding JK Suan Guite, MPS, Asst Commandant, 1^st IRB makaih in Rehearsal nei uh a, contingent telding 60 lak ah 10 tellou uh hi’n kigen hi.  Aug 13, 2013 zingsang dak 7:00 in leng Rehearshal om nawn ding hi.

 I-Day football tournament

Lamka, Aug-12: Singngat Area Football Assn(SAFA)te saina in Aug 15, 2013 sunnung dak 1.00 in  Singngat Public Ground ah ‘the 8^th SAFA I-Day Football Tournament,2013’ final programme om ding a,Ginsuanhau,MLA (Singngat A/C) khuallian hiding hi.Huai ah Guest of Honour in Mahajon Xavier Nengkhanlam pang ding a, Functional President in Smt Rachel N. Guite,MCS, SDO/BDO, Singngat pang ding hi.Football final kimawlna ah Apoisekai vs Lsaizom(Mata) teamte kibawl ding uh a,sunning dak 2.00 a Third Place kituhna ah BYF FC vs Singngat collection teamte kimawl ding uhi.

Malaysia ah Zomi International Concert 

Lamka, Aug-12: Malaysia khawpi Kuala Lumpur a Chin Woo stadium  ah zanhal zinglam dak 11:45 in ‘Zomi International Concert(Zomi IC)’ nei uhi. Huai hunah Zomi IC Founder, Philip Mawng in concert piankhiakdan pulak a, lasiam tuamtuam, Kim Kim Deih Mang @ Sower Sister, Francis Khampi,  Zomi Section Player – Khualtawng, CK Khai, Mary Lun, Niangpi (Idol), Cingpi, Lengtong Pauno, Kapno leh lasiam tuamtuam tamtak tel uhi.

ZYA makai te’n joint meeting neiding

Lamka, Aug-12: ZYA Gen HQ a Central Executive Committee member-te leh ZYA Lamka block cabinet member te’n Aug 14, 2013 zingsang dak 7:00 in Nehru Marg a Zomi Council Administration building ah joint meeting nei ding uhi. Huai hun ah ‘the 3^rd World Zomi Convention’kichi Oct 25-27, 2013 sung Lamka a om ding tawh kisai a Organising Committee te’n ZYA khut a mawhpuakna (portfolio) apiak uh genkhawm ding uh chih ahi hi.

I-Day Badmintion Match om ding

Lamka, Aug-12: DC/CCur makaihna DLCC meeting thupukna dungzui in tuni nitak dak 6:00 apan Hiangtam Lamka a Community Hall ah Public Leader-te leh Dist Level Officer te’n Independence Day Badminton Match kimawl ding uh chih himahleh Aug 13 &14,2013 nitak dak 6:00 apan neih dingin ahun suan uhi. Public Leader-te leh DLO kimawl ding teng nitaklam dak 5:30 in kimawlna mun tunkim ngai hi’n thusuak kingah hi.

SUUNNA

Tingneichiin (55) d/o Upa (late) Lalkhopao Gangte of Thangzam road  tuni nitak dak 7.15 in tuap(lung) a  cancer ziakin  si, aluang August 13, 2013 in Hill Town hanmual ah kivui ding hi.

Rev.J.Sanglhun (81) f/o Dr Lalnghaklien (Vety Officer/CCpur) of Rengkai tuni zing dak 4:00 velin zunkhum ziakin si a, tuni’n Rengkai hanmual ah kivui hi.

Kapchiin (28) d/o Ginkhopau of V.Munhoih, New Lamka zan nitak dak 6:00 velin BP sanglua ziakin  si a, tuni’n Simveng hanmual ah kivui hi.

IMPHAL NEWS

Cabinet meeting in  CM bungalow

a bomb puakzaksakte  mawhpaih

Imphal, Aug-12:Tuni nitaklam a Cabinet meeting in Aug 10, 2013 nitak dak 6.30 vela CM bungalow konglam gate kianga bomb puakzaksakte lemna leh muanna deuh Manipur mipite kalh hi a koih in mawhpaihthu puang uhi. CM bungalow kong a bomb paite Prepak(Pro) helpawl hi’n kipuang khin uhi.

    Tuni a Cabinet meeting in Manipur Police a Head Constable 488 vel leng ASI a upgrade ding in thukim uhi. Manipur Police ah ASI post 1500 vel om lakah tulelin post 1000 vel vacancy om ziakin Head Constable 488 vel promotion piak ding Cabinet in lemsa hi’n kigen hi. ASI post 25% vel Direct Recruitment a lak ding hi a,75% vel promotion dana pai ding chih ahi hi.Cabinet meeting in tuma a Tombisana High School omna mun ah Nupi Keithel bawlkhiak ding in leng thupuk uhi.Imphal ah IETE Technical University bawlkhiak ding thu leng genkhawm uh a, hileleng tunungin ngentelzaw a genkhawm lai ding in koih uhi.Cabinet in Hort deptt a official 2 meltheihlouhte pimang tungtang leng genkhawm uh a,hileleng thuchiang puankhiak neilou uhi.

CM in Hockey player-te cash award pia

Imphal, Aug-12: German gama Moenchenladbach khawpi ah ‘7^th Junior Women’s World Cup Hockey Championships’ ah India team in Bronze medal la uh a, huai ah Manipur mi 4 leng telkha uhi. Chief Minister O. Ibobi in  tuni in a office chamber ah kimuhpih a,  Hockey players 4 te kiangah kipahpihna in cash award Rs. 2 lakhs chiat pia hi.

Huai mi 4te- Pukhrambam Sushila Chanu, Thokchom Pinky Devi, Ningombam Sanarik Chanu leh Mayengbam Lily Chanu hi uhi.Chief Minister in players 4 te kiangah kipahpih mahmah ahihdan genkawm in noute Manipur mipite’n hon kisaktheihpih mahmah uh ahi, chi hi. Mi 4 te’n  Aug. 13, 2013 in Imphal nuse nawn ding uhi. Tuni a CM in Hockey player 4te a kimuhpihna hun  ah  M. Prithviraj- Parliamentary Secretary(YAS), R. K. Nimai- Commissioner(YAS) leh N. Ashok Kumar- Director( YAS) te leng tel uhi.

UNC General Strike ni 1 ching

Imphal, Aug-12: UNC in Manipur a Naga mite tenna bial teng ah zan(Aug 11, 2013) nitak zankim akipan in dakkal 48 sung daih ding General Strike a puan uh tuni ni khat chinni tan in buaina thiltung thupilua bangmah zak omlou hi. Ukhrul, Senapati lrh Chandel ah bandh ziakin hindan ngeina buaipha hi’n kigen a,General strike ziakin BRTF te’n NH No. 37 a a nasepna uleh Northeast Frontier Railway te’n Tamenglong district ah a nasepna uh khawl hi’n kigen hi.Dakkal 48 sung bandh ziakin Imphal zuan ding vanpua Gari tamtak paisuak theilou uh a,NH No. 2 a Mao Gate leh NH No. 37 a Jiribam ah Gari tamtak tang(stranded) hi’n kigen hi.UNC te’n Manipur govt nuai hilou alternative arrangement a kivaipuak ding deihna in India govt leh Manipur govt tawh kihouna nei dia phutna in General strike puang hi uhi.

Lampi hoihta: thautui hongtung

Imphal, Aug-12: Imphal-Dimapur lamlian(NH No. 2) lamlian ah Gari ngeina banga a paisuak theihnawn ziakin thautui pua Oil Tanker hunkhop Imphal hongtung uh chihthu om hi. Tuni in leng NRL tanker 3 telin thautui pua Oil Tanket 62 vel Imphal hongtung hi.Oil Tanker 62 hongtung thakte banah Khuman Lampak a Inter State Bus Terminus ah Oil tanker 100 vel hongtung khinsate leng hichi’n omlai uh hi’n kigen hi.

Combined team in UNLF 3 mankhia

Imphal, Aug-12 : Thoubal Police leh 27-Assam Rifles kithuah combined team in zan in  a Tangjen, Nungoo leh Chairel village laka search operation a neihn uah UNLF atel numei 1 leh pasal 2 mankhia uh chih Police thusuak in gen hi.

69-Bn CRPF te’n vanzat hawmkhia

Imphal, Aug-12 : Mantripikhri  69-Bn CRPF te’n tuni’n NGO leh Youth Club te kiangah Civic Action Programme tungtawn in kimawlna vanzat leh  thil tuamtuam hawmkhia uhi. Huai hun ah Chief Guest in SK Rai, DIG Group Centre, CRPF Imphal, Langjing  pang a, Commandant of 69-Bn CRPF PK Singh, Commandant of 109- CRPF Bn PK Mehra  leh Commandant of 86 CRPF Bn Sanjeev Kumar te Guests of Honour in pang uhi. Huai hun ah Youth Social Club Kiyamgei, Hmar Youth Assn Imphal, Dry Bone Vision Langol, Eastern Youth Constructive Assn, Porompat leh KRIPA Foundation Mantripukhri te kiangah Rs. 1 lakhs man ding  water storage tank khat chiat pia uhi. Tua banah NGO 6- Mother Teresa care home Mantripukhri, Hope Home Imphal, Kavitha Children Home Mantripukhri, Ching Tam Ashram Mantripukhri, Blind School Takyelpat leh Karmel Jyoti Koirengei te  kimawlna vanzat tuamtuam Rs. 1 lakhs man chiat pekhia uhi.

Combined team in operation nei

Imphal, Aug-12 : Imphal East Police Commando- te leh 40-Assam Rifles kithuahte’n tuni zinglam dak 9:30 in Imphal river leh a kimlak banah Sanjenthong a VIP Colony lak search operation nei uhi. Huai hun ah combined team te’n metal detector leh uisa siam zangin bomb leh  muanmawh thilte naktak in zong ua, himahleh bangmah muhkhiak bel neilou uhi.

NIT in Foundation Day zang

Imphal, Aug-12 : NIT Manipur te’n tuni in Takyelpat a NIT campus  ah Foundation Day zang uhi. Huai ahEducation Minister M. Okendro , Education Commissioner P Vaiphei, Controller of Technical Education Kh Rajchandra Singh, former Vice Chancellor of Manipur University C Amuba, Member BOG, NIT Manipur Kh Devabrata leh Director NIT S. Birendra Singh leng tel uhi.

Tipaimukh Dam deihlouh ziakin rally pai

Imphal, Aug-12 : Khelakhong to Sekmaijin Areas People organization, Hangul Social Youth Action Committee, Sekmaijin Social Club, Sekmaijin Mayai Leikai Naharol Club leh Ngakhapat Youth Dev Assn te saina in tuni in Sekmaijin mun ah Tipaimukh Dam bawl ding deihlouhna in mass rally pai uhi. Huai hun in pawl tuamtuamten lampi zui  uh a, Sekmaijin bazar ah public meeting nei uhi.Huai hun ah President of India, Prime Minister of India, Union Home Minister, Minister of State for  Environment & Forest, leh Chairperson and members of Forest Advisory Committee (FAC), Chief Minister leh Governor of Manipur te kiangah memorandum pia uhi.

NATIONAL

GJM in bandh khahkol hidin gen uh

Darjeeling, Aug-12 : Gorkha Janmukti Morcha (GJM) pawl in Gorkhaland a demand uh tawh kisai a Darjeeling bial ah  hunchiam omlou dia bandh a puan uh Aug. 15, 2013 akipan in ni 4 sung khahkol ding uh hidan in gen uhi. Thusuakin  a taklatna ah Darjeeling bial bandh nawn hun ah kuaman thagum zanglou ding in  GJM General Secretary Roshan Giri in ngen hi. Bandh nung ni 10 hita a, himahleh West Bengal CM Mamata Banerjee in bangmah thu zasak nailou a, huai naksang in GJM ten hunchiam omlou bandh a bawl pen uh ‘dan kalh Illegal’ hidan in gen a, dakkal 72 sunga  khawlsak dingin thupia hi. Hibang a West Bengal CM in thupiak a bawl GJM in  mawhpaih uh a, CM in hunchiam omlou bandh  tuabanga a lak aleh maban ah Janata Curfew puan hiding chi’n Roshan Giri in gen hi.

Kashmir  genlai in MP  khat 1 ihmu

New Delhi, Aug-12 : Parliament tuni’n  Kashmir state sung Kishtwar biala  namkal buaina thu  Finance Minister P. Chidambaram in thil omdan a genlai in a nungzeka tu Andhra Pradesh state apan MP dia telching  a om Palvai Govardhan Reddy ihmu den hi’n  kigen hi. Namkal buaina ah tuni tan in Muslim mi 2 leh Hindu mi 1  si uh a, amaute bel India mi ngen hi uhi. Tua banah akigawm in mi 10 mat in om a, mimal’ tenna leh neih-le- lam banah gari tamtak halsiat in om hi. Tua ziakin Kishtwar ah curfew koih in om a, tuni inleng curfew om mahleh army-te Kishtwar town sung ah patrolling pai veve uhi.

Kerala CM tunga kiphin pawl om

Chennai, Aug-12: Solar scam thu a mipi lungkimloute’n Kerala Chief Minister Oommen Chandy tungah thangpaih etsakna in kiphin uh a, huai thiltung ziakin Thiruvananthapuram ah security hihkhauh in om hi. Thusuakin a gendanin Cabinet Meeting a teldia kisa, Kerala CM in mipi sousangte ziakin police officer  tamtak humbitna tawh meeting mun zuan thei a, opposition worker tamtakin Thiruvananthapuram a Secretariat  umkual uh a,amau  Rs. 7 crore mangthang ziaka kitawp dingin CM nawh uhi. 

Bihar ah namkal buaina  om

Nawada, Aug-12: Bihar khawpi   Patna apan km 150 vela gamla Nawada ah namkal buaina om ziakin ni 2 paisa sungin mi 2 thah a om  hi’n thusuakin gen hi. Nawada town ah zanhal akipan public curfew puan hi a, Chief Minister Nitish Kumar  in huai tungtang tuni a a gendanin pawlkhat te’n thilhoih deihlou in buaina bawlsawm uh a, kuapeuh pankhawm poimawh ahihdan kilang, chi hi.

Kishtwar buaina a kigolhte  mankhia un: Union home ministry

New Delhi, Aug-12: Minister of State for Home Affairs R.P.N. Singh in tuni’n   agendan in Sintawpni paisa a Jammu & Kashmir a Kishtwar bial a namkal buaina a kigolh teng government  in mankhe dia thupiak hi a, Jammu & Kashmir dinmun a hoihnawn theihna dingin  Kishtwar town a namkal buaina omsakte  matkhiak vek hiding chi hi. 

FOREIGN NEWS

Norway PM  in Taxi  hek

Oslo, Aug-12: Mipite vote deih in Norway capital Oslo ah Prime Minister Jens Stoltenberg  vazin a, vote zong dia akuanlai in aguktak a taxi hek(drive) chihthu om hi. Hibang a Prime Minister kiniam chetdan atheikha peuh in lamdang sa uhi. Taxi sunga tuang te’n amah, Prime Minister tunga bang ngaihdam nei uhiam chihte leng aman a theinop lamtak hi’n gen hi. Thusuakin agendanin election kuan  PM omdan ahihleh zan in VG newspaper  ah suahkhiak hi a, politics tawh kisai a PM omdan apan mipite’n bang ngaihdan nei uhiam, chi’n Jens Stoltenberg in dotna bawl hi.

KIA cadre 4 kaplup in om

Laiza, Aug-12: Kachin Independence Army (KIA) cadre-te leh Myanmar sepaihte zanzek in Muse Township sung Monggo area ah kikaptuah uh a, dakkal 3 sung thautang khahkhiak a omte’n KIA cadre 4 kaplum hi’n thusuakin gen a, Kachin helpawl leh govt. kala kilemna omtheihna dia pawlnihte’ panlak lai a hibang thiltung om hi’n gen hi.