Lianboi Khaute sihna tawh kisai tulel dinmun

Lianboi sihna thu ah point 3 in kilemna bawl

Lamka, Jan-23: Khuptonminlian @ Lianboi zana electric bawllai current in a mat ziaka sihna tawh kisai in tuni in Imphal a CE chamber ah Zomi Students’ Federation (ZSF) leh N. Sarat Singh, Chief Engineer (Power), T. Manga Vaiphei, MLA (Henglep A/C) &  Chairman, MTDC & MLA (Henglep) leh Lianboi innkuan akipan Harry Muanlal telin kihouna om  a
, sawtkuamtak kihou nungin point 3 ah kilemna bawl  uhi. N. Sarat Singh, Chief Engineer (Power) in Harry Muanlal kiangah sigalna in Rs. 2 lakh pekhia chihthu leng om hi.  

Kihoulemna dingzui in luangman  Rs. 5 lakh hiam Workmen Compensation Act dungzui in kha 3 sungin  zangnadopna ahithei zah piak ding chih hi a, Lianboi’ zi leng kha 5 ma in Die-in-harness scheme tungtawn in sepna piak ding chih ahih banah CSS Pension Rules dungzui a Family Pension piak dingin kilem uhi.

Tuni a kihouna ah Chief Engineer (Power) banah  L. Priyokumar Singh, Addl. Chief Engineer (Power) – II, EDM; Th. Aton Singh, Suptd Engineer, EC-II, EDM; H. Shantikumar Singh, Executive Engineer: SCD-I, EDM; W Kumar Singh, Executive Engineer, Ccpur, EDM; leh L.K. Hatzaw, Asst Engineer, Distribution Sub-Division tel uh a, Electricity Dept sik-le-tang in CE(Power) leh  mi 5 in kilemna lehkha ah  suaikai uhi. Misi innkuante sik-le-tang in S. Kapkhanmuan, President, ZSF/Gen HQ telin mi 3 in suaikai uh a, theihpihtu in T. Manga Vaiphei, Chairman, MTDC pang hi.  VPC Gen HQ a President Khatkhotong Baite leng huai hun ah tel hi. Electricity Deptt leh misi innkuante zan in  a kihoufel theihlouh ziakun siluang zan nitak in District Hospital campus a morgue ah zan khawvak a koih hi a, tuni’n  a kihoulemna om theih ziakin morgue akipan lakkhiak hi a, New Christian Cemetery hanmual ah kivui hi.

=================

Electric bawllai current pai in a mat ziakin dam zoulou

Lamka, Jan-22: Electricity deptt, CCpur Divn a linemen  Khuptawnminlian @ Lianboi (47) s/o (late) Kaizasong of Red Cross road  in tuni zinglam  dak 9:5 velin SBI, Tuibuong Branch nunga  33/11- KV sub station nung a electric bawllai current pai in man a,  kintakin  Dist Hospital ut himahleh etkol manlouh in si hi. Siluang tuni mah in morgue ah Postmortem bawl hi a,  misi innkuante’n electricity deptt tawh kihou fel ahihman in siluang lak lemsalou uh a, tuzan morgue ah koih in om hi. Misi innkuante sikin Zillai makaite leh EE makaihna in electricity deptt in kihouna nei mahle uh kihoulem thei nailou uh hi’n kigen hi. Lianboi sihna tawh kisai Zomi Students’ Federation(ZSF) pawlin a case la uh a, fax tungtawn in  CM ading memorandum thon uhi.

       ZSF in CM kianga  memorandum a piak uah  point 3- Walkman Compensation Act nuai ah misi innkuante  ex-gratia Rs.5 lakh piak ding, kha 3 sungin Lianboi’ innkuante khat  die & harness nuai ah sepna piakding chih ahih banah  Lianboi’ a pension hun chin masiah  azi’ Siemzou kiangah  a pasal kha lawh full a piak ding chih ahi hi. ZSF in CM kiang ah memorandum a piak uh Jan 23, 2013 sun dak 12:00 tana govt in a tungtansak kei leh ZSF makaih in kiphinna om ding chi’n leng govt theisak uhi. 

       Thu kizadan in  zan nitak in IB feeder asiatna omziak in electricity deptt te’n bawl mahle uh zoulou in tuzing baihtak akipan sunzom nawn uh a,  Sielmat area ah electric high tension gui a kitan ziakin bawl uh a, SO Khailal leh Lianboi in  SBI Tuibuong Branch nung a electric siatna bawl ding in kisa uhi. SO Khailal in a gendan in Khengjang Power Sub Station a duty te thuzak in electric current shutdown sak uh a, huaizawh in Khailal pen electric khuam a kaltou in high tension gui 3 omte laka 1 sutkhe khin phet  a 2nang sutkhe dia kisalai electric current in Lianboi man in  sawnkhia a, alu’ (head) in leilak khawhkha hi’n gen hi. Army te’ gari zangin Dist Hospital puaktung pah  himahleh damzoulou hi’n gen hi. 

     Khengjang Power Sub- Station a current shutdown nunga electric current om mawk bangziak hiam chihbel theilou ahihdan Khailal in gen a, electric bawlzawh hunhun in  Khengjang power sub station ah current  paisak nawn ding a thuzak fing chih  himahleh bawlzawh ma in current in a seppih Lianboi mankha hi’n gen hi.  Khengjang Power sub station a duty te’n electric current a paisak uh ahihleh hihlouh bel amun a omlou ahih ziakin theituanlou hi’n Khailal in gen hi.Tuni ai thiltung tawh kisai in  Police te’n ‘Unnatural Death’ (UD) case 01. CCP-PS/2014 U/S 174 Cr PC registered uhi.