Manipur Express | January 24, 2014

Lianboi sihna thu ah point 3 in kilemna bawl

Lamka, Jan-23: Khuptonminlian @ Lianboi zana electric bawllai current in a mat ziaka sihna tawh kisai in tuni in Imphal a CE chamber ah Zomi Students’ Federation (ZSF) leh N. Sarat Singh, Chief Engineer (Power), T. Manga Vaiphei, MLA (Henglep A/C) &  Chairman, MTDC & MLA (Henglep) leh Lianboi innkuan akipan Harry Muanlal telin kihouna om  a, sawtkuamtak kihou nungin point 3 ah kilemna bawl  uhi. N. Sarat Singh, Chief Engineer (Power) in Harry Muanlal kiangah sigalna in Rs. 2 lakh pekhia chihthu leng om hi.  

Kihoulemna dingzui in luangman  Rs. 5 lakh hiam Workmen Compensation Act dungzui in kha 3 sungin  zangnadopna ahithei zah piak ding chih hi a, Lianboi’ zi leng kha 5 ma in Die-in-harness scheme tungtawn in sepna piak ding chih ahih banah CSS Pension Rules dungzui a Family Pension piak dingin kilem uhi.

Tuni a kihouna ah Chief Engineer (Power) banah  L. Priyokumar
Singh, Addl. Chief Engineer (Power) – II, EDM; Th. Aton Singh, Suptd Engineer, EC-II, EDM; H. Shantikumar Singh, Executive Engineer: SCD-I, EDM; W Kumar Singh, Executive Engineer, Ccpur, EDM; leh L.K. Hatzaw, Asst Engineer, Distribution Sub-Division tel uh a, Electricity Dept sik-le-tang in CE(Power) leh  mi 5 in kilemna lehkha ah  suaikai uhi. Misi innkuante sik-le-tang in S. Kapkhanmuan, President, ZSF/Gen HQ telin mi 3 in suaikai uh a, theihpihtu in T. Manga Vaiphei, Chairman, MTDC pang hi.  VPC Gen HQ a President Khatkhotong Baite leng huai hun ah tel hi. Electricity Deptt leh misi innkuante zan in  a kihoufel theihlouh ziakun siluang zan nitak in District Hospital campus a morgue ah zan khawvak a koih hi a, tuni’n  a kihoulemna om theih ziakin morgue akipan lakkhiak hi a, New Christian Cemetery hanmual ah kivui hi.

Kilemna  point 3te:

HEADLINES:

Yurembam a Power sub-station kangsia ziakin electric meivak buai

Imphal, January-23: Yurembam Power Sub-station ah January 19, 2014 nitaklam dak in 33-KV line leh 11-KV line aki-het(contact)khak ziakin meikang thupitak om a, meikang ziakin 11-KV Switchgear teng repair vuallouh in kangsia hi. Huaiziak mahin Yurembam  power sub-station a 11-KV Eastern Feeder; 11-KV Western Feeder; 11-KV Tedim Feeder; 11-V Industrial Feeder leh 11-V CRPF Feeder in meivak a supply-na area tengah a tompen in leng kal khat sung electric meivak ginataka piaktheih hilou ding chi’n Electricity deptt in thupuan bawl hi. Lamka khawpi leh a kimlak ah leng ni 2 paisa akipan in electric meivak ginatak in pai theilou hi’n thutut kingah hi. 

Chief Engineer (Power) in a thusuah danin Jan 19, 2014 in  Yurembam  a 132/33/11/KV Control Room buai guih a, 11-KV Switchgear omteng bawlthak theihlouh in kangsia chi hi. Huailou in  33-KV Control & Relay Panels in a piakkhiak  33-KV line-te’ leng buai vek a,   meivak piakkhiakna kisiate  abaihtheilam a bawlthak hiding chih himahleh zawhsiang hun ding theihchet hilou chi’n puang hi.

HEADLINES:

Saidan khaw kianga electric post kipuk dek ziakin electric line nawngkai

Lamka, Jan-23: Tuni  sunnung in Vallalhlun, AE leh Lalminlun, AE te’n  Saidan khua a Electric khuam(post) kipuk dek va enkhia uh a,huai electric post a kipuk dek a awn leiloi ziakin Jan 21 akipan Saidan tawnkha 33-KV(New Lamka Feeder)  leh 11-KV ( IB Line Feeder) kihettuah kha a, New Lamka feeder ah  trial dan a kikhah sek pen in hihkha hiding in gintakthu gen uhi. New Lamka pen Division tuam in a etkolna hi’n leng gen uhi. 

Electricity Deptt CCpur Division a officiak khat in a gendan in, zanhal in Lamka a IB feeder mei a pailouh ziakin Electricity Deptt te'n theihtawp suah in panla uhi. Huchihlai in Jan. 21, 2014 nitaklam dak 5:00 in Saidan leh Khawmoi kikal ah innmun kihawmna ding mun JCB zanga nawt pawl om a, huai in Electric post khat phukoi in kipuk dek a, awn leiloi in om hi (lemlak a circle no. 1). 

Lemlak 1na ah electric post phutkoi ahihziak in Lemlak 2 na ah Electric post koi ziak in electric line 3 laka 2 kitan in, a kitanlou line 1 pen kikang a, huaiziak in IB feeder (11KV) leh New Lamka feeder  (33KV) kihettuah kha hi'n gen uhi. Huaiziak in IB feeder leh New Lamka feeder mei pailou tuak in Deptt te'n theihtawp suah in bawl uh a, mun tuamtuam check kualkual tawh thuah uhi. Huchihlai in IB feeder lam ah zan a tuahsia Lianboi leh a lawmte'n SBI Tuibuang Branch gei a Electric sia abawl laitak un mei (current) pai guih Saidan khua a IB feeder leh New Lamka feeder a kisukkhak ziaka tuahsiatna tuak kha hidi'n gen uhi.

HEADLINES:

Parliament session om hun ah Telangana thu hihfel hi ding

President in Telangana thu ah AP assembly ni 7 hunpia

New Delhi, Jan-23: President Pranab Mukherjee in tuni in Andhra Pradesh(AP) legislature-te’ kiangah Telangana issue tawh kisai tuni apan ni 7 sunga genveng dingin hunpia a, January 30, 2014 in huai thu final bawl hita ding chih ahi hi. Telangana Bill thu ah President in Andhra Pradesh Assembly in huai thu kintaka genfel dingin theisak a, himahleh Assembly in kal 4 sung hu ngaih laidingin ngen mahleh President in January 30, 2013 tan hunpia chih hi. Parliament session ah February 5, 2014 in Telangana issue ah thutawp bawl hita ding chih ahi hi.

Centre in tuma zekin AP government kiangah ni 10 sung hun pekawmin Andhra Pradesh Reorganisation Bill tungtang leng genfel dingin theisak  a, Union Home Ministry leh law ministry in AP government kiangah ni 10 sung  a final draft bill pelut dinga theisak kawm in huai bill pe’n Parliament a luikhiak hidingin zasak uhi. Himahleh Andhra Pradesh government  tuni tanpha in leng a taktakin kisakhol lou in muangtak in omsan lai uh chihthu om hi. Huai ziakin Centre telin President mahmah in leng ngaikhawk petmah a tuni apan ni 7 sung in huai thubuai genfelna  ding hun na neita uh chi’n  theihsakna pia chihthu om hi.

HOT SPOT:

Lamka Public Ground a Republic Day a Parade Contingent telding te’n rehearsal  ah S.Khaikhopau Ngaihte, Jr MCS, BO/HQ, DC’s office in contingent- te apan salute la hi.

LOCAL NEWS:

Tuni’n Parade rehearsal om 

Lamka, Jan-23: Lamka Public Ground ah Jan 26, 2014 zinglam dak 8:00 akipan  Republic Day 2014 lopna om ding tawh kisai tuni zingsang  dak 7:30 akipan Parade Commander JK Suan Guite, MPS, Asst Commandant, 1st IRB makaih in parade contingent te’n  rehearsal nei uh a, S.Khaikhopau Ngaihte, BO Hq. DC’s office in parade atel contingent-te apan salut la hi. Tuni’n parade contingent 35 lak ah 31 tel uh a, Jan 24, 2014 in final rehearsal om ding hi. Final rehearsal hun ah contingent a telloute’ main event ah telsak hilou ding uh a, contingent strength khat ah mi 32-35 kikal phak teitei ngai ding chih ahi hi. Tutung Republic Day lopna a parade contingent lak ah CCpur dist adia amasa dingin women police contingent tel ding uh a, ADCC school 170 vel om lak ah mixed contingent in Misao Lhahvom JB school-te telding uhi.

Naupang kum 7 vel in Circus show

Lamka, Jan-23: Chhattigarh akipan naupang  kum 7 vel mi Lakshimi in  tuni zinglam dak 11:00 vel in ZEO/CCpur office khang Tipaimukh Road mun 3 ah Rope Circus show bawl a,mipi ahunkhop in huai en  uhi. Lakshimi in anu-le-pa tawh kithuah in circus lahna(show) neisek uh a, Lamka ah kal 2 vel omta  uh hi’n kigen a, Rope Circus enmipi  te’n akiphal bangbang uh sum pekhawm uhi.

Kithawhkhawm in lampi bawl uh

Lamka, Jan-23:Central Lamka huamsung a om Tedim Road akipan PKT steet lutna lampi  kisegawpta a, govt akipan banah MGNREGA tungtawn a leng work programme ah telkha ngeilou ahihman in vengsung mipite’n mahni phal dandan sum kithawhkhawm in zan akipan ngeingoi(sand), chip(suanghum) leh cement mixed in vengsung lampi bawl in nasem uhi.

Delhi a R-Day a Parade ah telding

Lamka, Jan-23: Delhi a Republic Day 2014 lopna hun ah North Eastern Region NCC Contingent lak a telding in Rayburn H/S apan Class IX simlel leh Rayburn NCC Jr Divn. apan Lalkhantuang leh Cadeny Guite ban ah Jr Wing (girls) apan Chingmuankim leh Lydia Chingbiaksiam telkhiak in om uh a,amau zan zekin Delhi zuanin zinkhekhin uhi.

Rayburn College te’n 18th Baccalaureate 2014 nei

Lamka, Jan-23: New Lamka a Rayburn College te’n tuni zinglam dak 10:00 apan Rayburn PCI (R ) Church ah 18th Baccalaureate 2014 nei uh a, huai ah kum 2014 a COHSEM saina a class XII  exam dingte khakkhiatna leh thumsakna  om a, Rev Khen P.Tombing, Principal Rayburn College in student- te’ hasotna thu genkawm in exam dingte Pathian kiang ah thumsak hi. Tutung in Rayburn College apan student 617 (Science  243, Commerce  64 leh Arts  310) exam ding uhi. Huaizawh in Rayburn College campus ah student te’n session II nei uh a, best student award, group dance, Annual Sports 2013 a kipahmante hawmkhia uhi.  Kimahman  mu 82te Gold medal, 63 in Silver medal leh 25 in bronze madel la uhi.

Aided materials tamtak kihawmkhia

Lamka, Jan-23: People Advance in Social Service (PASS), ALIMCO, Kanpur leh ONGC, New Delhi pangkhawm in Dec 10, 2013 in Synod Hall ah Persons with Disabiliites assessment camp om hun a beneficiaries telkhiakte adingin tuni  in Church Road, Vengnuam, New Lamka a om Dist Disability Rehabilitation Centre (DDRC) office  ah Aided Material  hawmkhiak ahi hi. Huaite Wheel Chair 8; Tricycle 3; Hearing Aid 56; Lower Limb 1; AC 3; Walking Stick 1 leh Crutch 2 hi’n kigen hi.

Sunday School Teachers training om

Lamka, Jan-23: IB Road a Lamka Presyterian Church ah tuni zinglam dak 10:00 apan Tuithaphai Presbytery nuai a Lamka Pastor Bial; Kawnpui Pastor Bial; Saikot Pastor Bial leh Imphal Pastor Bial  a Sunday School teacher -e’n training nei uh a, mi 400 vel tel uhi. Huai ah Mizo Sunday School Union, Mizoram Synod apan trainer Upa Lalchhuanawma leh Upa T.Lalthahluna te’n sinsak uhi.

Drip Irrigation nget-theih 

Lamka, Jan-23: Dist Hort office/CCpur ah haichi  tui piakna(Drip Irrigation) deihte ading in kum 2013-14 sunga beneficiary hiding in January 31, 2014 tan ngetna piaktheih laitak hi a, thuchian kimaaw theinuamte adin office ah kantheih ding chihthu om hi.

Legal Aid Clinic honkhiak hiding 

Lamka, Jan-23: Manipur State Legal Service Authority saina in January 24,2014 sun dak 12.00 in CCpur Govt College ah Legal Aid Clinic honkhiakna leh One Day Legal Awareness Programme kithuah om ding a, CJM/CCpur in hong ding hi. Huai ah Chief Guest in Ricky Vanlallawm, Principal, CCpur Govt pang ding a, Functional President in  Yumkham Rother, CJM/CCpur leh Guest of Honour in Ms Athokpam. Shanta Devi  pang ding hi.

National Voters’ Day zat hiding 

Lamka, Jan-23: Singngat Community Hall ah January 25, 2014 zinglam dak 10.00 in 4th National Voters’ Day zatna om ding a, huai ah vote neithak dingte lakah Electoral Photo Identity Card(EPIC) thak hawmkhiak hiding hi. Huai ah Village Authority member-te leh akisaipihte telkim chiat ding in SDO/AERO Singngat in theisak a, 60-Singngat A/C huamsunga BLO teng leng telchiat ding in theisak hi.

Suunna

Chingthamoi (40) sister of Siamkhen of Dorcas Veng, New Lamka tuni zingsang  in awmna in si a, YPA Hanmual, New Lamka ah kivui hi.

Dimzangai (72) w/o T.Chinzadou of Colony Veng, Bungmual zan nitak dak 11:30 in taksa hatlou in si a, tuni’n Bungmual hanmual ah kivui hi.

IMPHAL NEWS:

Elm. teacher teng training piaksawm

Imphal January 23: Manipur a Elementary teacher tutan a training nailou omlai 7000 vel omlaite kum 2015 tan in IGNOU nuaia Open Distance Learning (ODL) tungtawn in ‘2 Years Diploma in Elementary Education’ zawhsak vek sawm in Manipur govt nuaia Education(S) deptt in panla a,training programme patna ding in tuni;n Paslace compound a Manipur Film Dev Corpn Auditorium ah honna (launching programme) ah Chief Minister O. Ibobi khuallian a pang in hong hi. CM in huaia paikhawm elementary teacher te’n student-te sinsakna hoihtak piak theihna ding in kum 2015 tana training zouciat dingin hasotna thu gen hi. 

    Education Minister, M Okendro in a genna ah  training piak ding teacher  7153 te lakah education(S) deptt nuaia elementary teacher 3177 leh Tribal Affairs & Hills huaia sem teacher 3975 hi uh chi’n puang a, kum 2015 tana training zoulou teascher-te National Council of Teachers Education (NCTE) guideline dungzui in a sepna uapan a khawl mai uh ngai ding ahihman in teacher te’n hibsang traning a zawh teitei uh poimawh ahihdan gen hi.

Kalay khua ah medical camp 

Imphal, Jan-23: Rotary Club of Imphal te’n Myanmar gama Sagaing Region govt tawh pangkhawm in June 26, 2014 in Kalay khua ah free OPD camp sai sawm uhi. Huai a free medical camp om sung in damlou mi 1,000 vel etsawm in Rotary Club pawl kisakhol uhi.   Huai camp om sungin Rotary Club of Imphal pawlin Kalay a General Hospital a zat dingin ultrasound machine leh Printer kithuah piaksawm uh a, damloute lakah damdoi chi tuamtuam Rs. 4-5 lakhs man hawmkhiak sawm uhi.

Republic Day full rehearsal om 

Imphal, Jan-23 : India in Republic a ngah 65veina January 26, 2014 in Imphal a 1st M/R Parade Ground ah om ding a, tuading tawh kisai in tuni in full rehearsal om hi. Huai hun ah contingent 80 vel tel uhi. Tuni a rehearsal atel contingent-te  1st M/R parade ground apan in Kangla Fort tawn in Chief Minister Bungalow kiang tan pai uh a, huai  rehearsal om sungteng   traffic nawngkai mah man hi’n kigen  hi.

Buh piang metric tonne 2 kisamlai 

Imphal, Jan-23: Agriculture Technology Management Agency (ATMA) saina in ni 3 sung  Iboyaima Shumang Leela Shanglen a om State Level Krishi Mela 2014 hunkhakna a Chief Guest a pang Chief Minister O. Ibobi in a genna ah Manpur a buh(food grain) piasng in tamlam nawt mahleh mihing  omzah tawh tehkak in metric tonnes 2 tan kisamlai chi’n gen hi. Chief Minister in loubaswl mi(farmer)te panlakna pahtakhuai sakthu genkawm in buh tamsem piankhiak theihna ding a hahtakna panla tou zel dingin hasuan hi.

Doctor inn ah grenade mukhia

Imphal, Jan-23 : Imphal a Kwakeithel Makha Thounaojam Leikai a om Shija Hospital & Research Institute a Heart Specialist Dr. Laishram Sachindra tenna inn huangsung(compound) ah tuni zingsang dak 6:30 velin handgrenade khat muhkhiak hi a, police ah kintaka report piak ahih dungzui in  police te’n  lakhia uh a, muntuam khat ah hihsia(defused) uhi. Huai grenade vakoih kuate hiam chih kithei nailou a, a kipuang leng kuamah omlou hi’n kigen hi.

Literature in i hihna uh taklang-T. Manga Vaiphei

Imphal, Jan-23 : Senapati District sung Sadar Hills East a Haukhongphai village mun ah zan in  Eastern Block VPC & Zillai Conference-cum-Sports Meet-2014 kipan hi. Hua ah T. Manga Vaiphei, MLA & Chairman,MTDC khuallian in pang a, aman a thugenna ah literature i hihna (identity) taklang hi’n gen hi. Huai hun ah VPC, YVA leh Zillai apan makai  in leng uap uh a, Functional President in VPC Gen HQ a President Khatkhotong Baite pang hi. Aman a genna ah VPC in Manipur ah Block 17 nei a, block 17 ten  hibang conference a neih theih kipahhuai  sakthu genkawm in Vaiphei-te tawm mahle hang MP 1, MLA 1 leh ADC members 6 inei a, i hihna suanhuai mahmah nam ahi chi’n  gen hi. Huai conference tungtawn in kuapeuh in kituam bawlnate koihmang a bangchileh Community kituak leh masawn hiding ihiam, chih ngaihtuah zawding in chial hi.

Students pawl in MU A-Block hihsia

Imphal, Jan-23 : Manipur University ah  Manipur University Students’ Union (MUSU) puahthak nawn deih ziakin tuni in student  tamtak in MU campus ah sit-in-protest nei uhi. Sit in protest a telte police te’n hawlzak uh a, huai ziaka  students’ thangpaite ten MU vice-Chancellor lem (effigy) hal uh a, tuazawh in Administrative Block a lut in van tuamtuam hihsia uhi. Amau a genna uah MUSU puah thak ding Vice-Chancellor in hoihsa lou in dak chi’n taklang uhi. Hibang a students’ te a gamtat nung un police te’n MU gate pua ah hawlkhia uh a, gate kalhkhum in police ten gate sung a buaina om ding veng uhi. Students’ ten huai tawh kisai akinlam a hihveng ahih kei leh kiphinna nasa sem pan ding uh hi’n gen uhi.

UNC te’ bandh  lawhching

Imphal, Jan-23 :United Naga Council (UNC) te’n Naga mite adia kivaipuakna tuam  alternative arrangement phutna banah Ministry of Home Affairs a Jt Secretary(Northeast) Shambhu Singh,IAS in Naga tawh kisai a thugen lungkimlouh latsakna in tuni zingsang dak 6.00 akipan nitaklam dak 6.00 tan dakkal 12 sung Naga mite tenna bial teng bandh(shut down) a bawl uh lawehching mahmah hi’n kigen hi. 

Thudang kizadan in Ministry of Home Affairs(North East Divn) in Feb 6, 2014 in Senapati ah Alternative Arrangement tawh kisaia kihouna(tripartite talks) 7veina om sding chi’n UNC makaite theisak uh a, huai ah Manipur govt leh Minitry of Home Affairs akipan palaite leng tel ding uh chi’n   S. Saha, Deputy Secretary NE in fax tungtawn in theihsakna laehkha thon chihthu om hi.

TUNI THUPI:

“Huchi’n, na unau in na tungah thil ahihkhelh leh pai inla, amah leh nang kia theih in a khelhna  hilh in; ahon ngaihkhiak leh na unau  na zou ahi ding.” 

– Matthai 18:15

Jeweled land: Manipur

Chi-le-nam tamtak tengkhawm a, tawndan chi tuamtuam nei Manipur state in lam tuamtuam ah khantouhna thupitak aneih lai in, pupa tawndante kepbitna leng paitou zel hi. Polo kimawlna ziak in Manipur in minthanna ngah lawh a, martial arts leh sports item tuamtuam te ah leng Manipur in khawvel theihphak in minthanna ngah hi. Khaw om dan leh huihsiang ban ah sing leh guate et in Manipur pen Sanaleibak “the jeweled land” chih in ana om a, Sangai  leh Siroi Lily te ziak mahmah in leng Ethel St. Clair Grimwood in Manipur kichi “leitung a gam lungzuang huai penpen te lak a khat ahi” ana chi hial hi. India Prime Minister masapen Pundit Jawaharlal Nehru in “Jewel of India” ana chi a, ngakik tuamtuam omte, luiluangte, gammang hing dipdep te ban ah, loktak diil te ziak in Manipur kichi gam etlah huai petmah ahi chi hi. Huchih lai in Manipur ah pupa khang apan ana kizui nopna bawlna hun (festival) tuamtuam te om a, ahunbi ahong tun tawh kiton in zanzek mahmah in Manipur ah Gan-ngai festival tel in festival chi tuamtuam te zat in om zel hi. Tuni in hiai Gan-ngai festival tawh kisai etkikna neizek leng uthuai isa hi. 

Manipur singtangmite lak ah en le hang, Zosuante’ sang mah in Naga lamte’n festival hauzaw mahmah un kilang a, huchih lai in amau festival pen government in bildawh zaw adiam chih theih ding in leng om hi. Zosuante’ lak ah festival tamlou om sun a i theihte uh ahihleh, Kut, Zomi Nam Ni, Khuado Pawi, Chapchar Kut, Sikpui Ruoi leh adang bangzah hiam om lel ding in ngaihsut theih a, state holiday dan in Kut chauh om lel hi. Chapchar Kut bang Manipur ah kizang law lou hin kigen a, Mizoram ah bel festival thupipen a zat in om hi. Nagate lak ah leng festival chi tuamtuam tampite lak ah, aminthang diakte ahihleh, Gan-Ngai bang ahih kei leh Lui Ngai Ni chihte om a, hiai te state holiday hi a, Nagaland ah Hornbill festival kichi thupitak in zat hi leuleu hi. 

Hun bangtan hiam paisa in, Gan-Ngai festival pen state holiday apan lakkhiak himahleh, Demand Committee on Restoration of Gan-Ngai Holiday chih min vuah in Zeliangrong mipiten kiphinna nasatak aneih nung un, Zeliangrong community te khualna tawh Gan-Ngai pen state holiday a puan in hong omthak nawn a, significant festival chi’n chiamteh in om hi. February 14 in Manipur pumpi ah Lui Ngai Ni zat hinawn laiding hi. Zeliangrong mi nampi i chih chiangin tamthou mah le uh Zosuante’ population tawh tehna ngaihna om lou a, ahihziak in kiphinna nasatak nei a, Ibobi Singh makaih SPF Government boycott tanpha a puan ziak un Holiday list ah Gan Ngai tuansak in om nawn hi. Eilak ah bangchi dan a Kut chauh state holiday a puangsak zou i dia chihte ngaihsut tham mahmah hi. Phaizangmite a i et nawn chiang in, Irabot, Imoinu, Khongjom Day, Ningol Chakkouba leh ni poimawh tamtak holiday a puan in om a, Zosuante’ ziak a state holiday ki puang Kut chauh hi liuliau mai hi. Mizoram a thupitak a Chapchar Kut kizang bang leng Lamka khawpi ahih kei leh Chandel town khawng ah leng thupitak in zat ding in kilawm a, huai ding in Mizoram Government in leng state Government kiang ah Zosuante population taklang kawm in, Chapchar Kut holiday dingin hon phut pih thei le uh se hetlou ding in kilang hi.

I gensa bang in, Manipur ah chi le nam tamtak tengkhawm in, tawn dan chi tamtak kinei mah hi. Huchi kawmkal ah, Nam/tribe chih in tawndan leh festival chi tuamtuam i nei ua, tribe teng in festival a neihte state holiday hihsak vek ding chi hizaw lou in, Manipur ah Nambing a kikhenna, Naga/Kuki/Zomite’ adia ni poimawh bik 2/3 tan beek holiday list ah tuansak hileh bang a chidia? 

Singtangmite’ adi liauliau in Hill Areas Committee kichi bawlkhiak in om a, amauten singtangmite adingin bang thupi asemkhe tuan ua chih theih hun om zeuhzeuh mawk hi. Zomi Nam Ni leh Sikpui Ruoi bang Manipur a festival poimawh mahmahte’ lakah guantel hileh chih huai mahmah hi. Gan Ngai Festival in mihingte’ khelhna (evil) tengteng la mangta ahi chi a a lop dupdup pian deuh un, ei lamten leng i pipu khangui i zopna a festival poimawh khat le nih i neihte beek holiday list ah guanlutsak sawm in panla ni chi ut hi hang.

NATIONAL NEWS:

AAP in Cong leh BJP leader-te tauhding

UP chauh ah mi 2500 valin AAP ticket ngen

Lucknow, Jan-23: India adia political party naupangpen a chiamteh Aam Admi Party (AAP) in gensiatna khenkhat atuahlai un hiai party zoptak mah ahi chi’n mi tuamtuam in Ghaziabad a AAP office zuan vengvung ua, maban a Lok Sabha election om ding ziakin a office uh lun mahmah chih hi a, tuni tanin  Uttar Pradesh state chauh a Lok Sabha member hih ut mi 2500 val te’n AAP ticket ngenta uh chih thusuak om hi.

Mi poimawh tuamtuam 2500 te’n Uttar Pradesh state adia AAP ticket a nget theih ua atangpi thu etin constituency khat adingin AAP ticket ngen mi 30 val ngen chihna suak chi uhi. Uttar Pradesh ah parliamentary constituency 80 om a, constituency teng ah AAP in candidate guanvek sawm chi’n AAP’s UP unit a screening committee member Manuj Singh in tuni’n gen hi. Aman agenna ah, thil omdan etin candidate ut mi bangzahhiam te’n form fill-up kimlou ua, tualou in candidate ut mi bangzah hiamte’n lah society ah minsiatna khenkhat nei uh ahihmanin candidate ding tungtang pilvangtakin telkhiak hiding chi hi.

Tutan in candidate ut mi 2500 velte’ lakah ‘primary level weeding’ tanin mi 600 telkhiak hi phot a, abanban a etkhiak detdet ahihnungin mi 80 lel telkhiak hiding  uh chi’n Manuj Singh in gen hi. Lucknow, Kanpur leh Ghaziabad apan top official tanpha in leng ticket hon ngen ua, mi chitak leh ginom AAP in a poimawh chi hi. Ticket ngente’ lakah teachers, academicians, union leaders, businessmen leh social workers atamzaw ahi chi’n Singh in gen hi. AAP makai banah Delhi a Minister lenlel Kumar Vishwas in ahihna apan kitawp a Amthei parliamentary Constituency ah Rahul Gandhi khingding ahihdan puangkhinta hi.

Delhi Chief Minister Arvind Kejriwal in leng Rae Bareli parliamentary Constituency apan Sonia Gandhi khingding ahihdan gen a, ahihziakin banghiam a chih leh Kejriwal in Ghaziabad ah BJP president Rajnath Singh khingthak maithei a, aman Rajnath akhin ngiengei leh AAP national spokesperson Sanjay Singh in Rae Bareli mun ah Congress president khingding chi uhi. 

Journalist-turned-politician Ashutosh in Lucknow seat tuhthei phut in om a, Anna Hazare's movement a jail tang Aseem Trivedi in in Unnao seat ah Congress MP Annu Tandon tuh ut mahmah ahihdan genlang khin chin uhi. Farrukhabad a senior politician banah Congress leader Salman Khurshid  leh Kanpur a Congress leader Sri Prakash Jaiswal te leng AAP in phuksawm teitei in kisa uh chih ahi.

Shimla ah vuuk sah mahmah 

Shimla, Jan-23: India gamsung adia atuk-akhal a vuuk om detna mun hi a kigen banah, gamdangmite’ hawhna tampe’n na mun a kigen Himachal Pradesh khawpi Shimla ah tulai in vuuk sah mahmah lel chih thu kiza a, Shimla banah Manali ah leng vukkhal nasa chi uhi. Indian hill station ‘Shimla’ khawpi ah tulaitakin khualzinmi (tourist) sah mahmah lel a, June 2014 tanin khualzinmi kibehlap semlai thei dinmun ah om chi uhi. Tulai ngialin Shimla leh Manali khawpite vot mahmah in 0.1 degree Celsius tung Met Office thusuakin gen a, honeymooners' paradise chih a om Kufri, Fagu leh Narkanda te ah avangkim in vuuk ke singsing chi uhi. Lahaul, Spiti, Chamba, Mandi, Kullu, Kinnaur, Sirmaur leh Shimla district te ah vuk akiat ziakin khawpi sung sianthouna behlaptuan mahmah in ama sangin huihleng siangzaw tham a, mihingte’ damtheihna kibehlap tuan mahmah chih ahi. Shimla khawpi bel nidang hunin Delhi apan dakkal 9 kimlak tai hisek mah leh lampi four landed abawl ahihnungin tuni chiangin baihlamtakin dakkal 4 in tungta uh chih ahi.

LS poll ah BJP-MDMK pangkhawm ding

Chennai, Jan-23: BJP  leh Vaiko makaih MDMK pawlin tuni in official thupuan aneihna uah Lok Sabha elections 2014 om dingah party 2 te pangkhawm ding uh ahihdan puang uhi. Lok Sabha election om ding vaiah Tamil Nadu state apan party pangkhawm ding official apuankhiak patna hidanin kigen a, BJP leh MDMK makaite’n Chennai’ Thayagam mun a MDMK party office  ah joint press conference nei in hibang thupuan nei uhi. Tamil Nadu state BJP chief Pon Radhakrishnan leh MDMK chief Vaiko te’n hiai office ah dakkal 2 val vingveng houlimna aneih nung ua hibang thupuan om theiphet hi’n kigen hi. BJP leh MDMK in parliamentary constituency bangzah ah tuhtuak ding uhiam chih bel awl a thutanna bawl hiding chi uhi. Chennai khawpi ah BJP Prime Ministerial candidate Narendra Modi in February 8, 2014 chianga rally aneih hunah MDMK worker teng leng telvek dingin lemsa uh chih ahi.

RS poll ah AIADMK te’n CPM gumding

Chennai, Jan-23: Communist party of India (CPM) te’n Tamil Nadu state a Rajya Sabha election om ding ah seat khat adingin CPM member banah Rajya Sabha member lel T K Rangarajan mah guannawn dingin thupukna bawl ua, hiai pe’n Chief Minister Jayalalithaa makaih AIADMK pawlin gupna pedingin lemsa uh chih ahi. Tamil Nadu state apanin upper house (Rajya Sabha) seat awng 6 om a, AIADMK in seat 4 ah tuh ding ua, huai pe’n CPM member te’n gum ding ua, seat 1 ah AIADMK in CPM candidate gum ding uh chih ahi. Seat dang khat bel opposition DMK te’ adia siit hidingin kigen hi. CPM state secretary G Ramakrishnan in tuni in kipahthu puan bawl in ruling AIADMK te’n CPM candidate hon gup ziakun ka kipak mahmah uh chi hi. CPI leh Forward Black te’n leng CPM candidate gum ding uh chih hi a, Tamil Nadu chief minister J Jayalalithaa tungah CPM kipak mahmah chih ahi.

Netaji pianchampha lawm

Kolkata, Jan- 23: West Bengal state in tuni in Netaji Subhas Chandra Bose pianchampha kum 117 chin lopna hun nasatak nei uhi. Program ahihleh Netaji Bhavan, Kolkata ah zat hi a, State Governor M. K. Narayanan leh Chief Minister Ms. Mamata Banerjee te’n Netaji lem ah zahtak etsakna in paak pia uhi. Ms. Banerjee in agendanin, Subhasgram mun ah Netaji theihgigen adingin monument tunkhiak hiding chi hi. Tu zingkal baihtak apan in mihing asang a sim te’ n Netaji Bhawan ah paak piakna va nei uhi.

Law Minister Bharti kitawp dia phutna uang 

New Delhi, Jan-23:  Law Minister Somnath Bharti  in African  numei khat soisakna dia thupiak nei chihthu om ziakin adinmun apan kitawp dia ngetna uang sem a, soisak a om Uganda numei in Law Minister tangtak a angawh ziakin Minister maban ding limchi lou hi’n kigen hi.   

Thusuakin agendanin pasal tamtakte  Somnath Bharti in makaih ahihdan African numei in gen a, amaute’n chiangpum zang in nasataka soisa uh hi’n leng kigen hi. African numei teng in South Delhi nuse dingin leng vau uh a, thupiak zuiloute thah ding chih tanpha in genkhum uh chi uhi.  Delhi Commission for Women in African numeite ngawhna amuh nungin Bharti thudot dingin sam(summoned) a,  thiltung suizui in omlel lai hi.  NCW chairperson Mamta Sharma  inleng thiltun hun a Bharti  va om mah ahihdan chetna nei hi’n gen hi.

R-Day full rehearsal om 

New Delhi, Jan-23: Tuni in in New Delhi ah Republic Day celebration 2014 lopna om ding tawh kisai in full dress rehearsal neih in om a, zinglam dak 9:50 am apan in Vijay Chowk apan parade kipan in Red Fort ah khawl uhi. Delhi Police te’n security lam tawh kisai enkai in police personnel 25,000 in venbitna pia ua, traffic advisory hoihtak dinkhiak a om hi a, zinglam dak 5 apan sunnung dak 12:30 kikal Vijay Chowk leh India Gate kal ah gari taisak hilou hi. Parade contingent tengtengin Rafi Marg, Janpath, Man Singh Road, Tilak Marg, Bahadur Shah Zafar Marg, Subhash Marg te tawn in Red Fort lut uhi. Gurgaon apan Inter-state bus tengteng Dhaula Kuan ah khawlsak in om a, metro rail service te ahihleh ngeina bangin paisak in om a, Central Secretariat leh Udyog Bhawan Metro station te bel zinglam dak 5 apan suunnung dak 12:30 pm tan mah khakin om hi.

Mizoram Chief Minister damtakin Aizawl tung

Aizawl, Jan-23: Mizoram state adia thil poimawh tuamtuam ngaihtuaha New Delhi pha Chief Minister Lal Thanhawla tuni in state capital Aizawl tungkik nawn hi. Chief Minister Hawla in  mi poimawh tuamtuam  kimuhpih a, JNNURM nuaia Mizoram state in nna sem hoih chi a centre government apanin leng award va sang chih ahi. Chief Minister zui a hawh UD & PA Minister Zodintluanga leng tuni mah in CM tawh Aizawl tungkik khawm uh chih ahi. Chief Minister leh UD & PA Minister ahihleh Lengpui Airport ah Ngunlianchunga Minister of State for AH & Vety; K. Lalrinthanga, Parliamentary Secretary leh party mi pawimawh tak tak te’n ana dawn ua, pakkhi te a ohsak  banuah official tuamtuam te’n paak piakna leng nei uh chih ahi.

Inn chih ah IT literate

New Delhi, Jan -23: Centre government in 2020 tanin India gamsung pumpi ah inn chih ah mi khat beek Information Technology (IT) theihsak/siamsak tum uh hi’n official thusuak om hi. IT and Communications Minister Kapil Sibal in tuni a agendanin, Department of Electronics and Information Technology in agenda hoihtak nei in tukum 2014 sungin innkuan lakh 10 zel om na ah IT literate person khat beek om sak tup ahi chi hi. Siamna leh pilna lam ah michih in khantouhna aneihding uh deihna ziakin agenda hoih tak 18 bawlkhiakin om chi’n leng gen hi.

Bandh zahtaklou di’n  ngen

Shillong, Jan-23: Meghalaya government  in  Hynniewtrep National Liberation Council (HNLC)  thupiak, Republic Day  sung a bandh zui dinga mipite theihsakna aneihpen uh kuama’n zahtaklou dingin ngen a, lemna tawh Republic Day zang chiat dingin mipite theisak hi. Chief Minister Mukul Sangma in cabinet meeting zawh a thuthak saite atheihsakna ah, Republic Day zang dinga state mipite’ pawtkhe dingin ngen a, helpawlte’n bandh puang mahle uh lemna omsak tum in state government in naktakin panla chi hi.

West Bengal gangrape: Mi sualtute jail ah koih

Kolklata, Jan-23: West Bengal’ Birbhum District Court in tuni in numei kum 20 mi sualluih a om tawh kisai a mat mi 13 te’ dinmun etna nei in, ni 14 sung jail ah om phot dingin thutankhum uh chih ahi. Zan nitakin numei kum 20 mi ahihleh Birbhum district a Lavur munah hehpihna bei in thagum in sual hi a, numei innkuan te’n police ah complaint atheh lut nung un police te’n case langal in mi 13 mankhia uhi. State Governor M. K. Narayanan in thiltung poisa mahmah in hibang thil maban ah tunung nawnkei henla, thagum a mi sualluihtute’ tungah gawtna sangpen piak hihen chi uhi. Thusuak khenkhat in agenna ah, numei nu leh namdang khat kingai a, a innkuan te’n deihsak lou ua, huai kawmkalah, ama innkuante mah in engbawlna dan a thagum a asualluih uh ahi chi uhi.

Telugu cinema legend Akkineni Nageswara Rao si 

Hyderabad, Jan-23:Telugu cinema khangthu a mi poimawh leh tallang, Akkineni Nageswara Rao  in hun sawttak cancer natna athuak nung Hyderabad  ah tuni’n si hi. ANR chih a om, Akkineni Nageswara Rao   ahihleh  kum 91  tan dam a,  'Batasari', 'Devadas'  leh 'Tenali Ramakrishna'  chihte Cinema abawlte laka minthang deuh ahi hi. Kum 70 sung vel Cinema ah career zang a,  tunaichin in home production 'Manam' (Us)  kichi  bawlkhe man hi.  Dada Saheb Phalke award winner, Akkineni Nageswara Rao   bel film 250 vel ah kihelkha a, Tamil film bangzah hiam ah leng telkha ban hi. Kum 2011 a zi  sih theihgigena in  Annapurna Studios pankhia hi. Zan nitakin asungkuante tawh kihoulimna neih zou lai mahleh, a ihmut nung sawtlou in houpih theih nawnlouh hi’n doctor te’n gen uhi.

FOREIGN NEWS:

UN aid chief in ceasefires omsak sawm 

Montreux, Jan-23: United Nations Aid Chief in Syria peace talks hun a gamsung buaina hihvengtu hidinga ceasefire omsak sawm in pawlnihte kiangah ngetna bawl hi.  Reuters tawh interview aneihna ah Valerie Amos in International Conference hun a  kilemna piching a om poimawh ahihdan gen a,  minautangte kianga panpihna alut theihna dingin leng ceasefire poimawh pipen lai chi hi. 

Aman agenzelna ah  milip 250,000 valin haksatna ziakin  Aleppo, Homs  leh Damascus area ah UN huhna poimawh ua, himahleh kikaptuahna ziakin aid agency te lut ngamlou uh chi hi.  Syria buaina a haksatna tuak mihing 2.5 million  velin leng UN apan panpihna poimawh mahmah uh chi hi.

SPORTS NEWS:

Australian Open :

Stanislas Wawrinka, Li Na leh Dominika Cibulkova te final lut uh

Australian Open Tennis Championship pasal singles leh numei singles semi-final match kimawlna zan nitak a om ah Stanislas Wawrinka, Li Na leh Dominika Cibulkova ten vualzawhna tang in final lut uhi. Pasal singles ah Stanislas Wawrinka in Tomas Berdych kimawlpih a, huai ah set in Stanislas Wawrinka in vualzawhna tang in final lut hi. Hiai match ah Czech 8th seeded Stanislas Wawrinka in set masa nuamtak in 6-3 in la mahleh set nihna Tomas Berdych in la a, tua zawh in Wawrinka in set 3na leh 4na vangphathuaitak in 7-6, 7-6 a la in vualzawhna tang a, Grand Slam a final a lut patna dingin lut hi. Match tawp in Wawrinka in, Grand Slam a final tan tung dingin ka ki gingta kei a, ka kipak mahmah, chi hi. Aman final ah Rafael Nadal leh Roger Federer a zou penpen kimawlpih ding hi.

Numei singles semi-final ah China Li Na in Eugenie Bouchard kimawlpih a, huai ah nuamtak in 6-2, 6-4 a vualzawhna tang in Australian Open a final thumvei a lutna dingin final lut hi. Li Na in 2011 leh 2013 in Australian Open ah final ana lut hi. Match dang ah Slovakian Dominika Cibulkova leh Agnieszka Radwanska te kimawl ua, huai ah Cibulkova in nuamtak in 6-1, 6-2 a zoukhia in final lut hi. Slovakian mi Grand Slam a final lut masapen leng ahi hi. Cibulkova in 4th Round ah Maria Sharapova zoukhia a, tua nung hih hoih deuhdeuh in zan nitak in No. 5 seeded Radwanska zoukhe nawn a, numei singles ah champion la kha nailou tuak kimawl ding uh chihna suak hi. China Li Na in vualzawhna a tang phet in, tennis player hi kei leng minthang ka ut kei ding a, tennis ka kimawl chiangin China a mihing 1.4 billion te ading a kimawl ka hihdan ka thei a, ka mawhpuakna lian petmah ahih ka thei a, huaiziakin haksa kasa petmah, chi hi. Tennis kimawl ka khawlsan hak nawn kei ding a, huai zawh chiang in housewife hoihtak hih ka sawm ahi, chi’n gen hi. 

Mixed doubles quarter-final ah India mi Leander Paes leh a pankhawmpih Daniela Hantuchova ten K. Mladenovic leh D. Nestor pangkhawmte 6-3, 6-3 a zou in semi-final lut zoulou uhi. Ahihziakin, Sania Mirza leh H. Tecau ten J. Goerges leh A. Qureshi panghawmte 6-3, 6-4 a zou in semi-final lut uhi. Sania Mirza leh H. Tecau ten Mladenovic leh Nestor pangkhawmte semi-final ah kimawlpih ding uhi.

Tello hat-trick in Barca te vualzou

Copa del Rey Quarter-final 1st leg kimawlna zan nitak  a om ah Barcelona ten League a tukal a 1-1 akidrawpih uh Levante kimawlpih ua, huai ah Christian Tello hat-trick in Barcelona ten nuamtak in 4-1 in vualzawhna tang uhi. Hiai match ah Lionel Messi in hih hoih mahmah a, ama ziakin Christian Tello in hat-trick mu hi. Barcelona ten half zawh minute 53 in Levante goal ah khat khum ua, tua zawh in Messi tungtawn ngen in Christian Tello in goal 3 akizom in khum hi. 

Match dang ah Real Sociedad ten Racing Santander te 3-1 in zoukhia uhi. Jan. 24 nitak in defending champion Atletico Madrid ten Athletic Bilbao te zintun ding uhi.

Chelsea Manager Mourinho in Writers’ Association Award sang

Chelsea Manager Jose Mourinho in England’s Football Writers’ Award sang hi. Chelsea ten Manchester United te 3-1 a azawhkhiak phet un hiai Writers’ Award piakkhiakna London a Savoy Hotel ah neih in om a, tua hun in Mourinho leng a zi tawh va kihel uhi. Aman 2005-06 kum in Premier League ah Chelsea te champion lakpih a, Super Sunday nitak a defending champion Manchester United te a zawhkhiak uh tawh kiton in title contenders dinmun khahsuah nailou uhi. 

Aman hiai hun in noute itna leh deihsakna a hiai bang award tang thei ka hi a, huaiziakin, kipahthu kon gen, chi hi. Aman Dutch Coach Louis Van Gaal leh England Manager Bobby Robson ten a maban ding lampi sialsak ua, amaute ziaka hiai tang tung thei ka hi, chikawm in kipahthu gen hi. A sungkuanten England nuamsa ua, huaiziaka Chelsea Manager ding a hong kik nawn hidan inleng gen hi. Huaiziakin, Chelsea ten a paihkhiak ua leh leng Premier League dang zom ding hidan in gen hi.

League Cup :

Sunderland ten Man. United te zou in final lut uh

English League Cup semi-final 2nd leg kimawlna zan nitak a om ah Manchester United ten 1st leg a 2-1 a azawhlouh uh Sunderland te zintun ua, huai ah normal time in Manchester United ten 1-0 a vualzawhna tang in aggregate in 2-2 in kidraw uhi. Tua tawh kiton in extra-time kimawlsak in om huai ah Sunderland apan Phil Bardsley in minute 119 in goal poimawh mahmah khum a, Sunderland ten vualzawhna tang ding a gintak  lai in minute 120 in Manchester United apan Javier Hernandez in goal poimawh mahmah khum in 3-3 in kidraw nawn uhi. Penalty peksak in om ua, huai ah Manchester United apan mi 5 lakah mi khat kia in khum in Sunderland ten 2-1 a vualzawhna tang in final lut uhi. 

Tutung League Cup final a Manchester City leh Manchester United te kimawltuah ding a gintaklai in Manchester United te final lut zoulou uhi. Penalty ah Danny Welbeck leh Phil Jones ten goal sung tawnkha lou in a pawlam ah paisak ua, Adnan Januzaj leh Rafael te pek Sunderland keeper Vito Mannone in ana save khia hi. Darren Fletcher kia in goal ah peklut hi. Manchester United ten League Cup semi-final a match 10 akimawl khakna uah nihvei a vuallelhna uh hipan a, 2004-05 a vuallelhna a tuah nung uh tutung in vuallel nawn uhi. Sunderland ten 1985 nung a League Cup final a lut nawn patna uh ahi hi. Amau zan nitak in lametna lianpi tawh fans 9,000 vel in Old Trafford ah zui uhi.