Manipur Express | January 16, 2014

Aam Aadmi Party(AAP)  sungah a kiphinpawl om

Party a tallang Vinod Kumar,MLA  lungkimlou

New Delh, Jan-15: Aam Aadmi Party (AAP) adia ‘Hero’ chih hiala om Vinod Kumar Binny kichi December 8, 2013 tanin AAP sungah tallang petmah himahleh  tuni in ama makaihin kiphinna omkik leuleu chihthu om hi. Delhi Assembly elections om ah aman Congress leader banah hun sawtkuamtak Health Minister  len Dr AK Walia khenkhia a, aman tuni’n party sungah thil paidan diklou ahi chi hi. Binny in Dr Walia a khetkhiat hunin Walia in Congress makaih Sheila Dikshit’ government ah Finance Minister dinmun len hi. Dr Walia in Laxmi Nagar assembly constituency ah term 4 sung MLA hihna  len a, Vinod Kumar Binny in AAP ticket tungtawnin tutung in khenkhia hi.

Binny tungtang ah Cabinet Minister dia guankhak

ahihlouh ziaka party leader tuamtuam kapkawm a kiphinte ziak hiam ahihkeileh bangtupna nei a kiphin hiam chih theih hikei mahleh, amah a kiphin taktak aleh kum 1 paisa a party kiphutthak AAP sung buai mahmah thei dinmun ah om chihthu leng kiza hi. Vinod Kumar Binny bel Congress ticket tungtawn in Municipality Councilor dingin term 2 vawk ching ana hita a, India ah nekguk-takguk hihbei ahih deihna ziakin kumlui 2013 in Aam Aadmi Party kumlui  ana zom hi. Amah  mi chitak leh gin-om mahmah hi’n kigen a, Delhi University student-te’ lak tanpha ah gen neipha mihing khat hi’n kigen a, kum 39 lelin upa pan hi.

Manipuri Cultural Delegation team in Myanmar pha uh

Imphal, Jan 15: Sapam Bheigya, Joint Director of Directorate of Art & Culture makaihna in

cultural delegation mi  35 in tuni’n Imphal nusia in Myanmar zuan in zinkhia uh a, Myanmar gamsung mun tuamtuam ah Manipur akipan cultural item tuamtuam lahna nei ding uhi. RK Nimai,IAS, Commissioner(Arts & Culture) tuni zingsang in Palace compound a Directorate ofArt & Culture mun ah Myanmar gama zinkhe dingte khakhia(flagged-off) hi.  

     RK Nimai in a gendan in Directorate of Art & Culture in kumlui 2013 akipan in Myanmar gam ah cultural delegation team zinsak sawm in panla sek mahleh tuni a sawlkhe zoupan phet ahihdan gen hi. Amau Myanmar gam a om sungun Masnipuri dance leh cultural item tuamtuam lahna nei ding uh a, Myanmar a unaute’n mit-tai-huaisa dingin a lam-et thu gen hi.    

    Myanmar gamsung Mandalay region  a om  Manipuri mipite’n Manipur govt ah chialna hongthon sek uh a, amau biakna inn ah Maharash dance lahna nei ding in ngensek uh chi’n leng RK Nimai in gen hi. Myanmar government banah Myanmar a  Indian Ambassador leh  Consulate General of India leng huai dinga lunglut mahmah uh ahihdan RK Nilai in leng gen hi. Manipuri Cultural delegation team in January 17, 2014 in Mandalay region ah Maharash dance leh Manipuri cultural dance tuamtuam lahna nei ding uh a,  January18 in  Mandalay National Theatre ah lahna nei ding uh hi’n kigen hi.

     Manipuri Cultural delegation team in Monywa khawpi leng pha ding uh a, cultural leh  archaeological tawh kisai in huai khua ah photo exhibition leng bawl ding uh chih ahi hi. Manipur leh Myanmar gam 2 kalah  cultural leh thil tuamtuam a kizopna leh kitanauna hoihsem a om deihna ziakin hibang exploratory trip leh cultural exchange programme kibawl hidan in leng RK Nimai in gen hi. Aman a genzelna ah member 35 zinkhiate lakah officials, cultural artists, photo exhibitionist, officers leh  Directorate of Arts & Culture, Manipur a staff-te leng tel uh a,  dance troupe a member tamzawte  JN Manipur Dance Academy leh  Director of JN Manipur Dance Academy akipan hi uh chi’n gen hi. Tuni a zinkhia teamte’n January 16, 2014 zingsang dak 7:00 in Tamu nuse ding uh a, nitaklam in Mandalay tung ding uh hi’n gen a, January 20,2014 in Imphal hong tungkik nawn ding uh chi’n Arts & Culture Commissioner RK Nimai,IAS in gen hi.

LOCAL NEWS

CBYF member 34 in sisan pia 

Lamka, Jan-15: Chin Baptist Youth Fellowship (CBYF) Golden Jubilee lopna ding tawh kisai in tuni zinglam dak 10:00 apan CBYF member 50 valte’n Dist Hospital a Blood Bank ah sisan  pedin kuan uh a, huaite lak ah member 34 te’n sisan unit khat chiat  pia uhi.CBYF member te’n midangte adia sisan apiak uh pahtak thu mi hunkhop apan kiza a, Dist Hospital thuneitute’ leng kipak mahmah uhi.

Doctor lem kineih hawlkhia 

Lamka, Jan-15: Ni tamlou paisa in  Bungmual khawsung a numei khoih sawmlai mat a om Romen Singh h/o Bembem of Zion Veng, Tuibuong tuni in Tuibuong Women’s Welfare Association (TWWA) pawlin vengsung a  teng theinawnlou dingin nawhkhia uhi. TWWA thusuakin a gendanin, doctor  kineih a mun tuamtuam avak Romen Singh in vengsung hih minsia a, tualou in numei-naupang tanpha a khoihsawm TWWA in ngai serious mahmah chi uhi. Maban ah Tuibuong area apan vengsung hih minse theidinga gamtang a omlai leh numei pawlte kintaka theisak din TWWA te’n ngen uhi.

MLA(Singngat A/C) in meeting neihpih 

Lamka, Jan-15: Ginsuanhau MLA (Singngat A/C) in tuni’n  Lailam Veng a a inn ah Singngat A/C sunga khua 12 apan teacher leh School Management Committee member-te meeting pih a, khua 12 a school omte tukum apan function ding tungtang genkhawm  uhi. MLA  in agendan in khua 12 a school building-te  bawlthak hiding a, aman enkai ding in gen hi. Huaizawh in Singngat A/C a Mahila Congress makaite meeting neihpih in Singngat A/C ah Mahila Congress hihhat dingdan kikum uh a, Singngat A/C sung a ADCC Constituency dungzui in  Mahila Congress bial leng bawlthak din thupuk uhi.

Numei naupang ‘rape’ ahihdan chian   

Lamka, Jan-15: Numei naupang kum 5 lel a upa Zinzinmoo d/o Moo Win of Nghathal thagum a sualluih ahih banah  sisa in aluang muhkhiak hi a, tua in mipi’ lungsim aphawn mahmah lai in Singngat sub-divn  sunga om Tuima khawkiang ah zanhal in kum 4 lel a upa Nenem d/o Thangpu of Vengnuam, New Lamka sualluihin om hi. Amah  tuni in medical check-up neih ahihnungin sualluih(raped) mah ahihdan chet (confirmed) hi a, thil omdan police te’n hoihtakin enzui lel uh chihthu kiza hi. Muanhuaitak apan kizadan in Baby Nenem zunthakna sung mun khenkhat a keh ziakin medical treatment  om lel  chihthu leng kiza hi.

YMA Branch in Happiness Home veh  

Lamka, Jan-15: Young Mizo Assn(YMA) Chiengkawn Branch in Pangzawl a tagah etkolna Happiness Home tuni sunnung dak 2.30 in veh  uh a, antang bag 3 leh nektheih chituamtuam vapia uhi. Orphanage home panpihte’n naupangte tawh hun zangkhawm in kipolh khawmna leh houlimna leng neihpih uhi.

Accident in mi 3 liam uh

Lamka, Jan-15:  Zan nitakin Bike 2 kihettuah khak ziakin  Immanuel(20) s/o Chinzason  of Bungmual leh bike dang atuang Ginneithang(52) s/o (late) Khaikhozam of HQ Veng liam uh chihthu kiza hi. Immanuel pen a gil lak liam in Ginneithang pen ataklam khutzung 3 kitan hi’n kigen hi.  Huailou in candle apan meikuang ziakin Durga Devi (23) w/o Munna of Tedim road a mailak liam a,accident aliam  mi 3te hospital ah etkol hi uhi.

February kha in HSP zawh ngai

Lamka, Jan-15:Lamkhosiem, DTO/CCpur apan kizadan in Dist Transport office ah gari (4-wheeler, 3-wheeler leh 2-wheeler) te ading High Security Plate (HSP) thuahna pailel a, February 2014 khasungin gari teng zawh ngai hi. Govt thusuak dungzui in tu’n leng gari te ah High Security Plate check theihta a, hileleng mipi khualna ziakin check hi nailou a, HSC plate thuahlou gari-te’ atawmpen in Rs.2000/-liausak hiding uhi.

SSPP Mizoram in teacher-te’ pahtawi

Lamka, Jan-15: Siamsinpawlpi(SSPP) Mizoram HQ in Mimbung Community Hall ah January 4, 2014  in teacher  44 pahtawina pia uh a, huai hun ah SSPP ka hiang tuamtuam, HQs Aizawl, Mimbung Branch, Mimbung Hr Sec School Unit, Mimbung Govt. H/S Unit, Mimbung English School Unit leh Mimbung Govt Middle School Unit te’n teacher-te’ pakkhi oksak in siamsinte hanthawnna leh sinsaktute hasotna hun zatpih uhi. 

Dist Task Force IPPI meeting

Lamka, Jan-15:Maniram Sharma, IAS, Addl DC/CCpur makaih in tuni in DC’s office a BRGF Resource Centre ah Dist Task Force (DTF)/Dist IPPI Co-ordination Committee meeting om a, January 19, 2014 a IPPI om ding tungtang genkhawm uhi .January 18, 2014 zinglam dak 11:00 in Dist Hopital ah IPPI 2014 honkhiat dingin thupuk uh a, kuan hong ding chiam chih DC/CCpur in thupukna bawldin  kigen hi.

SBI-RSETI  tawh kisai meeting

Lamka, Jan-15:SBI-Rural Self Employment Training Institute (SBI-RSETI) a Local Advisory Committee member te Jan 20, 2014 sun dak 12:00 in New Lamka a Sauliim Restaurant ah meeting ding uhi. Huai ah SBI-RSETI kiphuh khiatnung tutan a nasepna kikum ding uh a, kum 2014-15 Budget & Annual Action Plan, Dist a bank branch-te a Credit linkage leh n thu tuamtuam gen  ding uhi.

Singngat Mahila Congress committee

Lamka, Jan-15: Manipur Pradesh Mahila Congress Committee President, R.K. Sanisana Devi in approval abawl dungzui in 60-Singngat Block  Mahila Congress Committee member thak phuankhiak hi a, Manenniang d/o P. Khaikhanpau of Teisaljang in President hihna len hi. Huailouin Vice President, Treasurer, Secretary , Joint Secretary, Finance Secretary, Executive member  tuamtuamte leng   guan hi uhi. 

Ni 2 sung custody ah omlai ding 

Lamka, Jan-15:  Zin Zin Moo (5) d/o Moe Win of Nghathal sualluih banah thah ziaka matkhiak a om  Lalnunnema (32) s/o Zakhuma tulel a Nghathal  a om Police-te’n a matkhiak nung un Police custody ah koih hi a, tuni’n CJM)court a dinsak a om in police khut ah ni 2 sung omlai di’n Court in phalsak hi. Tua ziakin  January 17  tan om lai ding a,  Police-te’n huai thiltung suizui kawm in FIR No. 4 (1) 2014 CCP-PS U/S 302/377 IPC registered uhi.

Rape nunga thah hidia gintak siluang kimu 

Lamka, Jan-15: Tuni zinglam dak 11.30 velin Bishnupur district sunga Kumbi PS huamsung Santipur munah numei siluang khat kimukhia a, ahihna theihchet nungin sualluih(rape) nunga thah hidia gintak ahi  uhi. Police thusuak gendanin misi Sultana Begum (26) d/o (late) Md. Lairen Khan of  Irong Umang Khatta, Golapati Mayai Leikai, Imphal East district  hi a, January 6(Monday) a inn apan a potkhiak nung muh hilou a, tuni zinglam  dak 11.30 in  aluang muhkhiak a om pan hi’n kigen hi.

SUUNNA

Chingzaman (60) w/o Dongzachin Nunthuk @ ND Paite of Zoar Veng, Bungmual hun sawtkuamtak cancer  natna ziaka damlou tuni sunnung dak 2:30 velin si a, January 16, 2014   in Bungmual hanmual ah kivui ding hi. 

IMPHAL NEWS

MLA tenna inn  bomb paihkhum

Imphal, Jan-15: Sangaiprou a FCS godown kianga om N. Loken,MLA(Nambol A/C) tenna inn huangsung ah meltheihlouh pawlkhat in a paihlut uh hand grenade khat tuni zingsang dak 4.40 velin puakzak hi. Bob puahzakna mun MLA inn konga Gate kiang hi a,gate kim lakah bomb them kithehdalh zengzung mahleh asi leh liam bel omlou chih ahi hi.  Bomb puahzak hun laitakin MLA leh a innkuante ihmu lai uh a,amah vengtu 1^st Manipur Rifles pawl duty om uh hi’n kigen hi. Tuni zingsanga bomb puakzak ziaka lungkimlou in Sangaiprou ApunbaNupi Lup pawl tuni in sit-in-protest tu uh a, bomb puakzak saktute’n aziak puang ding in phut uhi. 

Ni 2 sungin mi 3000 in AAP zom uh      &&&&&&&

Imphal, Jan-15:Kum 1 lel paisa a party kibawlkhia Aam Aadmi Party(AAP) in India gam pumpi ah corruption beisak ding chih thupi in a neih ziakun Delhi Assembly election ah hat mahmah uh a, tu’n govt a bawl zawkmah ziakun India gamsung mun tuamtuam ah member dinga lunglutte January 26, 2014 tan  laklut sawm uh a, ni 4 sungin India gam a state tuamtuam ah member thak 10,00,000 in kibehlap uhi.   

   AAP North East Co-ordinator Habung Payeng in Manipur hongpha in Imphal ah AAP zom utte adin registration bawltheihna ding hong khia a, huai ah ni 2 sung lelin mi 3,000 in min pelut uhi.

UTLA faction kal buai: 1 si

Imphal,Jan-15: Muanhuaitak akipan thusuak kingah dan in  United Tribal Liberation Army (UTLA)-SK Thadou leh  UTLA (Robert) kal buaina ziakin cadre 1 si a, SK Thadou telin i 2 liam uh chihthu om hi. Thusuak in a gendan in  SK Thadou leh amah nuaia cadre 2 in Maruti-800 car a tuang in Jiribam akipan Imphal zuanlai tuni sunnung dak 12:30 velin Leingangpokpi kiang a tun un Robert pawlte’n ana attack uh a, huai ah kikaptuahna om ziakin Kaikholun Haokip @ George (22), s/o Thangjin Haokip of HaokipPunjee, Cachar, Assam amun ah si a,  SKThadou liam a,amah nungzui(cadre)  Billing of CCpur leng liam hi’n kigen hi.Aliam mi 2te Tata Winger in Jiribam tun a, 1^st aid piakzawh in a liamna uh serious ziakin Silchar a etkol dingin puaksuak hi uhi.

Dingku in weightlifter khat soisa

Imphal, Jan-15: Asian Games a gold medallist boxer Dingku in weightlifter numei(giril) khat a soisak ziakin huai numei pen gimsim mahmah chih ahi hi. Weightlifter numei amin  SoibamAranbala (17) d/o of late Rohen Singh of Moreh Bazar Ward No 6, tulelin Khuman Lampak a SAI Hostel No 1 a om weight lifting kizil(training) a om hi’n kigen hi. Ataksa tung mun tuamtuam aliam ziakin  Shija Hospital ah etkol a om hi’n kigen hi. Thilrtung ahihleh January 13, 2014 nitak dak 7.30 vel hi’n kigen a, huai numei in Dingku’ Car ah Dingku min a gelh ziakin Dingku thangpai a soisa hi’n kigen hi.

Rajya Sabha adin form laktheih

Imphal, Jan-15:Manipur akipan Rajya Sabha seat 1 adin Feb 7, 2-124 a election om ding ah Congress nominee dinga lunglutte adin BT road a Manipur Pradesh Congress Committee(MPCC) office ah January 19, 2014 tan  office kaihun sung in  Rs. 1,000 pia in prescribed application form laktheih ding a, huai kimtaka fill-up khit in non-refundable Rs. 11,000/- telin January 19, 2014 tan mah in submit theih ding chi’n Secretary(Admn),MPCC in thupuan bawl hi. 

Imphal East leh West ah operation   &&&&&&

Imphal, Jan-15: January 26, 2014 a Republic Day lopna ah Imphal khawpi sunga buaina bawl omsaklouh sawm in Imphal West leh Imphal East Police te’n tuni in khawpi sung mun tuamtuam ah combing operation bawl uhi. DSP(Ops) Dr S. Ibomcha makaihna in  Imphal West police leh  8-IRB personnel te’n tuni’n  Pishumthong Ningombam Leikai leh  Oinam Leikai lak zingsang dak 5:20 akipan operation bawl uh a, identification paper neilou mi 13 kaikhawm uh a, huai teamte mah in zinglam dak 7.30 in North AOC area ah leng operation bawl uhi.

     Huchih lai in Imphal East police pawlin Addl SP (Ops) M Rajen makaihna in Porompat PS bialsung a om  Soibam Leikai Citizen Club leh Khanglabung area lak ah tuni zingsang dak 5.00 akipan in search operation bawl uh a, ahihna uh suichet dingin mi 5 pikhia uhi.  Imphal East police pawlte mah in zingsang dak 7.30 velin HaokipVeng lakah leng operation bawl uhi.

Khongampat ah Herbal garden

Imphal, Jan-15: Principal Chief Conservator of Forest AK Rana, IFS in Imphal khawpi akipan mallam bial km. 12 vela gamla Langol Reserve Forest area a Khongampat mun ah  zan in Herbal garden hongkhia hi. Huai herbal garden bel gam hectares  15 bial sung a om hi’n kigen a,huai ah plant(sinking) leh medicinal properties  chi tuamtuam 230 kisuan hi.

Huai harbel garden bel National Medicinal Plants Board (NMPB) akipan panlakpihna tungtawn in kum  2008-09 akipan patkhiak hi a, National Highway No. 2 jula om ahi hi. Huai mun ah damdoi a zat theih singkung chituamtuam heibung, heigri, mukthrubi, nungarei, ghrita kumari, sarpagandha, black neem, ginger, kege, chinichampra leh  peruk kung tamtak om hi.

Manipur in electric meivak a ngahdan

Date :14/01/14  Time: 17:09:59

State        Schedule  Drawal    Deviation

Manipur      95.6          120.5   24.9

Date :15/01/14    Time:  22:47:00

State       Schedule  Drawal Deviation

 Manipur   67.8     102.1         34.3 

NATIONAL NEWS:

BSP tawh kuamah kikoilou ding –Mayawati  

Lucknow, Jan-15: Uttar Pradesh khawpi Lucknow ah tuni in BSP Chief Mayawati in agendanin, tunung sawtlou a election om ding ah BSP te’n party kizoppih aneikei dinga, Congress, BJP ahihkeileh party tuamtuam tawh akikawi keiding chi hi. 'Savdhan Vishal Maharally' kichi tuni in Lucknow khawpi ah om in BSP supporter a sang asim kihel ua, tua hunah UP Chief Minister lui Mayawati in thugenna nei hi. Mayawati in BJP’ Prime Ministerial Candidate Narendra Modi kap kawmin Godhra thiltung a a kigolhna tuni tan bangziaka thudiktak puankhiak hilou hiam chi hi.

MP Assembly session khawlsak

Bhopal, Jan-15: Madhya Pradesh state legislative assembly tutkhawmna tuni a om ah, ruling leh opposition te’ kalah issue tuamtuam ziaka kitheihsiamlouhna piangah assembly dinkhawlsak in om hi. Madhya Pradesh state assembly election ahihleh, tuma zekin om a, state assembly a Speaker leh deputy-speaker thak ding telzawh ahihnungin buaina kipan ngal chih ahi. Governor Ramnaresh Yadav in session kipat tung kallui Ningani in thu va gen a, tuni tuk a Madhya Pradesh Inpi abuailam theih hinailou chih ahi hi. Second supplementary budget 2013-14 tawh kisai hun sawtkuamtak genkhawm ahihnungin puuk (passed) uh chih thu om hi.

NSA in LoC bouruak opposition leader-te hilh

New Delhi, Jan- 15: National Security Advisor in tuni in senior Bharatiya Janata Party (BJP) leaders banah opposition leader (Lok Sabha) Sushma Swaraj leh opposition leader (Rajya Sabha) Arun Jaitley te’ kiangah Pakistan tawh gamgi zul Line of Control (LoC) a bouruak sangtak om tawh kisai thil omdan hilh in theisak hi. Menon in opposition leader te’ kiangah army te muanhuai huntawk ahihthu hilh a, thil omdan a kip akawi a ahilhte bel official takin bangmah puankhiak hinailou lai hi.

LoC bouruak tawh kisai mah in zanin Prime Minister Manmohan Singh in senior opposition leaders Sushma Swaraj leh Arun Jaitley te hilh hi. Opposition lam te’n tutan a Indian army te’ panlakdan kipahpih mahmah kawmin, centre government dinmun leng hoih tadih sa uh hi’n kigen hi. Apaisa January 8, 2014 in Line of Control ah Indian army personnel 2 Pakistan sepaihte’n a thah nung ua a gawl uh a tansak ua pan tuni dong sousang in a vangkim in kikaptuahna om den lai chi uhi. Sushma Swaraj in zanin Mathura ah Pakistan te’n a lu apuak mang uh Lance Naik Hemraj Singh innkuante va kimuhpih hi. Huai hunah,

BJP president Nitin Gadkari leng tel a, Pakistan in ceasefire abawhsiatna uh government in leng naktaka douthuk dingin BJP leader te’n government ngen uhi.

Swami sih kum 1 chinna zang uh 

Bangalore, Jan- 15: Karnataka a sahkhaw heutu lar mahmah Sri Balagangadharanatha Swami sihnung kum khat chinna tuni in zat in om hi. Swami in ahihleh nungzui tamtak nei a, adiakin Vokkaliga community te ngialin  pathian tuk a angaih uh ahi hi. Kum 68 a upa Swami in a awm na asak ziakin kumlui kiginni (Jan 12, 2013) in BGS (Balagangadharanatha Swami) Global Hospital, Bangalore ah admit in om a, lungtang natna leh kal (kidney) lam buai ahihdan muhsuah ahihnung sawtlou Jan 15, 2013 in si chi uhi. Swami in 2010 kum in lam tuamtuam a anasep hoih ziakin Idnia a civilian award sangpen 3 na Padma Bhushan leng ana ngah kha hi. Vokkaliga community mi mah Chief Minister Jagadish Shettar, Prime Minister lui H.D. Deve Gowda, union minister Veerappa Moily banah political leh religious leader tamtak in Swami suunthu puangin a galna hun leng va uap uh chih thu kiza hi.

IGI ah lenna buainawn

New Delhi, Jan- 15: Indira Gandhi International Airport (IGI) ah tuni’n mei zing (fog) a tam luat ziak in lenna 21 val ding khawl sak in om a, huai ziak in airliners tuamtuam in a flight te uh a reschedule ngai uh hi’n kigen hi. Airport Official in Runway Visibility Rang (RVR) 625 meter in kia niam a, airport authorities te’n CAT-I landing system a zat ngai uh hi’n gen a, flights 10 khong  runway hoihtak a muhthei ahihlouh ziak a delay a om hi’n gen hi. Met department official in mei zing pen ni bang zah hiam a daih ding a temperature leng kia niam lai ding in leng gen hi. Tuni’n IGI ah Minimun temperature 12.7 degree Celsius tung zou a, kum dang sang in 4 degree Celsius in normal zaw lai hi’n leng kigen hi.