Manipur Express | January 17, 2014

HEADLINES:

Rahul Gandhi dinmun ding tuni’n chiangta ding

Cong’ PM candidate di’n Rahul puankhiak  hi ding-Fernandes

New Delhi, Jan-16: Zingchiang (Jan 17, 2013) in AICC session poimawhtak January 17, 2014 in  New Delhi ah om ding a, tua hunah Rahul Gandhi dinmun ding chiangta ding chih thu om  hi. Union Minister Oscar Fernandes in tuni’n  a gendanin maban a Lok Sabha election om ding ah Congress in Prime Ministerial candidate dingin Jan 17, 2014  in Rahul Gandhi puang ding chi hi. Ahihziakin, huai tawh kisai in Rahul Gandhi in dinmun poimawh mahmah a lettheih 3 om hidan a genpawl leng om hi.

Union Road Transport Minister Fernandes in a genna ah “Rahul Gandhi in a pom leh pomlouh ka thei naikei a, bangteng hileh amah bel Congress adingin Prime Ministerial candidate ahi” chi hi. Bangteng hileh zingchiang(Jan 17) tan  hungaih photni, bangkim a chiangta ding chih behlap hi. Tuni a media-te’ dotna khenkhat Fernandes in a dawnna ah, Congress leader-te’ laka

h ngaihdan kituahlouhna  bangmah a om kei a, ka kithutuak mahmah uh a, Rahul tungah kinepna liantak a om a, kakipak vek  uh chi hi.

AICC session om ding ziakin tuni in Congress working committee tutkhawmna om a, tua zawhin media-te’n Oscar Fernandes delhzui ngalin hun sawtlou sung houpih teitei uhi. Fernandes bel Congress adinga mi poimawh mahmah hi a, hun sawttak General Secretary hihna ana len in tuni dong Sonia leh a tapa Rahul adinga khuampi poimawh mahmah khat  hi tawntung hi. Ni tamlou paisa in Prime Ministerial candidate ding tungtang ah Congress leader-te  sungah kitauhtuahna om zek a, leader tamtakte’n Rahun min puankhiak hita hen chi uha, mi bangzahhiamte’n amah min puankhiak hikei hen chi’n ngaihdan kikalh hi’n kigen hi. Hibangkalah  Union Minister Jyotiraditya Scindia in Jan 17, 2014  a AICC meeting hunah Prime Ministerial candidate dingin  Rahul Gandhi’ min official a puankhiak ahih gingta ahihdan gen  hi.

            Tualou, thusuak dang kizadan in  Congress adia thukhentu sangpen (highest decision making body)Congress Working Committee tutkhawmna tuni a neih ahihlai in party senior leader khenkhat in kum 43 lel a upa Rahul Gandhi adingin hun a tam lawlai chih bawlsim uh hi’n kigen a, ahihziakin, ama adingin a om theihna ding mun poimawh mahmah 3 a om chi uhi. Rahul in tulel in Congress Vice President len a, Prime Ministerial candidate leng ahithei a, huai a utkei leh Working President a koih  ding, huai ahihlouh tawp in May 2014 a Lok Sabha election om chiangin  ama deih dandan a pai a, Chief campaigner ahih ding chi pawl leng om  hi. Rahul in zanhal(Sepnawnni) in  agendanin Congress adia sepaih muanhuai ka hihmanin ka liangkou a puakgik hong kinga nga pawdingin mansa in ka om chi a, tua ziakin Prime Ministerial post leng pom(accept) dingin lametna om a, Prime Minister Dr Manmohan Singh mahmah in leng ka tha hong khengkhe dingin Rahul ka muang huntawk mahmah chi khinta hi.

Mizoram asem Pastor 1 in thil lamdangpi tuak

Lamka, Jan-16: Mizoram state sunga om Kawlbem khua ah zanhal (Jan 14, 2014) zingsang baihtak dak 3:00  velin Pastor B Goutunlian s/o B Zam Do Thang of B. Kaljang in a quarter sungah thil lamdangpi khat tuak hi. Muanhuaitak apan thusuak kingahdanin Pastor Goutunlian ahihleh December 2013 a EBC kumsim khawmpilian ah Pastor ordination tangthak hi a, Kawlbem khua ah posting in a naunu Chingkhannem@ Nenem tawh Jan 12, 2014 in va pai uhi. Huchikawm kalah zanhal zingsang dak 3:00 velin Kawlbem’ EBCC Pastor Quarter ah Pastor B.Goutunlian a ihmut lai in thakhat in alu nasa petmah a, banghiam zanga khet’ bang  khop in nasa chih ahi hi. Aman leng bang ahi de aw? chi'n thoukhia a, alu a khoihleh kawt nilhnelh a, lamdang sa petmah in, "ka lu keh ahi de aw, na kasa lua” chi’n a nau room tuam a giaklai sam a, anau in leng delhpahin alu veilampang ah sisan luangsuk mawk hi’n kigen hi.

Anau (Nenem) in a u’ sisan vahahsiang sak a, ahih ziakin a kehna ma ding muh ahihlouh banah a zingchiangin leng bangmah chilou in a natna himhim omlou chi uhi. Pastor-pa’ lu a sisan aluan lai in alu, abil leh atal lak apanin leng ‘ama’ omlou in luang mawk hi’n kigen a, muhtheih dingin sisan tamsim tak a om ziakin khawsung mite’n leng lamdangsa mahmah uh hi’n kigen hi. Pastor Goutunlian in  asepna munding ava zotma in New Lamka a V. Munhoih ahihkeileh Mualsan leh mun tuamtuam a counselling a paisek ahihbanah Pathian in zang mahmah in a posting na munding a zotma deuhin mi hunkhop in pianthakna a ngah ban uah baptisma leng mi ahunkhop in tangman uhi. Pastor pa’n a gendanin "Setan in hon ze-etna ahi" chi lelin gen a, amah bangmah chi nawnlou in alu leng nasa nawnlou a, tuni’n leng  Kawlbem khua ah inn tuamtuam veh hidanin Kawlbem khawte apan kiza hi. Pastor Goutunlian bel naupang chik ahihlai banah Pathian mi zat mahmah leng hi a, aneu apan Bungmual ah khanglian in apa neu Upa BKh. Khankhup te’ inn pansan a, naupang pawl leh tuailai pawl (BYF) ah leng kihahzat mahmah hi.

Kejriwal kichi ‘dictator' ahi -Vinod Binny,MLA

AAP in Vinod Binny tungah action laksawm

Delhi CM Kejriwal       v/s  AAP MLA Vinod Binny

New Delhi, Jan-16: Aam Aadmi Party (AAP) ticket apan Laxmi Nagar Assembly Constituency a MLA dinga telching Vinod Kumar Binny in zan a lungkimlouh thu a puan nungin tuni’n  mipi ma ah party leader -e’ tungah a lungkimlouhthu taklang toihtoih hi. AAP Convenor Arvind Kejriwal kichi amah thu kia deih ahihbanah ‘dictator’  ahi chi a,election laia AAP in sepkhiak dia a chiamte kalh in Chief Minister Arvind makaihna Delhi govt in nasem a, kam a gen leh a nasep kibanglou  chi’n Binny in gen hi. A thugen in AAP-te hih thangpai mahmah a, AAP in leng dawnna pengal in Vinod Binny in mipi ma a a thugen teng zuauphuah tawm leh belhchian dawllou ahihban ah thuneihna a deih ziak ahi chihsan uhi.

Delhi assembly election ah AAP ticket apan mi 28 ching uh a, huai lakah kum 39 a upa Binny leng telkha hi. Tuni in AAP telin Chief  Minister Kejriwal nasatakin vunhawk a, AAP in thil omdan ngaisiamlou in Binny tungah disciplinary action lak sawm uhi. Kejriwal in tuni’n  a dawnna ah Lok Sabha elections om dingah Binny in AAP ticket ngahlou dinga a a kingaihsut khak ziak hizaw maithei ahi chi hi.

Binny in tuni’n  AAP minister-te mipi ma ah demgawp in, AAP Minister te’n ‘red beacons’ a car tung uah thuahlou ding chi mahle uh Minister tengin Car zangin VIP number tungah a tuang veve uh chi hi. Party sungah zalenna a om kei a, mi 5 chauh in bangkim ah thutanna ala sek uh chi hi. Kuahiam in Kerjriwal mawhsa sim a apau chiangin akikou loiloi pah chi a, ahihziakin a ngawhnate neu theilua hi’n kigen a, party sung hihsiatna dia kuate’ hiam khutzat hithei chih ziakin atungah tu in AAP in action laksawm uh chihthu om hi.

            Delhi khawpi sung ah kum 51  upa Danish numei khat January 1, 20124 a India hongzin Delhi Railway station kiang ah ‘gang raped’ in  om a, huai leng AAP adia mualphouna thupitak ahi chi’n Binny in gen hi. Kejriwal in party sungah corruption a doudal zawhkei leh bangchidan a gamsung pumpi ah douzou mahmah ding hiam chi’n Binny in gen a, party ticket hawmdan tungtang ah leng kigolhgukna om adiam ka chi chi hi. AAP in mipite’ kianga thuchiam a neihte khatmah leng a sepsuah ka thei naikei chi hi. AAP leader Yogendra Yadav in a genna ah Binny thugen tengteng BJP te’ draft sa ngen ahi a, amah BJP-te’  ‘mouthpiece’  dan a pang maimai lel ahi hi.

LOCAL NEW

Tuni in DLCC meeting om

Lamka, Jan-16: DC /CCpur makaih in tuni’n Dist Level Co-ordination Committee meeting om a, huai ah  January 26, 2014 Republic Day lopna ding a tanvou ding bikhiah uhi. Tutung in Pathianni leh Republic Day 2014 a kituahkhak ziakin  zinglam dak 8:00 in  Lamka Public Ground ah Republic Day lopna pat hidin thupuk uhi.Deptt 6 in Tableau bawl ding a, deptt 10 in stall bawlding leh mun 5 ah welcome gate bawldingin thupuk uhi. DLO te’n amau deptt a nasem hoiha  recommend utte uh Jan 20 tan in  DC office ah  submit ding, Sub divn HQ level a Republic Day lopna a hawhding tengin Jan 17 tan in DC office ah a list submit ding in thupuk uhi.

ESC Khanglai Khawmpi 2014 kipan   

Lamka, Jan-16: Evangelical Synod Church (ESC) nuai a Central Kristien Khanglai Pawl (CKKP) saina in tuni’n Chiengkonpang a ESC Secretariat ah 58th Khanglai Khawmpi (Synod Youth Conference) kipan a, Jan 19 tan sunzom ding uhi. Tuni nitaklam  dak 5:00 in mipi’n Synod HQ Church apan ESC Secretariat tan meisel dekawm in lampi zui uh a, Upa Henna in Kross pua in makai  a,Pastor leh Upate’n uniform silh in mipi in anung uah zui uhi.  CKKP Founding Member Jamkhokam leh Nguldal te’n Khanglai Khawmpi 2014 mei dekuang in, Upa Henna, founding Member CKKP in khawmpi hong  hi. Khawmpi sungin Rev T.Kampu, M.Th.President, Asia Antioch Seminary; Rev Henkholien Gangte,M.B.S, Life Word Mission leh Pastor Lawrence, ASCM, Delhi, Missionary IEM in thugen ding uhi.

Officer 2 mawhpuakna pia

Lamka, Jan-16: Food Safety tawh kisai khawpi sunga  Bakery(sang bawlna)  tengin a thil bawlkhiat-te uah ‘Manufacturing Date(a bawlni) uh akoih teitei ding uh chih hi a, huai enkai ding in DC/CCpur’ in CMO/CCpur mawhpuakna pia hi. Huailou in khawpi sunga inn tuamtuam ban phak kual kawma  gas zuak leh bawlding zongte’n Dist Council ah register akibawl vek ding uh, huai bawlloute’ CEO/CCpur in Police tawh kithuzak a, mankhe ding leh registration bawlding in DC’ in CEO/CCpur mawhpuakna pia hi.

Admission test ah mi 600 val tel

Lamka, Jan-16: Ngathal a SSPP Residential School ah tukum a class A-IX student  kaithak ding lakna dingin tuni’n  admission test om a, student 607 tel uhi. Select a omteng in Jan 20 & 21, 2014 in admission bawl ngai ding  a, admission bawllou a om leh waiting list a omte admission bawldin lak hiding uh a, merit list dungzui in selection bawl hiding hi. SSPP Residential school ah class I-VIII te’n free uniform,free text book banah  tuition fee awl(exempted) hiding uhi. Ministry of Tribal Affairs, Govt of India panpihna in kum 1988 in SSPP residential phuhkhiak hi  a, tukum in huai school apan student 26 in BSEM saina in Class X exam ding uhi. Huai school ah  staff 17 om uhi.

Marathon Race om ding

January-16:Republic Day lopna ding tawh kisai in January 25, 2014 zingsang dak 7:00 in category 2 a kikhen in Marathon Race  omding hi. Walking race ah District Level Officer teng tel ding uh a, huailou in mipi ading in Marathon Race om ding a, kipahman leng omding hi. Republic Day ma in town area hahsiang ding, footpath leng painting bawlding ban ah CCpur govt college leh Lamka college’ Principal te’n quotation 5 tuak thawh a, khawpi sung mun tuamtuam ah mipi muhtheih ding a takkhiat hiding chihthu om hi.

BLO te’n training nei

Lamka, Jan-16: Dist Admn saina in tuni akipan Tuibuong a Dist Training Centre ah Booth Level Officer (BLO) te’n ‘One Day training of BLOs on continuous updation of  Electoral Rolls and Conduct of Election’ nei uhi. Tuni’n Singngat A/C; Tipaimukh A/C leh CCpur A/C a BLO teng training  uh a, Jan 17, 2014 in Henglep A/C; Thanlon A/C leh Saikot A/C a BLO te’n training ding uhi. Training sung in ST Gangte, SDO/AERO Thanlon; L.Fimate, SDO/AERO Singngat; Jolel G.Haokip, SDO/AERO Parbung; L.T Puii, SDO/AERO CCpur; K.Simte, AC to DC; Soiminlian Lengen SDO/AERO Henglep leh Mannuamching, CEO te’n sinsak uhi.

Mi 3 te’n DYASO muh ngai

Lamka, Jan-16: Khuman Lampak Main Stadium a National Sports Academy ah 2014-15 a coaching atel ding lakna din  January 13, 2014 in Tuibuong Peace Ground ah DYASO saina in Preliminary selection om hi. Huai ah Archery adin Kimngaihlhing of Cambride School; Wrestling adin Phungkhothang govt H/S apan  Lenzapau leh Nehminlen  recommend bawl hi. Recommend a om mi 3 te’n February 2014 1^st week in Khuman Lampak, Imphal ah written leh medical test nei ding uh a, amau akinlam in DYASO/CCpur a muh uh ngai hi’n kigen hi.

Intensified Malaria Control Training

Lamka, Jan-16: Caritas India/DSSS Imphal saina in tuni in Hq Venga KKL complex ah Intensified Malaria Control Project-II, Community Health Volunteer Refresher Training om a, huai ah HL Khai, MHS leh  Thangkhopau MHW te’n Malaria natna apan kiven dingdan sinsak uhi. Training ah mi 11 tel uh a, Jan 17, 2014 in zouding uhi.

KNF(S) Defence Secy mankhia

Lamka, Jan-16:Police thusuak kingahdan in 7-Assam Rifles te’n Jan 14, 2014 zinglam dak 11:50 vel in Chiengkonpang a Phalam Road ah KNF(S) Defence Secy lenlel Bruce Thangneo (30) s/o Pakam Thadou of Tuinom/CCpur mankhia in amah akipan  9mm pistol 3, magazine 3 leh Nokia Mobile X-2 kichi 1 mukhia in Imphal Police  ah pekhia uhi.  CCpur Police te’n a case lasawn in FIR No. 8 (1) 2014 CCP-PS U/S 400 IPC & 25 (1-C) Arms Act registered uhi.

EBC Nepal Field Office hon hiding

Lamka, Jan-16:Evangelical Baptist Convention(EBC) nuaia Nepal Missions Field omna Birtamode, Arjundhara 8 ah February 5, 2014 zinglam dak 11.00 in Rev. L. Kham Kho Lun, Director of Missions, EBC in Field Office building thak hong ding a, Native Evangelist 2014 lakthak a omte leng Commissioning piak hiding uhi. Tulelin EBC Nepal Mission Field nuaiah inn 345  om a, biakinn 21 nei uh hi’n kigen hi.

SUUNNA

Soilianlal(50) s/o (late) Hellam of J. Phaikholum(Thanlon sub-division) tuni zinglam dak 6.00 in RIMS Hospital, Imphal ah TB natna in si a, aluang tuni mah in New Christian Cemetery, Imphal ah kivui hi.

IMPHAL NEWS

CM leh Dy CM tulelin Delhi ah

Imphal, Jan-16: Chief Minister O. Ibobi leh Dy CM banah MPCC President Gaikhangam  zan nitaklam in Delhi ah zin  uh a,amau January 17, 2014 in New Delhi a Talkatora Stadium a AICC(All India Congress Committee) meeting ah tel ding uh hi’n kigen hi.Huai AICC meeting ah tunung sawtlou a Lok Sabha election om ding tungtang leh  February 7, 2014 a Rajya Sabha member 55 telna ding tawh kisai telin thu poimawh tuamtuam genkhawm ding uh chihthu om hi.

Gaan-ngai festival zatna ah thilpiak kikhengtuah uh

Imphal, Jan-16 : Zeliangrong mite ading nopbawlna thupipen leh a minthangpern a kigen  Gaan-ngai festival kichi Majorkhul a Kabui Village a a om paitou zelin tuni in All Manipur Ethno Socio-Cultural Organization-te saina in thilpiak tuamtuam kipiaktuah hun zang uhi. Huai Gaan-Festival ahihleh Jan. 12, 2014 a kipan hi a, kalkhat sung daih ding chih ahi  hi.

National Food Security Act

Imphal, Jan-16:Consumer Affairs, Food & PD Minister M. Okendro in  tuni’n Thoubal district sung Wangjing a senior citizens pawl ‘Yaifakol’ raising day 3veina zatna hun ah Chief Guest hikawm in uap a,aman a genna ah National Food Security Act lawhching taka sepkhiak theihna dinga panlakna paitou zel hi’n gen hi.Manipur a mihing omzah laka 67% in huai hamphatpih ding uh hi a genkawm in huai a kizat hun ah mi 1 in kum 1 sungin antang kg 1 ah Rs. 3 zel in kg. 60 tan ngah ding uh chi’n gen hi.Huai dingin Manipur ah antang kiching koihkholh theihna din Imphal ah FCI office hon hiding in leng  gen a, Union Minister of State for Food Prof. KV Thomas in January 22, 2014 in Imphal hongpha in hong ding chi’n Minister in gen hi.  

     CAF & PD Minister in a genzeldan in Imphal-Moreh kikal ah bandh leh blockade a om munluat ziakin mipi adin gen vuallouh nawngkaina tun a, huai pumpelh theihna ding gelna in govt in Khudengthabi tawn din Wangjing akipan Heirok tan lamlian bawlhoih sawm a, huai lamlian keklet(widening) ding leng Centre in lemsa hi’n gen hi.

Manipur Weightlifting Assn in Dingku gamtatdan mawhpaih

Imphal, Jan-16:Manipur Weightlifting Assn (MWA) pawlin Asian Games Gold medallist, Ng Dingku in weightlifter SoibamAranbala a soisak ziakin mawhpaih uhi.Tuni’n Manipur Press Club a Press Conference ah  MWA Secretary Elangbam Sunil in a gendan in January 13, 2014 nitak dak 7.00 velin SAI a coach apang  Olympian Ng Dingku phalna lalou in numeite omna  hostel a lut in SoibamAranbala leh a lawmte ziak mumal omlou in vua hi’n gen hi Moreh Ward No. 6 a om Soibam Aranbala aliam nasat ziakin Shija Hospital ah etkol ngai hial hi’n leng gen hi.  MWA in Dingku gamtatdan deihlou a mawhpaih kawm in thuneitute’n champiin boxer  tunga action la ding in ngen uhi.

Oil and Gas Conservation Fortnight

Imphal, Jan- 16: Ministry of Petroleum ad Natural Gas nuaia Petroleum Conservation Research Association leh  Oil Industry kigawm a saina in tuni zinglam dak 10.00 in Hotel Nirmala ah ‘Oil and Gas Conservation Fortnight 2014’ honna om a, huai ah Y. Thamkishore,IAS, Commissioner(CAF & PD) khuallian a pang in hong a, Guest of Honour in K. Radhakumar,IAS, DC/Imphal West pang hi.  which will be held from January 16 to 31 to propagate the message of conservation of petroleum products.

The forthnight celebration was launched with a function at Hotel Nirmala on Thursday wherein Y ThamkishoreCommissioner (CAF & PD) attended chief guest. Deputy Commissioner of Imphal West, K Radhakumar pang a, State level Co-ordinator, Manipur, K I Singh leng tel hi. Oil and Gas Conservation Fortnight 2014 sungin petroleum product himhim chilsiam leh zatdan siam dinga chialpina a zat hiding a, January 31, 2014 tan sutzop hiding hi.  

Mi 14 in application form la

Imphal, Jan-16:Manipur ah Feb 7, 2014 a Rajya Sabha seat 1 adia election om ding ah tuni tan in Congress(I) candidate dinga lunglut mi  14 in application form la uh chihthu om hi. Huai mi 14te bel MPCC Vice-President Sagolshem Achouba;  W Angou,ex-MP;  retired IPS W Kipgen,retired IPS;  Bijoy Koijam, ex-MLA;  MPCC secretaries L Manglem leh  Ibochouba;  Abdul Salam, ex-MLA;   L Nandakumar,MLA(Uripok A/C);  Pulinkanta, ex-MLA;  Maniruddin Seikh, ex-MLA; M Hemanta Singh,ex-MLA; W Shyamo Devi,  Janghemlung Panmei,ex-MLA leh Dr E Iboyaima hi uhi.Jan 19 tan application piaklut theih ding chih ahi hi.  .

BJP Manipur Pradesh President

Chaoba in President in Delhi delh

Imphal, Jan-16; BJP Manipur Pradesh Th. Chaoba in tuni’n Delhi zuan in zinkhia a, BJP te’n Lok Sabha election om ding ah 1^st phase in candidate ding mi 150 vel January 20, 2014 a puankhiak a sawmna lak uah Manipur leng a telkhask deihna ziaka Central leader-te kiang ah haithu tun ding hi’n kigen a, huailou in Delhi ah January 17-19, 2014 sung BJP    

National Executive Meeting ah leng telkawm ding hi’n kigen hi.

       Inner Manipur Parliamentary Constituency a BJP candidate ding in Professor RK Ranjan, Oinam Indira, retired Colonel Jayraj leh retired Colonel RK Rajendra in ticket ngen uh a, Outer Manipur Parliamentary Constituency a BJP candidate ding in Professor Gangmumei Kamei, Loni Adani leh  BP Yanglen Haokip in ticket ngen uh a, BJP Manipur Pradesh in huaite BJP National Executive Board in thupukna a bawl dingin petou hi’n kigen hi.

Ngasa poimawhzah piansak sawm

Imphal, Jan-16: DC/Imphal East office complex ah tuni’n Imphal East District Fishery office-te saina in ni 2 sung ngasa khoidan kisinsakna(training) honna ah Fishery Director K. Sarat Kumar in khuallian apang kawmin a genna ah Manipur ah tuban kum 5 sungin Manipur mipite asdia poimawhzah ngasa piaksak sawm in govt in panla chi’n gen hi. Aman tuni a training hun ah a gendan in ngasa khoidan(fish farming) tawh kisai kisinsakna poimawh mahmah hi’n gen a,huai dinga lunglut a poimawh banah ngasa-te nek-le-tak ding bawldan tanpha leng theih phatuam mahmah ding hi’n gen hi.Kum 2017 chiangin Manipur adin ngasa kiching a piankhiak lam-et hi a, huai hun ah state dang akipan ngasa laklut ngai nawnlou ding hi’n leng gen hi.

Assam Rifles te’n khamtheih mankhia

Imphal, Jan-16: 9-Assam Rifles te’n zan in Chandel district sun a Moreh town  ah operation a bawlna uah khamtheih tamtak mankhia uhi.  Akigendan in 9-Assam Rifles te’n Mama Haokip s/o (late) Heingul of Moreh Ward No. 3 akipan in Opium kg. 2 vel  mukhia uh a, khamtheih leh a mimat khiak uh Moreh a Customs-te pekhia uhi. Huai khamtheih bel  sum a tuat in Rs. 30 lakhs vel man ding hi’n kigen hi.

Manipur in electric meivak a ngahdan

Date 16/01/14    Tima  20:17

State         Schedule     Drawal         Deviation

 Manipur      98.7            124.9            26.2

Gari accident ziakin 1 si: 14 liam

Imphal, Jan-16: Ukhrul district sung Kasom Khullen Police station bialsung Asang Khullen ah gari accident ziakin numei kum 17 a upa khat si a, midang 14 liam uh chihthu om hi. Aliamte laka mi 6 gim mahmah in JNIMS Hospital ah etkol hi uhi.

Thutut kingah dan in zan nitaklam dak 4.00 velin Saktiman Tata(No. MN- 03T/0696) mi 20 pawkawm in Leinangching zuaka tailai Asang Khullen akipan km. 1 vela gamla  a tailai  metrer 50 athuk kenlak(deep gorge) ah kekhia a, aliamte laka  numei kum 17 a upa  

M C Naomichon of Asang Khullen gim mahmah kawma Hospital zotpih ahih lai in si a, aliam midang 14te laka 6 leng gim mahmah kawmin  JNIMS Hospital a etkol hi un kigen hi.       

     Aliam gimdeuh mi 6te ahihleh Miss Denstri(21) d/o N. Nalangzao;  Leiminon(23) w/o  Mathotmi;  Grace Kakhui(32) w’o Thuisen;  Miss Nungmila(18) d/o M C Ahao;  V S Chihangsing(17) s/o John Boss leh Naoroipam Jajo (23) s/o Shimeri Jajo hi uh a, amau  Asang Khullen khawmi ngen hi uhi. AC Victor Keishing,MLA(Phungyar A/C) leh bialtu MDC Thotaishang of Kasom Khullen in damloute veh in sum in leng panpih uh chihthu om hi.

FOREIGN NEWS

Syria rebel-te  kikaptuah:  1069 si

Aleppo, Jan-16: Syria rebels kal a kituahlouhna ziakin nipikal 2 vel paisa akipan northern Syria ah kikaptuahna huaisetak om a, tunitan in civilian 130 banah, Islamic State of Iraq and the Levant (ISIL) jihadist 312  thah hi uh a, himahleh Syria apan ISIL nawhkhiak sawm a gamtang moderate leh Islamist rebels 608 val in ISIL khutlum ah sihlawh uh a,  ISIL khazak aletdan ensak hi’n thusuakin gen hi. Zan zinglam in  ISIL adia Idlib province makai Abul Baraa kichi Islamist rebels te’n kaplum  ua, amah bel ISIL doudal peuhmah thah dinga thupetu ahi hi.  Kikaptuahna apaizel lai in ISIL te’n a panmun uh Raqqa province apan Islamist leh moderate rebels te nawhkhia uh a, himahleh Aleppo tawh Idlib province ah ISIL tunga beihpi suahna paizom zel lai hi.

Al-Qaeda  pawlinFallujah mipite tohthou sawm 

Fallujah, Jan-16: Iraq leh Syria adia Al-Qaeda kahiang, Islamic States of Iraq and the Levant(ISIL) pawlin Iraqi sepaihte dou dingin Fallujah mipite chial uh a, mipite’n galvan dokkhia a sihtanpha a sepaihte dal dingin ngen uhi. Fallujah ahihleh Sunni Muslim milip tamna Anbar province sung hi a, Iraq capital Baghdad akipan gamlalou ahihbanah, nipikal tamlou paisa a Al-Qaeda pawlin a thuneih khum uh ahi hi. ISIL fighter te’n mipite kiangah amau pawl adia kibukna leh nektak pe dingin leng ngen uh a, khawlai ah tuabang ngetna laigelh(pamphlet) thehzak uhi. Tuabang kalah al-Qaeda helpawl leh Iraq sepaihte Fallujah neighbourhood sung mun 2 ah kikaptuah lai uhi.  Iraq PM Nouri al-Maliki in khawvel makaite kiangah  Sunni-dominated Anbar province apan ISIL te nawhkhiak pih dingin ngen a,  tulelin Syria tawh gamgi Fallujah  leh Ramadi  ah ISIL fighter tamtak in Iraq sepaihte’ khawpi sung a lut ding uh ngaklel uh a, kikaptuahna huaise mahmah dingin kilang hi.

Hezbollah hatna bial ah bomb puak

 Beirut, Jan-16: Syria tualgal a Lebanon’ Shia helpawl Hezbollah akigolh nungin Al-Qaeda te’n suicide bomb zang in attack  zel uh a, tuni’n  leng Lebanon' northern border town Hermel ah car bomb hattak puakzak in mi 3 si uhi. Thusuakin agenzelna ah, Netherland khawpi ‘The Hague’ ah Lebanese statesman Rafik al-Hariri thahna tungtang thukhentatna kipat hun a bombpuak om ahi hi.