Manipur Express | January 20, 2014

HEADLINES:

Term pailel adia Parliament session nanungpen om ding

New Delhi, Jan-19: Parliament session(Lok Sabha leh Rajya Sabha tutkhawmna) February 5-21, 2014 sung om ding a, huaipen Lok Sabha term pailel adingin session nanungpen hita ding a, huaizawh April,2014 kimlak ahih kei leleng May, 2014 khabul in General election neih hiding hi. Kumlui Dec 5-20,2013 sungin Parliament Winter Session om a, huai hunsung in  Bill poimawh ahunkhop pass  manlouh a dinkhawl ahihziakin hiai session a bill tuamtuam pending a omte pass hiding chih hi a, April, 2014 akipan kha bangzah hiam sung govt  sum zat ding  ‘Vote on Acco

unts’ leng passed hiding hi, Huai ding ziakin tulai in UPA government  naktakin kisakhol lel uh a, opposition party tuamtuamte leng houpih lel uh chih ahi.

Tuni’n official  thusuakin a apuan danin, Rajya Sabha ah  Feb 5, 2014 zinglam dak 11 in session kipan ding a, ahun kibang mah in Lok Sabha session leng  kipan ding hi. Session hunsung (Feb 5-21) sungin Vote-on-Account khempeuh pass hiding  a, bill poimawh diakte February 17, 2014 in ngentel takin genkhawmna om ding chi uhi.

Union Parliamentary Affairs Minister Kamal Nath in a genna ah, tutung a session om ding pen thakhat thu a sawmphut hilou in kumlui 2013 a Winter Session sutzopna hi a, tua hunin Innpi 2te niteng phialin hihbuai in om  a, government in ahunchiam sungin session zou manlou chi hi. Parliament session om dingah anti-corruption tawh kisai legislations thak om ngei ding a gintak hi a, innpi 2 te ah bill 126 dinkhawl lel a, huai lakah Rajya Sabha ah bill 64 leh Lok Sabha ah bill 62 hi a, huai teng tu session ah hihvenvek hiding, a poimawh leh voice vote in pass  mengmeng hiding chi hi.

  

PM in Northeast  a Chief Minister teng kimuhpih sawm

New Delhi, Jan-19:  Prime Minister Dr Manmohan Singh in Jan 20, 2014 in New Delhi ah India malsuahbial(Northeast)  a Chief Minister 8 omteng kimuhpih ding chihthu om hi. Huai hunah North Eastern India (NEI) a government project tuamtuamte bangtan in a khangtou a,chih banah  infrastructure dinmun vel thakna leh  development projects tuamtuam omsate genkhawmna hun zangkhawm ding uh chih ahi hi.

Prime Minister’s Office (PMO) apan tunitak a thusuak kingahdanin Dr Manmohan Singh makaih a meeting om dingah, Assam, Arunachal Pradesh, Meghalaya, Nagaland, Manipur, Mizoram, Tripura leh Sikkim apan Chief Minister teng telvek ding ua, UPA government in a term sung un abial (state) chiat ua nasepkhiak dia a guante bangtan tunghiam chih genkhawm ding uh chi uhi. Prime Minister Dr Singh in  infrastructural leh development project tuamtuamte ngaihkhawk pipen in nei chih hi a, huchi kalah, state te’n banglam ah haksatna nei uhiam chihte leng genkhawm ding uh chihthu om hi.

Dr Manmohan Singh ahihleh Assam state apan Rajya Sabha member a telching hi a, road, railway, telecommunication leh hydroelectricity vai tawh kisai a hunchiam sunga zawhdia kiguangte a kisaipih state te’n zouman taktak mah uhiam chih Chief Minister te’  alangtang a dong ut hi’n kigen hi. State govt tamzaw in bel centre project tuamtuamte hunchiam sungin zou manlou uh, helpawlte’n a  hihbuai ziaka nasep ze-ol ahi chih suanlam den uh chih hi. Tripura CM Manik Sarkar leh Meghalaya CM Mukul Sangma in bel Bangladesh tawh kigamgitna bul a trade centre hoih huntawk mahmah tun ding dingin phutsawm uh chihthu kiza hi. 

Electoral revision ah MDC/MLA te’ min tanpha paihin om

58/CCpur A/C ah voter 2056 te’ min paihkhiakin om

Lamka, Jan-19: Muanhuaitak apan thusuak kingahdanin Chief Electoral Officer (CEO) Manipur in  electoral revision 2013 a suahkhiak dungzui in 58/Churachandpur (ST) Assembly Constituency sungah voter 2056 te’ min paihkhiak (deleted) in om chihthu kiza a, huai lakah mipite’ palai (people’s representative) MDC/MLA khenkhat- te’ min  tanpha leng paikhiak(deleted)  hi a,   bang ziaka  mihing  hiaizah lawmlawm paihkhiaka om hiam chih etzui hilel hi. 59/Saikot A/C apan leng mi 135 te’ min paihkhiakin om a, constituency dangte’ leng bang dinmun hiam chih etzui hilai  hi.

            58/CCpur (ST) A/C sungah form 7 dungzui in paih a om dingte’  SDO/BDO CCpur in BLO te tungtawn a min akaihkhawm 113 lel himahleh paihkhiak a om teng mi 2056 phatou mawk a, bang thuguk kiphumgu hiam chih theih hilou hi. Etsakna dingin Bungmual kia et zual in leng polling station 4 om a, tuate 58/6, 58/7, 58/8 leh 58/9 hi a, tua ah BLO te’n SDO/CCpur ah paihkhiak (deletion) dia a piaklut uh 58/6 ah mi 8;  58/7 ah mi 7;  58/8 ah mi 8 leh 58/9 ah mi 9 hi ua, ahih ziakin mi 100 val tham paihkhiak (deleted) in om uhi. paihkhiak a omte lakah GJG0006841-Vungzagin Valte s/o Dongzakham Valte lehGJG0043992- H. Mangchinkhup s/o H. Lianzamang leng telkha uhi.Vungzagin tulelin MLA & Parliamentary Secretary hi a, H. Mangchinkhup leng EM/ADC CCpur ahi hi.

        ERO/58-CCpur (ST) in a suahkhiakna ah lamtom (abbreviation) chi 4 om a, tuate ahihleh E (Expired), S (Shifted), M (Missing), Q (Disqualified) leh R (Repeated) chih hi a, voter paih a omte ahihleh atangpi in R (Repeated) chih piakin om mawk ua, phetlou in a silou tanpha leng E (Expired) chih min vuahsakin a vote uh paihkhiak sakin om mawk uhi.

            Electoral form tungtawnin hukdim ding tamtak om mah a, constituency khat lel a BLO te’ piakkhawm  leh official a suakkhia kibanglou mawk ahihleh huai pe’n ngaihkhawk huai mahmah dingin kilang a, a sukhialtu (culprit) kua hiding hiam chih leng etzui poimawh mahmah din kilang hi. Tuaziakin, a kisaipih official te’n deletion leh addition tungtang banah hun lui (previous) a 58/CCpur (ST) A/C a vote omzah leh a nanungpen (latest figure) mipite’ theihdia a puanzak uh poimawh  ding chi’n mi tamtakin press ah thu hongtun uh a, misi loupi sidan a a gelhhiam ahihkeileh bangchidan a mihing hiai zahzahte’ vote paihkhiak a om mawk thei ding hiam chi’n dotna tamtak om hi.  Thil omdan tawh kisai thuchian zawsem ki-hungaih lel lai hi.  

Naupang tamta in Polio damdoi dawn

Lamka, Jan-19: India gam pumpi ah tuni’n National Immunization Day (NID/IPPI) 1st round om a, naupang (0-5yrs) kikalte ah Polio dalna damdoi dawnsak hi uhi. CCpur dist ah booth 435 kihong  a, Divnl Supervisors 19 leh Sectoral Supervisors 85 duty in naupang te zeng dalna damdoi dawnsak uhi. Tuni zing dak 7:00 apan town area a booth omte  ah damdoi dawnsak uh a, tuni a dawn khalou naupangte Jan 20 &21 in inn inn (house to house visit) ah  dawnsak ding uhi.

Songtal H/S apan mi 5 in   exam ding

Lamka, Jan-19: Thanlon sub-divn sung Songtal khua a Govt. High School pukse sa puahphat ahihnung in tukum a HSLC exam ding candidate 5 om uhi. Amaute Dec 7, 2013 akipan Langkhanpau Guite, Chairman, ADC/Ccpur inn Songtal ah  kikulh in lai simsak hi uh a, tukum bul akipan Dorcas Veng, New Lamka a ADC Chairman in a inn a kem in Shoute Coaching Centre ah tution lasak a,  routine bawlsak in exam di’n kisakhol uh ahihdan Headmaster, Songtal Govt. H/S in akipan thutut kingah hi..

Elizabeth in Ph.D. ngah

Lamka, Jan-19: Ms Elizabeth Kimneihat Vaiphei d/o T. Manga Vaiphei, Chairman/ MTDC & MLA(Henglep A/C in Bangalore a National Institute of Mental Health and Neuro Sciences  ah kum 5 vel paisa akipan research a bawl ‘Psychosocial issues among women injectable drug users’  thesis tungtawn in  Ph.D. (Psychiatry Degree) ngah hi.  Aman  Stockholm  a Young Scholar Research Award Scholarship leng mu a, , XXXI Annual National Conference of  ‘Indian society of Professional Social Work’ Manipal, Kasturba Medical College ah leng Best Paper Award piak in om hi. Professor  D. Muralidhar, dept of Psychiatric Social Work leh Prof Prabha S Chandra, Dept of Psychiatry etkaina nuaiah  Ph.D thesis gelh hi’n leng kigen hi.

Jan 31 tan  Biometric kilak theih

Lamka, Jan-19: India govt in India mite leh gamdang mite khenkak theihna din   ‘Aadhar project’  tungtawn in biometric photo lakna pailel a,January31, 2014 tan in SDO/CCpur office ah CCpur mi kila khalou te’n biometric photo kilaktheih ding hi. January 31, 2014 tana Biometric photo kila ding mi a tamlai leh ahun hihsau(extend) hiding a, hileleng photo kila ding mi a om nawnkei leh khawlsak hidin kigen hi.

Car in bike phukha in taisan

Lamka, Jan-19: Tedim Road a  Police Station khang deuh ah tuni sunnung dak 2:30 vel in Lamka lam zuan Alto  car (silver colour) No. MN 01X-1034  in Rengkai Road apan Tedim Road a khawllai Pulsar Bike MN 04B-7864 phukha in taisan hi. Thiltung theihphet in Police Station a duty om te’n Alto car delh mahle uh mantang manlou in taisuak hi’n kigen hi. Pulsar bike a malam teng kise dimdem a, bike driver Emmanuel Lalsiemthar (26) s/o (late) Rema of Rengkai leh anung atuang Polly Pulamte of Peace Lane  bel liam nak lawlou in Dist Hospital a Casualty ah dressing bawl zawh in Doctor te’n  paisak  uhi.

VPC Presidential Election 2014

Lamka, Jan-19: Vaiphei Peoples Council  Gen HQ in Feb 18, 2014 in kum 2014-2017 sung vaipaw ding President leh Vice President  tel ding uhi. Candidate nuamte’n   February 10, 2014 tan nomination paper file thei ding uhi. Feb 12, 2014 in  nomination paper-te etchetna(  Scrutiny) om ding a, candidate kizukkik nuamte adin Feb 14, 2014 in  kizukkik theiding uhi.  

ZPYF in Lakutpi zang zou uh

Lamka, Jan-19: Zomi Colony Road a Central Church, ZPCS ah Zou Presbyterian Youth Fellowship pawlte saina in Jan 7, 2014 apan Lakutpi a zat uh tuni nitak in zou uhi. Huai hunsung in Seminar hun ah Rev PC Manga leh James Songate in sinsak uh a, Rev Awnkhankhup in Pathian thugen hi.

Document submit loute

a lawh uh hentang hiding

Lamka, Jan-19: District  Council nuai a untrained teacher hileleng HSLC/Class XII marksheet submit nailou te’n Jan 23, 2014 tan in Dist Council office ah submit ngai ding a, huaini tana  submit louteng January 2014 kha lawh held-up sak hiding in CEO/ADC in thusuah  hi.

Henglep Area Youth Camp

Lamka, Jan-19: Tuilaphai ECA Church saina in Jan 23-27, 2014 sung Tuilaphai khua a ECA Church ah Henglep Area Youth Camp om ding a, Pastor Shehkhohen, Henglep Pastorate Area in hong ding hi. Youth Camp ah Pro Pastor Tongminthang in Pathian thu gen ding a, Devotion leh teaching hun ah Evan Seiboi, DTS Lecturer-cum- Librarian in sinsak ding hi.

Dist Level & Sub-Divn Level 

Republic Day lopna om ding

Lamka, Jan-19:  Lamka Public Ground ah January 26, 2014 in District level a Republic Day lopna om ding a, Singngat, Thanlon, Henglep leh Parbung ah Sub Divional level a lopna om ding hi. Lamka Public Ground a  lopna  ah deptt 12- Agriculture, Health & FW, Horticulture, Sericulture, Veterinary, NIC, ICDS, Fishery, CAF& PD, Forest, Election leh First AID te’n stall bawlding uh a, Health, Education, PWD& PMGSY, PHED. IFCD leh DRDA te’n Tableau display ding uhi. Deptt 5 in Welcome gate bawl ding uh a, Dist Council& TD te’n Main gate, Nehru Marg ah Co-operative & Employment Exchange te’n bawl ding uh a, Police Station kong ah Transport & Statistics te’n, Forest Gate ah Forest Deptt te’n, Lanva ah Social Welfare & NYK te’n bawlding uhi.

SUUNNA

Jangthong Haokip (55) s/o (late) Jangkhosei Haokip of Matalambulane tuni nitaklam  dak 5:30 velin Dist Hospital ah kalna in si a, Jan 20, 2014 in Matalambulane hanmual ah kivui ding hi. 

IMPHAL NEWS

Union Minister in FCI  office hong ding 

Imphal,Jan-19: Union Minister of State(Consumer Affairs, Food & Public Distribution) Prof VK Thomas in January 22, 2014 in Imphal hongpha ding a, huaini mahin Food Corporation of India(FCI) Regional Office hong ding chihthu om hi. Prof Thomas in January 22, 2014  nitaklam dak 3.30 in FCI Regional Office ding hongkhe ding chi’n thusuak in gen hi. India govt in Imphal ah FCI Regional Office honkhiak dia

lemsakna thupuan a bawl zawh in Manipur Cabinet in FCI Regional office mun ding bawlzawh ahih masiah Assembly Secretariat munlui zat phot hiding in thupukna bawl uhi.

Security Nodal Officer din Khaute  

Imphal, Jan-19:Manipur ah  April,2014 kha kimlak vela Lok Sabha election om ding ah Security Nodal Officer dingin LM Khaute,IPS, Addl DGP guan a om hi’n Manipur Chief Electoral Officer(CEO) O. Nabakishore Singh in gen hi.Election phase 1 ding ahihleh security force company 150 vel Central in  hong sawl dinga gintak hi’n CEO in gen a, hileleng phase 2 a khen ahih aleh Central Para-Military Force(CPMF) company 75 vel duty  dingin Centre in hong sawl gintak-huai chi’n CEO in gen hi. 

Winger khat accident: mi 5 si  

Imphal, Jan-19 : Guwahati akipan Imphal zuan Winger ‘Mini Bus’ (No. MN01X/0280) tuni in North Guwahati apan km. 45 vela gamla Baihata Chariali mun ah accident in a sung a tuang mi 5 si in midang 10 liam uhi. Thusuak kizadan in  Winger a tuang Barastabandra, Chandra Prasad leh Rasoda Devi  amun ah si uh a, midang 2te  damdawi inn zotpih ahihlai un si uhi. Aliamte Guwahati Medical College puaktung hi uh a, asimi 2te bel hiai thu sut tanin amin uh theih hinailou hi.

Momoko thu a om ding deihlou 

Imphal, Jan-19 : BA III year 6^th Semester syllabus ah Manipur Film Star Momoko tangthu a tel ding deihlouh ziakin tuni’n Anal Naga Civil Orgn te’n Chandel district sunga Panchai village ah press conference nei uhi. Huai ah President Kohring Victor in a genna ah state govt in BA III year 6^th Semester adingin Prof. Naorem Rabei Singh in a gelh ‘Indian Government & Politics’ kichi telsak hi’n gen  a, aman huai syllabus ah NSCN(IM) a S/S Lt. Col. Livingstone in Momoko a bawldan tawh kisai taklat hi a, tuaziakin Anal Students; Union in naktak in mawhpaih ua, huai bang thu syllabus a om theilou ding hi’n gen uhi. Huaiziakin, state govt in hibang gelhtu gawtna pe dingin ngen hi.

Tentha Khunou ah bomb puak    

Imphal, Jan-19 : houbal district sung Yaipipok PS biala  Tentha Khunou ah zan nitak dak 6:45 velin IFCD a LDC sem Moirangthem Yaisana tenna inn kiang ah IED bomb khat puakzak a, himahleh asi leh liam  omlou hi. Huai IED bomb puak in Moirangthem Yaisana gate hih sezek hi’n kigen a, thiltung  theihphet in Yairipok Police te’n amun delh  uhi.

Kangpokpi A/C secular constituency ahi – Nemcha 

Imphal, Jan-19 : 50-Kangpokpi A/ C akipan  MLA telching a om Nemcha Kipgen in zan in a tenna Ngahmun ah Pathian kianga kipahthu genkawm in a workers- te annek pih hi. Huai hun ah a gendan in Kangpokpi Constituency ah nam tuamtuam teng khawm  a, tua ziakin secular constituency ahi a, khentuam ka neikei a, ka hon etdan akibat vek ziakin kuapeuh pangkhawm ni, chi’n ngen hi. Namtuam leh pautuamte’n nek leh i dawnkhawm chiang in itna hong piang in huai in kitanauna tun a, huai tupna ziaka hibang programme sai ahihdan gen hi. Aman Kangpokpi khangtouhna din kuapeuh in panlak poimawh ahihdan gen hi. Hiai hun ah Vikas Bhujel, Member, ADC Sadar Hills leh Meena Kumari Sedai, Ex-Member, Zilla Parishad te’n leng uap in hibang programme MLA  in asai kipahpihthu gen uhi.

Manipur in electric a ngahdan  

Date 18/01/14     Time 16:28:00

State           Schedule   Drawal  Deviation

 Manipur     83.5             94.9      11.4

Date 19/01/14     Time 17:07:30

State         Schedule     Drawal     Deviation

 Manipur    76.9             24           -52.9 

Naupang tamtak in polio damdoi dawn 

Imphal, Jan-19: Family Welfare Services leh State Health Society, Manipur kigawma saina nuai ah tuni’n Intensified Pulse Polio Immunization (IPPI) 1^st round pat hi a, Family Welfare office ah Director of State Health Society, Dr O Ibomcha in a honkhiakna kawmin naupang bangzahhiam polio drops(zeng dalna damdoi) dawnsak hi. IPPI 1st round sungin Manipur ah naupang kum 5 leh anuai lam 3,60,911 val omte polio damdoi dawnsak dinga ngim(target) ahi hi.

   Tuni a honna programme zatna ah Funtional President in Family Welfare Services Director Dr K Rajo pang a, Guests of Honour in NRHM gynaecologist Dr Ch Nabakanta leh State Health Mission Additional Director Dr A Ibochouba pang uhi. Dr O Ibomcha in a gendan in Manipur state pumpi ah tuni’n Polio booth  3609 honkhiak hi a, huai ah naupang 3,60,911 om laka a tamzaw zeng dalna damdoi dawn uh hi’n gen hi. Aman a genzeldan in January 20 & 21, 2014 in Nurse te’n innteng abanban a phasuak in damdoi dawnsak ding uh hi’n gen hi

Assam Rifles ten KCP 1 man 

Imphal, Jan-19 : 10- Assam Rifles ten Khoken village kimlak operation a bawlna uah phaijang helpawl KCP cadre khat mankhia uhi. Matkhiak a om bel Thanggin Haolai Doungel (42) s/o (late) Hensat Haolai of Khoken village, Imphal West hi a, amah akipan in 7.65mm pistol khat leh atang 4 mukhia uhi.

Golf tourney ah MEPTA-B ten champion la 

Imphal, Jan-19 : Manipur Golf Assn leh MEPTA (IGAR South) te saina a 3^rd Basantakumar Memorial Golf Tournament 2014’ kichi Mantripukhri  a om zawhsiang ahih tawh kiton in Mantripukhri Ecology Park & Training Area (MEPTA) –B team ten champion hihna la uhi. Huai tournament ah akigawm in team 7 ktel uh a Meghalaya, Air India Sports Board (Mumbai) chihte leng tel  uhi.

            Final match leh hunkhakna ah 3 Corps Commander Lt. Gen. Narashimha in Chief Guest hihna tawh uap a, Chief Secretary PC Lawmkunga, DGP Shahid Ahmed, IGAR South Major Gen. Chopra, GOC 57^th Mountain Division Major Gen. Balli -te Functional President leh Guests  of Honour in pang uhi. Hiai hun  Wangkhem Basantakumar innkuanten leng uap uhi.

FOREIGN NEWS

Syria main opposition kihel ding

Damascus, Jan-19: Switzerland khawpi Geneva ah January 22, 2014 in Syria gamsung buaina hihveng sawm in UN leh US banah Russia kithuah khawm in peace talks neih sawm uh a, huai hun a kihel dingin Syria a opposition group pipen(main) Syrian National Coalition kihel ding uhi.  Syrian National Coalition ahihleh opposition body galtai(exile) te kikhai khawmna pipen hi a, January 22  chiang a Geneva peace talks pen ah lemna deih in kihel ding uhi.  US Secretary of State John Kerry  inleng Syria' opposition makaite thupukna kipahpih kawm in Syria gamsung buaina hihveng theih a lam-etdan gen hi.

Bombpuak ah sepaih 22 si

Islamabad, Jan-19: Northwest Pakistan a Bannu kiangah bombpuak ziakin Pakistan sepaih 22 thah in om uh a,  thusuakin agendanin sepaihte ahonpi a kizuilai bomb hattak in puahzak khum ahi hi. Tuni a bombpuah hun in sepaih dang 30 vel in liamna tuak uh a, huai bombpuak bel  civilian  gari a kikam ahihbanah paramilitary Frontier Corps sepaihte paw dinga azat dek uh ahi hi.  Tehreek Taliban Pakistan (TTP) pawlin huai thiltung amau gamtatna hi’n puang uh a,  tuaziakin Bannu  area ah curfew koih in omlel hi. 

Kiphinna neite lakah bombpuak in 28 liam

Bangkok, Jan-19:  Thailand Prime Minister Ms. Yingluck Shinatwtra deihlou a mipi kiphinna in venlam nawtlou in hiamgam sem dingin kilang a, huchihlai in kiphin pawlte lakah police-te’n thau khah in tamkhop thah in om ta hi. Tuni inleng kiphin pawlte lakah bomb hattak puakzak in mi 28 vel liam uh a,  zan nitakin anti-government activist khenkhat thau a kapliam in om hi.  Thiltung tawh kisai Prime Minister Yingluck Shinawatra in ngaihsak sawmlou a, tua tawh kiton in adinmun apan kizukkhiak leng sawmlou hi.