Manipur Express | January 21, 2014

Prime Minister in NE Chief Minister 8-te kimuhpih

New Delhi, Jan-20: Prime Minister Dr Manmohan Singh in tuni’n India malsuahbial (Northeast) state a Chief Minister 8 omte kimuhpih  a, infra-structural projects tungtang a a nasepkhiak uh lungtunhuai sa mahmah ahihdan gen hi. Huai hunah Assam, Arunachal Pradesh, Meghalaya, Nagaland, Manipur, Mizoram, Tripura leh Sikkim apan Chief Minister teng tel uh a, Prime Minister  tawh infrastructural leh development project tuamtuamte  tungtang ngentel takin houlim uh chih ahi hi.

Prime Minister Dr Manmohan Singh bel Assam apan Rajya Sabha member a telching hi a, aman a gendan in  India malsuah biala dinga poimawh masapen kikawmtuahna lampi hi a, tua dingin mipi in a mamawh lamlian, railway, telecommunication

leh meivak tawh kisai hydroelectricity ahi chi hi. Dr Singh in Chief Minister te’ ma a a genna ah, India malsuahbial ah khantouhna nasepna a zekaina ziak chi 2 omsek a, tuate environment tawh kisai ahih banah helna(insurgency) problems tungtang ahi chi hi. Infrastructure project tuamtuam a sem mi nautang tamtak pimang in omta a, tua in nasepna a hun a zawh ding kichi hon zou saklou sek ahi chi hi.

Tripura Chief Minister Manik Sarkar  leh Meghalaya Chief Minister Mukul Sangma in Bangladesh tawh kigamgi a Border Trade Centre puah hoihsem ding tungtang hah gen  mahmah uh chih hi. Tripura  khawpi  Agartala leh Bangladesh a Akhaurah kikal kikawmna ding rail lampi sialna dingin process bangkim zawh hita chi’n leng Prime Minister Dr Singh in dawnna pia hi. Tuabanah Mizoram tawnin Myanmar a Kaladan luipi  apanin tui lampi sial hiding a, huai in India malsuahbial mipite leh mainland India kikawmtuahna hihnai tuan mahmah ding chi’n Prime Minister in gen a, Arunachal Pradesh a Sino-Indian border ah leng gam 2 kal kikawmna dingin  lampi hoih leh liantak mai sial hilel ahi chi’n PM in gen  hi.

National Voters’ Day ni’n voter  thak  40,191 kiangah EPIC piak hiding 

Imphal, January-20:Kumteng a National Voters’ Day kizang tukum in leng January 25, 204 in  ‘Ethical Voting’ chih thupi zangin Palace compound a MFDC Auditorium ah kizang ding a, huai ah Chief Guest in Manipur Governor VK Duggal pang ding chi’n state Chief Electoral Officer(CEO) O. Nabakishore Singh,IAS in gen hi.Huai hun ah tkum akipan vote neithei ding(newly enrolled electors) mi 40,191 kiangah Electors’ Photo Identity Card (EPIC) piakkhiak hiding chi’n leng CEO in gen hi.CEO in zanhal in Manipur Secretariat a North Block ah DC/Dist Election Officer,Jiribam leh Kangpokpi a ADC banah Electoral Registration Officer leh SDO teng tunung zeka Lok Sabha election ding tawh kisai in meeting neihpih hi. .

      CEO makaihna meeting ah election om hun a thil poimawh tuamtuamte leh tulela law & order dinmun banah polling station omdan leng genkhawm uh a, District Electrion Officer te’n buaina om theihna dinga patauh-huai polling station tuamtuam tawh kisai kal khat sungin CEO office ah report chiat dingin theihsak hi uhi. Meeting zawh in CEO in media-te kianga a gendan in National Voters’ Day zatni in April,2014 kha vela Lok Sabha election om hun ah voter tengin mahni vote chiat khechiat ding kizaksakna leh chialna leng om ding a, state level kia hilou in district, block, polling station leh sub-divisional level ah leng National Voters’ Day zat hiding chi’n CEO in gen hi. 

      Vote neithak dingte lakah tutung a   EPIC kihawmkhia ding bel hun paisa ate tawh kibanglou deuh in plastic PVC a kituam hiding a, PVC a bawlna machine bel state Election deptt in nei hi’n kigen hi.  Election Commission of India in tuma deuhin PVC a bawlna dingin mi 1 zel akipan Rs. 30 lak theih ding hi’n theisak uh a,bangtenghileh Manipur ah mi 1 tungah Rs. 10-15 kikal lak kisawm chi’n CEO in gen hi.

      Manipur ah polling station 2662 om a, DC te’n SP chiat tawh kithuza in Polling station tuamtuam polling duty ding poimawh zah om hina hiam chih suichian dingin leng CEO in DC-te thisak hi. Aman dotna a dawnna ah January 6, 2014 a electoral roll kisuahkhia akul leh poimawh bangin Lok Sabha election om ma in update zel hiding in gen hi. Adiklou omte himhim election kuana nomination file hun madeuh tan bawldik theih ding chi’n leng gen hi. Manipur a mihing omzah laka 60% vel vote nei hi uh a, voter omzah 17,39,005 lakah double a om leh adangdang 38, 277 paihkhiak( deducted) a om uh hi’n CEO in gen a, voter omzah pasal  1000 zel ah numei 1039 om hi’n gen hi.

Sunanda Pushkar sihna ziak overdose  ahi -Report

New Delhi, Jan-20: Union Minister Shashi Tharoor zi Sunanda Pushkar Tharoor ni 2 paisa in  South Delhi a 5-star hotel ‘Leela Palace’ a room sungah  sisa a muhkhiak ahih tawh kisai in gen-le-sak tam mahmah a, siluang haltum ahih hun in aluang pawte’ lakah a pasal mahmah leng pang a, a pasal in AICC session ah atelsung in  azi in beisan ahihdan thei ahihthu gen a, huai pe’n thudik mah adiam chihtheih in om a, huchih lai in post-mortem bawl doctor te’n bel overdose ziaka si hidingin ginlelh huai chi uhi.

Kum 52 upa Sunanda Pushkar’ autopsy report tungtang chiang deuhdeuh a, overdose mah hidingin gintak-huai a, amah leh amah overdose hia ahihkeileh kuahiam in over dose sak hia chihte etzui lai hiding chi uhi. Amah sihna tawh kisai report om theiliai teng tuni nitakin Magistrate kiangah piaklut hi’n official thusuak om a, a taksa banah a sigui zam tuamtuamte hoihtak a et ahihnungin zu tawh kisai bangmah muh hilou a, ahihziakin damdawi khamtheih Alprazolam telin damdawi hat taktak a taksa sungah lut ahihdan bel chet in om chi uhi. Huai overdose  tawh kisai hihkhelh ahihkeileh theihkhelh khak ziaka overdose hihiam ahihkeileh tup mawng a hih a om hiam chihte etchet ding omlai chi uhi.

A pasal Shashi Tharoor in tulelin Union Minister of State for Human Resource Development lenlel a, zanin Delhi police-te’n a statement record a bawlnung un tuni in Magistrate in thu dotna neikawm in a statement lak hinawn a, tua zawhin Hardwar luipi ah a zi’ kihalna vu(ashes)-te khahkhe dingin phalna piakin om hi. Tharoor in Union Home Minister Sushil Kumar Shinde kiangah zanin a zi sihna tawh kisai thilsuina pailel ah, theihtawp suah a thilsuimite kithuahpih ding ahihdan chiam  hi. Mi khenkhat in a gendanin bel AICC session ma nitakin Tharoor leh azi Sunanda naktakin kina uh a, 5 star hotel sungah a room kiang ua giakte khenkhat tanpha ihmu sak theilou khop in kisel uh chi uhi. Thiltung teng tawh kisai Delhi police-te’n document bangkim kaikhawm lel uh chih ahi hi.

LOCAL NEWS

YPA duty pawlin mi 2 mankhia

Lamka, Jan-20: Young Paite Assn(YPA) Pearsonmun Unit duty pawlin tuni sunnung in sum-ngen(demand) a kipei pasal khat mankhia uh a, akithuahpih uh pasal dang khat tuni nitak dak 9.00 velin YPA Pearsonmun Unit khut ah kipekhia hi. Thutut kingahdanin mat a om Liansanglun(18) s/o Thangkhanmang of Bezer Veng Gangpimuol in azi tonpih kawmin  zan zinglam dak 10.00 velin Pearsonmun khawsak a Nepali bawngnoi zuak a nekzongte vaukawm in  sum ngen in  Rs. 900 laksak  chih ahi hi. Sum ngetna a akithuahpih sek Khamgoulian (17) s/o (late) Mangtinlal of Lamzahau road Gangpimuol tuni nitak dak 9.00 velin kipekhia a YPA makaite’n, thuhilhna a neihzawh un  a innkuante kiangah  pekhia uhi.

(Aban page 4na ah)  

      YPA Unit makaite apan kizadan in Liansanglun leh azi in tuni a sum a nget zawh un duty te’n thei uh a, Pearsonmun khawsung a lampi tawn a pai hun ding uh tangkawm in duty uhi. Huchihlai in khawsak a ZMA donation box ah a gari zat uh Activa (No. MN-02/7099) kisiat ziaka a bawl laitak  uh  tuak kha in mankhia uhi. Amau gari number kitheihlouhna dingin solid tape vom  belhkhum uh hi’n leng kigen hi.

R-Day Run :Mini Marathon 2014

Lamka, Jan-20: Dist Admn saina in Jan 25, 2014 zingsang dak 7:30 in Repulic Day Run-Mini Marathon 2014 om ding a, category 2 in kikhen hi. Category I- Open (kum 45tunglam) leh (kum 45 nuailam) hiding a, caterogy II-DLO walking Walk hiding hi. Kidemna  atelding teng Tuibuong Peace ground a kipankhia inTuibuong Road-Rengkai Road- Rengkai Bible Hills- Sim Veng- Saikham road, New Lamka-College road, New Lamka-Tedim road- Dorcas road, New Lamka-Bungmual-Phailian-Chengkon-Hill Town tawn in Lamka Public Ground ah zou ding uhi. Caterogy 1 (45 yrs above & 45 yrs below) ah kipahman a tuamtuak om ding a, 1^st Rs 5000/- 2^nd Rs 3000/- 3^rd Rs 2000/- ban ah consolation mi 10 kiang ah piak chiat hiding uhi. Huaia telnuamte’n  S.Khaikhopau Ngaihte, SDC Hq, DC’s office; Lunkhosei Haokip, DYASO/CCpur leh H.Doungel, DYC, NYK/CCpur kiang ah Jan 24, 2014 tan office kaihun sungin registration bawltheih ding hi.  (Alemchanna mun akipan page 4na a zop ding chih koih ding)

BSI-RSETI Local Advisory Committee

Lamka, Jan-20: Maniram Sharma, IAS,Addl DC makaih in tuni sun dak 12:00 apan New Lamka a Sauliim Restaurant ah SBI-Rural Self Employment Training Institute (SBI-RSETI) a Local Advisory Committee meeting om hi. Huai ah kum 1 sunga nasepkhiakte enkhawm uh a, kum 2014-15 Budget & Annual Action Plan approved bawl uhi. Huai lak ah 32vei training sai in  mi 820 sinsak ding, BPL card neite deihsakna piak ding chih telkha hi. (Aban page 4na ah)

Huai ban ah tulela SBI-RSETI in office building a neihlouh ziakin Pearsonmun a SBI-RSETI building kibawllel zawhsiang ahih masiah  office luahding thu DC in ngaihtuahsak din thupuk uh a, Pearsonmun a SBI-RSETI building kibawl  akinlam a zawh deihthu genkhawm uhi.

Contingent 31 vel parade ah tel ding

Lamka, Jan-20: Lamka Public Ground ah Jan 26,2014 zinglam dak 8:00 apan Dist Level Republic Day 2014 lopna om ding a, huai ah contingent tuamtuam 31 vel parade a telding uh hi’n  kigen a, tuni tanin participent list submit team 24 om hi’n kigen hi. Parade atel ding contingent tengin  Jan 23 & 24, 2014 zingsang dak 7:00 in  Lamka Public Ground ah parade rehearsal neiding uhi.

Ni 5 sung daihding training kipan

Lamka, Jan-20: Directorate of Civil Defence, Govt of Manipur saina in tuni’n Dist Hospital a Medl Suptd Conference Hall ah '5 Days Disaster Management Training on Search & Rescue/First Aid’  kipan a, Med Supdt leh CMO staff-te tel uhi. Training ah Ayub Khan, Staff Officer (Training.) Relief & Disaster Management, Govt of India makaih in Subash Chandra Singh, Sr Instructor; Budha Chandra Singh, Sr Instructor; V.Pumsiam, Sr Instructor, leh Raisi Leo, Jr Instructor te'n sinsak uhi.

Medical camp adi’n kuankhia

Lamka, Jan-20:Dr. H.L. Liensang, CMO/CCpur makaih in Dr T.Hatzaw leh Dr Melory te'n tuni'n Vaingai area zuan uh a, Phailienthang, Khangbol leh Patpuihmun khua a Medical Camp ah telding uhi. CMO in a phakna teng ah CHC, PHC leh PHSC omte  inspection bawl ding a, Jan 25, 2014 velin Lamka hong tungkik nawn ding uh hi'n kigen hi.

Numei pawlte   thumkhawm uh

Lamka, Jan-20: New Lamka Area Numei pawlin khawpi sunga sualna tuamtuam, khamtheih leh guihtheihte  doudalna in Pathian kiangah thumna neikhawm zel uh a, tuni’n leng ECCC Hebron New Lamka ah thumkhawm uhi.New Lamka area Numei pawl in khamtheih guihtheih zuaktute kisik a, Pathian lam a kiknawn ding leh a thilhih hoihloute a tawpsan theihna ding un  Pathian kiangah thumpih zel uhi.

Ticket Counter & Parking  kisuan 

Lamka, Jan-20: CCpur-Imphal Taxi Owner Society (CITOS) nuai a CCpur-Imphal kikala Tata Winger Service te’n Imphal a New Lambulane ah ticket counter & parking mun di zang mahle uh passenger-te’ adia lemchang zawding khualna in a khangzek a Checkon’ Traffic Post bul ah kisuan uh a, passenger-te’n huai mun ah gari naihtheih ding chi’n CITOS apan thusuak om hi.

Police-te’n Jail ah koih uh

Lamka, Jan-20:7-Assam Rifles te’n Chiengkonpang a Phalam Road ah January 14, 2014 zinglam in KNF (S) Dy. Defence Secy len Bruce Thangneo (30) s/o Pakam Thadou of Tuinom/CCpur  a matkhiak  uh tuni’n CJM court ah dingsak uh a, court in Judicial Custody (Jail) a omdi’n thutan khum a, Police te’n Jail ah koih uhi. 

Tuahsiat ziakin liam

Lamka, Jan-20: Thanglal(30) s/o Vumkholal of Koite zan nitakin a lawmpa tawh kipua  a Bike a tailai Khomoi ah gari dang a pelhna lam un accident uh a,  Thanglal amai lak hahliam sim in Hospital ah admit in om hi. Huailou in Ms. Singpui (43) w/o Lalhawnglien of Hmar Veng in Activa a tailai electric post phukha in liam a, dist. hospital puaktung nungin RIMS a etkol din refered in om hi. 

IMPHAL NEWS

Manipur Governor akipan message   

Imphal, Jan-20:Governor  Manipur VK Duggal in Manipur in State piching a ngahni January 21, 2014 ziakin Manipur mipite deihsakna thuchah(message) thon hi. Manipur Governor in a gendan in Manipur in January 21, 1972 in state piching ngah a, huai tungtawn in mipite lunggulh leh duhthusam tangtung hi’n gen a, huai tungtawn in Manipur ah lam tuamtuam ah masawnna leh khantouhna ngah a, Centre a plan allocation tungtawn in hamphatna leh phattuamna lianpi leng mu hi’n taklang hi.

DGP in mipite’kithuahpihna ngen  

Imphal, Jan-20: Shahid Ahmed,IPS, Director General of Police(DGP) Manipur in January 26, 2014 a Republic Day lopna ding tawh kisai in muanna leh bitna(law & order) dinmun a siatlouhna dingin mipite akipan kithuahpihna ngen hi.DGP in tuni’n Police HQ ah media person khenkhat tawh a kimuhna hun uah hibang ngetna a bawl ahi hi. Kuahiam ginlelh-huai a gamtang mukha kuapeuh  in kintaka police theisak dingin ngen a, phone no. 100 (City police Control Room); 2450214 (Imphal West Control Room) leh  2452669 (Imphal East Control Room) tungtawn in police-te contact theih hidin leng gen hi.Corruption a kigolh  Police personnel-te tungah action lak geihgeih ahih ziakin Police force lakah  corruption kiamsawt mahmah hi’n leng gen hi. 

.

KIM in Kuki Inpi/CCpur phiat   

Imphal, Jan-20:Kuki Inpi/CCpur hun(term) a beitak ziakin phiat(dissolved) a om hi’n Kuki Inpi Manipur(KIM) akipan thusuak in gen a, Office Bearer thak tel ahihma former President Totong Haikip in Care-taker dan in pawtou phot ding chihthu om hi.  KIM in Election Commission kiangah Kuki Inpi/CCpur vaipaw thak ding telna dinga vaisai ding in leng theisak chi’n thusuak in gen hi. 

Dakkal 12 sung Shut down puang 

Imphal, Jan-20: United Naga Council (UNC) Naga mite tenna district HQ teng ah June 23, 2013 a Rally om dia a puan cancelled thak in January 23, 2014 in Naga mite tenna district HQ teng ah zingsang dak 6.00 akipan nitaklam dak 6.00 tan dakkal 12 sung ‘Total Shut down’ om ding chi’n puang uhi. UNC in Joint Secretary, NE, Ministry of Home Affairs kampau lungkimlouh ziakin hibang thupuan bawl uh hi’n kigen a, UNC in Republic Day boycott hilou in Naga mite a lungkimlouh ziakua Republic Day lopna a tellou ding chih hizaw hi’n leng hilhchian uhi. UNC in Total Shut Down kuapeuh in tangtungsak chiat dinga puang kawm in a bawhsia a om leh huaite amawh kipuak ding uh chi’n puang uhi.

21^st State Level Sub-Jr and Jr

Kick Boxing Championship

Imphal, Jan-20: Kick Boxing Training School, Sekta te’n All Manipur Kick Boxing Assn akipan  huhna zangin January 22-24, 2014 sung of Sekta Mayai Leikai Community Hall ah ‘ 21^st State Level Sub-junior and Junior Kick Boxing Championship’ sai ding uh hi’n kigen hi.  State level kick boxing championship kidemna ahihleh Australia gam Innsbruck a Olympic Hall ah April 10-15, 1024 sung WAKO World Cup Austrian Classics 2014  a telding telkhiakna hidin kigen hi. State Level Championship a player telkhiaka omte Feb 13-17, 2014 sung Pune a National Championship ah tel ding uh a, national level a telkhiakte WAKO World Cup Austrian Classics 2014 ah tel ding uhi. Huai ah team 20 akipan player 400 tel ding uhi.

Post-Matric Scholarship

Imphal, Jan-20: Academic session 2012-2013 a  Post-Matric Scholarship ngah ding Minorities student-te list puankhiak hita a, Directorate of Minorities, Other Backward Classes & SC office, North AOC Imphal a Notice Board ah kitakkhia hi. Huai a telkha student-te’n official website www.mobcmanipur.gov.in tungtawn in prescribed authorisation format downloaded theih ding a, huchi ahihkei leleng Directorate akipan in collect theih ding hi.Huai kimtaka fill-up zawh in  account honna bank official te’n verification leh countersigned a bawl nung un Directorate of Minorities, Other Backward Classes & SC office ah January 31, 2014 tan in submit ngai ding hi.

Forest areas a ST te’n MGNREGA  

nasepna hun ni 150 tan ngah ding

New Delhi,Jan-20:Ministry of Rural Development in forest areas a om Scheduled Tribe(ST) innkuante’n MGNREGA nasepna ding ni 150 tan ngah ding uh hi’n akisaipihte thupia hi.  MGNREGA dungzui in ni 100 tan nasep ding bikhiah  himahleh huai banah ni 50 dang lawh(wages) piaka na sepna ding Forest Rights Act, FRA (2006) nuaia patta neite leng huamkha ding hi.Huailou in ni 150 tan nasem thei ding forest area a ST innkuante leh Forest Rights Act,23006  dungzui a patta neite adin nasep ding a thak leng guan behlap hi a, agriculture tawh kisai banah durable quality assets leh ST/SC-te’ socio-economic condition improve sakna ding leng telsak hiding hi.  Jharkhand, Odisha, Chhattisgarh leh  Andhra Pradesh a mi 8,00,000 valte’n scheme thak phattuampih ding uhi.  .

Manipur in electric mei a ngahdan   

Date: 20/01/14  Time:t 17:44:30

State          Schedule    Drawal  Deviation

 Manipur      87.3            81.8      -5.5 

NATIONAL NEWS:

Dr Jamir’ pianna anu kum 90 ching

Dimapur, Jan-20: Nagaland Chief Minister lui banah Maharashtra leh Goa Governor lui Dr SC Jamir pianna nu Takatula w/o (late) Senayangba Jamir of Ungma village tuni in kum 100 in upata hi. Takatula in kum 100 mel amuhna hunah Nagaland state sung chauhlouh in leng India gamsung mun tuamtuam apan Jamir te innkuan deihsaktu tamtak telua, internet tungtawn in leng kipahpihna message tamtak ngah uh chih ahi. Kum 100 chinna birthday lopna hunah Takatula ta 7 te telkim vek ua, atapa upa pen Governor of Odisha Dr. S.C Jamir banah a tu mi 31, a tusawn mi 49 te leng kimtakin telthei ua, Nagaland state sunga birthday lopna hun apipen pawl ahi chi uhi. Pi Takatula ahihleh tu in kum 100 hial phamah leh a khuak hiam mahmah lai a, amit hah afiah banah, azakna bil leng hoih mahmah lai chih ahi. Spect bunlou in leng tunitanin Bible sim theilai chih hi a, Dr. S.C Jamir in a Nu pe’n Nu chituam ahihdan taklang a, anule pa’ hahkatna ziaka hiai tan tung uh ahihdan taklang hi.

Haryana accident ah mi 9 si

Chandigarh, Jan-20: Haryana’ Fatehabad district ah tu zingkal in car khat leh truck khat kiphutuah kha in huai ah nauapng 5 leh numei 2 telin mi 9 in sihna tuak hi. Police ten agendanun, thiltunna mun ahihleh Chandigarh apan km 300 velding a gamla Gilla Khera village mun hi a, kintakin damdawi inn tut vek himahle uh lamkal ah si man uh chi uhi. Tu zingkal in Gilla Khera munah vuuk naktak a a kiat banah meizun a sah mahmah ziakin gari kimutuahlou a, lampi hoihna mun tak ahih zawk mah ziakin gari te a haat tai tuak sim ziak ua hiai bang tung hiding chi uhi.

TN ah Minister-lui Saminathan man

Chennai, Jan-20: Tamil Nadu police te’n tu zingkalin DMK minister lui M.P. Saminathan kichi nekguk-takgukna tawh kisai case om ziakin man uhi. Mat a om ahihleh Saminathan hi a, highways minister lui leng hi a, DMK government hun lai in sum hunkhop thelthangsak ahi chi uhi. Amah ahihleh tu zingkal in Chennai apan km 400 vel a gamla Tirupur a atenna inn ah police ten a va matkhiak uh ahi hi. AIADMK te’n May 2011 apan vaihawmna len ua, tuni tanin DMK minister leh senior leader hunkhop nekgukna tawh kisai in jail ah khumlut ta uhi. Tuni tan a minister mat leh jail a koihlut a omte ahihleh, K. Ponmudi, K.N. Nehru, Veerapandi Arumugham leh mi tuamtuam hi a, government in DMK government hun a nekgukna omte suitu dingin special cell kichi dinkhe hial uhi. Tu in nekgukna case mah ziakin deputy chief minister lui M.K. Stalin leh atapa Udayanidhi Stalin tung ah leng police ten case khat tuak chiamteh uhi.