Manipur Express | January 26, 2014

HEADLINES:  Lamka a lopna ah DC/CCpur  khuallian hiding

Governor in Kangla a Republic Day lopna uap ding

Imphal, January-25: Republic Day 64veina January 26, 2-014 zinglam dak 8.00 akipan in Kangla ah state level a lopna om ding a, huai ah Manipur Governor  Vinod Kumar Duggal khuallian in pang ding a,March Past atel contingent tuamtuamte akipan in salute la ding hi.Huaizawh sawtlou nungin Chief Minister O. Ibobi in 1^st Bn Manipur Rifles Parade Ground ah March Past a telte lakah kipahthu genna hun zang ding hi.Lamka Public Ground ah leng zinglam dak 8.00 in programme kipan ding a,Ms Jacintha Lazarus,IAS, DC/Ccpur khuallian a pang in India flag a kaihpalh banah March Past apai contingent-te akipan in salute la ding hi.

        Kangla a Republic Day lopna ah slating base ah zinglam dak 8.00 in Governor tung ding a,aman Guard of Honour inspection a bawl banah National Flag kaipalh ding a,huchi’n Manipur Rifles band te’n National Anthem play ding uhi. Huaizawh in award tuamytuam hawmkhiakna leh March Past om ding a, huchi’n Chief Guest in huaimun nuse ding hi.

       1^st M/R Parade Ground ah zinglam dak 11.00 in ‘Vote of Thanks’ ceremony om ding a,Chief Minister O. Ibobi in March Past atel contingent-te tungah kipahthu gen ding hi. Republic Day lopni mah nitaklam dak 3.00 in  Governor

in Raj Bhavan ah Republic Day tawh kisai in Reception programme bawl ding hi. Republic Day lopna hunkhakna kawm in  January 27, 2014 sunnung dak 1.30 in 1^st Bn M/R Parade Ground ah Folk Dance Festival leh Beating the Retreat om ding hi. Huai ah dance competition, prize leh award tuamtuam hawmkhiakna banah Band display  om ding a,hunkhakna(beating thr retreat) zawh phet nitaklam dak 4.50 in Chief Guest in huaimun nuse ding a, huchi’n programme zawh hiding hi.

     Tutung in leng kumdang bangin Northeast a helpawl tuamtuam in India Republic Day pomlou in boycott leh general strike puankhum uh a, huaiziakin adiakin Imphal khawpi leh Manipur a district HQ tengah security khauh mahmah hi.Manipur a helpawl tuamtuam kigawm CorCom banah HNLC, KLO,NDFB,NLFT leh ULFA(Ind) pawlin boycott  puang uh a, January 26, 2014 zinglam dak 1.00 akipan nitaklam dak 5.00 tan General strike puang uhi. Manipur a helpawl URF pawlin leng boycott puangkhawm in January 26, 2014 zinglam dak 12.00 akipan nitaklam dak 5.00 tan Manipur pumpi ah bandh puang uh a, Maoist Community Party pawlin leng boycott puang uh a, Republic Day lopna ah kuamah tellou ding in theisak uhi. 

Republic Day Programme

Venue : CCpur Public Ground

Ms Jacintha Lazarus,IAS, DC/CCpur will

will unfurl the National Flag and take the salute

08:00AM   Assembly of Contingents

08:30AM   Arrival of Chief Guest

08:32AM   Inspection of Parade

08:35AM   Unfurling of National Flag

08:45AM    March Past

09:05AM   Address by the Chief Guest

09:10AM Tableau display

09:20AM   Inspection of the Stalls

09:25AM   Cultural Display

09:55AM   Presentation by BSF

10:00AM   Presentation of Prizes & Awards

The 3^rd State Level Tribal Cultural Festival om ding

Imphal, January-24: Tribal Research Institute,Manipur in Manipur govt leh Ministry of Tribal Affairs, Govt of India akipan kithuahpihna zangin January 27-29, 2014 sung Chingmeirong a Tribal Research Institute Auditorium ah ‘Culture for Peace and Harmony’ chih thupi a zangin ‘The 3rd State Level Tribal Cultural Festival’ om ding hi. January 27, 2014 zinglam dak 9.00 in Cultural Festival kipatna(inaugural) function om ding a,Chief Guest in Manipur Chief Minister O. Ibobi pang ding hi.Huai ah Functional President-cum-Host  in IFCD Minister Ngamthang Haokip pang ding a, Guests of Honour in Victor Keishing,Parliamentary Secretary(Tribal Affirs & Hills) leh Vungzagin Valte,Parliamentary Secretary(Hort & CADA) pang ding uhi.

         Hun patna kikhopna ah MBC choir akipan lapawl ngaihkhiakna om masa ding a, huaizawh in  PC Lawmkunga,IAS, Chief Secretary in welcome address & key note address gen ding a, huchi’n  Chief Guest in ‘3rd State Level Tribal Cultural Festival’ hong ding hi.Guests of Honour 2te leh Functional President in thu a genkhit in Chief Minister akipan thugen ngaihkhiakna om ding hi.Maram folk song ngaihkhiakna, Liangmai Cultural dance(choreography),Paite Cultural Dance(zangta lam),Hmar bamboo dance(CCpur), Poumai Cultural dance(Senapati),Koireng cultural dance, Naga trumpet,Tribal wresting(Poumai) leh Kabui cultural troupe  akipan cultural item tuamtuam lahna om ding hi.

       Programme ni 2na January 28,2014 zinglam dak 9.00 a kikhopna ah Chief Guest in Health Minister Phungzathang Tonsing pang ding hi.Huai ah Functional President in RD & PR Minister Francis Ngajokpa pang ding a,Guest of Honour in Hill Areas Committee a Vice Chairman Z. Kikhonbou Newmai pang ding hi.Hun masalam ah Lunminthang Haokip,IAS, Director of Tribal Affairs & Hills in vaidawnna thugen ding hi.Khualliante akipan thugen ngaihkhiakna a om banah Thangal folk song(tumnoupokpi),Rawung Mapum(tangkhul), Maring dance,Thadou Cultural dance Troupe(Khenyang),Chothe Chumbang  Youth Cultural dance, Kharam war dance(Napii lam),Cultural Indigenous song(artist), Monsang cultural dance,Rongmei folk dance, Tangkhul cultural,teinem(Ukhrul), Kom cultural dance, Anal cultural dance,Mizo cultural dance(CCpur)banah hun khakna din RNBA Choir,Imphal akipan apawl ngaihkhiak hiding hi.

       Hun tawpni a ni 3ni January 29, 2014 zinglam dak 9.00 a programme zatna ah Chief Guest in Deputy Chief Minister Gaikhangam pang ding hi.  Huai ah Functional President in Dr Chaltonlien Amo, Chairman, Hill Areas Committee(HAC) pang ding a, Guests of Honour in MK Preshaw Shimray, Dy Speaker , Manipur Assembly leh T. Manga Vaiphei, Chairman/MTDC pang ding uhi. Hun patna ah  EBC Choir(Paite)  akipan lapawl  ngaihkhiak zawh in SK Dev Verman,IAS, Principal Secy(Tribal Affairs & Hills) akipan key note address genna om ding hi. Khualliante apan thugen ngaihkhiak ahih banah Moyon folk song, Zemei Folk song,Vaiphei Cultural Troupe(Leilon Vaiphei), Saa Lu lam(Taphou Kuki), Liangmei Folk Dance, Khurkom lam(Molem Youth Club),Mao dance, Hip-Hop in traditional attire, Mizo Cultural dance(Centre Lamka), Simte Cultural dance(Simveng Ccpur)leh  Zou Cultural dance pawla kipan cultural item tuamtuam lahna om ding hi.

     Tukum a Tribal Cultural Festival a kikhopna tengah singtangmi MLA, ADC Chairman-te,EM leh ADC member teng Special invitees hiding uh a, programme tawp-hun tengah thumna(prayar) tawh hunkhak gige hiding a,kikhopna om zawh tengin mipi ankuang umkhawmna om  zel ding hi.

DC in Dist website hongkhia   

Lamka, Jan-25: Ms.Jacintha Lazarus, IAS, DC/CCpur in tuni sunnung dak 1:30 in ama’ office chamber ah CCpur  website thak www.ccpurdistrict.com  hong hi. Aman agenna ah kum 15 vel paisa in CCpur website hon himahleh deihbang in a function louh ziakin tuni’n  honthak a om hi’n gen hi. Aman a genzelna ah mipite’n information baihlam tak a a muhtheihna ding un Dist Level Officer te’n deptt tungtawn a issue leh scheme (social issues) omte mipi theihdin  akintheilam in website a upload zel dingin theisak hi. Act tuamtuamte maban a hongtung ding leh hongtungzel ding omta ahihziak in dept  te’n  tuate lungsim a thei kawm a, bangmah selguk omlou in mipi theih dinga information  update touzel din theisak hi.

Tedim Rd ah bomb 1 muh hinawn   

Lamka, Jan-25: Tedim road a  Torbung Bangla leh S.Kotlian  kikal a lampi nawl ah tuzing baihtak dak 3:30 velin 54-Bn BSF patrolling paite’n leikawm a kiphum IED bomb mukhia uh a, Police leh Army-te  theisak uhi. SP/CCpur, OC/CCpur ban ah SDPO/Bishnupur te’n khawvakma in delh  uh a,  Ningthoukhong a om 54-Bn BSF CO in leng bomb kimuhkhiatna mun pha hi.

     OC/CCpur makaih in Police te’n lam gei a IED bomb kiphum gua bamboo) zangin kaihkhiat sawm mahle uh bomb koihna bag kitan in lakhe theilou uhi. Army te’n Leimakhong a 57-Mountain Divn munpi theisak uh a, huai akipan bomb expert 2 hong kuan in zinglam dak 10:20 velin hihsia hi. Army leh BSF te’n  zan a mun 2 ah IED bomb kimukhiate  leh tuni a kibang hi’n gen uh a, kuate hiam in remote  control a hihpuak sawm uh hidin ginthu gen uh a, IED bomb pen kg 8-10 vel a gik hi’n gen uhi.Bomb om ahihdan theih phetin Police leh Army te’n kidelh huan in  gari taite khawlsak uh a, Torbung leh S.Kotlian khua  pelhna  lampi  om zuisak uhi.

ZoRO Conference-cum-Commemoration

Lamka, Jan-25: Zo Re-Unification Orgn (ZoRO) inntekna in Jan 29, 2014 in Sadar Hills ah Saikul khua ah ‘ZoRO Conference-cum-Commemoration of the 122th Anniversary of 1892 Fort William (Chin-Lushai) Conference’  kichi om ding hi. Huai ah Chief Guest in R.Thangmawia, President ZoRO Gen HQ  hiding a, Yamthang Haokip, MLA, Saikul A/C in Commemoration stone hongkhe ding a, Haokholal Hangsing, Chairman,ADC Kanggui, Sadar Hills in Souvenir hong ding hi. Chief Guest banah  Thangsei Haokip, President Kuki Inpi Manipur leh  Chin, Tripura, Kachin & Assam state akipan  delegate tuamtuamte apan  thugen ngaihkhiatna leh  cultural program omding hi.

Gloria’ Album thak hon hiding

Lamka, Jan-25: Zenhang Lamka a om Zomi Legend Singer’ Ms Lianlunching leh social worker Khamkhopau Valte @ VK Joshua tanu upa pe’n singer Gloria Chiinlianniang in music video album a bawlthak “NANG KON MUANG” chih Republic Day (Jan 26, 2014) sunnung dak 1:00 in Hiangtam Lamka’ Community Hall ah V. Khaikhanmung MDC in hong ding a, Pastor MT Khanlal in Pathian min in laan ding hi.  Album thak honnah  Gloria apan Pathian la ngaihkhiak ahih ding banah anu Ms Lianlunching in leng thugen ding hi. Lianlunching leh a innkuante’n huai hun uapding in kuapeuh chial hi.

Lamka-Sugnu road black-top hiding

Lamka, Jan-25: Sangaikot leh Sugnu lampi kise mahmah a, bialtu MLA in blacktop a bawl  hiding in gen hi. Sangaikot TD Block a Songpeh khua a SSA Hall ah ‘Songpeh Youth Club(SYC) 40th Anniversary & Anniversary Stone Inauguration’ programme   a Chief Guest  Ginsuanhau, MLA(Singngat) in  a genna ah Sangaikot-Sugnu road pen March-April,2014  vel a blacktopping kibawl ding hi’n gen a, Sangaikot a 11-KV Power Station pen March 2014 tan in  honkhiak  hiding chi hi.  Huailou in Sangaikot BDO office leng SDO office in upgrade hiding a, Police station telin thil 3 honkhiak hiding chi hi.

KSO/CCpur te’n  Leimatak Unit  veh

Lamka, Jan-25: KSO CCpur  a President Lalkhohao makaih in KSO/CCpur block Level Co-ordination Program tungtawn in KSO/CCpur  makai mi 7 in tuni’n Henglep block a KSO Leimatak Unit veh in kum 2014-16 sung vaipaw ding election neihpih uhi. Huai ah President din Dongkhokai; Vice President din Lunkholal Haokip; Gen Secy din Satkholen; Education Secy din Satngal Doungel; Secy Finance din Kamlalsuong Gangte leh Secy Games & Sports hin Henry Lalcha Kipgen ching uhi.

Tuni’n One Day Seminar  om

Lamka, Jan-25: Zomi Colony a Chinkham Modern School ah tuni  in Khamlianlal, Student worker saina in “Youth and Addiction” leh “Early Marriage” chi thupi zangin ‘One Day Seminar’ om a,  Chinkham Modern School apan outgoing student mi 70 vel tel uhi. Seminar  ah Khamlianlal in addiction-te atangpi in stress, lunggim ziak, lawmte tungtawn a thil tuamtuam theih utna, early marriage ahihkei leh siamsinna taksap ziak , nu-le-pa ban ah lawmte apan pressure omziak ban ah innsung thilte ziak hideuh in  gen hi.

CMO teamte hongtung

Lamka, Jan-25: Dr HL Liensang, CMO/CCpur; Dr T.Hatzaw; Dr Merory leh Dr. Irabot te’n Jan 20, 2014 in  Vangai area vapha uh a, amau zan nitak in hongtung kiknawn uhi. CMO teamte’n khua 34 pha uh  a, Phaikholien, Khambol leh Phailenthang khua ah Free Medical Camp nei uhi. Huai ah damlou  mi 1000 vel en  in damdoi manbei in pia uh a, damloute lak ah a tamzaw sunghatlou leh sungna hi’n gen uhi.

Electric meivak hoih nawnta

Lamka, Jan-25: Electrictity  department in Saidan khawkiang a electric post kisiatna abawl zawh utawh kiton in zan akipan Lamka khawpi ah electric meivak ngeina bang in hoih nawnta hi. Electric kisiat sungin mipite leh exam ding student te’n haksatna lianpi tuak uhi.

Guta khat mat in om

Lamka, Jan-25: YPA Khominthang Unit in meihol(charcoal) guk sawmlai pasal khat mankhia uhi. Amah Khuptinpau(21) s/o (late) Ginkhankhual of  T Khajang( Singngat Sub- divn) hi a, tuni zingsang dak  5.00 velin  Khominthang tawn a lampi a a pailai in  innkhat a meihol om mu in guksawm hi’n kigen hi.  YPA Khominthang Unit makaite’n thuhilhna a neihlai un Bungmual a om hi’n a kipuan ziakin  YPA Bungmual Unit kianga piakkhiak hi a,  Bungmual khawsungmi ahihlouh ziakin YPA Bungmual Unit in leng thuhilhna nei uhi. 

Express office kikhak ding

Republic Day ziakin National paper-te tanpha Jan 26, 2014 in khawlvek ding uh a, Manipur Express office leng January 26, 2014 in kikhak ding hi. Huaiziakin January 27, 2014 issue hong suaklou ding hi.

IMPHAL NEWS

Governor in Voters Day zatna uap

Imphal, Jan-25 : Palace gate  a  MFDC Auditorium ah tuni’n 4^th National Voters’ Day zatna om a, huai ah Manipur Governor VK Duggal khuallian a pang in uap hi. Governor in a thugenna ah Manipur ah hun paisate etin election om hun ah voter tamtakin vote khia uh a, huai thilhoih leh kipahhuai hi’n gen hi.Election a vote khiak kichi mipi vaihawmna govt ah thupukna bawlna thupipen hi’n leng gen hi.Mipi tamtheipen in election hun ah mahni vote chiat khia in mipi sika vaihawmtu ding mihoih telkhiak poimawh ahihdan leng Governor in gen a, tunung a gam vaihawm ding khangthakte leng vote nei ahihdungzui un zatdan siam dinga sinsak leh makaih poimawh hi’n gen hi. Governor in tukum a kipan vote neithak mi hunkhop kiangah Electoral Photo Identity Card(EPIC) pekhia hi. Tuni a hun zatna ah  Chief Secretary PC Lawmkunga,IAS ; CEO Manipur  O. Nabakishore, IAS leh mi poimawh tamtak tel uhi. 

Manipur apan mi 8 in Medal ngah ding

Imphal, Jan-25: Tukum a Republic Day lopna hun tawh kiton in Manipur Police 6 leh Fire Service 2 in Medal ngah ding uh chihthu om hi.Indian Police Medl for Meritorious Service ngah ding mi 6 anuai abang  hi uhi. 

1.Dr S. Ibocha Singh,DIG of Police

2.K. Pukeho Mao,SDPO/Phugyar

3.Insp. L. Amarnath Sharma,CID(SB)  

4.K. Ganglaona Kabui,SI, CDI(SB)

5.Hav Ksh. Rajen Singh, 1^st Bn M/R

Huailou in Manipur Fire Service akipan 2 in President’s  Fire Service Medal for Meritorious Service ngah ding uhi. Huai mi 2te

1.Sub-Officer Kh. Babu Singh

2.Leading Fireman K. Peter Tangkhul

Imphal ah security hihkhauh in om

Imphal, Jan-25 : Republic Day lopna Jan. 26, 2014 a om ding tawh kisai in  helpawl tuamtuam in boycott  leh general strikes a puan ziak un Manipur govt in buaina omlou a Republic Day zat ahih deihna ziakin Imphal khawpi leh akimlak mun tuamtuam ah ni bangzahhiam paisa akipan in Police te’n combing operation bawl sek uh a, khawpi sung ah leng kitatsatlou in Police-te patrolling pai uhi. Imphal khawpi police commando-te banah numei police tamtak duty uh a, gari neu a pai vialte check bawl zel uhi. Tuni akipan in Imphal khawpi sungah hun paisa sangin security nasataka hihkhauh in om hi. 

Governor leh CM akipan message

Imphal, Jan-25: Manipur Governor VK Duggal leh Chief Minister O. Ibobi in India in Republic ahih kum 65 chin tawh kisai in Manipur mipie deihsakna thuchah(message) puang uhi.  Governor in a gendan in Republic Day tungtawn in  India in eimah  ki-etkolna(Constitution) tuam nei a  kivaihawmna neih manpha ahihdan taklang hi’n gen hi. Chief Minister O. Ibobi in leng Republic Day tungtawn in Manipur mipite lakah kituahna leh pankhawmna hoihsem a om deihthu taklang kawmin Manipur gam masawn leh khangtou hat sem hidinga deihthu puang hi. Dy Chief Minister Gaikhangam leh Assembly Speaker Th. Lokeshware in leng Manipur mipite deihsakna thupuan bawl uhi.

A/R te’n UNLF cadres apan  galvan  mukhia

Imphal, Jan-25 : 30-Assam Rifles leh Imphal East District Police kithuah combined team in  zan  a operation a neihkhawmna uah UNLF cadres 1 leh akithuahpih mi 5 mankhia uhi. Thusuak in a gendan in combined team in Nongren village  ah UNLF cadre SS Major Yumlembam Milan @ Kanglesembam  mankhia ua, huaizawh in Itham Mamang Leikai, Sekta Mamang Leikai leh Khundrakpam Awang Leikai mun ah   UNLF a overground mi 5 mankhia uh chihthu om hi. Thusuak in a gendan in combined team in huaite akipan in AK-56 rifles 2, 9mm pistol 1, .39 colt pistol (US Made) 1, AK-56 tang 60, 9mm pistol tang 5, mobile phone 2 leh sum Rs. 2 lakhs mukhia uhi. Mat  a omte  Lamlai Police ah pekhia  uh chih ahi hi.

DrKishan thatte tungtang

Feb 15,2014 in genfel hiding

Imphal, Jan-25:Kasom Khullen SDO hilai Dr Kishan banah amah nuaia sem Rajen Sharma leh Yumnam Token  thahna a kigolh NSCN(IM) a self-styled Lt Colonel HopesonNingshen leh amah tawh tualthat cadre khenkhat tungtang Delhi’s Patiala House a CBI Special Court Judge apang Justice VK Gupta in  thutanna a puan hunta dan in kigen mahleh amah a zinkhiak ziakin thupukna puankhiak theih hinailou a, Feb 15, 2014 a puankhiak ahih gintakhuai chihthu om hi.

Nupi pawlte Kangla ah kiphinna uh

Imphal, Jan-25 : Manipur akipan  Armed Forces Special Powers Act (AFSPA) lak khiak ding phutna in tuni’n nupi pawl tuamtuam  Kangla mun ah kiphin uhi. Huai hun ah amau kum 2006 in  Prime Minister Dr. Manmohan Singh in Manipur akipan  AFSPA lakkhiak ding in gen mahleh tunitan lakkhiak hilou ahihdan tangkoupih uhi. Maban a Lok Sabha election om ding himahleh tuni tan in  political leaders tuamtuam in  hiai thu genkha nailou uh a, huai in leng nupi pawlte thangpaisak mahmah ahihdan gen uhi.Nupi pawlin political party tuamtuam leng mawhsak in  Manipur ah  AFSPA koih hoihsa uh hidan in ngawh uhi.

NATIONAL NEWS:

Assam ah UG te’n Rs 23 crore khonkhia

Guwahati, Jan -25: Assam state sungah hiamgamna tawh kisai niamkiak deuha theih himahleh, kum paisa 2013 sungin helpawlte’n a sum khonkhiak teng uh a tangpi in Rs 23 crore kimlak tungzou chi ua, huai kawmkawm in 2013 sung mah in helpawl 39 leh mi nautang (civilian) 17 thah in om chi uhi.

Security agency tuamtuam apan kikaikhawm danin, kumlui 2013 sunga helpawlte’n nautang lak ah thagum a a sum kaihkhawm teng uh Rs 23 crore vel tungban dia tuat hi a, hiai sang in leng sangzaw mahmah thei chi uhi. Paresh Baruah makaih United Liberation Front of Asom (ULFA) pawlin tam khonkhe pen ding ua gintak hi a, amau khut ah sum lut sang mahmah chih ahi. ULFA anti-talks faction a Commander in Chief Paresh Baruah in ama mimal adi liauliau in Guwahati a sum dawng lian mahmah te apan in Rs 80 lakhs val dongkhia chih thu om a, ahihziakin amau pawl apan dawnna bangmah muh hinailou a, ngak hitadih hi.

Hibangkalah, 2013 sung mah in Assam state sung mah ah helpawlte tawh kisai in buaina mun 111 ah om a, huai ah helpawl member 39 leh mi nautang 17 in sihna tuak chi uhi. Helpawlte’ khut ah security personnel 8 in sihna tuak a, helpawl cadre 987 matkhiak in om chi uhi. Galvan chi tuamtuam 300 val mat hi a, thautang 10321 mat ahih banah, puakthei chi tuamtuam 131 leh grenades 130  muhkhiakin om chi uhi. ADGP (Law and Order) AP Rawat in agendanin, 2013 sung mah in helpawlte apan a sum hul in Rs 3 crore muhkhiakin om chi hi. Galvan tamzaw Dimapur apan hong lut ahihdan leng suikhiakin om chi’n Rawat in gen hi.

National Voters' Day kizang

New Delhi, Jan -25: Tuni in India gamsung pumpi ah National Voters’ Day zatna om hi. Hiai Ni in a tuppipen ahihleh electoral process ah mipi tamzaw a kihel ding uh deihna ahih banah kum 18 pha peuhmah in vote khethei ding a, amin uh voter list ah akhum lut ngeingei ding  uh chihte awareness program nasatak om hi. Election Commission thusuakin tuni a gendanin, 4^th National Voters’ Day tuni in zat hi a, zanzek apan enrolment drive neih ahihnung in mi 2.32 crore bangin a min uh hon khumlut uh chi uhi. Huai teng lak ah voter 93 lakh te kum 18 apan 19 kikal mi ngen ahi chi uhi. Indian Railways, Rural Development Ministry leh school/ college tuamtuam te’n mimal vote, mimal thuneihna ahi chih tungtang naktakin campaign bawl uh hi’n kigen hi.

UP's laptop scheme vualzawlna hiding

Lucknow, Jan- 25: Uttar Pradesh Chief Minister Akhilesh makaih SP government in UP state sunga sinlaite’ adia laptop scheme abawl uh computer siam hardware engineer te’ adia vualzawlna hiding in kigen a, engineer 2000 bangin sepna muhlawh ding uh ahi chi uhi. UP government in ahihleh khathak chiangin a state sung ua siamsin mi 25000 te’ kiangah a thawn in laptop peding ua, hiai pen phase masa hipan ding chi uhi. Tuabanah, state sung ah computer service centre leng 331 honkhiak behlai hiding chi uhi. Service center khat zel ah a tawmpen in engineer 5 zel koih hiding chi ua, centre hong ding company te tawh final bawl pah hiding a, laptop scheme pen engineer 2000 in hamphatpih ding chi uhi.Hibangkalah, Secondary education department Secretary Parth Sarthi Sen Sharma in district magistrate tengkiang ah scheme sepsuahna ding tawh kisai a poimawh bangkim hihfel ta dingin tuni’n theihsakna pia hi’n kigen hi.

Republic Day ding ziakin NE kigalging

Guwahati, Jan -25: India in zingchiang January 26, 2014 a Republic Day a lopna ding tawh kisai in malsuah gam ah helpawlte gamtatna omthei ding hia thuguk muh ziakin gamsung ah sepaihte pilvang ding leh kigalgingsa a omding in theihsak hita uh a, tua tawh kiton in Malsuah sial adiaka Assam, Manipur, Tripura leh Nagaland gamsung a tai train te hoihtakin etkhiakin om hi.

            Republic day sukbuai sawma helpawlten gamtatna nei dia muanmohna liantak neih ziakin Assam, Manipur, Meghalaya, Mizoram leh Tripura in BFS te kiangah India leh Bangladesh gamgi a venbitna nasazawsem ding in ngetna bawlta uh a, tuate banah Malsuah bial mun tuamtuam ah helpawlte gamtat ding lauhna ziakin paramilitary leh state security force-te tamsem duty dia sawlkhiak in omta uh hi’n nitaknung a IANS thusuak in gen hi. Helpawlte gamtat ding dalsawmna ziakin Assam, Tripura leh Nagaland state sungah train sung leh pua hoihtakin etkhiak ahi chi’n Northeast Frontier Railway (NFR) thusuak in gen a, Railway Protection Force (RPF) inleng amau panlak theihna chiang ah full-proof security vai guangta uh hi’n gen uhi.

            India malsuah biala helpawl tuamtuam United Liberation Front of Asom (ULFA), Hynniewtrep National Liberation Council (HNLC) of Meghalaya, Kamotapur Liberation Organisation (KLO), Manipur People's Liberation Front (MPLF) leh Tripura People's Democratic Front (TPDF) te’n gamsung mipite kiangah Republic Day Boycott ding in ngetna bawlta uh a tuate ziaka hiaibang panlakna om hi’n thusuak in gen hi.

            Sepaihte’n buaina aom ding venna ziakin ni bangzah hiam paita apan lenna phual, hotel, bus station, super market leh national highway-te ah etchetna nasatak in panta uh a, buaina a omlouh theih teitei nadia pan nasataka la ahihdan uh leng thusuak in taklang hi.

J&K ah galvan mankhia

Srinagar, Jan- 25: Republic Day lopna di ni 1 lel in a saplai in Jammu and Kashmir state sung ah army ten galvan hunkhop mukhia uhi. Huaite ahihleh RDX kg 3 ban ah hand grenade 5, Pak-made Anti-Personnel Mines, mortar bomb 2 leh RPG rocket 1 ahi hi. Police thusuak dan in, Kashmir valley a Baramulla leh Rajouri banah Poonch district-te a hun kibang in zan in security te’n luh uh hi’n gen uhi. State DGP Kuldeep Khoda in agenna ah, galvan kimukhete a lauhuai mahmah ngen ahihziak in, helpawlten bang tup nei uhiam chih naktak in et in om lel a, mun tuamtuam ah operation sutzop hiding chi hi.

Vualphaloute’ di’n school bus

Guwahati, Jan -25: Kamrup Metro Deputy Commissioner Ashutosh Agnoihotri in zan in Guwahati ah vualphaloute’ school kaina ding in school bus thak khat khahkhia (flagging off) a, mibanglou/vualphaloute ahihleh Shishu Sarothi kichi NGO in a etkol  uh ahi hi. DC in Shishu Sarothi te panlakna kipahpih mahmah ahihdan puang a, adiakin vualphaloute’ adia special education apiak uh gentaklouh bangchi leh amaute’n hinkhua nuamzaw sem a zangthei ding uhiam chih ngaihtuahna tawh nna asepziak uh kipahpih tham ching petmah ahi chi hi. Maban ah hibang NGO te’n vualphalou (physically and mentally disadvantaged) te’ adia panla dia mansa gige ahihdan gen a, a poimawh bangkim uah thuzak ding in leng a saitute ngen hi. Hiai school bus thak ahihleh, Axis Bank te’n apiak uh hi a, bus khahkhiakna hun ah Dipanjan Chatterjee, Senior Vice President and Circle Head, Subhra Mishra, Programme Manager, Axis Bank leh makai tamtak tel ua, Axis bank in ahihleh maban ah leng phungvuh theihna om teng ah Shishu Sarothi te thuap ding uh ahihdan gen uhi.

FOREIGN NEWS

Philippines govt leh helpawlte kilem

Manil, Jan-25: Philippines solkar in gamsung a Muslim helpawl hatpen, galvantawi 11,000 vel neitu  Moro Islamic Liberation Front tawh kum 40 val kikaptuahna aneih nung un kilem theita uh a,  minautang leh sepaih sang tamtak sihna pen in huntawp manawh ta hi’n official thusuakin gen hi. Southern Philippines ah Muslim mite khawsa deuh uh hi’n thusuakin gen a, huaibial a mipite’n Christian gam Philippines apan Muslim mite kivaihawmna tuam deih in sawt kuamtak kiphin uhi. Philippine presidential spokesman Edwin Lacierda  in  Associated Press news agency a theihsakdan in  helpawl cadre 11,000  val makaihtu Moro Islamic Liberation Front leader-te’n Kuala Lumpur ah kiginni in kihouna nei ua, kithukimna om theih ziakin peace agreement suaikai uhi.  

Hong Kong in sai hapak tamtak haltum ding

Hong Kong, Jan-25: Hong Kong  solkar in Asia gambup sunga saihapak(ivory) hoihpente lakah amatkhiakte uh 95 percent vel haltum hiding in thupuan bawlta hi.  World Wildlife Fund taklatdanin saihapak a sumdawnna thupipen ahihleh China  hita a, huaizom in Hong Kong hi a,  Hongkong solkar in 29.6 ton amatkhiakte lakah Twenty-eight tonn vel haltum dingin thupukna om ahi hi.  

Blasphemy ziakin sidi’n thutankhum

Islamabad, Jan-25: Pakistan a piang British mi khat in Prophet bang a kipuang chihthu a ngawhna atuah nung,  Rawalpindi court ah vaihawm khum hi a, Mohammed Asghar tuh sidingin thutan khum hita hi.  Amah bel Sadiqabad  ah 2010  in matkhiak hi a,  amah adia gensaktu in bel lungsim lam buaina nei mi ahihdan gen a, himahleh Pakistan ah sahkhua leh biakna tawh kisai a mawhtan peuhmah khauhtak a gawt in om zel hi’n thusuakin gen hi

======================================
 REPUBLIC DAY MARATHON RACE PHOTOS