Manipur Express | January 22, 2014

HEADLINES

CM O. Ibobi in state ngah ziaka phattuamna omte taklang

Manipur in state a ngah kum 43 chinna kizang

Imphal, Jan-21: Manipur government saina in tuni’n Imphal a Old Secretariat complex ah Manipur in state piching a ngah kum 43 chin zatna om a, Chief Guest in Deputy Chief Minister Gaikhangam pang hi. Huai hun ah Functional President in Commerce & Industries Miunister Govindas Konthoujam pang a, Guest of Honour in CAF & PD Minister M. Okendro pang hi.Chief Guest in a thugenna ah Manipur in state piching hihna ngah a mipite’n phattuamna i ngah uh kuapeuh adia kipahhuai ahi chi’n  gen a,Manipur in January 21, 1972 a state piching a ngah akipan in India gama state piching hihna ziaka hamphatna tuamtuam  ngah ahihdan gen hi. Chief Minister O. Ibobi in

Manipur in state piching a ngah kum 43 chinna hun ah mipute deihsakna thuchah(message) puangkawm in state govt in kikawmna lamlian leh lei(road & bridge) banah electric meivak leh tuisiang dawn ding kiching ngahna ding in govt in tawplou a panla ahihdan puang hi.

       Chief Minister in Manipur mipite theihdia a thuchah a bawlna ah  Manipur state piching ahih dungzui in state kivaipuakna leh vaihawmna lam ah govt adia lemchang ding in district tuamtuam 9 in kikhen a,  mipi in huai tungtawn in hampatna leh phattuamna tamtak ngah hi’n gen hi. District 9te banah sub-division,block leh zilla parishad abanban in omsawn  diudeu   hi’n gen a,huai in administrative set-up bukimsak ahihdan taklang hi.  

      CM in a genzeldan in Manipur singtanggam ah leng District Council tungtawn in kivaipuak hi a, huai in gamsung vaihawmna leh ki-etkolna lam ah jangkhaisak tuan mahmah hi’n gen hi.5 year Plan tungtawn in Centre in Manipur ah gamsung puahna ding leh project sepkhiakna ding sum tamtak hong pia a, tuni’n Khuga Project leh Singda Dam leng mipi in phattuampih hi a genkawm in Thoubal leh Dolaithabi project leng akinlama zawh ahih theihna ding in govt in panla chi’n taklang hi.

       Damtheihna lam tawh kisai(healthcare) lam ah leng district tenga g mun kilkoi(interior areas) a mihing omte tanpha in healthcare tungtawn a hamphatna ngah uh hi’n gen a, education lam ah leng NIT leh IT park tanpha bawlkhiak hi a, state govt in Science &  Technology lam leng mitsuan hi’n CM in taklang hi. Sports tawh kisai ah leng district tengah Mini-Stadium bawlkhiak dingin govt in panla ahihdan taklang hi.

      Tuni a Statehood Day lopna ah Chief Guest apang  Dy CM in a genna ah Manipur in state piching a ngah akipan India gamsung a state dangte mah bangin Centre akipan hamphatna tuamtuam ngah a, huchih dungzui in mipite’n leng state piching ngah chi a kipak kawma om maimailou in Manipur gam pumpi ah khantouhna, muanna leh lemna banah mipite lungmuang leh lungkimtaka om theihna dingin kuapeuh in panlak ding i mawhpuakna uh ahi chi hi.

      Mipi kuapeuh in namkal kitheihsiamlouhna omsak thei ding thilhih leh kampau kuama’n chinglou ding in ngetna bawl a, poikhoihlou mi khatpeuh pimang a sum a kitatkhiaksak(kidnapping for ransom) kichi thilchin in  thilhoih a tut sangmah in state adia minsiatna leh tunung adia thil hoihlou tunzaw hi’n Dy CM in gen hi.  Hibang chindan hoihlou kuapeuh in tawpsan ding a ngetna bawl kawmin banghiam lungkimlouhna leh thildeih neite tawh kihouna nei a problem omte hihveng ut in state govt in kong hongsa in om gige chi’n leng gen hi. Poikhoihlou mattang(kidnap) a omte leng mihinpihte khualna leh state minsiat ding deihlouhna ziaka khahkhe ding in ngen hi.

     Functional President apang Commerce & Industries Minister Govindas Konthoujam in a genna ah Manipur  government  in kum 2020 tan in economic tawh kisai a mahni kitoudelh thei ding in panla a, huchi hileh India gama state dangdangte tawh dinmun kibang leh kitaiteh thei ding dinmun a om ding ahihdan gen hi. Tuni a Manipur Statehood Day zatna hun ah Chief Secretary PC Lawmkunga,IAS; Director General of Police Shahid Ahmed,IPS banah civil leh police top official tamtak tel uhi.

NERCORMP-III a Dist Society Executive Board bawlkhia 

Lamka, Jan-21: DoNER Minister Pawan Singh Ghatowar in Jan 8, 2014 in Imphal ah a honkhiak CCpur dist leh Chandel dist adi’n 3rd  phase of North Eastern Community Resource Management Project (NERCORMP-III) a honkhiak tawh kisai in DC/CCpur in zan in Dist Society a Executive Board member guang hi. Chairperson DC/CCpur ban ah member 12 tel a, member-te lakah deptt tuamtuam a officer-te ban ah NGO apan 2 (rotation system ) leh Community Representative akipan mi 3 tel uhi. Member tengin Jan 28, 2014 sun dak 12:00 in DC’s office a BRGF Resource Centre ah meeting masa neiding uh a, Registration of Dist Societies (DS) thu; Bank account honding  ban ah office mun ding thu genkhawm ding uhi. Huai project tungtawn in mipite’n electrification, sanitary, road communications leh basic sectors tuamtuam phattuampih  ding uh hi’n kigen hi.

Sunanda Pushkar sihna ziak drug poisoning hizaw-Forensic expert

New Delhi, Jan-21: Union Minister Shashi Tharoor’ zi  Sunanda Pushkar  sihna ziak forensic report dungzui in drug poisoning ziak hi a, drug overdose ziak a si ahihlouhdan kilang chihthu om hi. Forensic expert khat in a gendan in a hinna hihbei ut a gamtang om hidia gintakthu gen hi.  Doctor- te’n  Sunanda Pushkar amah leh asmah kithat(suicide) hihiam chih puangkhe theilou uh a, police in thil omdan suizui ding leh a muhkhiakdan dungzui ua puang ding in koih uhi. All India Institute of Medical Sciences (AIIMS) apan thusuakin a gendanin   forensic expert-te thil muhkhiak tuamtuamte sealed envelope  tungtawn in  sub-divisional magistrate (SDM) kianga piak hi a, Criminal Procedural Code tungtawn in suizuina kipan ding chih ahi hi.     

LOCAL NEWS

SP makaih in Crime meeting om

Lamka, Jan-21: L.Mangkhogin, IPS, SP/CCpur   office chamber ah tuni’n n crime meeting om a, huai ah SDPO/CCpur, SDPO/Thanlon ban ah Police station tenga Officer i/c (OC) teng tel uhi. Huai  ah CCpur District sunga case pending te akinlama hihfel theih teng hihfel danding leh mabana  nasep danding genkhawm uh a, Jan 26, 2014 a Republic Day lopna ding a security dinmun tawh kisai leng genkhawm uhi.

Bio-metric kila ut mi tam

Lamka, Jan-21: Indian citizenship neite adinga poimawh hi a kigen Aadhar Card neihtheihna din  SDO office/Ccpur ah Biometric kilakna paizom zel a, niteng in akila ut mi tam mahmah hi. India govt in Unique Identification Authority of India (UIDAI) nuaia Unique Identification Number ‘Aadhar’ project tungtawn in India khual-le-tui hihna neite leh gamdangte(foreigner) khenkakna dinga abawl hi’n kigen a,  hiai Aadhaar scheme, unique identification project adi’n fingerprint leh mit(iris) khumlut a om hi’n kigen hi. 

Tuahsiat ziakin mi 3 bliam

Lamka, Jan-21: Lalchandam (33) s/o (late) Hranga of Saikawt tuni zingsang in inntung a langva kisia khek dinga kaltou lai  kia a, alu a tahkhak ziakin  khua phawklou in District Hospital kitun hi. Paotinlien (17) s/o (late) Seingam of  B.Vengnom a innbawlna uah sawng 3 apan kia  a, himahleh hah liamlou hi’n kigen hi.  Huailou in Neitinhoi (60) h/o Songchinkhup of Tangnuam tuni in huansung ken ah suang siktal in liam hi. Accident ziaka liamte Hospital ah etkol hi uhi.  

MGNREGS tungtawn in lampi bawl

Lamka, Jan-21: MGNREGS 2013-14 a 2^nd phase ni 14 sung adia nasepna Dec 2013 ‘Christmas’ madeuh in block teng ah sanction hi  a, town area a khua/veng tuamtuam a Village Authority-te’  makaih in khawsung/vengsung a lampi hoihlouhnate bawl in nasepna  pailel hi. Khua/veng khenkhat te’n cement, leingoi leh suanghum zang in lampi bawl uh a, khenkhat in nasem lel uh a,  lampi hoihlouhna mun bawlzawhna munte nuamtuam mahmah hi’n mi ahunkhop in gen uhi.

SDO makaih in  enkhe ding uh

Lamka, Jan-21: Chief Electoral Officer, Manipur in electoral revision 2014 a suahkhiak ah  58/CCpur (ST) A/C sungah voter 2056 te’min paihkhiak (deleted) in om a, huai thu ziakin SDO/CCpur leh staff-te ban ah DC’ office a Election deptt te’n thil omdan suizui in buai mahmah uhi. Huai ah BLO te’ report enkhe thak uh a, E(Expired), S(Shifted), M (Missing), Q (Disqualified) leh R (Repeated) bangzah om a, bangteng kihihkhial  hiam chih suikhiak sawm uh hi’n kigen hi.

Upa Thongthon Hangsing si

Lamka, Jan-21: Upa Thongthon Hangsing (94) f/o Rev. Dr. Hs. Chinsuanthang of Lennuam Veng, Bungmual teknat ziakin  tuni nitaklam dak 4.30 velin si hi. Upa Thongthon ahihleh Kidoupi 2na (2nd World War) lai a sepaih hangsan a genphak ahihman in British govt leh India govt in pahtakna in Medal pia uh a, German leh Japan galkap in leng tel  hi’n kigen hi.  Amah bel Manipur Express a Sunday Sermon gelhtu Rev Dr Hs. Chinsuanthang pianna pa hi a, Dec 3, 2013 in leng Japan mi khenkhat in hongveh uhi. Bungmual hanmual ah Jan 22, 2014 in kivui ding hi.

 Aided materials hawmkhe ding

Lamka, Jan-21: People Advance in Social Service (PASS), ALIMCO, Kanpur leh ONGC, New Delhi pangkhawm in Dec 10, 2013 in  Synod Hall ah Persons with Disabiliites assessment camp om hun a  beneficiaries telkhiakte adingin Jan 23, 2014 in Church Road, Vengnuam, New Lamka a om Dist Disability Rehabilitation Centre (DDRC) office(PK Mung’ building)  ah Aided Material hawmkhiak hiding hi. Huai ah assessment camp omlai  passport 2  submit khaloute’n submit ngai ding a, mahni taksa in  aided material kihawmte lak ngai ding chi’n thusuak om hi.

Khawvot dan kikhek nawn

Lamka, Jan-21:Zan zek akipan  Phalbi khawvot dan kikhek nawn in lum panta a, tuni nitak  dak 9.00 tan in Temperature  16.9 °C tung hi. Lamka ah nitak sawtnung leh zingkal baihtak in khua votsim lai a, tuni zingsang dak 6.00 velin 8.6 °C tung hi. Nisat ziakin sunnung dak 2.00 velin 30.0 °C tungtou nawn a, sun hun in nisa khauhsim  mahmah hi. January 4, 2014 zinglam dak 6.39 velin khaw omdan tehna ah 5.5 °C tungsuk a, July 27, 2011 akipan tunitan a khawvot hunpen a chiamteh bel  January 11, 2013 hi a, huaini’n  2.5 °C a tungsuk hi. Kum 2011 akipan  khawlum pen hun September 23, 2013 in 37.1 °C tung hi.  

Police-te’n jail ah ZDV cadre  koih uh

Lamka, Jan-21: 7-Assam Rifles te’n New Lamka Market area ah Jan 15, 2014 in ZDV cadre John (40) s/o Thuahneng of Vengnuam, New Lamka a matkhiat uh tuni’n police te’n  CJM court ah dingsak uh a, court in Jail a omdi’n a thutan khum ziakin Police te’n Jail ah koih uhi. Army te’n John apan 9mm pistol 2, magazine 2, atang 3, Nokia Mobile handset 1 leh Yamaha RX-100 MN1J-3775 mukhia uh chih ahi hi.

SUUNNA

Mrs. Nuchhungi(70) w/o (late) Nghinglova of Tedim Road (UBI building kiang) tuni zinglam in teknat in si a, tuni mahin Lamka hanmual ah kivui hi.

Vungngaihching (61) w/o Rev. ST Jamkhanthang of Zion Veng, New Lamka sunnung  dak 1:40 velin zunkhum ziaka damlou in si a, Jan 22, 2014 in  YPA hanmual New Lamka ah kivui ding hi.

IMPHAL NEWS

Manipur Governor in salute la ding

Imphal, Jan-21: Imphal a Kangla mun ah January 26, 2014 zinglam dak 8.00 akipan in Republic Day lopna kawmin Flag Hoisting Ceremony om ding a, huai ah Manipur Governor VK Duggal in Guard of Honour inspection a bawl banah India flag kaipalh ding a, march past apai contingent tuamtuamte akipan salute la ding hi. Huaizawh zinglam dak 11.00 in 1^st Bn Manipur Rifles Parade Ground ah Chief Minister O. Ibobi in March Past a tel contingent-te lakah kipahthu genna hun zang ding hi.

    Nitaklam dak 3.00 in Manipur Governor in Raj Bhavan ah Republic Day tawh kisai in Reception hun zang ding a, azing January 27, 2013 sunnung dak 1.30 akipan in 1^st Bn M/R Parade Ground ah Folk Dance Festival leh Republic Day lopna hun khakna kithuah om ding hi.

ECI in Election Notification suah

Imphal, Jan-21: Election Commission of India in state tuamtuam 16 ah Feb 7, 2014 in  Rajya Sabha member 55 telna dingin tuni’n notification suah a, huai dungzui in candidate nuamte’n January 18, 2014 tan nomination file thei ding uhi. January 29, 2014 in nomination paper etchetna(scrunity) om ding a, kizukkik nuamte January 31, 2014 in kizukkik thei ding uhi. Feb 7, 2014 a vote khiakzawh nitaklam dak 5.00 in vote sim kipan ding a, election process teng Feb 10, 2014 in zawhsiang hiding chihthu om hi. Tulelin Manipur akipan MP(Rajya Sabha) bel Rishang Keishing hi a,amah hun April 9, 2014 in bei ding hi.

Thah dinga om Non-local  khat suakta

Imphal, Jan-21 : Muanhuaitak apan kizadan in Imphal West PS huamsung Nepramenjor mun ah tuni zinglam dak 11:30 velin meltheihlouh galvantawite’n sik sia zong kawma tricycle a kuan non-local khat man in kaplup sawm uhi. Amau naichik a kap a sawmlai un a thautang un  kapkha lou in non-local pen taisuah thei hi. Huai vengsung mipi’n a theihphet un kidelhhuan uh a, huai takin non-local leh  meltheihlouhte  a omna uh theihlouh in mang uh chih ahi hi.

Jiribam ah IED khat kimukhia

Imphal, Jan-21: Jiribam PS akipan mallam km. 4 a gamla a om NH No. 37 a Kamranga Lamkai mun ah Assam Rifles te’n zan nitak  in IED bomb khat  mukhia uhi. Huai IED bomb pen remote control tawh kithuah hi a, kg. 5 vel a gik hi a,  Assam Rifles te’n tuni zingsang in hihsia uhi. Huai IED bomb  mikhat in a muh hi a, aman Assam Rifles-te kiangah report a, huai phet in Assam Rifles-te leh Jiribam Police commando kithuahte’n huai kimlak operation bawl uh a,  nitak dak 11:30  velin mukhia uhi..

Common candidate din Dr M. Nara guang  

Imphal, Jan-21: Manipur a political parties 10 kigawmte tuni’n Irabot Bhavan  ah kimukhawm uh a, maban a  Lok Sabha election a common candidate neih theihna ding bangtanhiam a genkhawm nung un Inner Manipur Lok Sabha adia common candidate ding in CPI Manipur State Council a Secretary Dr. M Nara kituak takin pom uhi. Political party tuamtuam  10te bel JD(U), JD(S), BSP, AIFB, CPI, CPI(M), RSP, Shiv Sena, NCP  leh PDA pawl hi uhi.

Kuki Inpi/Saikul te’n dakkal 48 hunpia

Imphal, Jan-21 : Imphal-Saikul road a nasem a om Ashem Tomba(40) s/o Kala of Thoubal Leishangthem Leikai apaisa Jan. 16, 2014 a helpawl hidia gintakten a pimang utawh kisai in Kuki Inpi/Saikul te’n tuni’n  press conference nei uh a, pimang a om Ashem Tomba a pimangte’n dakkal 48 sunga  khahkhe dingin ngen uhi. Mi pimangten bangthu tawh kisai a pimang uhiam, chih leng hilhchian dingin theisak uh a, huchi ahihkeileh kiphinna nasasem pan ding uh hi’n gen uhi.

Combing operation sunzom zel uh

Imphal, Jan-21 : Manipur ah Jauary 26, 2014 a  Republic Day lopna ding ah buaina a omkhak  ding venna in Imphal West leh Imphal East police ten mun tuamtuma ah combing operation a bawl uh sunzom zel uhi. Tuni in Imphal West Police  leh 40-Assam Rifles kithuahten Singjamei Makha Naorem Leikai leh Naorem Leikai Sopha Leirak ah combing operation bawl uhi. Imphal East Police te’n leng tuni’n Langthabal Kunja area lak ah operation bawl uh a muanmawh huai sakziakin mi 20 mantang ua, a khawnung in khahkhe nawn uhi.

Manipur in electric mei a ngahdan

Date: 21/01/14  Time:t 19:41:590

State          Schedule    Drawal  Deviation

 Manipur    100.2            92.5      -7.5

NATIONAL NEWS

Manipur, Meghalaya, Tripura kum 42 chingta

 New Delhi, Jan-21:  Tripura, Manipur  leh Meghalaya  tuni’n state piching a puankhiak ahihnung kum 42 chingta a,  42^nd statehood day zat in om hi. Tripura  leh Manipur  ahihleh Oct 15, 1949 in Indian Union ah pemlut a, full-fledged states piak ahihma union territories nuaiah om hi. Meghalaya  bel April 2, 1970 in autonomous state hi a, huaima in Assam state sungah om hi.   State 3-te’ lakaTripura  bel NE adia state neupen 3na hi a, gamkaih  10,491 km²   a lian  Bangladesh  tawh gamgi ahihbanah siamsinna lamah Tripura University (Agartala),  National Institute of Technology, Agartala (Jirania),  Agartala Government Medical College (Agartala),  Tripura Institute of Technology (Narsingarh), Maharaja Bir Bikram College   chih ziakin minthang hi.  Meghalaya bel 22,429 km² sungah 2011 tan in  milip 2,964,007 khawsa a, North Eastern Hill University (Shillong),  Techno Global University (Shillong),  Indian Institute of Management Shillong (Shillong),  North Eastern Indira Gandhi Regional Institute of Health and Medical Sciences (Shillong),  National Institute of Technology Meghalaya chihte ziakin minthang hi. Manipur ah  Area 22,327 km² sunga nam tuamtuam khawsa in NE state laka tuantual pawlte hi a,   Manipur University (Imphal) ,  National Institute of Technology, Manipur,  Central Agricultural University (Imphal),  Manipur Institute of Technology (Imphal)  ziakin siamsinna lam dopsang a om hi’n thusuakin gen hi.

Naga tawh kisai Book suahkhia 

New Delhi, Jan-21: United Kingdom pansan  Ashgate Publishing in  Nagas kichi laibu khat suahkhia hi. Huai book ah Naga te khangthu leh India in a opkhumdante ngenteltak a taklat in om a, “Progress and Its Impact on the Nagas: A Clash of Worldviews,” bel Ashgate Publishing, academic book leh journal publisher pawlin a suahkhiak uh ahi hi. 

FOREIGN NEWS

Ni 60 sung state of emergency puang

Bangkok, Jan-21:  Thailand government in  zingchiang  akipan ni 60 sung daih ding ‘state of emergency’ puang a, kha 2 val kiphinna om pen huham deuhdeuh dinga a kilat ziakin thupukna emergency puang uh hi’n thusuakin gen hi. Kiphin pawlte’n Prime Minister Yingluck Shinawatra  adinmun apan kitawp dingin phu ua, himahleh Prime Minister in a tanvou pen khahsuah lou ding hi’n gen hi.

Iraq government in mi 26 khailum 

Baghdad, Jan-21: Iraq  government in “terrorism” tawh kisai in suangkulh tang mi 26  khailum hi’n Justice Ministry in tuni’n puangkhia hi.  Pathianni a kikhailum te ahihleh Iraq  gamsungmi ngen hi ua, tuate lakah Sunni helpawl  "Sahwa"  makai Adel al-Mashhadani  leng telkha hi.  Adel bel  Baghdad  area a Sunni helpawl makaihtu leh Shia Muslim tamtak thahna a kigolh hi a, sualna lam a mi minthang hi’n Justice Minister Hassan al-Shimari  in gen hi. Sahwa (Awakening) helpawl ahihleh  Sunni Muslim tribesmen pawlte hi uhi.

Southern Beirut ah bomb puak 

Beirut, Jan-21: Syria buaina in Lebanon gamsung nawk kha nawn a, Syria helpawl leh Al-Qaeda tawh kizom Al-Nusra Front pawlin Lebanon' capital southern Beirut a bombpuak pen amau khutnung hi’n puang uhi. Bombpuahna southern Beirut ahihleh Syria president Assad kizoppih Shia helpawl Hezbollah pawlin panmun dinga azat uh hi a, mi 4 si in midang  35  liam uhi. Syria buaina a Hezbollah akigolh nungin Syria rebels pawl, adiakin Jihadist pawlin Lebanon gamsung lam ah bomb va hihpuak sek uh a, nipikal 2 sunga Shia-dominated Haret Hreik area adia bombpuak nihveina hita hi.  

Pakistani in  Waziristan tribal area bukap 

Islamabad, Jan-21: North Waziristan tribal area a Pakistan sepaih 20 velin sihna atuah nung un Air force te’n jet fighter zangin helpawlote omna munte bukap uhi. Afghan tawh gamgi a jet fighter in Taliban helpawlte leh  al Qaeda-linked group tuamtuamte  banah civilian tamkhop hihliam kha hi.  Military thupuangtu gendanin helpawl 15 vel kaplup in om uh a, Bazar leh Christian te biakbuk sunga bomb hihpuakna a kigolhte hi un leng taklang hi.