PDP legislature party-te’n leader dingin Mehbooba telching
J & K ah Mehbooba in apa’ tha khengin CM lending
J & K ah Mehbooba in apa’ tha khengin CM lending
Srinagar, March-24: People’s Democratic Party(PDP) chief Mehbooba Mufti in tunung sawtlou in Jammu and Kashmir(J & K) ah Chief Minister lenthei dinmun ah om chihthu kiza a, aman kallui in Prime Minister Narendra Modi leng kimuhpih khin a, tuni in dan tawh kituakin PDP Legislature party leader dingin telchingin om hi. Mehbooba’ pianna pa Mufti Mohammed Sayeed in Jammu and Kashmir Chief Minister lenlai January 2016 in heart attacked in si hi. A tanu Mehbooba in apa’ dinmun luah a Jammu and Kashmir Chief Minister lenpah dinga gintak himahleh PDP leh BJP kigawm a Ministry dinglai a paizom theihna dingin Mehbooba in BJP central leader adiakin Prime Minister Modi in Jammu and Kashmir adia special package achiam sepsuah masak ding a phut ziakin Chief Minister dinmun lenpah utlou a, huaiziakin Jammu and Kashmir ah Governor’s Rule koih a om in tuni tan lakkhiak(revoke) hinailou hi.
Mehbooba in apa’ damlai a a thiltup tangtunsak teitei tum tinten a, BJP President Amit Shah tawh a kihou nungin lungkim nai tuanlou a, zan zekin Prime Minister Modi tawh hoihtaka a kihou theih ziakun Mehbooba Mufti makaihna PDP in BJP kigawm in Jammu and Kashmir ah govt tun ding thak nawn dingin panla nawn panphet uhi. PM leh Mehbooba kihouna ah bang genkhawm uhiam chih puankhiak hilou hi. Mehbooba in J & K a CM alet ngeingei leh Jammu and Kashmir khangthu ah numei CM len masapen ding hi’n kigen hi. Prime Minister Narendra Modi makaih BJP pawlin leng J&K state ah BJP leh PDP kigawm in govt thak a bawlkhiak uh lunggulh tinten hidan in kigen hi. J & K state in bel India a state dangteng sanga tungnungzaw leh kivaihawmna sangzaw nei uh ahi hi.
Mehbooba Mufti in tuni’n apa’ kivuina han(grave) veh a, tua zawhin PDP MLAte kiangah PDP leader ding a non telching uh ka kipak mahmah a, ka pa’ sulnung ka zuitou ding chi hi. PDP leh BJP in kizopna thuktak a neih ziakun Mehbooba mahin CM len dingin gintak hi a, zingni/thaini a government thak a dinkhiak gintak ahi hi. ‘Agenda of Alliance’ tawh kisai in BJP leh PDP kal theih hilou a, Ms Mehboo in thu im ding a chih ziakin bangmah puakkhiak hilou a, J&K a AFSPA tungtang bang hong chiding hiam chih leng mi tamtakte’ bil dawh khat ahi hi.
Mipi’n haksatna a tuahte uh dawn zangkhai un-Modi
PM Narendra Modi in Bureaucrat-te thuhilhna nei
New Delhi, March-24: Prime Minister Narendra Modi in tuni in top bureaucrat-te thuhilhna neikawmin mipi nasem na hi uh a, tua ziakin file himhim pending saklou banah mipi’ haksatnate hih vaiveng pahpah un, chi hi. Prime Minister Modi in mipi lam akipan hekna (complaint) atam mahmah a, tua ziakin bangchileh mipi buaina tuamtuamte vaivengsak theiding ka hihiam chih ngaihsut poimawh mahmah ahi, chi hi.
PM Modi in officer-te kiangah mipi tawh kisai ‘case’ om khempeuh a sawt tawp a ni 60 (kha 2) sung ngei a sukfel ding ahi chi a, i mawhpuakna tungtawnin mipi hamhaih sak keini chi hi. Modi in PRAGATI tungtawn in top officer (bureaucrat)te thuhilhna nei a, video conferencing neih in om hi. PRAGATI kichi ahihleh web-based platform hi a, huai in mipi haksatna tuamtuam leh government a thil nget a neihte uh pulakna hi a, tualou in government department tuamtuamte nasepna enzui ahi hi. Prime Minister’ Office (PMO) in mipi’ haksatna tawh kisai leh civil service officer (bureaucrat)te’ kideihkhop dan hekna tamtak ngahta hi’n kigen hi.
Modi in officer-te kiangah technology leh electronic thil ah mahni bial chiat bang achi hiam chihte enzui dingin theisak a, tualou in road, railway, power leh oil sector dinmun kichiantak a enkai ding a zasak kawmin adiakin Madhya Pradesh, Haryana, Rajasthan, Gujarat, Maharashtra, Karnataka, Uttar Pradesh leh Bihar te’n hiai tungthu ngai poimawh dingin theisak hi. Official-te’n Aadhar tawh kisai a land records online tungtawn a kichiantak a bawlfel pahpah dingin puang a, world's largest biometric database (India a Aadhar card) tungtawn a mittang (iris signature) leh fingerprint-te poimawh semsem ding a, tua tungtawnin mipi’n hamphatna tuamtuam ngahthei ding uh a, huai pen michih in a ngahtheihna ding un official te’n mawhpuakna liantak nei uh chi’n a thugenna ah taklang hi.
Khuga Dam a om Khuga Bn te’n nasem hoih
Lamka, March-23: Khuga Dam a om Khuga Battalion-te nasep hoih tuailai sepna deih hunkhop in phattuampih petmah uhi. Kumlui 2015 in khawsakna haksa student-te khualna in Free Coaching Centre hong uh a, huaia tel student 3 in sepna mu in joined khin uh chih thutut kingah hi. Huaite banah Oct 4, 2015 in Statt Selection Commission(SSC) saina a 12 class level para military service ading written test a result Match 14, 2016 in suak a, huai ah Khuga Bn saina a free coaching atel 46 lakah student 26 in written leh physical ah lawhching uhi. Tu’n huaite’n medical ngak lel uh a, amaute Khuga Bn mun a pre-medical test bawlsak hi uh a, huai Center a Education Corp in-charge in paisuak vek dia fit uh hi’n gen hi.
Huailou in Lamka adia Tourist spot omsun Khuga Dam en visitor adiakin a numeite adi’n zun leh dailen buk omlou awlmawh huaisa in Khuga Battalion te’n Khuga gate bulah Toilet block 7 bawlkhia uh a, huai zawh ahihtak ziakin March 26, 2016 zinglam 9:30 in Lunminthang Haokip, IAS, DC/CCpur in hong ding a, SP leh army officer tamtak banah leh Mata V/A leh adangte’n uap ding uhi. Huai banah Khuga Battalion a CO in June, 2016 kha a a Battalion uh kisuankhiak ma in khawsakna haksadeuh student-te khualna in Free Coaching Centre patnawn lunglut a, huai a telnuamte’n ngaihven theih ding hi. Huai ah Army adia lunglut sese hilou UPSC, SSC, Banking Service leh adangdanga lunglutte adi’n leng teltheih ding hi’n thutut kingah hi.
LOCAL NEWS:
Tuni in 35th World TB Day zatna om
Lamka, March-24: District TB Officer/CCpur makaih in tuni zinglam in CMO’ Conference Hall ah ‘Paradigm Shifts to end TB’ chih thupi zang in 35th World TB Day zang uh a, Dr.J. Songoukham Samte, Med. Suptd/ Dist Hospital in thugen hi. Aman a genna ah TB natna dalna din pankhawm poimawh a, TB natna neite hong damsiang uh deihsakthu gen hi.
Dist. TB deptt. te’n CCpur dist. ah MSF banah NGO tuamtuam tawh pangkhawm in damloute kem in mi tamtak hihdam uh chi’n gen hi.
Dr. T. Pumzathang, Dist. TB Officer/CCpur in keynote address gen a, leitung pumpi ah tuni’n World TB Day kizang a, Dr Robert Kochs’ in TB Baccilie ana mukhia in Myco-Bacterium Tubercolosis kichi in mihingte taksa tungah Tuberculosis (TB ) natna tun hi’n gen hi. CCpur dist. ah Health Minister Phungzathang Tonsing in Dec 23, 2013 in DOT-Plus, Centre for Treatment of MDR-TB building hong a, huai mun pansan in TB natna neite etkol leh damdawi piakna mun a kizang hi’n gen hi. Huai building ah GENE-XPERT-CB NAAT machine zangin MRD-TB natna dakkal 1 leh minutes 52 sungin detect khiat theih a, huai machine zattheih dinga honkhiak pah lam-etthu gen hi. Program sung in Mrs. Chingthang, STC/RNTCP/CCpur makaih in TB &MDR patient-te ading in special items show uh a, MSF(H), India/CCpur; Mercy Home, CBCI, Tuibuong; SHALOM/ CCpur; Sanga,Co-ordinator Project Ashya, EHA (CCpur & Bishnupur) te’n thugenna leh item tuamtuam show uhi.
TCU Gen HQ Gen Council 55veina om
Lamka, March-24: Tedim Chin Union, Gen HQ in tuni’n Pangzawl Community Hall ah General Council a 55-veina nei uh a, Tedim Chin Youth Assn, Tedim Chin Cultural Club leh Tedim Chin Students’ Assn makaite banah unit tuamtuam apan palai 5 chiat tel uhi. Session masa zinglam dak 10:30 in Pastor Palet Thuomngel in thumna a hong in, S. Zam Mang in vaidawnna thugen in, Gen Secretary report pia hi. Dr. Neng Ngaih Lian, General President, TCU makaih in Session 2-na ah vaihawmna nei uhi. Huai ah TCU in hanmual khat kikop a neih ding thusun omsa athu in pawm uh a, sepsuah dingdan genkhawm lai hiding hi. TCU Gen HQ a Executive Committee guanthak a om Zam Khua Cin (Vice Chairman) leng pomkip uh a, kum tenga TCU nuai a branch/unit te’n (Jan & July) kha a Zonal Joint Meeting nei ding, TCU nuai a branch/unit omte term kibang, TCU official website bawlkhiak ding leng thupuk uhi. Annual Fund leh Year Plan tawh kisai kumteng a Feb- March a common auditor neih ding, banah unit tuamtuam apan agenda-te leng genkhawm uhi. Tedim Chin Union (TCU) min kheng danglamlou in TCU mi-le-sa te’n Sukte tribe min zang a Tribe Certificate lak ding a a thupuk ban uah TCU constitution ethak di’n leng thupuk uhi.
KSO/Singngat block in meeting neihpih
Lamka, March-24: KSO/Singngat Block in amau etkaina nuai a om ZEO leh ADC nuai a govt school Head-te banah staff-te leh School Management Committee-te tuni in Tuibuong a Kuki Inpi CCpur Office ah meeting neihpih uh a, school hoihtak a function theihna ding genpih uhi. KSO/Singngat in Jan 23, 2016 in meeting ana neihpih hun ah schoolte hoihtak a function ding a thupukna la mahle uh hoihtak a function omlouh ziaka tuni meeting asap nawn uh hidan in kigen hi. Meeting ah KSO/CCpur in school pai ding dan tawh ksai Headmaster/Headmistress-te khut ah koih in amau etkai thoh ding uh a, a kul leh poimawh banga nasem ding uh hi’n genpih uhi. Thu kizadan in, KSO/Singngat jurisdiction sungah ZEO nuai a om school 4 leh semtu 10 a om banah District Council nuai a school 5 leh semtu 31 omlel hi.
YVA Gen HQ makaite’n veh
Lamka, March-24: Young Vaiphei Association (YVA) GHQ a makaite’n tuni in zan a Kangvai khua innkang ziaka vangsiatna tuak Thanggoulian h/o Khawllianting veh uh a, siatvatna dan in kithuahpihna va pia uhi.
Tuni’n dharna tu omlou ding
Lamka, March-24: Joint action Committee against Anti-Tribal Bills in thusuah abawl in a taklatna ah Police station kong a, village authority makaih dharna /sit-in-protest neih a om pen March 25 (Good Friday) ziakin kuamah tulou ding in theisak a, tuni a dia seh a om – Aijalon, Bungmual leh D. Phailiante March 26 (Saturday) a tuding in theisak hi. Tubang kalah tuni in Bungmual, Muolvaiphei leh Headquarters Veng apan mipi 300 val paikhawm in dharna tu uhi. Tua banah ATML te’n Dist. Hospital Morgue ah nitak hun a program a neih zel uh Good Friday ziakin tunitak leh March 25 nitak program omlou ding hi’n kigen hi.
‘Purim Sameakh’ program zang uh
Lamka, March-24: Purim Kut Programme Committee 2016 makaih in B. Vengnuom Community Hall ah tuni zinglam dak 11:30 in “Purim Sameakh” programme zang uh a, mi tamtak tel uhi. J. Benjamin Hoakip, Religious Secy in Kut Thupi pansan in thugenna nei a, party bangzah hiam te’n special no. present uh a, Upa v/s Gollhang te’n dance competition nei in kipahman leng hawmkhia uhi. Avshalom Singson, Kut Finance Secy. in report pia a, Avihu Haokip, Khazan, Beith Shalom, B.Vengnuom in Seudat Purim nei hi. Purim Sameakh ahihleh Israel-te’ adia Kut poimawh khat hi’n kigen hi.
Suonkhanpau Zou omna kitheilou
Lamka, March-24: Suonkhanpau Zou (60) of Gangpimual, Hausa veng in Chennai ah atanu leh tupa vehding a train a tuang, Chennai tunglou in a omna kitheilou hi’n thusuak kingah hi. Suonkhanpau Zou ahihleh numei 8 vel tawh ticket confirm 2 vela pai uh hi’n kigen a, zan (March 23) zing dak 5:30 velin Vishakhapatnam tung uh a, Vishakpatnam a nutsiat zawh nung un atuanpih numei te’n mu nawnlou uh hi’n kigen hi. Suonkhanpau Zou’ tanu ahihleh Nepali tawh kiteng in tapa nei in Chennai ah om uh hi’n kigen hi. Suonkhanpau Zou’ mel mukha leh omna thei te’n contact No. 8179806569 / 8190934391/ 8056195524 ah thuzak ding in a sungkuante’n ngen uhi.
Singngat ah ATM machine koih
Lamka, March-24: Singngat khua a Central Bank of India te’n mipi zattheih ding in ATM machine 1 koihthak uh a, tunung sawtlou in zat theih ding hi’n kigen hi. Singngat a Central Bank of India ah ATM machine zat theih hunhun in mipi’ leh Security Force te’n phattuampih mahmah ding uh hi’n kigen hi.
SUUNNA:
S. Chinzalian (60) s/o (late) S. Chinzakap of Hebron veng, New Lamka near YPA Hall tunitak dak 9:30 velin RIMS Hospital, Imphal ah cancer ziakin zi a, March 25, 2016 in New Lamka YPA hanmual ah kivui ding.
Raymond Zosanglien s/o Thansang of Venglai, Rengkai tunitak dak 8:00 in sungna in si a, March 25, 2016 in Rengkai hanmual ah kivui ding. Amah ahihleh JL Sawm, President, HWA Gen HQ pianpih sanggam hi’n kigen hi.
IMPHAL NEWS:
Police in traffic rule bawhsia 1852 man
Imphal, March-24: Imphal West Dist. Police ten Yaoshang festival sungin traffic rule bawhsia mi tamtak mankhia uhi. Yaoshang festival ni 2na tuni’n leng Imphal West police ten special drive nei uh a, traffic rule bawhsia mi 1852 man ua, amaute sum liausak uh a, a kigawm in Rs. 1,74,500/- mukhia uhi. Imphal West Police ten Yaoshang Festival bei ni March 27, 2016 tan special drive nei ding uhi.
Yaoshang sports meet kipan omlai
Imphal, March-24: Tuni a Yaoshang sports meet pan pawl tuamtuam in Kangla mun ah meisel vala in lampi a zuih ziak un Kangla kim lakah traffic hun sawttak buai a, Police leh Traffic police-te panlakna ziakin ngeina bangin gari taithei nawn hi.
Huai lou in veng tuamtuam ah leng local club-te saina in Yaoshang tawh kisai a sports meet om a, Shree Shree Govindajee mun ah Yaoshang programme zatna leng om hi.
North East Asian Business Summit 2016 om ding-Chief Secy.
Imphal, March-24: Manipur ah April 7-9, 2016 sungin Ministry of DoNER, Indian Chamber of Commerce leh Deptt. of Commerce & Industry saina in North East Asian Business Summit 2016 om ding hi. Chief Secretary O. Nabakishore in huai thu genkawm in Myanmar a Sagaing leh Mandalay akipan palai chial dingin Ministry of External Affairs, Govt. of India ah ngetna bawl a, huai hun ah Trade & Commerce, MSME, Horticulture, Floriculture, Food Processing Industry, Handloom, Handicraft leh Tourism-te taklat hidin leng gen hi.
Student 1 tuni’n tui ah kelum
Imphal, March-24: Hmarkhawlien a Japheth Hostel a om Class X simlel Jehova Lalramhlun Hrangkhawl s/o Lungawi of Chikur tuni sun dak 12:40 velin a lawmte lui a kisil lai tuahsia in si hi. Yaoshang ahihziakin tuni school kailou uh a, alawmte tawh lui (river) ah kisil ding in hawh uh a, huai ah Jehova Lalramhlun tuahsia a, hahtak a zon nungin sisa in muhkhiak hidan in kigen hi. (UNA)
Phaijang ah bial ah Security khauh
Imphal, March-24: Yaoshang sung a thil deih huailou om khak ding venna in phaizang bial- Imphal East, Imphal West, Bishnupur leh Thoubal district ah security hihkhauh in om hi. Imphal area ah Police leh Traffic police kithuahte’n mun tuamtuam ah 2-wheeler gari-te frisking bawl uh a, document kimloute, driving license tawilou leh mi 3 kipuate sum liausak uh a, Police te’n tunung a 4-wheeler seating capacity bikhiah sanga mi tamzaw kipuate leng enkai ding uh hi’n kigen hi.
Zan nitak in IED bomb 1 mukhia
Imphal, March-24: Meltheihlouh pawlkhat in Khyamgei Maning Leikai Lairam Wangma ah zan nitak dak 9:45velin FCS supplier- lui Thokchom Dojendro tenna gate bul ah IED bomb koih uh a, Police-te theihsak ahih dungzui in Imphal East Commando leh Irilbung Police te’n zingsang dak 1:00 velin bomb lakhia uh a, Khyamgei Loukon mun ah hihsia uhi.
TUNI THUPI:
“Huchi’n ka unaute aw, hehpihtakin hichitelin gilou dah ve ua.”
– Genesis 19:7
EDITORIAL:
Ei-le-ei kineksiatna!
Manipur ah hun bangtanhiam paisa akipan mipi poimawh (essential commodity) tuamtuam omte kimawlpihna nasa mahmah hidanin gen om a, huai tungtang ah ataktak a enkai theiding leh thudik gumngam ding mi itawm mahmah hi. Bengali mi Das in Lamka-te’ sum Rs 1 crore val a pawkhia a, huaima in Johnson Enterprises hong saizualte’n Lamka-te’ sum mah a crore asim hong ana lakhe khin uhi. Tuni in state dangte thutuam in koih phot le hang, ei-le-ei bangzahta a kine ihi hiam chih ngaihsuttham ching hi.
Sum interest tawh kisai en lehang, mi hausa khut ah i pension book leh service lehkhabu tuamtuam bangzah i koih ale? Amaute akipan chikni chiangin suahtakna i mu dia? Interest nei a sum hawmte mawhsa i hi zenzen kei a, amaute ziakin leng mi tamtakin lam tuamtuam ah suahtakna a tang uh chih i haih kei hi. Kuahiam in a buaisiat tawpkhawk hun in lametna dang nei nawnlou in a service book hiam pension book uh a suahtak ding uh security dana koih in a percent ut zahzah hita ve chi in banda sek mai uh a, mahajon khat in ama ut thu hituanlou in ana lasek a, himahleh, a va surrender pen in sumpung(interest) tamtak tawh a ditkik ngai a, mahajon hunkhop in principal leh a interest banah arrear omte tanpha sum batlaktu theisak tuanlou in lalai uh chih hitazen hi. 5% kichi sang mahmah a, sum hau leh mahajon tuamtuamte’n leng hibang a buaisia a amau nuaia vakunte a interest 2/3% tanbekin kon hihsak ding chithei le uh hoih mahmah ding in gintak-huai hi.
I lakah thil awlmawhhuai tampi omte lak a khatnawn ahihleh, cement tawh kisai leng ahi hi. Inner Line Permit System tungtang gen sawm ihikei a, himahleh, igam ah cement zuak atamzaw Vaite hita uhi. Tuni chiangin ahihleh, eimi mahmah cement zuakthei hunkhop a om tak ziakin kipahhuai hi. Cement kichi chi tampi om a, a quality leng chi tampi omkha thei hi. Operation a bawlsa uh (original pack phelkhia a, bartin 1/2 lakhia) hunkhop om a, ahi bangbang a zuak leng hunkhop a om hi. Consumers Club/ LATSEA in a etkai ding uh tamtak om hi.
Tua mai hilou in LPG tungtang leng hun bangtanhiam paisa in Imphal pansan Newspaper khat in naktakin hon buaipih a phatuam mahmah a theih ahi hi. Lamka khawpi ah Gas agency tamlou om a, amaute kiangah a refilled cylinder avangkim in hongtung sek hi. Bottling Plant tuamtuam Sekmai, Digboi leh mun tuamtuam akipan hong puak uhiam chih zaw theikhang, himahleh, agency tuamtuamte’ gas cylinder man kibatlouhna tungtang leng mipi theihsiam dingin hon pulak le uh chih deihhuai petmah hi. LPG cylinder tungtang leng mipi’n awareness i neih uh poimawh mahmah a, cylinder a gikgik vadop in omzia nei khollou ding a, cylinder pua a a weight zah kigelhpen a sunga huih (gas) om hilou in a cylinder hawm (empty) gikna hizaw hi. Cement ah operation bawl hunkhop om ahi ichih kawm in, gas cylinder tawh kisai in leng operation bawl hunkhop a om chih theithak ni. Gari khat in gas cylinder 303 bang hong puaktheih leh tua lakah operation bawl ahihnungin driver hia kuate hiam theikhang gas cylinder 10 adingin refilled ngah ban mahmah uhi. Tuni in agency-te mawhsa i hikei a, gari pute etkhiak leng poimawh mahmah a, ei leh ei kineksiatna kichi in i gam ah vaihawm touzel thei dinmun ah om i chihna ahi hi.
Thautui tawh kisai en lehang, atangpi in kha khat sungin thautui man kikhekna (change/revision) nihvei in om sek a, atangpi in khathak ni 1 azat man ding leh khakim lai in aman akiam ding leh akhan ding thutanna lak hitangpi hi. NSCN(IM) General Secy Th Muivah in Ukhrul district a a tenna mun Somdal khua phatheilou dinga gakna om ziakin UNC in akha asim National Highway blockade hong bawl uh a, Sadar Hills District Demand Committee in leng District piching a ngahna ding uh deihna ziakin akha asim mah blockade hong bawl uhi. Tua hunin Lamka khawpi telin Manipur state sung mun tuamtuam ah thautui lam ah taksapna thupitak hong om a, mundang genlouhin Lamka khawpi a oil pump i neih sunsunte’ lakah black market a thautui pekhe dingte’ lak ah zan nunga thautui pekhe ziahziah thei om hi. Huchih lai in, thautui siang leh sianglou tungtang ah Lamka te’n experience hoihtak i tuakta ngal ua…
