LAMKA, May-4 (PhualvaTimes) : Lamka akipan km 16 lel a gamla, Bongbal area ah sum deih ziaka kipmangna thiltung tamveitak om nung, zan nitak dak 12:00 velin Construction site a nasem, gari driver Tongdon Singh (30) of Dulaithabi pimang in om a, pasal 7/8 velin thau tawh pikhia uh chihthu om hi. Tongdon Singh in Special Contractor T. Lala nuaiah sem hi'n kigen hi. Mi pimangte bang pawl hi uhiam chih theihchet hilou in, Gang or UG hi uhiam chih leng kigen lou a, Khawvaiphei News taklatdan in mi pimangtute'n Thadou pau zang masa in, huainung in Meitei pau zang uh chi hi.
Hiaimun ah tumazek in Special contractor S.Dama nuaia sem, gari driver 2 pimang in om uh a, amaute tatkhiakna ding in Rs. 50 lakhs nget in om hi.
Bongbal area a khua omte ah inn tamlou neuchik-chik om a, himahleh lamdang takin mi pimang tute'n kibukna leh gamtana ding in zang thei uh hi'n kilang a, Lamka akipan naichik ahihlai in kipimangna thiltungte suikhiak leh mi pimangte matkhiak ahihlam zak in om nailou a, pimang khahkhiak a omte leng sum demand zah piakkhit nung a khahkhiak hisek uh hi'n gen uhi.
Kum 10 paisa sung in hiaimun pansan in Lamka leh muntuam tuam ah, mihausa leh sumdawngmi tamtakte Sum a tatkhiak ding in pimang in omta hi. PhualvaTimes in hiai bial a kipimangna thiltung, Data bukimtak neikei mahleh, hiaibial ah kum 10 paisa sung in sum a tatkhiak ding a pimang a om mi 10-20 kikal hiding in gintak huai hi.
No comments:
Post a Comment