Huihchim Editor in pekhia
Lamka, May 2: Saichang area ah huihpi, vuahpi leh gialpi ziak a inn-le-lou, thil tuamtuam tamtak kisia-te panpih nang in Huihchim Media Foundation ten April 30, 2016 nitak in Chiengkawnpang bazar ah Charity Musical Nyte neih in om hi. Huai hun a sum kimukhia teng tuni zinglam dak 11:00 in Huihchim Editor Raymond Gangte in Chiengkawnpang a Relief Committee office ah Relief Committee Chairman S. Thienlaljoy Gangte’ khut ah Rs. 42,789/- pekhia hi. Chairman, Relief Committee in Huihchim Media in Saichang area a inn leh lou siate panpih nang a Charity Musical Nyte sai kipahpihthu gen a, Charity Musical Nyte a sum leh pai kimukhia-te zang in Relief Committee in Saichang area ah inn-le-lou siate panpih nang a zang ding hi’n gen hi. Huihchim Editor in Charity Musical Nyte a panpihna pe teng, aseppih lawm leh vualte, artistes-te tung ah kipahthu gen hi.
JAC leh MTMRC in khualzinna report pia
Lamka, May-2: JAC against Anti-Tribal Bills leh Manipur Tribal Movement Road Construction makai Aizawl a zinte zan nitaklam in Lamka hongtung uh a, tusun dak 12:00 in IB Road a JAC Information Centre, KKL Complex ah khualzinna report pia uhi. H. Mangchinkhup, Chief Convenor in Mizo Zirlai Pawl (MZP) Gen HQ, CYMA telin political party tuamtuam a makaite kimuhpih uh a, MNF President Zoramthanga, ZNP President Lalduhawma banah Civil Organization teng leng kimuhpih uh hidan in gen hi. April 29, 2016 in Mizoram Chief Minister Lal Thanhawla kimuhpih in thil tuamtuam tamtak genkhawm uh a, Manipur Govt in Bill 3 a pass-te singtangmite a dingin vangsiatna himahleh kipumkhatna hontun ahihman in a lehlam daih ah vualzawlna (Blessing in disguise) ahi chi a, buaina leh haksatna ah panpih dia mansa a om uh hi’n leng gen hi. Lawhchinna dingin kithutuak a, pankhawm poimawh chi’n gen hi.
G. Nengdouthang, Chairman, MTMRC in maban ah lampi puahthakna tawh kisai a Singngat JAC-te tawh programme zatkhawm hiding in gen a, Aizawl ah political party leh organization tuamtuamte a kimuhpihna hun uah lampi bawlna toh kisai report pia hi. Tua banah, Thuangtam gam a Guite Road bawl a om Bharti Infrastructure Company Ltd. te nasepna leng enkhia uh a, a suang (stone) zat uh hoihlou a, tuadan ahihleh lungtun huailou ding hi’n gen hi. Lampi ahihleh Singjamei a om Ibochouba, Special Contractor etkai hi a, tulel in JCB 1 leh Truck 3 zang in nasem hi. Aizawl ah political party leh organization tuamtuamte a kimuhpih hun uah lampi (Guite Road) puahthakna tawh kisai report pia uh a, Mizoram Chief Minister in huai lampi pen inter-state tawh kisaikha ahihman in duhthusam in kigolh theikei mahleh, panlak theihna chianga pang ding a chiam hi’n gen hi.
Rayburn College in Graduation Day zang
Lamka, May-2: Rayburn College Degree Section te’n tuni zinglam dak 10:30 in Rayburn Chapel ah tukum graduate ding student-te ‘Graduation Day 2016’ zatpih uh a, huai hun ah Rev. Khen P. Tombing, Principal, Rayburn College in Graduate ding student-te thumsak in vualzawlna ngetsak hi. Prof. Dr. N. Mohendro Singh, Academic Adviser, Rayburn College in graduation message gen a, lawhchin nangin mahni kithunun leh thuman poimawh a, thil bangteng sang a siamsinna mah masapen a koih di’n student-te hasuan hi. Rayburn College in thupi dia a zat ‘Sinin, Semin, Zuun’ in chih pen kuapeuh in lungsim a vawm den a, khawtang adia sin a, sem leh zun dingin ngen hi. Tutung in BA (Sociology) ah student 15, BA (Geography) ah 31, BA (Pol. Science) ah 56, BA (History) ah 40, BA (English) ah 18 leh B. Com (Honours) ah student 40 kigawm in student 212 graduate ding uhi.
DC makaih in meeting om
Lamka, May 2: DC/CCpur makaih in ama’ office chamber ah tuni zinglam in SDO/BDO te’n meeting nei uh a, April 2016 kha a huihpi, vuahpi, gialpi in inn-le-lou, thil tuamtuam ahihsiat kikum in, Sub-division wise ah list enkhawm uhi. Manipur govt apan relief fund hongtun hunhun a victims-te kiangah panpihna piak dingdan leng kikum uh a, antang indent bawl ding, langva tel a thil poimawh tuamtuam bazar ah leithawh ding hi’n kigen hi.
Huihpi ziakin innbang kichim
Lamka, May-2: Pearsonmun Vengkhang a Moria EBCC kiang ah zan zinglam dak 2:40 vela huihpi nung lai in building inn bang khat kichim hi. Tua inn ah teklei tamkhop lengkhia in lupna tung dengkha a, naupang khat delh liam hi. Inn neitu S. Haukhansuan s/o (late) Awnphung Samte hi a, thiltung hun in azi, tapa leh anu om uh a, amah asepna mun ah om hi. Thukizadan in singzawl tung a teklei kilem a, cement khuam ahoihlouh ziakin huihpi hattak in amut tawh kiton a kichimsia hiding in kigen hi. Teklei in a deng khak Lianmalsawm (6) pheipi dulh mahleh serious lou hi. Zingkal in khawsung a mi phatuamngaite’n delh in hahsiangsak uhi.
ATML te’n support puang
Lamka, May 2: Manipur University a DEAN Committee in ST reservation 33% apan 7.5% a hihniam ding leh MU huamsung ah Christian-te biakna kham (ban) thu a puang uh ATSUM leh MUTSU in a kalh (oppose) tungtang uh ATML te’n genkhawm in support puang in President leh Secy. min in Press Release suah uhi. ATML in ataklatna ah MU a DEAN committee thusuah, Manipur govt in Anti Tribal Bills 3 sepsuahna a first step hi a, huai Act ahih ding ATML in doudal ding hi'n taklang uhi.
Scientist ‘D’ apan 'E' ah kaisang
Lamka, May 2: Upa Dr. Zawlthanglien Changsan tulel a Ministry of Environment & Forest, govt of India nuai a Central Pollution Control Board, North Eastern Zonal Office, Shillong a semlel Scientist ‘D’ apat tuni’n Scientist ‘E’ in kaisang hi.
Indian Postal Service Group ‘A’ ah kaisang
Lamka, May 2: Zopawllien Hmar s/o (late) H.R. Chunga of Hmarkhawlien, Chief Post Master, General office, North East Circle Shillong, Postal Service, Group "B" apan tunaizek in Indian Postal Service , Group "A" ah kaisang hi.
2nd batch music training ding honna
Lamka, May-2: Rev. Thangjapao, Director Youth & Music, ECA in Molnom a David Kakap Rock Guiter Training Centre ah tunitaklam dak 3:30 in tukum adia 2nd batch training dingte Pathian kiang thumsakna, training honna leh training atelding student-te hanthawnna nei hi. Training ah mi 20 tel in amau kha 3 sung basic course leh advance course sinsak ding uhi.
Lailam Leibul ah pipe leak
Lamka, May-2: Khuga Dam apan Lamka khawpi sung tui piakna pipe tuni sunma dak 11:30 velin Lailam Lei bul ah keh a, department te’n delhpah in bawlhoih ngal uhi. Pipe ahihleh Gasket kisiat ziaka leak hidan in deptt te’n gen uhi. Tuabangkal ah, Lamka khawpi a tengte’n Khuga Dam apan tuisiang dawn ding ngahpan ta in, tui ah haksatna kiam deuh in kilang mahleh permit nei veng khenkhat ah tui a kai lai in veng dang ah kailou a, vengsung khat lel a leng a kaina tuam om in, kha 2 sung bang tui kai mulou leng om hi’n thu kiza hi. Permit nei khempeuh in tui a ngah theih nang ua deptt in pan alak thak deihhuai sakthu tamtak in gen uhi.
KKL Kaimai block election nei
Lamka, May 2: Kuki Khanglai Lawmpi (KKL) Jiri/Tamenglong (Kaimai) block election tuni’n Kaimai Community Hall ah om a, makai telching thak teng Capt. Lalsem, C.S.M .Salvation Army Corps in Pathian kiangah thumsak hi. Kum 2016-2019 sung KKL Kaimai block makaite President- Paoneisang Kipgen; Vice President- Paoneithang Singsit; Secretary- Kamminthang Haokip;Asst Secy. Ngamneipao Haokip; Secy. Finance-Seiminmang Khongsai; Treasurer-Vahneo Haokip; Secy. Social & Culture-Paulalgen Neihsial; Secy. Inf. Kaikapthang Kipgen; Asst. Secy. Inf. Laljathang Haokip, Val Upa (Tollaipao)-Kamkhogin Chongloi ban ah Adviser in Kailenmang Singson leh K. Mangcha Kipgen telching uhi.
AMFA Vice President di’n ching
Lamka, May 2: All Manipur Football Assn. (AMFA) office, Polo Ground , Imphal ah zan in AMFA kum 2016-2020 sung makai ding election om a, President in Imphal West apan Sana Tomba telching uhi. Vice President mi 5- Lalvullien Zote @ Vula of Rengkai, CCpur; Mangngol Chao Singh, Kakching; Wangtam Kaser, MPS, Ukhrul; Shyamno Singh, Thoubal leh Yaima Singh, Bishnupur ban ah Treasurer in Dinamani Singh, Imphal telching uhi. CDSA President Lalvullien Zote bel term lui in AMFA Vice President in telching in om a, AMFA paidan in President, Vice President mi 5 leh Treasurer elected hi uh a, Office bearer dangte ahihleh elected teng in aguan (nominate) uh hi’n kigen hi.
Shillong ah study tour in pai uh
Lamka, May-2: Henkhopao Haokip, Adviser, Thadou-Kuki Students’ Union (TKSU) GHQ in tuzing dak 7:30 in CCpur college ah TKSU CCpur College Branch apan student 60 vel Shillong ah education tour paiding in sawlkhia (flag-off) a, Pastor Tongkai Haokip, Koite Lui Area Pastor, ECA in Pathian kiangah thumsak hi. Study tour te’n Shillong ah Cheranpunji, Maushynran, Sweet fall tel in mun tuamtuam pha ding uh a, May 5, 2016 in Lamka hongtung kik nawn ding uhi.
KWU leh KSO/Nagaland te’n vaidawn uh
Lamka, May 2: Kuki Women Union, Nagaland leh KSO Nagaland makai te’n zan sun in Dimapur Airport ah Kochi, Kerala State ah April 27, 2016 a Miss Queen of India, 2016 competition atel Miss Veineinem Singson of Athibung, Nagaland vaidawnna nei uhi. Competition ah Veineinem Singson in ‘Miss East Queen’, ‘Miss Viewer's Choice’ leh ‘Beautiful Hair’ title ngah hi.
Lampi lai ah hawktui luang
Lamka, May-2: Tuni sunnung a vuahzuk hun in khawpi sung a hawkguam (nullah) hoihlouh ziakin lampi lai ah hawktui luang a, Tedim road ah gari taituahte leh khe apaite ading in nawngkai mahmah hi. IB road, Red Cross road, Thangzam road banah New Bazar area a hawktui leh niin tamtak Tedim road ah luanglut suk a, mihing adi’n damtheih huailou in namsia hi. Vuahzuk hun a tedim road ah hawktui aluan nawnlouh nang in hawkguam (nullah) hoihtak a hahsiang ngai hi’n kigen hi.
Phiamphu Innkuan Committee in ngen
Lamka, May-2: Phiamphu Innkuan Committee te’n asanggampa uh T. Thangsianbiak @ Biabiak tulel a Ginsuanhau, MLA (Singngat A/C) PRO leh Zou Youth Organisation, Imphal block a Vice President lenlel, genthei leh haksa taka azi tawh ta 4 banah anu enkawl a Laimanai, Imphal a khawsa April 26, 2016 nitaklam a meltheihlouh galvantawi dia gintakte’n apimang uh, innsungmite’n pawna mahmah uh hi’n taklang uhi. Huaiziakin Biabiak kemtute’n hehpihtak leh damtak a khahkhe dingin Jesu Kris min in ngen uhi.
Gospel Music Video Album hong ding
Lamka, May-2: Rev Dr. Luaichinthang in May 5, 2016 zinglam dak 10:00 in Hmuia Veng a Pasikhawm Restaurant ah NEO Vision te produced na nuai a Miss Nemsiam sak ‘Itna Lamdang’ Gospel Music Video Album thak hongkhia in Pathian kiang ah lan (dedicate) ding hi.
SUUNNA:
Lunman (93) m/o Lamkhopau of HQ veng tuzing baihtak dak 1:30 velin teknat in si a, sunnung in HQ Veng hanmual ah kivui hi.
Kimkhochong (83) m/o Dalson of B. Vengnuom, April 30 nitak in teknat in si a, zan in B. Vengnuom hanmual ah kivui hi.
Hatniang (80) m/o Langzapau of Zion Veng, Rengkai zan sunnung dak 12:30 vel in awmna in si a, tuni’n Simveng hanmual ah kivui hi. Hatniang’ bel STC GHQ a President leh Zomi Council a Chairman lenlel B. Dongzalian’ nu ahi.
Upa V. Thangkholun (68) h/o Niangngaihching @ Chingi of Vengnuam, New Lamka zan (May 1) zing dak 5:00 velin zunkhum ziakin si a, sunnung in YPA hanmual, New Lamka ah kivui hi.
Pauzalam (65) h/o Mankhanngai of Mata, zan nitak dak 10:30 velin cancer in si a, tuni’n Mata hanmual ah kivui hi.
Khawlnu (64) w/o (late) Seithang Lupheng of D Phailien, lungtang natna ziakin New Delhi ah zanhal masa in si a, aluang hong kipua in, zanin D Phailien hanmual ah vui in om hi.
Zenngaihching (57) w/o Thangkhanlian Guite of Mission Veng, zan zingkal baihtak dak 1:00 vel in hepatitis in si a, nitaklam in Lamka hanmual ah kivui hi.
Samuel Mangjapao Kipgen(40) h/o Ngaineilam @ Boinu of Bijang, tuni zingkal in sungna in si a, nitaklam in Bijang hanmual ah kivui hi.
Demkhosei Touthang (31) s/o (late) Ngamkholet of Bijang, April 30, 2016 nitak in sungna in si a, zan in Bijang hanmual ah kivui hi.
IMPHAL NEWS:
Ni 2 sung Manipur University shutdown puang
Imphal, May-2: Manipur University Tribal Students' Union (MUTSU) leh ATSUM pawlin MU Dean's Committee thupukna Resolution No.2 (a) and (b) deihlouh latsakna a April 30 akipan campus sunga Peaceful Sit-in-Protest a neih uh University Authority in ngaihsaklou chih ziakin May 3 & 4 University pumpi Total Shutdown puang uhi. Hiai Total Shutdown sungin Vice-Chancellor kianga Memorandum apiak uh ngaihsak ahihkeileh kiphinna khauh zawsem nei ding uh hi’n MUTSU makaite’n gen uhi. Dean Committee pawlin 2013-14 a Manipur High Court in order apiaksa reservation ST 31% pen kitheihmawh bawl in, UGC dungzui in 7.5% zat ding in thupukna bawl uh hi’n leng MUTSU makaite’n gen uh a, singtangmite nelhsiahna thupitak hi’n leng puang uhi.
MUTSU pawlin agenzelna uah hiai reservation zat ahihleh academic session thak akipan sepna tawh kisai Group B & C leh MA course tuamtuam a admission ah singtangmite ading vangsiatna tawpkhawk hiding chi uhi. Central Govt. order dungzui in ST ading Manipur ah reservation 34% himahleh tulelin 31% zuih a om hi’n leng MUTSU makaite’n gen uh a, hiai khek lamdang hitheilou ding chi uhi. Kiphinnate alawhchin keileh tribal student tengteng in MU pawtsan ding a mansa uh ahihdan leng gen uhi.
State level Science Festival om ding
Imphal, May-2: Manipur Science & Technology Council, Imphal saina in May 11-15, 2016 sung National Institute of Electronics & Information Technology, Akampat, Imphal ah “Make in India : S & T driven Innovations” thupi zang in State level Science Festival zat hiding hi. Science Model Exhibition-cum-Competition, Science Short play competition, Spot painting competition, declamation contest, science quiz competition, best guide teacher award, best Appreciation Award, Science Film Show, Science behind miracle show, Puppet Show, Book Exhibition, IT Show leh atuamtuam om ding a, application form leng www.mastec.nic.in ah download theih ding a, May 9, 2016 tan in submit ngai ding hi.
Thaukapna KNF in hilhchian
Kangpokpi, May-2: KNF in April 22 a Shantipur mun a thaukhahna leh gari suamna tawh kisai ngawh ahihna uh nial in, thiltung theihpihlou uh chi uhi. KNF JMG member Rohan Kuki in thusuah abawl kimudan in Koirengei a Manipur Public School naupang Rakesh Shah (17) s/o (L) Dadan Shah kapliamna tawh kisai suizui lel uh chi a, huai tawh kisai a Assam Rifles pawlin KNF cadre James Paominthang Singson amat tungtang leng poisakthu puang hi.
‘Panthou’ leh anungzuite gari 12 hal in om
Imphal, May-2: Demigod a mi tamtak in akoih uh 'Panthou' chih a om, Mr. Hijam Rantan of Wangkhie Hijam Leirak leh anungzuite gari 12 tuni’n mipi lungkimloute’n halsak uhi. Thusuakin agendanin tuzing dak 7:30 velin Hijam Rantan leh anungzuite khawsungmite tawh ‘Panthou’ huangsung ah kiselbuai in buaina nastak piang in gari tamtak halsiat in om hi. Thiltung zak phetin M. Joy Singh, Dist. Magistrate, Imphal East in ‘Panthou’ omna kimlak teng ah 144 Cr PC puang hi. Mipi sousang tak omlai in fire brigade te lutsawm mahle uh lutsak hilou ua, police te panlakna ziakin zinglam dak 10:20 velin lut theipan uhi. ‘Panthou’ tawh kisai thusuak gendanin, April 18 in mipi tawh kinawktuahna om ngeita a, anungzuite kampau ziakin khawsungmite thangpai uh hi’n leng gen uhi. Huailou in ‘Panthou’ leh anungzuite’n gam liantak a opkhum uh tungtang thubuai om banah sun-le-zan a music ngaihtaktak leh generator ging ngaihtakte ziakin akimnai a omte tawh kituaklou uh hi’n kigen hi.
Mumbai ah Manipur numei mat in om
Imphal, May-2: Kum 25 mi Manipur numei khat Mumbai police te’n zan in man uh a, amah khoih sawm pasal 2 leng mat in om uhi. Police thusuak gendan in Birthday party zang khin a innlam zuan Manipur numei bangzahhiam, lampi a pailai pasal hon in ‘Nepali’ chi in houpih uh a, numeite’n leng a dawn kik ziakun pasal hon in vuaksawm in beng (slapped) uh a, sawtsim nung in soisa uhi. Hiai thiltung tawh kisai in numeite’n leng kivenbitna ding in pasal akhoihte suang in deng uh a, pasal khat alu liam hi. Thiltung tawh kisai in police ah pawlnih te’n a tuamtuak in complaint bawl uh a, numeite laka khat leh pasalte laka 2 mat in om uh hi’n kigen hi. Hiai thiltung tawh kisai TSA, Bengaluru in mawhpaihthu puang uh a, Manipur numei khat a inn kiang ua hihbuaite state govt in kintaka mankhe ding in ngen uhi.
BJP Manipur President di’n Ksh Bhabananda guang
Imphal, May-2: National BJP President Amit Shah in tuni’n Manipur Pradesh a President ding in Kshetrimayum Bhabananda Sharma guang hi’n BJP National General Secretary Arun Singh apan thusuakin taklang hi. Thusuak dungzui in Th Chaoba Singh in State Election Management Committee, Manipur BJP ah tuni akipan Convenor len ding hi. State BJP President thak Ksh. Bhabananda Sharma in adinmun tawh kisai in MLA hiam hilou in BJP worker maimai hi’n gen a, central leader-te’n muangtak a tanvou apiak ziakun kipahthu gen hi. Tunung a IMC election om ding pen BJP President alet nung adia hun poimawhtak hiding ahihdan leng gen a, tuahun a vualzawh ding atup pipen leh masapen hi’n gen hi. Congress tawh kisai in BJP pen Congress bang a innkuan khat vaihawmna maimai hilou a, BJP sung ah buaina omlou hi’n leng gen hi.
TUNI THUPI:
“Huan, mi khat tatleknain mi tengteng adinga siamlouh tansakna a tut mah bangin, mi khat diktatna thilhih-in mi tengteng adingin suahtakna leh hinna a hontun hi.”
– Romte- 5:18
EDITORIAL:
Media-te leh Press Day
Kumteng in May 3 kichi Press Day ahihkeileh World Press Day in zatin om a, May Day (May 1) tawh kinaih mahmah in om hi. Bangziaka Press Day zat a om hiam chih ngaihtuahtham ching mahmah hi. Media-te leh Press Day tawh kisai sehnih suahin khen lehang gending khop tamtak om dingin gintakhuai a, himahleh, hiai thu sautak a sut sawm ihikei hi. Tukum 2016 Press Day thupi dingin ‘Access to Information and Fundamental Freedoms - This Is Your Right!’ chih ahi. Hiai tungtang ah gentheih ding tamtak a om dinga, media-te pampaihna thupitak a om chih leng haih vual ahikei hi. World Press Freedom Day ahihleh UN General Assembly in December 1993 a hon bawlkhiak uh hi a, UNESCO's General Conference in lemsakpihna pia uhi. Tua tawh kitonin leitung pumpi ah May 3 pen World Press Freedom Day a zatin hong om hi. Media-te adingin ‘fundamental principles of press freedom’ ahihmanin kuapeuhin zahtak mahmah in kipahpih petmah a, tuaziakin hiai Ni poimawh kumteng in zangsek uhi.
Leitung a gamchangkangte adia media poimawhna theihsiamna Ni banga ngaih hi a, a theisiamloute adingin khawmial tawh kibanga ngaihin leng om hi. Koimun peuh ah media-te a poimawh mahmah uh a, a poimawhnate theite mun a khawvak a om dia, a theiloute lak khawmial in a tuamtou lai ding chih bangin ngaihdan om hi. Manipur telin India state tuamtuam banah leitung khawvel ah Media-te’ poimawhna theihsiam ahih chiangin khawvak hong om ngeidinga lam-et leh gintak ahi hi.
World Press Freedom Day 2016 kizang sukin kizang touta leh, ataktakin banga phattuamna om ding chih ngaihsut huai mahmah hi. Syria telin Muslim gam tuamtuam ah tulai in ISIS helpawlte a hat mahmah uh a, ut hunhun in Media personte manin numei-naupang muh tanpha in gawl-at suk zialzial mai uhi. Leitung pumpi a Muslim hatna bialte himhim ah media te’n gen le sak a nei nawnkei uh chi lehang khial lua ihikei dinga, nidang a Sri Lanka telin Tamilte’ hatna bial a LTTE-te chetna nep mahmah a, India a Maoists-te khawsakdan ISIS-te adingin bangmah hinawnlou ahihdan theihtheih in om hi.
Kuapeuhin a poimawh mahmah ahihleh publicity (kikap larna) ahi hi. Tua dingin mimal leh pawlpi kuapeuhin kikaplarna a ngaina chiat uh chi phot ni. A ngaina lou a om khak lele ngaihsiatin ngaikei ni. Minngaih (popularity) na dingin kikapkhiakna ana poimawh a, tua dingin media mah ahi hi. Himahleh, Manipur telin India state tuamtuam banah leitung mun tamtak ah media-te soisak leh gawl-at tanpha a om uhiam chih dotna liantak ahi hi. Media te’n zalentakin mit a muh uh, bil a azak uh gelhtheih uh a, bangchidan a athil muh uh suahkhetu leh pulaktute thah leh soisak a om toutou ding uhiam chih ngaihsut huai mahmah hi. Tua ziakin, Press Day 2016 i zat utawh kitonin kuapeuhin media-te soisakna tawpsanta leng a deih huai mahmah hi. Media-te i soisak leh ithah ziaka ithil demand lawhching ding ahihleh tua dingin media person hunkhop ut leh utlouh genlouh a ki-surrendered ding leng om hi maithei hi. Gam changkhangte’n media-te hihna leh zahhuaina thei uh a, gamchangkang loute’n amaute bangmah in ngailou uh hi’n leng muhtheihin om hi.
Media te’n zalenna liantak aneihna uh zahna pekawmin amau mimal ah enzawlou in a thilhihtheihna (rights) uh enkawm in gamtang leng bang a chidia? Union Home Ministry telin agency tuamtuam in media-te thugelhte niteng a en vengveng uh ahihthu bangleng i theih uh kisam a, mimal kimuhsitna ziak hiam ahihkei leh adangdang a, media-te bangmah lou a muhna in thil hoihsang in hoihlou lam piangsak khamawh zawlou ding hi. Tukum 2016 a Press Day i zat in i lakah thil kipahhuaitak hon suan ikinem mahmah a, tua dingin aneu pen apan alianpen tan, politician-te leh philanthropic orgn tuamtuam makaite leh student leader te’n media-te poimawhna limsak chiat leng thu hoih hong piang dingin i gingta hi. Huai igen kawmkawm in helpawl leader, govt official leh heutu tuamtuamte leng poimawh mahmah ding hi. Helpawlte’n leng thau sanga ‘Pen’ izahtak zawkni uh hongtung ngeingei ding hi.
MAIN ARTICLE:
MHJU team in Gialpi ziaka Henglep bial mipi haksatna enkhia
Henglep Sub-Divn sung a om Santing leh Chongkhozou area a paisa April 23, 2016 zingkal baihtak in vuah leh gial kithuah in nuai-ek a, mihing bangmah chi omkei mahleh tenna inn telin hangvulh ganta leh louma haichi kiphumsa tamtak hihsia hi. Huaithu tawh kisai amun mahmah-a enkhe di’n Manipur Express, Eimi Times Lamka Post, Zogam Today apan Manipur Hills Journalist Union (MHJU) team April 29, 2016 in zinkhia uh a, April 30, 2016 in Lamka hongtung kik uhi. MHJU team-te km 15 vel asau khe a pai in Saichang area a gial leh huihpi in ahihsiat Sangting (L), Santing Venglai, K. Zoar, Maumuol/Bunglakon, Kawnpi, Saichang, Chongchin, Sainoulian banah hongkiklam un Chongkhozou leh Aina khua-te enkhia uhi.
Spot inquiry
SDO/Henglep in thiltung tawh kisai a mun ah enkhia chi’n gen a, himaleh area mipi’n Santing (L) tanlel pha in, huai ah area V/A samkhom in report kaikhawm uh a, huaisiat diakna khua-te etkhiak hilou chi’n gen uhi. Bialtu MLA T. Manga Vaiphei, Misnister, PHED in leng a tang in mi sawl a, amaute’n inn sediak khen khat lim leh aneitu min la uh a, vangsiattuak (victims) thuakte panpihna bangmah pelou in paikik uh hidan in area mipi’n gen uhi. Sainoulian khua ah Inn 11 om a, huailak ah inn 5 naktak (belhtheihlouh) in dengsia a, tutan official visit omlou a, SDO record ah leng telkhalou ding chihna suak hi. Huai khuate ah tenna inn 76 naktakin hihsia a, inn 136 hahsiat kei mahleh bawlhoih hinailou a, thiltung ziakin mihing hinna mansuah omlou hi.
Medical team
Dist Administration saina in affected area ah free medical camp nei di’n Dr. C. Tombing Child specialist, Dr. Robinson Lalnunpuia MO, Dr. Immanuel Singson MO, Dr. A. Ibotombi MO, Mr. Solomon Block Finance Manager, ANM Kholalnei, Sobita Devi, Meher Sahni, Seitinpao Grade IV te’n April 28, 2016 in Saichang leh Chongkhozou area zuan uh a, NH-150 in a totkhak Sangting (L) leh Chongkhozou khua ah manmoh/kinawh takin dakkal 1/2 sunglel camp nei uh a, gial in a hihsiatna diak khuate’n medical camp omlang zakhalou hi’n gen uhi. Saichang area mite’n tutung tuahsiat tawh kisai a medical team honghoh ding lamleng theikhalou uh a, polio damdawi loungal medical tawh kisai mukha ngeilou uhi’n gen uhi. Huchi kal ah Sainoulian khua a om Lamkakholun tanu kum 1 ½ a upa Lamkneikim vuah leh gialkia in shock a, khawsik tawh thuah in tunitan halkhe nailou a, treatment hoihtak leng piak hilou a, innkuante’ beidawng in Sainoulian dakkal 1 ½ vel khe a pai in Santing (L) khua ah damdawi la in kuan uhi. Henglep PHC nuai a om hi uh a, Henglep naihsang in Lamka Damdawi Inn baihlam zawlai chi uhi.
The Present Situation of the people
Sonzalal of Kawnpi gendan in April 23, 2016 zingkal baihtak in theihkholh louhin vuah leh gialpi kithuah om a, huai in a khua uah tenna inn telin huangvulh ganta denglum a, louma haichi phumsa leng hawktui in taihmangsak hi’n gen hi. Niteng in giahnang inn bawlthak nasep nei gige uh a, sum leh pai zongman di’n omlou uhi’n gen hi. Annhum a neihsa teng uh leng vuahtui in hihsiat sak a, maban khawsaknang beidot-huai mahmah hi’n gen hi. Khen khat in Langva kilei in bawlthak leng om mahle uh a haksa diakte’n govt huhna ngak kawmin YMA leh mimal phatuamngai te’n a piakkhawm Silpaulin zangin inntung thuap uhi. Lunminthang Haokip, IAS, DC/CCpur in April 28, 2016 a Government of Manipur Vide No. DC (CCP)/DDMA/2012 pansan in Chief Secretary kiang ah report pia in, panpihna Dal quintal 15, Anntang quintal 1300, CGI sheets bundle 1250 telin nutrition item ngen mahleh tutan area mipi’n ngah nailou uhi. Henglep sub-division huamsung a Saichang, Maumuol, Munpi/Chiangpi leh Kawnpi khua ah relief camp kibawlkhia hi’n report mahleh tunitan in releif camp kibawlkhai khat mahleng muh hilou hi.
Development
Saichang area a om mipi’n development tawh kisa a MGNREGS chihlouh govt. facility/ schemes mulou uh a, BPL, AAY a neihlouh banuah PDS kichi leng theikha vetlou uh hi’n gen uhi. Water supply, medical, electric meivak (electricity) leh mobile network tunglou ahihman kithuzak tuahna (telecommunication) leh transportation hoihlouh ziakin haksatna liantak tuak uhi. Bialtu MLA in khat vei leng huai area sikkha nailou hi’n gen uh a, Santing leh Saichang kikal km 15 vel a sau 2013 kum in bialtu MDC Genneikhup Vaiphei in PMGSY nuai ah bawlsak a, khawkhal hun-in DI-407 lutthei mahleh tukhun in bel kingak theihlouh hi. Huai lampi ahihleh JCB zang a kibawl hi a, a tawtkhak khuate’n inn teng in thau man in NREGS sum thawh uhi’n leng gen uhi.
Relief
Saichang area a vangsiatna tuakte panpihnangin Young Mizo Association (YMA) in emergency relief committee bawlkhia in Chiengkawn bazar ah panpihna kaikhawm in area mipi kiang ah silpaulin telin anntang, meh leh thil tuamtuam ana hawmkhe ngeita uh a, huailou CJC (Church of Jesus Chris) leh Dongzakai Gangte, Chief of Hill-town in leng panpihna pia hi. Civil Society leh mimal tuamtuam apan panpihna ngahta mahle uh govt. apan tutan bangmah ngahlou uh hi’n area mipi apan kiza hi.
Lamka, May 2: Saichang area ah huihpi, vuahpi leh gialpi ziak a inn-le-lou, thil tuamtuam tamtak kisia-te panpih nang in Huihchim Media Foundation ten April 30, 2016 nitak in Chiengkawnpang bazar ah Charity Musical Nyte neih in om hi. Huai hun a sum kimukhia teng tuni zinglam dak 11:00 in Huihchim Editor Raymond Gangte in Chiengkawnpang a Relief Committee office ah Relief Committee Chairman S. Thienlaljoy Gangte’ khut ah Rs. 42,789/- pekhia hi. Chairman, Relief Committee in Huihchim Media in Saichang area a inn leh lou siate panpih nang a Charity Musical Nyte sai kipahpihthu gen a, Charity Musical Nyte a sum leh pai kimukhia-te zang in Relief Committee in Saichang area ah inn-le-lou siate panpih nang a zang ding hi’n gen hi. Huihchim Editor in Charity Musical Nyte a panpihna pe teng, aseppih lawm leh vualte, artistes-te tung ah kipahthu gen hi.
JAC leh MTMRC in khualzinna report pia
Lamka, May-2: JAC against Anti-Tribal Bills leh Manipur Tribal Movement Road Construction makai Aizawl a zinte zan nitaklam in Lamka hongtung uh a, tusun dak 12:00 in IB Road a JAC Information Centre, KKL Complex ah khualzinna report pia uhi. H. Mangchinkhup, Chief Convenor in Mizo Zirlai Pawl (MZP) Gen HQ, CYMA telin political party tuamtuam a makaite kimuhpih uh a, MNF President Zoramthanga, ZNP President Lalduhawma banah Civil Organization teng leng kimuhpih uh hidan in gen hi. April 29, 2016 in Mizoram Chief Minister Lal Thanhawla kimuhpih in thil tuamtuam tamtak genkhawm uh a, Manipur Govt in Bill 3 a pass-te singtangmite a dingin vangsiatna himahleh kipumkhatna hontun ahihman in a lehlam daih ah vualzawlna (Blessing in disguise) ahi chi a, buaina leh haksatna ah panpih dia mansa a om uh hi’n leng gen hi. Lawhchinna dingin kithutuak a, pankhawm poimawh chi’n gen hi.
G. Nengdouthang, Chairman, MTMRC in maban ah lampi puahthakna tawh kisai a Singngat JAC-te tawh programme zatkhawm hiding in gen a, Aizawl ah political party leh organization tuamtuamte a kimuhpihna hun uah lampi bawlna toh kisai report pia hi. Tua banah, Thuangtam gam a Guite Road bawl a om Bharti Infrastructure Company Ltd. te nasepna leng enkhia uh a, a suang (stone) zat uh hoihlou a, tuadan ahihleh lungtun huailou ding hi’n gen hi. Lampi ahihleh Singjamei a om Ibochouba, Special Contractor etkai hi a, tulel in JCB 1 leh Truck 3 zang in nasem hi. Aizawl ah political party leh organization tuamtuamte a kimuhpih hun uah lampi (Guite Road) puahthakna tawh kisai report pia uh a, Mizoram Chief Minister in huai lampi pen inter-state tawh kisaikha ahihman in duhthusam in kigolh theikei mahleh, panlak theihna chianga pang ding a chiam hi’n gen hi.
Rayburn College in Graduation Day zang
Lamka, May-2: Rayburn College Degree Section te’n tuni zinglam dak 10:30 in Rayburn Chapel ah tukum graduate ding student-te ‘Graduation Day 2016’ zatpih uh a, huai hun ah Rev. Khen P. Tombing, Principal, Rayburn College in Graduate ding student-te thumsak in vualzawlna ngetsak hi. Prof. Dr. N. Mohendro Singh, Academic Adviser, Rayburn College in graduation message gen a, lawhchin nangin mahni kithunun leh thuman poimawh a, thil bangteng sang a siamsinna mah masapen a koih di’n student-te hasuan hi. Rayburn College in thupi dia a zat ‘Sinin, Semin, Zuun’ in chih pen kuapeuh in lungsim a vawm den a, khawtang adia sin a, sem leh zun dingin ngen hi. Tutung in BA (Sociology) ah student 15, BA (Geography) ah 31, BA (Pol. Science) ah 56, BA (History) ah 40, BA (English) ah 18 leh B. Com (Honours) ah student 40 kigawm in student 212 graduate ding uhi.
DC makaih in meeting om
Lamka, May 2: DC/CCpur makaih in ama’ office chamber ah tuni zinglam in SDO/BDO te’n meeting nei uh a, April 2016 kha a huihpi, vuahpi, gialpi in inn-le-lou, thil tuamtuam ahihsiat kikum in, Sub-division wise ah list enkhawm uhi. Manipur govt apan relief fund hongtun hunhun a victims-te kiangah panpihna piak dingdan leng kikum uh a, antang indent bawl ding, langva tel a thil poimawh tuamtuam bazar ah leithawh ding hi’n kigen hi.
Huihpi ziakin innbang kichim
Lamka, May-2: Pearsonmun Vengkhang a Moria EBCC kiang ah zan zinglam dak 2:40 vela huihpi nung lai in building inn bang khat kichim hi. Tua inn ah teklei tamkhop lengkhia in lupna tung dengkha a, naupang khat delh liam hi. Inn neitu S. Haukhansuan s/o (late) Awnphung Samte hi a, thiltung hun in azi, tapa leh anu om uh a, amah asepna mun ah om hi. Thukizadan in singzawl tung a teklei kilem a, cement khuam ahoihlouh ziakin huihpi hattak in amut tawh kiton a kichimsia hiding in kigen hi. Teklei in a deng khak Lianmalsawm (6) pheipi dulh mahleh serious lou hi. Zingkal in khawsung a mi phatuamngaite’n delh in hahsiangsak uhi.
ATML te’n support puang
Lamka, May 2: Manipur University a DEAN Committee in ST reservation 33% apan 7.5% a hihniam ding leh MU huamsung ah Christian-te biakna kham (ban) thu a puang uh ATSUM leh MUTSU in a kalh (oppose) tungtang uh ATML te’n genkhawm in support puang in President leh Secy. min in Press Release suah uhi. ATML in ataklatna ah MU a DEAN committee thusuah, Manipur govt in Anti Tribal Bills 3 sepsuahna a first step hi a, huai Act ahih ding ATML in doudal ding hi'n taklang uhi.
Scientist ‘D’ apan 'E' ah kaisang
Lamka, May 2: Upa Dr. Zawlthanglien Changsan tulel a Ministry of Environment & Forest, govt of India nuai a Central Pollution Control Board, North Eastern Zonal Office, Shillong a semlel Scientist ‘D’ apat tuni’n Scientist ‘E’ in kaisang hi.
Indian Postal Service Group ‘A’ ah kaisang
Lamka, May 2: Zopawllien Hmar s/o (late) H.R. Chunga of Hmarkhawlien, Chief Post Master, General office, North East Circle Shillong, Postal Service, Group "B" apan tunaizek in Indian Postal Service , Group "A" ah kaisang hi.
2nd batch music training ding honna
Lamka, May-2: Rev. Thangjapao, Director Youth & Music, ECA in Molnom a David Kakap Rock Guiter Training Centre ah tunitaklam dak 3:30 in tukum adia 2nd batch training dingte Pathian kiang thumsakna, training honna leh training atelding student-te hanthawnna nei hi. Training ah mi 20 tel in amau kha 3 sung basic course leh advance course sinsak ding uhi.
Lailam Leibul ah pipe leak
Lamka, May-2: Khuga Dam apan Lamka khawpi sung tui piakna pipe tuni sunma dak 11:30 velin Lailam Lei bul ah keh a, department te’n delhpah in bawlhoih ngal uhi. Pipe ahihleh Gasket kisiat ziaka leak hidan in deptt te’n gen uhi. Tuabangkal ah, Lamka khawpi a tengte’n Khuga Dam apan tuisiang dawn ding ngahpan ta in, tui ah haksatna kiam deuh in kilang mahleh permit nei veng khenkhat ah tui a kai lai in veng dang ah kailou a, vengsung khat lel a leng a kaina tuam om in, kha 2 sung bang tui kai mulou leng om hi’n thu kiza hi. Permit nei khempeuh in tui a ngah theih nang ua deptt in pan alak thak deihhuai sakthu tamtak in gen uhi.
KKL Kaimai block election nei
Lamka, May 2: Kuki Khanglai Lawmpi (KKL) Jiri/Tamenglong (Kaimai) block election tuni’n Kaimai Community Hall ah om a, makai telching thak teng Capt. Lalsem, C.S.M .Salvation Army Corps in Pathian kiangah thumsak hi. Kum 2016-2019 sung KKL Kaimai block makaite President- Paoneisang Kipgen; Vice President- Paoneithang Singsit; Secretary- Kamminthang Haokip;Asst Secy. Ngamneipao Haokip; Secy. Finance-Seiminmang Khongsai; Treasurer-Vahneo Haokip; Secy. Social & Culture-Paulalgen Neihsial; Secy. Inf. Kaikapthang Kipgen; Asst. Secy. Inf. Laljathang Haokip, Val Upa (Tollaipao)-Kamkhogin Chongloi ban ah Adviser in Kailenmang Singson leh K. Mangcha Kipgen telching uhi.
AMFA Vice President di’n ching
Lamka, May 2: All Manipur Football Assn. (AMFA) office, Polo Ground , Imphal ah zan in AMFA kum 2016-2020 sung makai ding election om a, President in Imphal West apan Sana Tomba telching uhi. Vice President mi 5- Lalvullien Zote @ Vula of Rengkai, CCpur; Mangngol Chao Singh, Kakching; Wangtam Kaser, MPS, Ukhrul; Shyamno Singh, Thoubal leh Yaima Singh, Bishnupur ban ah Treasurer in Dinamani Singh, Imphal telching uhi. CDSA President Lalvullien Zote bel term lui in AMFA Vice President in telching in om a, AMFA paidan in President, Vice President mi 5 leh Treasurer elected hi uh a, Office bearer dangte ahihleh elected teng in aguan (nominate) uh hi’n kigen hi.
Shillong ah study tour in pai uh
Lamka, May-2: Henkhopao Haokip, Adviser, Thadou-Kuki Students’ Union (TKSU) GHQ in tuzing dak 7:30 in CCpur college ah TKSU CCpur College Branch apan student 60 vel Shillong ah education tour paiding in sawlkhia (flag-off) a, Pastor Tongkai Haokip, Koite Lui Area Pastor, ECA in Pathian kiangah thumsak hi. Study tour te’n Shillong ah Cheranpunji, Maushynran, Sweet fall tel in mun tuamtuam pha ding uh a, May 5, 2016 in Lamka hongtung kik nawn ding uhi.KWU leh KSO/Nagaland te’n vaidawn uh
Lamka, May 2: Kuki Women Union, Nagaland leh KSO Nagaland makai te’n zan sun in Dimapur Airport ah Kochi, Kerala State ah April 27, 2016 a Miss Queen of India, 2016 competition atel Miss Veineinem Singson of Athibung, Nagaland vaidawnna nei uhi. Competition ah Veineinem Singson in ‘Miss East Queen’, ‘Miss Viewer's Choice’ leh ‘Beautiful Hair’ title ngah hi.
Lampi lai ah hawktui luang
Lamka, May-2: Tuni sunnung a vuahzuk hun in khawpi sung a hawkguam (nullah) hoihlouh ziakin lampi lai ah hawktui luang a, Tedim road ah gari taituahte leh khe apaite ading in nawngkai mahmah hi. IB road, Red Cross road, Thangzam road banah New Bazar area a hawktui leh niin tamtak Tedim road ah luanglut suk a, mihing adi’n damtheih huailou in namsia hi. Vuahzuk hun a tedim road ah hawktui aluan nawnlouh nang in hawkguam (nullah) hoihtak a hahsiang ngai hi’n kigen hi.Phiamphu Innkuan Committee in ngen
Lamka, May-2: Phiamphu Innkuan Committee te’n asanggampa uh T. Thangsianbiak @ Biabiak tulel a Ginsuanhau, MLA (Singngat A/C) PRO leh Zou Youth Organisation, Imphal block a Vice President lenlel, genthei leh haksa taka azi tawh ta 4 banah anu enkawl a Laimanai, Imphal a khawsa April 26, 2016 nitaklam a meltheihlouh galvantawi dia gintakte’n apimang uh, innsungmite’n pawna mahmah uh hi’n taklang uhi. Huaiziakin Biabiak kemtute’n hehpihtak leh damtak a khahkhe dingin Jesu Kris min in ngen uhi.
Gospel Music Video Album hong ding
Lamka, May-2: Rev Dr. Luaichinthang in May 5, 2016 zinglam dak 10:00 in Hmuia Veng a Pasikhawm Restaurant ah NEO Vision te produced na nuai a Miss Nemsiam sak ‘Itna Lamdang’ Gospel Music Video Album thak hongkhia in Pathian kiang ah lan (dedicate) ding hi.
SUUNNA:
Lunman (93) m/o Lamkhopau of HQ veng tuzing baihtak dak 1:30 velin teknat in si a, sunnung in HQ Veng hanmual ah kivui hi.
Kimkhochong (83) m/o Dalson of B. Vengnuom, April 30 nitak in teknat in si a, zan in B. Vengnuom hanmual ah kivui hi.
Hatniang (80) m/o Langzapau of Zion Veng, Rengkai zan sunnung dak 12:30 vel in awmna in si a, tuni’n Simveng hanmual ah kivui hi. Hatniang’ bel STC GHQ a President leh Zomi Council a Chairman lenlel B. Dongzalian’ nu ahi.
Upa V. Thangkholun (68) h/o Niangngaihching @ Chingi of Vengnuam, New Lamka zan (May 1) zing dak 5:00 velin zunkhum ziakin si a, sunnung in YPA hanmual, New Lamka ah kivui hi.
Pauzalam (65) h/o Mankhanngai of Mata, zan nitak dak 10:30 velin cancer in si a, tuni’n Mata hanmual ah kivui hi.
Khawlnu (64) w/o (late) Seithang Lupheng of D Phailien, lungtang natna ziakin New Delhi ah zanhal masa in si a, aluang hong kipua in, zanin D Phailien hanmual ah vui in om hi.
Zenngaihching (57) w/o Thangkhanlian Guite of Mission Veng, zan zingkal baihtak dak 1:00 vel in hepatitis in si a, nitaklam in Lamka hanmual ah kivui hi.
Samuel Mangjapao Kipgen(40) h/o Ngaineilam @ Boinu of Bijang, tuni zingkal in sungna in si a, nitaklam in Bijang hanmual ah kivui hi.
Demkhosei Touthang (31) s/o (late) Ngamkholet of Bijang, April 30, 2016 nitak in sungna in si a, zan in Bijang hanmual ah kivui hi.
IMPHAL NEWS:
Ni 2 sung Manipur University shutdown puang
Imphal, May-2: Manipur University Tribal Students' Union (MUTSU) leh ATSUM pawlin MU Dean's Committee thupukna Resolution No.2 (a) and (b) deihlouh latsakna a April 30 akipan campus sunga Peaceful Sit-in-Protest a neih uh University Authority in ngaihsaklou chih ziakin May 3 & 4 University pumpi Total Shutdown puang uhi. Hiai Total Shutdown sungin Vice-Chancellor kianga Memorandum apiak uh ngaihsak ahihkeileh kiphinna khauh zawsem nei ding uh hi’n MUTSU makaite’n gen uhi. Dean Committee pawlin 2013-14 a Manipur High Court in order apiaksa reservation ST 31% pen kitheihmawh bawl in, UGC dungzui in 7.5% zat ding in thupukna bawl uh hi’n leng MUTSU makaite’n gen uh a, singtangmite nelhsiahna thupitak hi’n leng puang uhi. MUTSU pawlin agenzelna uah hiai reservation zat ahihleh academic session thak akipan sepna tawh kisai Group B & C leh MA course tuamtuam a admission ah singtangmite ading vangsiatna tawpkhawk hiding chi uhi. Central Govt. order dungzui in ST ading Manipur ah reservation 34% himahleh tulelin 31% zuih a om hi’n leng MUTSU makaite’n gen uh a, hiai khek lamdang hitheilou ding chi uhi. Kiphinnate alawhchin keileh tribal student tengteng in MU pawtsan ding a mansa uh ahihdan leng gen uhi.
State level Science Festival om ding
Imphal, May-2: Manipur Science & Technology Council, Imphal saina in May 11-15, 2016 sung National Institute of Electronics & Information Technology, Akampat, Imphal ah “Make in India : S & T driven Innovations” thupi zang in State level Science Festival zat hiding hi. Science Model Exhibition-cum-Competition, Science Short play competition, Spot painting competition, declamation contest, science quiz competition, best guide teacher award, best Appreciation Award, Science Film Show, Science behind miracle show, Puppet Show, Book Exhibition, IT Show leh atuamtuam om ding a, application form leng www.mastec.nic.in ah download theih ding a, May 9, 2016 tan in submit ngai ding hi.
Thaukapna KNF in hilhchian
Kangpokpi, May-2: KNF in April 22 a Shantipur mun a thaukhahna leh gari suamna tawh kisai ngawh ahihna uh nial in, thiltung theihpihlou uh chi uhi. KNF JMG member Rohan Kuki in thusuah abawl kimudan in Koirengei a Manipur Public School naupang Rakesh Shah (17) s/o (L) Dadan Shah kapliamna tawh kisai suizui lel uh chi a, huai tawh kisai a Assam Rifles pawlin KNF cadre James Paominthang Singson amat tungtang leng poisakthu puang hi.
‘Panthou’ leh anungzuite gari 12 hal in om
Imphal, May-2: Demigod a mi tamtak in akoih uh 'Panthou' chih a om, Mr. Hijam Rantan of Wangkhie Hijam Leirak leh anungzuite gari 12 tuni’n mipi lungkimloute’n halsak uhi. Thusuakin agendanin tuzing dak 7:30 velin Hijam Rantan leh anungzuite khawsungmite tawh ‘Panthou’ huangsung ah kiselbuai in buaina nastak piang in gari tamtak halsiat in om hi. Thiltung zak phetin M. Joy Singh, Dist. Magistrate, Imphal East in ‘Panthou’ omna kimlak teng ah 144 Cr PC puang hi. Mipi sousang tak omlai in fire brigade te lutsawm mahle uh lutsak hilou ua, police te panlakna ziakin zinglam dak 10:20 velin lut theipan uhi. ‘Panthou’ tawh kisai thusuak gendanin, April 18 in mipi tawh kinawktuahna om ngeita a, anungzuite kampau ziakin khawsungmite thangpai uh hi’n leng gen uhi. Huailou in ‘Panthou’ leh anungzuite’n gam liantak a opkhum uh tungtang thubuai om banah sun-le-zan a music ngaihtaktak leh generator ging ngaihtakte ziakin akimnai a omte tawh kituaklou uh hi’n kigen hi.
Mumbai ah Manipur numei mat in om
Imphal, May-2: Kum 25 mi Manipur numei khat Mumbai police te’n zan in man uh a, amah khoih sawm pasal 2 leng mat in om uhi. Police thusuak gendan in Birthday party zang khin a innlam zuan Manipur numei bangzahhiam, lampi a pailai pasal hon in ‘Nepali’ chi in houpih uh a, numeite’n leng a dawn kik ziakun pasal hon in vuaksawm in beng (slapped) uh a, sawtsim nung in soisa uhi. Hiai thiltung tawh kisai in numeite’n leng kivenbitna ding in pasal akhoihte suang in deng uh a, pasal khat alu liam hi. Thiltung tawh kisai in police ah pawlnih te’n a tuamtuak in complaint bawl uh a, numeite laka khat leh pasalte laka 2 mat in om uh hi’n kigen hi. Hiai thiltung tawh kisai TSA, Bengaluru in mawhpaihthu puang uh a, Manipur numei khat a inn kiang ua hihbuaite state govt in kintaka mankhe ding in ngen uhi.
BJP Manipur President di’n Ksh Bhabananda guang
Imphal, May-2: National BJP President Amit Shah in tuni’n Manipur Pradesh a President ding in Kshetrimayum Bhabananda Sharma guang hi’n BJP National General Secretary Arun Singh apan thusuakin taklang hi. Thusuak dungzui in Th Chaoba Singh in State Election Management Committee, Manipur BJP ah tuni akipan Convenor len ding hi. State BJP President thak Ksh. Bhabananda Sharma in adinmun tawh kisai in MLA hiam hilou in BJP worker maimai hi’n gen a, central leader-te’n muangtak a tanvou apiak ziakun kipahthu gen hi. Tunung a IMC election om ding pen BJP President alet nung adia hun poimawhtak hiding ahihdan leng gen a, tuahun a vualzawh ding atup pipen leh masapen hi’n gen hi. Congress tawh kisai in BJP pen Congress bang a innkuan khat vaihawmna maimai hilou a, BJP sung ah buaina omlou hi’n leng gen hi.
TUNI THUPI:
“Huan, mi khat tatleknain mi tengteng adinga siamlouh tansakna a tut mah bangin, mi khat diktatna thilhih-in mi tengteng adingin suahtakna leh hinna a hontun hi.”
– Romte- 5:18
EDITORIAL:
Media-te leh Press Day
Kumteng in May 3 kichi Press Day ahihkeileh World Press Day in zatin om a, May Day (May 1) tawh kinaih mahmah in om hi. Bangziaka Press Day zat a om hiam chih ngaihtuahtham ching mahmah hi. Media-te leh Press Day tawh kisai sehnih suahin khen lehang gending khop tamtak om dingin gintakhuai a, himahleh, hiai thu sautak a sut sawm ihikei hi. Tukum 2016 Press Day thupi dingin ‘Access to Information and Fundamental Freedoms - This Is Your Right!’ chih ahi. Hiai tungtang ah gentheih ding tamtak a om dinga, media-te pampaihna thupitak a om chih leng haih vual ahikei hi. World Press Freedom Day ahihleh UN General Assembly in December 1993 a hon bawlkhiak uh hi a, UNESCO's General Conference in lemsakpihna pia uhi. Tua tawh kitonin leitung pumpi ah May 3 pen World Press Freedom Day a zatin hong om hi. Media-te adingin ‘fundamental principles of press freedom’ ahihmanin kuapeuhin zahtak mahmah in kipahpih petmah a, tuaziakin hiai Ni poimawh kumteng in zangsek uhi.
Leitung a gamchangkangte adia media poimawhna theihsiamna Ni banga ngaih hi a, a theisiamloute adingin khawmial tawh kibanga ngaihin leng om hi. Koimun peuh ah media-te a poimawh mahmah uh a, a poimawhnate theite mun a khawvak a om dia, a theiloute lak khawmial in a tuamtou lai ding chih bangin ngaihdan om hi. Manipur telin India state tuamtuam banah leitung khawvel ah Media-te’ poimawhna theihsiam ahih chiangin khawvak hong om ngeidinga lam-et leh gintak ahi hi.
World Press Freedom Day 2016 kizang sukin kizang touta leh, ataktakin banga phattuamna om ding chih ngaihsut huai mahmah hi. Syria telin Muslim gam tuamtuam ah tulai in ISIS helpawlte a hat mahmah uh a, ut hunhun in Media personte manin numei-naupang muh tanpha in gawl-at suk zialzial mai uhi. Leitung pumpi a Muslim hatna bialte himhim ah media te’n gen le sak a nei nawnkei uh chi lehang khial lua ihikei dinga, nidang a Sri Lanka telin Tamilte’ hatna bial a LTTE-te chetna nep mahmah a, India a Maoists-te khawsakdan ISIS-te adingin bangmah hinawnlou ahihdan theihtheih in om hi.
Kuapeuhin a poimawh mahmah ahihleh publicity (kikap larna) ahi hi. Tua dingin mimal leh pawlpi kuapeuhin kikaplarna a ngaina chiat uh chi phot ni. A ngaina lou a om khak lele ngaihsiatin ngaikei ni. Minngaih (popularity) na dingin kikapkhiakna ana poimawh a, tua dingin media mah ahi hi. Himahleh, Manipur telin India state tuamtuam banah leitung mun tamtak ah media-te soisak leh gawl-at tanpha a om uhiam chih dotna liantak ahi hi. Media te’n zalentakin mit a muh uh, bil a azak uh gelhtheih uh a, bangchidan a athil muh uh suahkhetu leh pulaktute thah leh soisak a om toutou ding uhiam chih ngaihsut huai mahmah hi. Tua ziakin, Press Day 2016 i zat utawh kitonin kuapeuhin media-te soisakna tawpsanta leng a deih huai mahmah hi. Media-te i soisak leh ithah ziaka ithil demand lawhching ding ahihleh tua dingin media person hunkhop ut leh utlouh genlouh a ki-surrendered ding leng om hi maithei hi. Gam changkhangte’n media-te hihna leh zahhuaina thei uh a, gamchangkang loute’n amaute bangmah in ngailou uh hi’n leng muhtheihin om hi.
Media te’n zalenna liantak aneihna uh zahna pekawmin amau mimal ah enzawlou in a thilhihtheihna (rights) uh enkawm in gamtang leng bang a chidia? Union Home Ministry telin agency tuamtuam in media-te thugelhte niteng a en vengveng uh ahihthu bangleng i theih uh kisam a, mimal kimuhsitna ziak hiam ahihkei leh adangdang a, media-te bangmah lou a muhna in thil hoihsang in hoihlou lam piangsak khamawh zawlou ding hi. Tukum 2016 a Press Day i zat in i lakah thil kipahhuaitak hon suan ikinem mahmah a, tua dingin aneu pen apan alianpen tan, politician-te leh philanthropic orgn tuamtuam makaite leh student leader te’n media-te poimawhna limsak chiat leng thu hoih hong piang dingin i gingta hi. Huai igen kawmkawm in helpawl leader, govt official leh heutu tuamtuamte leng poimawh mahmah ding hi. Helpawlte’n leng thau sanga ‘Pen’ izahtak zawkni uh hongtung ngeingei ding hi.
MAIN ARTICLE:
MHJU team in Gialpi ziaka Henglep bial mipi haksatna enkhia
Henglep Sub-Divn sung a om Santing leh Chongkhozou area a paisa April 23, 2016 zingkal baihtak in vuah leh gial kithuah in nuai-ek a, mihing bangmah chi omkei mahleh tenna inn telin hangvulh ganta leh louma haichi kiphumsa tamtak hihsia hi. Huaithu tawh kisai amun mahmah-a enkhe di’n Manipur Express, Eimi Times Lamka Post, Zogam Today apan Manipur Hills Journalist Union (MHJU) team April 29, 2016 in zinkhia uh a, April 30, 2016 in Lamka hongtung kik uhi. MHJU team-te km 15 vel asau khe a pai in Saichang area a gial leh huihpi in ahihsiat Sangting (L), Santing Venglai, K. Zoar, Maumuol/Bunglakon, Kawnpi, Saichang, Chongchin, Sainoulian banah hongkiklam un Chongkhozou leh Aina khua-te enkhia uhi.
Spot inquiry
SDO/Henglep in thiltung tawh kisai a mun ah enkhia chi’n gen a, himaleh area mipi’n Santing (L) tanlel pha in, huai ah area V/A samkhom in report kaikhawm uh a, huaisiat diakna khua-te etkhiak hilou chi’n gen uhi. Bialtu MLA T. Manga Vaiphei, Misnister, PHED in leng a tang in mi sawl a, amaute’n inn sediak khen khat lim leh aneitu min la uh a, vangsiattuak (victims) thuakte panpihna bangmah pelou in paikik uh hidan in area mipi’n gen uhi. Sainoulian khua ah Inn 11 om a, huailak ah inn 5 naktak (belhtheihlouh) in dengsia a, tutan official visit omlou a, SDO record ah leng telkhalou ding chihna suak hi. Huai khuate ah tenna inn 76 naktakin hihsia a, inn 136 hahsiat kei mahleh bawlhoih hinailou a, thiltung ziakin mihing hinna mansuah omlou hi.
Medical team
Dist Administration saina in affected area ah free medical camp nei di’n Dr. C. Tombing Child specialist, Dr. Robinson Lalnunpuia MO, Dr. Immanuel Singson MO, Dr. A. Ibotombi MO, Mr. Solomon Block Finance Manager, ANM Kholalnei, Sobita Devi, Meher Sahni, Seitinpao Grade IV te’n April 28, 2016 in Saichang leh Chongkhozou area zuan uh a, NH-150 in a totkhak Sangting (L) leh Chongkhozou khua ah manmoh/kinawh takin dakkal 1/2 sunglel camp nei uh a, gial in a hihsiatna diak khuate’n medical camp omlang zakhalou hi’n gen uhi. Saichang area mite’n tutung tuahsiat tawh kisai a medical team honghoh ding lamleng theikhalou uh a, polio damdawi loungal medical tawh kisai mukha ngeilou uhi’n gen uhi. Huchi kal ah Sainoulian khua a om Lamkakholun tanu kum 1 ½ a upa Lamkneikim vuah leh gialkia in shock a, khawsik tawh thuah in tunitan halkhe nailou a, treatment hoihtak leng piak hilou a, innkuante’ beidawng in Sainoulian dakkal 1 ½ vel khe a pai in Santing (L) khua ah damdawi la in kuan uhi. Henglep PHC nuai a om hi uh a, Henglep naihsang in Lamka Damdawi Inn baihlam zawlai chi uhi.
The Present Situation of the people
Sonzalal of Kawnpi gendan in April 23, 2016 zingkal baihtak in theihkholh louhin vuah leh gialpi kithuah om a, huai in a khua uah tenna inn telin huangvulh ganta denglum a, louma haichi phumsa leng hawktui in taihmangsak hi’n gen hi. Niteng in giahnang inn bawlthak nasep nei gige uh a, sum leh pai zongman di’n omlou uhi’n gen hi. Annhum a neihsa teng uh leng vuahtui in hihsiat sak a, maban khawsaknang beidot-huai mahmah hi’n gen hi. Khen khat in Langva kilei in bawlthak leng om mahle uh a haksa diakte’n govt huhna ngak kawmin YMA leh mimal phatuamngai te’n a piakkhawm Silpaulin zangin inntung thuap uhi. Lunminthang Haokip, IAS, DC/CCpur in April 28, 2016 a Government of Manipur Vide No. DC (CCP)/DDMA/2012 pansan in Chief Secretary kiang ah report pia in, panpihna Dal quintal 15, Anntang quintal 1300, CGI sheets bundle 1250 telin nutrition item ngen mahleh tutan area mipi’n ngah nailou uhi. Henglep sub-division huamsung a Saichang, Maumuol, Munpi/Chiangpi leh Kawnpi khua ah relief camp kibawlkhia hi’n report mahleh tunitan in releif camp kibawlkhai khat mahleng muh hilou hi.
Development
Saichang area a om mipi’n development tawh kisa a MGNREGS chihlouh govt. facility/ schemes mulou uh a, BPL, AAY a neihlouh banuah PDS kichi leng theikha vetlou uh hi’n gen uhi. Water supply, medical, electric meivak (electricity) leh mobile network tunglou ahihman kithuzak tuahna (telecommunication) leh transportation hoihlouh ziakin haksatna liantak tuak uhi. Bialtu MLA in khat vei leng huai area sikkha nailou hi’n gen uh a, Santing leh Saichang kikal km 15 vel a sau 2013 kum in bialtu MDC Genneikhup Vaiphei in PMGSY nuai ah bawlsak a, khawkhal hun-in DI-407 lutthei mahleh tukhun in bel kingak theihlouh hi. Huai lampi ahihleh JCB zang a kibawl hi a, a tawtkhak khuate’n inn teng in thau man in NREGS sum thawh uhi’n leng gen uhi.
Relief
Saichang area a vangsiatna tuakte panpihnangin Young Mizo Association (YMA) in emergency relief committee bawlkhia in Chiengkawn bazar ah panpihna kaikhawm in area mipi kiang ah silpaulin telin anntang, meh leh thil tuamtuam ana hawmkhe ngeita uh a, huailou CJC (Church of Jesus Chris) leh Dongzakai Gangte, Chief of Hill-town in leng panpihna pia hi. Civil Society leh mimal tuamtuam apan panpihna ngahta mahle uh govt. apan tutan bangmah ngahlou uh hi’n area mipi apan kiza hi.
No comments:
Post a Comment