Manipur Express | May 19, 2016

HEADLINES:
Assam a Congress leh West Bengal a Trinamool party-te nervous 
State 5 a Assembly election vote sim kipan ding

New Delhi, May-18: New Delhi, May-18:  Assam, West Bengal, Tamil Nadu, Kerala leh Puducherry a Assembly election om tawh kisai May 19, 2016 (Ningani) zingsang dak 8.00 akipan in counting centre tuamtuam ah vote sim kipan ding hi. Sun hunlai velin state tuamtuam bang party hat ding hiam chih kilang panta ding a, zingsang dak 8.00 akipan dakkal 6/7 sungin final result puankhiak vek ahih gintak-huai chi’n Election Commission of India official khat in gen hi. Assam ah Chief Minister Tarun Gogoi makaihna Congress leh BJP Chief Ministerial candidate Sarbananda Sonowal makaihna BJP kibei nasa mahmah uh a, Centre vaihawm BJP a kigolh nasat mahmah ziakin Congress-te nervous sim uhi.West Bengal ah leng Chief Minister Mamata Banerjee makaihna Trinamool Congress-te hat din kigingta mahle uh Congress leh Left Parties kigawmte banah alehlam ah BJP-te leng kisan mahmah uh a, thil omdan ding genkholh haksa mahmah chih ahi hi.
    Assam  assembly election ah candidate 1064 om a, huaite laka kuakua ching hiam chih a Counting Centre 51  a vote sim zawh in kichian ding hi.Tutung election ah Congress party in kikoipih party nei tuanlou a, alangkhat ah BJP pawl bel AGP leh BPF tawh pangkhawm uh a,kimuang mahmah uhi. Muslim mi AIUDF chief Badarudin Ajmal makaih in AIUDF pawlin leng candidate hunkhop nei uhi. West Bengal a Counting Centre 90 bikhiah a omte kimkot ah 144 Cr PC pansan in prohibitory order puan hi a, security khauhtak venbitna nuai ah vote sim hiding hi.
    Tamil Nadu ah counting centre 68 om ding a, Tenkati Polling station ah tuni in repoll om a, zingsang dak 7.00 akipan vote khiak ahi hi.Tuma a polling day ah EVM a mock entries kikoih lakkhiak ahihlouh ziakin vote khiak thak hi a, Karur distict a Aravakurichi leh Thanjavur constituency ah voter-te laka sum-le-pai tampi hawmkhiak a om chih complaint tamluat ziakin May 23, 2016 in vote khiak thak hiding chi’n Election Commission in puang hi.
Kerala Assembly seat 140 adia vote simna ding counting centre teng ah counting table 15 chiat koih hiding chi’n Thiruvananthapuram akipan thusuak in gen hi.Puducherry a region 4 ah assembly constituency 30 a vote simna dingin counting centre 5 bikhiah hi a,huaite bel Puducherry ah 2 hiding a, Karaikal, Mahe leh Yanam ah 1 chiat om ding hi. Puducherry ah a tangpi in constituency 1 zel ah voter 30,000 vel om a, result masapen zinglam dak 10.00 a puakhiak man hidingin gintak ahi hi.


Buaina thupilua omlou; dakkal 48 sung Total Shutdown bei
Lamka, May-18: JAC against Anti-Tribal Bills in May 16, 2016 zankim akipan dakkal 48 sung Manipur singtanggam  district tenga Total Shutdown apuan uh tuni zankim in bei hi. Total shutdown om sungin khauh mahmah a, mun tuamtuam ah kikawmtuahna lampite khaktan in om a, khawpi sungah gari tai muhding omlouh banah dukan, hotel, bazaar, school leh college-te bank leh office tamzaw  kikhak hi. Lamka khawpi ah shutdown akhauh mahmah lai in Tuibuong area ah bel khauhlou a, dawr/dukan kikhak omzek mahleh a tamzaw kihong hi. Imphal-Lamka kikal kawmtuah a passenger pua Winger-te leh khawpi sunga Diesel Auto-te Tuibuong bazar a kidawh in service uh a, hun dang bangin bel passenger ngahlou uh hi’n auto driver khat in gen hi.
Singtanggam district tengah total shutdown khauh mahmah a, United Naga Council (UNC), All Tribal Chiefs Forum, Manipur leh Zeliangrong Youth Front (ZYF) in leng shutdown lawhchinna ding in khauhtak in panla uh a, NH-2 a Mao Gate banah Ukhrul, Senapati, Chandel leh Tamenglong Dist HQ-te ah bandh khauh mahmah chihthu kiza hi. Sadar Hills ah Thadou Students' Association (TSA), Thadou Youth Association (TYA) leh Thadou Women Association (TWA) te’n NH- 2 (Imphal-Dimapur road) bandh uh a, bandh ziakin Mao Gate ah Manipur lutding gari tamtak tang(standed) chihthu leng zak ahi hi.
JAC against Anti-Tribal Bills in total shutdown sungin medical check-up, water supply, media houses, postal service, telecom, electricity, airport a khak leh pi, exam pailel atel student leh invigilator-te, kitenna leh khawmpi omdia bikhiahsate khahkol uh a, total shutdown sungin thiltung deih huailou omlam zak hilou hi.


LOCAL NEWS:
ZC Cabinet meeting om ding
Lamka, May-18:  Khamneithang Vaiphei, Gen. Secy, Zomi Council apan kizadan in, May 19, 2016 zinglam dak 11:00 in Hiangtam Lamka a PTC Conference Hall ah Zomi Council Cabinet Committee (ZCCC) meeting om ding hi. Huai hun ah member paikhawmte’n ZC Cabinet keklian ding uh a, anti-tribal bill 3-te tawh kisai a Coordination Committee bawlkhiak ding telin thu poimawh tuamtuam genkhawm ding uhi. ZC Cabinet Committee member teng kimtak a teldi’n theisak hi.


Numeite’n anngawl thumna nei
Lamka, May-18: All Manipur Tribal Women Union (AMTWU) makaih tuni’n numeite’ Dist hospital morgue ah zingsang dak 7:00 apan sunnung dak 3:00 tan Sai-ip puan silh Pathian sam in anngawl thumna nei uhi. Huai hun ah Pauthianmuang, Lecturer, GBC telin mi tuamtuam te’n thugen uh a, diktatna a kilamthak poimawh ahihdan gen uhi. A thugenna uah diktatna kichi a zawngpen hiam ahihkeileh ahaupente hiam apan kipan ding hilou in, eimah apan hong kipat chiangin Pathian in i thumnate uh hon dawng panding ahihdan gen uhi. May 21 (Kiginni) in Tuailai 1434 Pro saina a Anti-Corruption Rally om ding ziakin numei pawlte’n morgue ah hun zanglou in, rally ah telding uh chihthu kiza hi. 


Dr. Singh in Specialist (medicine) ngah
Lamka, May-18:  CCpur Dist hospital a NCD Cell and Diabetologist Diabetes Clinic ah Nodal Officer lenlel Dr. Y.  Premchandra Singh in Imphal a Regional Institute of Medical Sciences tawh kizom Texila American University, South America apan Prof K. Romeo, DM Gastroenterology, Deptt. of  Medicine, RIMS guide na nuai ah medicine specialist ‘MD INTERNAL Medicine’ ngah hi. Ama’n MD Biochemistry (RIMS), Fellowship in Diabetes (CMC Vellore) Fellowship in HIV Medicine (Kolkata Medical College), PG Diploma in Diabetology (Vinayaka Mission University, Chennai), IDF recognised CCEBDM, World Heart Federation recognised Adv Cert in Diabetes and Cardiovascular Disease leng ana zoukhia (complete) in, tulel in National Program (Cancer, Diabetes, Cardiovascular Disease and Stroke) ah State Training Co-ordinator ah leng sem hi.


Anti-Corruption Rally om ding
Lamka, May-18: Tuailai 1434 Pro Core Committee saina in May 21, 2016 zinglam in Lamka ah Anti-Corruption Rally omding hi. Rally apaiding teng zinglam dak 10:30 in New Lamka a Gospel Centenary Hall ah kingak khawm ding uh a, huai apan Tedim road zui in DC’ office tan rally paiding uh a, huai apan paikik lam in YPA GHQ Hiangtam Lamka ah rally khakna program neih hiding hi. Rally ah diktat ding a kilamthak lunggulh a suai ana kaisa-te banah suai kailou himahleh diklou tak a vaihawmna deihlou-te leng telding in Tuailai 1434Pro Core Committee te’n chial uhi.


Ni 2 sung vuahzu: lampi ah hawktui luang
Lamka, May-18: Zannitak apan Manipur ah vuah chiin a, tuni leng sun nitum phial in vuah chiin hi. Lamka khawpi leh asehvel a lampi lai ah hawktui luang a, total shutdown ziak in mipi buailou hi. Kalkhat (one week) vel paisa in Lanva lui ah tui tamkei mahleh tuni’n tui tam mahmah a, mihing tha a palzawh ding hilou hi. Bijang khua apan hawktui luang-te Tedim road ah luangsuk in Dist. Transport office khen ah luang a, inn leh lou ahihbuai bel neilou a, mihing adi’n damtheih huailou petmah hi. Lamka leh asehvel ah vuahzuk ziak a hawktui in inn-le-lou ahihsiat bel News bawl ahihtan in kitheilou hi.


Dhemaji ah Kapurdua biakinn hong
Lamka, May-18: Assam state a EBC-te’ Dhemaji Mission Field a Kapurdua kichihna mun ah zan in Rev T.Thangzasiam, Field Suptd. in Biakinn honna leh Pathian kiang ah latna nei hi. Huai hun ah Dhemaji Mission Field a semtute atawmzaw in uap uh a, Kapurdua a gingtute’n EBC mission Field worker-te kiang ah Gamosa/Nam puan present uh a, biakinn om ma a, Pathian biakna ding a inn zangsaktu Januki kiang ah FS in kipahna etsakna in thilpiak pia hi. Program hun ah Pathian thugenna, lasakna leh lam (missing dance) lahna om a, biakinn thak lopna in nitak ankuang umkhawm uhi.


Moirang ah inn 10 panpihna pia uh
]Lamka, May-18: Northeast Foodbanking Network, Humanitarian Organisation a Founder & Director Khamlianlal makaih in staff te’n tuni’n Moirang khua vapha uh a, inn 10 tui in atup (surmerged) neitute kiang ah ni 2/ 3 annek ding pia uhi. Northeast Foodbandking Network te’n Bunglon khua ah leng tuma in huihpi’ mutsiat innkuan bangzah hiam kiang ah annekding hunkhop pe ngei uhi.


Dr. Alice in Asst. Professor mu
Lamka, May-18: Dr. Khawlsonkim Suantak @ Alice d/o Rev. ST Khuppa leh Prof. Nemngaihchin of Hilltown in Tripura University nuai ah Asst. Professor muthak a, June 2016 in join ding hi’n kigen hi. Amah Dr. Seikholal Kom, Chief of Khudengthabi Village, Chandel Dist. zi (wife) hi a, tulel in EFL University, NEHU, Shillong ah guest lecturer in sem hi. Ama’n kum 2014  in NEHU nuai a Linguistics deptt.  ah Doctorate ngah a, Prof. SK Singh  guide na nuai ah thesis 'Vaiphei Phonetics, Phonology and Morphology: A Descriptive Study'  gelh hi.


SUUNNA:
H.Kam Khen Thang (86) f/o H.Thang Khan Kham @ Khamzawl of Go Cin Khup Veng, New Lamka tuzing dak 6:00 velin cancer in si a, nitaklam in CYA hanmual ah kivui hi. H.Thang Khan Kham bel Go Cin Khup Veng ah Chairman, Village Authority ahi.
T. Jampum (90) f/o Upa T.Thongzatun of Pearsonmun, zanhal nitak dak 10:30 velin BP Stroke in si a, zan in Pearsonmun hanmual ah kivui hi.


IMPHAL NEWS:
Rs. 40 lakhs bei akibawl lei tuahmang
Imphal, May-18: Manipur ah zan nitaklam akipan tuni tan vuah atam ziakin Imphal khawpi sunga lampi leh mun tamtak tui in tum(submerged) a, Imphal khawpi a luite ah leng tuilian vek hi’n kigen hi. Imphal a Wangkhei, Andro parking, Lamphel, Keishampat, Thangmeiband, Uripok, Sagolband, Konung Mamang area a mun niamdeuhte tui in tum chihthu zak hi a, Bishnupur district a Moirang, Wangoo leh Loktak dil kianga inn hunkhop tuilian in a tup banah Toubul, Khoijuman, Phubala, Thinungei, Thamnapokp, Sinusiphai leh Waikhong a ngakul (fishery pond) omte leng tuilian in tum chih thutut kingah hi. Imphal khawpi leh asehvel ah 103.1mm vuahzuk ziakin mun tuamtuam ah tuilian a, khawpi sunga lampi tamkhop leng tui in tum hi. May 19 apan 22 tan, tuilet ziakin buaina om dinga kilang hi’n National Weather Forecasting Center, Indian Meteorological Department, Ministry of Earth GOI in taklang hi. Imphal River leng ‘Warning Level’ pel in khangtou a, tuadan a vuahzuk apaitouh zel leh mipi ading in lauhuai ding chihthu om hi. Nambul river leh Loktak lake a luanglut, lui tuamtuam a khan ziakin patauh huai dinmun a om hi’n IFCD apan thusuakin taklang hi. Tamenglong dist Noney area a Izei river lei(bridge) tui hattakin tuzing in tuahmang a, Rs. 40 lakhs bei a tunaizek a kibawl pan hi’n leng kigen hi. Tuni’n Manipur sung muntuam tuam ah Fire Service Station leh Local Police Station complex telin inn 200 vel tui in tum(submerged) hi’n gen uhi.


IMC election adia candidate mi 241 paisuak
Imphal, May-18: IMC election ding tawh kisai tuni’n SDO/RO Lamphel (DC Complex) leh SDO/RO Porompat ah scrutiny om a, mi 241 paisuak uhi. Imphal East akipan candidate 23 te’n councillor seat 7 tuh ding uh a, amaute lakah Congress leh BJP apan mi 6 tuak, CPI apan mi 2, LJP apan mi 1, banah Independent candidate 8 om uhi. Imphal West seat 20 adia candidate te’n SDO/RO Lamphel ah scrutiny nei uh a, candidate 64 om uhi. Imphal West apan candidate te lakah Congress  leh BJP apan mi 20  tuak om in, CPI apan 3, LJP apan 2, JD(U) apan mi 1 banah Independent candidate mi 18 om uhi. 1st member 49 leh 2nd member 43 telin mi 156 te’n seat 20 tuak tuh ding uhi. Councillor seat 27 leh Ward chih a member 2 chiat kitelna ahihleh June 2, 2016 zinglam dak 8:00 apan nitaklam dak 4:00 kikalin om ding hi.


Thoubal ah 144 CrPC koih in om
Imphal, May-18: Thoubal district sung pumpi ah District Magistrate in 144 CrPC puang a, mi 5 sang a tamzaw omkhawm phallou in, midangte adia liamna tunthei ding thil tuamtuam tawi phallou hi. CrPC in May 17 zinglam dak 5:00 apan June 14, 2016 tan daih ding hi. District Magistrate Thoubal in order asuahna ah mipite adia hoihzaw ding ngimna a 144CrPC koih hi’n taklang a, BA/B.Sc/B.Com/B.Sc Biotechnology/ Bachelor of Food Technology/Bachelor of Social Work 2nd, 4th leh 6th Semester Examination 2016 lamzangtak a apaitheihna ding hi’n leng puang hi.


KNF in 29th Rising Day zang
Kangpokpi, May-18: Kuki helpawl om masapen Kuki National Front (KNF), May 18, 1987 a phuhkhiak a om tuni’n 29th Rising Day zang uh a, Ngahmun, Sadar Hills a huai hunzatna ah KNF phutkhetu Nehlun Kipgen zahna pia uhi. KNF ahihleh Molnoi village, Myanmar ah phuhkhiak hi a, Oct. 12, 1993 in security force te’n Nehlun Kipgen kaplum uhi. UPF nuai ah Aug 22, 2008 in KNF in Manipur Govt. leh Central Govt. tawh Suspension of Operation (SoO) suaikai uhi. Tuni a Rising Day zatna ah KNF faction KNF-MC, KNF-Zougam, KNF-Samuel banah UKLF Chairman, S.S. Haokip, Vice Chairman, United People’s Front (UPF) leh Kuki UG tuamtuam apan top leader-te leng kihel uhi. KNF President S.T. Thangboi in athugenna hunah Kukite kigawmkikna ding in kituahna poimawh masa chi a, Kuki faction tuamtuam te’n leng kituahna dia panla ding in KNF President in chial hi.


A/R ten thiltuam tuam mankhia uh
Imphal, May-18: National Highway 102 a thilkham(contraband) pua om chihthu azak un 26 Sector Assam Rifles nuaia 12 Assam Rifles   pawlin operation bawl uh a, Sita Road Junction, Chandel district ah Ginseng kg 170 agik mukhia uhi. Huaite’n Rs 10, 20,000/- vel man ding hi’n PIB(Defence Wing) apan thusuakin gen hi. NH-102 in a totkhak, gamlak ah leng Assam Rifles  pawlin jungle patrolling aneihna uah pasal khat in A/R te amuhphet a bag 4 a taihsan te ah Ginseng tamkhop mukhia uh chihthu om a, Range Forest, Tengnoupal Range, Govt of Manipur ah pekhia uhi.


DIPR Building kibawllel enkhia
Imphal, May-18: Keishampat, Imphal a DIPR Office building kibawl lel tuni’n Director, IPR Meghachandra Kongbam makaih in officer te’n enkhia uhi. Hiai building bawlna 1st Phase leh 2nd Phase zawhsiang phial hita a, zawhsiang hun in media section poimawh diakte - News, Photo, Video, Publication leh atuamtuamte leng hiaimun ah kisuan ding hi’n Director in gen hi. DIPR office building ahihleh Public Investment Board (PIB) in 11.07.2011 a lemsakna apiak nung in Rs. 812.41lakh bei in kibawl hi.


TUNI THUPI:
“Ka minpu ka mite kingaineu a  a thum ua, ahon zon ua, a omdan giloute uh aleh ngatsan ua leh van akipan in ka ngaikhe ding a; a khelhna uh ka ngaidam ding a, a gam uh ka damsak ding hi.” 2-Chronicle 7:14


EDITORIAL:
Manipur dinmun chituam!
Manipur ah a chituam mahmah thilkhat omsek a, khawkeu(drought) luat ziaka tuinek kiningching taksapna kia hilou in loubawlna tanpha nawngkaina thupitak a tut hun om sek a, huchih hun ah Manipur Cabinet in Manipur gam pumpi khawkeu(drought state) a puan ding chih thupukna bawl in huai ding in Centre ah memorandum pekawm ding leh khawkeu ziaka Centre a huhna ngen ding Chief Minister hiam Minister khatpeuh Delhi ah kisawl sek uh a, Delhi tungpan phet ‘Manipur ah vuah tamlaw phing hong kik nawn mai  aw’ chi a akisapkik hun uh omsek chihthu kigen sek hi.
    Akhenchiang in lah Manipur ah ni 3/4 sung vuah tamdeuh azuk leleng Imphal khawpi leh akimlaka lui omte ah tuilian gawp sek a, Imphal khawpi sung leh mun khenkhat aniam deuhna munte (low lying areas) tuilian in tum(sub-merged) sek in tenna inn hunkhop tui in tum a, mun tuamtuam ah relief camp tanpha hon ngai khop in om hi. Huchibang Relief camp a omte govt in nek-le-tak, tuisiang dawn ding leh damdawi tanpha manbei a apiak ngaisek hi. Huchih hun ah state govt in tuilian thuakte huhna ding Centre ah ngensek a, tuilian thuakte panpihna ding a nget uh hongtun ma in vuahzu khawl in tuilian leng kiam manzel kichi leuleu hi. Hibang thiltung i gen chiammuihna bang bang mahleh chiamnuihna hiam phtuahtawm hilou in thiltung ngei mah gen i hizaw hi.
    Manipur Assembly in Aug 31, 2015 in Anti-Tribal Bill 3 i chih sek passed uh a, huai in singtanggam pumpi leh singtangmite lungsim nasak mahmah hinapi in phaijang mipi hi’n state govt hileleng tuni tanpha singtangmite’ lungsim natna ngeingaih tuanlou uhi. Himahleh Manipur Governor in Bill 3te dan(act) a zat ahih theihna ding a lemsakpihna (assent) pelou in Centre khut ah nga hi. Huai bill 3te bangziak ahi diam state govt/assembly in a passed uh himahleh kha 9 phial a chin nungin leng Centre in hithei hiam, hitheilou hiam chih bangmah puang tuanlou a, state govt in leng  Centre ah beihpi suah in panla tuanlou hi’n kigen hi.
    Himahleh Bill 3te pass ahih theihna dinga kiphinna khauhtak zang Joint Committee on Inner Line Permit System(JCILPS) pawlin khauhtaka a nawh ziakun May 9, 2016 in Chief Minister O. Ibobi in All Political Party meeting sam a, amah makaihna in political party tuamtuam a palaite’n Centre a bawhzui ding in May 16, 2016 in Delhi ah zinding uh chi’n kigen mahleh Centre leader-te tawh kimuhna ding appointment hungaih in zinkhe nailou uh chih ahi hi.CM makaihna political party team zinkhe dingte’ Prime Minister, Union Home Minister, Union Law Minister banah central leader tuamtuam leng mu in Bill 3te India President in lemsakna suai a piakna dingin thuzawh sawm uhi.
    Alehlam ah All Manipur Tribal Women Union(AMTWU) pawlin May 16, 2016 in District  Hospital campus a morgue ah  zingsang dak 7.00 akipan nitaklam dak 4.00 tan an-ngawl  a thum in  Pathian buan uh a, tui tanpha dawnlou khop in pang uhi. Amau gam-le-leitang bitna ding leh Anti-Tribal Bill 3te Centre in lemsakpihna a piaklouhna ding in Pathian apan huhna ngen uhi. Pathian in a mite chimawh leh beidot tawpkhawk a a thumna uh za chih kigen sek a, thumna in thil ahihthei mahmah chih leng haihvual hilou hi.
    Bill 3te gelkhawm lai hun(drafting stage) ah singtangmite dot leh genkhawmpih ahi kei chih ahihbanah singtanggam tawh kisaikha thilte Hill Areas Committee(HAC) ngaihdan lak hilou in paikan ahih thu ah huai Bill 3te draft ahih lai in leng singtangmi  Dy CM Gaikhangam a makai hihial ahi, chih a pansan uh hi a, Assembly ah Bill genkhawmlai in MLA 60 omte’ lakah singtanggam apan telching singtangmite palai  MLA te’n leng bangmah nialna thugen omlou in kithutuak takin Bill 3te passed ahi chi uh a, huai pen Centre ah leng gik mahmah maithei mawk hi.
    Himahleh gintaklouh laitak in phaijangmite laka laisiam mahmah leh journalist minthang khat in Bill 3te laka khatna ‘the Protection of Manipur People Bill, 2016’ pen ah Manipur mi hihna chetna ding kum bikhiah(cut-off year) 1951 kichi thil hitheilou ahihdan gen hi. Huai thudik ahih ziak bel kum 1951 in National Register of Citizens,1951 leh Census Report,1951 himhim Manipur tawh kisai mumultak omlou chih hi a, technical ground lel ah leng huaiziakin Bill 3te a paisuak theih gintak haksa mahmah a, himahleh thil hithei hi’n hitheilou hileleng JCILPS te’n a nawh hatluat ziakun state govt in nial zoulou in a hidan a Assembly in passed mai hihtuak hi.
    Maban a thil hong kihei dingdan ngaihven kawm in singtangmite khempeuh gen-le-sak tuam nei om selou in kigawm a pankhawmna kia maban adia lampi hoihpen suak ding hi. Hibang thilte akipan etin Manipur gam dinmun zaw chituamdeuh mah hi.


SPORTS NEWS:
India a football suk hatna ding in AIFF in Indian Football system draft luikhia: 

2017-18 season akipan 3-tier system zat hiding
Tuni in AIFF president Praful Patel leh Raman te’n Indian football a domestic league thak pai dingdan first draft suahkhia uh a, 2017-18 season akipan zatpat hidi’n gen uhi.
    ISL pen premier domestic competition hiding a, team 8 omsa banah I-League apan tender process tungtawn in club 2/3 laklut hiding hi’n gen uhi. I-League a team omlai teng in League One (tulel a second division kichi) kichi bawlkhe ding uhi.
    ISL ah league dang banglou in relegate omlou ding hi. Hiai pen franchises omlelte a contract tawh kisai thubuai om theih ding ziakin kum bangzah hiam relegate omlou a bawl hiding chi’n leng AIFF draft in taklang hi. Himahleh, League One leh League Two ah bel promotion leh relegation om ding a, hiai tiers 3 teng kum 1na ah kha 5 sung neih hiding a, huaizawh in kha 7 tan adia behlap tou hiding hi. Tier 3 teng kiton (parallel) in paikhawm ding uhi.
    Tulel a Federation Cup kichi pen Super Cup a khen hiding a, League season zawh chiangin om ding a, Tier 3 apan team 16 kimawl ding uhi. Huai bel ISL apan top team 8, League One a top 4 teng direct in Super Cup ah qualify ding uh a, team dangte’n playoff nei ding uhi. ISL leh Super Cup a Champion club 2-te AFC Cup a kihel nawn ding uh chih ahi hi. Huai banah, women’s league leng pat hiding a, a kiton in league 3 sai hiding chi uhi.


2017-18 season a Indian Football System pai dingdan:
August:
Champions Cup - Kumteng ahihkeileh kum 2 hal zelin Nehru Cup paidan zui in gam 4 (FIFA ranking a 120-140 kikal a omte) tawh international invitational tournament om ding hi.

November to March:
1. ISL (Tier 1): Indian Super League (ISL) - Hiaipen tulel in kha 3 sung neih himahleh kha 5 sung neih hita ding a, main league hiding hi. Huai omdan bel English Premier League/ Spanish La Liga tawh dinmun kikim ding chihna ahi hi. I-League clubs khenkhat Bengaluru FC, Mohun Bagan leh East Bengal-te ISL a laklut lam-et ahi.

2. League One (Tier 2): I-League kichi pen League One chia khen hiding a, hiai ah team 10 kimawl ding uh a, ISL bangin kha 5 sung neih hiding a, huaizawh in kha 7 sung neih hinawn ding hi. ISL a laklut louh a omte clubte hiai category ah om ding uh a, relegation om ding hi.

3. League Two(Tier 3): I-League a Second Div pen League 2 a khen hiding a, zone 4- East, West, North leh South zone a khen hiding a, Zone chih a top 2 teng League One ah promote ding uhi.

April-May:
Super Cup- Federation Cup kichi pen Super Cup a khen hiding, teir 3 pan team 16 kihel ding uh a, huai a vualzou penpen in AFC cup berth ngah ding hi.