Manipur Express | May 20, 2016

HEADLINES:
Congress in Assam a kum 15 sung govt a bawl nungin puksia
Tuni’n state 5 a assembly election result puan in om

New Delhi, May-19: Assam, West Bengal, Tamil Nadu, Kerala leh Purucherry ah tuma a assembly election om tuni zingsang dak 8.00 akipan in vote sim hi a, Assam ah Chief Minister Tarun Gogoi makaihna Congress in kum 15 sung govt a bawl nungin term 4na ding len zoulou in BJP leh akizoppih AGP leh BPF in govt thak bawl ding in absolute majority la uhi. West Bengal ah Chief Minister Mamata Banerjee makaihna Trinamool Congress in term 2na ding in govt bawl di’n vualzou uh a, AIADMK in Chief Minister Jayalalthaa in makaihna in Tamil Nadu ah govt lenlai ding uhi. Kerala ah Left Front in govt thak bawl ding a, Puducherry ah Congress leh DMK in govt bawl ding uhi. Meghalaya state a Tura Parliamentary seat a by-election ah Lok Sabha Speaker-lui PA Sangma tapa naupangzaw NPP candidate Conrad Sangma tel dingin om hi.
    Assam Assembly seat 126 adingin April 4 & 11, 2016 in election om a, tuni a vote simzawh in Union Minister (Youth Affairs & Sports) banah BJP Chief Ministerial candidate Sarbananda Sonowal makaihna BJP, Asom Gana Parishad(AGP) leh Bodo Peoples Front (BPF) kigawm seat 86 ah ching uh a, Congress in seat 26 lel ngah uhi. Muslim leader Badruddin Ajmal makaihna AIUDF pawl seat 13 ah ching uhi. West Bengal ah seat 294 adingin phase 6 (phase 1na April 4 & 11,17,21,23,25 leh May 5, 2016  in election om a, May 16, 2016 in Tamil Nadu assembly seat 234, Kerala assembly seat 140 leh Puducherry a assembly seat 30 adi’n election om hi. Huai ni (May 16,2016) mah in Meghalaya state sung Tura Lok Sabha bial banah state 4 a assembly constituency 6 ah leng by-election om hi. Prime Minister Narendra Mod in Assam a BJP lawhchinna kipahpih in BJP leader leh worker-te pahtakthu puang a, lawchinna thupi leh chiamtehtham ching hi’n gen hi.  BJP in Assam mipi kinepna bangin nasem ding a, state khantouhna dinga panlak theihna tengah panla ding hi’n gen hi. Chief Minister hihna khah pah ding Tarun Gogoi in BJP lawhchinna kipahpihthu genkawm in Assam mipi’n deihtelna a bawl uh zah hi’n gen a, election ah vualzou a om bangin vuallel leng omthei mah ahihdan gen hi. BJP in a chiamsa uh bangin Assam masawnna ding leh khantouhna dinga nasem ding un a lam-et thu leng gen hi.
    Meghalaya state Tura Lok Sabha biala MP telching  a om PA Sangma a sih ziakin May 16, 2016 in by-election om  a,huai ah PA Sangma’ tapa naupangzaw Conrad Sangma(NPP candidate) in Chief Minister Mukul Sangma’ zi Dikkanchi Shira(Congress candidate) sangin vote 1,92,212 mu tamzaw in ching hi. Sangma in vote 3,29,497 mu a, Dikkanchi Shira in vote 1,37,285 mu hi. By-election omna state 4 dinmun anuai abang hi. Gujarat state a by-election ah Talala assembly seat ah Congress candidate vuallel in BJP ching a, Telangana state a Palair assembly seat ah leng Congress lawhsam in Telangana Rashtra Samiti(TRS) candidate ching hi. Uttar Pradesh a Bilari assembly constituency leh Jangipur assembly constituency ah ruling party-Samajwadi Party(SP) candidate 2 ching uh a, Jharkhand a by-election ah Godda assembly seat ah BJP ching a, Panki assembly seat ah Congress ching hi.


Assam (126 seats)
1. BJP    60
2. INC    26
3. AGP    14
4. AIUDF    13
5. BOPF    12
6. IND    1
West Bengal (294 seats)
1. TMC    211    2. INC    44
3. CPI(M)    26
4. RSP    3
5. BJP    3
6. OTHERS    3
7. AIFB    2
8. CPI    1
9. IND    1
Tamil Nadu
(232/2* seats)
Party     Total
1. AIADMK    134
2. DMK    89
3. INC    8
3. IUML    1
Kerala (140 seats)
Party     Total
1. CPI(M)    58
2. CPI    19
3. IUML    17
4. IND    7
5. Congress(S)    1
6. KEC(M)    6
7. JD(S)    3
8. NCP    2
9. CMPK    1
10. KC(B)    1
Puducherry (30 seats)
Party     Total
1. AIADMK    4
2. AINRC    8
3. DMK    2
4. INC    15
5. IND    1

*Tamil Nadu ah Assembly Constituency 2 -Aravakurichi leh Thanjavur ah May 23, 2016 in re-poll a om ding ziakin result puan hilou in, vote sim hilou hi.

JAC against anti-tribal bills in kipah thusuah
Lamka, May-19:  JAC against Anti-Tribal Bills (JAC) in thusuak in a gendan in May 16 zankim apan May 18 zankim tan dakkal 48 sung Manipur Hill Dist teng ah total shutdown a puan uh kuapeuh in a kithuahpih ziakun kipahthu taklang hi. Thusuak in a taklatna ah, Phaijang mite’n kha 2 sung lel kiphinna a neih un anti-tribal bill 3 piangkhia a, India President in assent (lemsakpihna) apiak ding nawhna in ni 3 sung lel mah a  kiphin ua leh  ‘all-political party meeting’ om a, huai ah political party in delegation sawl dingin thupukna bawl uh  hi’n taklang a, huai in Manipur govt lungsim chiangsak  hi’n leng taklang hi. Huchi kal ah Manipur govt. in singtangmite’n tuni tan ni 261 sung vingveng kiphinna a neih uh a theilou bangin om a, phaijang mi leh singtangmite kal ah kideidanna nasatak om ahi dan langsak in, JAC in Charter of Demands genkhawm dingin Manipur State Assembly special session sam dia a nget leng ngaihsak hilou chi’n taklang hi.
    Bill 3te’n singtangmite hihna, singtangmite gam leh leitang banah nek-tak zonna sukha ahihdan taklang kawm in, singtangmite adia political solution loungal pawmtak omlou ahihdan taklang in kuapeuh khemhai a om nawnlou ding in ngen uhi.


KSO/CCpur makaite’n Mini-Sect kibawl enkhia
Lamka, May-19: KSO/CCpur makaite’n tuni in Tuibuong a Mini-Secretariat kibawl enkhia uh a, nasep hoihlou ahihdan mukhia in nasemtu in a zawhsiang hunding bikhiah sak uhi. Mimin Khongsai, Spokesperson, KSO/CCpur in agenna ah Aug. 2011 apan Mini-Secretariat kibawl a Hyderabad pansan Avantika Company-te’ etkaina in site Engineer 2 etkaina nuai a sem lel uh hi’n gen hi. Kha 24 sunga Building zawh dingin bikhiah himahleh tutan zawhlouh in om a, hun paisa ah leng enkhe ngei uh hi’n gen hi. Mini-Secretariat ah DLO Block 1 & 2, Barrack (Sentry Post) 2 leh staff/family quarter building teng Sept 2016 tan a zousiang din thupia uh a, DLO Block 3 & 4 building leng March 2017 tan a zawhsiang ding in nasemtu kiang ah theisak uhi. Hunchiam sunga contractor in nasep a zawhkei leh khaksak ding uh hi’n theisak uhi. Dist sunga student body/orgn,. tuamtuamte’n leng panlakpih ding in KSO in ngen hi. Mini Secretariat bawlna din NEC in fund Rs. 39.65 crores a sanction lakah tutan in 28.5 crores zat  hita chi’n contractor in gen hi. Inspection teamte Lalkhohao Haokip, President in makai a, building kibawlte a etkhiak hun un kongkhak  kibawlsate settheih ding omlou ahihdan mukhia uh a,kalnawn sunga bawlhoih  dingin theisak ua, hunchiam sunga bawl ahih keileh khetsiat hidin gen uhi.


LOCAL NEWS:
ZC Meeting ah thupukna tuamtuam bawl
Lamka, May-19: Hiangtam Lamka a PTC Conference Hall ah tuni zinglam in Zomi Council Cabinet Committee (ZCCC) meeting om a, huai hun ah thupukna tuamtuam bawl uhi. Khamneithang Vaiphei, Gen. Secretary in a thusuah ah meeting a telte’n cabinet keklian in May 13, 2016 a Zomi Council, KIM, Hmar Inpui, MPC leh UNC meeting thupukna bangin anti-tribal bill 3-te tawh kisai state-level co-ordination committee bawlkhiak ding chih dungzui in ZC apan member dingin Dr. R. Sanga leh KG Tungnung sawldi’n thupuk uh a, May 20, 2016 in  Kuki Inn, Imphal a meeting  ah Zomi Council nuai a tribe President teng pang dingin thupuk uhi. Zomi Council Vice Chairman-te tanvou(portfolio) bikhiah  a, President UZO in (Organization), President TCU in (GAD), President GTC in  (Political Affairs), President MTC in (Customs & Culture), President PTC in (Village Administration), President Kom Union in (Women & Child Development), President TPO in (Youth Affairs), President VPC in (Planning & Development) lending hi’n taklang hi.


Simte MIL (Class IX &X) zat di’n lan
Lamka, May-19: Board of Secondary Education, Manipur (BSEM) in Simte leh Gangte pau Major Indian Language (MIL) dia a guan tawh kiton in academic session 2016-17 akipan zattheih ding in order om hi. Huai tawh kisai tuni’n Simveng a Simte Inn ah Simte Literature Society (SLS) in Class IX leh Class X te’ tawidia a bawl uh textbook Rev. H. Thangliankham in Pathian min in  lan hi.Simte nam in April 25, 2015 in govt apan Simte Language Recognition ngah in, 2016-17 academic session apan MIL (Simte) subject a tawi theih din Simte Literature Society in  panla a,  Jan. 30, 2016 in Pre-Primary apan Class VIII student te’ zatding “Simte Silchiilbu (Simte Primer)”  kichi honkhiak hi a, tu’n Class IX leh X MIL (Simte) honkhiak hinawn hi’n kigen hi.


LD Simte in Saheipak koih
Lamka, May-19:  Lamka a Dist Hospital cheimawi ding leh huih siangthou banah namtui  omding lam-etna in LD Simte, social worker in Hospital  huangsung a Bungsing kung ah ‘Sahei Pak’ koih hi.  Aman a gendan in Sahei Pak-te  Thanlon Sub-divn sung Suangpek gam ah nitha (wages) pia in mi zongsak a, zan zek in sai-ip dim  hongthon uh tuni a koih hi’n gen hi. Hospital damloute omna ahih dungzui in pak (flower) kilawmtak in lungkham hun ah hon hehnem thei ahihdan thei in, kum 2014 apan atup himahleh tu a semzoupan ahihdan gen hi. Sahei Pak in lungkhamte hehnem thei a, thil cheitu ahihlam phawk a, kuapeuh in kembit di’n ngen hi.


Bus phukhak damzoulou in si
Lamka, May-19: Tuni nitaklam dak 4:50 velin Saikawt Children Home campus ah Children Home’ bus anung back lam in Immanuel Zarzolien (6) s/o Lalhonglien of Saikawt phukha a, alu liam in kintaka Dist. Hospital ah puaklut in om hi. Immanuel Zarzolien ahihleh Stephen H/S, Saikawt ah class I simlel hi a, nitaklam dak 5:20 velin Dist. Hospital ah damzoulou in si hi. Children Home’ bus atailai in naupang 7 vel in anung uah delh uh a, anung back hun in Immaunel phukha hi’n kigen hi. Tunitak mah in RPC heutute’n Lalhawnglien’ inn ah singpi khai in vahoh uh a, Lalhawnlien’ te’n amau ana kihou phot ding leh May 20, 2016 a kihouthak di’n RPC heutute’ theisak uh a, RPC heutute’n paisan phot uh hi’n kigen a, May 20, 2016 in Saikawt hanmual ah Immauel’ kivui ding hi.


Henglep HQ area ah panpihna pia
Lamka, May-19: Henglep HQ leh a kim ah huihpi leh gialpi ziaka inn kisia bangzah hiam akpan innkuan 12-te kiang ah disaster assistance hawmkhiak in om hi. Relief Assistance teamte Soiminlian Lengen, MCS, SDO/Henglep makaih in Paolal Haokip, MDC/Henglep; Letmang Haokip, Chairman,  Relief Committee, Henglep hi uh a, amau Henglep HQ,  Najang,  Khaopijang, Napphou, Kamkeilon, Kolhen, Mualdak, Suangpha, D. Munlui, Tuilaphai leh Lhanjang khua a innkuan 120 kiangah  langva leh antang pia uhi.  Relief team-te May 16, 2016 in zinkhia uh a, tuni’n hong tung uhi.


KS Tawmbing, IFS in kipahpih
Lamka, May-19: KS Tawmbing, IFS,  Divl. Forest Officer; Southern Divn. CCpur in CM makaih in January 18, 2016 a State Board for Wildlife meeting ah CCpur Dist. apan Honorary Wildlife Warden kum 1 sung daihdia telkhiat H. Thangdam s/o (late) Pahau of SiloamVeng, Bungmual leh T. Dongzakai Gangte s/o (late) Thangzam Gangte of Hill Town telkhiat a om uh kipahpihthu puang hi. Maban ah wildlife kepbitna tawh kisai DFO, Southern Divn. CCpur in mi 2-te tawh kithuah a na septouh zel hiding in taklang hi.


Pherjol a Free Medical adi’n kuankhia
Lamka, May-19: Dist. Council/CCpur leh Lions Club of CCpur Greater (Dist.322-D) saina in Thanlon sub divn. a Pheljol khua ah “Free Medical Camp” omding a, huai a hoh dingin tuzing dak 7:00 in Langkhanpau Guite, Chairman ADC/CCPur & President Lions Club of CCpur Greater makaih in bialtu MDC Lalhmangpui, Doctor 3, Pharmacist & Nurse 7, ADC Ambulance gari in kuankhia uhi. Free Medical camp akuandingte Elder Thangzadal Guite f/o Langkhanpau Guite in Pathian kiang ah thumsak a, Lal Hossan, Vice Chairman ADC/CCpur in flag-off hi. Free Medical Camp ah Pheljol leh asehvel a khua tuamtuam apan damloute’ kiang ah amanbei in damdawi peding uhi.


Swachh Bharat Pakhwada zang uh
Lamka, May-19: Tuibuong a Post office staff te’n May 16-31, 2016 sung Swachh Bharat Pakhwada kichi sianthouna tawh kisai in program zang uhi. Tukal sung in staff te’n office asiangthou theipen in koihsawm uh a, apoimawh bangzel in social work neiding uh hi’n kigen hi.


Kal 1 val cable gui kibawllou
Lamka, May-19: Kal 1 val paita in DC’ office apan DTC Hall ah cable gui kizan a douna  huihpi’n amutpuk ziakin DC’s office lutna lampi kantan (crossing) in leilak ah cable gui tunitan in omden lai hi. Mi khenkhat apat kizadan in Dist. Administration office bulh, lampi ah cable gui ngaihsaklouh a om lamdang sakthu gen uhi.


SP office a application form la tam
Lamka, May-19: SP office ah May 16, 2016 apan Manipur Police Deptt. ah Police Constable, Follower leh Manipur Rifles ah Riflemen lakna ding application form kihawmkhia a, total shutdown zawh tuni’n application form la mi tam mahmah in queue in ngak hial uhi. Tuni’n Police Constable ading mi 269, Manipur Rifleman ading 136 leh Followers ading mi 68 in application form la uh a, tunitan in form 473 hawmkhia uhi.


Class IX-XII-te adi’n Seminar om ding
Lamka, May-19: Evangelical Baptist Convention, Division Baptist Children Deptt. Lamka South Divn. saina in May 22, 2016 sunnung dak 1:00 in EBCC Hebron, New Lamka ah Class IX-XII te ading in Seminar 2016 omding hi. P. Daimuanlian, Chairman, DBCD/LSD in vaidawn thugenna leh hunpatna neiding a, Lianding Guite, Child Co-ordinator, EBC in sinsak ding hi.


ATML te’n flag zuak ding
Lamka, May-19: All Tribal Movement of Lamka (ATML) te’n May 20, 2016 in Salpha-te’ zahna a flag vom kitakkhia, mipi lak ah Rs.50/- apan atunglam ngap dandan piakding in zuak ding uh a, kuapeuh in leisak ding in ngen uhi.


Jettwings adi’n mi 34 interview ding
Lamka, May-19: Jettwings, Guwahati nuai a semding written test-te lakah mi 34 te’n May 24, 2016 zinglam dak 10:00 in Kuki In, Imphal kiang a Directorate of TA & Hill, office campus a Jettwings Sub-Branch office ah personal interview neiding uhi. Personal interview atelding mi 34te list ADC/CCpur office ah kitakkhia a, amau class X apan atunglam educational documents, ST certificate, address proof, family income certificate, passport photo 1, full length photo 1 tawi ngaiding a, dress code- Western formal hiding hi.


YLS te’n Awareness Walk neiding
Lamka, May-19: Zenhang Lamka a Young Leaners’ School kum 25 chin Silver Jubilee lopna leh May 20 ‘YLS Foundation Day’ zatna in zinglam dak 9:30 in YLS a Eco Club saina in ‘ A clean Today for a Better Tomorrow’ chih thupi zang in Awareness Walk nei ding uhi. School campus ah L. Mangkhogin Haokip, IPS, SP/CCpur in flag-off ding a, class IX & X student-te leh staff te’n YLS campus apan Rengkai road zui in Tedim road zuiding uh a, Tedim road apan IB road zui in Tipaimukh road zuisuk ding uh a, Police Station gei apan Rengkai road ah lut in YLS campus ah zouding uhi. Awareness Walk hun ah Eco-Club student te’n mipi zatdia abawl uh dustbin hawmkhe ding uhi.


 TKSU YP College Branch kipak
Lamka, May-19: Inf. & Pub. Thadou- Kuki Students’ Union Young Pillar College Branch te’n tukum a HSSLC (class XII) exam ah TKSU member-te 100%  apassed ziak un kipahpihthu puang a, Principal leh staff te’n student-te lai hoihtaka hilhziak unleng kipahthu puang uhi.


HSA Langza Unit makai thakte
Lamka, May-19: HSA CCpur Jt HQ makaihin zan in Sagang area a HSA Langza Unit kum 2016-2018 makai ding election nei uh a, President in Hranghmingsang telching uhi. Vice President- Lalkhohlun, Secy.- Hauzakhum, Asst. Secy.- Lalthathang, Treasurer- Lalhmingthang, Finance Secy.- Philip Lalbelsa leh Inf. Secy- in Kelep Lalramsawn telching uhi.


Akintheipen a office luah di’n theisak
Lamka, May-19: N. Thuamkhansuan, SDO/Singngat a utna mun Singngat SDO sem dia posting hi a, ama’ mimal kisiantanna phuangkhe thei nawnlou ding banah mipi’ deihna a ngaihsaklouh ziakin JPO Singngat leh Singngat Vision 2020 Implementing Committee in mawhpaihna sangpen puang uhi. Mipi’ deihna a lawhchin masiah maban sawntouh zel hiding in JPO leh Singngat Vision 2020 te’n taklang uh a, Singngat area mipi deihna bang a, SDO/BDO Singngat in a akintheipen a Singngat khua a SDO/BDO building thak luah a nasemding in theisak uhi. Mipi deihna ngaihsaklou a, maban asawn hun uah thil hoihlou banghiam tung omleh SDO/BDO Singngat leh Dist. Administration in amawh kipuak ding in taklang uhi.


B. Ed zilding te’n document submit theih
Lamka, May-19: Directorate of Education (S) nuai a Graduate teacher (Sc & Arts) te’n DM College of Teacher Education, Imphal ah academic session 2016-2017 in kum 2 sung B.Ed program training theih ding hi. Lunglutna nei te’n application form, no objection certificate, regular appointment order, EIN, graduate certificate, date of birth certificate etc. tel in ZEO/CCPur office ah June 2, 2016 tan in submit theihding hi.


SUUNNA:
Ngaineichiin (46) w/o M.Thangginmung of Saihei Road, New Lamka tuzing dak 8:00 velin heat attack in si a, nitaklam in Simveng hanmual ah kivui hi.
K.Lianmang (52) s/o (late) K.Thankham of New bazar, Central Lamka tuzing in awmna in si a, nitaklam in Lamka hanmual ah kivui hi.


IMPHAL NEWS:
Traffic zuihding dan tuamtuam bawl
Imphal, May-19: Manipur a Traffic tawh kisai panlakdan hoihsem omtheihna ding in Traffic Regulation and Parking Committee (TRPC) tungtang ni 2 sung genkhawmna om a, Conference Hall, Old Secretariat ah Transport Minister  Dr. Kh. Ratankumar, Chairman, TRPC makaih a meeting hunin agenda tuamtuam 26 kikum khawm uhi. Meeting hun a thupukna bang in zinglam dak 9:00 apan sun dak 12:00 tan banah nitaklam dak 3:00 apan nitaklam dak 6:00 kikal, Imphal area ah Heavy Vehicle lutsak hilou ding a, parking ading in Naga Nallah (Concrete Slabs) kiang zat ding inleng lemsa uhi. Manipur Secretariat kong a National Highway munte ah leng road safety tawh kisai mipi theihsakna (precautionary) koih ding in lemsa uhi. Tuni a meeting hunah Transport,Traffic Polilce, MAHUD, IMC, PWD leh PDA banah AMWJU apan President leh Secretary telin media tuamtuam kihel uhi. 


BJP in IMC seat 18 lam-en
Imphal, May-19: Assam a BJP vualzawhna thupitak bangin Manipur ah leng BJP in IMC election omding ah mipi gupna ngah in seat 17-18vel ah lawhching ding uh hi’n State BJP President K Bhabananda in tuni’n lam-et huai asakdan gen hi. Office Chamber a BJP State President in Media-te kianga agendan in tutung election tungtawn in BJP in government hoih  paipih sawm ahihthu gen a, Smart City lakah Imphal leng telkha ahihman in BJP in vualzawhna angah leh state masawnna ding leh lemna-muanna banah Drainage hoihsem omding hi’n puang hi. Assam Legislative Assembly result tuni a puankhiak a om ah seat 126 lakah BJP in 78 ngah in vualzou uh hi’n leng Manipur BJP President in gen hi.


38hrs Cease-Work Strike puang
Imphal, May-19: Manipur a Inner Line Permit(ILP) koihna dinga kiphinna aneih uh JCILPS pawlin khauhsem in panla uh a, zingchiang (May 20) zinglam dak 4:00 akipan May 21 nitaklam dak 6:00 tan 38hrs sung Cease Work Strike puang nawn uhi. “Sintha Leppa” strike hunsung in sepna nei tengteng in asepna uh nusia in kiphinna ah kihel ding in JCILPS convener Kh Ratan in tuni’n ngen a, govt. office teng khawlsak hiding inleng gen hi. Dakkal 38 sung Strike hunah passenger service teng inleng nasep khawlsan di’n ngen a, dawr leh siamsinna munte banah govt. leh private office teng khak ding in theisak hi.


BJP leh NPF in Manipur humbitlou: RK Ranjit
Imphal, May-19: Naga People Front (NPF) leh Bharatiya Janata Party (BJP) Manipur Pradesh te’n Manipur integrity humbitna dingin panlalou uh hi’n MPCC Treasure & Minister-lui RK Ranjit Singh in tuni’n ngawhna bawl hi. Imphal Municipal Corporation’ Election adia Congress Councillor candidate Yumlembam (O) Lukamani Devi (Ward No. 19) adia campaign patna ding Flag-Off aneih hunah MLA RK Ranjit in NPF leh BJP-te chouna bawl a, Congress govt in mipi humbitna ding in issue tuamtuam sai uh hi’n leng gen hi.


May 23 apan 24-hrs bandh puang
Imphal, May-19: Nungrei Meira Paibi Shang ah April 11, 2016 a thau khahte matkhiakna dinga kibawl Joint Action Committee pawlin May 23, 2016 akipan dakkal 24 sung Bandh puang uhi. Tunitaklam in Imphal ah JAC Convenor Sanjoy Khaidem in Media-te kimuhpih in JAC ngetna state govt. in buchingsaklou hi’n gen a, thau khahna ah naupang 4 telin mi 14 liam in amaute lakah mi 12te tunitan hospital ah omlai uh chi hi. Agenzelna ah meltheihlouh tuailai mi 3 in motorbike a tuang in Meira Shanglen ah thau kap uh a, tunitan kuate gamtatna hiam chih suikhiak hinailou hi.


MLA inn ah bombpuak, helte’n BSF ambush
Imphal, May-19: Thoubal leh Chandel gamgi ah tuni’n helpawl khat in Border Security Force (BSF) personnel, foot patrolling neite ambush uh a, hun bangtan hiam kikaptuahna om mahleh si-le-liam omlou hi’n kigen hi. Thusuakin agendanin BSF 54th battalion-te Thoubal district a Heirok Police station huamsung Malei Lampak (Heirok Chingdongpok) munah tuzing dak 10:30 velin galvan tawi helpawl te’n bukap uhi. Official thusuakin agendanin helte’n RPG (Rocket Propel Grenade) in security force-te kap masa uh a, huainung in automatic rifle zang in kap uhi. BSF lam inleng two-inch mortar leh thau in thukkik uh a, minute 5 sung vel kikaptuah uh chihthu om hi. Thiltung tawh kisai in police commando te’n leng kintakin thiltunna mun delh uhi. Tuni a thiltung BSF te bukapna tawh kisai Police leh security force te’n NSCN(IM) cadre-te gamtatna hiding in gingta uhi. Thusuak dang ah helpawl hiding a gintak te’n Thoubal district sung Wangjing a MLA Paonam tenna inn ah bomb hattak, tuzing dak 9:00 velin hihpuak uhi. Police  te’n IED bomb hiding in gingta uh a, thiltung ziaka liam omlou hi’n leng gen uhi. 


TUNI THUPI:
“A panna a na migenthei vaihawmna na hekkawi ding ahi kei.”
- Eksodas 23:6


EDITORIAL:
BJP adingin kong kihong!
Tutung state 5 a assembly election om ah, centre government adingin lam tuamtuam ah kong ki hong bangin ngaihsun theih hi. Adiakin, India malsuahbial ah a chik achik in BJP ahat ngeikei himhim a, tutung a BJP in absolute Majority a ngahpe’n thil lamdangtak ahi. BJP adingin India malsuahbial ah tawlet (window) liantak kihong bangin ngaihsut theihin om hi. Maban ah BJP in North East State bial hon bangchi nuai ding uhiam chih theih hinailou lai hi.
    North East India adia mun poimawh penpen ahileh Assam hi a, Guwahati khawpi apan thil tamtak sepsuahtheih hi. Meghalaya state ah tulel in Congress vaihawmna a omlel a, Mizoram leng tuabang mah ahi hi. Tripura state ahihleh a chik achik in left front te vaihawmna ahi a, Arunachal Pradesh a thubuai tungtang leng kuapeuhin ithei vek uhi. BJP in Assam state a zawh ngeingei ua leh amaute adingin NE bial ah kong kihong mahmah chih theihin om hi. BJP in centre leh North India lak luhzou mahle uh South India a luhzou ta dihkei uh chih tutung result ah chiang mahmah a, Assam state a vaihawmna hon let ngeingei ua leh state dang 6/7 te hon khen mahmah ding uh chih chiangsa ahi hi.
    Sahkhaw vai ah genta le hang South India ahihleh Christian te hatna ahi a, West Bengal state bel namniamte kipawlkhawmte hatna ahi hi. Hun paisate in hiai state ahihleh CPI makaih left front te’ hatna leh akum akum a vaihawmna ana letna mun hi ua, term lui in Trinamool Congress in khenkhia uhi. Tua ziakin, tutung state 5 a election paidan i et vengveng leh kikhekna chikhat (changes) om ding adiam chih theihin om hi.
    India malsuahbial adia state poimawh penpen Assam ahi hi. Assam ah Tarun Gogoi ministry in nna hoihtakin semmah ua, ahih ziakin, a sepkhelhte uleh a sepkhaklouhte uh alangtang a phoulak ahih ziakin, mite’n BJP bawh zungzung mai uhi. BJP adingin India malsuahbial ah kong kihong lian mahmah a theihin om hi. Himahleh, mite’ paidan leh eilawi paidan kibang dingin i gingta kholkei hi.
    Eilawi bel mimal a ki en ihi a, BJP ticket ngah ziaka MLA chingmawk dinga iki gintak leh ihih khial mahmah kha maithei uhi. 3 bills kichi inei ua, huai pe’n advantage dan a la MLA tuhsawm ihih mawkleh dikthei tuanlou ding hi. India gamsung state tuamtuam ah BJP in ma asawn mahmah uh chih ithei ua, ahih ziakin, ei local context ah ma asawnna uhiam chih mi tamtak in enzui uhi. Centre government ah BJP’ nasep hoihlou teng taklang theiding hunkhop om a, Manipur Govt ah leng Congress govt in nna asep hoihlouh teng uh taklang theiding mi tamtak om uhi. North East bial ah BJP adinga kong aki hong kawmkawm a thil hong ki ‘balsialnuai’ thei tamtak om hi.
    Congress/BJP ahihkeileh political party tuamtuamte ahoihkei i chi zenzen kei a, vaigam paidan leh eilawi paidan naktakin ki danglam hi. Vaigam lam bel political party agup uh tungtawnin pai ua, eilawi bel mimal ah kipai hi. Election kuan hong hi taktak leh bangteng pholhkhiak hong hiding hiam chih theih hilou a, mimal a kichouna tanpha hong om  mahmah ding in gintakhuai hi. Mipi palai ding kitelna (election) pe’n pawng maingap ding hilou a, lehkhathei leh gam leh nam it taktakte ading ahi hi. Kamzol thu hiam ahihkeileh mipi pawng maingap thu a khem hun hinawnlou hi. Tua ziakin mipite’n gam-le-nam puah taktak kua hi hiam chihte ngaihtuah vengveng kiphamawh hi.
    Mipite’n state sung ki vaihawmna thei mahmah ua, Tamil Nadu state ah AIADMK mah in vaihawmna lennawn dinga, West Bengal state ah TMC mah hinawn dinga, Puducheery ah Congress leh a kizoppihte hithei phut ua, Kerala ah LDF pawl mah hiding ua, Assam state ah BJP in Congress te zahlakhuaitak in khenkhia uh chih ahi. Thil omdan i et vengveng chiangin Congress v/s BJP te in hun bangtan India ah vaihawmna hon lending ua chih bangleng ngaihdan piangthei a, mipite’ vaihawmna tungtang ah left front ahihkeileh regional party tuamtuamte leng hong ki sang mahmah ding un gintakhuai hi. Akoi abang hileh BJP te’n mailam nawt mahmah ua, India malsuahbial adia mun poimawh penpen Assam state hon lakzawh utawh kitonin aban a state tuamtuam ah kan hon suantou zel ding un kilang hi.