Manipur Express | May 23, 2016

HEADLINES:
Chandel a ambush ah JCO 1 telin AR mi 6 si

Imphal, May-22: Indo-Myanmar gamgijul Chandel district sunga Hangsi village ah tuni sunnung dak 1:00 velin galvan hoihtak tawi helpawl te’n 29-Assam Rifles convoy ambush uh a, amun ah Junior Commission Officer (JCO) 1 telin A/R personnel 6 thah in om uhi. Joupi A/R Battalion HQ apan km 15vela thiltung tawh kisai PIB (Defence Wing) thusuak gendanin Holing jang a menchim va enkhiate’n Batallion HQ zuan a akiklam un phaijang helpawl hidia gintakte tawh kikaptuah uh chi a, hun bangtan hiam kikaptuahna om nung in A/R mi 6 si in, helpawlte gamnuai ah kihemmang uh chi hi.
    Thiltung tawh kisai thukizadan in helpawl te’n Assam Rifles gari 3 kizuite mun naichik apan bukap uh chihthu om hi. Hiaithu sut ahihtan in helpawl kimuang omkei mahleh, Kangleipak Communist Party (KCP), Kanglei Yawol Kanna Lup (KYKL), People’s Revolutionary Party of Kangleipak (PREPAK), Progressive faction (PREPAK-Pro), Revolutionary People`s Front (People`s Liberation Army), United National Liberation Front (UNLF) leh United Peoples Party of Kangleipak (UPPK) kigawmna CorCOM gamtatna hiding in Police te’n gingtak thu uhi.
Kikaptuahna ah helpawlte’n INSAS rifle 1, AK-47 rifle 4 leh LMG 1 laksak uh a, thiltung zakphet in Joupi Battalion HQ akipan in Assam Rifles pawlin thiltunna mun delh uh a, operation bawl mahle uh helpawlte kihemmang khin uh chihthu om hi. Union Home Minister Rajnath Singh in Jawan site suun kawm in asungkuante uh thuakpih thu khak a, DG Assam Rifles leng houpih in, hiai thiltung MHA in hoihtaka enzui ahihdan DG Assam Rifles theisak hi. Kumlui June 4, 2015 zinglam dak 8:30 in Chandel district sung Paralong leh Charong kikalah NSCN(K) leh CorCOM pawlin 6-Dogra Regiment convoy kizuite ambush ngeita uh a, huai hunah Army 18 si in midang 16 liam uhi.


Union Minister hihna apan Sonowal kitawp
Assam CM dingin Governor in Sonawal chial
New Delhi, May-22: Assam Chief Minister thak ding Sarbananda Sonowal in tuni in New Delhi ah Union Council of Ministers hihna apan kitawpna pia hi. Kum 53 lel a upa Sonowal in Prime Minister Narendra Modi tungtawna kitawpna a piak President kianga  piaktouh (forwarded) hi a, tunitak mah in India President in pomsak chihthu kiza hi. Thudang  kizadanin  Assam Governor PB Acharya in tuni in Chief Minister hihna lending in Sarbananda Sonawal chialna bawl chih thu kiza hi.
    Prime Minister Narendra Modi in President Pranab Mukherjee kiangah Sarbananda Sonowal, Minister of State (Independent Charge) of Ministry of Youth Affairs and Sports in Council of Ministers apan kitawpna lehkha a piaklut pen tuhun (with immediate effect) in pomsak hihen a chih dungzui in President in leng pomsak kichi hi. Tua tawh kiton in PM Modi thupiak bangin Jitendra Singh, Minister of State in Ministry of Youth Affairs and Sports leng enkol phot ding chi’n Rashtrapati Bhawan thusuakin gen hi. Sonowal leh state BJP Chief Bora tulel in New Delhi ah om uh a, kuakua Assam a minister dinga laklut hoih ding hiam chih National BJP Chief Amit Shah telin central a BJP leadr tuamtuam tawh kikumkhawm uh chihthu kiza hi.
    Assam khawpi Guwahati ah tuni in BJP legislature party meeting  om a, tua ah leader dingin Sonowal telching uhi. Huai tungtawn in Assam Governor P B Acharya in Sonowal kiangah akinlam a government thak bawl dingin theihsak chihthu om hi. Prime Minister Modi in Sonowal kipahpihthu genkawm in mipi kianga BJP in thuchiam a bawlte semkhe ding a theisak kawmin ama’ tungah mipi’n kinepna liantak nei uh ahihdan mangngilhlou dingin zasak chihthu kiza hi. Sonowal bel All Assam Students Union (AASU) leader lui hi a, huai apan AGP ah lut in kum 2011 in BJP zom hi. Kum 2012 in BJP Assam Unit ah President hihna len a,amah  mi chitak leh ginom mahmah a theih ahih ziakin tutung Assam a assembly election ah BJP' chief ministerial candidate a guan in om hi.


Tuitha leh Lanva lui khang: mi tamtak buai
Lamka, May-22: Lamka khawpi leh akim ah zan in vuah chiin a, huchih lai in Tuitha leh Lanva-lui telin khawpi sunga lui guamte nasatak in tuilian a, innkuan bangzah hiamte inn hihbuai hi. Lanva-lui akhan ziakin a gei ateng inn bangzahhiamte  hihbuai a, Chinliankhup s/o (late) Damchinpau of Emmau Street, Hebron Veng, New Lamka inn anhuan innlam nawksia a,  Nekzapau inn leng a lauthawng huai ziakin kituahkhia uh a, Thanglamkhup-te’ inn leng abang  khang (crack) hi’n kigen hi. Thiltung tawh kisai New Lamka West MDC CT Lian Guite leh New Lamka East MDC Gouzamang Guite, EM ADC/CCpur  te’n tuni zingkal in enkhia uh a, Gouzamang in innsia tawh kisai a poimawh bangbang District Disaster Management Authority  tungtawn in a panpihna ngaihtuahsak ding hi’n gen a, innsung van puakkhiakna dingin a gari thawh a, CT Lian Guite in MDC' Relief Fund tungtawn in Chinliankhup leh Nekzapau kiang ah anntang bag 1 tuak pia hi. Tuitha-lui leng naktak a akhan ziakin luipang a teng Zoumunnuam khua ah innkuan 170 laka 50 vel hihbuai a, huai lak ah inn 9- Niangngaiching,  Thangchinkhup, Ginminlun,  Khamkhopau, Ginlal, Paukholam, Dongsienmuan, Nehkhankap leh Thanglianlal-te’ inn tui in bangtanhiam tum in bel theilou uh hi’n huai khua hausa T. Pauchinkhup in gen hi. Belh theihlouh inn 9- neite’n innkim leh kiangte’ bel in omlel uh hi’n gen a, tuilian ziaka thil kisia leh misi bel omlou hi’n gen hi. Zoumunnuam khawmite Tuitha luipang akipan metre 10 vela gamla ah teng hi uh a, tuilet hunchiang in buaisek uhi. Thiltun hun bel zan nitak  dak 11:00 apan tuni zinglam dak 1:00 kikal vel hi’n kigen hi.


LOCAL NEWS:
Laibu honna leh Pathian kianga latna
Lamka, May-21: New Lamka a Rayburn College ah tuni sunnung  G. Thangkhosuanmung, EM, ADC/ CCpur in ‘Systematic Theological” (The Cardinal Christian Doctrines) kichi laibu thak hong a, Dr. Rev. Khen P. Tombing, Chief Co-ordinator, PCI (R) in thumna in lan hi. Huai ah Guest of Honour in T. Khaikhomang, Chairman, Finance Committee, ADC/CCpur leh Chief Host in Dr. Rev. Khen P. Tombing  pang uh a, Langkhanpau Guite, Chairman ADC/CCpur leh Chinlunlunthang, President  UZO telin mi poimawh tuamtuam in uap uhi. Laibu ahihleh Dr. David G. Zou in a gelh hi a, aman tulelin Asian Mission College, Kohima ah academic dean lenlel hi.


WPFC makaih in thumna om ding
Lamka, May-22: Women Prayer Fellowship, CCpur-te  makaihna in May 24, 2016 zinglam dak 10:00 akipan sunnung dak 2:00 tan Hiangtam Lamka a EBC biakinn ah tukum adia masapen di’n mipi thumkhawmna om ding a, May Rose, Rev. Lalpienglawm, Ngaihnem leh Kimkhonei te’n thupi tuamtuam pansan in thumna makai ding uhi. Huai hun ah kuapeuh tel dingin committee in chial hi.


Class IX-XII-te’ adi’n seminar om
Lamka, May-22: Evangelical Baptist Convention, Lamka Sorth Divn nuai a Baptist Children deptt  saina in tuni sunnung in EBCC Hebron ah naupang pawl a omlai Class IX - Class XII-te adi’n seminar om hi. Huai ah naupangte’n musical drama lahna(show)  nei uh a, Dony Donbiakmawi leh Manthiannem te’n Pathian la sa uhi. Seminar ah Resource person in Lianding Guite, Child Co-ordinator, EBC pang in sinsak hi. Aman agenna ah kipahna teng thilhoih hilou a, tuailai khangthakte’n numei leh pasal kal ah sianthouna (virginity) mansuah sangin cell phone mansuah poisa zaw uh chi a, naupangte’n sianthouna mah kembit dingin hasuan hi. Huai Seminar ah Class IX-Class XII student tamtak tel uh a, programme zawhin S. Ginzalian Ngaihte in hunkhak hi.


YPA Gen HQ vaipaw ding telna
Lamka, May-22: YPA Gen HQ ah kum 2016-2019 sung vaipaw ding mi 17 tel ding in June 3, 2016 (Sintawpni) zinglam dak 11.00 in Hiangtam Lamka a YPA Gen HQ Hall ah election om ding hi. Huai adia candidate dingte’n May 27, 2016 (Sintawpni) tan nomination pelut thei ding uh a, scrutiny (nomination paper etchetna) leh withdrawal (candidate-te kzukikkik theihna)  hun May 28,2016(Kiginni) hiding hi. Chairman/Secretary, CEC, YPA GHQ leh Block President/Secretary-te kiangah nomination form muhtheih ding chi’n YPA GHQ thusuak in gen hi.


SBI staff lakna ding hun kisuan
Lamka, May-22: State Bank of India(SBI) a Junior Associate leh Junior Agricultural Associate lakna ding in tuni’n written test om a, huai ah 1st leh 2nd session a candidate-te’n zouman mahle uh 3rd leh 4th session a candidate-te ading in ahun kisuan a, May 28,2016(Kiginni) in Canchipur, Imphal a Ionz Digital Centre ah written test om ding hi.


May 24 tan book exhibition om ding 
Lamka, May-22: The Seven Sister Publication te’n Rayburn College ah May 19, 2016 akipan Book Exhibition a neih uh tuni (May 22, 2016) tan ding himahleh mipi’ akipan ngetna a tamluat ziakin May 24, 2016 (Sepnawnni) tan adin ahun behlap a om hi’n  Principal, Rayburn College akipan kiza hi.


Online game tournament om
Lamka, May-22: The Hill Men saina in tuni sunnung in CCpur College a Multipurpose Hall ah mobile online/multiplayer game kichi ‘3-Men Tag Team Mini Militia Tournament- 2016’ 2veina om a, huai ah team 17 tel uhi. Tournament ah ‘Singlung Disco’te’n 1na la in kipahman Rs. 1,000/- sang uhi. 2na in Bawinu Dawr pang a, Rs. 500 sang uh a, 3na in Vikings pang a kipahman Rs. 200 sang uhi.


SUUNNA:
K.Chinlianthang @ Th. Pauchinlian @ Thoibi (44) f/o K. Thangzavung of Langol Housing Complex tuni nitaklam dak 1:20 in RIMS Hospital, lmphal ah sinna ziakin si a, T. Khatkhanchin inn pansan in nitaklam 5:30 pm in Chingmeirong Christian Cemetery ah kivui hi.


IMPHAL NEWS:
CM in Championship hun khakna uap
Imphal, May-22: Khuman Lampak Astro Turf Hockey Stadium ah Hockey India nuai a Hockey Manipur-te saina in ‘The 6th Hockey India Sub-Junior Men National Championship A & B Division 2016’ hunkhakna tuni’n om a Chief Guest in CM O. Ibobi pang hi. Functional President in Ksh. Thoiba Singh, ex-Olympian banah President, Manipur Hockey pang a, Guest of Honour in Dr.Chaltonlien Amo, Chairman, HAC; O. Nabakishore Singh, Chief Secretary; Ms. Mariamma Kutty, Sr. Vice President, Hockey India; Md. Mustaque Ahemd, Gen. Secy.,
Hockey India leh Dr. Th. Dhabali Singh-te pang uhi. CM in a thugenna ah sports kichi damtheihna lam, hinkhua bawlhoihna leh kithununna ding banah tuailai-te khantouhna dia kisinsakna a poimawh tak hi’n gen a, Hockey Championship tawh kisai a Souvenir honkhiatna nei hi’n leng gen uhi. Division A final match ah Manipur leh Odisha ki mawl uh a, Odisha in 3-2 a Manipur zou uhi.


Vuah tam ziak in tuilian leh menchim om
Imphal, May-22: Manipur ah ni bangzah hiam paisa a vuah zuk ziakin phaizang leh singtang gam-te ah tuilian leh menchim om a, Chandel a Imphal-Moreh lampi Trans-Asia Highway No. 1 in a tawt khak Tengnoupal Police Station gei a menchim ziak in lampi kikhak tan a, Moreh apan Imphal zuan gari-te tang uhi. IFCD in Loktak Lake a tui tam luat ziakin tui khahkhiakna di’n Ethai barrage a gate 5 hong uh a, Lamphel leh Uripok area ah tuichim hi’n gen uhi. Imphal West a Nambul river a let ziakin innkuan hunkhawp buai uh a, Imphal river leng danger level tan tung in mun khenkhat a luang let a, IFCD thunei te’n kivenna ding in embankment gei ah gari tai ding kham uhi. Khurai Salangthong area ah tui let ziak in mun bitzaw ah suankhiak in om uh a, Thangal leh Paona bazar ah leng tuichim a, Thoubal river in Kakching sub-division sung a mun khenkhat tum hi. Ngamthang Haokip, Minister (IFCD) leh official te’n Imphal area leh a kim a tui chim na mun-te etkhiakna va nei uh a, flood control room honkhiat hi’n leng gen hi. Huailou in Senapati Brigade nuai a Maram Battalion leh mipi’n  Senapati district a NH-2 in a tawt khak New Magaimai village gei ah menchim zan in hahsiang uh hi’n kigen hi.


Biological diversity 2016 zatna om
Imphal, May-22: Dept. of Forest and Environment, Govt. of Manipur-te saina in Manipur Film Development Corporation ah ‘Mainstreaming biodiversity, sustaining people and their livelihood’ chih thupi zang in tuni’n International days of Biological diversity 2016 zatna om a, huai ah Chief Guest in I. Hemochandra, Minister (Forest and Environment) pang hi. Functional President in O. Nabakishore, Chief Secretary, pang a, Guest of Honour in Dr M. Homeshwor, Director, Environment pang hi. Chief Guest in Manipur ah biological diversity kepbit banah puah hoihna diagovt. leh khangthak-te pankhawm ngai a, naungek piang tung lawpna a sum sen sang a singnou suan zaw ding in gen a, Manipur a flora leh fauna om te theihna dia mobile apps leng honkhiat hi’n gen hi.


Exam saithak ding in phutna bawl
Imphal, May-22: Manipur a Center tuamtuam ah MPSC 2016 preliminary exam tawh kisai a MPSC thuneite’n a thak a exam sai dingin MPSC candidate te’n ngetna bawl uhi. Hiai tawh kisai a Ayam Rogendro, President, JAC against misconduct of MPSC Pre-Exam 2016 in media-te tawh kimuhna hunah Prelim exam hun ah Instruction 9na ah answer dong khelh ziakin penalty omlou ding chih kigelh banah objective type question paper dong khelh leh penalty om ding kichi in candidate-te thei kokalh (confuse) sak a, exam center teng ah exam timing kibanglou a, MPSC thunei te’n thil diklou-te bawl dik masiah result puang lou ding leh exam saithak ding in ngetna bawl a, MPSC thunei-te apan dawnna kichian tak a om keileh law court tut ding uh hi’n leng taklang hi.


Chandel district ah inn 8 kisia
Chandel, May-22: Chandel district a Khengjoi sub-division in a huamkhak TM. Dingpi village ah zan in huihpi-vuahpi tawh kithuah kekkia in tenna inn 8 hih sia a, khaw mipi te’n Joupi village bel uh hi’ kigen hi. Onjamang Touthang, Chief, TM Dingpi village in thiltung tawh kisai agendan in May 21, 2016 zingsang in huihpi leh vuahpi kithuah in inntung 8 mutsiat ziak in omna ding neilou mi hunkhawp om a, mipi bit zawkna dia Joupi village ah tai uh a, a kisaipih thuneite’n thiltungna mun enkhe ding leh a poimawh bang a panpih ding a ngetna bawl hi’n leng kigen hi.


AAY beneficiary-te lungkim lou
Imphal, May-22: Lamlai A/C a Ksh. Biren, Minister (CAF & PD) bial a AAY beneficiary te’n kha 1 a anntang kg 35 lei thei ding a bikhiah himahleh National Food Security scheme nuai a fair price shop ah anntang kg 13 lel a lei theih ziak un lungkim louhthu taklang uh a, hiai tungtang ah meeting nei uh a, huai hun ah Ksh. Biren kigolh a, anntang bikhiah zah lei theihna dia a panlak masiah scheme hamphatna la lou ding in thupuakna bawl uhi. AAY beneficiary-te kiangah anntang bikhiah zah zuak louh tawh kisai a dotna a bawl uh agent te’n beneficiary a tel kha lou innkuan-te kiangah zuak ding a beneficiary-te adia anntang bikhiah apan khenkhiak sak uh hi’n taklang uhi.


TUNI THUPI:
“Huai chiangin mangte in na hon lausak a, mengmuhnate in na hon mulkimsak hi:”
 - Job 7:14


EDITORIAL:
Mengmuhna leh a taktak gam
Sappau in gen lehang, ‘Vision and Reality’ pen mengmuhna leh a taktak gam chih bangin kilet thei dingin ngaihsun hang. Mihing a piangkhe phot in ngaihdan chi tuamtuam i nei ua, i ngaihdante uh a taktak gam a sep buchinna dingin khuak dang poimawh ahidiam chihbang leng ngaihdan om a, mahni khuak in a zawh kei leh khuak dang ‘hire’ mai poimawh dingin kilang hi. Mimal ah, innkuan sungah, khawtang ah, politics thil leh adangdang ah kuapeuhin mengmuhna (vision) neichiat mah lehang ataka sepsuahna (reality) dingin khuak (brain) poimawh mahmah a, khuakte’ lakah leng khuak hiamdiak (sharp brain) kiphamawh ahihdan theih dingin hoih hi.
    Tuma zekin Nagaland Chief Minister TR Zeliang’ ‘Vision Document’ kibawlkhia pen kha 2/3 sungin hong suak ding a, sepsuah pah ahi ding chih thupuan bawl  a, ataktak in a suaikei (impossible) hi. Manipur Chief Minister O Ibobi in Prime Minister Narendra Modi paidan copy kawmin ‘Make in Manipur’ chih paipih mahleh, tua leng gahsuah dingin i gingta kholkei hi. India malsuahsuah bial ah mengmuhna tamtak om a, himahleh a sepsuahna (execution) lam ah bangmahlou ihihdan theihchet  in om a, ataktak gam hon lutpihtu dingin party muanhuai kuamah omlou a, politician hilelte leh hidan a kivawkkhiak sawmte’ tungah leng ngaihdan piak haksa mahmah hi.
    Mengmuhna (vision) neite mawhsa ihi kei a, kuapeuhin neitheih mah ahi hi. Ahih ziakin bangchibang mengmu i hihiam chih kivel poimawh  a, a taktak gam tunna ding hial a mengmu khabanlou ihihleh thil poi mahmah hikha ding hi. Mi bangzahhiamte’n ‘tulai in meng ka mu a, pathian hon sawl ka hi’ kichi zenpeuh ua, ‘heutu tuamtuamte kiang ah vapai inla in hiai thu va tangkoupih in’ chihthu khawng bang om lai. Tua kia hilou in ‘theihsakna khat ka ngah a, na heutupa/na palaipa un hih diklou a, amah thumpih dingin sai-ip puan silhin kisingsa un’ chih tanpha sapna ngah om hidanin leng kigen hi.
    Numei khenkhat in a genna uah, na Nam heutute uh thumpih dingin mengmuhna thupitak ka ngah a, tua ziakin Sielmat lei (bridge) apan na Nam puan utawh vaktou un chi’n thu kaza chi pawl leng om hi. Adik maithei, adik kei maithei! Mite’n amau thungahdan chiat gen ahihman un adikleng om ding a, a diklou leng omtham ding a, huchikalah, Christianity huai takin gen lehang i paikhelh (cult) khak ding uh lauhuai petmah hi.
    India in tulel a vision (mengmuhna) tawh kisai adiakin  India malsuahbial ading bik a atangkoupih pih uh ahihleh ‘the North East Vision 2020’ leh ‘Act East Policy’ hi a, hiaite bangchileh eilawi in a  zar izou ban de aw chih khawng hon ngaihtuahsak hi. A taktak gam itun dek chianga kisuipai i hihkhak ding thil lauhuai  hi a, mite’ policy theihsiam leh ngenteltak a suizui (digest) poimawh hi. Eilawi mengmuhdan leh mite’ mengmuhdan a kigam latluat leh huai in ei leh ei hon kisuipaisak khathei hi.
    Phaizangbial mite tawh ngaihdan kikalh ziakin tulai in iki-bandh khel maimah ua, thil poitak ahi. Kihouna tungtawn a i buaina case uh hih vaiven leng hithei  maithei, hitheilou maithei kalah i ding ua, i sungthu uah thil sautak a kigolh chih haihvual hilou hi. Tutung India state 5 a Assembly election om ah BJP makaih NDA te’n Assam ah vaihawmna len dingin kisa ahita ua, NE state tuamtuam hon luhtou laiding ua, Christian-te’ tamna India malsuahbial hon luahkhum (coup) ngeingei ualeh eilawi kichai vawt i hita maiding hi. Politician te’n mengmuhna thupitak a nei ua, Engineer te’n leng ‘perspective view’ kichi muh pailetna saupitak neiban uhi.
    I gam paidan i et vengveng chiangin mengmuhna i neih leh ataksa sepsuahna leh ataktak gam kichite a kiton helhel (parallel) a a pai  ding ahi a, sautak muban kisa selua in i mitbulh (spectacles) lamkalah i sukkiak khak mawk leh singzung neuchik  ah leng ei leh ei kisuihpaih beibui theih ahihdan theih poimawh  hi. Mengmuhna nei kichian taktak nei ihihleh vanlam (Toupa) akipan ngah mah ihihdan chet hihen la, huai kawm in, kuahiam het leh kua hiam tawisang sawmna dingin i mengmuhna zangkei thei lehang bang achi dia?