Manipur Express | May 22, 2016

HEADLINES:
1na akipan 3na tan (top three position) numei ngen in la
CBSE saina a Class XII result suak: 83.05% pass

New Delhi, May-21: Central Board of Secondary Education (CBSE) saina nuai ah March 1,2016 akipan April 22, 2016 tan Class XII examination om tuni’n final result puankhiak hi a, examna a tel 10,65,179 candidates lak ah 83.05% in pass uhi. Delhi a om Montfort School akai Sukriti Gupta in mark 500 lakah marks 497 mu in khatna (1st position) la a, aman Physics leh Chemistry ah marks 100 tuak mu a, English, Math leh Computer Science ah marks 99 chiat mu hi. Palak Goyal in marks 496 mu in 2na (2nd position) hihna la a, 3na a pang Somya Uppal in marks 495 mu hi.
    Tutung in kum 2 akizom in Region tenga result puankhiak hi a, South Indian in region dangte sangin hih hoihzaw a, Thiruvanathapuram region in hihhoihpen a overall pass percentage 97.61 tung hi. Chennai region in 2na la a, huai region a overall pass percentage leng 92.63 tung hi. Huai banah pasal-te sangin numei(girls) lam in hih hoihzaw uh a, numei examte lakah  88.58 % lawhching uh a, pasal lam ah 87.85% lel lawhching uhi.
    Overall pass percentage leng kumlui in 82% himahleh tukum a hoihzaw in 83.05 % tung hi. Tele-counselling in zui zomngal a, result suahma akipan hibang counselling pat hi a, tu in second phase zingchiang May 22, 2016 akipan June 4, 2016 tan sutzop hiding hi. Topper apang Sukriti in a gendan in exam dia a kisakkholh lai in lehkha hahtaka a sim banah NCERT laibute ah kinga deuh hi’n gen hi. Aman hih hoih ding chih kithei mahleh topper hihna la pha ding in kinem banlou a, ‘hiai zaw ka lam-et phaklouh ahi’ chi hial hi.


Diktatna deih mi 10,000 valin vuahzu nuai ah lamzui
Lamka khawpi ah Anti-Corruption Rally om
Lamka, May-21: Tuailai 1434 Pro Core Committee saina in tuni’n Lamka ah Anti Corruption Rally ah mipi 10,000 val in lampi zui in rally pai uhi. Amau  New Lamka a Gospel Centenary Hall ah kingak khawm in Rev. S. Vungminthang, General Secretary, EBC in hasotna thu genkawm in thumna in khakhia hi. Rally a telte’n Tedim Road zui in Tuibuong  District Council campus ah programme sawtlou zang uh a, huai apan Tedim road zui in Hiangtam Lamka a YPA GHQ hall programme saulou zang nawn uh a, huai zawh in Rev. M. Pumsuanmung, Youth Co-ordinator, EBC in thumna in hunkhak hi.
    Rally ah diktatna a kilamthak lunggulh a suai kaite banah  suaikai khalou hileleng thudik a vaihawmna deih mipi tamtak lamlian zuite’n diktatna lunggulh huai ahihdan langsak in vuahzu-daikai nuai ah lampi zui uhi.
    Lal Hossan, Vice Chairman, ADC/CCpur in District Council office ah ana vaidawn a, aman a genna ah nekguk-takgukna  doudalna dinga mipi kalsuante kipahpih ahihdan gen hi. Rev. K. Kamchinkhup, Convenor, Tuailai 1434 Pro in a genna ah vuahzu-daikai nuai a diktatna lunggulh mipi hiaizah paikhawm in i-gam in diktatna lunggulh mahmah ahihdan langsak chi’n gen hi. Pathian in naktak in hong vualzawl a, Christian hihna tawisang ahihlai in diktatlouhna ziakin naktak a hihniam in om a, Pathian thu sangin thau tawite’ thu kimangzaw in, lauh leng kilau zaw a, huaite sangin Pathian mah lauhuaizaw chi hi. Sum-le-pai a kitaitehna nasatak omziakin in i-gam in gen vuallouh haksatna tuak lel hi’n leng gen hi. Rally a telte’n diktatna poimawh ahihdan slogan tuamtuam sam uhi.
    Tuailai 1434 Pro a Core Committee te’n DC/CCpur office leh office tuamtuam 25 ah anti-corruption poster tak uh a, huaite Pastor/Rev 25 te’n office mun teng ah lan uhi. Rally ah All Manipur Tribal Women Union (AMTWU) makaih numei pawl tamtak tel uhi. Anti- Corruption Rally ah CT Lian Guite, MDC leh azi banah G. Thangkhosuanmung, EM ADC/CCpur leng tel uhi.


LOCAL NEWS:
Rayburn College ah book exhibition
Lamka, May-21: The Seven Sister Publication te’n New Lamka a Rayburn College ah May 19, 2016 akipan Book Exhibition aneih uh May 22, 2016 zou ding uhi. May 19, 2016 in  Rev. Khen P. Tombing, Principal, Rayburn College in hongkhia a,huai book exhibition ah  school naupang leh laibu sim lunglut kuapeuh in kimantak a leitheih ding 10% discount in laibu tamtak zuak uhi.


Thousilen hawmkhe ding
Lamka, May-21:  National Vector Bourne Disease Control Programme /CCpur te’n  malaria natna tamna biala hawm dingin thousilen (Long Lasting Insecticide Net) a ngahte uh May 23, 2016 zinglam dak 10:00 in CMO Mini Conference Hall ah hawmkhe ding uh a, DC/CCpur khuallian  a pangin hong ding hi. Programme zawh in PHC/CHC tuamtuam a Medical Officer In-charge, Male Health Worker leh ASHA Facilitator te’n sensitization tawh kisai in meeting nei ding uh a, malaria natna dou dingdan genkhawm ding uhi.


MDC in Solar street 14 thuah
Lamka, May-21: 17-New Lamka East a MDC M. Gouzamang Guite, EM/ADCC in solar street light a ngahte a bial Lengtonghoih Street leh New Lamka PHSC kikal mun 14 a thuak in  tu’n vak theita a, nitak chiangin nuamtuam mahmah hi’n kigen hi. The 3rd Finance Recommendation tungtawn in MDC-te adin solar street light hunkhop  hongtung a, huai lak ah 17-New Lamka East in 14 tang hi’n leng kigen hi. Bialtu MDC in hibang common facilities omte mipi a’ hi a, kuapeuh in kepdan siam poimawh in, adiakin street light kithuahna gei a inn neite’n mahni a banga kem a enkai ding in ngen hi.


Inn bawlding te’n PWD-te dot theih ding
Lamka, May-21: Inn bawl dingte’n sum tampi senga private engineer/architect hire ngai selou in PWD/ CCpur divn.  a Engineer/SO te zat theih gige hi’n  Nengkhanpau Guite, EE, PWD/CCpur Divn.  in gen hi. Innbawl dingte’n labour cost, material cost etc. theih kia hilou in design hoih leh detdou neihthei ding a, huai din  PWD/CCpur divn. staff te mansa gige ahihdan uh  EE in gen  hi.


Lamsuanlun Tonsing in Scientist ‘B’ mu
Lamka, May-21: Lamsuanlun Tonsing s/o T.Khamzagin of Langol, Imphal in tunaizek in Beaureau of Indian Standard, govt. of India ah Scientist ‘B’ sepna mu hi.Aman Agartala ah B.Tech. zoukhia a, Steel Authority of India Ltd. (SAIL) ah hun bangtan hiam Jr.Manager sem hi’n kigen hi.


PASS in saina in Aids & Appliances Camp
Lamka, May-21: ALIMCO Outreach Centre, Guwahati tungtawn in People Advanced in Social Services (PASS) in vualbanloute adi’n May 23, 2016 zinglam dak 10:00 in IB Road a Synod Hall ah Aids & Appliances camp saiding uhi. Huai ah  guh-le-tang lama buaina nei, khawzakna leh khaw muhna hoihloute assessment bawl hi ding a,  natna dungzui in vanzat - tricycle, wheelchair, crutch walking stick leh elbow crutch, hearing aid,  white cane, tablet, DV player leh smart phone ngaihtuahsak hiding uhi. Camp a teldingte’n lai poimawh tuamtuam -passport size copy 2-(Ortho leh Locomotor-te a ding), disability certificate (Xerox copy) banah income & residential certificate tawi ngai ding hi.


Bongbal case ah mi 3 man sawn uh
Lamka, May-21: Police apan kizadan in Ginsuanhau, MLA PRO’ lui Thangsianbiak  kipnap thu ah Imphal West Commando te’ mat Lunliansiam Vaiphei (22) s/o Letzathang Vaiphei of Salam Patong village, Sadar Hills,  Letkhogin Vaiphei (47) s/o Nekthang Vaiphei of Salam Patong Village, Sadar Hills, leh Mrs. Tingngaineng (30) w/o (late) Thanglallian Vaiphei of Salam Patong village, Sadar Hills mankhia in FIR No. 107 (5) 2016 IPC U/S 364-A R/W 400 IPC & 25 (1-C) A.Act registered khum hi uhi. Mi 3 te mah  Bongbal area a T.Lala’ JCB driver kidnap case FIR No. 24 (5) 2016 CCP-PS U/S 400/365/34 IPC & 25(1-C) A.Act tungtawn in CCpur Police-te’n  mansawn (re-arrested) uh a, zan in CJM/CCpur court ah pawkhia  uhi. CJM in May 26, 2016 tan Police custody a omdin phalsak hi.


Simte MIL lopna omding
Lamka, May-21: June 24, 2016 in Simte inn ah SLS leh KZP GHQ saina in Simte MIL tawithei dia BSEM in phalsak kipahthu genna leh lopna omding hi. Huai ding in Committee kibawlkhia a,  Chairman- Dr.  Liankhanlal Simte, VC- P. Thomas Thonglianmang, Secy- H. Doumuanthang,Treasurer -L. Thangkhanpau, Fin. Secy . Hn. Khamlianmang, Info & Pub.ah Th. Lianboi Simte leh H.Thangkhansuan hi uhi. Physical arrangement-Hn.Ngulminlun leh Th.Thonglunthang ban ah Advisory Board : B.Dongzalian Simte, President, STC GHQ, Hn.Langkhothang, Chairman, SLS , L.Dongchinthang President,SYO GHQ leh Rev. L.H Jacky Simte, Supdt, Manipur AGEI hi uhi.


DIET centre upgrade kin poimawh
Lamka, May-21: HQ  veng a DIET Centre ah course tuamtuam training om  a, ZEO leh ADC/CCpur nuai a primary teacher te’n BA.Ed 2 yrs diploma in elementary education training-na ding in kidaih zoulou hi. Maban ah MA.Ed a 2yrs diploma in elementary education tan ziltheihna din upgrade  poimawh chih hi a,Education (S), RMSA nuai a primary teacher lakna ding leh TET exam-na ding in BA.Ed, MA. Ed 2 yrs diploma in elementary education certificate poimawh hi. DM College ah 2yrs diploma in elementary education zilna dingin selection ngai a, akum asim ngak a ngaih ziakin kum 1/ 2 nung a Education (S) leh RMSA nuai a Primary teacher lakna ding ah singtangmite’n buaina tuak ding a, huai venna din DIET Centre/CCpur  akinthei lam a upgrade a, MA.Ed 2yrs diploma in elementary education ziltheihna ahih  poimawh hi.


Laibu honna  leh latna om ding
Lamka, May-21: New Lamka a Rayburn College ah May 22, 2016 sunnung dak 1:30 in G. Thangkhosuanmung, EM, ADC/CCpur in ‘Systematic Theological” (The Cardinal Christian Doctrines) kichi laibu hongding a, Dr. Rev. Khen P. Tombing, Chief Coordinator, PCI (R) in thumna in lan ding hi. Huai ah Guest of Honour inT. Khaikhomang, Chairman, Fin. Comtt, ADC/CCpur leh Chief Host in Dr. Rev. Khen P. Tombing, Chief Coordinator, PCI (R) hiding hi.


SUUNNA:
T Haukhothang (50) s/o (late) T. Khatgin of Vengnuam South, New Lamka tuzing dak 7:00 velin khawsik in si a, sunnung in YPA hanmual, New Lamka ah kivui hi.
Upa Lalkhokam Gangte (87) s/o Evan. Paokhomang Gangte of Tuibuong, Laizon veng tuzing dak 1:00 velin teknat in si a, nitaklam in Tuibuong hanmual ah kivui hi.


IMPHAL NEWS:
Sualna doukhawm di’n CM in mipi chial
Imphal, May-21: Tuni’n 1st Manipur Rifles banquet hall, Imphal ah ‘Anti-Terrorism Day’ zatna om a, huai ah Chief Minister in sualna doukhawm a poimawh dan genkawm in, terrorism kalh ngam dingin mipi chial hi. Terrorism omlouhna ah khawtang chidamna leh mihinpihte theihsiamna om hi’n leng CM in gen hi. Manipur masawnna dinga panlak ahihlai in terrorism ziakin dan leh thupiak in siatlam nawt a, mipi leh kuapeuh in hiamgamna (violence) leh sualna(terrorism) te theihtawp suah a dou poimawh chi hi. Tuni a hunzatna ah Minister tuamtuam banah HAC Chairman, parliamentary secretary tuamtuam leh MLA, Chief Secretary, Director General of Police, civil leh police department apan top official-te kihel uhi.


ILPS strike sungin mi 1 si
Imphal, May-21: JCILPS pawlin dakkal 38 sung Cease Work Strike apuan hunsung un Imphal khawpi leh muntuam tuam ah buaina thiltung zakding om a, birthday cake lei dia kuan pasal kum 43 mi khat strike supporter te’n suang a aden ziakun damzoulou in si chihthu om hi. Thusuakin agendanin Okram Balendro (43) of Pishum Oinam Leikai, Imphal ahihleh zan in a tanu birthday cake di leikhin Activa a innlam zuanlai bandh/strike supporter pawlkhat in Uripok  ah suang in deng uh a, nitak dak 10:00 velin RIMS hospital puaktun himahleh alu a liamna a serious ziakin damzoulou chi uhi. Tunitaklam dak 6:00 a strike bei tan in Imphal khawpi sung muntuam tuam ah police leh mipi kinawktuahna om hi’n leng kigen hi.


Dakkal 12 sung bandh ding khawlsak
Imphal, May-21: S.K. Mangang, Manipur Meitei Defence Committee (MMDC) in tuni a thusuah a bawlna ah ST Demand Committee te’n ST list ah Meitei-te tel sak ding phutna a May 22, 2016 a rally pai a sawm uh tawp sak uhi. Amau ST deih leh deih lou-te kalah discussion sai zaw dia thupukna a bawl uh kipahpih kawm in May 22, 2016 zingsang dak 6:00 apan nitak dak 6:00 tan Manipur pumpi ah bandh a puang uleng khawlsak thu puang a, ST list ah Meitei tel theilou ding ahihdan Centre leh state govt kiangah theihsakna bawl hi’n leng taklang hi.


DC/Chandel in Purum Chumbang IVR hong
Chandel, May-21: Chandel district sung Purum Chumbang Village apan National Highway 102 (c) tan kizopna Chandel District Headquarter Road (IVR) kibawlthak tuni’n Chandel Deputy Commissioner Robert Singh Kshetrimayum in Purum Chumbang Village Community Hall ah hongkhia hi. Hiai hunzatna ah Purum Chumbang Village Chief Pr. Parhoi, Chandel Naga Peoples Organization (CNPO) President Ws. Kanral Anal leh Chothe' Tribe President Th. Malsawm Chothe te’n Functional President leh Guest of Honour in uap uhi.


Electric omlouh ziakin mipi buaizak
Tamenglong, May-21:Ni tamkhop paisa akipan Tamenglong district a electric meivak omlouh ziakin minautang-te buaizak uh a, market ah khawnvaktui kidaihlouh banah nek-le-tak kaihkhopna leng buaipha chi uhi Tamenglong bazar ah superfine Rs.1400/- per 50 kg bag in kizuak a, private generator a mobile charging na ding in Rs. 20 la uhi. Tamenglong-Khongshang leh Imphal-Tamei Road a mechim om ziakin gari lian lut theilou hi’n kigen a, gari neu khenkhat bel Khongshang lampi tawn in lut thei uhi. Niteng a mipite haksatna kibehlap dinga akilat ziakin tunung sawtlou in Tamenglong pumpi ah niteng poimawh taksapna uang mahmah ding chihthu kiza hi.


TUNI THUPI:
 “Lungtang a kipan in ngaihtuahna giloute, tualthahnate, angkawmnate, kingaihnate, guktaknate, heknate leh  gensiatnate ahong pawt nak” – Mathai 15:19


EDITORIAL:
Gam itna leh vangtahna!
Anti Terrorism Day
Tuni (May 21) in India gam pumpi ah Prime Minister-lui Rajiv Gandhi mulkimna bei a thah ahih  tawh kisai phawkthakna leh theihgigena kawmin ‘Anti Terrorism Day’ zatin om hi. Abiktakin Congress Party adingin thuakna nasa mahmah dinga, Congress worker leh supporter tengteng adingin flag vom (black) inn chih ah khaichiat ding a hoih hi’n leng kilang hial  hi. Rajiv Gandhi in May 21, 1991 in Tamil Nadu a Sriperumbudur ah campaign bawl dia a stage tunga thugen dia kisalai terrorist(LTTE numei suicide bomber khat in a taksa tunga bomb a puakguk puakzaksak in huai ah Rajiv Gandhi  mulkimhuai tawp in si hi.Rajiv Gandhi  leh anu Indira Gandhi in a sih nungin  Congress sunga kivaipuakna (administration) paidan a ngeina  bangzou nawnlou a theih hi a, Sonia Gandhi leh Rahul Gandhi te’n amaute’ khuak (brain) ban zoulou mah uh hidanin kilang hi. Tuabang ngaihdan  mah Congress makai tamtakte’ ngaihdan ahi hi.
    Thupil khat kigendan in leitung a piangkhia mihingte’ lakah kuamah a bukim a om kei  kichi dik mahmah a, Indira Gandhi sihna leh Rajiv Gandhi sihdante khawng i et chiangin politics sang mahmah ahi hi. Sikh-te’ hunbi om a, Tamil-te’ hunbi a om chih a chiang a, eite politics  leh amau’ politics bel tehvual  hilou ahihdan lam tuamtuam ah kilang chian mahmah hi. Eilawi in diktatna, gin-omna, nekguk-takguk hihbei ding chihte i tangkoupih lai in mite’n  mi Nam politics taktak  sai uh hita e chihtheih hi. A lawhchin uleh lawhchinlouh uh theikhang, himahleh, eilawi bel ABC a kipan ihi a, a madawk dinga Inn kihalsak leh hiamgamna (violence) pante ihi ua, Nagate’ politics tanpha ban nailoute ihi ua, Bodo leh Garo-te’ dinmun banghiam  chih tanpha chiangtak a thei nailou ihihleh lauhuai mahmah kha ding a, i khauhpai a, ikin pailuat leh i kipalpai khathei lai uhi.
    Leitung a theihphak mi poimawh India Prime Minister-lui Rajiv Gandhi in LTTE te’ khutlum a a sihni in mipi a lakh a simin khitui anul uh chih ithei hi.  August 20,1944 apiang Rajiv  a sihna pe’n ahun laitak asi ahi zawdiam ahihkeileh ahunlou laitak asi ahidiam chih gen a haksa. Sihna tawh kisai neuchik gen lehang, eilawi in ahun loutak asi i chih veu uh Pathian lemgel leng hithei a, Toupa’n a lata chi lehang bang achi dia? India kia hilou in leitung pumpi’n Rajiv Gandhi a poimawh mahmah a, UNGA a speech a piak tuni dong leitung pumpi adia thilthak hitou den a, nuclear policy tawh kisai a gente bang diktou den a, tualou in hiamgamtak a khawsa helpawl (terrorist)te doudalna ding a agente dik mahmah hi. ISIS hong piang a, tualou in Muslim helpawlte hong kibehlap semsem hi. Himahleh, LTTE tawh kisai ah policy ana bawlkhial kha hia ahihkeileh India gam leh leitang a it luat ziaka Sri Lanka a Jaffna bial leh South India bial teng Independent country a hong omkhak  ding uh a patauhluat ziak hiam chih ithei kei a, Indian Peace Keeping Force (IPKF) a sawllut ziakin sih khawlawh hi. Tuamah in apianna nu Indira Gandhi leng Sikh ‘revolution’ ziak mahin sihlawh a, gam leh nam it taktak Gandhi-te innkuan mah ahi diam chih hon ngaihsun sak hi. Himahleh, a tate uleh atute un amaute’ ngaihsutna aban kei uh chih ngamhuai mahmah hi.
    Terrorism tawh kisai gendan ding tamtak a om maithei a, LTTE leh Sikh helpawlte’ dinmun banah Gandhi family tungtang lel ahi i gen. Ahi a, Muslim helpawlte’ kibehlapdan leh kidouna siangthou ‘Holy War’ a puan uh tungtang ah numei-naupang galdou dingin kisa souhsouh mai uhi. South East Asia ah ISIS te’ gamtatna uang deuhdeuh a, Jammu and Kashmir ah leng Muslim helpawl pung hiaihiai chihthu om hi. Muslim/ Islam helpawlte’ adingin tualthahna kichi khawksakna bangmah omlou a, aziak bel a pathian un lemsakpih ahi chih ngaihdan om ziak ahi hi.
    I dinmun uh lungkhamhuai deuhdeuh a, mulkimna omlouhna khawvel ah khawsa hita hang. Ei sung mahmah ah leng helpawl adim-aha in  omta a, sum muh baihlamna ding ngimna ziak hia i theikei, ut hunhun a kipimang zatzat, a ut ut heutu himawk, a khem zawhzawh un anung uh zui chihkhawng ahihman in, hiamgamna chikhat hilou hiam chi ut ihi a, mi kuahiam i iplah a, ‘si suk heh’ i chihleh tualeng Pathian ngaihdan a tualthat kihikhin ahihman in tualthahna leh vangtahna in honzui toutou khadiam chih ngaihdan tamtak om hi.


SPORTS NEWS:
AIBA World Women’s Boxing Championships
MC Mary Kom leh Sarita Devi vuallel
Kazakhstan khawpi Astana a AIBA World Women’s Boxing Championships ah tuni’n 5vei world champion M C Mary Kom leh Asian Games bronze medallist L Sarita Devi te’n  kibeihpihte uh zoulou tuak in, Rio Olympic games a tel theihna ding chance khahsuah uhi.
    Mary Kom (51 kg) in Germany mi Azize Nimani 2-0 in zoulou a, Sarita (60kg) in Mexico mi Victoria Torres 3-0 in zoulou uhi. India adia lem-et omsun ahihleh Pooja Rani (75kg) hi a, amah prequarterfinals lut ta hi. Mary Kom in agenna ah, ka hihtheihna leh ka theihtawp suah in ka pang a, vualzawh leh vuallelh pen kimawlna ah om gige mah ahi chi hi. Judge-te thupukna na kasa mahmah , himahleh kei khut a omlou ahihziakin judge-te thupukna ka zahtak mahmah chi hi. Pathian in kei dia tup(plan) tuam nei ahih ka gingta chi hi.


Federation Cup
Mohun Bagan in Aizawl FC zou
Guwahati a Indira Gandhi Athletic Stadium ah tunitak dak 7:00 in Federation Cup final kimawlna om a, huai ah Mohun Bagan in Aizawl FC-te 5-0 a zou in, champion la uhi. Huai match ah 1st half in goal kikhum omlou a, 2nd half in Aizawl FC-te pangbuai mahmah uh a, minute 48 in Mohun Bagan apan Sonny Norde in goal  masa khum , minute 58 in Dhanchandra in goal 2na khum a, minute 73 in Jeje in goal 3na khum nawn hi. Minute 82 in Bikrmjit Singh in goal 4na khum nawn in, minute 88 in Jeje in goal 5na khum hi. Jeje in hiai tournament ah goal 8 khum in top scorer leng la hi. Mohun Bagan a vualzawh tawh kiton in Fed Cup 14vei domta uhi.