MANIPUR EXPRESS | MAY 26, 2016

HEADLINES:
Kerala Chief Minister dingin Pinarayi Vijayan kichiam

Thiruvananthapuram, May-25: CPI(M) strongman chih a om Pinarayi Vijayan tuni in Kerala Chief Minister thak dingin kichiam hi. Huai hunah Kerala state sung apan mi poimawh leh makai tuamtuam tamtak in uap uh a, tualou in Christian leader tamtakin leng uap uh chihthu kiza hi. Kerala ahihleh Christian-te’ tamna state hi a, tutung a Pinarayi Vijayan in CM ding a kichiamna a neihleng mi tamtakin kipahpih uh chihthu om hi. Christian mipi tamtakin Pinarayi Vijayan adingin thumpih uh hi’n thusuak in gen hi.
    Tuni a Chief Mnister dinga kichiam Left Democratic Front(LDF) leader Vijayan in a gendanin Kerala state ah mit a muhtheih ding kikhekna(change) om dinga, thil omdan ana entou le uchin hong kilang ding chi’n gen hi. Minister thak kichiamte’ lakah numei 2 leng tel a, numeite’ tungtawnin bangteng bawlkhiak a hong om ding hiam chih leng muhtheih in hong om hulhul ding ahi chi’n CM in gen  hi. Kum 72 a upa Vijayan bel khauhpai lai mahmah a, gam leh leitang itna in ahon sam chi hi. Governor Justice (retd) P Sathasivam in tuni’n Thiruvananthapuram a Central Stadium ah CM leh Minister-te  kichiam a, a kichiamte Malayalam pau zangin kichiam uhi.
    CPI-M Politburo member Vijayan bel Kerala state adingin Chief Minister 12na ahi hi. Cabinet Minister 19 lakah 12te CPI(M) apan hi a, adang 4te ahihleh CPI akipan hidanin kigen hi. Tualou in, NCP, Janata Dal(S) leh Congress(S) akipan mi khat chiat lak a om hi’n leng kigen hi. Term lui a Congress makaih UDF- Congress makaih UDF govt hunlai a Minister 21 tengin tuma deuh in kitawpna peta uh chihthu kiza hi.


MPC Sub-HQ. Zone -I Assembly-cum-Election 2016
Lamka, May-25: Mizo People’s  Convention (MPC), Sub-HQ. Zone- I a Assembly- cum- Election 2016 tuni zinglam dak 10:30 in Chiengkawnpang, Community Hall om a, session–I  ah Upa Vanlalrinliana, President, MPC, Manipur in thugen a, MPC Sub-HQ. Zone –I sunga Unit te’n report pia uhi. MPC Unit kihonna mun tuamtuam a  khaw hausate kiangah kipahpihna Memento pia uh a, Mangcha Thangzawm, S Thienlaljoy Gangte, H Dalzamang Gangte banah Thangpau’kiangah mimal in MPC in kipahpihna in Memento pia uhi. Assembly session ah agenda pawimawh – Budget 2016, Election neih nawn ding banah amun leh mual ding leh MPC census tungtang leng genkhawmna nei uhi.
    Session-II ah Vanlalrinliana, President, MPC, Manipur leh a teamte makaih in kum 2016-2018 sunga  MPC Sub-HQ Zone-I makai ding election nei uh a, President in Thangpau telching uhi. Vice President- Hautinthang leh Treasurer-H Dalzamang hi uh a, elected mi 3 te’n cabinet keklian ding uhi. Makai telching thak teng Rev S. Gangte, (retd) Principal, MBC Hr. Sec in Pathian kiangah thumsak hi.
    President thak Thangpau in mihing hihna ziakin adinmun leh mawhpuakna zoulou ding bang mahleh nu-le- pa te’n MPC ah semlai dia adeih ziak un kuapeuh in kithuahpih a, pangkhawm chiat ding banah nopni-dahni, haksatni a leng mipi tawh semkhawm ding leh  kithuhilhna hoih deih gige ahihdan gen a, lamdik ah mipi tawh pangkhawm gige ding in mipi ngen hi.


Lawhchingte kipahpihna leh Career Guidance
Lamka, May-25: Haokip Students’ Organisation/CCpur Branch saina in June 3, 2016 zinglam dak 10:00 in B. Vengnuom Community hall ah tukum Manipur Board leh Central board nuai a class XII & X passed-te kipahpihna program om ding hi. Huai ah Haokip’ tanu-tapa class XII & X passed-te Rev. Hemkhomang Haokip, M.Th. Principal, DTS, K. Salbung in Pathian kiang ah thumsak ding hi. Career Guidance hun ah Lunminthang Haokip, IAS, DC/CCpur in thugenna leh ‘Spiritual Motivation’ chih thupi zang in sinsak ding a, HPC Convention 2015 CD leng hong  ding hi.
    Mangkhogin Haokip, IPS, SP/CCpur in ‘Career Counselling”, James Doujapao Haokip, SDO/BDO Tuibuong in “Tips towards Success” leh Joel Haokip, SDO/BDO Thanlon in “Importance of Discipline in Student’s Life” chih pansan in sinsak ding hi. Haokip’ tanu-tapa tukum a class XII & X passed tengin Mobile No. 9089364371, 8730919408 ah   min, pa’min, address, mark percentage zah  sms  dingin Lhunkhothang Haokip, Secy. Education, HSO, CCpur branch in theisak hi. Haokip’ innsung mite ki-itsemna ding, kinaihsemna ding in Haokip Students’ Organisation GHQ kiphutkhia a, Dist. teng ah Branch hong in amau education lam focus ding uh hi’n HSO makaite’n gen uhi.


LOCAL NEWS:
Regd. leh renewal bawlnuam tam
Lamka, May-25: Manipur govt. in Education (S), Medical Deptt. leh Police Deptt. ah post tamtak laksawm ziakin candidate teng Dist. Employment Exchange office in sponsored ngai hi. Huaiziakin Headquarter veng a Dist. Employment Exchange ah mi tamthei mahmah a, employment exchange te’n registration leh renewal bawltheih hun akhak uh mipi khualna in tuni’ apan honsak ahih tawh kiton in mi tam petmah hi. Registration ahihleh May 28, 2016 tan niteng in sunnung dak 2:00 akipan office hunsung in bawltheih gige ding a, tuni’n bel  medical leh police deptt a ding form submit tamlouh ziakin registration pan baih uh hi’n Asst. Director apan kiza hi.


Zillai Gen HQ in lawhchingte’ kipahpih
Lamka, May-25:   Zillai Gen HQ a Secy Edn & Career Development S. Kamminlun Vaiphei in thusuah a bawlna ah, tutung board leh council tuamtuam a Class X leh Class XII a lawhchinna ngahte kipahpih mahmah uh ahihdan taklang hi.  Lawhchinna pen mahni kuhkalna leh tup-guhna ziak liauliau ahihdan taklang in, lawching kuapeuh in chi leh nam minhoihsaktu ahihlam uh phawk kawm a maban ah leng naksem a panla tou ding in deihsakthu taklang hi. Hiai lawhchinna in maban panlakna hanthawntu ahih ding  deihsak thu taklang hi.


EM, ADC/CCpur in suanghum sunsak
Lamka, May-25:  Saikawt area a tuilou bawlte tui lakna ah tui  luanglet in (late) Goukhenpau Road, Vengnuam, New Lamka leh Nghathal kikawmna lampi koina masapen buannawi dim a, lampi tawnkha te’n haksatna tuak uhi.  MDC  M. Gouzamang Guite, EM ADC/ CCpur tuni’n  suanghum sung hi. Vengsung mipi gendan in, tuilou bawlte’ tuilam ah tui luanglet in  a, nin tamtak tui in tuahlut in Luanzaching w/o (late) G. Dousung inn leng bangtan hiam tum hi’n gen uhi.  Bialtu MDC in zanhal in enkhia a, tuni’n sanghum truck/tipper trip 6  sungin bawlsak a, mahni nin halsiang theih teng mahni huangsung a haltum in ,  hawkguam ah nin pai nawnlou dingin ngen hi.


Battery charger sia:meivak theilou   
Lamka, May-25: 33/11-KV Khominthang Power Sub-Station ah battery charger siat ziakin tuni zingkal apan electric meivak pekhe theilou a, tuni’n bawl zoulou uh a, 33/11-KV Khominthang Power Sub-Station in a supply khakna teng ah tunitak inleng electric meivak paitheilou a, May 26, 2016 a bawlzawh lam-et huai hi’n MSPCL lam apan kiza hi.


Zinling ziak asi ex-gratia piak hiding
Lamka, May-25: April 13, 2016 nitak dak 7:25 velin Northeast biala zinling (earthquake) om ziakin Jangkholal Haokip @ Lalboi Haokip s/o Khailun Haokip of Ukha Tampak village heart attack ziakin si hi. Dist. Disaster Respond Team te’n Jangkholal Hoakip’ sungkuante kiangah tuni’n ex-gratia in Rs. 4 lakh sanction uhi.


DAPCU review meeting
Lamka, May-25:  Dr. Phirthanglien Buhril, DACO/CCpur makaih in ama office  ah tusun in District AIDS Prevention & Control Unit, CCpur tawh kisai review meeting om a, huai ah National AIDS Control Programme nuai a facility tuamtuam a Project Manager-te banah Co-ordinator, Stand Alone ICTC Staff, PPP Staff leh F-ICTC a staff teng tel uh a, DAPCU staff April 2016 a si Kholliankhup, Counsellor, ICTC  Mobile Van suunna hun zang uhi. Officer in annual performance pulak in NGO tuamtuamte monthly performance leh  maban panlak dingdan genkhawm uhi.  Meeting ah DACO Officer theihpihna in Manipur AIDS Control Society (MACS) nuai a om NGO tuamtuamte’n Employee Assn, CCpur  bawlkhia in,  executive member ding guang   uh a, President dingin T. Benjamin,  Vice President in Mrs. Rosy, Secretary in Reuben, Asst. Secy in Kh. Sanjit, Finance Secy in Thangkhanlian leh Treasurer in Mrs. Margereth  hi ua, Adviser  in Dr. Phirthanglien Buhril, DACO/CCpur leh Dr. HL Liensang guang uhi.


Dr. Zamthianlal in suanghum sungsak
Lamka, May-25: Singngat PHC a Medical Officer i/c Dr Zamthianlal in damdawi inn zawtna lampi vuahzuk hunchiang in buannawi in nuamlou petmah a, damloute khualna in ama’ mimal sumseng in lampi ah gari zang in suanghum sungsak hi. Khawsung mi khenkhat apat kizadan in Singngat damdawi inn zotna lampi nuam mahmah ta a, vuahzuk hun inleng gari in nuamtaka kitailut theih ban ah damlou te adia nuamtuam mahmah hi’n gen uh a, Dr Zamthianlal tung ah kipahthu gen uhi.


MIL thu ah ZEO in theihsakna bawl
Lamka, May-25: Board of Secondary Education Manipur (BSEM) in academic session 2016-17 ah class IX leh 2017-2018 ah Simte leh Gangte’ MIL subject zattheih ding in introduced hi. Huai thu ah  ZEO/CCpur control na nuai a Headmaster/Headmistress/Principal te banah Simte leh Gangte Literature Society te kiangah amau level chiat a panla a, student te’n subject alaktheih nang ua panla chiat ding in thusuah bawl hi.


Lawhchingte kipahpihthu puang
Lamka, May-25: Joshua Amo, Secy. Inf. & Publicity, Hmar Students’Assn. CCpur Jt. HQ in tukum a High School Leaving Certificate (HSLC) Manipur result suak ah HSA member lawhching teng kipahpihthu puang a, maban ah lawhching touzel ding in deihsakthu taklang hi. Himahleh lawhsam (fail)te thuakpihthu puang in maban ah lawhchin nang a panla thak ding leh ahong lawhchin touh uh deihsakthu puang hi.


Agents & SK. Oil Dealer-te’ ading release order
Lamka, May-25: National Food Security Act. (NFSA) nuai a Rationing Agent & S.K. Oil Sub-Dealer-te ading in May 26, 2016 in District Training Centre, Tuibuong ah anntang leh SK. Oil laktheih nang release order hawmkhiat hiding hi. Huai hun ah Agent te’n Identity Card tawichiat ding leh office hour sung ala ding in M. Ginzasuan, DSO/CCpur in theisak hi.


Teacher ading apply theih
Lamka, May-25: Directorate of Education (S) nuai a SSA ah Primary teacher post 489, Upper Primary teacher post 455 leh RMSA teacher tamtak lak nang tawh kisai Dist. Empolyment Exchange Office/CCpur te’n official in notice muta uh a, tunung sawtlou in Employment Exchange tungtawn in apply theih ding hi’n ZEO office apan kiza hi.


Inservice teacher trg loute’n apply theih
Lamka, May-25: SSA nuai a Primary leh Upper primary teacher in-service training kha nailou te’n 2 yrs Diploma in Elementary Education training theih ding a, training dia apply, selection ngahloute leng teltheih ding a, ZEO office ah Profoma laktheih ding hi’n leng kigen hi.



SUUNNA:
Mrs. Khuolhat (86) m/o Vungkhokam of Gangpimual, tuni zinglam dak 9:30 velin teknat in si a, nitaklam in Gangpimual hanmual ah kivui hi.


IMPHAL NEWS:
Army Chief in 29-A/R Bn. HQ mun va pha
Imphal, May-25: IGAR(S) thusuak in a gendan in Chief of Army Staff (COAS) Gen. Dalbir Singh leh Lt. Gen. Praveen Bakshi, Army Commander, Eastern Command te’n Chandel District ah tuni’n Joupi a 29-A/R battalion HQ va pha uh hi’n kigen hi. Huai ah Major Gen. VS Sreenivas, IGAR(S) in COAS leh Army Commander kiangah May 22, 2016 ni a JCO 1 telin A/R personnel 6 thahna tawh kisai a kigolh khate hih chimit na dia panlak din theisak a, COAS in huai kim a helpawl omte tungah khawl lou a operation bawl a poimawh dan gen a, lusunna tuak innkuante  thuakpih ahihdan leh a innkuante uh panpih theihna teng a panpih ding in official-te kiangah thupia hi’n gen uhi. Army Commander in mi dawi lok-te gamtatna hidan in gen a, huai kim ah muanna leh bitna om ding deihna in helpawl-te tungah operation sutzop touh hiding in gen hi.


CM tanau 1 telin mi 2 Court ah ding
Imphal, May-25: Imphal Tulihal International Airport ah Nov 1, 2013 ni a Crore tampi man khamtheih matkhiak tawh kisai a ngawh a om CM O. Ibobi nephew (sanggam-te ta) Okram Henry telin mi 2 tuni nitaklam in Narcotics Drugs & Psychotropic Substances (ND&PS) Special Court ah dinsak hi uhi. Kolkata pansan a SCB leh CBI te’n khamtheih matkhiak tawh kisai a May 16, 2016 ni a ND & PS Manipur-te kiangah charge sheet a piaklutna uah Okram Henry telin mi 5 tungah ‘Special Trial (CBI) case’ bulh khum hi a, court ah Rajneesh Kumar, Ramveer Tyagi leh Md. Rajauddin-te kilang lou uh hi’n kigen hi. Court hearing hun ah Henry Okram leh Sapam Angus @ Nanao @ Naoba te’n P/R Bond Rs. 1 lakh leh sureties ding a govt. nasem Grade-III sang a niam zawlou a koih tuak uh ngai a, hearing nawn June 16, 2016 in om ding hi. Court ah kilang lou mi 3 lakah Rajeneesh Kumar in damlouh ziak hi’n Court ah theihsakna bawl hi’n kigen hi.


Ukhrul dist ah menchim om phut thei
Imphal, May-25: Manipur pumpi ah ni bangzah hiam paisa a vuahzuk ziakin phaizang gam ah tuichim a, singtanggam mun khenkhat ah menchim om a, Ukhrul district sung a Shongthel leh Molnom village ah lei khang (crack) in mipi lauthawngsak hi’n kigen hi. Media team telin KSO Ukhrul Branch volunteer leh Jalengbung MDCC member te’n khaw 2-te va enkhia uh a, Shongthel village khaw laitak ah meter 30 vel a sau in lei khang (crack) a, vuahzuk hun ah vuah tui luanglut zel hi’n Kamthang Haokip, Village Chief in gen a, lampi leh inn khenkhatte tuang leng khang (crack) hi’n gen hi. Hiai tungtang 16-Jalendung MDCC Yamkholet Khongsai kiangah tut hi a, mipi’n menchim thupitak om khak ding pautauh huai sak thu taklang uhi.


Kha 10 sungin nga kg 32,500 piangkhia
Imphal, May-25: DIPR thusuak in State Fisheries Dept. in Manipur ah Fisheries sector puahhoih tupna in tu financial year sung a nga (fish) kg 34,000 piangkhiaksak ding tum uh a, January 2016 tan a nga kg 32,500 piang khia hi’n gen uhi. Fisheries dept. in CSS tungtawn in scheme tuamtuam pan uh a, Lamphelpat a Departmental Inland Fisheries Centre ah ‘One Year training on Inland Fisheries’ pailel a, kumteng in ‘Augmentation of fish production’ scheme tungtawn in Loktal Lake leh wetland-te ah nga nou (fish seed) khahkhiak hi’n gen uhi. Fishery Dept. in devolution of power tungtawn in Valley Panchayat 4 leh Autonomous District Council 6-te kiangah ‘Asistance to Pisciculture Scheme’ pekhia uh hi’n leng taklang uhi.


TUNI THUPI:
“Na melma tengteng un hondou ua honsel theihlouhna ding un kam leh pilna honpe ding ka hi ngal a.” – Luka 21:15


EDITORIAL:
Laisiamna leh sum neihna
India adia Namte’ pa chi a minlawh  a om Mahatma Gandhi in ‘Education is a life long process’  chi a, mihingte’n siamsimna kichi i damsung ua  i sintouh ding uh hi’n kilang a,education genlouh  ‘politics’ leng damsung a thil omtou den ding (life long process) ahihdan i thei  hi. Kal masa in Council of Hr Sec School,Manipur(COHSEM)  saina a Class XII/HSE examna ’ result hong suak a,huainung  zanzek in leng CBSE nuai a Class  XII te’ result suak nawn hi. Huaibanah zan in Board of Secondary Eduation, Manipur, (BSEM) saina a Class X/HSLC examination, 2016  result puankhia  uhi.
    Kum dangin  Manipur Board (BSEM/CoHSEM) saina a examna himhim a result zekai sek a,  state tuama kainuam  student te’ adingin nawngkaina tunsek mahleh tukum in  Mizoram leh Nagaland Board mah bangin Manipur a Class X leh Class XII result suakkhe pah vanglak  hi. Manipur Board (BSEM) nuai ah tutunga lawhching top 3 te’ nu-le-pate officer ngen hi’n leng kigen hi.
    Laisimna leh laisiamna kikal kigamla mahmah hi. Laisiamna kichi khuakpilna hiam  pupa’ khang akipan gou kinutsiatna chikhat leng hithei hi. Laisimna bel sum-le-pai tawh kisai hi a, nu-le-pa’ hauhsakna ziaka laisin teitei, siam teitei kichi leng omkha maithei hi. Laisim thadah mahmah, himahleh, lehkha asiam a siamthei kichi leng om a, lehkhasim kuhkal mahmah himahleh, lehkha theithei lou  mi kuhkal kichi kal leng om hi. Tuchiangin i gam ah mihausa i tam mahmah ua, nu-le-pate’n a chawm zawh ziakua lehkha siam, position hoih taktak ngah chih leng a om tham hi.Huchi kalah, nulepa’n  khawsakna  leh sum-le-pai neilou sasa a achawm teitei uh  tuition tanpha la zoulou  a hunkhop siamsinna lam ah a om  chih leng i thei  hi.
    Board of Secondary Education Manipur (BSEM) saina in March 1, 2016 akipan March 19, 2016 sung Class X/HSLC Examination, 2016 om a, huai a tel candidate 31,749 lakah 20,753  passed uh a, pass percentage 65.37% tung hi. Hoih mahmah chih ding ahi. Himahleh, etkik a velkikna taktak ( analysis) bawl lehang, government school-te puksia (collapse) tawh kibangin ngaihtheih a, poi petmah hi.  Government in state education dinmun  ngenteltakin enthak henla, i gam a government school-te a  puksia tawh kibang khop a examna a result niam ahihleh bangchi tunding ding hiam chih a ngaihsut  deihhuai hi. Govt School-te puksia ahihleh khateng a sum tampipi lawh govt teacher-te Mission/ Private school ah  bangchibang a zat theih ding uhiam chih tanpha  ngaihsut kisam hi.
    Mi tamtakte’ ngaihsutna a om ding bel Union Education Minister Irani in leng hiai tungtang a buaipih a, education reformation ding  i tangkoupih a chi maithei, himahleh, sapte’ gendan hileh a ‘logic’ adik mahmah, a sepsuahna (execution) ah lawhsam chih leng om thei hi. Thu vantang gen ihi a, kuapeuhin siamsinna i ngai poimawh chiat uh chi ut ihi. Tulel a i gam dinmun etin siamsinna leh laisiamna dingin sum-le-pai poimawh mah ahi hiam chih bang hon ngaihtuah sak  hi. Tutung a UPSC saina Civil Services examna a lawhchingte laka a topper-te i et chiangin a nu-le-pate uh officer lianpipi hi uh a, Manipur Board nuai a Class X topper- te’ nu-le-pate leng tuabang mah uhi. India Prime Minister Modi ahihleh train station a singpi zuaka kitoudelh  ngei hi a, tualou in politician leh bureaucrats tamtak khawsakna haksatak akipan khangkhia  ahihdan uh ihaihkei hi. Bangtenghileh, igam in siamsinna lam a ngaih poimawh taktak poimawh tungtuan hi.
    Class X zawh nung in bang lampi i zuidia chih nu-le-pa tamtakte buaina hiding hi. Nu-le-pa lehkhasiam siam  nei mi ahunkhop i  omkha maithei a, huai kalah, nu-le-pa nei nawnlou, meithai’ tate leng a hunkhop i om ngei ding uhi. Class  X zawh a bang ‘line’ zui ding ihiam chih a pitu(guide) poimawh  a, hamhaihtak a om nu-le-pate leh sinlai naupangte panpih (guidance) akiphamawh  uhi. Siamsinna dingin aloutheilou in sum-le-pai poimawh a, huai kawm in pitu hoih leng poimawh mahmah hi. Class X passed pe’n kalbi khat khetkhiakna hi a, siamsinna  ah mihingte’ ading in hinkhua kipatna bangin ngaihsut theih hi. Tua ziakin Class  X zawhnung in bang lampi  itawn dia? chih gel masak poimawh a, student pawl tuamtuamte’n leng student-te maban adiakin academic tawh kisai lampi kawkmuh kichi a mawhpuakna  ding ua  poimawh mahmah ahi hi.