MANIPUR EXPRESS | MAY 27, 2016

HEADLINES:
Government doctor-te kum 65 in retire ta ding: PM

New Delhi, May-26: Prime Minister Narendra Modi in a genna ah, India a sem  government doctor-te’ upatdan  kum 65 a chin chiang un a sepna uapan in retire-ta ding uh chi a, India  ah doctor lam kitaksapna liantak om chi hi.  Prime Minister Modi in a gendan in hun paisa in doctor-te kum 62 a chin chiang un a nasepna uapan pension uh a, tu in a pension kum ding uh (retirement age) 65 hita ding chi hi.
    Uttar Pradesh a Saharanpur mun a mipi kikhopna ah Prime Minister Modi in a gendanin, India in doctor tasammahmah a, tu in bangchileh medical college tamsem honkhiak theih hiding hiam chih ngaihsut hilel chi hi. Gamsung pumpi ah tu in doctor-te’n kum 65 tan sem theita ding uh ahihman in kipahhuai mahmah chih ding ahi chi hi. National Urban Health Mission in mipite’ damtheihna etkolna tungtang a program tuamtuam a neih uh government in kipahpih mahmah ahi chi a, tu in singtang leh phaizang bial ah damtheihna tawh kisai etkolna government in pibawl mahmah sawm hi’n PM in gen hi.
    Prime Minister Modi in doctor-te kiangah khawsakna haksa numei naupaite khakhat sung bek a thawn liauliau a hoihtaka etkolna nasem ding in ngen a, kum 2 sunga kuamah doctor hithei mawklou ahihman in panpihna nasep lam a kalsuan dingin ngen hi. Damtheihna kichi mihingte adingin poimawh mahmah a, mahni mimal kikep zawhlouh ziaka damlou kichi bangleng om theitham ahihman in mipi’n leng doctor-te’ thuhilhna (advice) te pom a zuichiat dingin leng PM Modi in ngen hi.


JAC leh Innpi/Tribe Council palaite’n meeting nei
Lamka, May-26:  JAC against Anti -Tribal Bills te’n  tuni zinglam  in HQ Veng a KKL complex  ah maban panlak dingdan genkhawm uh a, huai hun ah JAC member-te banah Innpi leh Tribe Council tuamtuam-Gangte Tribe Council, Gangte Tribe Union, Hmar Inpui, Mate Tribe Council, Mizo Peoples Convention, Paite Tribe Council, Simte Tribe Council, Tedim Chin Union, Thadou Inpi, United Zou Organization leh Vaiphei People’s Council akipan palaite tel uhi.
    Meeting tawh kisai JAC in thusuah abawlna ah June 3, 2016 in Thanlon khua ah Bill 3-te tawh kisai public awareness campaign neih din lemsa uh a, a lawhchinna dinga panlak dingin thupuk uhi. Sit- in-protest leng June 2016 akipan sutzop hiding a, Hiangtam Lamka a Salphate’ Pumbuk ah neih ding chih hi s, huai enkaidi’n Hiangtam Lamka Village Authority-te mawhpuakna pia uhi.  JAC in kivaipuakna hoihsemna dingin  Motivation & Monitoring Cell, Transport Cell, Fund-Raising Cell bawlkhiak  lemsa in thupuk uh a, May 30, 2016 sunnung dak 2:00 in JAC Information Centre, KKL complex ah genkhawm nawn dingin thupuk uhi.


NFSA zat hiding, Rationing Agent 14 in permit lalou
Lamka, May-26: Manipur CM O. Ibobi Singh in April 25, 2016 in National Food Security Act. 2013 (NFSA) official in hongkhia a, CCpur Dist. ah zat hihtheihna dingin Dist. Supply Deptt/CCpur te’n tuni zinglam in Dist. Training Centre, Tuibuong ah NFSA nuai a Rationing Agent & S.K. Oil Sub-Dealer-te kiangah antang leh SK. Oil laktheihna ding release order hawmkhia uhi. CCpur Dist. a A/C dungzui in antang hawmkhiat hiding, ahawmkhe masa ding lottery in bawl uh a, 1st in CCpur A/C, 2nd Saikawt A/C, 3rd Singngat, 4th Thanlon A/C, 5th Tipaimukh A/C , 6th in Henglep A/C hiding hi. May 27, 2016 zing dak 7:00 in Headquarter Veng a FCS godown ah M. Ginzasuan, DSO/CCpur in CCpur A/C a Release order No.1- 36 te kiang ah antang pekhia/flag-off ding hi. CCpur Dist. ah Rationing Agents & SK Oil Sub Dealer 386 om a, 55-Tipaimukh A/C ah 22, 56-Thanlon A/C ah 32, 57-Henglep A/C ah 56, 58-CCpur A/C ah 125, 59-Saikawt A/C ah 92 leh 60-Singngat A/C ah 59 om hi.
    Thil buaihuai ahihleh Agent te’n antang kg. 1 lei nang in Rs. 3/- deposit uh a, mipi lak ah antang kg.1 ah Rs. 3 a zuak dingin central govt in bikhiah a, huai thu ah Agent tamtak in DSO/CCpur kiangah complain bawl mahle uh DSO/CCpur inleng govt order omsa kizui ahihziak in hihtheih neilou ahihdan agent-te theisak a, agent te’n mipi lak ah antang kg.1 a zuakkhiat ding rate fixed theituanlou hi’n leng theisak hi. NFSA antang tawh kisai Manipur govt in quintal 1 ah govt. in Rs. 65 reimbused ding a, huai leng banghun chih gentheilouh banah akum leng kivei thei ahihdan DSO/CCpur in gen hi. Tuni a kimuhkhawmna ah Sub-Division/Assembly Constituency tuamtuam a FPS rationing agent 385 te tel uhi. Tuabang kal ah, Vengnuam Village Authority huamsung a om Rationing Agent 14 te’n tu leh tu in permit leh anntang laklouh phot lemsa in lalou uh a, beneficiary te’n  theisiam ding in ngen uhi.


ZMA in Michael Job Centre a om student 4 hunzatpih
Lamka, May-26:  Zomi Mothers’ Association (ZMA) kithuahpihna tungtawn in Tamil Nadu a Michael Job Centre a om student 4 Lamka a summer vacation zang a omlel tuni sunnung dak 1:30 in Vengnuam, New Lamka a Only Grace Home ah ZMA makaite’n annekpih uhi. Student 4 te bel Bethany Tingjoykim d/o (late) Pauchinlian of Gangpimual; Joan Vungthiansiam d/o Niangngaihzen of HQ  Veng, Lily Nianghaukim d/o Thangchinlam of Pearsonmun leh Shiny Chinghoihnuam d/o (late) Kaizalang of Zoveng hi uh a,amau  ZMA te panlakna in gamdang ah siamsin a om uh hi’n kigen hi. Huai hun ah  Miss Joycee, President, ZMA in  kemtu gina neilou naupangte etkolna dingin ZMA in 2006 kum in ‘Only Grace Home’ kichi pankhia in gamdang  tawh kizomdan in om mahle uh 2010 in partnership teng sukbei hidan in gen hi. ZMA in annual membership fee Rs. 100 a donkhawmte banah Buallian leh  Pearsonmun khawgei a donation box a koihte uleh  mimal leh pawl tuamtuam kiphalte akipan huhna  zangin home a om naupangte chawm uh hi’n gen hi.


LOCAL NEWS:
DC/CCpur in ex-gratia pekhia
Lamka, May-26: DC/CCpur in tuni’n ama’ office ah BO HQ leh Cashier, Revenue deptt. telin April 13, 2016 nitak dak 7:25 vela Northeast biala zinling (earthquake) om ziak a heart attack asi (late) Jangkholal Haokip @ Lalboi Haokip s/o Khailun Haokip of Ukha Tampak village innkuante kiang ah ex-gratia( cheque)  in Rs. 4 lakh pekhia hi.


Pre-paid area ah No Due Certificate ngailou
Lamka, May-26: Manipur govt. employee te’n kum 1 sung in 2 vei electricity deptt apat ‘No Due Certificte’ la in Treasury office ah paybill tawh pelut zel uh a, himahleh electrict pre-paid area ah govt. employee te’ adi’n May 16, 2016 apat No Due Certificate ngai nawnlou ding hi’n K. Sudhan, IAS, Managing Director, Manipur State Power Distribution Company Ltd. (MSPDCL) in thusuah bawl hi.


Moreh ah Exposure Visit in pai uh
Lamka, May-26: RMSA sponsored na in CCpur Dist. apan Phungkhothang govt H/S a class IX & X student 100 leh teacher 10 tuni’n Moreh ah ‘Exposure Visit ‘ in pai uhi. Student leh teacher-te tuzing dak 8:00 in Phungkhothang govt H/S ah kuankhia uh a, T. Goukhomang, ZEO/CCpur in flag-off hi. Program hun ah Kaikhanlian Guite, DI of schools/CCpur in student-te thuhilh a, Moreh lutnang in gate bangzahhiam om a, student te’n I-Card tawichiat ding, teacher-te thuthu a omding, group apan mimal mawkvak khiatlou a, pilvangtaka omchiat ding in thuhilh hi. Student te’n Moreh Hr. Sec School, Heritage centre, Budhism Centre, Tamu-International Market, museum, botanical garden, fort leh place etc. veh ding uhi. Moreh  exposure visit nang in RMSA in Rs. 1 lakh sanction a, May 28, 2016 in Lamka hongtung kiknawn ding uhi.


Governing Body meeting omding
Lamka, May-26: DC/CCpur & Chairman Governing Body Dist. Health Society makaih in June 9, 2016 zinglam dak 11:00 in DC’s office a BRGF Resource Centre ah Dist. Health Society Governing Body meeting omding hi. Huai ah Dist. Program officer in 2015-16 sung nasepna review bawl ding a, Dist. Program Management Support Unit te’n block wise performance report bawl ding uhi. Block Level ah Block Health Society tawh kisai banah thu poimawh tuamtuam genkhawm ding uhi.


GFI Hindi Sangathi lan ding
Lamka, May-26: Rev. L.B. Angam, Executive Director, ECA & Adviser, Gospel For India (GFI) in May 29, 2016 sunnung dak 1:00 in Gelmol a Kanaan Veng ah GFI Hindi Sangathi kichi Pathian kiang ah  thumna in lan ding hi. Huai hun ah Rev Robert H. Vaiphei, Director of Mission, EOC (ECCI) in Pathian thu gending a, Hoikhotin, Chief of Gelmol in thugenna nei ding hi.


Bongbal case ah mi 3 teng June 3 tan om ding
Lamka, May-26: Imphal West Commando te’n Ginsuanhau, MLA PRO’ Thangsianbiak kidnap ziaka amat uh Lunliansiam Vaiphei  (22) s/o Letzathang Vaiphei of Salam Patong village, Sadar Hills, Letkhogin Vaiphei (47) s/o Nekthang Vaiphei of Salam Patong Village, Sadar Hills,leh Mrs.Tingngaineng (30) w/o (late) Thanglallian Vaiphei of Salam Patong village, Sadar Hills te, CCpur Police te’n Bongbal area a T. Lala’ JCB driver kidnap case FIR No.24 (5) 2016 CCP-PS U/S 400/365/34 IPC & 25 (1-C) A. Act tungtawn in CCpur Police-te’n mansawn (re-arrested) uhi. Police custody ah ni 7 sung om nung tuni’n Police te’n JCM/CCpur ah pawkhe nawn uh a, CJM/CCpur in  June 3, 2016 tan Police custody ah omlai ding in theisak a, Police te’n kemlai uhi.


Food Drive nei ding uh
Lamka, May-26: Northeast Food Banking Network (NeFN), Humanitarian Organisation te’n May 28, 2016 zing dak 8:30 in Zomi Colony a Chinkham Modern School ah Food Drive neiding uh a, slogan tuamtuam pansan in food waste louh nang leng student leh teacher te lak ah campaign nei ding uhi. NeFN te’n May 28 “World Hunger Day” leng zang ding uhi. NeFN te’n igam uah nek ding neilou a lungkham leh mangbangte nekding piaksawm in school bangzahhiam in campaign leh Food drive neikhin uh a, maban ah leng neihtouh zel sawm uh hi’n Khamlianlal, Founder & Director, NeFN apan kiza hi.


LPG kg.19-te laktheih
Lamka, May-26: Kim Joe Gas Agency ah May 27, 2016 in LPG kg.19 te laktheih ding in om a, gas booking leh akisaipih te’n laktheih ding hi.


ATM koihna ding  felthei nailou
Lamka, May-26: DC/CCpur makaih in bank tawh kisai meeting thupukna bang in Dist. Hospital campus ah UBI/CCpur te’n ATM booth koih ding chih himahleh sepsuah hi nailou hi. Huai tawh kisai UBI/CCpur manager in agendan in Dist. Hospital thuneitute’n ATM booth koinang apiak hunhun ua UBI in ATM booth koih ding chi’n  gen hi.
     Med. Suptd. Dist. Hospital apan kizadan in Dist. Hospital ah ATM booth koih ding tawh kisai  agreement masa ah hospital major repairing bawl hun chiang a contractor te’n ATM booth koih nang bawlsak ding chih himahleh tuapen lawhchinglou a, OPD building lutna bul ah ATM booth koih ding a UBI/CCpur te kawkmuh hi’n gen hi. Dist. Hospital ah ATM booth om hileh damlou te’n sun leh zan chih omlou in a poimawh uh sum draw khethei zel ding ua, damlou ompihte ading in nuamtuam mahmah ding hi’n kigen hi.


Pet Care Centre mei in kang
Lamka, May-26: Tunitak dak 11:30 velin Tedim Road, Central Lamka a ‘Pet Care Centre’ mei in kang a, mipi tamkhop paikhawm te'n hun bangtan hiam nung in phelhmit thei mahle uh, asunga ganhing damdawi omte bangmah lakhe manlou in kangtum hi. Dawr neitu Dr. Sawma in Electric Short-circuit ziaka meikuang kipan hiding in gingta a, asunga damdawi tuamtuam Rs. 3 Lakhs val man kangtum dingin gingta hi. Thiltung theihphet in akimnai a mipi leh Fire Brigade te'n delh in phelhmit thei uhi.


SUUNNA:
Goihching (83) w/o (late) Upa S. Zamzachin Ngaihte of Mission Veng, Hiangtam Lamka tuni nitaklam dak 3:00 velin lungtangna in si a, May 27, 2016 in tapa S. Zamkhanlian Ngaihte’ inn pansan in Lamka hanmual ah kivui ding hi.
Deacon H. Thonkhansiam (45) s/o (late) H. Khamzam of Zenhang Lamka, tuzing dak 3:00 velin cancer in si a, nitaklam in Zenhang Lamka hanmual ah kivui hi.


IMPHAL NEWS:
NSFA lawhchinna di'n stock kiningching om
Imphal, May-26: Manipur ah National Food Security Act (NFSA) zat ding tawh kisai a Food Corporation of India (FCI) Manipur-te stock kiningching hi’n offical te’n gen uh a, stock dinmun dungzui in FSD Sangaiprou ah capacity 13090 MT himahleh tulel in rice 12244 MT leh wheat 4182 MT om a, utilization percentage 125.49% tung hi’n gen uhi. FSD Korengei capaciy 4000 MT himahleh tulel in rice 4006 MT om a, Ukhrul FSD capacity 5000 MT himahleh wheat 4795 MT om a, FSD Jiribam capacity 5000 MT lakah rice 1279 MT om a,FSD Senapati capacity 5000MT lakah rice stock 4560 MT om hi. Manipur ah FCI overall stock 31066 MT lakah rice stock 26,884 MT leh wheat 4182 MT om hi’n gen uhi. N. Nandakishore, Circle Manager, FCI Imphal in Manipur ah NFSA zat ahihchiang in Rs. 3 in anntang kg 1 ki lei thei ding a, FCI teng ah stock om teng in ni 68 sung dai zou ding hi’n gen hi.


IED bomb puak ah mi 1 liam
Imphal, May-26: Moirangpurel-Maphou road in a tawt khak Moirangpurel Bethel High School gei ah tuni zingsang dak 8:40 velin IED bomb puak a, huai ah BSF CI Post Moirangpurel a 49 Battalion  attached a om IRB Chandigarh a personnel Sandeep liam hi’n kigen hi. Sandeep ahihleh bomb neng in a ban taklam (right arm) leh a gil (stomach) kha a, RIMS hospital ah puak tung hi a, a dinmun lauh thawng huailou hi’n kigen hi.


JFF-te gamtatna hi’n kipuang
Imphal, May-26: Chandel district a Khengjoi sub-division sung a May 22, 2016 ni a A/R personnel 6 thahna tawh kisai CorCom a Joint Military Commission nuai a Joint Fighting Force (JFF) te’n ‘Operation Spring’ chih minvuah  a gamtatna uh hi’n kipuang uhi. Thiltung tawh kisai a JFF ground force-te’n galvan (LMG 1, Insas rifle 1, AK-56 rifle 6) a laksakte uh tawh damtak in war office tung uh a, media khenkhat ah Army te’n CorCom-te camp suksiat sak kichi thuzuau hi’n gen uhi. India govt. in Manipur-te mihing bang in mulou a, mahni kivaipuak theihna dia a poimawh pen ahihleh phaizang leh singtangmite kigawm khawm ding chih a thiltup uh hi a, huai ding a mipi gupna banah sepaih lam ah hatna ngai a, mipi’n a panlakna uh thuap ding inleng ngetna bawl uhi.


JCILPS leh CSOs-te kiangah ngen
Kangpokpi, May-26: Imphal a Kuki Inn ah May 28, 2016 in KSO Imphal Branch leh IHBT banah RIMS-te saina in Blood Donation Camp om ding a, huai ni a JCILPS leh CSOs te’n  bandh leh kiphinna sailou ding in Seiboi Haokip, Gen. Secy.,  KSO-GHQ in ngetna bawl a, kallui a om ding himahleh JCILPS te total shutdown ziak in ahun kisuan hi’n gen hi. D. Korungthang, Minister (Health & Family Welfare) in blood donation camp honkhiatna nei ding a, hiai hun mun tuamtuam apan KSO volunteer 200 val te’n uap ding uhi. Blood bank-te ah sisan kidaih louh ziak in damlou leh innkuante’n haksatna lianpi a tuah banuah KSO executive te sisan petu ding zong in buai uh a, Blood Bank-te ah sisan kiningching om ding deihna leh singtang bial apan Imphal a ki-etkolte huh theih ding tupna ziak hi’n leng taklang uhi.


MHGEA in SC panpihna ngen ding
Imphal, May-26: Home Guards Honorarium thu tawh kisai in tuni’n press meet om a, huai ah Y. Mangi, President, Manipur Home Guard Employee Assn. (MHGEA) in media-te tawh kimuhna hun ah state govt. in June 25, 2016 tan a Supreme Court (SC) thupiak a sepsuah keileh kiphinna tuamtuam pan ding uh hidan in gen hi. CM, Dy CM telin Cabinet Minister teng kiangah May 25, 2016 in thutawp pia uh a, Manipur ah Home guard-te police tawh kibang in lampi, govt. institution banah mun tuamtuam ah zat in om uh a, himahleh kha lawh Rs. 5,000 kia sang uh chi hi. Ministry of Home affairs in NE bial telin state chih a Chief Secretaries teng kiangah June 4, 2015 in home guard-te kha lawh khangsak dingin thu pia a, home guard-te lawh ding Central govt. apan 90% himahleh Manipur ah sepsuah omlou hi’n leng taklang hi.


Kum 3 sung in Rs 1057.01 crore ngah
Imphal, May-26: India gam pumpi ah naungek piang tung a si pah (Infant Mortality)  tawh kisai a 13th Finance Commission in Infant Mortality rate sukiam state-te kiangah kipahman Rs. 5000 crore piak a chiam tawh kiton in Manipur in kum 2012-13 in Rs. 358.49 lakh, 2013-14 in Rs. 325.12 lakh leh 2014-15 in Rs. 373.40 lakh a vek a gawm in kum 3 sung in  Rs. 1057.01 crore ngah a, state teng laka kipahman tam ngah pen hi’n leng kigen hi. Manipur ah Health and Family Welfare Dept. in employee sanctioned post 8083 lakah employee 5504 om a, dept. khenkhat in sanction post 130 sang a niam zaw nei uh a, state govt. nuai a Feb 2016 tan in JNIMS, NHM leh MACs telin public health manpower 9065 hi hi’n gen uhi. Manipur ah JNIMS hospital, State TB Hospital, State Leprosy Hospital, State Ayush Hospital, District hospital 7, sub-district hospital 2, CHC 17, PHC 85 leh PHSC 421 telin health institution 557 om a, huai banah Nursing college 1, FHW training school 3 leh Family welfare training centre 1 om hi’n gen uhi.


TUNI THUPI:
“Amen, vualzawlna bang, thupina bang, pilna bang, zahtak-huaina bang, thilhihtheihna bang, hatna bang, khantawn, khantawn in i Pathian kiangah om hen, chi in.”- Kilakna 7:12


EDITORIAL:
Siamsinna a kibulphuhna
Eipawl in siamsinna i chih chiangin, atangpi in ‘education’ i chi sek ua, a dikkei i chikei a, ‘teina’ chih bangin leng lehtheih a, lehdan chi tuamtuam (definition) hunkhop om ding hi. I gam ah student organisation hunkhop om a, tuate laka khenkhat in  education tawh kisai ah singtangam bial deuhte a school omte etkaina lam ah kum bangzahhiam paisa akipan in panla uh a huaite pahtak-huai  isa hi.  I gam a om student organisation tuamtuamte’n singtang bial lam a i school-te chiat uh awlmawh hilehang hoih mahmah ding a, naupangte’ maban ding i gelpih uh poimawh hi. Tulai i gam politics dnmun i et chiang in siamsinna  a kibulphuh mah poimawhpen  ahihdan muhtheih in om hi.
    Amasapen in Pre-school (preparatory class) tungtang  i gen masak uh poimawh hi. Nidang in Pre-school kichi omlou a,naupang kum 4  achin chiangin School i kaisak uh a,A,B,C, chihte sin tawh thuah sek uh. Tuni chiangin Prep omta a,naupang kum 3  tua ah kum 3 a chin ualeh ualeh school admission bawltheih mai hi. Tulai leh hun paisa in  sepna apan pension tuamtuam kum 3 a school kai vang mahmah ding uh a, kum 10 khawng a school lut pan chih khawng ahi uhi. Tuni chiangin  naungek isakte bang preparatory class ah kipan ngal uh chihtheih a, nawi tep laiding a i gintakte bang school kai uh chihtheih hita hi. Thamlou in, naungek i chihte tanpha in mobile (touch screen/ smart phone) tanpha khoihthei zatzat in a ut-ut uh mek khethei mawk uhi. Hibang naupangte kemtu dingin civil society leader tuamtuam banah nu-le-pate kisakkholh poimawh mahmah hi.
    Nu-le-pate banah school teacher-te’n poimawhna liantak nei uhi. School naupangte tunung sawtlou a gamsung vaipa dingte hi uh a, amaute’ khut ah gam-le-nam a kingak hun ompah ding hi. Education i chih poimawhlaw mahmah a ‘Life long process’ chih hialin a om mah a, Mahatma Gandhi’ muhkholhna pe’n khawvel pumpi ah thupilte laka chiamteh in a om hi. Hiai ‘Learning is an integral component of life and is a lifelong process’ pe’n i tunung hinkhua ua dia khuam poimawh hong  hikha ding hi.
    Manipur Board kichi sek BSEM saina a Class X/HSLC examna  result puankhiak hita a, huaima deuh in Council kichi  CoHSEM in leng Class XII  puangkhia uhi. Tua ah, Government School-te bangmah hilou ahihdan muhtheih in om a, private school-te mah in hih hoihpen uhi. Tualou in Centre nuaia  CBSE leh board tuamtuamte’ saina examna tuamtuamte ah leng government  school-te hoihtuanlou hi. State leh centre government nuaia school-te sanga private institution result-te bang ziaka hoihzaw leh kingakna tak chingzaw sek ahi uhiam  chih ngaihtuahtham ching  hi.
    I gam in siamsinna a poimawh petmah a, lehkha theilou kichi tulai khawvel ah zatna ding tawm mahmahta uhi. Chiamnuih a kigen khat gensawn zual lehang, ‘Singtang a mipil pe’n leh Calcutta bawngpi kibang’ chi uhi. Hiai a agen utna  uh ahihleh Calcutta/ Kolkata ah bawngpi in lampi lai tawn leleng a lampi ding (side) thei a, singtang a mipil pe’n in leng a side ding theisiam chih ahi hi. Politics ah social tawh kisai gen-gen mahlehang, a taktak in lehkha thei mah i gam ah poimawh touden dingin kilang hi. Tua ziakin, preparatory class akipan tate etkaitouh poimawh  hi’n muhtheih hi.
    Siamsinna mah ah hoihtak a ikibulhphuh ualeh buaina tuamtuam i tuahsekte uleng hong veng thei deuh de  aw chih ngaihdan  piangsak a, education ah ikik nawn uh deihhuai mahmah hi. Education a kiknawnna dingin i  poimawh uh thil tamtak om dinga, i Nam pumpi’n pan i lak uh poimawh ding hi’n kilang hi. Damsung in  kuapeuh in  siamsinna kichi sin toutou i hi ua, a neupen akipan teknung-vuainung tanpha a siamsin ngen i hih manun, hiai Education poimawhna i theih ua, pilna leh teina/theihna i sintouh det uh poimawh hi. Siamsinna leng politics khat hilai hi. Saptuam makai ding, politician ding, social leader ding leh thil bangkim ah lehkhasiam i poimawh ua, tua dingin i naupang preparatory akipan naupang sek khiakdan kisin ni. Tua dingin, innsung akipan leh school ah mawhpuakna liantak i neichiat uhi.