Manipur Express | May 28, 2016

HEADLINES:
PM in Manipur leh Mizoram a train services hong
North Eastern Council plenary meeting 65veina om 

Shillong, May-27: Prime Minister Narendra Modi in tuni’n Meghalaya state khawpi Shillong ah North Eastern Council(NEC) plenary meeting 65veina hong kawmin a thugenna ah, govt in India gama region dang tawh khantouhna (development) thil a dinmun kibang hih theihna dingin North East bial puah ut ahihdan gen hi. Aman a thugenna sunzom kawm in North east bial leng a khantouhna theihlouhna ding aziak bangmah omlou hi’n leng gen hi. Huaizawh nitaklam dak 4.25 in Prime Minister in Shillong a Polo ground a mipi kikhopna ah remote in Jiribam (Manipur)-Silchar kikal a service ding broad gauge passenger train leh Assam leh Mizoram kal kikawmna ding Bhairabi-Silchar passenger train hong(flag off)  a, huaizawh in North East region a mipi kikawmtuahna hoihzawsem om theihna dingin Kamakya-Katra Express Train leng hong hi.
    Silchar-Jiribam kikal a broad gauge passenger train niteng a zinglam dak 8.45 in Silchar nuse ding a, zinglam dak 11.00 in Jiribam tung ding hi. Jiribam akipan zinglam dak 11.45 in   Silchar zuan un paikik ding a, Silchar tunma in mun 7 ah khawl ding hi. Huai hun a tel Thangso Baite, MP(Outer Manipur) in Manipur adia rail service thak om mipi adia thil kipahhuai petmah hi a, Jiribam akipan Tupul kikal ralway line leng zawh hun ding bikhiahsa   bang geih a  zawh ahih ding ahi, chi’n gen hi. Dr Th. Meinya, MP in a genna ah Northeast Frontier Railway in project a bikhiahsate ahun zawh ahih theihna ding in mipi in kithuahpih  dingin ngen hi. Northeast Frontier Railway a Chief Administrative Officer Ajit Pandey in Jiribam-Tupul railway nasepna kum 2019 tan a zawh hiding chi’n gen hi.
    Prime Minister in NEC meeting honna hun a a genzelna ah govt in Act East Policy tungtawn in North East bial ah bangchibang in muhtheih a khantouhna hong om theidia chih ngaihtuahin na leng nakpitaka panla in nasem hi’n gen a, North East bial akhantouh kei leh India khangtoulou chihna ahi chi’n gen hi. North east lam chiteng a khantouhna a om theihna dingin centre in policy tuamtuam bawl hi’n leng Prime Minister in gen hi.
    Huailou in Prime Minister in tuni a train service 2 a khahkhiak tawh kiton in Manipur leh Mizoram leng India gama  Broad Gauge Passenger Railway map ah telkha tuak uhi. Tuni maha khahkhiak a om Kamakya-Katra Express ah 2-tier air-conditioned, 3 tier air-condition, sleeper class leh general second class accommodation om a, North East mipi’n hun sawttak a lunggulh uh tangtung hita chihthu om hi.


Council of Minister-te lak ah melthak 18 om
WB Chief Minister dingin Mamata Banerjee kichiam
Kolkata, May-27: West Bengal ah Chief Minister  term 2na  dingin Trinamool Congress Chairperson Mamata Banerjee in tuni’n Kolkata a Republic Day parade venue mun Red Road ah  Governor Keshri Nath Tripathi  ma ah kichiam hi. Chief Mnister Mamata makaihna  Council of Minister 42 om lakah mithak(new faces) 18 om a, minority communities akipan leng Minister 7 lak hi uhi.  Kum 61 a upa Mamata Banerjee bel Bengali pau in kichiam a, India gama numei Chief Minister 4 omte laka khat ahi hi. West Bengal ah April 4-May 5, 2016 sungin phase 6 in assembly election om ah assembly seat 294 om lakah Mamata makaihna Trinamool Congress in seat 211 luah uh a, opposition Congress-te seat  44 ah ching uh a, CPM te’n seat 26 luah uhi. Mamata Banerjee bel West Bengal ah media-te’n ‘Bengal Tiger’ chih min vuah hial uhi.
    Tutung a Minister thak mi 18te ahihleh Suvendu Adhikari, Sobhandeb Chattopadhyay, Churamoni Mahato, Tapan Dasgupta, Asima Patra, Indranil Sen, Laxmi Ratan Shukla, Shyamal Santra, Golam Rabbani, Siddikullah Chowdhury, Abdur Rezzak Mollah, Jakir Hossain, James Kujur, Rabindra Nath Ghosh, Sandhyarani Tudu, Abani Joardar, Bachchu Hansda leh Sovan Chatterjee  hi uh a, Sovan Chatterjee bel tulel in Mayor of Kolkata ahi hi.
    Mamata Banerjee in tuni a Chief Minister dinga a kichiamna hunah Union Finance Minister Arun Jaitley banah Minister mah Babu Supriyo, Bihar Chief Mnister Nitish Kumar, UP Chief Minister Akhilesh Yadav, Bihar Chief Minister-lui Laloo Prasad Yadav leh Farooq Abdullah in uap uhi. Huai hun ah Bhutan Prime Minister Tshering Tobgay, Bangladesh Industry Minister Amir Hossain Amu leh Kolkata a om Bangladesh  Deputy High Commissioner inleng huai hun uap uhi.
    Mamata leh a Council of Minister-te’ kichiamlai in a kichiamna mun kong ah Trinamool Congress supporter mipi tamtak  kikou zuazua uh a, Didi (ka u’ nu uh) hong damdawt in Bengal in nang hon poimawh ahi chih leh thu(slogan) tuamtuam sam uhi. Banerjee in West Bengal CM a let masakna din  May 20, 2011 in kichiam a, namniam leh tagah-meithaite nakpitak a awlmawh  ziakin tutung assembly election ah leng party dangin zoulou in amah makaihna  Trinamool  party mah uh hatpen uhi.Term-lui in Trinamool Congress, Congress leh Socialist Unity Centre of India-Communist  pangkhawm in kum 34 sung vaihawm Left Front-te khenkhia uhi.


LOCAL NEWS:
Bangla leh Kotlian kal ah IED mukhia
Lamka, May-27: Tedim Road  a Torbung Bangla leh S. Kotlian kikal a lei(culvert) bul ah tuzingkal in IED bomb hidia gintak 1 muhkhiak hi a, Leimakhong a om bomb squad te’n zinglam dak 9:45 vela lakhia in hihpuak uhi. Tuzing  dak 1:00 velin Khengjang a om 7-Assam Rifles ‘Eco Coy’ a road opening party ten a mukhiauh a, kintak in Army HQ  a theihsak ziakun Leimakhong a army bomb squad-te hong kuan in mun thawveng ah  hihpuak uhi. IED om ziakin army te’n Torbung Bangla leh S. Kotlian kal Tedim road ah dakal 8 vel gari taisaklou in khawlsak vek uh a, IED lakkhiak nungin paisak pan uhi.


Graduation-cum-Commissioning Ceremony
Lamka, May- 27: Evangelical College of Theology (ECT) Chapel, Nehru Marg ah tuni in Graduation-cum-Commissioning Ceremony om a, Rev. Khen P. Tombing, Principal Rayburn College in Pathian thugen hi. Rev. Dr. T. Jamkhothang  Haokip, Principal, ECT in M. Div zou thak mi 12 leh B. Th  zou mi 15-te degree pia a, Rev. L. Sata, Chairman, ECT Managing Board in Graduate thakte Pathian kiangah thumsak hi. Rev. L. Ngamkholal makaih in student-te kiang ah Thangkai & Lungpau Award, Rev L. Sanga Award, Rev. Khupjapao Singson Award, Rev. K.T Amos Award, Elder Zanuom Award, Rev. Thangjaleng Singson Award, Practical Ministry Award, Rev. (L) Lhunkholet Haokip Award leh Class Topper Awards hawmkhia uh a, Rev. H. Thiek, Executive Director, EAC in Awards pekhia hi. Graduation program zawh in Alumini meeting om hi.


Emp. Exchange ah counter honbeh ding
Lamka, May-27: State  govt. in Education (S), Medical, Police leh MSDPCL (Electric) ah post tamtak lak asawm ziak un Dist. employment exchange in candidate teng a sponsored ngai hi. Huaiziakin HQ veng a employment exchange lun mahmah a, form submit, registration/renewal bawl mi tamthei mahmah hi. Huai tawh kisai i tuni in CDSU makaite’n enkhia uh a, Asst. Director tawh  a genkhawm nung un counter 2 honbeh ding in thukim uh a, DIET Centre thuneite kiangah room awng omte zangsak ding in va ngen uh a, phalna amuh dungzui un May 28 akipan DIET Centre ah counter 2 honbeh hiding hi.


ZILLAI leh CDSU in mawhpaih 
Lamka, May-27: Torbung Bangla leh S. Kotlian kikal leibul a IED bomb muhkhiak tawh kisai Zillai Kangvai Block leh CCpur District Students’ Union (CDSU) in mawhpaihthu puang uhi. Hibang gamtatna in lemna leh muanna a hihsiat banah numei-naupang patausak  ahihman in kuaman bawl nawnlou ding in ngen uh a, maban ah huai area bomb koihna dia zang nawnlou di’n Zillai Kangvai Block in ngen uhi.


Don Bosco a lawhchingte kipahpih
Lamka, May-27: Don Bosco Hr. Sec. School ah tuni’n HSLC leh HSC Examna ah MIL (Zou) a, state topper -Vungdeiniang (Roll No 17231)  d/o of Thangsuanlal of Hiangtam, School topper Chingthianhoih (Roll No 17167) leh HSE a Thangoumuon Valte (Science stream) banah Lorita Hatjoukim (Arts stream) kipahpihna hun zatpih uh a, huai ah HSLC student 2-te kiang ah Rev. Fr. Mathew Vellilakkattu Memorial Scholarship  award Rs. 5000/- leh HSE student 2-te kiang ah Rev. Fr. Shaji Sebastian Memorial Scholarship award Rs. 5000/- pia uhi.  Rev. Fr. Kholi Emmanuel, Principal in lawhchinna ngahte’ kipahpih ahihdan gen in, maban ah Pathian vualzawna deihsakthu gen hi.


YVA saina in Free Medical Camp
Lamka, May-27: Young Vaiphei Association (YVA) Gen HQ leh YVA Imphal Jt. HQ kigawm in tuni’n NH 150 a Chiangpi khu ah Free Medical camp nei uhi. Huai ah khua 15 akipan in mi 200 val ki-ensak uh a, damdawi leng a thawn in pia uhi. Medical camp ah Dr. Asem Vaiphei, Dr. Lien Vaiphei, Dr. Sylvia Vaiphei, Dr. Kimbawi Vaiphei, Dr. Kamthamuan Neihsial te’n damloute en uhi. Medical camp ahihleh Dir. of Tribal Affairs & Hill, Govt of Manipur; 7th Assam Rifles leh RIMS Vaiphei Employee Assn te’n leng kithuahpih uhi.


Examna a lawhchingte kipahpihna
Lamka, May-27: SSPP Lungthul Block te’n June 4, 2016 nitak 7:00 in Lungthul (D) ah HSLC & HSSLC exam 2016 a lawhchingte kipahpihna neiding uh a, Chief Guest in G.Suanchinpau, MDC  pangding hi. Functional President in Lianzapau Samte, President, SSPP GHQ leh Guest of Honour in Thangzamuan Tombing, Tribunal General/ATSUM pang ding hi.  Pastor H.Thangbiaklal, bial Pastor, EBCC Lungthul (D) in student lawhchingte  Pathian kiang ah thumsak ding hi.Khuallian te thugenna ban ah SSPP Lungthul Block te’n lawhchinna ngah student te present peding uh a, Games & Sports deptt. SSPP Lungthul Block makaih in Games & Sports neih hun a kipahman hawmkhiat hiding hi.


Bungmual Dorcas te’n panpih
Lamka, May-27: EBCC Bungmual a Dorcas makaite’n tuni in Dist Hospital morgue ah All Manipur Tribal Women Union (AMTWU) makaite hun zatpih in panpihna Rs. 2,000/- pia uhi. President, Baptist Dorcas Fellowship in a genna ah hun tamtak seng banah gim-le-tawl leng poisalou a gam leh leitang adia tunitan Pathian buan numeite’ pahtak-huai uh ahihdan gen a, hibang a panlakna Pathian in vualzawl ngei dinga lam-et thu gen hi.


Relief committee in kipahthu gen
Lamka, May- 27: Saichang area ah tutung vuah leh gialpi a thuakte panpihna kaikhawmtu Saichang Area Relief Committee in tuni sunnung in H Dalzamang Inn, Chiengkawnpang ah kipahthugenna leh ankuang umkhawmna nei uhi. Huai ah S. Thienlaljoy Gangte, Chairman Relief Committee in tutunga  vangsiatna govt. inleng awlmawh in kal 2 sunga govt. akipan relief material kimuh kipahhuai ahihdan gen in, panpihna pia mimal leh pawl tuamtuamte tung ah kipahthu gen hi. Huai hun ah Group YMA President CV Duhawma telin YMA Chiengkon Branch akipan mi poimawh tamtak in uap uhi.


DSO/CCpur in NFSA antang flag-off
Lamka, May-27: CCpur Dist. ah National Food Security Act sepsuah nang in tuzing dak 7:00 in HQ Veng a FCS godown ah antang hawmkhiat dingte Rev K.Mawia, GBA in Pathian kiang ah thumna in lan a, huai zawh in M. Ginzasuan, DSO/CCpur in flag-off hi. SDO in agenna ah NFSA sepsuah nang in haksatna thupitak kituak a, huai-te phupaisuak a, mipi’n antang kiman taka leitheihnang a honkhiat theih kipahhuai sakthu gen a, mipi’n NFSA tungtawna antang ahamphat pih uh deihthu gen hi. DSO/CCpur in flag-off zawh in CCpur A/C Releasing Order No.1-36 te’n awlawl in amau antang ding chiat pawkhia uh a, annekma apawkhe manlou te’n annek zawh in pawkhia uhi.
Saichang Area Relief Committee in tuni sunnung in H Dalzamang Inn, Chiengkawnpang ah kipahthugenna leh ankuang umkhawmna nei uhi. Huai ah S. Thienlaljoy Gangte, Chairman Relief Committee in tutunga  vangsiatna govt. inleng awlmawh in kal 2 sunga govt. akipan relief material kimuh kipahhuai ahihdan gen in, panpihna pia mimal leh pawl tuamtuamte tung ah kipahthu gen hi. Huai hun ah Group YMA President CV Duhawma telin YMA Chiengkon Branch akipan mi poimawh tamtak in uap uhi.


Ebenezer Polyclinic hon hiding
Lamka, May-27: Langkhanpau Guite, Chairman, ADC/CCpur in May 30, 2016 zinglam dak 11:00 in New Lamka Go Cin Khup Veng ah “Ebenezer Poly-Clinic” hongding a, Rev.Sut Khan Thang, Executive Secy. CBA in Pathian kiang ah thumna in landing hi. Huai hun ah Dr. Hatzaw, Prop. Ebenezer Polyclinic in introductory speech neiding a, Rev M.Gousuan in thumna in hunkhak ding hi.


1-Day consultation for Mizo Langue subject
Lamka, May-27: Mizo Literature Society (MLS), Text Book Sub-Committee saina in May 28, 2016 zinglam dak 10:30 apan in MLS Office, YMA Complex, Hmuia Veng ah Mizo Langue Subject Teachers tawh kisai “One Day Consultation” omding hi. Session-I ah Lalkunga in ‘Teaching & Motivation Technique’ chih pansan in thugen ding a, Session-II sunnung dak 1:00 apan Upa MB Sanghnuna in ‘Pattern of Question Setting’ chih thupi zang in thugen ding hi.


Lawhching-te leh Gari neite’ Maicham
Lamka, May-27: Koite khua a Lamkhopao Kipgen’ Inn ah May28, 2016 sun dak 12:00 in Koite khua a HSLC & HSSLC exam a lawhchingte’ ban ah Gari neite ading in Maicham omding hi. Huai ah Rev.Hemkhomang Haokip,Principal, DTS in lawhchingte leh gari neite Pathian kiang ah thumsak ding a, James Doujapao Haokip, SDO/BDO, Tuibuong in student-te hanthawnna thugen ding hi.


SP office ah form 3453 hawmkhia
Lamka, May-27: Tuibuong a SP office ah May 16, 2016 apan Manipur Police deptt nuai a Police constable (male) post 2052, Follower post 564 leh Manipur Rifle ah Riflemen post 441 laknang application form tunitan in 3453 hawmkhia uh a, May 28, 2016 inleng hawmnawn ding uhi. Police constable ading form 1920, Follower ading form 820 leh MR ading form 713 hawmkhia uhi.


Kipahpihna leh thumsakna omding
Lamka, May-27: Bijang Youth Club saina in May 28, 2016 zinglam dak 11:00 in Bijang Community Hall ah HSLC & HSSLC, exam 2016 a lawhching-te kipahpihna leh thumsakna omding hi. Huai ah Upa Sokholal in student lawhchingte’ Pathian kiang ah thumsak ding, Bijang hausapu, Village Authority leh Bijang Women Welfare Assn. te’n thu gending uhi.


An-ngawl thumkhawmna omding
Lamka, May-27: Halleluyah Prayer Band (HPB), Town Area/CCpur pawlin Teiseng AG Church ah June 2, 2016 zingsang dak 7:30 :00 akipan in an-ngawl a thumkhawmna 252 veina nei ding uhi. Huai hun ah Upa Lunkhomang, Vice Chairman, HPB/Town Area in vaidawnna thu gending a, Rev. Khuala, Jt. Secy. KCLF makaih in thumkhawmna hun zang ding uhi.


SUUNNA:
Nianglalmalsawm (3) d/o H.Thongkhopau of Lamlian veng, Bungmual tuni sunnung dak 2:00 velin Dist. Hospital ah tang (pneumonia) ziakin si a, May 28, 2016 in Bungmual hanmual ah kivui ding hi.


IMPHAL NEWS:
SSA nuai a Primary Teacher lak ding deihlou
Kangpokpi, May-27: All Hill Districts EGS/SSA Volunteer Teachers Union te’n SSA nuai a Primary Teacher 489 lakna dia recruitment pailel dal ding leh SSA nuai a recruitment teng khawlsak ding phut uhi. Hiai thu tawh kisai  Trimson Saka, President leh R. Thiem, Gen. Secy., Union te’n joint meeting hun ah  state govt. in EGS/SSA volunteer teacher-te sepna hun sawtpek apan regularize louh ziakin haksatna tuak hidan in gen uhi. ZEO/DPO te’n EGS/SSA Centre-te primary school tan a upgrade ding banah volunteer teacher-te primary teacher dia regularize sak ding chiam in DPC tungtawn in kum 2004-2005 in EGS/SSA volunteer teacher la uh a, EGS/SSA centre khenkhat primary school tan a upgrade himahleh tunitan a volunteer teacher-te sepna regularize om nailou hi’n gen uhi. Hiai tungtang ah High Court in Primary school tan a EGS/SSA centre upgrade a omte ah volunteer teacher-te sepna kha 2 sung a regularize sak ding in thupia a, state govt. in semsuah lou hi’n gen uhi.


SW dept. ah Maneka Gandhi kigolh ding
Imphal, May-27: RK. Pramodini, President, Manipur BJP Manila Morcha makaihna a Manipur BJP Manila Morcha delegate team te’n zan nitaklam dak 3:30 velin New Delhi a Shastri Bhavan ah Maneka Gandhi, Union Minister of Women and Child Development va kimuhpih uh hi’n kigen hi. Huai hun ah Pramodini in Manipur a Social Welfare dept. nuai a old age pension scheme leh Anganwadi programme tawh kisai a dan kalh a thilchin omte theisak kawm in Ministry level tanpha a kigolh dingin ngetna bawl hi. Union Minister in hiai tungtang enkai ding in chiam a, Manipur ah numeite’n politics lam ah haksatna a tuahte uh amah kiang tut dingin thei sak a, Manipur ah General Election 2017 ma ngei a Manipur pha ding ahihdan theisak hi’n gen uhi.


DoNER day zatna om
Imphal, May-27: Sikkim telin North East state teng ah tuni’n DoNER day zat ahih tawh kiton in Manipur ah leng DoNER day zatna om a, hiai hun W. L. Hangshing, Addl. Chief Secretary; Vineet Joshi, Secy., MAHUD; R.K. Dinesh, Director, MAHUD; N. Geetkumar leh mi tuamtuam te’n uap uhi. R.K. Dinesh in May 27, 2004 in Ministry of DoNER patkhiak ahih dungzui in kumteng in hiai ni pen North East state tuamtuam ah DoNER Day ni a zat hi’n gen hi. May 28, 2016 in Swachhta Pakhwada leh Imphal area ah NGO-te telin cleanliness drive banah programme tuamtuam om ding hi. North East state-te ah infrastructure development na dia Ministry 56 te’n Union Budget a fiscal year 2016-17 a dingin Rs. 33 crore val bikhiah uh a, Manipur ah Central sponsor/flagship programme 100 val kisemkhia hi’n taklang hi.


Students’ wing te’n kiphinna khauhsak ding
Imphal, May-27: JCILPS nuai a students’ wings te’n May 28, 2016 apan kiphinna khauhsak sem ding uh hi’n gen uh a, ILP tawh kisai a Bill 3-te Act hihtheihna dia All Political Party delegation-te tunitan a New Delhi ah a zin khiak louh ziak uh hi’n taklang uhi.
Huailou in TG Girls Hr. Sec. School kong ah student te’n Manipur ah ILP zat ding phutna in sit-in-protest nei uhi. Police te’n May 24, 2016 ni a student 2 a matte uh khahkhiak ding phutna in Keishampat Leimajam Leikai ah student 6 in hunger strike pan uh hi’n kigen hi.


KSA Gen. Secy. telin mi 4 man
Imphal, May-27: City Police OC Sudhir makaihna nuai a city police te’n tunitaklam dak 3:30 velin Keishampat Sega Road a Kangleipak Students’ Association (KSA) office apan Sukham Bidyananda, Gen. Secy., KSA telin KSA volunteer 4 man uhi. KSA Volunteer te’n Thangal Keithel leh Keishampat Leimajam Leikai apan Grocery 2 in chi (salt) sianglou a zuak ziak un dawr neitu Rajesh Kumar Yadav (28) s/o Binod Yadav of Bihar leh Dasrat Prasad (48) s/o (late) Dinanath Prasad of Telipati-te man in media-te maiah pulakna a neih hun uah mat in om uhi. Thiltung tawh kisai a A. Khuman, Secy., KSA in khawtang hoihna dia nasemte mat a om mawhpaihthu puang a, thu nung thu ma omlou a KSA volunteer mi 4-te khahkhiak ahihkeileh kiphinna pan ding uh hi’n taklang hi.


TUNI THUPI:
“Ahi, himahleh, mihing aw, Pathian nial vialpa kua na hia leh? Thilsiam in, a siampa kiangah, Bang achia hichi banga honsiam? a chi dia hia?”– Rome-te 9:20


EDITORIAL:
Lamka leh Homo…
Pathian thilsiam mah!
Leitung leh mihingte’ banah thilsiam chiteng   Pathian in a bawl(asiam) ahi hi. Pathian in mihingte amah kibatpih in siam a, a thilsiamte en in hoihsa mahmah a, lungkim mahmah ahihdan Laisiangthou ah i mu hi. Huchi kalah, tuni a i gen ut  ahihleh Lamka leh Homo… (Pathian thilsiam mah!) chih tungtang ahi hi. Amasa in kuamah akisimmawh ding tuam i om kei a, Pathian in mihingte a hong bawlvek ahi a, ikisimmawh omlou ding i hih banah i tan dinga Pathian in hon piak tungtawna kipiaksiatna (depression) neiding in leng kuamah deihsak huai hetlou hi.
    Homo… i gen hang in homosexuality (tawkaw hukna) tungtang gen sawm ihikei hi. Vaigam ah i zin leh  train khawnga i tuan aleh pasal hinapi numei chei a kichei leh a mel le puam uh leng numei tawh kibang mahmah mi ahunkhop honglut in  khut hong beng uh a, sum hong ngen uhi. Pathian in pasal dinga asiam himahle uh a taksa pianzia uleh a ngaihtuahnate uh numei lungtang a nei uh  ahihdan kichian hi. Huai thu mah khawvel in a buaipih ahi a, court tuamtuam ah leng kikhintuahna nasatak om phah  hi.
    Pasal leh pasal kingai ahihkeileh numei leh numei kingai chih kum zabi paisa akipan zak leh genkhak sek in om a, a taktak genin ‘hehpihhuai mahmah uh’ hizaw hi. Gay leh Lesbian (pasal leh pasal, numei leh numei ki-enlah tuah) mihng  leitung ah lakh tampi petmah om uh ahihman in thil poitak ahi a, lah amaute vamawhsak mawk theih hituanlou hi.
    Ni tamlou paisa in Lamka khawpi  ah pasal 3 in a gendan un, “kou leng numei chei in ka kichei ut ua, zi ka neithei sam ding ua, ta leng ka neithei ding uh, himahleh, numei etlahna himhim ka neikei ua, pasal mah kithuahpih dingin lunggulhna ka nei zaw uh” chi hilhial uhi. Documentary proof hiam ahihkeileh official data om kei mahleh, amaute’ gendan in Lamka phaijang ah Homo mi 500 val bang om  ahihdan gen uhi. Himahleh, mite’n hon simmawh et ua, ut dandan in houkou in hon chiamnuih sek uh a,himahleh  kouleng ka ut thu ua om ka hikei uh, chi uhi. Amau’ ut thu a hibang lungsim nei  nei ahih tuanlouh ziakun vapawng enghou leh simmawh bawl mawk kichi  hoih hetlou hiding hi. Pathian’ zakdah ihih khakleh a pap leng a om kha diam?. Gay leh Lesbian lam in amau taksa utna hih pichinna dinga ‘Homosexuality’ tawh kisai ana hihkhak ua lebel Pathian’ hamsiat a omkha  thei zel hi. 
    I gam a om Non-Governmental Organisation (NGO) khenkhatin  hiai thu ah study a bawl tham ding ua, Data leng anei  ding un i gingta hi. Pilna-siamna tawh kisai a ‘mi tuai’/ ‘ki pa sak’ i chihte ei sangin leng theihna leh siamna ah sangzawtham mi tami om uh a, dan (legal) tawh kisai in amau’ dikna leh hihna banah a kalsuan dingdan uh theilaw mahmah uhi. CCpur district ah hibang mi aza asim om ahihdan bel theihchet (confirm) hisim a, amaute’ adingin lam tuamtuam ah kithuahpihna piak theihnadan leh awareness campaign khawng hihtheihna lampi a om diam chih ut-huai hi. Awareness campaign i chih chiangin mi bangzahhiam a kipesia (depress) om kha  ding ua gintak hi a, gamdangte’n hiai tungtang bangchi paipih uh ahiam chih tanpha mipil leh siamte’n a etzui dingin hoih hi.
    A zakdah hetlou ding un gen lehang, ahihna uh kisel sawm pawl omsek  mahleh, mi tamzawte’n hangsantakin ahihna uh pulak ngam leng om veve uhi. Supreme Court leh Delhi High Court kalah leng hiai thu buaipih petmah  om a, ‘kou ut thu a hiai dan a om ka hi kei ua, ka rights uh zanga hinkhua paipih ka hilel uh, kou mimal utna leh deihtelna tung a thunei zaw ding kua ahi tuandia?” a chih chiangun court adingin buaihuai mahmah a, tua ziakin ‘legalize’ in hong om man hi. Christian-te paidan tawh bel naktakin kikalh a, Pasal leh pasal kingai, numei leh numei kingai chih om theilou a, phetlou in akipolh ngeingei ua leh huai in Pathian thangpaihna sukha ding chih ahi hi. Hiai kipolhna leh nupa banga nopsakna a sau atunluat ma un campaign thupitak neih poimawh sakna om hi.