Manipur Express | May 6, 2016

DC in Chongkhozou leh Saichang area a relief team-te sawlkhia
Chonkhozou leh Saichang area ah relief material hawm

Lamka, May-5: Lunminthang Haokip, IAS, DC/CCpur in tuni zinglam dak 7:30 in Peace Ground, Tuibuong ah Tuilaphai area telin Henglep Sub-Divn. a om khaw tuamtuam ah April 23, 2016 a huipi-vuahpi leh gialpi in tenna inn a hihsiat-te panpihnang hawmkhe di’n first batch in relief team sawlkhia (flag-off) hi. DC/CCpur in concerned SDO/BDO te’n verification a zawh chiangun Sub-Divn dang a victim-te kiangah relief material hawm hiding a, Imphal apan relief anntang quintals 500 hongtung lakah Henglep Sub-Divn. nuai a hawm ding antang bag 450 puakkhiat hi a, adang teng Tuibuong a DTC Hall  ah hawmtheih dingin om chi hi.

Soiminlian Lengen, MCS, SDO/Henglep in makaih a office staff  bangzahhiam relief team te’n relief material (CGI sheets 1050 bundles leh anntang 450 bags) pua in Chongkhozou leh Saichang area zuan uh a, relief hawmkhiakna hun ah YVA GHQ, YMA Relief Committee leh T. Manga Vaiphei, Minister PHED worker te’n leng zui in kithuahpih uhi.  Relief team te’n Tuilaphai area a khua 4 ah tenna inn 14 ading  anntang bag 15 leh Langva (CGI Sheet) bundle 42 pia in paisuak uhi.  Tuilaphai area telin Chongkhozou leh Saichang area a khua 27 a huih leh gialpi in tenna inn 421 ahihsiat lak ah inn 208 naktak in kisia a, inn seteng kiangah anntang half bag 1 chiat a piak ban uah inntung siat dan dungzui in langva (CGI sheet) pia uhi. Huai hun ah SDO/Henglep  in relief material hawmkhiak a omte Minster T. Manga Vaiphei panlakna ziaka State govt. in apiak hi a,  material-te kaihkhawm sung hun a lut zek ziak a duhthusam bangin kihawmkhe thei pahlou hi’n gen hi. Maban ah Sub-Divn HQ (Henglep) area ah vangsiatna thuak-te kiang ah hawmkhiak hidingin gen hi. Material hawmkhia tawh kisai YVA GHQ makaite’n Chongkhozou area ah kithuahpih in, Saichang area ah YMA Relief Committee te’n kithuahpih uh a, Saichang area a ding relief material-te nitaklam dak 4:30 in Santing (L) puaktung hi a, SDO in Saichang khua tan va phasuak hi.
        


Tunitan in DC/CCpur office ah huihpi, vuahpi leh gialpi in thil tuamtuam ahihsiat SDO/BDO te’n report apiakna uah inn 1029 kisia in, innkuan 1107 in thuak kha (affected) hi. Huai-te CCpur sub-divn. ah inn 124 leh innkuan 143 te’n thuak kha hi. Henglep sub divn. ah inn 544 leh innkuan 553 banah JB school 2, private school 2, biakinn 2, community hall 2 leng kisia hi. Tuibuong block ah inn 50 leh innkuan 82, fencing, retaining wall banah Teiseng ah crop field hectares 15 kisia a, K. Salbung ah Youth Club office leh Koite ah school 1 kisia hi. Thanlon sub divn. ah inn 71 leh innkuan 71 te’n thuakkha uh a, private school 2 leh crop field hecture 15 kisia hi. Singngat block ah inn 40 leh innkuan 40 te’n thuakkha uh a, community hall 1 kisia hi. Tipaimukh sub-divn. ah inn 138 leh innkuan 138 te’n thuak kha uh a, PHSC building 1 leh community hall 2 kisia hi. Sangaikot block ah inn 5 leh innkuan 5 te’n thuak kha uhi. Kangvai sub divn. ah inn 55 leh innkuan 73 te’n thuak kha uh a, crop field 73 Acres kisia hi. Vangai block ah inn 2 kise dimdem a, innkuan 2 in thuak kha uhi.


HEADLINES:
Tuni in LS in ‘Bankruptcy Code’ pomna bawl
West Bengal Assembly election ah 84% val vote kikhia
New Delhi/Kolkata, May-5: West Bengal state ah tuni in a phase 6na banah final phase state assembly electon om a, huai ah 84% val vote kikhia hi. Assembly seat 25 ah zalentakin vote khiakna om a, vote khiak zawh ahihtanin 84.24 percent polling om chih ahi. Vote kikhiakna munte ahihleh Purba Medinipur district sungah seat 16 leh Coochbehar district ah seat 9 chih ahi. Hibangkalah, tuni in Lok Sabha Session ah ‘Bankruptcy Code/ Bill’ kichi pomna neihin om a, mipi’n phattuampih mahmah ding ua gintak ahi chi uhi.
    West Bengal State Additional CEO, Dibyendu Sarkar in tunitak a agenna ah, Coochbehar district ah vote kikhia tengteng 83.71 percent  tungzou a, Purba Medinipur ah 85.09 percent tung chi hi. Assembly seat 25 a kitelna om lakah Purba Medinipur ah seat 16 leh Coochbehar district ah seat 9 ahi chi a, buaina thupilua bangmah gending omlou ahi chi hi. Tuni a vote khe dinga voter list lak a om ahihleh mihing lakh 58 hi uh a, amau candidate 170- te lakah adeihpen telkhe ding uh a, numei candidate 18 om hi. Tualou in polling station 6,774 koihin om a, security khauh mahmah chih thu kiza hi. May 19, 2016 chiangin West Bengal state telin state tuamtuam a assembly election tawh kisai in vote simna pat hiding chihthu kiza hi.
Thudang khat kizadanin, tuni in Lok Sabha in ‘Bankruptcy Code’ kichi passed uhi. Hiai ‘Insolvency and Bankruptcy Code, 2016’ in lam tuamtuam ah mipi adingin hamphatna tundin ahi chi uhi. Abiktakin sumsin mite adingin hiai code phatuam mahmah dinga, ‘Insolvency and Bankruptcy Board of India’ in lam tuamtuam a pilvangtaka nekzonna nei, agency bawlkhia leh company tuamtuam tungdingkhiate adingin mahni kitou delhtheihna peding chi uhi. Minister of State for Finance, Jayant Sinha in agenna ah, hiai ‘code’ in gamsung a business tuamtuam bawlte adingin lam tuamtuam ah navakna thupitak ape ding chi hi. Hiai bill tawh kisai ahihleh apaisa December 21, 2015 in Lok Sabha ah luikhiak himahleh, innpi deihna bangin LS leh RS a Joint Committee khut ah piakkhiak hi a, huchi’n committee khat dinkhiak ahihnungin April 28, 2016 in amau athil muhdan uh innpi ah pekik  uh chi uhi. Lok Sabha innpi in tuni in thil omdan hoihtaka agenkhit nungin India a sumdawngmite’ adia hamphatna thupitak a om theihna ding ngimna in hiai ‘Code/Bill’ passed ahita chi’n tunitakin BJP leader P P Choudhary in gen hi.


Mizoram ah AR Commandant Col. Jasjit Singh matin om
Aizawl, May-5: Mizoram state capital Aizawl pansan a om Assam Rifles 39th battalion a commandant Colonel Jasjit Singh kichi tuni in ‘suamhat’ (robbery) ziakin matin om chih thu kiza hi. Thusuakin agendanin, highway robbery-te lakah amah (Col Singh) leng kigolhkha a, gold tawh kisai mi tuamtuam apan thagumin suhsak uh a, a sum atuat in Rs 14.5 crore vel pha ding chi uh a, hiai sana (gold) te ahihleh Myanmar apan hong kipawlut amau pawl makaih a highway a ana suhsak uh ahi chi uhi.
    Police te’n ngawhna abawldan un, Col Jasjit Singh in a naupang (jawan) te galvan hoihpipi tawh Aizawl khaw pawlam ah duty sak a, akigolhna thuk mahmah chi uhi. Apaisa December 14, 2015 nitakin Aizawl khawpi simlam ah gold biscuits tamtak mi hunkhop apan thagum in suhsak chi uhi. Gari hektu Lalnunfela in Aizawl Police station ah April 21, 2016 in FIR pelut a, 39 Assam Rifles apan galvan hoih taktak tawite’n gold biscuits 52 asum atuat in Rs 14.5 crore manding ka gari ua pan hon suhsak uh chi hi. Lalnunfela in FIR a ataklatna ah, galvantawi te’n pautamlou dingin vauna hon bawl uh a, lauhna tawh kidim ahihthu genkawmin a tawpin alawmte’n police ah thil omdan theisakin a chih dungzui ua report bawl ahihthu leng gen chih ahi.
    Police te’n thil om dan suizui ngalin, Assam Rifles jawan 8 matin omta a, battalion Commandant apan thupiak angah ziakua hibanga gamtang kha mah uh ahihdan kipuang uh chi uhi. Col Singh in ahihleh a lawyer tungtawnin anticipatory bail ngen mahleh Aizawl District and Sessions Judge Lucy Lalrinthari in nawlkhinsak a, court sung mah ah matin om kik leuleu hi. Brigadier T C Malhotra, DIG (Range), Commander, 23 Sector, Assam Rifles- Aizawl in Colonel Jasjit Singh ahihna apan suspend ahihdan tunitakin order suahngal hi. Media te’n tunitakin Brig Malhotra kiangah thil omdan dotsawm mah le uh aman tu-le-tu a dawnna bangmah pe nailou ding ahihdan gen chi uhi. Aizawl Police te’n thiltung tawh kisai in member 6 omna Special Investigation Team (SIT) khat dinkhe khin uh a, Mizoram a student Union leader poimawh mahmah bangzahhiam leng kigolhkha ahihdan theihsuah leh matin om chi uhi.


LOCAL NEWS:
T. Monglham Vangkho Silver Jubilee lawm


 

Lamka, May-5: Singngat sub.divn. a T. Monglham Vangkho kum 25 chin Silver Jubilee tuni zinglam in lopna om a, Chief Guest in Langkhanpau Guite, Chairman ADC/CCpur pang hi. Functional President in Grace Zamnu, EM, ADC/CCpur leh Guest of Honour in Khaipao Hoakip, MDC pang hi. Chief Guest in Jubilee suang hong a, Pastor Houkhoyam Haokip, YD, New Boljang in Pathian kiangah thumna in lan (dedicate) hi.
Chairman ADC/CCpur in khawsung nopna ding leh khantouhna ding in V/A-te, Saptuam-te leh Organisationte kithutak taka pangkhawm ding huai hileh khawsung nuam leh khangtou ding hi’n gen hi. Khawsung ah development works tuamtuam, MGNREGSte hoihtaka sepsuahna ding in pankhawm vek ngai hi’n gen hi. Silver kia hilou a, Golden leh Centenary lawm thei dia T. Monglham Vangkho hong om deihsakthu gen hi.


Dr Hegin in RIMS ah sem
Lamka, May-5: Dr. Hegin, MS, Ortho Surgeon in June 25, 2013 in All India PG entrance exam ah selection mu a, RIMS Hospital, Imphal ah Ortho MS (Specialist) a zilnung May 4, 2016 in a course zou hi. Aman June 2016 tan RIMS Hospital ah sem phot ding a, huai zawh in State Service lam ah sem ding hi’n kigen hi.


Mi 16 in NFSA ration card pekik
Lamka, May-5: DC office a Food & Civil Supply Deptt. ah tunitan in mi 16 te’n National Food Security Act. Ration card pomlou in pekik (surrender) uhi. Huailou in Dorcas Veng ah tuni’n mi 3 te’n NFSA ration card surrender in Agent-te kiang ah submit uh hi’n Dorcas Veng, V/A Chairman apan kiza hi. Huai banah Bungmual akipan minih in tuni in NFSA ration card pekik uhi.


Electric post in Umesh’ delhliam kha


Lamka, May-5: Guwahati apan CCpur Dist. sung Tipaimukh leh Thanlon sub divn. ah electric post ding pua gari (No. NL01-8011) apan tuni zinglam dak 10:50 velin PT Sports Complex New Lamka ah gari’ a nasemtute’n  electric post-te suahkhe lai ananna uh khuam kitan in, electric post tuk khia in gari a nasemtu Umesh Mahto (18) s/o Ganor Mahto of Dihkamayti, Vishali Dist. Bihar delhkhum kha hi. Nasemtute’n kintak in electric post hemkhia uh a, M. Gouzamang, EM/ADC gari zang in Hospital puaklut in om hi. Umesh Mahto’ taksa mun tuamtuam banah akam, abil ah sisan pawt a, aneh (lips) liam nak mahmah in khua phawklou (unconscious) a, Doctor te’n tuni mah in Shija Hospital, Imphal ah referred uhi.


Electric Pre-paid recharge ni 2 kikhak ding
Lamka, May-5: May 7, 2016 (Missionary Day) leh May 8, 2016 (Sunday) ziakin New Lamka (G) ah Electric Pre-paid recharge na mun ni 2 sung kikhak ding hi.


PWF Silver Jubilee-cum-PWF Day

 


Lamka, May-5: Lailam Veng a Zou Presbyterian Church Synod (ZPCS) ah tuni zinglam dak 10:00 in Presbyterian Women Fellowship (PWF) Silver Jubilee-cum- PWF Day lopna om hi. Huai ah  Rev. Hangpi Manlun, Bial Pastor, Lamka Dist. ZPCS in Jubilee suang hongkhia in Pathian kiang ah thumna in lan a, PWF makai mi 25 te’n Silver Jubilee lopna in dakpi 1vei chiat khen ging  uhi. Biakinn sung a biakna hun ah Rev Hangpi Manlun in Pathian thu gen a, sunnung dak 1:00 in debate leh Bible quiz kidemna om a, nitak kikhop hun ah Lalneihtluang, M.Th. in Pathian thugen in Upa Chiinsuanthang in thumna in hunkhak hi.


Free Anti-Rabies Vaccination ah ui 53 kap
 
 
 

 

Lamka, May-5: Tuibuong a Vety. & A.H. Deptt. office ah tuni zinglam dak10:30 apat in ‘World Veterinary Day 2016’ observedna in “Free Anti-Rabies Vaccination” om hi. Huai ah ui (dog) 53 aman bei in Deptt. te’n damdawi in kapsak uh a, certificate leng pia uhi. Rosangzuol Khawlum, Jt. Director, Dist. Veterinary Officer/CCpur gendan in kumlui October 2015 apat town area leh asehvel, Kangvai area, Mata, Sangaikot, Misao Lhahvomte’ cover in ui hai dalna ‘Anti-Rabies vaccination nei hi’n gen hi. Private a ui (dog) kapsak te’n Rs. 150 vel pia uh a, Office ah bel Rs. 30 kila in Certificate leng kipia hi’n gen hi. April 1, 2016 apat tunitan in Vety & AH Office, Tuibuong ah ui (dog) 262 kapsak in om hi.


Electric sawtkhop pailou ding
Lamka, May-5: Muanhuaitak akipan thutut kingahdan in Lamka-Singngat kal a electric kisia dept. in hun sawttak a siatna a zong nungun tuni in musuah uh a, tua tawh kiton in mun tamtak ah Disc Insulator tamtak kisiat ziakin a kha asim mei pailou dingin kigen hi. Tuni a dept. in a siatna zong na uah mukhia uh a, thil omdan Imphal a thuneitute kiangah tun dingin Imphal zuan uh a, huai akipan in thil omdan kithei ding a, ahihziakin bawlhoihna dingin a tompen in khakhat/khanih lut ding in kigen a, Lamka-Singngat line electric hun sawt khoptak hoihlou ding hi.


 “Itna Lamdang” album hongkhia



Lamka, May-5: Rev. Dr. Luaichinthang in tuni zinglam dak 10:30 in Hmuia Veng a Pasikhawm Restaurant ah ‘Itna Lamdang’ Gospel Music Video Album  hongkhia in Pathian kiang ah thumna in lan (dedicate) hi. ‘Itna Lamdang’ Album a la (song) bel Miss Nemsiam sak hi a, NEO Vision te’ produced hi’n kigen hi. Huai hun ah  CT. Lian Guite, MDC (New Lamka West) in target leh vision neitak a album honkhiat in lasasiamte career hoihsakthei ahihdan genkawm in naupang, tuailai leh piching-te lunglutna kibanglou ahihziak in lasiam leh album bawlte’n album 1/2 kan bawlzom zoulou uh chi hi.


Tribal area ah JCILPS in activities nei theilou ding: ATML
Lamka, May-5: All Tribal Movement of Lamka (ATML) pawlin thusuah abawlna uah Joint Committee on Inner Line Permit System (JCILPS) te’n 3 Anti-Tribal Bills ziak a dakkal 36 public curfew apuan uh singtangmite’ tenna, mun leh mual (Lamka/Tribal Area) ah JCILPS te’n activities nei theilou ding uh chi’n taklang uhi. JCILPS ziakin Three Anti-Tribal’s Bill passed hi a, huai gupna ziaka in tribal-te gam leh leitang ah JCILPS makaih in activities aneih dek uh leh chin leh ha (tooth & nail) tawh doudal hiding a, singtangmite’n JCILPS te’kithuahpihlou ding in ngen uh a, activities aneih teitei uh a, buaina a tuah uleh mawh akipuak ding uh chi’n ATML pawl in thusuah bawl uhi.


PTC Gen.HQ in kipahthu gen
Lamka, May-5: Mimbung-Sinzawl lamlian kibawl, Mimbung gam lam Tuivai lut nang portion khat (metres 400/500) vel zawhlouh a om April 30, 2016 in G. Vungkhum, Special contractor in azawh ziakin mipi theih ding in PTC GHQ in kipahthu puang uhi. Maban ah na hoih semthei zel dingin Pathian in ompih zel hen chi’n deihsakthu leng taklang uhi.


KNLF/KNO in UKLF thusuah hilhchian
Lamka, May-5: Kuki National Liberation Front (KNLF/KNO) a Information Secy Kolphe Kuki apan thusuah kimudan in Indo-Myanmar border area a Kuki hausate kikhaikhawmna BAKCA kichi UKLF pawlin hihbei sawm uh chi a, SoO ground rule bawhsiatna hi’n taklang hi. Chandel dist. ah Aimol tribe te’n 2013 ma in UKLF tawh kizom in kalsuan khawm mahle uh UKLF leadership ginatlouh ziakin tuni chiang in kizopna bei a, Aimol in Naga abelhna uh thildang ziak hilou in UKLF ziak hi’n gen hi. Chandel ADC Chairman tawh kisai sum deihtak ziaka UKLF gamtang ahihman in amaute apan mipi pilvang dingin KNLF in theisak a, Kuki society tungtang ah UKLF kigolhlou in Kuki Civil Society/Orgn te’n asep dingte uh sem le uh masawn zaw ding hi’n leng taklang a, UKLF in KSO/KIM leh pawl tuamtuamte Blanket Bandh abawlkhum ziakun hun manpha tamtak mansuah in om chi uhi. KNLF/KNO in Chandel a Tribe tuamtuamte khentuam neilou in khekhat a kalsuan khawm theihna dia panla hi’n leng Kolphe Kuki in thusuah abawlna ah taklang hi.


SUUNNA:
Thawngkholam (85) f/o Henkhogin of Gangpimual, tunitak dak 7:30 velin teknat in si a, May 6, 2016 in Gangpimual hanmual ah kivui ding hi.
Chiinkhozam @ Zamnu (52) w/o (late) Chinkhanpau of  Vengnuam South, New Lamka, tuzing dak 5:30 velin sungna in si a, sunnung in YPA hanmual, New Lamka ah kivui hi.
Mangkholun (42) h/o Ngaibiaklun of New Lamka (G) tuni nitaklam dak 3:00 velin sungna in si a, May 6, 2016 in CYA hanmual ah kivui ding hi.


IMPHAL NEWS:
Flood Control Scheme panlakna pailel
 

Imphal, May-5: Irrigation & Flood Control Department (IFCD) in state sunga tuilian apan kivenna ding in nasep panta uh a, Major and Medium Irrigation (MMI) leh Multipurpose project tuamtuam semsuah tou zel uh hi’n DIPR in taklang hi. IFCD’ MMI nuai a 10th, 11th, leh 12th FY Plan sungin Khuga Multipurpose Project, Thoubal Multipurpose Project leh Dolaithabi Barrage Project paitou lel a, huaite zawhsiang hun in loubawlna 57,470 hectare ah tui pekhe ding a, nikhat in tuidawn ding 15 million gallon (MGD) banah electricity 7.5 megawatt pekhe ding hi’n leng kigen hi. Khuga Multipurpose Project bel Planning Commission in July 1980 a sanction abawl hi a, zawhsiang ahihchiang in tuisiang dawn ding 5 million gallon leh loubawlna 14,760 hectare ah tui apiakkhiak zawh ding banah 1.5 megawatt electricity pekhe ding hi’n taklang uhi.
Tuilet (flood) apan kivenna ding in Flood Management Programme (FMP) nuaiah scheme 12 te Ministry of Water Resources (MoWR) tungtawn in Rs. 109.09 crore bei a bawl hi a, huaite lakah Nambul River a Retaining Wall bawlna leng telkha hi. NABARD  tungtawn a Rural Infrastructure Development Fund (RIDF) ah  2011-12 sungin lui lian deuhte a bawl ding Rs. 99.73 crore bei in scheme 5 sanction in om a, huaite zawhsiang a omta in Jan. 2016 tan in Rs. 81.00 crore bei hi’n gen uhi.  NEC tungtawn in scheme 7  adi’n Rs. 27.85 crore sanction hi a, huaite lakah Waishel lui a Retaining Wall pen 75% zawh hita in, March 2017 tan a zawhsiang dia lam-et hi’n DIPR apan thusuakin taklang hi.


Mass Rally khawlsak di’n ngen
Imphal, May-5: Schedule Tribe Committee pawlin May 22, 2016 a Mass Rally neih ding a sawm uh ngaihtuah thak a khawlsak ding in Aimol Villages Development Committee, Manipur (AVDC) in ngen uhi. Thusuak kimudan in Manipur ah tribe 36 om a, singtanggam ah tribe tamzaw om in, tribe tuamtuamte leng divide & rule policy tawh ST, SC, OBC leh atuamtuam a khenzak in om uhi. Singtanggam a social orgn. tuamtuam leh student pawlpi leh makaite’n ST demand omthakte adeihlouh ziakun Manipur a kituahna hihsiat ahihlouhna ding in Mass Rally khawlsak di’n ngen uhi. AVDC pawlin  CCpur ah siluang 9te vui hinailou a, central govt. in dawnna kichiantak pelou in zekaisak chi uhi. Mass Rally bawl in om leh singtang leh phaizang mite kalah kikhenzakna lian sem ding hi’n leng AVDC pawlin taklang uhi.


A/R saina in Chandel ah Medical Camp om



Chandel, May-5: HQ IGAR (South) tawh pangkhawm in 26 Sector Assam Rifles nuai a 11-Assam Rifles pawlin B Bongjang Village, Chandel dist. ah tuni’n Medical Camp sai uhi. Huai hunah khawsung leh akim-le-kiang apan mipi tamkhop paikhawm uh a, A/R pawlin athawn in damdawi pia in damloute en uhi. Mipi paikhawmte lakah damtheihna tawh kisai banah hygiene leh sanitation tawh kisai Awareness hun leng zang uhi.


JAC in Anjumante khut a si hi’n puang
Imphal, May-5: Md. Imamuddin sihna tawh kisai a kibawlkhia Joint Action Committee pawlin Anjumal te custody a soisak lup hi a puang in mawhpaih uh a, soisakna ziaka liamsa in hospital puaktun hidan in kigen mahleh sisa a hospital tut a om hizaw hi’n gen uhi. Thiltung tawh kisai Lilong mipite’n zan in meeting nei uh a, Lilong area ah Anjuman pawlte ‘Ban’ puankhum uhi.


National Hockey championship kipan
Imphal, May-5: 6th Hockey India Sub-Junior Men’s National Championship A and B division tuni’n Khuman Lampak Sports Complex ah kipan a, May 22 tan om ding hi. Manipur assembly Th Lokeshwar in Chief Guest hihna tawh hongkhia a, Ruling congress MLAKh Deven (Sekmai) leh T Mangibabu (Thanga) banah JNIMS Director Deven  leh Manipur Hockey (MH) president &former Olympian Ksh Thoiba Singh te’n uap uhi.


Manipur ah ‘Corneal Transplantation’ omta
Imphal, May-5: Manipur a Shija Hospitals and Research Institute ah Corneal Transplantation omtheita a, Transplantation of the Human Organs (Amendment) Act 2011 for Cornea Transplantation (Section 14 & 15 )  adia Shia Hospital in certificate angah dungzui in mittang (cornea) vun khek ngaite’n state dang naih louh in Manipur ah bawltheihta hi. Hiai surgery ahihleh mittang vun(Cornea) kisiate midang khat in a piak (donate) nuam leh kheksak theihna ding hi’n gen uhi.  Directorate of Health Services, Manipur in Shija Hospital kiang a registration aphalsak ziakin leng Shija Eye Care Foundation te’n Health Director tung ah kipahthu gen uh a, hiai surgery ah tunitan in mi 3 operation bawl hita un leng  Santosh Shekhar, AGM, Business Development, Shija Hospital apan thusuakin taklang hi.


Jayenta kawl a kelum hiding in gingta
Imphal, May-5: Ukhrul a sisa a kimukhia Shamalailatpam Jayenta of Nepra Company, Thoubal sihna tawh kisai, alawmpa Kharibam Rajen Singh (60) of Charangpat Maning Leikai, Thoubal leh Sagolsem Pakpi Singh (65) of Nepra Company Thoubal te’n hilhchetna bawl in kawl (gorge) a kelum hiding in gingta uh ahihdan Manipur Press Club ah tuni’n puang uhi. Kharibam Rajen gendanin Pakpi banah Rajen tawh Lunghar Village ah singsat ding in kuan uh a, sawtlou nung in Rajen a omna ua pan gamlalou ah amah vuak in vapai  a, azingchiang in gamlak a kawl ah aluang mukhia uh chi hi. Thiltung tawh kisai suizuina pailel pen kithuahpih ding uh ahihdan leng gen uhi.


TUNI THUPI:
“Huaiziakin ken leng nakpi a hon limsakin ka honkhena; na khelhnate ziakin ka hon hihgam ahi.” - Mika 6:13


EDITORIAL:
1990s hun lutnawn ding ibang ua!
Kipimangna i chih bang?
Leitung gam tuamtuam ah kipimangna (kidnapping) tawh kisai thuthak ahikei a, a omsa, a omlel leh hong om toutou ding ahi hi. Bangziaka thagum a hibang kipimangna om sek hiam chih a kibulphuhna (root cause) sukhiak hun mahmah a, Manipur state ah apaisa 1990s hun apan in hibang thil hong uang diakin kilang a, tua zomin unau melhaih hun hong om a, 2000 kum pelvel apat in hong kipan nawnin kilang hi.
    Thagum a kipimangna kichi thil poitak ahi a, mi pimangtute’ adingin nuam mahleh pimang a om innkuante adingin nuam lawkhollou maithei hi. Mi pimangtute’n pimang a omte hoihtakin nek-le-dawn banah a damtheihna utawh kisai treatment hoihtak pekha maithei uh a, himahleh, pimang a om innkuante adingin zan ihmut mawhna suaksak mahmah ding uhi. Pimang a omte tatkhiakna dingin sum (ransom money) bangzah ki-demand sek uhiam chih itheikei a, hibang thil Lamka khawpi ah tung mun law mahmah a, siangtaka genin security forces tuamtuamte’ banah police leh helpawl (UPF leh KNO) lamin leng a etkai uh kisam mahmah hi. KNO leh UPF bel Government of India tawh Suspension of Agreement (SoO) nei hi uh a, amau operational area ah zalentak a gang type sim a hong gamtangte amatkhiak uh poimawh mahmahta hi.
    Government lampang i et chiang in Army line in Intelligence Department hoihtak neidinga, Police inleng tuabang mah neidinga, huai kawmkalah, SIB in role liantak neikha maithei lai hi. SoO nuai a om helpawlte leh GoI in kitheihsiamna hoihtak aneih nung un zalentak a galvantawi a mi pimang chih bangchidan a om theithei ding hiam chih ngaihsuthuai petmah a, tua ziakin, government agency tuamtuamte leh helpawl lamte’n leng khut ahon lik zek uh poimawh mahmah sakna om hi. Huchi hikeileh, denchiangin, iki pimangsekna ziak un thil deihhuailoupi hong om khak ding lauhuai hi.
    1990s hunin Lamka zang ah kipimang kichi thang mahmah a, phetlou in Mahajon tuamtuam kiangah sum demand bawl chihte hong uang mahmah a, huai in thu hoihsang in thusia hontun zaw a, atawpin sisan-naisan tanpha kisuahna hontung hi. Mi khat i pimangna ziaka sum a lakh a sim muh lawh kichi lawk law mahmah a, government in a kham ‘Chingpi’ kapsang mahin leng lawk zaw hi. Himahleh, tuhun pen Manipur singtangmite’ adia politics vai a buaina tawpkhawk tuah hun ahihlai a galvan zanga kipimang chih pen singtangmite simmawhna hiam chih bangin ngaihsut theiha, mi pimangtute’n hihkhial kha mahmah thei uhi. Sum-le-pai deih a dangtak ihihleh kamsiam in kingenve ni, huchi lou a, zi leh tate banah mipi supatau a igamtat leh denchiangin mimal mahmah in a pap kipaw thei dinmun ah ki-om hi.
    Special Contractor Mangbeldam nasemtute pimang ahihnung in tu in T. Lala Vaiphei nasemtute mah pimangin om a, huaikal ah MLA Ginsuanhao adia PRO Biabiak pimang in omlai hi. Bang tupna nei a kipimang ihia? Sum-le-pai deihtakna ziaka kipimang ihi hia ahihkeileh thudang ziaka kipimang ihi hia chihte theih hilou hi. 1990s hun a ikipimangna hun vengvung uh hongtun nawnkhak ding thil lauhuai mahmah ahi hi. Pimang a om innkuante’ patauh genlouhin, mipi mahmah leng patau ahihmanin hibang thilte chintam hetlouh deihhuai a, banghiam kitheihsiamlouhna om ahih tak leleng kam agenthawh a hihven theihna lampi ngaihtuah hoihlou ding hiam chih ngaihtuahna mi tamtakin nei hi.
    Athudan in security tawh kisai leng chau deuh adiam chih theihin om a, bangchidan a zalentaka mi tuamtuam pimang a om sekthei diam chih in lungsim hon dawt mahmah hi. Kidnapped case tungtang bangleng kuahiam in Whatsapp group ah hiai mun/ huai mun delhni chi’n hon post kheleh tuailaite’n kidelhhuan ding khop in omsa hi uh a, i gam dinmun hiaidan himai lel hi. Kipil hia, kihai hia chih zaw theikhang! Bangteng hileh, sum ideih leh kamsiam in kingen zaw in, zi leh tate, innsung mite leh mipi vantang hih patauthei dingin kuamah omnawn keile hang deihhuai mahmah hi.